(1)

Sabiex jiġu stabbiliti l-allokazzjonijiet annwali tal-emissjonijiet tal-Istati Membri għall-perjodu mill-2021 sal-2030 fis-setturi fil-kamp ta’ applikazzjoni tar-Regolament (UE) 2018/842, il-kalkoli rilevanti jeħtieġ jiġu bbażati fuq l-aktar data preċiża disponibbli. Għalhekk, l-emissjonijiet ta’ gassijiet serra totali li jaqgħu fil-kamp ta’ applikazzjoni tar-Regolament (UE) 2018/842 u ppreżentati mill-Istati Membri lill-Kummissjoni skont l-Artikolu 7 tar-Regolament (UE) Nru 525/2013 tal-Parlament Ewropew u tal-Kunsill (2) fis-sena 2020 huma stabbiliti fir-rieżami komprensiv li ġej. Dak ir-rieżami twettaq mill-Kummissjoni, assistita mill-Aġenzija Ewropea għall-Ambjent, f’konformità mal-Artikolu 19(1) tar-Regolament (UE) Nru 525/2013 u fih data rieżaminata tal-emissjonijiet ta’ gassijiet serra għas-snin 2005 u 2016 sal-2018 f’konformità mal-Artikolu 4(3) tar-Regolament (UE) 2018/842.

(2)

Data preċiża bħad-data rieżaminata dwar l-inventarju, hija meħtieġa fir-rigward tal-emissjonijiet ta’ gassijiet serra minn installazzjonijiet stazzjonarji fil-kamp ta’ applikazzjoni tad-Direttiva 2003/87/KE tal-Parlament Ewropew u tal-Kunsill (3), li tistabbilixxi sistema għall-iskambju ta’ kwoti ta’ emissjonijiet ta’ gassijiet serra ġewwa l-Unjoni (“EU ETS”) kif derivat mir-Reġistru tal-Unjoni tal-emissjonijiet verifikati ta’ dawk l-installazzjonijiet (“ir-Reġistru”). Meta l-emissjonijiet tal-EU ETS tal-2005 fir-Reġistru ma jikkorrispondux mal-kamp ta’ applikazzjoni attwali tad-Direttiva 2003/87/KE jew tar-Regolament (UE) 2018/842, id-Deċiżjonijiet tal-Kummissjoni rilevanti (4) adottati skont id-Direttiva 2003/87/KE jew id-Deċiżjoni Nru 406/2009/KE tal-Parlament Ewropew u tal-Kunsill (5), kif ukoll il-pjanijiet ta’ allokazzjoni nazzjonali u l-korrispondenza uffiċjali bejn il-Kummissjoni u l-Istati Membri rispettivi, jintużaw biex tiġi pprovduta data komplementari dwar l-emissjonijiet.

(3)

Sabiex tiġi żgurata l-konsistenza tal-allokazzjonijiet annwali ddeterminati tal-emissjonijiet mal-emissjonijiet ta’ gassijiet serra rapportati għal kull sena tal-perjodu mill-2021 sal-2030, l-allokazzjonijiet annwali tal-emissjonijiet tal-Istati Membri jeħtieġ jiġu kkalkulati f’ekwivalenti għas-CO2 billi jiġu applikati l-istess valuri għall-potenzjali tat-tisħin globali, jiġifieri l-valuri stabbiliti fil-Grupp Intergovernattiv għall-ħames Rapport ta’ Valutazzjoni dwar it-Tibdil fil-Klima u elenkati fl-Anness tar-Regolament Delegat tal-Kummissjoni (UE) 2020/1044 (6).

(4)

Metodoloġija b’ħames passi tapplika biex l-allokazzjoni annwali tal-emissjonijiet għal kull Stat Membru għas-sena 2030 tiġi kkalkulata f’konformità mat-tnaqqis tal-emissjonijiet ta’ gassijiet serra fl-2030 fir-rigward tal-livelli tagħhom tal-2005 speċifikati fl-Anness I tar-Regolament (UE) 2018/842.

(5)

L-ewwel nett, jiġi ddeterminat il-valur tal-emissjonijiet ta’ gassijiet serra tal-2005. Il-kwantità ta’ emissjonijiet ta’ gassijiet serra tal-installazzjonijiet stazzjonarji fil-kamp ta’ applikazzjoni tad-Direttiva 2003/87/KE li eżistew fl-2005, titnaqqas mit-total rieżaminat ta’ emissjonijiet ta’ gassijiet serra għas-sena 2005. Għall-Istati Membri li ilhom jipparteċipaw fl-EU ETS minn wara l-2005, tapplika l-kwantità ta’ emissjonijiet tal-2005 kif iddeterminata fid-Deċiżjoni 2013/162/UE. L-estensjoni tal-kamp ta’ applikazzjoni tad-Direttiva 2003/87/KE fl-2013 hija riflessa bil-kalkolu tal-valur ekwivalenti tal-2005 tal-aġġustament korrispondenti tal-allokazzjoni annwali tal-emissjonijiet għall-2020 f’konformità mad-Deċiżjoni Nru 406/2009/KE kif stabbilit fid-Deċiżjoni ta’ Implimentazzjoni 2013/634/UE. Kif meħtieġ mill-Artikolu 10(1)(a) tar-Regolament (UE) 2018/842, il-kalkolu jirrifletti wkoll it-tibdil fil-kopertura tal-installazzjoni bejn l-2005 u l-2012, bl-istess mod kif stabbilit fid-Deċiżjoni (UE) 2017/1471.

(6)

It-tieni nett, l-allokazzjoni annwali tal-emissjonijiet għal kull Stat Membru għas-sena 2030 hija kkalkulata billi jiġi applikat il-perċentwal stabbilit fl-Anness I tar-Regolament (UE) 2018/842 għall-valur tal-emissjonijiet ikkalkulat għall-2005.

(7)

It-tielet nett, il-kwantità medja ta’ emissjonijiet ta’ gassijiet serra fil-kamp ta’ applikazzjoni tar-Regolament (UE) 2018/842 fis-snin 2016, 2017 u 2018 ta’ kull Stat Membru hija kkalkulata billi titnaqqas il-kwantità medja tal-emissjonijiet ta’ gassijiet serra verifikati minn installazzjonijiet stazzjonarji fil-kamp ta’ applikazzjoni tad-Direttiva 2003/87/KE fis-snin 2016, 2017 u 2018 fl-Istat Membru rispettiv u l-emissjonijiet tas-CO2 tal-avjazzjoni domestika mit-total rieżaminat tiegħu ta’ emissjonijiet ta’ gassijiet serra għas-snin 2016, 2017 u 2018.

(8)

Ir-raba’ nett, l-allokazzjonijiet annwali tal-emissjonijiet għal kull Stat Membru għas-snin 2021 sa 2029 huma kkalkulati. Huma stabbiliti fuq bażi ta’ trajettorja lineari li tibda fil-kwantità medja għas-snin 2016, 2017 u 2018 fil-ħames parti minn kull tnax tad-distanza mill-2019 sal-2020 u tispiċċa bl-allokazzjoni annwali tal-emissjonijiet tagħha għas-sena 2030. Għall-Greċja, il-Kroazja u l-Ungerija, it-trajettorja lineari tibda fl-2020 peress li din tirriżulta f’allokazzjoni iktar baxxa għal dawk l-Istati Membri.

(9)

Fl-aħħar nett, il-valuri li jirriżultaw tal-allokazzjonijiet annwali tal-emissjonijiet huma aġġustati. Il-kwoti tal-EU ETS relatati mal-emissjonijiet ta’ gassijiet serra minn installazzjonijiet stazzjonarji esklużi mill-EU ETS f’konformità mal-Artikolu 27 tad-Direttiva 2003/87/KE, kif notifikati mill-Istati Membri lill-Kummissjoni skont dak l-Artikolu, u li b’hekk huma esklużi mil-limitu massimu tal-Unjoni skont dik id-Direttiva mill-2021 ’il quddiem, għalhekk jaqgħu fil-kamp ta’ applikazzjoni tar-Regolament (UE) 2018/842. Sussegwentement, il-kwantitajiet imnaqqsa mil-limitu jiżdiedu mal-allokazzjonijiet annwali tal-emissjonijiet tal-Istati Membri rilevanti għall-perjodu mill-2021 sal-2030. L-ammont tal-aġġustament speċifikat fl-Anness IV tar-Regolament (UE) 2018/842 jiżdied mal-allokazzjoni annwali tal-emissjonijiet għas-sena 2021 għal kull Stat Membru elenkat f’dak l-Anness.

(10)

Il-kwantitajiet massimi totali għal ċerti Stati Membri wara t-tnaqqis tal-kwoti tal-EU ETS li jistgħu jitqiesu għall-konformità ta’ Stat Membru bejn l-2021 u l-2030 f’konformità mal-Artikolu 9 tar-Regolament (UE) 2018/842, huma ddeterminati bl-applikazzjoni tal-perċentwali notifikati mill-Istati Membri skont l-Artikolu 6(3) ta’ dak ir-Regolament għall-valuri tal-valuri kkalkulati ta’ emissjonijiet ta’ gassijiet serra għall-2005.

(11)

Il-miżuri previsti f’din id-Deċiżjoni huma f’konformità mal-opinjoni tal-Kumitat dwar it-Tibdil fil-Klima,