(1)

Il-Konvenzjoni dwar il-konservazzjoni tal-ħajja ferjali Ewropea u tal-abitati naturali (“il-Konvenzjoni”) ġiet konkluża mill-Unjoni bid-Deċiżjoni tal-Kunsill 82/72/KEE (1) u daħlet fis-seħħ fl-1 ta’ Settembru 1982.

(2)

Skont il-Konvenzjoni, il-Kumitat Permanenti stabbilit mill-Konvenzjoni (“il-Kumitat Permanenti”) jista’ jadotta emendi għall-Artikoli 13 sa 24 tal-Konvenzjoni li jiġu ppreżentati lill-Kumitat tal-Ministri tal-Kunsill tal-Ewropa (“il-Kumitat tal-Ministri”) għall-approvazzjoni u, wara, lill-Partijiet Kontraenti (“Partijiet”) biex jiġu aċċettati.

(3)

Skont il-Konvenzjoni, il-Kumitat Permanenti huwa responsabbli biex isegwi l-applikazzjoni tal-Konvenzjoni u jista’, b’mod partikolari, jagħmel kwalunkwe proposta biex tittejjeb l-effettività tal-Konvenzjoni.

(4)

Matul l-40 laqgħa tiegħu, mit-30 ta’ Novembru sal-4 ta’ Diċembru 2020, il-Kumitat Permanenti għandu jadotta deċiżjonijiet dwar l-emendar tal-Konvenzjoni sabiex jiġu introdotti klawżoli finanzjarji u dwar l-istabbiliment ta’ ftehim parzjali estiż dwar il-fond għall-implimentazzjoni tal-Konvenzjoni.

(5)

Huwa xieraq li tiġi stabbilita l-pożizzjoni li għandha tittieħed f’isem l-Unjoni fil-Kumitat Permanenti, billi d-deċiżjonijiet tiegħu huma atti li għandhom effetti legali.

(6)

Is-Segretarjat tal-Konvenzjoni (is-“Segretarjat”) ippreżenta proposta biex tiġi emendata l-Konvenzjoni u jiġi introdott mekkaniżmu finanzjarju li permezz tiegħu l-Kumitat Permanenti jiddetermina skala ta’ kontribuzzjonijiet finanzjarji obbligatorji mill-Partijiet biex jikkumplimentaw l-allokazzjoni tal-baġit ordinarju tal-Kunsill tal-Ewropa.

(7)

Skont il-Konvenzjoni, l-emendi għall-Konvenzjoni għandhom l-ewwel jiġu approvati mill-Kumitat tal-Ministri u sussegwentement jidħlu fis-seħħ għall-Partijiet kollha fit-tletin jum wara li l-Partijiet kollha jkunu nnotifikaw l-aċċettazzjoni tagħhom.

(8)

Is-Segretarjat ippreżenta wkoll proposta biex tissaħħaħ il-kooperazzjoni intergovernattiva għall-implimentazzjoni tal-Konvenzjoni permezz tal-istabbiliment ta’ ftehim parzjali estiż, li jkun jinkludi kontribuzzjoni finanzjarja obbligatorja għall-Partijiet għal dak il-ftehim parzjali estiż.

(9)

Skont l-Istatut tal-Kunsill tal-Ewropa u tal-Gwida tal-Kumitat tal-Ministri tal-Kunsill tal-Ewropa dwar il-Proċeduri u l-Metodi ta’ Ħidma, wara deċiżjoni mill-Kumitat Permanenti, il-ftehim parzjali estiż propost ser jidħol fis-seħħ għall-partijiet kollha għal dak il-ftehim parzjali estiż wara l-adozzjoni mill-Kumitat tal-Ministri b’maġġoranza ta’ żewġ terzi tar-Rappreżentanti li jitfgħu vot u maġġoranza tar-Rappreżentanti intitolati li jieħdu sehem fil-Kumitat tal-Ministri u wara li jintlaħaq limitu minimu ta’ firmatarji.

(10)

Ladarba jiġi adottat il-ftehim parzjali estiż propost, ser ikun f’idejn il-Partijiet għall-Konvenzjoni li jiddeċiedu jekk ser isirux parti għalih.

(11)

Din id-Deċiżjoni hija mingħajr preġudizzju għal kwalunkwe deċiżjoni futura tal-Kunsill dwar l-adegwatezza tal-Unjoni li ssir parti għall-ftehim parzjali estiż propost.

(12)

Meta jitqies it-tnaqqis fil-finanzjament ipprovdut permezz tal-kontribuzzjoni ordinarja tal-Kunsill tal-Ewropa, kif ukoll it-tnaqqis fil-kontribuzzjonijiet volontarji mill-Partijiet, hemm ħtieġa urġenti li jiġi stabbilit sors sigur u ta’ min joqgħod fuqu ta’ finanzjament għall-funzjonament tal-Konvenzjoni.

(13)

L-emendar tal-Konvenzjoni biex jiġi introdott mekkaniżmu finanzjarju hija allinjata ma’ kif jiġu ffinanzjati ftehimiet ambjentali multilaterali oħra u tiżgura kontribuzzjoni ġusta mill-Partijiet kollha. Madankollu, it-test tal-emenda kif propost mis-Segretarjat iħalli inċertezza fir-rigward tal-mekkaniżmu finanzjarju li għandu jiġi stabbilit, b’mod partikolari fir-rigward tad-distinzjoni bejn il-baġits ewlenin u dawk programmatiċi, u fir-rigward tal-livell ta’ kontribuzzjonijiet li għandhom jiġu meħtieġa.

(14)

L-appoġġ mill-Unjoni għall-emendar tal-Konvenzjoni biex jiġi introdott mekkaniżmu finanzjarju jkun soġġett għall-proċedura stabbilita fl-Artikolu 218, paragrafi 2 sa 4 tat-Trattat dwar il-Funzjonament tal-Unjoni Ewropea.

(15)

It-tul taż-żmien konsiderevoli meħtieġ għan-negozjar u d-dħul fis-seħħ tal-emendar għall-Konvenzjoni jindika l-ħtieġa għal soluzzjoni finanzjarja aktar immedjata biex il-Konvenzjoni tkun tista’ tkompli b’mod effettiv fl-interim. Dik il-ħtieġa tkun issodisfata permezz tal-ftehim parzjali estiż propost.

(16)

Għalhekk, il-pożizzjoni tal-Kunsill jenħtieġ li tkun li tipproponi mozzjoni biex tipposponi d-deċiżjoni dwar l-emendar tal-Konvenzjoni u li tappoġġa l-istabbiliment ta’ ftehim parzjali estiż,