ANNESS

Kriterji tal-Ekotikketta tal-UE għall-għoti tal-Ekotikketta tal-UE għall-unitajiet tal-wiri elettroniċi

QAFAS

Għanijiet tal-kriterji

Il-kriterji tal-Ekotikketta tal-UE huma mmirati lejn l-aqwa unitajiet tal-wiri elettroniċi, f’termini ta’ prestazzjoni ambjentali. Il-kriterji jiffukaw fuq l-impatti ambjentali ewlenin assoċjati maċ-ċiklu tal-ħajja ta’ dawn il-prodotti u jippromwovu l-aspetti tal-ekonomija ċirkolari.

B’mod partikolari, il-kriterji għandhom l-għan li jippromwovu prodotti li huma effiċjenti fl-użu tal-enerġija, li jistgħu jissewwew, li jistgħu jiġu żarmati faċilment (sabiex jiġi ffaċilitat l-irkupru tar-riżorsi mir-riċiklaġġ fi tmiem il-ħajja utli tagħhom), li għandhom kontenut minimu riċiklat u li jista’ jkun fihom biss ammont limitat ta’ sustanzi perikolużi.

Għal dan l-għan, il-kriterji:

—	jistabbilixxu rekwiżiti dwar il-konsum tal-enerġija li jitolbu l-aqwa klassijiet disponibbli tal-effiċjenza enerġetika u jistabbilixxu limiti dwar il-konsum massimu tal-enerġija fil-modalità mixgħul;

—	jistabbilixxu rekwiżiti għall-ġestjoni tal-enerġija;

—	jirrikonoxxu u jippremjaw il-prodotti b’użu ristrett ta’ sustanzi perikolużi;

—	jistabbilixxu rekwiżiti biex jiġi żgurat kontenut minimu ta’ plastik riċiklat fil-fażi ta’ wara l-konsumatur;

—	jistabbilixxu rekwiżiti biex jiġi żgurat li l-prodott jista’ jissewwa permezz ta’ disinn xieraq tal-prodott, u d-disponibbiltà ta’ manwal dwar it-tiswija, ta’ informazzjoni dwar it-tiswija u ta’ spare parts;

—	jistabbilixxu rekwiżiti biex tiġi żgurata ġestjoni xierqa ta’ tmiem il-ħajja tal-prodotti u jimponu l-obbligu li tiġi provduta informazzjoni biex tittejjeb ir-riċiklabbiltà, tiġi limitata l-għażla tal-materjali u jiġi promoss disinn faċli għaż-żarmar;

—	jistabbilixxu rekwiżiti dwar ir-responsabbiltà soċjali korporattiva, jindirizzaw il-kundizzjonijiet tax-xogħol matul il-manifattura u l-akkwist tal-landa, tat-tantalju, tat-tungstenu u tad-deheb minn żoni affettwati minn kunflitti u b’riskju għoli.

L-importanza li l-unitajiet tal-wiri elettroniċi jintużaw u jintremew b’mod korrett biex iħallu inqas impatt tul iċ-ċiklu tal-ħajja tagħhom hija indirizzata wkoll bl-istabbiliment ta’ rekwiżiti dwar l-istruzzjonijiet tal-utent u l-informazzjoni tal-konsumatur.

Il-kriterji għall-għoti tal-Ekotikketta tal-UE għall-“unitajiet tal-wiri elettroniċi” huma kif ġej:

1.	Konsum tal-enerġija

1.1	Iffrankar tal-enerġija

1.2	Ġestjoni tal-enerġija

2.	Sustanzi ristretti

2.1	Sustanzi esklużi jew limitati

2.2	Attivitajiet li jnaqqsu l-emissjonijiet ta’ gassijiet fluworurati b’effett ta’ serra (GHG) fil-katina tal-provvista

3.	Possibbiltà ta’ tiswija u garanzija kummerċjali

4.	Ġestjoni ta’ tmiem il-ħajja

4.1	Għażla tal-materjal u informazzjoni biex tittejjeb ir-riċiklabbiltà

4.2	Disinn għaż-żarmar u r-riċiklaġġ

5.	Responsabbiltà soċjali korporattiva

5.1	Kundizzjonijiet tax-xogħol matul il-manifattura

5.2	Akkwist ta’ “minerali mingħajr kunflitt”

6.	Kriterji ta’ informazzjoni

6.1	Informazzjoni għall-utenti

6.2	Informazzjoni li tidher fuq l-Ekotikketta

Valutazzjoni u verifika: Ir-rekwiżiti speċifiċi ta’ valutazzjoni u verifika huma indikati f’kull kriterju.

Meta l-applikant ikun meħtieġ jipprovdi dikjarazzjonijiet, dokumentazzjoni, analiżijiet, rapporti tat-testijiet, jew evidenza oħra biex juri l-konformità mal-kriterji, dawn jistgħu joriġinaw mill-applikant u/jew mill-fornitur(i) tiegħu/tagħha u/jew mill-fornitur(i) tagħhom, eċċ., kif xieraq.

Il-korpi kompetenti għandhom jirrikonoxxu preferenzjalment l-attestazzjonijiet li jinħarġu mill-korpi akkreditati f’konformità mal-istandard armonizzat rilevanti għal-laboratorji tal-ittestjar u l-kalibrazzjoni u l-verifiki minn korpi li huma akkreditati f’konformità mal-istandard armonizzat rilevanti għall-korpi li jiċċertifikaw il-prodotti, il-proċessi u s-servizzi.

Fejn xieraq, jistgħu jintużaw metodi ta’ ttestjar oħrajn minbarra dawk indikati għal kull kriterju, jekk il-korp kompetenti li jivvaluta l-applikazzjoni jaċċetta l-ekwivalenza tagħhom.

Fejn xieraq, il-korpi kompetenti jistgħu jeħtieġu dokumentazzjoni ta’ appoġġ u jistgħu jwettqu verifiki indipendenti jew spezzjonijiet fuq il-post biex jivverifikaw il-konformità ma’ dawn il-kriterji.

Bidliet fil-fornituri u fis-siti tal-produzzjoni li jappartjenu għall-prodotti li għalihom tkun ingħatat l-Ekotikketta tal-UE għandhom jiġu nnotifikati lill-korpi kompetenti, flimkien ma’ informazzjoni ta’ sostenn li tippermetti l-verifika tal-konformità kontinwa mal-kriterji.

Bħala prerekwiżit, l-unità tal-wiri elettronika għandha tissodisfa r-rekwiżiti legali applikabbli kollha tal-pajjiż jew tal-pajjiżi fejn il-prodott jitqiegħed fis-suq. L-applikant għandu jiddikjara l-konformità tal-prodott ma’ dan ir-rekwiżit.

Għandhom japplikaw id-definizzjonijiet li ġejjin:

(1)	“Kontroll awtomatiku tal-luminożità” (“ABC”, Automatic Brightness Control) tfisser il-mekkaniżmu awtomatiku li, meta jkun attivat, jikkontrolla l-luminożità tal-unità tal-wiri elettronika bħala funzjoni tal-livell tad-dawl ambjentali li jdawwal il-parti ta’ quddiem tal-unità tal-wiri;

(2)

“prestabbilit” li tirreferi għal konfigurazzjoni speċifika, tfisser il-valur ta’ karatteristika speċifika kif ġiet ikkonfigurata fil-fabbrika u disponibbli meta l-klijent juża l-prodott għall-ewwel darba u wara li jagħmel azzjoni li treġġa’ lura l-konfigurazzjonijiet tal-fabbrika, jekk il-prodott jippermetti dan;

(3)	“fażi taż-żarmar” tfisser operazzjoni li tispiċċa bit-tneħħija ta’ part jew b’bidla ta’ għodda;

(4)	“fast start” jew “quick start” tfisser funzjoni mtejba ta’ riattivazzjoni li kapaċi ttemm it-tranżizzjoni f’“modalità mixgħul” f’ħin iqsar minn dak tal-funzjoni normali ta’ riattivazzjoni;

(5)

“Medda Dinamika Qawwija (HDR, High Dynamic Range)” tfisser metodu biex jiżdied il-proporzjon ta’ kuntrast tal-immaġini ta’ unità tal-wiri elettronika billi tintuża metadata ġġenerata matul il-ħolqien tal-materjal tal-video u li ċ-ċirkwiti ta’ ġestjoni tal-unità tal-wiri jinterpretaw biex jipproduċu proporzjon ta’ kuntrast u apparenza tal-kulur ipperċepiti minn għajn il-bniedem aktar realistiku minn dak miksub minn viżwalizzazzjonijiet mhux kompatibbli mal-HDR;

(6)	“LCD” tfisser display tal-kristalli likwidi;

(7)

“luminanza” tfisser il-kejl fotometriku tal-intensità luminuża għal kull unità tal-erja tad-dawl li tivvjaġġa f’direzzjoni partikolari, espressa f’unitajiet ta’ candelas għal kull metru kwadru (cd/m2). Sikwit jintuża t-terminu luminożità biex tiġi kwalifikata b’mod suġġettiv il-luminanza ta’ unità tal-wiri;

(8)

“konfigurazzjoni normali” jew “konfigurazzjoni dar”, “modalità standard”, jew, għat-televiżjonijiet, “modalità dar” tfisser konfigurazzjoni tal-iskrin tal-wiri li hija rrakkomandata lill-utent aħħari mill-manifattur mill-menu inizjali tas-set-up jew mill-konfigurazzjoni tal-fabbrika li l-unità tal-wiri elettronika għandha għall-użu maħsub tal-prodott. Din trid tipprovdi l-aħjar kwalità għall-utent aħħari f’ambjent tipiku domestiku jew ta’ uffiċċju. Il-konfigurazzjoni normali hija l-kundizzjoni li fiha jitkejlu l-valuri ddikjarati għall-modalità mitfi, standby, standby man-netwerk u fil-modalità mixgħul;

(9)	“modalità mixgħul” jew “modalità attiv” tfisser kundizzjoni li fiha l-unità tal-wiri elettronika tkun imqabbda ma’ sors tal-enerġija, tkun ġiet attivata, u tkun qed tipprovdi funzjoni tal-wiri waħda jew aktar tagħha;

(10)	“għodod proprjetarji” huma għodod li mhumiex disponibbli għax-xiri mill-pubbliku ġenerali jew li għalihom, kwalunkwe privattiva applikabbli mhijiex disponibbli għal liċenzja skont termini ġusti, raġonevoli u mhux diskriminatorji;

(11)	“riċiklabbiltà” tfisser il-kapaċità ta’ prodott li jiġi riċiklat fi tmiem il-ħajja tiegħu, abbażi tal-prattiki attwali;

(12)	“spare parts” huma l-komponenti jew l-assemblaġġi kollha li jistgħu potenzjalment ifallu u/jew li huma mistennija li jeħtieġu sostituzzjoni fil-ħajja tas-servizz tal-prodott. Parts oħrajn li għandhom ħajja li normalment taqbeż il-ħajja tipika tal-prodott mhumiex spare parts;

(13)	“UHD” tfisser unità tal-wiri elettronika li tista’ tirċievi sinjal tal-UHD kif definit fir-Rakkomandazzjoni tal-Unjoni Internazzjonali tat-Telekomunikazzjoni (ITU-R) BT.2020, u li turih fuq l-iskrin f’riżoluzzjonijiet ta’ 3840 × 2160 (UHD-4K) u 7680 × 4320 (UHD-8K).

KRITERJI TAL-EKOTIKKETTA TAL-UE

Kriterju 1 — Konsum tal-enerġija

1.1   Iffrankar tal-enerġija

(a)

L-unitajiet tal-wiri elettroniċi għandhom jissodisfaw l-ispeċifikazzjonijiet tal-Indiċi tal-Effiċjenza Enerġetika stabbiliti fl-Anness II tar-Regolament Delegat (UE) 2019/2013 għall-klassijiet tal-effiċjenza enerġetika speċifikati kif ġej jew, alternattivament għal klassi aktar effiċjenti fl-użu tal-enerġija. Sal-31 ta’ Marzu 2021: (i) Il-klassi tal-effiċjenza enerġetika E (F għar-riżoluzzjonijiet tal-UHD u ogħla) għat-televiżjonijiet; (ii) Il-klassi tal-effiċjenza enerġetika D (F għar-riżoluzzjonijiet tal-UHD u ogħla) għall-monitors; (iii) Il-klassi tal-effiċjenza enerġetika F għall-unitajiet tal-wiri tas-sinjalar diġitali. Wara l-31 ta’ Marzu 2021: Waħda miż-żewġ klassijiet tal-enerġija ewlenin li għandhom mudelli rreġistrati (1) taħt il-bażi tad-data tal-prodotti (2) skont l-Artikolu 12 tar-Regolament (UE) 2017/1369 (3) għal riżoluzzjoni speċifika u t-tip ta’ wiri (televiżjonijiet, monitors jew wiri tas-sinjalar) fid-data tas-sottomissjoni tal-applikazzjoni tal-Ekotikketta tal-UE. Nota : ladarba jingħata l-ekotikketta, l-applikant għandu jagħti prova tal-konformità ma’ waħda miż-żewġ klassijiet tal-enerġija ewlenin li għandhom mudelli rreġistrati  (1) mill-inqas kull sentejn matul il-perjodu ta’ validità tal-liċenzja tiegħu.

(b)	Id-domanda massima għall-enerġija fil-modalità mixgħul f’konfigurazzjoni normali għandha tkun ≤ 64 W (125W għall-unitajiet tal-wiri tas-sinjalar diġitali, għal riżoluzzjonijiet tal-UHD u ogħla).

Valutazzjoni u verifika : Għar-rekwiżit (a), l-applikant għandu jissottometti rapport tat-test għall-unità tal-wiri elettronika mwettaq f’konformità mal-metodi tal-kejl indikati fl-Anness IV tar-Regolament Delegat (UE) 2019/2013. Barra minn hekk, għandha tiġi pprovduta evidenza tal-klassijiet ewlenin fuq il-bażi tad-data EPREL (b’mudelli disponibbli għar-riżoluzzjoni u t-tip ta’ mudell ta’ wiri li jridu jingħataw ekotikketta) fid-data tal-applikazzjoni u mill-inqas kull sentejn matul il-perjodu ta’ validità tal-liċenzja tagħha. Għar-rekwiżit (b), l-applikant għandu jissottometti rapport tat-test għall-unità tal-wiri elettronika mwettaq f’konformità mal-metodi tal-kejl u l-kundizzjonijiet indikati fil-punti 1 u 2 tal-Anness III tar-Regolament (UE) 2019/2021.

Nota

:

Għall-unitajiet tal-wiri li jkollhom il-karatteristika HDR, il-kejl tal-konsum tal-enerġija fil-modalità mixgħul sabiex jiġu ssodisfati r-rekwiżiti (a) u (b) għandu jsir fil-konfigurazzjoni normali, f’medda dinamika standard (SDR).

1.2   Ġestjoni tal-enerġija

(a)	Kontroll Manwali tal-Luminożità: l-unità tal-wiri elettronika għandha tippermetti lill-utent sabiex jaġġusta manwalment l-intensità tar-retroilluminazzjoni;

(b)

Kontroll awtomatiku tal-luminożità (ABC, Automatic Brightness Control): l-unitajiet tal-wiri elettroniċi bil-kontroll awtomatiku tal-luminożità (ABC) għandhom jissodisfaw ir-rekwiżiti biex jikkwalifikaw għal tnaqqis ta’ 10 % f’Pmkejla deskritt fl-Anness II tar-Regolament (UE) 2019/2021 (il-Punt 1 tat-Taqsima B);

(c)

Funzjonalità quick start: wara li tiġi attivata l-funzjonalità quick start (jekk l-apparat ikollu din il-karatteristika), l-apparat jaqleb awtomatikament lura għall-modalità standby jew għall-modalità mitfi bħala konfigurazzjoni prestabbilita mhux aktar tard minn sagħtejn wara l-aħħar attività tal-utent.

Valutazzjoni u verifika : L-applikant għandu jipprovdi dikjarazzjoni li tiċċertifika li l-apparat intbagħat bil-konfigurazzjonijiet tal-ġestjoni tal-enerġija msemmija hawn fuq.

Għar-rekwiżit (b) l-applikant għandu jissottometti rapport tat-test għall-unità tal-wiri elettronika li juri li l-kundizzjonijiet deskritti ġew issodisfati. Il-kejl rilevanti għandu jitwettaq f’konformità mal-Anness III tar-Regolament (UE) 2019/2021.

Għar-rekwiżit (c), l-applikant għandu jippreżenta l-paġni rilevanti tad-dokumentazzjoni tal-prodott.

Kriterju 2 — Sustanzi ristretti

2.1   Sustanzi esklużi jew limitati

Il-preżenza fil-prodott, jew fis-subassemblaġġi u fil-parts komponenti definiti, ta’ sustanzi li huma identifikati f’konformità mal-Artikolu 59 tar-Regolament (KE) Nru 1907/2006 tal-Parlament Ewropew u tal-Kunsill (4) jew sustanzi u taħlitiet li jissodisfaw il-kriterji għall-klassifikazzjoni f’konformità mar-Regolament (KE) Nru 1272/2008 tal-Parlament Ewropew u tal-Kunsill (5)għall-klassijiet tal-periklu, il-kategoriji tal-periklu u l-kodiċijiet tad-dikjarazzjonijiet tal-periklu assoċjati elenkati fit-Tabella 1 għandhom jiġu ristretti f’konformità mas-subkriterju 2.1. (a) u (c). Għall-finijiet ta’ dan il-kriterju, il-Lista ta’ Kandidati għal Sustanzi ta’ Tħassib Serju Ħafna (SVHCs) u l-klassijiet tal-periklu, il-kategoriji tal-periklu u l-kodiċijiet tad-dikjarazzjonijiet tal-periklu assoċjati huma miġbura fit-Tabella 1. Is-subkriterju 2.1. (b) jillimita l-preżenza ta’ sustanzi speċifiċi.

Tabella 1

Ir-ragruppament tal-lista ta’ kandidati għal SVHCs u l-klassijiet tal-periklu, il-kategoriji tal-periklu u l-kodiċijiet tad-dikjarazzjonijiet tal-periklu assoċjati

Perikli tal-Grupp 1

— Sustanzi li jidhru fuq il-Lista ta’ Kandidati għal Sustanzi ta’ Tħassib Serju Ħafna (SVHCs) — Sustanzi Karċinoġeniċi, Mutaġeniċi u/jew Tossiċi għar-Riproduzzjoni (CMR) CMR tal-Kategorija 1A jew 1B: H340, H350, H350i, H360, H360F, H360D, H360FD, H360Fd, H360Df

Perikli tal-Grupp 2

— CMR tal-Kategorija 2: H341, H351, H361f, H361d, H361fd , H362 — Tossiċità akkwatika tal-Kategorija 1: H400, H410 — Tossiċità akuta tal-Kategoriji 1 u 2: H300, H310, H330 — Tossiċità mill-aspirazzjoni tal-Kategorija 1: H304 — Tossiċità speċifika għall-organi fil-mira (STOT) tal-Kategorija 1: H370, H372

Perikli tal-Grupp 3

— Tossiċità akkwatika tal-Kategoriji 2, 3 u 4: H411, H412, H413 — Tossiċità akuta tal-Kategorija 3: H301, H311, H331, EUH070 — STOT tal-Kategorija 2: H371, H373

2.1(a)   Restrizzjonijiet fuq is-Sustanzi ta’ Tħassib Serju Ħafna (SVHCs)

Is-sustanzi li jissodisfaw il-kriterji msemmija fl-Artikolu 57 tar-Regolament (KE) Nru 1907/2006 li ġew identifikati f’konformità mal-proċedura deskritta fl-Artikolu 59 ta’ dak ir-Regolament u inklużi fil-lista ta’ kandidati ta’ sustanzi ta’ tħassib serju ħafna għall-awtorizzazzjoni ma għandhomx jiżdiedu intenzjonalment mal-prodott f’konċentrazzjonijiet ogħla minn 0,10 % (piż skont il-piż). L-istess restrizzjoni għandha tapplika għas-subassemblaġġi li jiffurmaw parti mill-prodott li huma elenkati fit-Tabella 2. Ma għandha tingħata l-ebda deroga minn dan ir-rekwiżit.

Tabella 2

Is-subassemblaġġ u l-parts komponenti li għalihom għandu japplika l-Kriterju 2.1(a)

Bords ta’ Ċirkwiti Stampati (Bords ta’ Wiring Stampati, motherboards sħaħ, bords tal-enerġija (unitajiet tal-provvista tal-enerġija) u bords tal-moduli) >10 cm2

Wiring/kejbils elettriċi (aggregati)

Kejbils esterni (Kejbil tal-enerġija (Wajers tal-elettriku AC u DC), kejbil tal-modem u kejbil tal-LAN jekk applikabbli, kejbil HDMI u kejbil RCA)

Housing estern (Qoxra ta’ wara, qoxra ta’ quddiem (dekorazzjoni tal-gwarniċ) u stands)

Housing estern tar-remote control

Retroilluminazzjoni LED (arranġamenti bil-LED)

Fil-komunikazzjoni ta’ dan ir-rekwiżit lill-fornituri tas-subassemblaġġi/parts komponenti elenkati, l-applikanti jistgħu jagħmlu skrinjar minn qabel tal-Lista ta’ Kandidati ta’ REACH billi jużaw il-lista tas-sustanzi dikjarabbli tal-IEC 62474 . (6) L-iskrinjar għandu jkun ibbażat fuq l-identifikazzjoni tal-potenzjal għall-preżenza ta’ sustanzi fil-prodott.

Valutazzjoni u verifika: L-applikant għandu jiġbor id-dikjarazzjonijiet tan-nuqqas ta’ preżenza tal-SVHCs fil-limitu ta’ konċentrazzjoni speċifikat jew ogħla għall-prodott u s-subassemblaġġi identifikati fit-Tabella 2. Id-dikjarazzjonijiet għandu jkollhom referenza għall-aħħar verżjoni tal-Lista ta’ Kandidati li ppubblikat l-ECHA  (7) fid-data tas-sottomissjoni tal-applikazzjoni tal-Ekotikketta tal-UE. Fejn id-dikjarazzjonijiet isiru abbażi ta’ skrinjar minn qabel tal-lista ta’ kandidati bl-użu tal-IEC 62474, l-applikant għandu jipprovdi wkoll il-lista skrinjata mogħtija lill-fornituri tas-subassemblaġġ. Il-verżjoni tal-lista tas-sustanzi dikjarabbli IEC 62474 użata għandha tirrifletti l-aħħar verżjoni tal-lista tal-kandidati.

Id-dikjarazzjonijiet jistgħu jiġu pprovduti wkoll direttament lill-korpi kompetenti minn kwalunkwe fornitur fil-katina tal-provvista tal-applikant.

2.1(b)   Restrizzjonijiet fuq il-preżenza ta’ sustanzi speċifiċi

Is-sustanzi perikolużi speċifikati fit-Tabella 3 ma għandhomx jiżdiedu jew jiġu ffurmati intenzjonalment fis-subassemblaġġi u fil-parts komponenti speċifikati fil-limiti ta’ konċentrazzjoni stipulati jew f’konċentrazzjonijiet ogħla.

Tabella 3

Restrizzjonijiet fuq is-sustanzi li għandhom japplikaw għas-subassemblaġġi u għall-parts komponenti

Grupp ta’ sustanzi	L-ambitu tar-restrizzjoni (sustanzi u subassemblaġġi/parts komponenti)	Limiti ta’ konċentrazzjoni (fejn applikabbli)
(i) Saldatura u kuntatti tal-metall	L-eżenzjoni 8b f’konformità mad-Direttiva 2011/65/UE tal-Parlament Ewropew u tal-Kunsill  (8) relatata mal-użu tal-kadmju f’kuntatti elettriċi ma għandhiex tkun permessa.	0,01 % w/w Metodu ta’ ttestjar: IEC 62321-5
(ii) Stabbilizzaturi, koloranti u kontaminanti tal-polimeri	Il-komposti tal-istabbilizzatur tal-organotin li ġejjin, ikklassifikati taħt il-perikli tal-Grupp 1 u 2, ma għandhomx ikunu preżenti fil-kejbils esterni:   Ossidu tad-dibutiltin   Diaċetat tad-dibutiltin   Dilawrat tad-dibutiltin   Maletat tad-dibutiltin   Ossidu tad-dioktiltin   Dilawrat tad-dioktiltin	mhux applikabbli
	Il-housing estern tal-unità tal-wiri ma għandux ikun fih il-koloranti li ġejjin: Iż-żebgħat ażo li jistgħu jinferqu fl-ammini aril karċinoġeniċi elenkati fl-Appendiċi 8 tar-Regolament (KE) Nru 1907/2006, u/jew il-komposti koloranti inklużi fil-lista tas-sustanzi dikjarabbli IEC 62474.	mhux applikabbli
	L-Idrokarburi Aromatiċi Poliċikliċi (PAHs) ikklassifikati taħt il-perikli tal-Gruppi 1 u 2 ma għandhomx ikunu preżenti f’konċentrazzjonijiet daqs jew aktar mil-limiti individwali tal-konċentrazzjoni u mill-għadd totali tal-limiti tal-konċentrazzjoni f’kull faċċata esterna tal-uċuħ tal-plastik jew tal-lastiku magħmulin mill-bniedem ta’: Kejbils esterni Housing estern tar-remote control Parts tal-lastiku tar-remote control Il-preżenza u l-konċentrazzjoni tal-PAHs li ġejjin għandhom jiġu vverifikati: Il-PAHs ristretti mir-Regolament (KE) Nru 1907/2006:   Benżo[a]piren   Benżo[e]piren   Benżo[a]antraċen   Krisen   Benżo[b]fluworanten   Benżo[j]fluworanten   Benżo[k]fluworanten   Dibenżo[a,h]antraċen PAHs addizzjonali soġġetti għal restrizzjoni:   Aċenaften   Aċenaftilen   Antraċen   Benżo[ghi]perilen   Fluworanten   Fluworen   Indeno[1,2,3-cd]piren   Naftalen   Fenantren   Piren	Il-limiti ta’ konċentrazzjoni individwali għall-PAHs ristretti skont ir-Regolament (KE) Nru 1907/2006 għandhom ikunu ta’ 1 mg/kg Il-limitu totali tal-konċentrazzjoni għat-18-il PAHs elenkati ma għandux ikun akbar minn 10 mg/kg Metodu ta’ ttestjar: AfPS GS 2014:01 PAK.
(iii) Prodotti bijoċidali	Il-prodotti bijoċidali maħsuba biex jipprovdu funzjoni antibatterika ma għandhomx jiġu inkorporati fil-Housing estern u fil-parts tal-lastiku tar-remote control.	mhux applikabbli
(iv) Merkurju fir-retroilluminazzjoni	L-eżenzjoni 3 f’konformità mad-Direttiva 2011/65/UE relatata mal-użu tal-merkurju fil-bozoz fluworexxenti bil-katodu kiesaħ u fil-bozoz fluworexxenti bl-elettrodi esterni (CCFL u EEFL) ma għandhiex tkun permessa.	mhux applikabbli
(v) Aġenti li jirfinaw il-ħġieġ	L-arseniku u l-komposti tiegħu ma għandhomx jintużaw fil-manifattura tal-ħġieġ tal-unità tal-wiri LCD u tal-ħġieġ li jgħatti l-iskrin.	0,0050 % w/w
(vi) Plastik ibbażat fuq il-kloru	Il-parts tal-plastik >25g ma għandux ikun fihom polimeri klorinati. Nota: Għal dan is-subrekwiżit speċifiku, il-housing tal-kejbils tal-plastik mhuwiex ikkunsidrat bħala “part tal-plastik”.	mhux applikabbli
(vii) Ftalati	Il-ftalat tad-diisononil (DINP), il-ftalat tad-diisodeċil (DIDP) ma għandhomx jintużaw fil-kejbils tal-elettriku esterni.	mhux applikabbli

Valutazzjoni u verifika: L-applikant għandu jipprovdi dikjarazzjonijiet tal-konformità u rapporti ta’ testijiet f’konformità mar-rekwiżiti fit-Tabella 3. Ir-rapporti tat-testijiet, fejn meħtieġ, għandhom ikunu validi fiż-żmien tal-applikazzjoni għall-mudell tal-produzzjoni rilevanti u għall-fornituri assoċjati kollha. Fejn is-subassemblaġġi jew il-parts komponenti bl-istess speċifikazzjonijiet tekniċi joriġinaw minn għadd ta’ fornituri differenti, għandhom jitwettqu testijiet fejn applikabbli fuq parts minn kull fornitur. Id-dikjarazzjonijiet/ir-rapporti tat-testijiet jistgħu jiġu pprovduti wkoll direttament lill-korpi kompetenti minn kwalunkwe fornitur fil-katina tal-provvista tal-applikant.

2.1(c)   Restrizzjonijiet fuq sustanzi kklassifikati skont ir-Regolament (KE) Nru 1272/2008

Ir-ritardanti tal-fjammi u l-plastifikanti li huma assenjati kwalunkwe waħda mill-klassijiet tal-periklu, il-kategoriji tal-periklu u l-kodiċijiet tad-dikjarazzjonijiet tal-periklu assoċjati elenkati fit-Tabella 1; f’konformità mar-Regolament (KE) Nru 1272/2008 ma għandhomx jiżdiedu intenzjonalment mas-subassemblaġġi u mal-parts komponenti definiti fit-Tabella 4 fil-limitu ta’ konċentrazzjoni ta’ 0,10 % jew ogħla (piż skont il-piż).

Tabella 4

Subassemblaġġi u parts komponenti li għalihom għandu japplika l-Kriterju 2.1(c)

Parts li fihom ritardanti tal-fjammi

— Bords ta’ Ċirkwiti Stampati — Kejbils esterni — Housing estern tal-unità tal-wiri

Parts li fihom il-plastifikanti

— Kejbils esterni — Wiring elettriku intern — Housing estern tal-unità tal-wiri

Derogi għall-użu ta’ ritardanti tal-fjammi u plastifikanti perikolużi

L-użu ta’ ritardanti tal-fjammi u plastifikanti li jissodisfaw il-kriterji għall-klassifikazzjoni fi kwalunkwe klassi tal-periklu, kategorija tal-periklu u kodiċi tad-dikjarazzjonijiet tal-periklu assoċjat elenkati fit-Tabella 1 huwa derogat mir-rekwiżiti tal-Kriterju 2.1(c) diment li jissodisfaw il-kundizzjonijiet speċifikati fit-Tabella 5.

Tabella 5

Derogi għar-restrizzjonijiet fuq sustanzi kklassifikati skont ir-Regolament (KE) Nru 1272/2008u l-kundizzjonijiet applikabbli

Tip ta’ sustanza/taħlita	Applikabbiltà	Il-klassi tal-periklu, il-kategorija tal-periklu u l-kodiċi tad-dikjarazzjonijiet tal-periklu derogati u l-kundizzjonijiet għad-deroga
Ritardanti tal-fjammi	Bords ta’ Ċirkwiti Stampati	Ir-ritardanti tal-fjammi kklassifikati taħt il-perikli tal-Grupp 3 u t-TBBPA (ikklassifikati mal-Grupp 2) huma derogati għall-użu.
	Kejbils esterni	Ir-ritardant tal-fjammi u s-sinerġista tiegħu kklassifikat taħt il-periklu tal-Grupp 3 u t-triossidu tal-antimonju (Sb2O3) ikklassifikat taħt il-perikli tal-Grupp 2 huma derogati għall-użu.
	Housing estern tal-unità tal-wiri	Ir-ritardanti tal-fjammi u s-sinerġisti tagħhom ikklassifikati taħt il-perikli ta’ Grupp 2 u 3 huma derogati għall-użu.
Plastifikanti	Kejbils esterni, wiring elettriku intern u housing estern tal-unità tal-wiri	Il-plastifikanti kklassifikati taħt il-perikli tal-Grupp 3 huma derogati għall-użu.

Valutazzjoni u verifika: L-applikant għandu jipprovdi dikjarazzjoni ta’ konformità mal-Kriterju 2.1(c). Id-dikjarazzjoni għandha tkun appoġġata mil-lista tar-ritardanti tal-fjammi, tal-plastifikanti u tal-addittivi tal-metall u tal-kisjiet użati fis-subassemblaġġi u l-parts komponenti elenkati fit-Tabella 4 flimkien mal-SDS li jappoġġjaw il-klassifikazzjoni tal-periklu jew in-nuqqas ta’ klassifikazzjoni tagħhom.

Għas-sustanzi derogati u t-taħlitiet elenkati fit-Tabella 5, l-applikant għandu jipprovdi prova li l-kundizzjonijiet kollha tad-deroga huma ssodisfati. Meta jkunu meħtieġa rapporti tat-testijiet, dawn għandhom ikunu validi fiż-żmien tal-applikazzjoni għal mudell ta’ produzzjoni.

Id-dikjarazzjonijiet/ir-rapporti tat-testijiet jistgħu jiġu pprovduti wkoll direttament lill-korpi kompetenti minn kwalunkwe fornitur fil-katina tal-provvista tal-applikant.

2.2   Attivitajiet li jnaqqsu l-emissjonijiet ta’ gassijiet fluworurati b’effett ta’ serra (GHG) fil-katina tal-provvista

L-applikant għandu jiġbor l-informazzjoni li ġejja mingħand il-fornituri tal-unitajiet tal-wiri LCD tagħhom li permezz tagħha għandhom juru l-attivitajiet tagħhom li jnaqqsu l-emissjonijiet ta’ GHG mill-proċess ta’ produzzjoni, inkluża l-prestazzjoni tas-sistemi ta’ tnaqqis li jkunu installaw:

(a)	L-ispeċifikazzjoni ta’ liema mill-gassijiet b’effett ta’ serra fluworinati (F-GHGs) ikunu qegħdin jintużaw u liema qegħdin jitnaqqsu;

(b)	L-intensità annwali tal-emissjonijiet ta’ F-GHGs (f’kg CO2eq għal kull m2 ta’ unitajiet tal-wiri b’pannelli ċatti (arranġament bil-ħġieġ) prodotti) fis-siti kollha tal-manifattura għall-aktar sena reċenti;

(c)	Indikazzjoni tal-qerda jew tal-effiċjenzi tat-tneħħija (DREs) ta’ sistemi ta’ tnaqqis installati għal kull wieħed mill-F-GHGs li jintużaw.

Valutazzjoni u verifika: L-applikant għandu jipprovdi d-dokumentazzjoni ta’ appoġġ li jkun fiha l-informazzjoni ta’ hawn fuq mingħand il-fornituri tal-unità tal-wiri tagħhom lill-korp kompetenti. Id-dokumentazzjoni tista’ tiġi pprovduta wkoll direttament lill-korpi kompetenti minn kwalunkwe fornitur fil-katina tal-provvista tal-applikant.

Kriterju 3—Possibbiltà ta’ tiswija u garanzija kummerċjali

(a)

Disinn għat-tiswija: (i) l-ispare parts li ġejjin tal-unitajiet tal-wiri elettroniċi għandhom ikunu aċċessibbli u sostitwibbli bl-użu ta’ għodod disponibbli kummerċjalment (jiġifieri l-għodod kollha ħlief għodod proprjetarji, eż. tornaviti, spatula, plajers, jew pinzetti): — assemblaġġ tal-iskrin u r-retroilluminazzjoni LED; — stands, u — bords ta’ ċirkwit tal-enerġija u tal-kontroll. (ii) l-adeżivi li jridu jitneħħew bis-sħana jew bis-sustanzi kimiċi ma għandhomx jintużaw biex titwaħħal il-qoxra ta’ wara tal-unità tal-wiri elettronika; (iii) il-parts tal-casing huma ħielsa minn assemblaġġi elettroniċi li ma jistgħux jitneħħew bl-użu ta’ għodod disponibbli kummerċjalment.

(b)

Manwal tat-tiswija: l-applikant għandu jipprovdi struzzjonijiet ċari dwar iż-żarmar u t-tiswija (eż., kopja stampata jew elettronika, video) u jagħmilhom disponibbli pubblikament mingħajr ebda kost addizzjonali, biex ikun jista’ jkun hemm żarmar mhux distruttiv ta’ prodotti bl-għan li jiġu sostitwiti komponenti jew parts ewlenin għal aġġornamenti jew tiswijiet;

(c)

Servizz ta’ tiswija / Informazzjoni: l-informazzjoni għandha tiġi inkluża fl-istruzzjonijiet għall-utent jew fis-sit web tal-manifattur biex l-utent ikun jaf fejn għandu jmur biex jikseb tiswijiet u servisjar professjonali tal-unità tal-wiri elettronika, inklużi d-dettalji ta’ kuntatt kif xieraq u l-prezz rakkomandat tal-ispare parts mill-manifattur. Matul il-perjodu ta’ garanzija msemmi f’(e) dan jista’ jkun limitat għall-fornituri ta’ servizzi awtorizzati tal-applikant;

(d)

Disponibbiltà tal-ispare parts: l-applikant għandu jiżgura li l-ispare parts oriġinali jew kompatibbli b’mod retroattiv (dawk imsemmija f’(a) (i) u dawk inklużi fl-Anness II (D. Rekwiżiti tal-effiċjenza tal-materjali. Il-Punt 5 (a) Disponibbiltà tal-partijiet ta’ rikambju) tar-Regolament (UE) 2019/2021, bħala minimu) ikunu disponibbli għall-pubbliku għal mill-inqas tmien snin wara t-tmiem tal-produzzjoni tal-mudell;

(e)

Garanzija kummerċjali: mingħajr preġudizzju għall-obbligi legali tal-bejjiegħ skont il-liġi nazzjonali dwar il-garanziji legali u kummerċjali, l-applikant ma għandu jipprovdi bl-ebda kost addizzjonali garanzija kummerċjali minima ta’ tliet snin matul liema żmien għandu jiżgura li l-prodotti jkunu konformi mal-kuntratt tal-bejgħ. Din il-garanzija għandha tinkludi ftehim ta’ servizz bi ġbir u radd lura għal każijiet fejn it-tiswija ma tkunx saret fuq il-post;

(f)	L-informazzjoni dwar it-tiswija, l-ispare parts u l-garanzija kummerċjali għandha tiġi pprovduta f’formati aċċessibbli għall-persuni b’diżabbiltà meta tintalab, f’konformità mar-rekwiżiti ta’ aċċessibbiltà fid-Direttiva (UE) 2019/882.

Valutazzjoni u verifika: L-applikant għandu jiddikjara l-konformità tal-prodott ma’ dawn ir-rekwiżiti lill-korp kompetenti. Barra minn hekk, l-applikant għandu jipprovdi:

(a)	Dijagramma kompożita li turi kif il-parts tal-casing, ix-xażi u l-assemblaġġi elettriċi/elettroniċi jiġu mmuntati fil-prodott;

(b)	Kopja tal-garanzija kummerċjali;

(c)	Kopja tal-manwal tat-tiswija;

(d)	Kopja tal-istruzzjonijiet għall-utent;

(e)	Lista pubblika ta’ negozjanti awtorizzati tal-ispare parts.

Kriterju 4— Ġestjoni ta’ tmiem il-ħajja

4.1   Għażla tal-materjal u informazzjoni biex tittejjeb ir-riċiklabbiltà

(a)

Riċiklabbiltà tal-plastik: (i) Il-parts b’piż ta’ aktar minn 25 gramma għandhom jikkonsistu f’polimeru wieħed jew f’taħlita jew liga ta’ polimeri li huma riċiklabbli; (ii) Il-preżenza ta’ żebgħat u kisjiet ma għandux ikollha impatt sinifikanti fuq ir-reżistenza tal-plastik riċiklat prodott minn dawn il-komponenti mar-riċiklaġġ u meta ttestjat f’konformità mal-ISO 180 [1] jew l-ekwivalenti; (iii) Il-kaxxi tal-plastik ma għandux ikun fihom metall inkorporat jew inkullat sakemm il-komponenti tal-metall ma jkunux jistgħu jitneħħew b’għodod disponibbli kummerċjalment; (iv) Il-casings, il-kaxxi u l-gwarniċi li jinkorporaw ritardanti tal-fjammi għandhom ikunu riċiklabbli. Nota [1]: : Għall-finijiet ta’ dan il-kriterju, impatt sinifikanti huwa definit bħala tnaqqis ta’ > 25 % fl-impatt ta’ Iżod imtaqqab ta’ raża riċiklata kif imkejla bl-użu tal-ISO 180.

(b)

Informazzjoni biex jiġi ffaċilitat ir-riċiklaġġ: 1. Il-parts tal-plastik b’massa ta’ aktar minn 25 gramma għandhom jiġu mmarkati f’konformità mal-ISO 11469 u l-ISO 1043, it-Taqsimiet 1 u 4. Għall-parts tal-plastik > 100 gramma, il-marki għandhom ikunu kbar biżżejjed u jkunu f’pożizzjoni viżibbli sabiex ikunu jistgħu jiġu identifikati faċilment. L-eżenzjonijiet speċifikati fl-Anness II tar-Regolament tal-Kummissjoni (UE) 2019/2021 (it-punt 2 tat-Taqsima D) japplikaw għal dan ir-rekwiżit. 2. L-applikant għandu jqiegħed għad-dispożizzjoni tal-operaturi professjonisti tas-settur tal-iskart, f’sit web u mingħajr ħlas, informazzjoni rilevanti għaż-żarmar u l-irkupru. Dan għandu jinkludi mill-inqas: (a) dijagramma tal-prodott li turi l-post fejn jinsabu l-komponenti tal-plastik li fihom ir-ritardanti tal-fjammi; (b) il-post tal-komponenti li fihom is-sustanzi tossiċi jew ekotossiċi.

(c)

Kontenut irriċiklat: Il-prodott għandu jkun fih bħala medja minimu ta’ 10 % ta’ plastik riċiklat fil-fażi ta’ wara l-konsumatur, imkejjel bħala perċentwal tal-plastik totali (skont il-piż) fil-prodott li jeskludi l-Bords ta’ Wiring Stampati. Fejn il-kontenut riċiklat ikun ogħla minn 25 %, fil-kaxxa tat-test li takkumpanja l-Ekotikketta tista’ ssir dikjarazzjoni (ara l-Kriterju 6.2). Il-prodotti b’casing tal-metall huma eżentati minn dan is-subkriterju.

Valutazzjoni u verifika : L-applikant għandu jipprovdi dijagramma kompożita tal-unità tal-wiri elettronika f’format bil-miktub jew awdjo-viżiv. Din għandha tidentifika l-parts tal-plastik akbar minn 25 gramma skont il-piż tagħhom, il-kompożizzjoni tal-polimeri tagħhom, u l-marki tagħhom tal-ISO 11469 u 1043. Id-dimensjonijiet u l-pożizzjonijiet tal-immarkar għandhom jintwerew u, fejn japplikaw l-eżenzjonijiet, għandhom jingħataw ġustifikazzjonijiet tekniċi.

L-applikant għandu jipprovdi l-informazzjoni rilevanti għaż-żarmar u l-irkupru disponibbli għall-operaturi professjonisti u s-sit web fejn tinsab.

L-applikant għandu jivverifika r-riċiklabbiltà billi jipprovdi evidenza li l-plastik, kemm individwalment kif ukoll ikkombinat, ma għandux impatt fuq il-karatteristiki tekniċi tal-plastik riċiklati li jirriżulta b’tali mod li ma jistax jerġa’ jintuża fi prodotti elettroniċi. Dan jista’ jinkludi:

—	Dikjarazzjoni minn riċiklatur tal-plastik bl-esperjenza jew operatur ta’ trattament awtorizzat f’konformità mal-Artikolu 23 tad-Direttiva 2008/98/KE tal-Parlament Ewropew u tal-Kunsill  (9);

—	Ir-riżultati tat-testijiet minn laboratorju indipendenti jew minn riċiklatur tal-plastik bl-esperjenza;

—	Il-letteratura teknika rieżaminata bejn il-pari u l-industrija applikabbli għall-Ewropa.

L-applikant għandu jipprovdi verifika minn parti terza u traċċabilità għall-kontenut riċiklat wara l-konsum. Jista’ jintuża ċertifikat tar-riċiklaturi skont l-iskema ta’ ċertifikazzjoni EuCertPlast jew ekwivalenti biex jappoġġa l-verifika.

4.2   Disinn għaż-żarmar u r-riċiklaġġ

(a)

Għall-parts fil-mira li ġejjin, kif rilevanti għall-prodott, għandu jsir żarmar manwali minn persuna waħda (jiġifieri mhux aktar minn konnessjoni snap-on waħda għandha tinħall fl-istess ħin) bl-użu ta’ għodod disponibbli kummerċjalment użati b’mod wiesa’ (jiġifieri tnalji, tornaviti, cutters u mrietel kif definit fl-ISO 5742, ISO 1174, ISO 15601): (i) Bords ta’ Wiring Stampati >10 cm2; (ii) Unità tat-Tranżistur b’Film Irqiq (TFT) >100 cm2 u l-kondutturi tar-rita; (iii) Gwida luminuża tal-polimetilmetakrilat (PMMA).

(b)

Mill-inqas wieħed mill-komponenti fakultattivi li ġejjin (jekk applikabbli) għandu jkun possibbli wkoll li jiġi żarmat manwalment bl-użu ta’ għodod komuni disponibbli kummerċjalment: (i) Unitajiet tar-retroilluminazzjoni LED; (ii) Kalamiti tal-unità tal-ispeaker (għal daqsijiet tal-iskrin ta’ 25 pulzier jew aktar); (iii) Diski HDD (jekk applikabbli fil-każ ta’ apparati intelliġenti).

Valutazzjoni u verifika: L-applikant għandu jipprovdi:

Rapport tat-test li jagħti dettalji dwar is-sekwenza taż-żarmar, inkluż deskrizzjoni dettaljata tal-passi, l-għodod u l-proċeduri speċifiċi taż-żarmar, għall-komponenti elenkati f’(a) u għall-komponenti fakultattivi magħżula minn (b).

Kriterju 5 — Responsabbiltà soċjali korporattiva

5.1   Kundizzjonijiet tax-xogħol matul il-manifattura

Wara li kkunsidra d-Dikjarazzjoni Tripartitika dwar il-Prinċipji li Jikkonċernaw l-Intrapriżi Multinazzjonali u l-Politika Soċjali tal-Organizzazzjoni Internazzjonali tax-Xogħol (ILO), il-Patt Globali tan-NU (il-Pilastru 2), il-Prinċipji Gwida tan-NU dwar in-Negozju u d-Drittijiet tal-Bniedem u l-Linji Gwida tal-OECD għall-Intrapriżi Multinazzjonali, l-applikant għandu jikseb verifika minn parti terza appoġġata minn awditi fuq il-post li l-prinċipji applikabbli inklużi fil-konvenzjonijiet fundamentali tal-ILO u d-dispożizzjonijiet supplimentari ta’ hawn taħt identifikati ġew rispettati fl-impjant(i) tal-immuntar finali għall-prodott.

Konvenzjonijiet fundamentali tal-ILO:

a)	It-Tħaddim tat-Tfal: i. Il-Konvenzjoni dwar l-Età Minima, 1973 (Nru 138); ii. Il-Konvenzjoni dwar l-Agħar Forom tax-Xogħol tat-Tfal, 1999 (Nru 182);

b)	Ix-Xogħol Furzat u Obbligatorju: i. Il-Konvenzjoni dwar ix-Xogħol Furzat, 1930 (Nru 29) u 2014 il-Protokoll għall-Konvenzjoni dwar ix-Xogħol Furzat; ii. Il-Konvenzjoni dwar l-Abolizzjoni tax-Xogħol Furzat, 1957 (Nru 105);

c)

Il-Libertà ta’ Assoċjazzjoni u d-Dritt ta’ Negozjar Kollettiv: i. Il-Konvenzjoni dwar il-Libertà ta’ Assoċjazzjoni u l-Protezzjoni tad-Dritt għall-Organizzazzjoni, 1948 (Nru 87); ii. Il-Konvenzjoni dwar l-Applikazzjoni tal-Prinċipji tad-Dritt ta’ Organizzazzjoni u tal-Innegozjar Kollettiv, 1949 (Nru 98);

d)	Diskriminazzjoni: i. Il-Konvenzjoni dwar ir-Remunerazzjoni Indaqs, 1951 (Nru 100); ii. Il-Konvenzjoni dwar id-Diskriminazzjoni (Impjiegi u Xogħol) (Nru 111).

Dispożizzjonijiet supplimentari:

a)	Ħinijiet tax-xogħol: i. Il-Konvenzjoni tal-ILO dwar is-Sigħat tax-Xogħol (Industrija), 1919 (Nru 1);

b)

Remunerazzjoni: i. Il-Konvenzjoni tal-ILO dwar l-Iffissar tal-Paga Minima, l-1970 (Nru 131) ii. Il-paga li tiggarantixxi l-għajxien: L-applikant għandu jiżgura li l-pagi (minbarra kwalunkwe taxxa, bonus, benefiċċju, jew pagi tas-sahra) imħallsa għal ġimgħa tax-xogħol normali (li ma taqbiżx it-48 siegħa) jkunu biżżejjed biex ikopru l-ħtiġijiet bażiċi (akkomodazzjoni, enerġija, nutrizzjoni, ħwejjeġ, kura tas-saħħa, edukazzjoni, ilma għax-xorb, kura tat-tfal u trasport) tal-ħaddiema u ta’ familja ta’ erba’ persuni, u li jipprovdu xi dħul diskrezzjonali. L-implimentazzjoni għandha tiġi awditjata b’referenza għall-gwida SA8000 (10) dwar ir-“Rimunerazzjoni”;

c)	Saħħa u Sigurtà: i. Il-Konvezjoni tal-ILO dwar is-Sikurezza fl-Użu tas-Sustanzi Kimiċi fuq ix-Xogħol, l-1990 (Nru 170); ii. Il-Konvenzjoni tal-ILO dwar is-Sikurezza u s-Saħħa fuq ix-Xogħol, l-1981 (Nru 155).

F’postijiet fejn id-dritt għal-libertà tal-assoċjazzjoni u n-negozjar kollettiv huwa ristrett bil-liġi, il-kumpanija mhux ser tirrestrinġi lill-ħaddiema milli jiżviluppaw mekkaniżmi alternattivi biex jesprimu l-ilmenti tagħhom u jipproteġu d-drittijiet tagħhom rigward il-kundizzjonijiet tax-xogħol u t-termini tal-impjieg, u għandha tirrikonoxxi assoċjazzjonijiet leġittimi tal-impjegati li magħhom tista’ tidħol fi djalogu dwar kwistjonijiet fuq il-post tax-xogħol.

Il-proċess tal-awditjar għandu jinkludi konsultazzjoni ma’ partijiet ikkonċernati ta’ organizzazzjonijiet indipendenti tal-industrija esterni f’oqsma lokali madwar is-siti, inklużi trade unions, organizzazzjonijiet tal-komunità, NGOs u esperti tax-xogħol. Għandhom isiru konsultazzjonijiet sinifikanti ma’ mill-inqas żewġ partijiet ikkonċernati minn żewġ subgruppi differenti.

Matul il-perjodu ta’ validità tal-Ekotikketta tal-UE, l-applikant għandu jippubblika r-riżultati aggregati u s-sejbiet ewlenin mill-awditi (inkluż dettalji dwar (a) kemm hemm u kemm huma serji l-vjolazzjonijiet ta’ kull dritt tax-xogħol u tal-istandard tal-OHS; (b) strateġija għar-rimedju – fejn ir-rimedju jinkludi l-prevenzjoni għal kull kunċett tal-UNGP; (c) il-valutazzjoni tal-kawżi ewlenin tal-vjolazzjonijiet persistenti li jirriżultaw mill-konsultazzjoni mal-partijiet ikkonċernati – min ġie kkonsultat, liema kwistjonijiet tqajmu, kif dan influwenza l-pjan ta’ azzjoni korrettiva), online sabiex tiġi pprovduta evidenza tal-prestazzjoni tagħhom lill-konsumaturi interessati.

Valutazzjoni u verifika: l-applikant juri l-konformità ma’ dawn ir-rekwiżiti billi jipprovdi kopja tal-verżjoni l-aktar reċenti tal-kodiċi ta’ kondotta tagħhom li trid tkun konsistenti mad-dispożizzjonijiet speċifikati hawn fuq u mar-rapporti ta’ awditu ta’ appoġġ għal kull impjant finali tal-assemblaġġ tal-prodott għall-mudell(i) li jrid(u) jiġi(u) ekotikkettat(i) flimkien ma’ link fuq l-internet għal fejn tista’ tinstab il-pubblikazzjoni tar-riżultati u s-sejbiet online.

L-awditi fuq il-post minn partijiet terzi għandhom jitwettqu minn awdituri kkwalifikati biex jivvalutaw il-konformità tas-siti tal-manifattura industrijali mal-istandards soċjali jew mal-kodiċijiet ta’ kondotta jew, f’pajjiżi fejn il-Konvenzjoni tal-ILO dwar l-ispezzjoni tax-xogħol, 1947 (Nru 81) ġiet ratifikata u s-superviżjoni tal-ILO tindika li s-sistema nazzjonali ta’ spezzjoni tax-xogħol hija effettiva u l-ambitu tas-sistema ta’ spezzjoni jkopri l-oqsma elenkati hawn fuq  (11) , minn spettur(i) tax-xogħol maħtur(a) minn awtorità pubblika.

Ċertifikazzjonijiet validi minn skemi ta’ partijiet terzi jew proċessi ta’ spezzjoni li, flimkien jew parzjalment, jawditjaw il-konformità mal-prinċipji applikabbli tal-Konvenzjonijiet fundamentali tal-ILO elenkati u d-dispożizzjonijiet supplimentari dwar il-ħinijiet tax-xogħol, ir-remunerazzjoni u s-saħħa u sikurezza u l-konsultazzjoni mal-partijiet ikkonċernati esterni, għandhom jiġu aċċettati. Dawn iċ-ċertifikazzjonijiet ma għandux ikollhom aktar minn 12-il xahar.

5.2   Akkwist ta’ “minerali mingħajr kunflitt”

L-applikant għandu jappoġġa l-akkwist responsabbli tal-landa, it-tantalju, it-tungstenu u l-minerali mhux maħduma tagħhom u deheb minn żoni affettwati minn kunflitti u minn żoni ta’ riskju kbir billi:

(i)	jimxi b’diliġenza dovuta skont il-Gwida tal-OECD dwar id-Diliġenza Dovuta għal Ktajjen ta’ Provvista Responsabbli tal-Minerali minn Żoni Affettwati mill-Kunflitti u Żoni ta’ Riskju Għoli; u

(ii)	jippromwovi produzzjoni u kummerċ responsabbli tal-minerali f’żoni affettwati minn kunflitti u f’żoni b’riskju għoli għall-minerali identifikati li jintużaw fil-komponenti tal-prodott f’konformità mal-Gwida tal-OECD.

Valutazzjoni u verifika: L-applikant għandu jiddikjara l-konformità ma’ dawn ir-rekwiżiti flimkien mal-informazzjoni ta’ prova li ġejja:

—	rapport li jiddeskrivi l-attivitajiet ta’ diliġenza dovuta tagħhom tul il-katina tal-provvista għall-erba’ minerali identifikati. Dokumenti ta’ prova bħal ċertifikazzjonijiet ta’ konformità maħruġa mill-iskema tal-Unjoni Ewropea għandhom jiġu aċċettati wkoll.

—	Identifikazzjoni ta’ komponent(i) li fihom il-minerali identifikati, u l-fornitur(i) tagħhom, kif ukoll is-sistema tal-katina tal-provvista jew il-proġett użat għal akkwist responsabbli.

Kriterju 6 — Kriterji ta’ informazzjoni

6.1   Informazzjoni għall-utenti

Il-prodott għandu jinbiegħ bl-informazzjoni rilevanti għall-utent, li tipprovdi pariri dwar l-użu u r-rimi ambjentali xieraq tal-prodott.

L-imballaġġ u/jew id-dokumentazzjoni li jakkumpanjaw il-prodott għandhom jipprovdu d-dettalji ta’ kuntatt (telefown u/jew posta elettronika) u referenza għall-informazzjoni online għall-konsumaturi li jkollhom mistoqsijiet jew li jkunu jeħtieġu parir speċifiku dwar l-użu jew ir-rimi tal-unità tal-wiri elettronika. Bħala minimu, l-informazzjoni għandha tinkludi l-informazzjoni li ġejja (fejn applikabbli):

(a)

Konsum tal-enerġija: Klassi tal-Effiċjenza Enerġetika f’konformità mar-Regolament Delegat (UE) 2019/2013. Id-domanda massima għall-enerġija f’kull modalità operattiva. Barra minn hekk, għandhom jiġu pprovduti struzzjonijiet dwar kif tintuża l-modalità tal-iffrankar tal-enerġija tat-tagħmir u informazzjoni li l-effiċjenza enerġetika tnaqqas il-konsum tal-enerġija u b’hekk tiffranka l-flus billi tnaqqas il-kontijiet tal-elettriku;

(b)

L-indikazzjonijiet li ġejjin dwar kif jitnaqqas il-konsum tal-enerġija: (i) Jekk il-prodott jintefa mill-plakka, jew jintefa mill-iswiċċ li jitfi l-apparat kompletament (meta jkun hemm wieħed installat), dan jaqta’ l-użu tal-enerġija għal (qrib) żero; (ii) It-tqegħid tal-prodott fil-modalità standby inaqqas il-konsum tal-enerġija, iżda xorta waħda jieħu xi ftit enerġija; (iii) Innota li l-iscreen savers (monitors tal-kompjuter) jistgħu jwaqqfu l-unitajiet tal-wiri milli jgħaddu għal modalità ta’ enerġija aktar baxxa meta ma jkunux qed jintużaw. Għalhekk, l-iżgurar li l-iscreen savers ma jkunux attivati fuq l-iskrins jista’ jnaqqas l-użu tal-enerġija; (iv) Innota li Funzjoni Quick Start tista’ tikkawża żieda fil-konsum tal-enerġija; (v) Innota li l-funzjonijiet integrati, bħal riċevitur għas-sinjali diġitali (eż. DVB-T) jew reġistratur b’diska riġida jistgħu jgħinu biex inaqqsu l-konsum tal-enerġija jekk, bħala riżultat, apparat estern ma jibqax meħtieġ.

(c)	Il-konnettività tan-netwerk: Informazzjoni dwar kif jiġu diżattivati l-funzjonijiet tan-netwerking;

(d)	Il-pożizzjoni tal-iswiċċ li jitfi kompletament;

(e)	Informazzjoni li l-estensjoni tat-tul tal-ħajja tal-prodott tnaqqas l-impatti ambjentali ġenerali;

(f)

L-indikazzjonijiet li ġejjin dwar kif ittawwal il-ħajja tal-prodott: (i) Iż-żarmar u t-tiswija ċari li jippermettu żarmar mhux distruttiv tal-prodotti bl-iskop li jiġu sostitwiti l-komponenti ewlenin jew il-parts għat-tiswija; (ii) Informazzjoni biex l-utent ikun jaf fejn għandu jmur biex jikseb tiswijiet u servisjar professjonali tal-prodott, inkluż dettalji ta’ kuntatt kif xieraq;

(g)	Struzzjonijiet dwar tmiem il-ħajja għar-rimi xieraq tal-prodott f’faċilitajiet għall-iskart goff jew permezz ta’ skemi ta’ teħid lura mill-bejjiegħa skont kif ikun applikabbli, li għandhom jikkonformaw mad-Direttiva 2012/19/UE tal-Parlament Ewropew u tal-Kunsill;

(h)	Informazzjoni li l-prodott ingħata l-Ekotikketta tal-UE bi spjegazzjoni qasira dwar xi jfisser dan flimkien ma’ indikazzjoni li aktar informazzjoni dwar l-Ekotikketta tista’ tinstab fuq is-sit web http://www.ecolabel.eu;

(i)	Kwalunkwe verżjoni stampata tal-istruzzjonijiet/tal-manwal(i) tat-tiswija għandu jkun fiha kontenut irriċiklat u ma għandux ikun fiha karta bbliċjata bil-kloru. Sabiex jiġu ffrankati r-riżorsi, għandhom jiġu ppreferuti l-verżjonijiet online.

Valutazzjoni u verifika: L-applikanti għandhom jiddikjaraw il-konformità tal-prodott ma’ dawn ir-rekwiżiti lill-korp kompetenti u għandhom jipprovdu link għall-verżjoni online jew kopja tal-istruzzjonijiet għall-utent / manwal tat-tiswija lill-korp kompetenti.

6.2   Informazzjoni li tidher fuq l-Ekotikketta tal-UE

Jekk tintuża t-tikketta fakultattiva bil-kaxxa testwali, din għandu jkun fiha tlieta mit-testi li ġejjin:

(a)	effiċjenza għolja fl-użu tal-enerġija;

(b)	restrizzjoni ta’ sustanzi perikolużi;

(c)	iddisinjata biex tkun faċli li tissewwa u tiġi rriċiklata;

(d)	fiha xy % plastik riċiklat fil-fażi ta’ wara l-konsumatur (meta jkun hemm aktar minn 25 % biss bħala perċentwal tal-plastik totali).

L-applikant għandu jsegwi l-istruzzjonijiet dwar kif għandu jintuża sew il-logo tal-Ekotikketta tal-UE pprovdut fil-Linji Gwida tal-logo tal-Ekotikketta tal-UE:

http://ec.europa.eu/environment/ecolabel/documents/logo_guidelines.pdf

Valutazzjoni u verifika: L-applikant għandu jipprovdi dikjarazzjoni ta’ konformità ma’ dan il-kriterju, appoġġata b’immaġni/disinn b’riżoluzzjoni għolja tal-imballaġġ tal-prodott li turi b’mod ċar it-tikketta, in-numru tar-reġistrazzjoni/tal-liċenzja u, fejn rilevanti, id-dikjarazzjonijiet li jistgħu jintwerew flimkien mat-tikketta.

---

(1)  Iż-żewġ klassijiet tal-enerġija ewlenin iridu jiġbru mill-inqas 25 mudell irreġistrat li jridu jiġu kkunsidrati għal riżoluzzjoni u tip ta’ wiri speċifiċi (televiżjonijiet, monitors u wiri tas-sinjalar). Fil-każ li ma jintlaħaqx il-minimu ta’ 25 mudell irreġistrat għal ċertu riżoluzzjoni u tip ta’ wiri, iż-żewġ klassijiet tal-enerġija ewlenin li għandhom mudelli rreġistrati (indipendentement mill-għadd ta’ mudelli rreġistrati) japplikaw għal din ir-riżoluzzjoni u t-tip ta’ wiri speċifiċi.

(2)  https://ec.europa.eu/info/energy-climate-change-environment/standards-tools-and-labels/products-labelling-rules-and-requirements/energy-label-and-ecodesign/product-database_en

(3)  Ir-Regolament (UE) 2017/1369 tal-Parlament Ewropew u tal-Kunsill tal-4 ta’ Lulju 2017 li jistabbilixxi qafas għat-tikkettar tal-enerġija u li jħassar id-Direttiva 2010/30/UE (ĠU L 198, 28.07.2017, p. 1)

(4)  Ir-Regolament (KE) Nru 1907/2006 tal-Parlament Ewropew u tal-Kunsill tat-18 ta’ Diċembru 2006 dwar ir-reġistrazzjoni, il-valutazzjoni, l-awtorizzazzjoni u r-restrizzjoni ta’ sustanzi kimiċi (REACH), li jistabbilixxi Aġenzija Ewropea għas-Sustanzi Kimiċi, li jemenda d-Direttiva 1999/45/KE u li jħassar ir-Regolament (KEE) Nru 793/93 tal-Kunsill u r-Regolament (KE) Nru 1488/94 tal-Kummissjoni kif ukoll id-Direttiva 76/769/KEE tal-Kunsill u d-Direttivi 91/155/KEE, 93/67/KEE, 93/105/KE u 2000/21/KE tal-Kummissjoni (ĠU L 396, 30.12.2006, p. 1).

(5)  Ir-Regolament (KE) Nru 1272/2008 tal-Parlament Ewropew u tal-Kunsill tas-16 ta’ Diċembru 2008 dwar il-klassifikazzjoni, l-ittikkettar u l-imballaġġ tas-sustanzi u t-taħlitiet, li jemenda u jħassar id-Direttivi 67/548/KEE u 1999/45/KE, u li jemenda r-Regolament (KE) Nru 1907/2006 (ĠU L 353, 31.12.2008, p. 1).

(6)  Il-Kummissjoni Elettroteknika Internazzjonali (IEC), IEC 62474: “Material declaration for products of and for the electrotechnical industry, http://std.iec.ch/iec62474

(7)  ECHA, Candidate List of substances of very high concern for Authorisation, http://www.echa.europa.eu/candidate-list-table

(8)  Id-Direttiva 2011/65/UE tal-Parlament Ewropew u tal-Kunsill tat-8 ta’ Ġunju 2011 dwar ir-restrizzjoni tal-użu ta’ ċerti sustanzi perikolużi fit-tagħmir elettriku u elettroniku (ĠU L 174, 1.7.2011, p. 88).

(9)  Id-Direttiva 2008/98/KE tal-Parlament Ewropew u tal-Kunsill tad-19 ta’ Novembru 2008 dwar l-iskart u li tħassar ċerti Direttivi (ĠU L 312, 22.11.2008, p. 3).

(10)  Social Accountability International, Social Accountability 8000 International Standard, http://www.sa-intl.org

(11)  Ara ILO NORMLEX (http://www.ilo.org/dyn/normlex/en) u l-gwida ta’ sostenn fil-manwal tal-utent.