(1)

Id-Deċiżjoni tal-Kummissjoni (UE) 2017/2285 tas-6 ta’ Diċembru 2017 li temenda l-gwida għall-utent li tistabbilixxi l-passi meħtieġa għall-parteċipazzjoni fl-EMAS skont ir-Regolament (KE) Nru 1221/2009 tal-Parlament Ewropew u tal-Kunsill dwar il-parteċipazzjoni volontarja ta’ organizzazzjonijiet fi skema Komunitarja ta’ ġestjoni u verifika ambjentali (EMAS) (2) fil-paragrafu 2.4.3. tal-Anness I tiddefinixxi r-rekwiżiti għall-utilizzazzjoni ta’ metodu tal-kampjunar għall-verifiki ta’ organizzazzjonijiet li jkollhom diversi siti.

(2)

Il-paragrafu 2.4.3.3. (a) tal-gwida għall-utent li tinsab fl-Anness I tad-Deċiżjoni (UE) 2017/2285 jiddefinixxi setturi li fihom jista’ jiġi permess l-użu ta’ metodu tal-kampjunar għall-verifika ta’ organizzazzjonijiet li jkollhom diversi siti (it-Tabella 9).

(3)

Il-paragrafu 2.4.3.3. (b) tal-gwida għall-utent jiddefinixxi s-setturi li fihom l-użu ta’ metodu tal-kampjunar għall-verifika ta’ organizzazzjonijiet li jkollhom diversi siti jista’ jiġi permess fi proġetti pilota (it-Tabella 10) u jispeċifika li, wara proġett pilota u abbażi tal-evalwazzjoni tal-proġett pilota l-Kumitat tal-EMAS jista’ jirrakkomanda l-inklużjoni tas-settur fil-lista tas-setturi li fihom huwa permess l-użu ta’ metodu tal-kampjunar (it-Tabella 9).

(4)

Fil-Ġermanja twettqu żewġ proġetti pilota fis-setturi elenkati fit-Tabella 10: proġett wieħed fis-settur tal-bejgħ bl-imnut (il-Kodiċi tan-NACE 47.1) u proġett wieħed għal attivitajiet tal-kura residenzjali (il-Kodiċi tan-NACE 87) u xogħol soċjali mingħajr akkomodazzjoni (il-Kodiċi tan-NACE 88). Evalwazzjoni ta’ dawn il-proġetti pilota ġiet ippreżentata lill-Kumitat tal-EMAS.

(5)

Fuq il-bażi tal-evalwazzjoni tal-proġetti pilota, il-Kumitat tal-EMAS irrakkomanda li dawn is-setturi jiġu inklużi fil-lista tas-setturi li fihom huwa permess l-użu ta’ metodu tal-kampjunar għall-verifika ta’ organizzazzjonijiet li jkollhom diversi siti (it-Tabella 9).