(1)

Skont l-Artikolu 349 tat-Trattat dwar il-Funzjonament tal-Unjoni Ewropea. (TFUE), il-Kunsill, filwaqt li jqis ir-restrizzjonijiet strutturali soċjali u ekonomiċi tar-reġjuni ultraperiferiċi, inkluż il-periferiċità, l-insularità, id-daqs żgħir, it-topografija diffiċli u d-dipendenza ekonomika tagħhom fuq ftit prodotti, irid jadotta miżuri speċifiċi mmirati, b’mod partikolari, li jistabbilixxu l-kundizzjonijiet tal-applikazzjoni tat-Trattati għal dawk ir-reġjuni, inkluż il-politiki komuni.

(2)

Għalhekk, jenħtieġ li jiġu adottati miżuri speċifiċi sabiex jistabbilixxu l-kundizzjonijiet għall-applikazzjoni tat-TFUE għal dawk ir-reġjuni. Tali miżuri iridu jqisu l-karatteristiċi u r-restrizzjonijiet speċjali ta’ dawk ir-reġjuni, bla preġudizzju għall-integrità u l-koerenza tal-ordni ġuridiku tal-Unjoni, inkluż is-suq intern u l-politiki komuni.

(3)

Id-dipendenza ekonomika tal-Gżejjer Kanarji fuq is-settur tas-servizzi u b’mod partikolari fuq it-turiżmu, kif imkejjel fis-sehem tal-PDG tar-reġjun relatat ma’ dak is-settur, tikkostitwixxi restrizzjoni sinifikanti. Dak is-settur għandu rwol ferm akbar fl-ekonomija tal-Gżejjer Kanarji mis-settur tal-industrija.

(4)

Il-kombinazzjoni tal-iżolament u l-insularità inerenti f’arċipelagu tfixkel il-moviment liberu tal-persuni, tal-oġġetti u tas-servizzi u hija t-tieni l-akbar restrizzjoni li qed jiffaċċjaw il-Gżejjer Kanarji. Il-post fejn jinsabu l-gżejjer iżid id-dipendenza tagħhom fuq it-trasport bl-ajru u fuq it-trasport marittimu. It-trasport lejn, minn u fuq dawk il-gżejjer imbiegħda u insulari jkompli jżid il-kostijiet tal-produzzjoni għall-industriji lokali. Il-kostijiet tal-produzzjoni huma akbar minħabba li dawk il-modi ta’ trasport huma inqas effiċjenti u jiġu jiswew iktar flus milli bit-triq jew bil-ferrovija.

(5)

Bħala konsegwenza ulterjuri ta’ dan l-iżolament, kostijiet ogħla tal-produzzjoni jirriżultaw mid-dipendenza tal-gżejjer fuq l-importazzjoni ta’ materja prima u tal-enerġija, l-obbligu li jiġu akkumulati ħażniet u diffikultajiet li jaffettwaw il-forniment ta’ tagħmir ta’ produzzjoni.

(6)

Id-daqs żgħir tas-suq u l-livell baxx tal-attività tal- esportazzjoni, il-frammentazzjoni ġeografika tal-arċipelagu, u l-obbligu li jinżammu linji ta’ produzzjoni diversifikati iżda żgħar sabiex jissodisfaw ir-rekwiżiti ta’ suq żgħir, jillimitaw l-opportunitajiet għal ekonomiji ta’ skala.

(7)

F’ħafna każijiet huwa aktar diffiċli jew aktar għali fil-Gżejjer Kanarji biex tikseb servizzi speċjalizzati u ta’ manutenzjoni, u taħriġ għal maniġers u tekniċi, jew li tissottokuntratta jew tippromwovi l-espansjoni ta’ negozju lil hinn mis-suq reġjonali. Il-firxa dejqa ta’ metodi ta’ distribuzzjoni tirriżulta wkoll f’eċċess ta’ stokk.

(8)

Fir-rigward tal-ambjent, ir-rimi ta’ skart industrijali u t-trattament ta’ skart tossiku jagħti lok għal kostijiet ambjentali ogħla. Dawk il-kostijiet huma ogħla minħabba li ma hemmx impjanti tar-riċiklaġġ, ħlief għal ċerti prodotti, u l-iskart irid ikun ittrasportat biex jiġi ttrattat barra l-Gżejjer Kanarji.

(9)

It-taxxa magħrufa bħala ‘Arbitrio sobre Importaciones y Entregas de Mercancías en las Islas Canarias (‘it-taxxa AIEM’) qed isservi l-għan ta’ żvilupp awtonomu tas-setturi ta’ produzzjoni industrijali tal-Gżejjer Kanarji u għad-diversifikazzjoni tal-ekonomija tal-Gżejjer Kanarji.

(10)

Id-Deċiżjoni tal-Kunsill 2002/546/KE (2), adottata skont l-Artikolu 299 tat-Trattat KE, inizjalment awtorizzat lil Spanja biex tapplika eżenzjonijiet minn jew tnaqqis fit-taxxa AIEM sal-31 ta’ Diċembru 2011 għal ċerti prodotti li jiġu prodotti lokalment fil-Gżejjer Kanarji. L-Anness għal dik id-Deċiżjoni kien fih lista ta’ prodotti li għalihom jistgħu jiġu applikati eżenzjonijiet u tnaqqis mit-taxxa. Id-differenza bejn it-tassazzjoni ta’ prodotti lokali u t-tassazzjoni ta’ prodotti oħrajn ma setgħetx taqbeż il-5, il-15 jew il-25 punt perċentwali, skont il-prodott.

(11)

Id-Deċiżjoni tal-Kunsill 895/2011/UE (3) emendat id-Deċiżjoni 2002/546/KE, billi estendiet il-perjodu tal-applikazzjoni tagħha sal-31 ta’ Diċembru 2013.

(12)

Id-Deċiżjoni tal-Kunsill Nru 1413/2013/UE (4) emendat ulterjorment id-Deċiżjoni tal-Kunsill 2002/546/KE, billi estendiet il-perjodu tal-applikazzjoni tagħha sat-30 ta’ Ġunju 2014.

(13)

Id-Deċiżjoni tal-Kunsill Nru 377/2014/UE (5) awtorizzat lil Spanja biex tapplika eżenzjonijiet minn jew tnaqqis fit-taxxa AIEM sal-31 ta’ Diċembru 2020 għal ċerti prodotti li jiġu prodotti lokalment fil-Gżejjer Kanarji. L-Anness għal dik id-Deċiżjoni fih lista tal-prodotti li għalihom jistgħu japplikaw l-eżenzjonijiet minn jew it-tnaqqis fit-taxxa.

(14)

Eżami bir-reqqa tas-sitwazzjoni tikkonferma li huwa meħtieġ li tintlaqa’ t-talba ta’ Spanja li tiġġedded l-awtorizzazzjoni.

(15)

Ir-rata differenzjali massima, li tista’ tiġi applikata għall-prodotti industrijali inkwistjoni, jenħtieġ li ma teċċedix il-15 %. B’konformità mal-prinċipju tas-sussidjarjetà, jenħtieġ li l-awtoritajiet Spanjoli jkunu jistgħu jiddeċiedu dwar il-persentaġġ xieraq għal kull prodott. Id-differenzjal tat-taxxa awtorizzat jenħtieġ li ma jeċċedix il-kostijiet addizzjonali ġġustifikati. Madankollu, dak il-vantaġġ fiskali jenħtieġ li japplika soġġett għal limitu ta’ EUR 150 miljun fis-sena, ħlief f’każijiet debitament ġustifikati.

(16)

B’konformità mal-prinċipju tas-sussidjarjetà u sabiex tiġi żgurata flessibbiltà, jenħtieġ li l-awtoritajiet Spanjoli jitħallew jemendaw il-lista ta’ prodotti u d-differenzjali tat-taxxa awtorizzati tagħhom biex jirriflettu l-livell attwali tal-kostijiet addizzjonali mġarrba fil-produzzjoni ta’ dawn il-prodotti fil-Gżejjer Kanarji. F’dak il-kuntest, jenħtieġ li jkun possibbli għall-awtoritajiet Spanjoli biex japplikaw rati tad-differenzjali aktar baxxi u li jistabbilixxu taxxa minima għal prodotti speċifiċi fejn meħtieġ, dment li kwalunkwe emenda tkun konformi mal-objettivi tal-Artikolu 349 TFUE. Kwalunkwe emenda fil-lista ta’ prodotti jenħtieġ li tkun ibbażata fuq il-kriterji ta’ eliġibbiltà li ġejjin: li l-produzzjoni lokali teżisti u li s-sehem tagħha fis-suq lokali jammonta għal mill-inqas 5 %; li teżisti importazzjoni sinifikanti ta’ oġġetti (inkluż minn Spanja kontinentali u minn Stati Membri oħra) li tista’ tipperikola l-kontinwazzjoni tal-produzzjoni lokali, u li s-sehem tagħha fis-suq lokali jammonta għal mill-inqas 10 %; u li jeżistu kostijiet addizzjonali li jżidu l-prezz tal-kost tal-produzzjoni lokali meta mqabbla ma’ prodotti li jiġu prodotti bnadi oħra, u b’hekk jikkompromettu l-kompetittività tal-prodotti li jiġu prodotti lokalment.

(17)

L-awtoritajiet Spanjoli jenħtieġ li jiġu permessi jidderogaw mil-limiti tas-sehem fis-suq f’ċirkostanzi debitament ġustifikati, li jinkludu: produzzjoni li tirrikjedi ħafna ħaddiema; produzzjoni li altrimenti tkun ta’ importanza strateġika għall-iżvilupp lokali; produzzjoni soġġetta għal varjazzjonijiet perjodiċi; produzzjoni li tinsab f’żoni partikolarment żvantaġġati; u produzzjoni ta’ prodotti mediċi u tagħmir personali protettiv meħtieġ biex jiġu indirizzati l-kriżijiet tas-saħħa. Jenħtieġ li jkun possibbli għall-awtoritajiet Spanjoli li jemendaw il-lista ta’ prodotti u d-differenzjal tat-taxxa awtorizzat tagħhom, dment li kwalunkwe emenda tkun konformi mal-objettivi tal-Artikolu 349 TFUE.

(18)

L-objettiv li jiġi promoss l-iżvilupp soċjoekonomiku tal-Gżejjer Kanarji huwa rifless fuq livell nazzjonali fl-għan li għalih twaqqfet it-taxxa AIEM u l-allokazzjoni tad-dħul li hija tiġġenera. L-inkorporazzjoni tad-dħul mit-taxxa AIEM fir-riżorsi tas-sistema ekonomika u tat-taxxa tal-Gżejjer Kanarji u l-użu ta’ dak id-dħul għal strateġija ta’ żvilupp ekonomiku u soċjali li tinvolvi l-promozzjoni ta’ attivitajiet lokali hima obbligi legali.

(19)

L-eżenzjonijiet minn jew it-tnaqqis fit-taxxa AIEM jenħtieġ li japplikaw għal seba’ snin. Sabiex il-Kummissjoni tkun tista’ tivvaluta jekk il-kundizzjonijiet li jiġġustifikaw l-awtorizzazzjoni għadhomx issodisfati, jenħtieġ li l-awtoritajiet Spanjoli jissottomettu rapport ta’ monitoraġġ lill-Kummissjoni sat-30 ta’ Settembru 2025.

(20)

Din id-Deċiżjoni hija mingħajr preġudizzju għall-applikazzjoni possibbli tal-Artikoli 107 u 108 TFUE,