(1)

Id-Deċiżjoni tal-Kunsill Nru 189/2014/UE (2) awtorizzat lil Franza tapplika rata mnaqqsa ta’ dazju tas-sisa fuq ir-rum “tradizzjonali” prodott f’Guadeloupe, fil-Guyana Franċiża, f’Martinique u f’Réunion, u mibjugħ fi Franza kontinentali, li tista’ tkun aktar baxxa mir-rata minima tad-dazju tas-sisa stabbilita bid-Direttiva tal-Kunsill 92/84/KEE (3) iżda mhux aktar minn 50 % anqas mir-rata tad-dazju tas-sisa standard nazzjonali fuq l-alkoħol. It-tnaqqis tad-dazju tas-sisa huwa limitat għal kwota annwali ta’ 144 000 ettolitru ta’ alkoħol pur. Dik l-awtorizzazzjoni tiskadi fil-31 ta’ Diċembru 2020.

(2)

Fit-18 ta’ Ottubru 2019, l-awtoritajiet Franċiżi talbu lill-Kummissjoni biex tressaq proposta għal Deċiżjoni tal-Kunsill li testendi l-perjodu tal-awtorizzazzjoni stabbilit fid-Deċiżjoni Nru 189/2014/UE, bi kwota ogħla għal perjodu ta’ seba’ snin, mill-1 ta’ Jannar 2021 sal-31 ta’ Diċembru 2027.

(3)

Minħabba l-iskala żgħira tas-suq lokali, id-distilleriji fl-erba’ reġjuni ultraperiferiċi koperti minn dik l-awtorizzazzjoni jistgħu jiżviluppaw l-attivitajiet tagħhom biss jekk ikollhom aċċess suffiċjenti għas-suq fi Franza kontinentali, li huwa s-suq ewlieni għar-rum tagħhom (65 % tar-rum). Id-diffikultà li għandu r-rum “tradizzjonali” biex jikkompeti fis-suq tal-Unjoni hija kkaġunata minn żewġ parametri: kostijiet ogħla ta’ produzzjoni u taxxi ogħla għal kull flixkun peress li r-rum “tradizzjonali” jiġi tipikament ikkummerċjalizzat b’livelli ogħla ta’ saħħa alkoħolika u fi fliexken akbar.

(4)

Il-kostijiet ta’ produzzjoni tal-katina tal-valur tal-kannamieli-zokkor-rum fl-erba’ reġjuni ultraperiferiċi huma ogħla milli f’reġjuni oħra tad-dinja. B’mod partikolari, il-periferiċità, it-topografija u l-klima diffiċli ta’ dawk l-erba’ reġjuni ultraperiferiċi għandhom impatt konsiderevoli fuq il-kost tal-ingredjenti u tal-produzzjoni. Barra minn hekk, il-kostijiet lavorattivi huwa ħafna ogħla minn dawk f’pajjiżi ġirien peress li l-leġiżlazzjoni soċjali Franċiża hija applikabbli f’Guadeloupe, fil-Guyana Franċiża, f’Martinique u f’Réunion. Dawk ir-reġjuni ultraperiferiċi huma soġġetti wkoll għal standards ambjentali u ta’ sikurezza tal-Unjoni, li jinvolvu investimenti konsiderevoli u kostijiet li mhumiex marbuta direttament mal-produttività, minkejja li parti minn dawk l-investimenti hija kofinanzjata mill-fondi strutturali tal-Unjoni. Barra minn hekk, id-distilleriji f’dawk ir-reġjuni ultraperiferiċi huma iżgħar mid-distilleriji ta’ gruppi internazzjonali. Dan jiġġenera kostijiet ta’ produzzjoni ogħla għal kull unità ta’ produzzjoni.

(5)

Ir-rum “tradizzjonali” mibjugħ fi Franza kontinentali huwa tipikament ikkummerċjalizzat fi fliexken akbar (36 % tar-rum jinbiegħ fi fliexken li jesgħu litru) u b’livelli ogħla ta’ alkoħol (li jvarjaw minn 40° sa 59°) minn prodotti tal-kompetituri bbażati fuq ir-rum, li huma tipikament ikkummerċjalizzati fi fliexken ta’ 0,7 litru b’37,5°. Il-livelli ogħla tal-kontenut tal-alkoħol min-naħa tagħhom iwasslu għal dazji tas-sisa ogħla, “cotisation sur les boissons alcooliques” (magħruf ukoll bħala “vignette sécurité sociale”) (VSS) ogħla u, barra minn hekk, taxxa fuq il-valur miżjud (VAT) ogħla għal kull litru ta’ rum mibjugħ. Għaldaqstant, ir-rata mnaqqsa tad-dazju tas-sisa, li mhix aktar minn 50 % anqas mid-dazju tas-sisa standard nazzjonali fuq l-alkoħol, għadha proporzjonata mal-kostijiet addizzjonali kumulattivi li ġejjin mill-kostijiet ogħla ta’ produzzjoni kif ukoll mid-dazju tas-sisa, mill-VSS u mill-VAT ogħla.

(6)

Għaldaqstant, għandhom jitqiesu l-kostijiet żejda li jitnisslu mill-prattika ta’ kummerċjalizzazzjoni ta’ għaxar snin ta’ bejgħ tar-rum “tradizzjonali” b’livelli ogħla ta’ alkoħol u li, għalhekk, iwasslu għal taxxi ogħla.

(7)

Biex il-vantaġġ fiskali li jkopri kemm id-dazji tas-sisa armonizzati u l-VSS jiġi awtorizzat, dan jeħtieġ li jibqa’ proporzjonat biex ma jdgħajjifx l-integrità u l-koerenza tal-ordni legali tal-Unjoni, inkluż is-salvagwardja ta’ kompetizzjoni mhux imxekkla fis-suq intern u fil-politiki ta’ għajnuna mill-Istat.

(8)

Sal-lum, il-vantaġġ fiskali ma kellux impatt fuq is-suq intern peress li s-sehem mis-suq tar-rum ‘tradizzjonali’ naqas bi 11 % f’dawn l-aħħar snin, minħabba l-konsum dejjem akbar ta’ xorb alkoħoliku bbażat fuq ir-rum.

(9)

Sabiex jiġi evitat li jkun hemm trażżin qawwi tal-iżvilupp ekonomiku tar-reġjuni ultraperiferiċi Franċiżi u biex tiġi ggarantita l-kontinwazzjoni tal-industrija tal-kannamieli-zokkor-rum u l-impjiegi li din l-industrija tipprovdi fir-reġjuni ultraperiferiċi Franċiżi, jeħtieġ li l-kwota annwali tal-awtorizzazzjoni stabbilita fid-Deċiżjoni Nru 189/2014/UE tiżdied u tiġi aġġornata.

(10)

Sabiex jiġi ggarantit li din id-Deċiżjoni ma ddgħajjifx is-suq intern, il-kwantitajiet massimi ta’ rum, li joriġinaw mid-dipartimenti Franċiżi extra-Ewropej eliġibbli għall-miżura, għandhom jiġu ffissati għal 153 000 ettolitru ta’ alkoħol pur kull sena.

(11)

Peress li l-benefiċċju fiskali huwa limitat għal dak li huwa neċessarju biex ipatti għall-kostijiet addizzjonali, u peress li l-volumi kkonċernati huma żgħar u l-benefiċċju fiskali huwa limitat għall-konsum fi Franza kontinentali, il-miżura ma ddgħajjifx l-integrità u l-koerenza tal-ordni legali tal-Unjoni.

(12)

Sabiex il-Kummissjoni tkun tista’ tivvaluta jekk il-kundizzjonijiet li jiġġustifikaw l-awtorizzazzjoni għadhomx jiġu ssodisfati, jenħtieġ li Franza tressaq rapport ta’ monitoraġġ lill-Kummissjoni sat-30 ta’ Settembru 2025.

(13)

Din id-Deċiżjoni hija mingħajr preġudizzju għall-applikazzjoni possibbli tal-Artikoli 107 u 108 tat-Trattat dwar il-Funzjonament tal-Unjoni Ewropa (TFUE),