(1)

Id-Deċiżjoni tal-Kunsill Nru 376/2014/UE (2) awtorizzat lill-Portugall japplika rata mnaqqsa tad-dazju tas-sisa fir-reġjun awtonomu tal-Madeira fir-rigward ta’ rum u likuri prodotti u kkonsmati lokalment u fir-reġjun awtonomu tal-Azores fir-rigward ta’ likuri u eaux-de-vie prodotti u kkonsmati lokalment, li tista’ tkun anqas mir-rata minima tad-dazju tas-sisa stabbilita mid-Direttiva tal-Kunsill 92/84/KEE (3), iżda mhux lil hinn minn 75 % inqas mir-rata tad-dazju tas-sisa standard nazzjonali fuq l-alkoħol.

(2)

Fi Frar 2019, l-awtoritajiet Portugiżi talbu lill-Kummissjoni tressaq proposta għal Deċiżjoni tal-Kunsill li testendi l-limitu taż-żmien tal-awtorizzazzjoni stabbilit fid-Deċiżjoni Nru 376/2014/UE, bl-istess kundizzjonijiet, kif ukoll li testendi l-ambitu ġeografiku għall-Portugall kontinentali bi tnaqqis aktar limitat, għal perjodu ieħor ta’ seba’ snin, mill-1 ta’ Jannar 2021 sal-31 ta’ Diċembru 2027.

(3)

Il-produtturi fir-reġjuni awtonomi ta’ Madeira u tal-Azores iħabbtu wiċċhom ma’ diffikultajiet biex ikollhom aċċess għas-swieq barra minn dawk ir-reġjuni, u s-swieq reġjonali u lokali huma l-uniċi postijiet ta’ bejgħ possibbli biex jinbiegħu ċerti prodotti alkoħoliċi. Dawk il-produtturi jħabbtu wiċċhom ma’ kostijiet addizzjonali peress li l-materja prima ta’ oriġini agrikola, minħabba ċ-ċokon, in-natura fframmentata u l-mekkanizzazzjoni baxxa tal-azjendi agrikoli, tiswa aktar milli f’kundizzjonijiet ta’ produzzjoni normali. Minbarra dan, ir-rendiment mill-ipproċessar tal-kannamiela huwa inqas minn dak ta’ reġjuni ultraperiferiċi oħra, minħabba t-topografija, il-klima, il-ħamrija u l-produzzjoni artiġjanali. Barra minn hekk, it-trasport lejn il-gżejjer ta’ ċerta materja prima u imballaġġ li mhumiex prodotti lokalment iwassal għal kostijiet addizzjonali.

(4)

Fil-każ tal-Azores, l-insularità toħloq problema doppja peress li huma grupp ta’ gżejjer mifruxin fuq żona kbira. It-trasport f’dawk ir-reġjuni mbiegħda u insulari jissoktaw iżidu l-kostijiet addizzjonali. Dan japplika wkoll għal ċerti vvjaġġar u konsenji minn fuq il-baħar neċessarji lejn il-kontinent. Jiġġarrbu wkoll kostijiet addizzjonali għall-ħażna tal-prodotti finali minħabba li l-konsum lokali mhuwiex kapaċi jassorbi r-rendiment kollu, speċjalment fil-każ tal-produzzjoni tar-rum. Iċ-ċokon tas-suq reġjonali jżid il-kostijiet għal kull unità, b’mod partikolari minħabba r-relazzjonijiet sfavorevoli bejn il-kostijiet fissi u r-rendiment. Fl-aħħar nett, il-produtturi kkonċernati jħallsu wkoll kostijiet żejda li ġeneralment ikunu mġarrba mill-ekonomiji lokali, b’mod partikolari, żieda fil-kostijiet marbutin max-xogħol u mal-enerġija.

(5)

Il-produzzjoni tar-rum żdiedet b’riżultat taż-żieda fil-produzzjoni tal-kannamiela. Filwaqt li xi rum jitqaddem jew jintuża bħala bażi għal-likuri, il-kwantitajiet mhux mibjugħa tar-rum jinħażnu b’kost li jissokta jżid il-kostijiet addizzjonali għall-produtturi. Bħala riżultat tal-kostijiet addizzjonali, il-produtturi fir-reġjuni awtonomi ta’ Madeira u tal-Azores mhumiex kapaċi jikkompetu ma’ produtturi minn barra dawk ir-reġjuni minħabba l-prezz ogħla tal-prodott finali u għalhekk ma jistax ikollhom aċċess għal swieq oħra. L-aċċess għas-suq tal-Portugall kontinentali b’rati mnaqqsa tad-dazju tas-sisa jippermetti li tiġi indirizzata din il-kwistjoni.

(6)

Sabiex jiġi evitat li jkun hemm trażżin qawwi tal-iżvilupp tar-reġjuni awtonomi ta’ Madeira u tal-Azores u biex tinżamm l-industrija tal-alkoħol u l-impjiegi li din l-industrija tipprovdi f’dawk ir-reġjuni, jeħtieġ li jiġi aġġornat u jitwessa’ l-kamp ta’ applikazzjoni tal-awtorizzazzjoni stabbilita fid-Deċiżjoni Nru 376/2014/UE.

(7)

Id-Deċiżjoni Nru 376/2014/UE tapplika sal-31 ta’ Diċembru 2020. Għal raġunijiet ta’ ċarezza, huwa meħtieġ li tiġi adottata Deċiżjoni ġdida li tawtorizza lill-Portugall japplika rata mnaqqsa tad-dazju tas-sisa fir-reġjuni awtonomi ta’ Madeira u tal-Azores.

(8)

Peress li l-vantaġġ fuq it-taxxa huwa limitat għal dak li huwa neċessarju biex ipatti għall-kostijiet addizzjonali, u peress li l-volumi kkonċernati għadhom modesti u l-vantaġġ fuq it-taxxa huwa limitat għall-konsum fir-reġjuni awtonomi ta’ Madeira u tal-Azores u fil-Portugall kontinentali, il-miżura ma ddgħajjifx l-integrità u l-koerenza tal-ordni legali tal-Unjoni.

(9)

Sabiex il-Kummissjoni tkun tista’ tivvaluta jekk il-kundizzjonijiet li jiġġustifikaw l-awtorizzazzjoni għadhomx jiġu ssodisfati, jenħtieġ li l-Portugall iressaq rapport ta’ monitoraġġ lill-Kummissjoni sat-30 ta’ Settembru 2025.

(10)

Din id-Deċiżjoni hija mingħajr preġudizzju għall-applikazzjoni possibbli tal-Artikoli 107 u 108 tat-Trattat dwar il-Funzjonament tal-Unjoni Ewropea (TFUE),