(1)

Il-Ftehim ta’ Sħubija fis-Settur tas-Sajd bejn il-Komunità Ewropea u r-Repubblika Iżlamika tal-Mauritania (1) (minn hawn ’il quddiem imsejjaħ “il-Ftehim”), li ġie approvat bir-Regolament tal-Kunsill (KE) Nru 1801/2006 (2), daħal fis-seħħ fit-8 ta’ Awwissu 2008.

(2)

Il-Protokoll tal-Ftehim, li jistabbilixxi l-opportunitajiet tas-sajd u l-kontribuzzjoni finanzjarja previsti fil-Ftehim, li daħal fis-seħħ fl-istess jum għal perijodu ta’ sentejn, ġie sostitwit diversi drabi.

(3)

Fit-8 ta’ Lulju 2019, il-Kunsill awtorizza lill-Kummissjoni tiftaħ negozjati mar-Repubblika Iżlamika tal-Mauritania (minn hawn ’il quddiem imsejħa l-“Mauritania”) għall-konklużjoni ta’ Ftehim ta’ Sħubija ġdid dwar is-Sajd Sostenibbli u Protokoll li jimplimenta dak il-Ftehim.

(4)

Sabiex jiġi evitat li l-attivitajiet tas-sajd jitwaqqfu għal perijodu twil, il-Kunsill awtorizza wkoll lill-Kummissjoni biex tinnegozja estensjoni, għal perijodu massimu ta’ sena, tal-Protokoll għall-Ftehim attwali (3) qabel jiskadi fil-15 ta’ Novembru 2019 (minn hawn ’il quddiem imsejjaħ “il-Protokoll”). Fit-8 ta’ Novembru 2019, il-Kunsill adotta d-Deċiżjoni (UE) 2019/1918 (4) dwar dik l-estensjoni.

(5)

Bejn Settembru 2019 u Frar 2020, saru erba’ sessjonijiet ta’ negozjati mal-Mauritania għall-konklużjoni ta’ ftehim u protokoll ġodda. Dawn in-negozjati ma kinux konklużivi.

(6)

Minħabba s-sitwazzjoni attwali tas-saħħa kkawżata mill-pandemija tal-COVID-19 u minkejja l-ewwel estensjoni tal-protokoll, ġie kkonstatat li n-negozjati għall-konklużjoni ta’ ftehim u protokoll ta’ sħubija ġodda mhumiex se jiġu konklużi fil-ħin u għalhekk mhux se jiġi evitat li l-attivitajiet tas-sajd jitwaqqfu. F’dan il-kuntest, fis-26 ta’ Ġunju 2020 il-Kunsill awtorizza lill-Kummissjoni tinnegozja estensjoni ulterjuri tal-Protokoll għal perijodu massimu ta’ sena.

(7)

Sa ma jitlestew in-negozjati għall-konklużjoni ta’ ftehim u ta’ protokoll ġodda, il-Kummissjoni nnegozjat, f’isem l-Unjoni, ftehim fil-forma ta’ skambju ta’ ittri dwar it-tieni estensjoni għal perijodu massimu ta’ sena, tal-Protokoll li jistabbilixxi l-opportunitajiet tas-sajd u l-kontribuzzjoni finanzjarja previsti fil-Ftehim (minn hawn ’il quddiem imsejjaħ “Ftehim fil-forma ta’ skambju ta’ ittri”). Fi tmiem ta’ dawn in-negozjati, il-Ftehim fil-forma ta’ skambju ta’ ittri ġie inizjalat fis-7 ta’ Lulju 2020.

(8)

Il-Ftehim fil-forma ta’ skambju ta’ ittri għandu l-objettiv li jippermetti lill-Unjoni u lill-Mauritania jkomplu jaħdmu flimkien biex jippromwovu politika tas-sajd sostenibbli u l-użu responsabbli tar-riżorsi tas-sajd fl-ilmijiet tal-Mauritania u li jippermetti lill-bastimenti tal-Unjoni jwettqu l-attivitajiet tas-sajd tagħhom f’dawn l-ilmijiet.

(9)

Biex tiġi żgurata l-kontinwità tal-attivitajiet tas-sajd tal-bastimenti tal-Unjoni fl-ilmijiet tal-Mauritania, jenħtieġ li l-Ftehim fil-forma ta’ skambju ta’ ittri jiġi applikat b’mod provviżorju mis-16 ta’ Novembru 2020 jew minn kwalunkwe data oħra ulterjuri mill-iffirmar tiegħu, f’konformità mal-punt (6) tiegħu.

(10)

Jenħtieġ li l-Ftehim fil-forma ta’ skambju ta’ ittri jiġi ffirmat u applikat fuq bażi provviżorja, sakemm jitlestew il-proċeduri neċessarji għad-dħul fis-seħħ tiegħu,