(1)

Ir-Regolament (UE) 2019/452 tal-Parlament Ewropew u tal-Kunsill (1) stabbilixxa mekkaniżmu ta’ kooperazzjoni bejn il-Kummissjoni u l-Istati Membri dwar investimenti diretti barranin. Dak il-mekkaniżmu huwa bbażat fuq skambju ta’ informazzjoni li jista’ jinkludi data personali skont it-tifsira tal-Artikolu 3(1) tar-Regolament (UE) 2018/1725 tal-Parlament Ewropew u tal-Kunsill (2). L-għan tal-mekkaniżmu ta’ kooperazzjoni huwa li kull Stat Membru jitħalla jeżamina jekk investiment dirett barrani fi Stat Membru ieħor hux kapaċi jaffettwa s-sigurtà jew l-ordni pubbliku tiegħu u l-Kummissjoni biex teżamina jekk investiment dirett barrani hux kapaċi jaffettwa s-sigurtà jew l-ordni pubbliku f’aktar minn Stat Membru wieħed.

(2)

Il-kategoriji ta’ data personali pproċessata mill-Kummissjoni għall-iskrinjar ta’ investimenti diretti barranin mill-Istati Membri u biex jiżguraw l-effettività tal-mekkaniżmu ta’ kooperazzjoni stabbilit mir-Regolament (UE) 2019/452 jinkludu data ta’ identifikazzjoni u ta’ kuntatt, data professjonali u data relatata mal-investiment dirett barrani.

(3)

Id-data personali ser tinżamm mis-servizzi tal-Kummissjoni responsabbli mill-attività ta’ skrinjar sakemm tkun meħtieġa għall-iskrinjar ta’ investimenti diretti barranin mill-Istati Membri u biex jiġi żgurat il-funzjonament tal-mekkaniżmu ta’ kooperazzjoni u se tinħażen f’ambjent elettroniku sigur biex jiġi evitat l-aċċess illegali jew it-trasferiment ta’ data lil persuni barra l-Kummissjoni (3).

(4)

Filwaqt li twettaq il-kompiti tagħha, il-Kummissjoni hija obbligata li tirrispetta d-drittijiet ta’ persuni fiżiċi b’rabta mal-ipproċessar ta’ data personali rikonoxxuta mill-Artikolu 8(1) tal-Karta tad-Drittijiet Fundamentali tal-Unjoni Ewropea u mill-Artikolu 16(1) tat-Trattatdwar il-Fundamentali tal-Unjoni Ewropea, kif ukoll id-drittijiet previsti fir-Regolament (UE) 2018/1725. Fl-istess ħin, il-Kummissjoni hija mitluba li tikkonforma mar-regoli stretti ta’ kunfidenzjalità stabbiliti fl-Artikolu 10 tar-Regolament (UE) 2019/452.

(5)

F’ċerti ċirkustanzi, huwa meħtieġ li jiġu rrikonċiljati d-drittijiet tas-suġġetti tad-data skont ir-Regolament (UE) 2018/1725 mal-ħtieġa ta’ effikaċja tal-mekkaiżmu ta’ kooperazzjoni, kif ukoll b’rispett sħiħ għad-drittijiet fundamentali u l-libertajiet ta’ suġġetti oħra tad-data. F’dan is-sens, l-Artikolu 25(1) tar-Regolament (UE) 2018/1725 jagħti l-possibbiltà lill-Kummissjoni li tirrestrinġi l-applikazzjoni tal-Artikoli 14 sa 17, 19, 20 u 35 tar-Regolament (UE) 2018/1725, kif ukoll il-prinċipju ta’ trasparenza stabbilit fl-Artikolu 4(1)(a) tiegħu, sa fejn id-dispożizzjonijiet tiegħu jikkorrispondu mad-drittijiet u l-obbligi previsti fl-Artikoli 14 sa 17, 19 u 20 ta’ dak ir-Regolament.

(6)

Il-politika kummerċjali komuni tal-Unjoni teħtieġ li l-Kummissjoni twettaq b’mod effettiv u effiċjenti l-kompiti tagħha taħt il-mekkaniżmu ta’ kooperazzjoni. Sabiex tagħmel dan, filwaqt li tħares l-istandards tal-protezzjoni tad-data personali skont ir-Regolament (UE) 2018/1725, jeħtieġ jiġu adottati regoli interni li permezz tagħhom il-Kummissjoni tkun tista’ tirrestrinġi d-drittijiet tas-suġġetti tad-data skont l-Artikolu 25 tar-Regolament (UE) 2018/1725.

(7)

Dawk ir-regoli interni għandhom ikopru l-operazzjonijiet kollha tal-ipproċessar tad-data mwettqa mill-Kummissjoni fit-twettiq tal-funzjonijiet tagħha skont il-mekkaniżmu ta’ kooperazzjoni stabbilit permezz tar-Regolament (UE) 2019/452, mill-mument li fih tirċievi informazzjoni dwar l-investimenti diretti barranin ikkonċernati.

(8)

Biex tikkonforma mal-Artikoli 14, 15 u 16 tar-Regolament (UE) 2018/1725, jenħtieġ li l-Kummissjoni tgħarraf lill-individwi kollha bl-attivitajiet tagħha li jinvolvu l-ipproċessar tad-data personali tagħhom u bid-drittijiet tagħhom b’mod trasparenti u koerenti billi tippubblika avviżi dwar il-protezzjoni tad-data fuq is-sit web tal-Kummissjoni. Fejn ikun rilevanti, jenħtieġ li l-Kummissjoni tippreżenta salvagwardji addizzjonali biex tiżgura li s-suġġetti tad-data jiġu infurmati individwalment f’format xieraq.

(9)

Mingħajr preġudizzju għall-Artikolu 14(5) u l-Artikolu 16(5) tar-Regolament (UE) 2018/1725, il-Kummissjoni għandha l-possibbiltà, fuq il-bażi tal-Artikolu 25 ta’ dak ir-Regolament, tirrestrinġi l-għoti tal-informazzjoni lis-suġġetti tad-data dwar l-ipproċessar tad-data personali tagħhom u l-applikazzjoni tad-drittijiet l-oħrajn tagħhom sabiex tipproteġi s-setgħat tal-Kummissjoni li twettaq l-analiżi u l-proċeduri marbuta mal-iskrinjar tal-investimenti diretti barranin jew il-mekkaniżmu ta’ kooperazzjoni skont ir-Regolament (UE) 2019/452. F’dan ir-rigward, jista’ jkun meħtieġ li l-Kummissjoni tirrestrinġi l-applikazzjoni ta’ dawk id-drittijiet u l-obbligi skont l-Artikolu 25(1)(a), (c), (d), (g) u (h) ta’ dak ir-Regolament. Dan jista’ jkun meħtieġ fejn l-iskop tal-analiżi tal-Kummissjoni u l-proċeduri relatati mal-iskrinjar ta’ investimenti diretti barranin jew il-mekkaniżmu ta’ kooperazzjoni fir-rigward tal-implimentazzjoni effettiva tal-politika kummerċjali komuni tal-Unjoni jista’ jkun ipperikolat.

(10)

Barra minn hekk, biex tinżamm il-kooperazzjoni effettiva, jista’ jkun hemm bżonn li l-Kummissjoni tirrestrinġi l-applikazzjoni tad-drittijiet tas-suġġetti tad-data sabiex tipproteġi l-attivitajiet tal-ipproċessar ta’ istituzzjonijiet, korpi, uffiċċji u aġenziji oħrajn tal-Unjoni jew tal-awtoritajiet tal-Istati Membri. Il-Kummissjoni tista’ tagħmel dan f’sitwazzjoni fejn l-għan tat-tali restrizzjoni min-naħa ta’ istituzzjoni, korp, uffiċċju jew aġenzija oħra tal-Unjoni jew min-naħa ta’ awtorità ta’ Stat Membru jkun ipperikolat fejn il-Kummissjoni ma tapplikax restrizzjoni ekwivalenti għall-istess data personali. Għal dak il-għan, jenħtieġ li l-Kummissjoni tikkonsulta lil dawk l-istituzzjonijiet, lil dawk il-korpi, lil dawk l-uffiċċji, lil dawk l-aġenziji u lil dawk l-awtoritajiet dwar ir-raġunijiet rilevanti għaliex ġew imposti r-restrizzjonijiet u dwar il-ħtieġa u l-proporzjonalità tat-tali restrizzjonijiet.

(11)

Il-Kummissjoni jista’ jkollha tirrestrinġi l-għoti ta’ informazzjoni lis-suġġetti tad-data u l-applikazzjoni ta’ drittijiet oħra tas-suġġetti tad-data fir-rigward tad-data personali li jaslu mill-Istati Membri jew minn oħrajn, kemm jekk ikunu sorsi anonimi jew identifikati, meta dan ikun meħtieġ biex jiġu ssalvagwardjati s-sigurtà nazzjonali, is-sigurtà pubblika jew id-difiża tal-Istati Membri, kif imsemmi fl-Artikolu 25(1)(a) tar-Regolament (UE) 2018/1725, jew għas-salvagwardja tas-sigurtà interna tal-istituzzjonijiet u l-korpi tal-Unjoni, kif imsemmi fl-Artikolu 25(1)(d) ta’ dak ir-Regolament. Is-sigurtà interna tal-istituzzjonijiet u l-korpi tal-Unjoni tista’ tkun involuta b’mod partikolari f’dawk il-każijiet ta’ investiment dirett barrani, li x’aktarx jaffettwaw proġetti jew programmi ta’ interess għall-Unjoni għal raġunijiet ta’ sigurtà jew ordni pubbliku.

(12)

Il-Kummissjoni jista’ jkollha tirrestrinġi wkoll l-għoti ta’ informazzjoni lis-suġġetti tad-data u l-applikazzjoni ta’ drittijiet oħrajn tagħhom b’rabta mad-data personali li hija tirċievi mill-Istati Membri. minn pajjiżi terzi jew mingħand organizzazzjonijiet internazzjonali, sabiex tikkoopera ma’ dawk il-pajjiżi jew ma’ dawk l-organizzazzjonijiet u, b’hekk, tissalvagwardja objettiv importanti ta’ interess pubbliku ġenerali tal-Unjoni, kif imsemmi fl-Artikolu 25(1)(c) tar-Regolament (UE) 2018/1725. Madankollu, f’ċerti ċirkustanzi l-interess tad-drittijiet fundamentali tas-suġġett tad-data jista’ jegħleb l-interess tal-kooperazzjoni internazzjonali.

(13)

Għaldaqstant, fejn meħtieġ għal funzjoni ta’ monitoraġġ, spezzjoni jew regolamentazzjoni marbuta mal-eżerċizzju tal-awtorità uffiċjali tagħha meta twettaq il-kompiti tagħha skont il-mekkaniżmu ta’ kooperazzjoni stabbilit permezz tar-Regolament (UE) 2019/452, il-Kummissjoni jista’ jkollha tirrestrinġi l-għoti ta’ informazzjoni lis-suġġetti tad-data u l-applikazzjoni ta’ drittijiet oħra, kif imsemmi fl-Artikolu 25(1)(g) tar-Regolament (UE) 2018/1725.

(14)

Barra minn hekk, il-Kummissjoni jista’ jkollha tirrestrinġi l-għoti tal-informazzjoni lis-suġġetti tad-data u l-applikazzjoni ta’ drittijiet oħrajn tagħhom b’rabta mad-data personali li tkun irċeviet minn sorsi anonimi jew minn sorsi identifikati, bħall-kollaboraturi fil-ġustizzja, li jeħtieġu l-protezzjoni tad-drittijiet u tal-libertajiet tagħhom, skont l-Artikolu 25(1)(h) tar-Regolament (UE) 2018/1725.

(15)

Għalhekk, il-Kummissjoni identifikat ir-raġunijiet imniżżlin fl-Artikolu 25(1)(a), (c), (d), (g) u (h) tar-Regolament (UE) 2018/1725 bħala raġunijiet għar-restrizzjonijiet li jista’ jkun hemm bżonn biex jiġu applikati l-operazzjonijiet tal-ipproċessar tad-data li twettqu fil-qafas tal-analiżi u l-proċeduri tal-Kummissjoni marbuta mal-iskrinjar tal-investimenti diretti barranin jew il-mekkaniżmu ta’ kooperazzjoni stabbilit peremzz tar-Regolament (UE) 2019/452.

(16)

Jenħtieġ li kull restrizzjoni li ssir abbażi ta’ din id-Deċiżjoni tkun meħtieġa u proporzjonata u tkun tqis ir-riskji li jkun hemm għad-drittijiet u għal-libertajiet tas-suġġetti tad-data.

(17)

Jenħtieġ li l-Kummissjoni tittratta r-restrizzjonijiet kollha b’mod trasparenti u tirreġistra kull applikazzjoni fis-sistema ta’ rekords korrispondenti.

(18)

Il-Kummissjoni tipproċessa data personali skont ir-Regolament (UE) 2019/452 flimkien mal-awtoritajiet kompetenti tal-Istati Membri. Il-valutazzjoni u l-proċeduri tal-Kummissjoni fir-rigward tal-iskrinjar ta’ investimenti diretti barranin jew tal-mekkaniżmu ta’ kooperazzjoni jitwettqu permezz ta’ servizzi differenti, iżda r-responsabbiltà primarja tal-koordinazzjoni tinsab mad-Direttorat Ġenerali responsabbli għall-Kummerċ.

(19)

Skont l-Artikolu 25(8) tar-Regolament (UE) 2018/1725, il-kontrolluri jistgħu jiddiferixxu, iħallu barra jew jiċħdu l-għoti ta’ informazzjoni bażat fuq ir-raġunijiet għall-applikazzjoni ta’ restrizzjoni għas-suġġett tad-data jekk l-għoti ta’ dik l-informazzjoni fi kwalunkwe każ jikkanċella l-effett tar-restrizzjoni. Dan huwa l-każ, b’mod partikulari, fil-każ tar-restrizzjonijiet previsti fl-Artikoli 16 u 35 ta’ dak ir-Regolament.

(20)

Jenħtieġ li l-Kummissjoni tirrevedi b’mod regolari r-restrizzjonijiet imposti sabiex tiżgura li d-drittijiet tas-suġġett tad-data li jiġi infurmat skont l-Artikoli 16 u 35 tar-Regolament (UE) 2018/1725 jiġu ristretti biss għall-perjodu li jkun meħtieġ biex il-Kummissjoni tkun tista’ twettaq l-analiżi u l-proċeduri marbuta mal-iskrinjar ta’ investimenti diretti barranin jew il-mekkaniżmu ta’ kooperazzjoni.

(21)

Fejn jiġu ristretti drittijiet oħra tas-suġġetti tad-data, il-kontrollur jenħtieġ li jivvaluta fuq bażi ta’ każ b’każ jekk il-komunikazzjoni tar-restrizzjoni tikkompromettix l-għan tagħha.

(22)

Jenħtieġ li l-Uffiċjal tal-Protezzjoni tad-Data tal-Kummissjoni jwettaq rieżami indipendenti tal-applikazzjoni tar-restrizzjonijiet bil-għan li jiżgura l-konformità ma’ din id-Deċiżjoni.

(23)

Sabiex il-Kummissjoni tkun tista’ tirrestrinġi l-applikazzjoni ta’ ċerti drittijiet u obbligi b’mod immedjat skont l-Artikolu 25 tar-Regolament (UE) 2018/1725 u biex ma tipperikolax l-analiżi u l-proċeduri relatati mal-iskrinjar tal-investimenti diretti barranin jew dwar il-mekkaniżmu ta’ kooperazzjoni stabbilit peremzz tar-Regolament (UE) 2019/452, din id-Deċiżjoni għandha tidħol fis-seħħ fit-tielet jum wara l-pubblikazzjoni tagħha f’Il-Ġurnal Uffiċjali tal-Unjoni Ewropea.

(24)

Il-Kontrollur Ewropew għall-Protezzjoni tad-Data ġie kkonsultat u ta l-opinjoni tiegħu fid-29 ta’ Lulju 2020,