16.10.2020 |
MT |
Il-Ġurnal Uffiċjali tal-Unjoni Ewropea |
L 343/12 |
DEĊIŻJONI TAL-KUNSILL (UE) 2020/1490
tat-12 ta’ Ottubru 2020
dwar il-pożizzjoni li għandha tittieħed, f’isem l-Unjoni Ewropea, fil-Kumitat tal-FSE stabbilit mill-Ftehim ta’ Sħubija Ekonomika Interim bejn il-Kosta tal-Avorju, fuq naħa, u l-Komunità Ewropea u l-Istati Membri tagħha, fuq in-naħa l-oħra, fir-rigward tal-adozzjoni tal-proċeduri tar-riżoluzzjoni tat-tilwim u tal-kodiċi ta’ kondotta tal-arbitri
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-ewwel subparagrafu tal-Artikolu 207(4), flimkien mal-Artikolu 218(9), tiegħu,
Wara li kkunsidra l-proposta tal-Kummissjoni Ewropea,
Billi:
(1) |
Il-Ftehim ta’ Sħubija Ekonomika Interim bejn il-Kosta tal-Avorju, fuq naħa, u l-Komunità Ewropea u l-Istati Membri tagħha, fuq in-naħa l-oħra (minn hawn ’il quddiem imsejjaħ “il-Ftehim”) (1) ġie ffirmat f’isem l-Unjoni permezz tad-Deċiżjoni tal-Kunsill 2009/156/KE (2). Dan qiegħed jiġi applikat b’mod provviżorju mit-3 ta’ Settembru 2016. |
(2) |
F’konformità mal-Artikolu 59(1) tal-Ftehim, il-Kumitat tal-FSE għandu jadotta r-regolament tal-proċedura li jirregola l-proċeduri tar-riżoluzzjoni tat-tilwim. |
(3) |
Il-Kumitat tal-FSE, fil-laqgħa annwali tiegħu li jmiss, se jkun meħtieġ jadotta deċiżjoni li tistabbilixxi l-proċeduri tar-riżoluzzjoni tat-tilwim u l-kodiċi ta’ kondotta tal-arbitri anness magħhom. |
(4) |
Jenħtieġ li tiġi stabbilita l-pożizzjoni li għandha tittieħed, f’isem l-Unjoni, fil-Kumitat tal-FSE, fir-rigward tal-adozzjoni tad-deċiżjoni li tistabbilixxi l-proċeduri tar-riżoluzzjoni tat-tilwim u l-kodiċi ta’ kondotta tal-arbitri sa fejn din id-deċiżjoni tkun vinkolanti fuq l-Unjoni. |
(5) |
Jenħtieġ għalhekk li l-pożizzjoni tal-Unjoni fil-Kumitat tal-FSE tkun ibbażata fuq l-abbozz ta’ deċiżjoni ta’ dan tal-aħħar, |
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed, f’isem l-Unjoni Ewropea, fil-Kumitat tal-FSE stabbilit mill-Ftehim ta’ Sħubija Ekonomika Interim bejn il-Kosta tal-Avorju, fuq naħa, u l-Komunità Ewropea u l-Istati Membri tagħha, fuq in-naħa l-oħra, hija bbażata fuq l-abbozz ta’ deċiżjoni tal-Kumitat tal-FSE tal-adozzjoni tal-proċeduri tar-riżoluzzjoni tat-tilwim u tal-kodiċi ta’ kondotta tal-arbitri (3).
Artikolu 2
Din id-Deċiżjoni għandha tidħol fis-seħħ fil-jum tal-adozzjoni tagħha.
Magħmul fil-Lussemburgu, it-12 ta’ Ottubru 2020.
Għall-Kunsill
Il-President
J. BORRELL FONTELLES
(2) Id-Deċiżjoni tal-Kunsill 2009/156/KE tal-21 ta’ Novembru 2008 dwar l-iffirmar u l-applikazzjoni provviżorja tal-Ftehim ta’ Sħubija Ekonomika Interim bejn il-Côte d’Ivoire, fuq naħa waħda, u l-Komunità Ewropea u l-Istati Membri tagħha, fuq in-naħa l-oħra (ĠU L 59, 3.3.2009, p. 1).
(3) Ara d-dokument ST 10612/20 hawnhekk: http://register.consilium.europa.eu