DEĊIŻJONI (UE) 2020/1332 TAL-BANK ĊENTRALI EWROPEW

tal-15 ta’ Settembru 2020

li tinnomina kapitajiet ta’ unitajiet ta’ xogħol biex jadottaw deċiżjonijiet iddelegati dwar is-sinifikanza ta’ entitajiet taħt superviżjoni u li tħassar id-Deċiżjoni (UE) 2017/937 (BĊE/2020/40)

Il-Bord Eżekuttiv tal-Bank Ċentrali Ewropew,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra l-Istatut tas-Sistema Ewropea ta’ Banek Ċentrali u tal-Bank Ċentrali Ewropew, u b’mod partikolari l-Artikolu 11.6 tiegħu,

Wara li kkunsidra d-Deċiżjoni (UE) 2017/933 tal-Bank Ċentrali Ewropew tas-16 ta’ Novembru 2016 dwar qafas ġenerali għad-delegazzjoni ta’ setgħat ta’ teħid ta’ deċiżjonijiet għal strumenti legali relatati ma’ kompiti superviżorji (BĊE/2016/40) (1) u b’mod partikolari l-Artikoli 4 u 5 tagħha,

Wara li kkunsidra d-Deċiżjoni (UE) 2017/934 tal-Bank Ċentrali Ewropew tas-16 ta’ Novembru 2016 dwar id-delegazzjoni ta’ deċiżjonijiet dwar is-sinifikanza ta’ entitajiet taħt superviżjoni (BĊE/2016/41) (2), u b’mod partikolari l-Artikolu 2 tagħha,

Billi:

(1)	Ġiet stabbilita proċedura għall-adozzjoni ta’ deċiżjonijiet iddelegati speċifiċi biex tindirizza n-numru konsiderevoli ta’ deċiżjonijiet illi l-Bank Ċentrali Ewropew (BĊE) irid jadotta għat-twettiq tal-kompiti superviżorji tiegħu.

(2)	Deċiżjoni ta’ delega hija effettiva mal-adozzjoni ta’ deċiżjoni mill-Bord Eżekuttiv li taħtar kap ta’ unità ta’ xogħol wieħed jew aktar biex jieħu jew jieħdu deċiżjonijiet abbażi ta’ deċiżjoni ta’ delega.

(3)	L-importanza tad-deċiżjoni ta’ delega u n-numru ta’ destinatarji li lilhom iridu jintbagħtu d-deċiżjonijiet iddelegati għandhom jiġu kkunsidrati mill-Bord Eżekuttiv fil-ħatra ta’ kapijiet ta’ unitajiet ta’ xogħol.

(4)	Id-Deċiżjoni (UE) 2017/937 tal-Bank Ċentrali Ewropew (BĊE/2017/17) (3) tispeċifika l-kapijiet tal-unitajiet ta’ xogħol biex jadottaw deċiżjonijiet delegati skont l-Artikolu 3(1), (2), (3) jew (4) tad-Deċiżjoni (UE) 2017/934 (BĊE/2016/41).

(5)	L-Artikolu 10.1 tad-Deċiżjoni BĊE/2004/2 (4) jipprovdi li l-Bord Eżekuttiv għandu jiddeċiedi dwar in-numru, l-isem u l-kompetenza rispettiva ta’ kull waħda mill-unitajiet ta’ xogħol tal-BĊE.

(6)

Fl-1 ta’ Ottubru 2020, se jsiru bidliet organizzattivi fis-Superviżjoni Bankarja tal-BĊE, inkluż il-ħolqien ta’ żewġ oqsma ta’ ħidma addizzjonali, ir-ridistribuzzjoni tal-kompiti u l-għoti ta’ isem ġdid lill-oqsma ta’ ħidma. B’riżultat ta’ dan, id-Deċiżjoni (UE) 2017/937 (BĊE/2017/17) mhux se tibqa’ tirrifletti l-istruttura organizzattiva tas-Superviżjoni Bankarja tal-BĊE.

(7)	Il-President tal-Bord Superviżorju ġie kkonsultat dwar il-kapijiet ta’ unitajiet ta’ xogħol li lilhom għandha tiġi ddelegata s-setgħa biex jadottaw deċiżjonijiet dwar is-sinifikanza ta’ entitajiet taħt superviżjoni.

(8)	Għalhekk, id-Deċiżjoni (UE) 2017/937 (BĊE/2017/17) għandha titħassar.

ADOTTA DIN ID-DEĊIŻJONI:

Artikolu 1

Deċiżjonijiet iddelegati li jikklassifikaw jew ma jibqgħux jikklassifikaw entità taħt superviżjoni bħala Sinjifikanti fi ħdan grupp Sinjifikanti taħt superviżjoni jew li jbiddlu l-isem ta’ entità Sinjifikanti taħt superviżjoni

Deċiżjonijiet iddelegati skont il-Artikolu 3(1), (2) jew (4) tad-Deċiżjoni (UE) 2017/934 (BĊE/2016/41) għandhom jiġu adottati minn wieħed mill-kapijiet ta’ unitajiet ta’ xogħol li ġejjin:

(a)	id-Direttur Ġenerali jew Deputat Direttur Ġenerali tad-Direttorat Ġenerali Banek Sistemiċi u Internazzjonali, jekk is-superviżjoni tal-entità jew grupp rilevanti taħt superviżjoni titwettaq mid-Direttorat Ġenerali Banek Sistemiċi u Internazzjonali;

(b)	id-Direttur Ġenerali jew Deputat Direttur Ġenerali tad-Direttorat Ġenerali Istituzzjonijiet Universali u Diversifikati, jekk is-superviżjoni tal-entità jew grupp taħt superviżjoni relevanti tkun imwettqa mid-Direttorat Ġenerali Istituzzjonijiet Universali u Diversifikati;

(c)

id-Direttur Ġenerali jew id-Deputat Direttur Ġenerali tad-Direttorat Ġenerali Istituzzjonijiet Speċjalizzati u Istituzzjonijiet Inqas Sinjifikanti, jekk is-superviżjoni tal-entità jew grupp rilevanti taħt superviżjoni titwettaq mid-Direttorat Ġenerali Istituzzjonijiet Speċjalizzati u Istituzzjonijiet Inqas Sinjifikanti.

Artikolu 2

Deċiżjonijiet iddelegati li ma jibqgħux jikklassifikaw entità Sinjifikanti taħt superviżjoni jew grupp Sinjifikanti taħt superviżjoni bħala Sinjifikanti

Deċiżjonijiet iddelegati skont l-Artikolu 3(3) tad-Deċiżjoni (UE) 2017/934 (BĊE/2016/41) għandhom jiġu adottati mid-Direttur Ġenerali jew mid-Deputat Direttur Ġenerali tad-Direttorat Ġenerali Governanza u Operazzjonijiet tal-MSU – jew jekk ma jkunux disponibbli mill-Kap tad-Diviżjoni tal-Awtorizzazzjoni, u minn wieħed mill-kapijiet ta’ unitajiet ta’ xogħol li ġejjin:

(a)	id-Direttur Ġenerali jew Deputat Direttur Ġenerali tad-Direttorat Ġenerali Banek Sistemiċi u Internazzjonali, jekk is-superviżjoni tal-entità jew grupp rilevanti taħt superviżjoni titwettaq mid- Direttorat Ġenerali Banek Sistemiċi u Internazzjonali;

(b)	id-Direttur Ġenerali jew Deputat Direttur Ġenerali tad-Direttorat Ġenerali Istituzzjonijiet Universali u Diversifikati, jekk is-superviżjoni tal-entità jew grupp taħt superviżjoni relevanti tkun imwettqa mid-Direttorat Ġenerali Istituzzjonijiet Universali u Diversifikati;

(c)

Artikolu 3

Revoka u dħul fis-seħħ

1. Id-Deċiżjoni (UE) 2017/937 (BĊE/2017/17) hija mħassra.

2. Din id-Deċiżjoni għandha tidħol fis-seħħ fl-1 ta’ Ottubru 2020.

Magħmul fi Frankfurt am Main, il-15 ta’ Settembru 2020.

Il-President tal-BĊE

Christine LAGARDE

(1) ĠU L 141, 1.6.2017, p. 14.

(2) ĠU L 141, 1.6.2017, p. 18.

(3) I-dDeċiżjoni (UE) 2017/937 tal-Bank Ċentrali Ewropew tat-23 ta’ Mejju 2017 li tinnomina kapijiet ta’ unità ta’ ħidma biex jadottaw deċiżjonijiet iddelegati dwar is-sinifikanza ta’ entitajiet taħt superviżjoni (BĊE/2017/17) (ĠU L 141, 1.6.2017, p. 28).

(4) Id-Deċiżjoni BĊE/2004/2 tad-19 ta’ Frar 2004 li tadotta r-Regoli tal-Proċedura tal-Bank Ċentrali Ewropew (ĠU Edizzjoni Speċjali bil-Malti: Kapitolu 01 Volum 005 p. 46 - 50).