REGOLAMENT (UE) 2019/2160 TAL-PARLAMENT EWROPEW U TAL-KUNSILL

tas-27 ta’ Novembru 2019

li jemenda r-Regolament (UE) Nru 575/2013

fir-rigward ta’ skoperturi fil-forma ta’ bonds koperti

(Test b’rilevanza għaż-ŻEE)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 114 tiegħu,

Wara li kkunsidraw il-proposta mill-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidraw l-opinjoni tal-Bank Ċentrali Ewropew (1),

Wara li kkunsidraw l-opinjoni tal-Kumitat Ekonomiku u Soċjali Ewropew (2),

Filwaqt li jaġixxu skont il-proċedura leġiżlattiva ordinarja (3),

Billi:

(1)

L-Artikolu 129 tar-Regolament (UE) Nru 575/2013 tal-Parlament Ewropew u tal-Kunsill (4) jagħti trattament preferenzjali lil bonds koperti taħt ċerti kundizzjonijiet. Id-Direttiva (UE) 2019/2162 tal-Parlament Ewropew u tal-Kunsill (5) tispeċifika l-elementi ewlenin tal-bonds koperti u tipprevedi definizzjoni komuni tal-bonds koperti.

(2)

Fl-20 ta’ Diċembru 2013, il-Kummissjoni talbet lill-Awtorità Superviżorja Ewropea (Awtorità Bankarja Ewropea) (“EBA”), stabbilita permezz tar-Regolament (UE) Nru 1093/2010 tal-Parlament Ewropew u tal-Kunsill (6), tagħti opinjoni rigward l-adegwatezza tal-piżijiet tar-riskju għal bonds koperti stabbiliti fl-Artikolu 129 tar-Regolament (UE) Nru 575/2013. Skont l-opinjoni tal-EBA tal-1 ta’ Lulju 2014, it-trattament preferenzjali tal-piż tar-riskju previst fir-Regolament (UE) Nru 575/2013 jikkostitwixxi, bħala prinċipju, trattament prudenzjali xieraq. Madankollu, l-EBA rrakkomandat li tingħata aktar konsiderazzjoni sabiex jiġu kkomplementati r-rekwiżiti ta’ eliġibbiltà biex it-trattament preferenzjali tal-piż tar-riskju jkopri, bħala minimu, l-oqsma tal-mitigazzjoni tar-riskju tal-likwidità u tas-sovrakollateralizzazzjoni, ir-rwol tal-awtoritajiet kompetenti, u l-iżvilupp ulterjuri ta’ rekwiżiti eżistenti dwar id-divulgazzjoni lill-investituri.

(3)	Fid-dawl tal-opinjoni tal-EBA, huwa xieraq li jiġu adottati rekwiżiti addizzjonali għal bonds koperti, u b’hekk tissaħħaħ il-kwalità ta’ bonds koperti eliġibbli għal trattament kapitali favorevoli taħt ir-Regolament (UE) Nru 575/2013.

(4)

L-awtoritajiet kompetenti jistgħu jirrinunzjaw parzjalment l-applikazzjoni tar-rekwiżit għal skoperturi għal istituzzjonijiet ta’ kreditu fl-aggregazzjoni ta’ kopertura biex jikkwalifikaw għall-iskala 1 tal-kwalità tal-kreditu u, minflok dan, jippermettu skoperturi sa massimu ta’ 10 % tal-ammont nominali ta’ bonds koperti pendenti tal-istituzzjoni emittenti biex jikkwalifikaw għall-iskala 2 tal-kwalità tal-kreditu. Madankollu, tali rinunzja parzjali tapplika biss wara konsultazzjoni minn qabel mal-EBA u biss fejn problemi potenzjali sinifikanti tal-konċentrazzjoni li jirriżultaw mill-applikazzjoni tar-rekwiżit tal-iskala 1 tal-kwalità tal-kreditu fl-Istati Membri konċernati jistgħu jiġu ddokumentati. Hekk kif il-konformità mar-rekwiżiti għal skoperturi li jikkwalifikaw għall-iskala 1 tal-kwalità tal-kreditu kif magħmula disponibbli minn istituzzjonijiet esterni tal-valutazzjoni tal-kreditu saret dejjem aktar diffiċli fil-biċċa l-kbira tal-Istati Membri, kemm fiż-żona tal-euro kif ukoll barra ż-żona tal-euro, l-applikazzjoni ta’ tali rinunzja parzjali ġiet ikkunsidrata bħala meħtieġa minn dawk l-Istati Membri li jospitaw l-ikbar swieq tal-bonds koperti. Biex jiġi ssimplifikat l-użu ta’ skoperturi għal istituzzjonijiet ta’ kreditu bħala kollateral għal bonds koperti, u sabiex jiġu indirizzati problemi potenzjali ta’ konċentrazzjoni, jeħtieġ li jiġi emendat ir-Regolament (UE) Nru 575/2013 billi tiġi stabbilita regola li tippermetti skoperturi għal istituzzjonijiet ta’ kreditu sa massimu ta’ 10 % tal-ammont nominali tal-bonds koperti pendenti tal-istituzzjoni emittenti biex jikkwalifikaw għall-iskala 2 tal-kwalità tal-kreditu minflok għall-iskala 1 tal-kwalità tal-kreditu mingħajr ir-rekwiżit li l-EBA tiġi kkonsultata. Jeħtieġ li jkun permess l-użu tal-iskala 3 tal-kwalità tal-kreditu għal depożiti ta’ terminu qasir u derivattivi fi Stati Membri speċifiċi fejn il-konformità mar-rekwiżit tal-iskala 1 jew 2 tal-kwalità tal-kreditu tkun diffiċli wisq. L-awtoritajiet kompetenti maħtura skont id-Direttiva (UE) 2019/2162 jenħtieġ li jkunu jistgħu, wara li jikkonsultaw lill-EBA, jippermettu l-użu tal-iskala 3 tal-kwalità tal-kreditu għal kuntratti tad-derivattivi sabiex jindirizzaw problemi potenzjali ta’ konċentrazzjoni.

(5)

Il-kuntratti ta’ self iggarantit permezz ta’ unitajiet superjuri maħruġa mill-Fonds Communs de Titrisation Franċiżi jew maħruġa minn entitajiet ekwivalenti li jittitolizzaw skoperturi fuq proprjetà residenzjali jew proprjetà immobbli kummerċjali huma assi eliġibbli li jistgħu jintużaw bħala kollateral għall-bonds koperti, sa massimu ta’ 10 % tal-ammont nominali tal-ħruġ pendenti ta’ bonds koperti (il-“livell limitu ta’ 10 %”). Madankollu, l-Artikolu 496 tar-Regolament (UE) Nru 575/2013 jippermetti lill-awtoritajiet kompetenti biex jirrinunzjaw il-livell limitu ta’ 10 %. Barra minn hekk, l-Artikolu 503(4) ta’ dak ir-Regolament jirrikjedi li l-Kummissjoni tanalizza l-adegwatezza tad-deroga li tippermetti lil awtoritajiet kompetenti jirrinunzjaw il-livell limitu ta’ 10 %. Fit-22 ta’ Diċembru 2013, il-Kummissjoni talbet lill-EBA tagħti opinjoni f’dak ir-rigward. Fl-opinjoni tagħha, l-EBA sostniet li l-użu ta’ unitajiet superjuri maħruġa mill-Fonds Communs de Titrisation Franċiżi jew maħruġa minn entitajiet ekwivalenti li jittitolizzaw skoperturi fuq proprjetà residenzjali jew proprjetà immobbli kummerċjali jżid it-tħassib prudenzjali minħabba l-istruttura ta’ saff doppju ta’ programm ta’ bonds koperti ggarantit minn unitajiet ta’ titolizzazzjoni u b’hekk iwassal għal nuqqas ta’ trasparenza fir-rigward tal-kwalità tal-kreditu tal-aggregazzjoni ta’ kopertura. Konsegwentement, l-EBA rrakkomandat li d-deroga mil-livell limitu ta’ 10 % għal unitajiet superjuri attwalment prevista fl-Artikolu 496 ta’ dak ir-Regolament titneħħa wara l-31 ta’ Diċembru 2017.

(6)

Huma ftit l-oqfsa nazzjonali ta’ bonds koperti li jippermettu l-inklużjoni fl-aggregazzjoni ta’ kopertura ta’ titoli ggarantiti b’ipoteki residenzjali jew kummerċjali. L-użu ta’ tali strutturi qed jonqos u huwa meqjus li jżid kumplessità bla bżonn għall-programmi ta’ bonds koperti. Għalhekk huwa xieraq li jiġi eliminat għalkollox l-użu ta’ tali strutturi bħala assi eliġibbli.

(7)

Il-bonds koperti maħruġa fi strutturi ta’ bonds koperti aggregati f’intragrupp li jikkonformaw mar-Regolament (UE) Nru 575/2013 intużaw ukoll bħala kollateral eliġibbli. L-istrutturi ta’ bonds koperti aggregati f’intragrupp ma joħolqux riskji addizzjonali minn perspettiva prudenzjali għaliex ma jqajmux l-istess kwistjonijiet ta’ kumplessità bħall-użu ta’ self iggarantit permezz ta’ unitajiet superjuri maħruġa mill-Fonds Communs de Titrisation Franċiżi jew maħruġa minn entitajiet ekwivalenti li jittitolizzaw skoperturi ta’ proprjetà residenzjali jew proprjetà immobbli kummerċjali. Skont l-opinjoni tal-EBA, il-kollateralizzazzjoni ta’ bonds koperti minn strutturi ta’ bonds koperti aggregati f’intragrupp jenħtieġ li tkun permessa mingħajr limiti għall-ammont ta’ bonds koperti pendenti tal-istituzzjoni ta’ kreditu emittenti. Ir-rekwiżit ta’ applikazzjoni tal-limitu ta’ 15 % jew 10 % fir-rigward ta’ skoperturi għal istituzzjonijiet ta’ kreditu tal-istrutturi ta’ bonds koperti aggregati f’intragrupp għalhekk jenħtieġ li jitneħħa. Dawk l-istrutturi ta’ bonds koperti aggregati f’intragrupp huma regolati bid-Direttiva (UE) 2019/2162.

(8)

Il-prinċipji ta’ valutazzjoni għal proprjetà immobbli li tikkollateralizza bonds koperti japplikaw għal bonds koperti sabiex dawk il-bonds jissodisfaw ir-rekwiżiti għal trattament preferenzjali. Ir-rekwiżiti għall-eliġibbiltà tal-assi li jservu bħala kollateral għall-bonds koperti jirrigwardaw il-karatteristiċi ta’ kwalità ġenerali li jiżguraw ir-robustezza tal-aggregazzjoni ta’ kopertura u għalhekk jenħtieġ li jkunu stabbiliti fid-Direttiva (UE) 2019/2162. Għaldaqstant, id-dispożizzjonijiet dwar metodoloġija ta’ valutazzjoni jenħtieġ li jkunu stabbiliti f’dik id-Direttiva u l-istandards tekniċi regolatorji dwar il-valutazzjoni tal-valur tas-self ipotekarju jenħtieġ li ma japplikawx fir-rigward ta’ dawk il-kriterji ta’ eliġibbiltà għal bonds koperti.

(9)

Il-limiti għall-proporzjon bejn is-self u l-valur (“limiti LTV”) huma parti neċessarja li jiżguraw il-kwalità ta’ kreditu tal-bonds koperti. L-Artikolu 129(1) tar-Regolament (UE) Nru 575/2013 jistabbilixxi li l-limiti LTV għall-ipoteki u l-irhna marittimi fuq il-bastimenti iżda ma jispeċifikax kif dawk il-limiti għandhom jiġu applikati. Dan jista’ jwassal għal inċertezza. Il-limiti LTV jenħtieġ li japplikaw bħala limiti ta’ kopertura ratba. Dan ifisser li filwaqt li ma hemm ebda limitu fuq id-daqs ta’ self sottostanti, tali self jista’ jaġixxi bħala kollateral biss fi ħdan limiti LTV għall-assi. Il-limiti LTV jiddeterminaw il-porzjon tal-persentaġġ tas-self li jikkontribwixxi għar-rekwiżit ta’ kopertura għall-obbligazzjonijiet. Huwa għalhekk xieraq li jiġi speċifikat li l-limiti LTV jiddeterminaw il-porzjon tas-self li jikkontribwixxi għall-kopertura tal-bond kopert.

(10)

Sabiex tiġi żgurata aktar ċarezza, jenħtieġ li l-limiti LTV japplikaw matul il-maturità kollha tas-self. Il-limiti LTV attwali jenħtieġ li ma jinbidlux iżda jenħtieġ li jibqgħu’ ta’ 80 % tal-valur tal-proprjetà residenzjali għal self residenzjali, ta’ 60 % tal-valur tal-proprjetà immobbli kummerċjali għal self kummerċjali bil-possibbilta’ ta’ żieda għal 70% ta’ dak il-valur, u ta’ 60 % tal-valur ta’ bastimenti. Il-proprjetà immobbli kummerċjali jenħtieġ li tinftiehem f’konformità mal-interpretazzjoni ġenerali ta’ dak it-tip ta’ proprjetà bħala proprjetà immobbli “mhux residenzjali”, anke meta tkun f’idejn organizzazzjonijiet mingħajr skop ta’ qligħ.

(11)

Sabiex titjieb aktar il-kwalità tal-bonds koperti li jirċievu trattament preferenzjali, tali trattament preferenzjali jenħtieġ li jkun soġġett għal livell minimu ta’ sovrakollateralizzazzjoni, jiġifieri livell ta’ kollateral li jaqbeż ir-rekwiżiti tal-kopertura msemmija fid-Direttiva (UE) 2019/2162. Tali rekwiżit jimmitiga r-riskji l-aktar rilevanti f’każ ta’ insolvenza jew riżoluzzjoni tal-emittent. Deċiżjoni ta’ Stat Membru li japplika livell minimu ogħla ta’ sovrakollateralizzazzjoni għal bonds koperti maħruġa minn istituzzjonijiet ta’ kreditu li jinsabu fit-territorju tiegħu jenħtieġ li ma twaqqafx lill-istituzzjonijiet ta’ kreditu milli jinvestu f’bonds koperti oħra b’livell minimu aktar baxx ta’ sovrakollateralizzazzjoni li jikkonformaw ma’ dan ir-Regolament u milli jibbenefikaw mid-dispożizzjonijiet tiegħu.

(12)

L-istituzzjonijiet ta’ kreditu li jinvestu f’bonds koperti jenħtieġ li jkunu pprovduti b’ċerta informazzjoni dwar dawk il-bonds koperti mill-inqas fuq bażi ta’ kull sitt xhur. Ir-rekwiżiti ta’ trasparenza huma parti indispensabbli ta’ bonds koperti li jiżguraw livell uniformi ta’ divulgazzjoni u li jippermettu lill-investituri jwettqu l-valutazzjoni tar-riskju meħtieġa, u dan itejjeb il-komparabbiltà, it-trasparenza u l-istabbiltà tas-suq. Huwa għalhekk xieraq li jiġi żgurat li r-rekwiżiti ta’ trasparenza japplikaw għall-bonds koperti kollha billi dawk ir-rekwiżiti jiġu stipulati fid-Direttiva (UE) 2019/2162. Għaldaqstant, tali rekwiżiti jenħtieġ li jitneħħew mir-Regolament (UE) Nru 575/2013.

(13)

Il-bonds koperti huma strumenti ta’ finanzjament fuq perjodu ta’ żmien twil, u għalhekk jinħarġu b’maturità skedata ta’ diversi snin. Huwa għalhekk meħtieġ li jiġi żgurat li l-bonds koperti maħruġa qabel il-31 ta’ Diċembru 2007 jew qabel it-8 ta’ Lulju 2022 ma jkunux affettwati minn dan ir-Regolament. Sabiex jintlaħaq dak l-objettiv, bonds koperti maħruġa qabel il-31 ta’ Diċembru 2007 jenħtieġ li jibqgħu eżentati mir-rekwiżiti tar-Regolament (UE) Nru 575/2013 fir-rigward ta’ assi eliġibbli, sovrakollateralizzazzjoni u assi ta’ sostituzzjoni. Barra minn hekk, bonds koperti oħra li jikkonformaw mar-Regolament (UE) Nru 575/2013 u li jinħarġu qabel it-8 ta’ Lulju 2022 jenħtieġ li jiġu eżentati mir-rekwiżiti ta’ sovrakollateralizzazzjoni u assi ta’ sostituzzjoni u jenħtieġ li jkomplu jkunu eliġibbli għal trattament preferenzjali stabbilit f’dak ir-Regolament sal-maturità tagħhom.

(14)

Dan ir-Regolament jenħtieġ li jiġi applikat flimkien mad-dispożizzjonijiet tal-liġi nazzjonali li jittrasponu d-Direttiva (UE) 2019/2162. Sabiex tiġi żgurata l-applikazzjoni konsistenti tal-qafas il-ġdid li jistabbilixxi l-karatteristiċi strutturali ta’ ħruġ ta’ bonds koperti u r-rekwiżiti emendati għal trattament preferenzjali, jenħtieġ li l-applikazzjoni ta’ dan ir-Regolament tiġi differita biex tikkoinċidi mad-data li minnha l-Istati Membri jridu japplikaw id-dispożizzjonijiet tal-liġi nazzjonali li jittrasponu dik id-Direttiva.

(15)	Għalhekk, jenħtieġ li r-Regolament (UE) Nru 575/2013 jiġi emendat kif meħtieġ,

ADOTTAW DAN IR-REGOLAMENT:

Artikolu 1

Emendi għar-Regolament (UE) Nru 575/2013

Ir-Regolament (UE) Nru 575/2013 huwa emendat kif ġej:

(1)

l-Artikolu 129 huwa emendat kif ġej:

(a)

il-paragrafu 1 huwa emendat kif ġej:

(i)

l-ewwel subparagrafu huwa emendat kif ġej:

—

il-parti introduttorja hija sostitwita b’dan li ġej:

“Biex ikunu eliġibbli għat-trattament preferenzjali stabbilit fil-paragrafi 4 u 5 ta’ dan l-Artikolu, il-bonds koperti kif definiti fil-punt (1) tal-Artikolu 3 tad-Direttiva (UE) 2019/2162 tal-Parlament Ewropew u tal-Kunsill (*1) għandhom jissodisfaw ir-rekwiżiti stabbiliti fil-paragrafi 3, 3a u 3b ta’ dan l-Artikolu u għandhom jiġu kollateralizzati permezz ta’ kwalunkwe mill-assi eliġibbli li ġejjin:

—

il-punt (c) huwa sostitwit b’dan li ġej:

“(c)

skoperturi għal istituzzjonijiet ta’ kreditu li jikkwalifikaw għall-iskala 1 tal-kwalità tal-kreditu jew l-iskala 2 tal-kwalità tal-kreditu, jew skoperturi għal istituzzjonijiet ta’ kreditu li jikkwalifikaw għall-iskala 3 tal-kwalità tal-kreditu fejn dawk l-iskoperturi huma fil-forma ta’:

(i)	depożiti ta’ terminu qasir b’maturità oriġinali li ma taqbiżx il-100 jum, fejn jintużaw biex jiġi ssodisfat ir-rekwiżit ta’ riżerva ta’ likwidità tal-aggregazzjoni ta’ kopertura stabbilit fl-Artikolu 16 tad-Direttiva (UE) 2019/2162; jew

(ii)	kuntratti tad-derivattivi li jissodisfaw ir-rekwiżiti tal-Artikolu 11(1) ta’ dik id-Direttiva, fejn ikunu permessi mill-awtoritajiet kompetenti;”;

—

il-punt (d) huwa sostitwit b’dan li ġej:

“(d)	self iggarantit permezz ta’ proprjetà residenzjali li ma jaqbiżx l-inqas ammont tal-ammont ta’ kapital tal-ipoteki li jkunu kkombinati ma’ kwalunkwe ipoteka preċedenti u 80 % tal-valur tal-proprjetajiet mirhuna;”;

—

il-punt (f) huwa sostitwit b’dan li ġej:

“(f)

self iggarantit permezz ta’ proprjetà immobbli kummerċjali li ma jaqbiżx l-inqas ammont tal-ammont tal-kapital tal-ipoteki li jkunu kkombinati ma’ kwalunkwe ipoteka preċedenti u 60 % tal-valur ta’ proprjetajiet mirhuna. Is-self iggarantit permezz ta’ proprjetà immobbli kummerċjali jkun eliġibbli fejn il-proporzjon tas-self għall-valur ta’ 60 % jinqabeż sa livell massimu ta’ 70 % jekk il-valur tal-assi totali mirhuna bħala kollateral għall-bonds koperti jaqbeż l-ammont nominali pendenti fuq il-bonds koperti b’mill-inqas 10 %, u l-pretensjoni tad-detentur tal-bonds tissodisfa r-rekwiżiti ta’ ċertezza legali stabbiliti fil-Kapitolu 4. Il-pretensjoni tad-detentur tal-bonds għandha tieħu preċedenza fuq il-pretensjonijiet l-oħra kollha fuq il-kollateral;”;

(ii)

it-tieni subparagrafu huwa sostitwit b’dan li ġej:

“Għall-finijiet tal-paragrafu 1a, l-iskoperturi kkawżati mit-trażmissjoni u l-ġestjoni tal-pagamenti tad-debituri ta’ self iggarantit permezz ta’ proprjetajiet mirhuna ta’ titoli ta’ dejn jew ikkawżati mit-trażmissjoni u l-ġestjoni ta’ rikavati minn likwidazzjoni fir-rigward ta’ tali self ma għandhomx jiġu inklużi fil-kalkolu tal-limiti msemmija f’dak il-paragrafu.”;

(iii)

it-tielet subparagrafu huwa mħassar;

(b)

jiddaħħlu l-paragrafi li ġejjin:

“1a. Għall-finijiet tal-punt (c) tal-ewwel subparagrafu tal-paragrafu 1, għandu japplika dan li ġej:

(a)	għal skoperturi għal istituzzjonijiet ta’ kreditu li jikkwalifikaw għall-iskala 1 tal-kwalità tal-kreditu, l-iskopertura ma għandhiex taqbeż 15 % tal-ammont nominali ta’ bonds koperti pendenti tal-istituzzjoni ta’ kreditu emittenti;

(b)	għal skoperturi għal istituzzjonijiet ta’ kreditu li jikkwalifikaw għall-iskala 2 tal-kwalità tal-kreditu, l-iskopertura ma għandhiex taqbeż 10 % tal-ammont nominali ta’ bonds koperti pendenti tal-istituzzjoni ta’ kreditu emittenti;

(c)

għal skoperturi għal istituzzjonijiet ta’ kreditu li jikkwalifikaw għall-iskala 3 tal-kwalità tal-kreditu li jieħdu l-forma ta’ depożiti ta’ terminu qasir, kif imsemmija fil-punt (c)(i) tal-ewwel subparagrafu tal-paragrafu 1 ta’ dan l-Artikolu, jew il-forma ta’ kuntratti tad-derivattivi, kif imsemmija fil-punt (c)(ii) tal-ewwel subparagrafu tal-paragrafu 1 ta’ dan l-Artikolu, l-iskopertura totali ma għandhiex taqbeż 8 % tal-ammont nominali ta’ bonds koperti pendenti tal-istituzzjoni ta’ kreditu emittenti; l-awtoritajiet kompetenti maħtura skont l-Artikolu 18(2) tad-Direttiva (UE) 2019/2162 jistgħu, wara li jikkonsultaw lill-EBA, jippermettu skoperturi għal istituzzjonijiet ta’ kreditu li jikkwalifikaw għall-iskala 3 tal-kwalità tal-kreditu fil-forma ta’ kuntratti tad-derivattivi, dment li l-problemi potenzjali sinifikanti ta’ konċentrazzjoni fl-Istati Membri kkonċernati minħabba l-applikazzjoni tar-rekwiżiti tal-iskala 1 u 2 tal-kwalità tal-kreditu msemmija f’dan il-paragrafu jistgħu jiġu ddokumentati;

(d)

l-iskopertura totali għal istituzzjonijiet ta’ kreditu li jikkwalifikaw għall-iskala 1, 2 jew 3 tal-kwalità tal-kreditu ma għandhiex taqbeż 15 % tal-ammont nominali totali ta’ bonds koperti pendenti tal-istituzzjoni ta’ kreditu emittenti u l-iskopertura totali għal istituzzjonijiet ta’ kreditu li jikkwalifikaw għall-iskala 2 jew 3 tal-kwalità tal-kreditu ma għandhiex taqbeż 10 % tal-ammont nominali ta’ bonds koperti pendenti tal-istituzzjoni ta’ kreditu emittenti.

1b. Il-paragrafu 1a ta’ dan l-Artikolu ma għandux japplika għall-użu ta’ bonds koperti bħala kollateral eliġibbli kif permess skont l-Artikolu 8 tad-Direttiva (UE) 2019/2162.

1c. Għall-finijiet tal-punt (d) tal-ewwel subparagrafu tal-paragrafu 1, il-limitu ta’ 80 % għandu japplika fuq bażi ta’ self distint minn self ieħor, għandu jiddetermina l-porzjon tas-self li jikkontribwixxi għall-kopertura ta’ obbligazzjonijiet marbuta mal-bond kopert, u għandu japplika matul il-maturità kollha tas-self.

1d. Għall-finijiet tal-punti (f) u (g) tal-ewwel subparagrafu tal-paragrafu 1, il-limiti ta’ 60 % jew 70 % għandhom japplikaw fuq bażi ta’ self distint minn self ieħor, għandhom jiddeterminaw il-porzjon tas-self li jikkontribwixxi għall-kopertura ta’ obbligazzjonijiet marbuta mal-bond kopert, u għandhom japplikaw matul il-maturità kollha tas-self.”;

(c)

il-paragrafu 3 huwa sostitwit b’dan li ġej:

“3. Fil-każ ta’ proprjetà immobbli u bastimenti li jikkollateralizzaw bonds koperti li jikkonformaw ma’ dan ir-Regolament, ir-rekwiżiti stipulati fl-Artikolu 208 għandhom jiġu ssodisfati. Il-monitoraġġ tal-valuri tal-proprjetà skont il-punt (a) tal-Artikolu 208(3) għandu jsir frekwentement u tal-anqas annwalment għall-proprjetà immobbli u l-bastimenti kollha.”;

(d)

jiddaħħlu l-paragrafi li ġejjin:

‘3a. Minbarra li jkunu kollateralizzati mill-assi eliġibbli elenkati fil-paragrafu 1 ta’ dan l-Artikolu, il-bonds koperti għandhom ikunu soġġetti għal livell minimu ta’ 5 % ta’ sovrakollateralizzazzjoni kif iddefinit fil-punt (14) tal-Artikolu 3 tad-Direttiva (UE) 2019/2162.

Għall-finijiet tal-ewwel subparagrafu ta’ dan l-Artikolu, l-ammont nominali totali tal-assi ta’ kopertura kollha kif definit fil-punt (4) tal-Artikolu 3 ta’ dik id-Direttiva għandu jkun mill-inqas tal-istess valur tal-ammont nominali totali ta’ bonds koperti pendenti (il-“prinċipju nominali”) u għandu jikkonsisti f’assi eliġibbli kif stabbilit fil-paragrafu 1 ta’ dan l-Artikolu.

L-Istati Membri jistgħu jistabbilixxu livell minimu iktar baxx għal sovrakollateralizzazzjoni għal bonds koperti jew jawtorizzaw lill-awtoritajiet kompetenti tagħhom jistabbilixxu tali livell, dment li:

(a)	jew il-kalkolu ta’ sovrakollateralizzazzjoni jkun ibbażat fuq approċċ formali fejn ir-riskju sottostanti tal-assi jittieħed inkunsiderazzjoni, jew il-valutazzjoni tal-assi tkun soġġetta għall-valur tas-self ipotekarju; u

(b)	il-livell minimu ta’ sovrakollateralizzazzjoni ma jkunx inqas minn 2 % abbażi tal-prinċipju nominali msemmi fl-Artikolu 15(6) u (7) tad-Direttiva (UE) 2019/2162.

L-assi li jikkontribwixxu għal livell minimu ta’ sovrakollateralizzazzjoni ma għandhomx ikunu soġġetti għal-limiti fuq id-daqs tal-iskopertura kif stipulat fil-paragrafu 1a u ma għandhomx jingħaddu għall-iskop ta’ dawk il-limiti.

3b. L-assi eliġibbli elenkati fil-paragrafu 1 ta’ dan l-Artikolu jistgħu jiġu inklużi fl-aggregazzjoni ta’ kopertura bħala assi ta’ sostituzzjoni kif definiti fil-punt (13) tal-Artikolu 3 tad-Direttiva (UE) 2019/2162, soġġett għal-limiti fuq il-kwalità tal-kreditu u d-daqs tal-iskopertura kif stipulat fil-paragrafi 1 u 1a ta’ dan l-Artikolu.”;

(e)

il-paragrafi 6 u 7 huma sostitwiti b’dan li ġej:

“6. Bonds koperti maħruġa qabel il-31 ta’ Diċembru 2007 ma għandhomx ikunu soġġetti għar-rekwiżiti stabbiliti fil-paragrafi 1, 1a, 3, 3a u 3b. Għandhom ikunu eliġibbli għal trattament preferenzjali skont il-paragrafi 4 u 5 sal-maturità tagħhom.

7. Bonds koperti maħruġa qabel it-8 ta’ Lulju 2022 li jikkonformaw mar-rekwiżiti stabbiliti f’dan ir-Regolament kif applikabbli fid-data tal-ħruġ tagħhom ma għandhomx ikunu soġġetti għar-rekwiżiti stabbiliti fil-paragrafi 3a u 3b. Għandhom ikunu eliġibbli għal trattament preferenzjali skont il-paragrafi 4 u 5 sal-maturità tagħhom.”;

(2)

fil-punt (a) tal-Artikolu 416(2), il-punt (ii) huwa sostitwit b’dan li ġej:

“(ii)

huma bonds koperti kif definiti fil-punt (1) tal-Artikolu 3 tad-Direttiva (EU) 2019/2162 għajr dawk imsemmija fil-punt (i) ta’ dan il-punt;”;

(3)

fl-Artikolu 425, il-paragrafu 1 huwa sostitwit b’dan li ġej:

“1. L-istituzzjonijiet għandhom jirrappurtaw il-flussi ’l ġewwa tal-likwidità tagħhom. Il-flussi ’l ġewwa tal-likwidità għandhom ikunu limitati għal massimu ta’ 75 % tal-flussi ’l barra tal-likwidità. L-istituzzjonijiet jistgħu jeżentaw flussi ’l ġewwa tal-likwidità minn depożiti li jkunu saru ma’ istituzzjonijiet oħra li jikkwalifikaw għat-trattamenti stabbiliti fl-Artikolu 113(6) jew (7) ta’ dan ir-Regolament minn dak il-limitu massimu.

L-istituzzjonijiet jistgħu jeżentaw flussi ’l ġewwa tal-likwidità minn flejjes dovuti minn mutwatarji jew investituri ta’ bonds fejn dawk il-flussi ’l ġewwa jkunu relatati ma’ self ipotekarju ffinanzjat minn bonds eliġibbli għat-trattament stabbilit fl-Artikolu 129(4), (5) jew (6) ta’ dan ir-Regolament jew minn bonds koperti kif definiti fil-punt (1) tal-Artikolu 3 tad-Direttiva (EU) 2019/2162 minn dak il-limitu massimu. L-istituzzjonijiet jistgħu jeżentaw flussi ’l ġewwa minn self promozzjonali li l-istituzzjonijiet ikunu għaddew. Soġġett għall-approvazzjoni minn qabel tal-awtorità kompetenti responsabbli għas-superviżjoni fuq bażi individwali, l-istituzzjoni tista’ teżenta parzjalment jew kompletament flussi ’l ġewwa fejn il-fornitur tal-likwidità jkun istituzzjoni prinċipali jew istituzzjoni sussidjarja tal-istituzzjoni, jew ditta prinċipali jew sussidjarja ta’ investiment tal-istituzzjoni, jew sussidjarja oħra tal-istess istituzzjoni prinċipali jew tal-istess ditta prinċipali ta’ investiment, jew ikun relatatat mal-istituzzjoni kif stabbilit fl-Artikolu 22(7) tad-Direttiva 2013/34/UE.”;

(4)

fil-punt (b) tal-Artikolu 427(1), il-punt (x) huwa sostitwit b’dan li ġej:

“(x)	obbligazzjonijiet li jirriżultaw minn titoli maħruġa li jikkwalifikaw għat-trattament stipulat fl-Artikolu 129(4) jew (5) ta’ dan ir-Regolament jew minn bonds koperti kif definiti fil-punt (1) tal-Artikolu 3 tad-Direttiva (UE) 2019/2162;”;

(5)

fil-punt (h) tal-Artikolu 428(1), il-punt (iii) huwa sostitwit b’dan li ġej:

“(iii)

finanzjati b’finanzjament simetriku(pass-through) permezz ta’ bonds eliġibbli għat-trattament kif stipulat fl-Artikolu 129(4) jew (5) ta’ dan ir-Regolament jew permezz ta’ bonds koperti kif definiti fil-punt (1) tal-Artikolu 3 tad-Direttiva (UE) 2019/2162;”;

(6)	l-Artikolu 496 huwa mħassar;

(7)

fil-punt 6 tal-Anness III, il-punt (c) huwa sostitwit b’dan li ġej:

“(c)	huma bonds koperti kif definiti fil-punt (1) tal-Artikolu 3 tad-Direttiva (EU) 2019/… għajr dawk imsemmija fil-punt (b) ta’ dan il-punt.”.

Artikolu 2

Dħul fis-seħħ u applikazzjoni

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mit-8 ta’ Lulju 2022.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Strasburgu, is-27 ta’ Novembru 2019.

Għall-Parlament Ewropew

Il-President

D. M. SASSOLI

Għall-Kunsill

Il-President

T. TUPPURAINEN

(1) ĠU C 382, 23.10.2018, p. 2.

(2) ĠU C 367, 10.10.2018, p. 56.

(3) Il-Pożizzjoni tal-Parlament Ewropew tat-18 ta’ April 2019 (għadha mhijiex ippubblikata fil-Ġurnal Uffiċjali) u d-deċiżjoni tal-Kunsill tat-8 ta’ Novembru 2019.

(4) Ir-Regolament (UE) Nru 575/2013 tal-Parlament Ewropew u tal-Kunsill tas-26 ta’ Ġunju 2013 dwar ir-rekwiżiti prudenzjali għall-istituzzjonijiet ta’ kreditu u d-ditti tal-investiment u li jemenda r-Regolament (UE) Nru 648/2012 (ĠU L 176, 27.6.2013, p. 1).

(5) Id-Direttiva (UE) 2019/2162 tal-Parlament Ewropew u tal-Kunsill tas-27 ta’ Novembru 2019 dwar il-ħruġ ta’ bonds koperti u s-superviżjoni pubblika ta’ bonds koperti u li temenda d-Direttivi 2009/65/KE u 2014/59/UE (ara l-paġna 29 ta’ dan il-Ġurnal Uffiċjali).

(6) Ir-Regolament (UE) Nru 1093/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Bankarja Ewropea) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/78/KE (ĠU L 331, 15.12.2010, p. 12).