REGOLAMENT (UE) 2019/2099 TAL-PARLAMENT EWROPEW U TAL-KUNSILL

tat-23 ta’ Ottubru 2019

li jemenda r-Regolament (UE) Nru 648/2012 fir-rigward tal-proċeduri u l-awtoritajiet involuti għall-awtorizzazzjoni ta’ CCPs u r-rekwiżiti għar-rikonoxximent ta’ CCPs ta’ pajjiżi terzi

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 114 tiegħu,

Wara li kkunsidraw il-proposta mill-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidraw l-opinjoni tal-Bank Ċentrali Ewropew (1),

Wara li kkunsidraw l-opinjoni tal-Kumitat Ekonomiku u Soċjali Ewropew (2),

Filwaqt li jaġixxu skont il-proċedura leġiżlattiva ordinarja (3),

Billi:

(1)

Ir-Regolament (UE) Nru 648/2012 tal-Parlament Ewropew u tal-Kunsill (4) jirrikjedi li l-kuntratti tad-derivati OTC standardizzati jiġu kklerjati permezz ta’ kontroparti ċentrali (CCP, central counterparty) konformement ma’ rekwiżiti simili f’pajjiżi oħra tal-G20. Dak ir-Regolament introduċa ukoll rekwiżiti stretti prudenzjali, organizzazzjonali u dwar l-imġiba fin-negozju għas-CCPs u stipula arranġamenti għas-superviżjoni prudenzjali tagħhom sabiex ikunu minimizzati r-riskji għall-utenti ta’ CCPs u sostnuta l-istabbiltà finanzjarja.

(2)

Mill-adozzjoni tar-Regolament (UE) Nru 648/2012, il-volum ta’ attività tas-CCPs fl-Unjoni u globalment kiber rapidament, kemm fid-daqs kif ukoll fl-ambitu. L-espansjoni tal-attività tas-CCPs ser tkompli fis-snin li ġejjin bl-introduzzjoni ta’ obbligi addizzjonali ta’ kklerjar u biż-żieda ta’ kklerjar volontarju mill-kontropartijiet li mhumiex soġġetti għal obbligu ta’ kklerjar. Ir-Regolament (UE) 2019/834 tal-Parlament Ewropew u tal-Kunsill (5) jemenda r-Regolament (UE) Nru 648/2012 b’mod immirat, itejjeb l-effettività u l-proporzjonalità tiegħu, joħloq aktar inċentivi għas-CCPs biex joffru kklerjar ċentrali ta’ derivati lill-kontropartijiet u jiffaċilita l-aċċess għall-ikklerjar lil kontropartijiet żgħar finanzjarji u mhux finanzjarji. Swieq kapitali aktar profondi u aktar integrati li jirriżultaw mill-Unjoni tas-Swieq Kapitali (CMU, Capital Markets Union) ser ikomplu jżidu l-bżonn għal ikklerjar transfruntier fl-Unjoni, biex b’hekk tkompli tiżdied l-importanza u l-interkonnettività tas-CCPs fis-sistema finanzjarja.

(3)

L-għadd ta’ CCPs attwalment stabbiliti fl-Unjoni u awtorizzati taħt ir-Regolament (UE) Nru 648/2012 għadu relattivament limitat, u fis-16 ta’ Awwissu 2019 kien jgħodd 16. Taħt dak ir-Regolament ġew rikonoxxuti mill-Awtorità Ewropea tat-Titoli u s-Swieq (AETS) 33 CCP ta’ pajjiżi terzi, li jippermettilhom li joffru s-servizzi tagħhom lil membri tal-ikklerjar u ċentri tan-negozjar stabbiliti fl-Unjoni. Is-swieq tal-ikklerjar huma integrati tajjeb madwar l-Unjoni iżda kkonċentrati ħafna f’ċerti klassijiet ta’ assi u interkonnessi ħafna. Minħabba l-konċentrazzjoni tar-riskju, il-probabbiltà li CCP tfalli hija baxxa ħafna iżda jekk isseħħ ikollha impatt potenzjalment qawwi ħafna. F’konformità mal-konsensus tal-G20, il-Kummissjoni adottat proposta għal Regolament dwar l-irkupru u r-riżoluzzjoni ta’ CCPs f’Novembru 2016 sabiex tiżgura li l-awtoritajiet ikunu mħejjija kif suppost biex jindirizzaw CCP li tkun qed tfalli, biex b’hekk jissalvagwardjaw l-istabbiltà finanzjarja u jillimitaw l-ispejjeż tal-kontribwenti tat-taxxa.

(4)

Minkejja dik il-proposta leġislattiva u fid-dawl tad-daqs, il-kumplessità u d-dimensjoni transfruntiera tal-ikklerjar li qed jikbru kemm fl-Unjoni kif ukoll globalment, l-arranġamenti superviżorji għas-CCPs tal-Unjoni kif ukoll dawk ta’ pajjiżi terzi jenħtieġ li jiġu kkunsidrati mill-ġdid. Jekk il-problemi identifikati jiġu indirizzati fi stadju bikri u jiġu stabbiliti arranġamenti superviżorji ċari u koerenti kemm għas-CCPs tal-Unjoni kif ukoll għal dawk tal-pajjiżi terzi, l-istabbiltà globali tas-sistema finanzjarja tal-Unjoni għandha tissaħħaħ u r-riskju potenzjali ta’ falliment ta’ CCP għandu jkompli jonqos.

(5)

Fid-dawl ta’ dawk il-kunsiderazzjonijiet, fl-4 ta’ Mejju 2017 il-Kummissjoni adottat Komunikazzjoni dwar ir-reazzjoni għal sfidi li jiffaċċaw l-infrastrutturi finanzjarji kritiċi tas-suq u dwar l-iżvilupp ulterjuri tas-CMU, u fiha ddikjarat li hemm bżonn ta’ aktar tibdil fir-Regolament (UE) Nru 648/2012 sabiex jitjieb il-qafas kurrenti li jiżgura l-istabbiltà finanzjarja u jappoġġa l-iżvilupp u l-approfondiment ulterjuri tal-Unjoni tas-Swieq Kapitali.

(6)

L-arranġamenti superviżorji taħt ir-Regolament (UE) Nru 648/2012 jiddependu l-aktar fuq l-awtorità tal-pajjiż ta’ oriġini. CCPs stabbiliti fl-Unjoni bħalissa huma awtorizzati u ssorverljati minn awtoritajiet kompetenti tal-Istati Membri f’kooperazzjoni ma’ kulleġġi magħmulin minn superviżuri nazzjonali, mill- AETS, minn membri rilevanti tas-Sistema Ewropea ta’ Banek Ċentrali (SEBĊ), u minn awtoritajiet rilevanti oħra. Il-kulleġġi jiddependu fuq il-koordinazzjoni u l-kondiviżjoni ta’ informazzjoni mill-awtorità kompetenti tas-CCP li għandha r-responsabbiltà li tinforza d-dispożizzjonijiet stipulati fir-Regolament (UE) Nru 648/2012. Id-diverġenzi fil-prassi superviżorji għas-CCPs madwar l-Unjoni jistgħu joħolqu riskji ta’ arbitraġġ regolatorju u superviżorju, jipperikolaw l-istabbiltà finanzjarja u jirriżultaw f’kompetizzjoni dannuża. Fil-Komunikazzjoni tagħha tal-14 ta’ Settembru 2016 dwar is-CMU u fil-konsultazzjoni pubblika dwar l-operazzjonijiet tal-Awtoritajiet Superviżorji Ewropej (ASE), il-Kummissjoni ġibdet l-attenzjoni lejn dawk ir-riskji emerġenti u l-bżonn ta’ konverġenza superviżorja akbar. Fi ħdan il-qafas tar-rwol ġenerali diġà eżistenti tal-AETS li twettaq rwol ta’ koordinazzjoni bejn awtoritajiet kompetenti u fost il-kulleġġi bil-għan li tiżviluppa kultura superviżorja komuni u prattika superviżorja konsistenti, filwaqt li tiżgura proċeduri uniformi u approċċi konsistenti, u li ssaħħaħ il-konsistenza fl-eżiti ta’ superviżjoni, jenħtieġ li l-AETS tiffoka b’mod partikolari fuq oqsma superviżorji li għandhom dimensjoni transfruntiera jew impatt transfruntier possibbli. Jenħtieġ li l-AETS tiddetermina l-oqsma superviżorji li għandhom dimensjoni transfruntiera jew impatt transfruntier possibbli bbażati fuq l-għarfien espert u l-esperjenza tagħha fl-applikazzjoni tar-Regolament (UE) Nru 648/2012.

(7)

Fid-dawl tan-natura globali tas-swieq finanzjarji u tal-ħtieġa li jiġu indirizzati l-inkonsistenzi fis-superviżjoni tal-Unjoni u tas-CCPs ta’ pajjiżi terzi, il-kapaċità tal-AETS li tippromwovi l-konverġenza fis-superviżjoni tas-CCPs jenħtieġ li tissaħħaħ. Għal dak il-għan, jenħtieġ li jitwaqqaf kumitat intern permanenti għas-CCPs (“Kumitat Superviżorju tas-CCPs”) sabiex jittratta l-kompiti li jirrigwardaw is-CCPs awtorizzati fl-Unjoni u CCPs ta’ pajjiżi terzi. Jenħtieġ li l-istabbiliment, il-funzjonijiet u l-kompożizzjoni tal-Kumitat ta’ Superviżjoni tas-CCPs stabbilit fi ħdan l-AETS jkunu soluzzjoni unika biex iġibu flimkien l-għarfien espert fil-qasam tas-superviżjoni tas-CCPs u jenħtieġ li ma jikkostitwixxux preċedent għall-ASE.

(8)	Il-Kumitat Superviżorju tas-CCPs jenħtieġ li jkun responsabbli għal kompiti speċifiċi assenjati lilu skont ir-Regolament (UE) Nru 648/2012 sabiex ikun żgurat il-funzjonament tajjeb tas-suq intern kif ukoll l-istabbiltà finanzjarja tal-Unjoni u l-Istati Membri tagħha.

(9)

Sabiex jinkludi l-firxa sħiħa ta’ esperjenza prattika u għarfien espert operazzjonali fir-rigward tas-superviżjoni tas-CCPs, jenħtieġ li l-Kumitat Superviżorju tas-CCPs ikun magħmul minn President, membri indipendenti, u l-awtoritajiet kompetenti tal-Istati Membri b’CCP awtorizzata. Jenħtieġ li, meta l-Kumitat Superviżorju tas-CCPs jiltaqa’ fir-rigward ta’ CCPs awtorizzati, il-banek ċentrali tal-ħruġ fil-muniti tal-Unjoni tal-istrumenti finanzjarji kklerjati minn CCPs jkunu jistgħu, fuq bażi volontarja, jipparteċipaw fil-Kumitat Superviżorju tas-CCPs b’rabta maż-żoni ta’ valutazzjonijiet fl-Unjoni kollha tar-reżiljenza tas-CCPs għal żviluppi negattivi fis-suq u żviluppi tas-suq rilevanti, biex jiġi ffaċilitat l-aċċess għal informazzjoni li tista’ tkun rilevanti għat-twettiq tal-kompiti tagħhom. Jenħtieġ li, meta l-Kumitat Superviżorju tas-CCPs jiltaqa’ fir-rigward ta’ CCPs ta’ pajjiżi terzi, il-banek ċentrali tal-ħruġ tal-muniti kollha tal-Unjoni tal-istrumenti finanzjarji kklerjati jew li għandhom jiġu kklerjati minn CCP ta’ pajjiż terz rispettiv jkunu jistgħu, fuq bażi volontarja, jipparteċipaw fil-Kumitat Superviżorju tas-CCPs għat-tħejjija ta’ deċiżjonijiet fir-rigward ta’ CCPs ta’ pajjiżi terzi li jkunu sistemikament importanti, jew x’aktarx li jsiru sistemikament importanti, għall-istabbiltà finanzjarja tal-Unjoni jew ta’ wieħed jew aktar mill-Istati Membri tagħha (CCPs tal-Grad 2). Il-banek ċentrali tal-ħruġ jenħtieġ li jkunu membri mingħajr id-dritt tal-vot fil-Kumitat Superviżorju tas-CCPs. Il-President tal-Kumitat Superviżorju tas-CCPs jenħtieġ li jkun jista’ jistieden membri tal-kulleġġi bħala osservaturi sabiex ikun żgurat li jittieħed kont tal-opinjonijiet ta’ awtoritajiet rilevanti oħra mill-Kumitat Superviżorju tas-CCPs.

(10)

Sabiex ikun previst livell xieraq ta’ għarfien espert u responsabilizzazzjoni, jenħtieġ li l-President u l-membri indipendenti tal-Kumitat Superviżorju tas-CCP jinħatru mill-Bord tas-Superviżuri tal-AETS (“il-Bord tas-Superviżuri”) abbażi tal-mertu, l-għarfien dwar kwistjonijiet ta’ kklerjar, ta’ segwitu wara n-negozjar, ta’ superviżjoni prudenzjali, u ta’ finanzi, kif ukoll abbażi ta’ esperjenza rilevanti għas-superviżjoni u r-regolamentazzjoni tas-CCPs, wara proċedura ta’ għażla miftuħa organizzata u ġestita mill-Bord tas-Superviżuri, assistit mill-Kummissjoni, li jenħtieġ li tirrispetta l-prinċipju tal-bilanċ bejn is-sessi. Qabel il-ħatra tal-President u l-membri indipendenti tal-Kumitat Superviżorju tas-CCPs, u sa xahar wara l-għażla tagħhom mill-Bord tas-Superviżuri, jenħtieġ li l-Parlament Ewropew, wara li jkun sema’ lill-persuni magħżulin, japprova jew jirrifjuta n-nomina tagħhom. Huma biss il-kandidati magħżulin approvati mill-Parlament Ewropew li jistgħu jinħatru mill-Bord tas-Superviżuri.

(11)

Sabiex ikunu żgurati t-trasparenza u l-kontroll demokratiku, kif ukoll sabiex jiġu salvagwardati d-drittijiet tal-istituzzjonijiet tal-Unjoni, il-President u l-membri indipendenti tal-Kumitat Superviżorju tas-CCPs jenħtieġ li jkunu responsabbli lejn il-Parlament Ewropew u l-Kunsill għal kull deċiżjoni li jieħdu abbażi tar-Regolament (UE) Nru 648/2012.

(12)

Il-President u l-membri indipendenti tal-Kumitat Superviżorju tas-CCPs jenħtieġ li jaġixxu indipendentement u oġġettivament fl-interess tal-Unjoni. Jenħtieġ li jiżguraw li jittieħed kont kif xieraq tal-funzjonament tajjeb tas-suq intern kif ukoll tal-istabbiltà finanzjarja f’kull Stat Membru, kemm b’CCPs awtorizzati kif ukoll mingħajrhom, u fl-Unjoni.

(13)

Sabiex ikun żgurat li jkun hemm proċess adatt, effettiv u rapidu ta’ teħid ta’ deċiżjonijiet fil-Kumitat Superviżorju tas-CCPs, il-President, il-membri indipendenti, u l-awtoritajiet kompetenti tal-Istati Membri b’CCP awtorizzata jenħtieġ li jkollhom drittijiet tal-vot. Ir-rappreżentanti tal-bank/banek ċentrali, kif ukoll l-osservaturi, jenħtieġ li ma jkollhomx drittijiet tal-vot. Jenħtieġ li l-Kumitat Superviżorju tas-CCPs jieħu d-deċiżjonijiet tiegħu b’maġġoranza sempliċi tal-membri tiegħu, u jenħtieġ li kull membru jkollu vot wieħed u jenħtieġ li l-President ikollu d-dritt tal-vot deċiżiv f’każ ta’ parità. Is-setgħa deċiżjonali finali jenħtieġ li tibqa’ għand il-Bord tas-Superviżuri.

(14)

Sabiex jiżgura approċċ superviżorju koerenti u konsistenti fi ħdan l-Unjoni, il-Kumitat Superviżorju tas-CCPs jenħtieġ li jkun responsabbli għat-tħejjija ta’ ċerti deċiżjonijiet speċifiċi u t-twettiq ta’ ċerti kompiti li huma fdati f’idejn l-AETS. Tali responsabbiltajiet isaħħu r-rwol ta’ koordinazzjoni tal-AETS bejn l-awtoritajiet kompetenti u fost il-kulleġġi bil-għan li jiġu żviluppati kultura superviżorja komuni u prattiki superviżorji konsistenti, b’mod speċjali fir-rigward ta’ oqsma superviżorji li għandhom dimensjoni transfruntiera jew impatt transfruntier possibbli. F’dak ir-rigward, tali attivitajiet u deċiżjonijiet superviżorji rilevanti jistgħu jinkludu b’mod partikolari oqsma superviżorji fejn prattiki superviżorji diverġenti jistgħu joħolqu riskji ta’ arbitraġġ regolatorju u superviżorju jew jipperikolaw l-istabbiltà finanzjarja. L-AETS jenħtieġ li tkun infurmata wkoll bl-opinjonijiet kollha adottati minn kulleġġi previsti fir-Regolament (UE) Nru 648/2012, inkluża l-bażi tat-teħid tad-deċiżjonijiet li magħha tirrelata l-opinjoni tal-kulleġġ u kwalunkwe rakkomandazzjoni marbuta ma’ dawk l-opinjonijiet mill-kulleġġ.

(15)

Barra minn hekk, jenħtieġ li fi ħdan il-Kumitat Superviżorju tas-CCPs jsiru skambju ex ante obbligatorju u diskussjoni dwar abbozzi ta’ deċiżjonijiet ta’ awtoritajiet kompetenti tas-CCPs dwar ċerti oqsma superviżorji ta’ importanza partikolari. Barra minn hekk, fuq bażi volontarja u fuq l-inizjattiva tal-awtoritajiet kompetenti tas-CCPs, jenħtieġ li l-abbozzi tad-deċiżjonijiet kollha jkunu jistgħu jkunu soġġetti għal skambju fuq bażi ex ante. L-AETS jenħtieġ li ma tipprovdix opinjoni fejn, bħala riżultat tal-eżitu tad-diskussjoni fi ħdan il-Kumitat Superviżorju tas-CCPs, ma tkun ġiet identifikata l-ebda opinjoni diverġenti. Jenħtieġ li s-setgħa biex l-AETS tipprovdi opinjonijiet tiżgura li l-awtorità kompetenti tas-CCP tirċievi ammont addizzjonali ta’ reazzjoni dwar abbozzi ta’ deċiżjonijiet minn grupp ta’ superviżuri speċjalizzat u b’esperjenza fis-superviżjoni ta’ CCPs. Tali opinjonijiet mill-AETS jenħtieġ li ma jkollhom l-ebda implikazzjoni għar-responsabbiltà tal-awtorità kompetenti tas-CCP li tieħu d-deċiżjoni finali, li jfisser li l-kontenut finali tad-deċiżjoni rispettiva jibqa’ fid-diskrezzjoni sħiħa tal-awtorità kompetenti tas-CCP. Meta l-awtorità kompetenti ma taqbilx ma’ opinjoni tal-AETS, jenħtieġ li tipprovdi kummenti lill-AETS dwar kwalunkwe devjazzjoni sinifikanti minn dik l-opinjoni. Jenħtieġ li l-awtorità’ kompetenti tkun tista’ tipprovdi kummenti qabel, jew fl-istess waqt ta’, jew wara l-adozzjoni ta’ deċiżjoni. Madankollu, fejn l-awtorità kompetenti tipprovdi kummenti wara li tadotta deċiżjoni, jenħtieġ li hija tagħmel dan mingħajr dewmien żejjed. L-opinjoni pprovduta mill-AETS jenħtieġ li ma tinterferixxix mas-setgħa tal-kulleġġi li jiddeterminaw il-kontenut tal-opinjoni tagħhom skont id-diskrezzjoni tagħhom, fejn applikabbli.

(16)

Fejn l-attivitajiet superviżorji fir-rigward ta’ CCPs awtorizzati juru nuqqas ta’ konverġenza u koerenza fl-applikazzjoni tar-Regolament (UE) Nru 648/2012, inkluż fuq il-bażi ta’ konsultazzjoni obbligatorja u volontarja tal-AETS mill-awtoritajiet kompetenti u d-diskussjonijiet fil-Kumitat Superviżorju tas-CCPs, l-AETS jenħtieġ li tippromwovi l-livell neċessarju ta’ konverġenza u konsistenza, inkluż bil-ħruġ ta’ linji gwida, rakkomandazzjonijiet jew opinjonijiet. Sabiex jiġi ffaċilitat dak il-proċess, jenħtieġ li l-Kumitat Superviżorju tas-CCPs ikun jista’ jitlob li l-Bord tas-Superviżuri jikkunsidra l-adozzjoni ta’ linji gwida, rakkomandazzjonijiet u opinjonijiet mill-AETS. Jenħtieġ li l-Kumitat Superviżorju tas-CCPs ikun jista’ wkoll jagħti opinjonijiet lill-Bord tas-Superviżuri dwar deċiżjonijiet li għandhom jittieħdu mill-AETS dwar il-kompiti u l-attivitajiet tal-awtoritajiet kompetenti tas-CCP. Jenħtieġ li l-Kumitat Superviżorju tas-CCPs jipprovdi, pereżempju, opinjonijiet dwar abbozzi ta’ standards tekniċi jew abbozzi ta’ linji gwida żviluppati mill-AETS fil-qasam tal-awtorizzazzjoni u s-superviżjoni tas-CCPs.

(17)

Biex jipprovdi superviżjoni effettiva fir-rigward ta’ CCPs ta’ pajjiżi terzi, jenħtieġ li l-Kumitat Superviżorju tas-CCPs iħejji abbozzi sħaħ ta’ deċiżjonijiet għall-approvazzjoni mill-Bord tas-Superviżuri u jwettaq kompiti fdati f’idejn l-AETS fir-rigward tad-dispożizzjonijiet dwar ir-rikonoxximent u s-superviżjoni ta’ CCPs ta’ pajjiżi terzi stabbiliti fr-Regolament (UE) Nru 648/2012. Minħabba li l-kooperazzjoni u l-informazzjoni huma essenzjali, jenħtieġ li l-Kumitat Superviżorju tas-CCPs, meta jiltaqa’ rigward CCPs ta’ pajjiżi terzi, jikkondividi informazzjoni rilevanti mal-kulleġġ tas-CCPs ta’ pajjiżi terzi, inklużi abbozzi sħaħ ta’ deċiżjonijiet li huwa jressaq quddiem il-Bord tas-Superviżuri, deċiżjonijiet finali adottati mill-Bord tas-Superviżuri, aġendi u minuti tal-laqgħat tal-Kumitat Superviżorju tas-CCPs u applikazzjonijiet għal rikonoxximent minn CCPs stabbiliti f’pajjiż terz.

(18)

Sabiex tiġi żgurata l-prestazzjoni effettiva tal-kompiti tiegħu, il-Kumitat Superviżorju tas-CCP jenħtieġ li jkun appoġġat minn persunal dedikat mill-AETS biex iħejji l-laqgħat tiegħu, iħejji l-analiżijiet meħtieġa biex jitwettqu l-kompiti tiegħu u jappoġġah fil-kooperazzjoni internazzjonali tiegħu.

(19)

Jenħtieġ li l-banek ċentrali tal-ħruġ jiġu involuti fit-tħejjija ta’ deċiżjonijiet mill-Kumitat Superviżorju tas-CCPs b’rabta mal-klassifikazzjoni ta’ CCPs ta’ pajjiżi terzi skont l-importanza sistemika tagħhom u s-superviżjoni ta’ CCPs tal-Grad 2 sabiex jiżguraw l-eżerċizzju xieraq tal-kompiti tagħhom relatati mal-politika monetarja u l-operat mingħajr xkiel tas-sistemi ta’ pagament. Billi d-deċiżjonijiet mill-AETS fir-rigward ta’ CCPs tal-Grad 2 dwar -rekwiżiti tal-marġini, kontroll tar-riskju tal-likwidità, il-kollateral, is-saldu u l-approvazzjoni ta’ arranġamenti ta’ interoperabbiltà jistgħu jkunu ta’ relevanza partikolari għall-kompiti tal-banek ċentrali, jenħtieġ li l-Kumitat Superviżorju tas-CCPs jikkonsulta lill-banek ċentrali tal-ħruġ tal-muniti kollha tal-Unjoni tal-istrumenti finanzjarji kklerjati jew li għandhom jiġu kklerjati permezz tas-CCPs ta’ pajjiżi terzi abbażi ta’ mekkaniżmu ta’ “ikkonforma jew spjega”.

(20)

Jenħtieġ li l-Bord tas-Superviżuri jadotta l-abbozzi ta’ deċiżjonijiet ippreżentati mill-Kumitat Superviżorju tas-CCPs, li jaġixxi skont il-proċess tat-teħid ta’ deċiżjonijiet stabbilit fir-Regolament (UE) Nru 1095/2010 tal-Parlament Ewropew u tal-Kunsill (6). Sabiex jiġi żgurat proċess effettiv u rapidu ta’ teħid tad-deċiżjonijiet, ċerti deċiżjonijiet li ma għandhomx x’jaqsmu mar-rikonoxximent, il-klassifikazzjoni ta’ CCPs ta’ pajjiżi terzi, rekwiżiti speċifiċi imposti fuq CCPs tal-Grad 2, rieżami jew l-irtirar tar-rikonoxximent jew mal-elementi essenzjali tas-superviżjoni kurrenti ta’ CCPs ta’ pajjiżi terzi, fejn tkun meħtieġa konsultazzjoni mal-banek ċentrali tal-ħruġ, jenħtieġ li jiġu adottati mill-Bord tas-Superviżuri fi żmien tlett ijiem ta’ xogħol.

(21)

Sabiex tkompli tippromwovi l-konverġenza dwar deċiżjonijiet superviżorji, jenħtieġ li l-AETS tirċievi mandati ġodda biex tiżviluppa abbozzi ta’ standards tekniċi regolatorji dwar l-estensjoni ta’ attivitajiet u servizzi u sabiex tispeċifika l-kondizzjonijiet li taħthom ikunu kkunsidrati bħala sinifikanti bidliet fil-mudelli u l-parametri. Barra minn hekk, jenħtieġ li l-AETS toħroġ linji gwida meħtieġa biex tispeċifika aktar il-proċeduri komuni għar-rieżami superviżorju u l-proċess ta’ evalwazzjoni fir-rigward tas-CCPs.

(22)

Il-funzjonament tal-kulleġġi stabbiliti għal CCPs tal-Unjoni huwa kruċjali għal superviżjoni effettiva tas-CCPs. Sabiex tiġi żgurata koerenza mal-Unjoni kollha tal-proċessi fi ħdan il-kulleġġi, jenħtieġ li l-ftehimiet bil-miktub li jiddeterminaw l-arranġamenti prattiċi għall-funzjonament tal-kulleġġi jiġu rfinuti u standardizzati aktar. Biex jiġi promoss aktar ir-rwol tal-membri ta’ kulleġġi, jenħtieġ li dawn ikunu intitolati li jikkontribwixxu fit-tfassil tal-aġenda ta’ laqgħat tal-kulleġġ. Biex tiżdied it-trasparenza tal-kulleġġi, jenħtieġ li il-kompożizzjoni tagħhom tkun pubblika. Sabiex jiġi evitat kwalunkwe kunflitt ta’ interess, ir-Regolament tal-Kunsill (UE) Nru 1024/2013 (7) jistipula li l-kompiti superviżorji tal-BĊE u l-kompiti relatati mal-politika monetarja u kwalunkwe inkarigu ieħor tagħha jenħtieġ li jitwettqu b’mod kompletament separat. Dik is-separazzjoni speċifika tar-responsabbiltajiet tal-BĊE jenħtieġ li tiġi rikonoxxuta. Għaldaqstant, fejn il-BĊE huwa membru ta’ kulleġġ stabbilit għal CCP tal-Unjoni minħabba l-funzjonament tiegħu bħala awtorità kompetenti ta’ membru tal-ikklerjar fi ħdan il-Mekkaniżmu Superviżorju Uniku kif ukoll minħabba l-funzjonament tiegħu bħala bank ċentrali tal-ħruġ li jirrappreżenta l-Eurosistema, il-BĊE jenħtieġ li jingħata żewġ voti fil-kulleġġ.

(23)

L-għadd ta’ banek ċentrali tal-ħruġ u awtoritajiet kompetenti responsabbli għas-superviżjoni tal-membri tal-ikklerjar tal-Istati Membri rrappreżentati f’kulleġġi stabbiliti għas-CCPs tal-Unjoni huwa bħalissa limitat. Biex jiġi ffaċilitat l-aċċess għall-informazzjoni minn firxa usa’ ta’ banek ċentrali tal-ħruġ u awtoritajiet kompetenti ta’ Stati Membri oħra, li l-istabbiltà finanzjarja tagħhom tista’ tiġi affettwata minn diffikultà finanzjarja ta’ CCP, jenħtieġ li iżjed banek ċentrali tal-ħruġ u awtoritajiet kompetenti jkunu jistgħu jieħdu sehem f’kulleġġi fuq talba. Sabiex tiġi promossa l-konsistenza fis-superviżjoni ta’ CCPs fl-Unjoni kollha, il-President, jew membru indipendenti, tal-Kumitat Superviżorju tas-CCPs jenħtieġ li jieħdu sehem ukoll fil-kulleġġi. Sabiex jiġi żgurat proċess adatt, effettiv u rapidu ta’ teħid tad-deċiżjonijiet, il-banek ċentrali ta’ ħruġ u awtoritajiet kompetenti, li jipparteċipaw fuq il-bażi ta’ talba, kif ukoll il-President, jew il-membru indipendenti, tal-Kumitat Superviżorju tas-CCPs jenħtieġ li ma jkollhomx id-dritt tal-vot.

(24)

Biex jissaħħaħ ir-rwol tagħhom, jenħtieġ li l-kulleġġi jkunu f’pożizzjoni li jipprovdu opinjonijiet dwar oqsma superviżorji addizzjonali ta’ impatt fundamentali fuq l-attivitajiet kummerċjali ta’ CCP, inkluż dwar il-valutazzjoni ta’ azzjonisti u membri b’titoli kwalifikattivi ta’ CCPs u l-esternalizzazzjoni ta’ funzjonijiet operattivi, servizzi jew attivitajiet. Barra minn hekk, fuq talba minn kwalunkwe membru tal-kulleġġ, jenħtieġ li l-kulleġġ ikun jista’ jinkludi fl-opinjoni tiegħu rakkomandazzjonijiet immirati biex jindirizzaw nuqqasijiet fil-ġestjoni tar-riskju ta’ CCP u li jżidu r-reżiljenza tagħha, soġġett għal deċiżjoni b’maġġoranza tal-kulleġġ. Il-vot tal-kulleġġ dwar l-inklużjoni ta’ tali rakkomandazzjonijiet jenħtieġ li jitwettaq separatament mill-vot tal-kulleġġ dwar l-opinjoni. Sabiex jissaħħaħ l-impatt tal-opinjonijiet u r-rakkomandazzjonijiet tal-kulleġġ, jenħtieġ li l-awtoritajiet kompetenti jikkunsidrawhom kif dovut u jipprovdu raġunament f’każijiet ta’ devjazzjoni sinifikanti minn dawk l-opinjonijiet jew rakkomandazzjonijiet.

(25)

L-arranġamenti superviżorji fr-Regolament (UE) Nru 648/2012 għal CCPs ta’ pajjiżi terzi li joffru servizzi ta’ kklerjar fl-Unjoni wkoll jenħtieġu reviżjoni. Hemm bżonn li jsir titjib ukoll fir-rigward tal-aċċess għall-informazzjoni, tal-kapaċità li jitwettqu spezzjonijiet fil-post u investigazzjonijiet, tal-possibbiltà li tiġi kondiviża informazzjoni dwar CCPs ta’ pajjiżi terzi bejn awtoritajiet rilevanti tal-Unjoni u tal-Istati Membri kif ukoll tal-possibbiltà li jiġu infurzati deċiżjonijiet tal-AETS fuq CCPs ta’ pajjiżi terzi sabiex jiġu evitati implikazzjonijiet ta’ stabbiltà finanzjarja importanti għall-entitajiet tal-Unjoni. Hemm ukoll ir-riskju li ma jkunx jista’ jittieħed kont tat-tibdil fir-regoli ta’ CCP ta’ pajjiż terz jew fil-qafas regolatorju ta’ pajjiż terz u li dan jista’ jkollu impatt negattiv fuq riżultati regolatorji jew superviżorji li jista’ jwassal għal nuqqas ta’ ekwità fil-kondizzjonijiet bejn is-CCPs tal-Unjoni u dawk ta’ pajjiżi terzi.

(26)	Għadd sinifikanti ta’ strumenti finanzjarji denominati fil-muniti tal-Unjoni huma kklerjati minn CCPs ta’ pajjiżi terzi. Dan jimplika sfidi sinifikanti għall-awtoritajiet tal-Unjoni u tal-Istati Membri biex jissalvagwardaw l-istabbiltà finanzjarja.

(27)

Bħala parti mill-impenn tagħha favur swieq finanzjarji integrati, il-Kummissjoni jenħtieġ li tkompli tiddetermina, permezz ta’ deċiżjonijiet dwar l-ekwivalenza, li l-oqfsa ġuridiċi u superviżorji ta’ pajjiżi terzi jissodisfaw ir-rekwiżiti tar-Regolament (UE) Nru 648/2012. Sabiex titjieb l-implimentazzjoni tar-reġim attwali ta’ ekwivalenza fir-rigward tas-CCPs, il-Kummissjoni jenħtieġ li tkun tista’, jekk meħtieġ, tispeċifika ulterjorment il-kriterji biex tiġi vvalutata l-ekwivalenza tar-reġimi CCP ta’ pajjiżi terzi. Huwa meħtieġ ukoll li l-AETS tingħata s-setgħa li timmonitorja l-iżviluppi regolatorji u superviżorji f’dawk ir-reġimi ta’ CCPs ta’ pajjiżi terzi li l-Kummissjoni tkun ikkunsidrat ekwivalenti. Dan sabiex jiġi żgurat li l-kriterji tal-ekwivalenza u kull kondizzjoni speċifika stabbiliti għall-użu tagħhom ikomplu jibqgħu jiġu sodisfatti minn pajjiżi terzi. Jenħtieġ li l-AETS tirrapporta l-konklużjonijiet tagħha lill-Parlament Ewropew, lill-Kunsill, lill-Kummissjoni u lill-kulleġġ tas-CCPs ta’ pajjiżi terzi fuq bażi kunfidenzjali.

(28)

Il-Kummissjoni attwalment tista’ temenda, tissospendi, tirrivedi jew tirrevoka deċiżjoni dwar ekwivalenza f’kull ħin, b’mod partikolari meta jseħħu żviluppi f’pajjiż terz li materjalment jaffettwaw l-elementi vvalutati f’konformità mar-rekwiżiti ta’ ekwivalenza taħt ir-Regolament (UE) Nru 648/2012. Fejn l-awtoritajiet rilevanti ta’ pajjiż terz ma jibqgħux jikkooperaw mal-AETS jew ma’ superviżuri oħra tal-Unjoni in bona fede jew jonqsu milli jikkonformaw fuq bażi kontinwa mar-rekwiżiti applikabbli ta’ ekwivalenza, il-Kummissjoni tista’ wkoll, inter alia, tagħti twissija lil dawk l-awtoritajiet jew tippubblika rakkomandazzjoni speċifika. Fejn il-Kummissjoni tiddeċiedi, fi kwalunkwe ħin, li tirrevoka deċiżjoni dwar l-ekwivalenza, hija tista’ tipposponi d-data tal-applikazzjoni ta’ dik id-deċiżjoni sabiex jiġu indirizzati r-riskji għall-istabbiltà finanzjarja jew it-tfixkil fis-suq. Barra minn dawk is-setgħat li huma attwalment disponibbli, il-Kummissjoni jenħtieġ ukoll li tkun tista’ tistabbilixxi kondizzjonijiet speċifiċi sabiex tiżgura li l-kriterji ta’ ekwivalenza jkomplu jiġu sodisfatti fuq bażi kontinwa mill-pajjiż terz li lilu tkun tirrigwarda deċiżjoni dwar l-ekwivalenza. Il-Kummissjoni jenħtieġ li tkun tista’ wkoll tistabbilixxi kondizzjonijiet li jiżguraw li l-AETS tkun tista’ teżerċita b’mod effettiv ir-responsabbiltajiet tagħha fir-rigward tas-CCPs ta’ pajjiżi terzi rikonoxxuti taħt ir-Regolament (UE) Nru 648/2012 jew fir-rigward tal-monitoraġġ tal-iżviluppi regolatorji u superviżorji f’pajjiżi terzi li jkunu ta’ rilevanza għal deċiżjonijiet dwar l-ekwivalenza adottati.

(29)

Fid-dawl tad-dimensjoni transfruntiera li qed tikber tas-CCPs u tal-interkonnessjonijiet fis-sistema finanzjarja tal-Unjoni, hemm bżonn li titjieb il-kapaċità tal-Unjoni li tidentifika, timmonitorja u timmitiga r-riskji potenzjali relatati ma’ CCPs ta’ pajjiżi terzi. L-irwol tal-AETS għalhekk jenħtieġ li jikber biex b’mod effettiv tissorvelja CCPs ta’ pajjiżi terzi li japplikaw għar-rikonoxximent li jipprovdu servizzi tal-ikklerjar fl-Unjoni. Jenħtieġ li l-involviment ta’ banek ċentrali tal-ħruġ tal-Unjoni fir-rikonoxximent, is-superviżjoni, ir-rieżami ta’ rikonoxximent u rtirar ta’ rikonoxximent ta’ CCPs ta’ pajjiżi terzi li jkunu attivi fil-valuta li huma joħorġu jiġi mtejjeb ukoll. Għalhekk, il-banek ċentrali tal-ħruġ tal-Unjoni jenħtieġ li jiġu kkonsultati dwar ċerti aspetti li jaffettwaw ir-responsabbiltajiet tagħhom ta’ politika monetarja fir-rigward ta’ strumenti finanzjarji denominati f’muniti tal-Unjoni li huma kklerjati jew li għandhom jiġu kklerjati minn CCPs li jinsabu barra mill-Unjoni.

(30)

Ladarba l-Kummissjoni tkun iddeterminat li l-qafas legali u superviżorju ta’ pajjiż terz bħala ekwivalenti għall-qafas tal-Unjoni, il-proċess għar-rikonoxximent tas-CCPs minn dak il-pajjiż terz jenħtieġ li jieħu kont tar-riskji li dawk is-CCPs jippreżentaw għall-istabbiltà finanzjarja tal-Unjoni jew ta’ wieħed jew aktar mill-Istati Membri tagħha.

(31)

Meta tikkunsidra l-applikazzjoni għar-rikonoxximent ta’ CCP ta’ pajjiż terz, l-AETS jenħtieġ li tivvaluta l-grad ta’ riskju sistemiku li s-CCP tippreżenta għall-istabbiltà finanzjarja tal-Unjoni jew ta’ wieħed jew aktar mill-Istati Membri tagħha fuq il-bażi ta’ kriterji oġġettivi u trasparenti stabbiliti f’dan ir-Regolament. Jenħtieġ li dawk il-kriterji jikkontribwixxu għall-valutazzjoni ġenerali. Individwalment, jenħtieġ li l-ebda waħda minn dawk il-kriterji ma titqies bħala determinanti waħidha. Meta jiġi vvalutat il-profil tar-riskju ta’ CCP ta’ pajjiż terz, jenħtieġ li l-AETS tqis ir-riskji kollha, inklużi r-riskji operazzjonali, bħal frodi, attività kriminali, riskju relatat mal-IT u riskju ċibernetiku. Jenħtieġ li att delegat tal-Kummissjoni jispeċifika aktar dawk il-kriterji. Meta jiġu speċifikati dawk il-kriterji, jenħtieġ li jiġu kkunsidrati n-natura tat-tranżazzjonijiet ikklerjati mis-CCP, inklużi l-kumplessità, il-volatilità tal-prezzijiet u l-maturità medja tagħhom, kif ukoll it-trasparenza u l-likwidità tas-swieq ikkonċernati u l-grad sa fejn l-attivitajiet tal-ikklirjar tas-CCP ikunu ddenominati f’euro jew f’muniti oħra tal-Unjoni. F’dak ir-rigward, karatteristiċi speċifiċi ta’ ċerti kuntratti derivati agrikoli elenkati u esegwiti fi swieq regolati f’pajjiżi terzi, li huma relatati ma’ swieq li fil-parti l-kbira tagħhom iservu kontropartijiet mhux finanzjarji domestiċi f’dak il-pajjiż terz li jimmaniġġja r-riskji kummerċjali tagħhom permezz ta’ dawk il-kuntratti, jistgħu joħolqu riskju negliġibbli għall-membri tal-ikklirjar u ċ-ċentri tan-negozjar fl-Unjoni peress li għandhom grad baxx ta’ interkonnettività sistemika mal-bqija tas-sistema finanzjarja. Fejn ikun hemm fis-seħħ f’pajjiż terz qafas għall-irkupru u r-riżoluzzjoni tas-CCPs, dak jenħtieġ li jitqies ukoll mill-AETS fl-analiżi tagħha tal-grad ta’ riskju sistemiku li s-CCP applikanti stabbilita f’dak il-pajjiż terz tippreżenta għall-istabbiltà finanzjarja tal-Unjoni jew ta’ wieħed jew aktar mill-Istati Membri tagħha.

(32)

CCPs li ma jkunux sistemikament importanti għall-istabbiltà finanzjarja tal-Unjoni jew ta’ wieħed jew aktar mill-Istati Membri tagħha jenħtieġ li jiġu kkunsidrati bħala CCPs tal-“Grad 1”. Is-CCPs li huma sistemikament importanti jew x’aktarx li jsiru sistemikament importanti għall-istabbiltà finanzjarja tal-Unjoni jew ta’ wieħed jew aktar mill-Istati Membri tagħha jenħtieġ li jiġu kkunsidrati bħala CCPs tal-“Grad 2”. Fejn l-AETS tiddetermina li CCP ta’ pajjiż terz mhijiex sistemikament importanti għall-istabbiltà finanzjarja tal-Unjoni jew ta’ wieħed jew aktar mill-Istati Membri tagħha, il-kondizzjonijiet eżistenti ta’ rikonoxximent taħt ir-Regolament (UE) Nru 648/2012 jenħtieġ li japplikaw għal dik is-CCP. Fejn l-AETS tiddetermina li CCP ta’ pajjiż terz hija sistemikament importanti, jenħtieġ li jiġu imposti rekwiżiti speċifiċi fuq dik is-CCP. L-AETS jenħtieġ li tirrikonoxxi tali CCP biss fejn dik is-CCP tkun konformi ma’ dawn ir-rekwiżiti. Dawk ir-rekwiżiti jenħtieġ li jinkludu ċerti rekwiżiti prudenzjali stabbiliti fir-Regolament (UE) Nru 648/2012 bl-għan li tiżdied is-sikurezza u l-effiċjenza ta’ CCP. L-AETS jenħtieġ li tkun direttament responsabbli biex tiżgura li CCP sistemikament importanti ta’ pajjiż terz tikkonforma ma’ dawk ir-rekwiżiti. Jenħtieġ ukoll li rekwiżiti relatati jippermettu li l-AETS twettaq superviżjoni sħiħa u effettiva ta’ dik is-CCP taħt ir-Regolament (UE) Nru 648/2012.

(33)

Sabiex jiġi żgurat involviment korrett tal-bank jew banek ċentrali tal-ħruġ tal-muniti kollha tal-Unjoni tal-istrumenti finanzjarji kklerjati jew li għandhom jiġu kklerjati permezz ta’ CCPs ta’ pajjiżi terzi fir-rikonoxximent ta’ CCPs tal-Grad 2, l-AETS, meta tirrikonoxxi tali CCPs, jenħtieġ li tqis il-konformità tagħhom ma’ rekwiżiti speċifiċi li dawk il-banek ċentrali tal-ħruġ setgħu imponew fit-twettiq tal-kompiti tal-politika monetarja tagħhom. Dawk ir-rekwiżiti jenħtieġ li jirrelataw mas-sottomissjoni ta’ informazzjoni lill-bank jew banek ċentrali tal-ħruġ fuq talba raġunata tagħha, il-kooperazzjoni tas-CCPs mal-bank jew banek ċentrali tal-ħruġ fil-kuntest tal-valutazzjoni tar-reżiljenza tas-CCP għal żviluppi negattivi fis-suq imwettqa mill-AETS, il-ftuħ ta’ kont ta’ depożitu mal-lejl mal-bank jew banek ċentrali tal-ħruġ u r-rekwiżiti f’sitwazzjonijiet eċċezzjonali li l-bank jew banek ċentrali tal-ħruġ iqisu meħtieġa. Il-kriterji ta’ aċċess u r-rekwiżiti tal-bank jew banek ċentrali tal-ħruġ għall-ftuħ ta’ kont ta’ depożitu mal-lejl jenħtieġ li ma jwasslux għal obbligu li jiġu rilokati s-servizzi kollha tal-ikklerjar tas-CCP jew parti minnhom.

(34)

Fir-rigward tar-rekwiżiti li l-bank jew banek ċentrali tal-ħruġ jkunu jistgħu jimponu f’sitwazzjonijiet eċċezzjonali, it-trasmissjoni ta’ politika monetarja jew l-operat mingħajr xkiel tas-sistemi ta’ pagament jistgħu jiġu affettwati minn żviluppi fi swieq ikklerjati ċentralment f’sitwazzjonijiet bħal pressjonijiet fis-swieq (speċjalment is-swieq tal-flus u ta’ riakkwist) li fuqhom tiddependi is-CCP biex tikseb likwidità, sitwazzjonijiet fejn l-operazzjonijiet tas-CCP jikkontribwixxu għat-tnaqqis tal-likwidità fis-suq jew nuqqasijiet serji ta’ pagament jew arranġamenti ta’ saldu li jimpedixxu l-abbiltà tas-CCP li tissodisfa l-obbligi tal-pagament tagħha jew iżidu l-ħtiġijiet ta’ likwidità tagħha. Id-determinazzjoni tal-eżistenza ta’ tali sitwazzjonijiet eċċezzjonali tiddependi biss fuq kunsiderazzjonijiet ta’ politika monetarja u ma teħtieġx tikkoinċidi ma’ kwalunkwe sitwazzjoni ta’ emerġenza relatata mas-CCP. F’tali sitwazzjonijiet, il-qafas prudenzjali jista’ għalhekk ma jimmitigax kompletament ir-riskji li jirriżultaw, f’liema każ tista’ tkun meħtieġa azzjoni diretta mill-bank jew banek ċentrali tal-ħruġ biex tiġi żgurata t-trasmissjoni tal-politika monetarja jew ikun żgurat l-operat mingħajr xkiel tas-sistemi ta’ pagament.

(35)

F’tali sitwazzjonijiet eċċezzjonali, il-banek ċentrali tal-ħruġ jistgħu jeħtieġu li jimponu, sal-punt permess taħt l-oqfsa istituzzjonali rispettivi tagħhom, rekwiżiti temporanji relatati mar-riskji tal-likwidità, arranġamenti ta’ saldu, rekwiżiti tal-marġini, arranġamenti ta’ kollateral jew interoperabilità. In-nuqqas ta’ konformità ma’ tali rekwiżiti temporanji jistgħu jiskattaw l-irtirar mill-AETS tar-rikonoxximent ta’ CCP tal-Grad 2. Dawk ir-rekwiżiti jistgħu jinkludu, b’mod partikolari, titjib temporanju għall-ġestjoni tar-riskju tal-likwidità ta’ CCP tal-Grad 2, bħal żieda fir-riżerva ta’ likwidità, żieda fil-frekwenza tal-ġbir ta’ marġnijiet fl-istess ġurnata, u limiti fuq espożizzjonijiet bejn il-valuti, jew arranġamenti speċifiċi għad-depożitu tal-flus kontanti u s-saldu tal-pagamenti fil-valuta tal-bank ċentrali. Jenħtieġ li r-rekwiżiti ma jkunux estiżi għal oqsma oħra ta’ superviżjoni prudenzjali jew iwasslu awtomatikament għall-irtirar tar-rikonoxximent. Barra minn hekk, l-applikazzjoni ta’ dawk ir-rekwiżiti jenħtieġ li tkun biss kondizzjoni għar-rikonoxximent għal perijodu limitat ta’ żmien ta’ mhux aktar minn sitt xhur b’estensjoni potenzjali ta’ darba għal perijodu addizzjonali ta’ mhux aktar minn sitt xhur. Wara l-iskadenza ta’ dan il-perijodu addizzjonali, l-applikazzjoni ta’ dawk ir-rekwiżiti jenħtieġ li ma tibqax tkun kondizzjoni għar-rikonoxximent ta’ CCP tal-Grad 2. Madankollu, fil-kuntest ta’ sitwazzjoni eċċezzjonali ġdida jew differenti, jenħtieġ li l-banek ċentrali tal-ħruġ ma jkunux prevenuti milli jimponu rekwiżiti temporanji, li l-applikazzjoni tagħhom tkun kondizzjoni għar-rikonoxximent ta’ CCP tal-Grad 2 taħt ir-Regolament (UE) Nru 648/2012.

(36)

Qabel l-applikazzjoni tar-rekwiżiti jew qabel estensjoni possibbli, bank ċentrali tal-ħruġ jenħtieġ li jipprovdi lill-AETS, lill-banek ċentrali l-oħra tal-ħruġ tal-muniti kollha tal-Unjoni tal-istrumenti finanzjarji kklerjati jew li għandhom jiġu kklerjati, u lill-membri tal-kulleġġ tas-CCPs ta’ pajjiż terz spjegazzjoni tal-effetti tar-rekwiżiti li biħsiebu jimponi fuq l-effiċjenza, is-solidità u r-reżiljenza tas-CCPs u ġustifikazzjoni għala r-rekwiżiti huma neċessarji u proporzjonati biex tiġi żgurata t-trasmissjoni tal-politika monetarja jew l-operat mingħajr xkiel tas-sistemi ta’ pagament filwaqt li b’mod adegwat tkun rispettata l-ħtieġa tal-protezzjoni ta’ informazzjoni kunfidenzjali jew sensittiva. Sabiex tiġi evitata d-duplikazzjoni, il-bank ċentrali tal-ħruġ jenħtieġ li jikkoopera u jikkondividi informazzjoni fuq bażi kontinwa mal-AETS u mal-banek ċentrali l-oħra tal-ħruġ tal-muniti kollha tal-Unjoni tal-istrumenti finanzjarji kklerjati jew li għandhom jiġu kklerjati b’rabta mar-rekwiżiti temporanji applikabbli f’sitwazzjonijiet eċċezzjonali.

(37)

Il-bank jew banek ċentrali tal-ħruġ jenħtieġ li jikkonfermaw lill-AETS jekk CCP tal-Grad 2 tikkonformax jew le ma’ kwalunkwe rekwiżit addizzjonali malajr kemm jista’ jkun u fi kwalunkwe każ sa 30 jum ta’ xogħol minn meta jiġi determinat li CCP ta’ pajjiż terz mhijiex CCP tal-Grad 1 jew f’90 jum ta’ xogħol minn meta ġew imposti rekwiżiti addizzjonali fejn dawk ir-rekwiżiti ġew imposti wara r-rikonoxximent ta’ CCP tal-Grad 2.

(38)

Il-livell ta’ riskju ppreżentat minn CCP sistemikament importanti għas-sistema finanzjarja u għall-istabbiltà tal-Unjoni jvarja. Ir-rekwiżiti għal CCPs li huma sistemikament importanti jenħtieġ għalhekk li jiġu applikati b’mod proporzjonat għar-riskji li s-CCP tista’ tippreżenta lill-Unjoni. Fejn l-AETS, wara li tikkonsulta lill-Bord Ewropew dwar ir-Riskju Sistemiku (BERS), u bi qbil mal-banek ċentrali tal-ħruġ tal-muniti kollha tal-Unjoni tal-istrumenti finanzjarji kklerjati jew li għandhom jiġu kklerjati mis-CCP ta’ pajjiż terz, tikkonkludi, abbażi ta’ valutazzjoni motivata b’mod sħiħ, inkluża valutazzjoni teknika kwantitattiva tal-ispejjeż u l-benefiċċji, li CCP ta’ pajjiż terz jew xi servizzi ta’ kklerjar tagħha huma ta’ tali importanza sistemika li l-konformità mar-rekwiżiti speċifiċi stipulati fir-Regolament (UE) Nru 648/2012 ma tindirizzax b’mod suffiċjenti r-riskju għall-istabbiltà finanzjarja għall-Unjoni jew għal wieħed jew aktar mill-Istati Membri tagħha, u f’każ li miżuri oħra huma meqjusa bħala insuffiċjenti biex jiġu indirizzati r-riskji għall-istabbiltà finanzjarja, jenħtieġ li l-AETS tirrakkomanda lill-Kummissjoni li dik is-CCP jew xi servizzi ta’ kklerjar tagħha ma jiġux rikonoxxuti. L-AETS tista’, taħt dik il-proċedura, tirrakkomanda lill-Kummissjoni li CCP ma tiġix rikonoxxuta, kemm b’klassifikazzjoni minn qabel kif ukoll mingħajrha tas-CCP jew ta’ xi servizzi tagħha bħala tal-Grad 2.

(39)

Jenħtieġ li, fuq il-bażi ta’ dik ir-rakkomandazzjoni, il-Kummissjoni tkun mogħtija s-setgħa li tadotta, bħala miżura tal-aħħar rikors, att ta’ implimentazzjoni li jispeċifika li s-CCP tal-pajjiż terz inkwistjoni jenħtieġ li ma tkunx tista’ tipprovdi s-servizzi tal-ikklerjar tagħha kollha jew xi wħud minnhom lil membri tal-ikklerjar u ċentri tan-negozjar stabbiliti fl-Unjoni sakemm dik is-CCP ma tkunx awtorizzata fi kwalunkwe Stat Membru biex tagħmel dan f’konformità mar-Regolament (UE) Nru 648/2012. Jenħtieġ li dan l-att ta’ implimentazzjoni jistabbilixxi wkoll perijodu xieraq ta’ adattament ta’ mhux aktar minn sentejn, li jista’ jiġi estiż darba permezz ta’ perijodu addizzjonali ta’ sitt xhur, u jenħtieġ li jindika l-kondizzjonijiet li taħthom dik is-CCP tista’ tkompli tipprovdi ċerti servizzi jew attivitajiet tal-ikklerjar matul il-perijodu ta’ adattament u kwalunkwe miżura li jenħtieġ li tittieħed matul dak il-perijodu sabiex jiġu limitati l-ispejjeż potenzjali għall-membri tal-ikklerjar u l-klijenti tagħhom, b’mod partikolari dawk stabbiliti fl-Unjoni.

(40)

Huwa importanti għall-banek ċentrali tal-ħruġ li jiġu kkonsultati individwalment mill-AETS u jesprimu l-qbil tagħhom ma’ kwalunkwe rakkomandazzjoni potenzjali li tiċħad ir-rikonoxximent lil CCP ta’ pajjiż terz minħabba l-impatt li tali deċiżjoni jista’ jkollha fuq il-munita li joħorġu u fuq ir-rapport mill-AETS dwar l-applikazzjoni ta’ att ta’ implimentazzjoni tal-Kummissjoni konsegwenti għal tali rakkomandazzjoni. Madankollu, fil-każ ta’ tali rakkomandazzjoni jew rapport, il-qbil jew tħassib li bank ċentrali ta’ ħruġ jista jinvoka jenħtieġ li jkun relattiv biss għall-munita li joħroġ u mhux għar-rakkomandazzjoni fl-intier tagħha jew għar-rapport fl-intier tiegħu.

(41)

Jenħtieġ li l-AETS tirrieżamina regolarment r-rikonoxximent ta’ CCPs ta’ pajjiżi terzi kif ukoll il-klassifikazzjoni tagħhom bħala CCPs tal-Grad 1 jew tal-Grad 2. F’dak ir-rigward, l-AETS jenħtieġ li tqis fost affarijiet oħra, it-tibdil fin-natura, fid-daqs u fil-kumplessità tal-operat kummerċjali tas-CCP ta’ pajjiż terz. Tali rieżamijiet jenħtieġ li jsiru tal-anqas kull ħames snin u kull meta CCP rikonoxxuta ta’ pajjiż terz tkun estendiet jew naqqset il-firxa tal-attivitajiet u s-servizzi tagħha fl-Unjoni. Fejn, wara dak ir-rieżami, l-AETS tiddetermina li CCP tal-Grad 1 għandha tiġi klassifikata bħala CCP tal-Grad 2, jenħtieġ li l-AETS tistabbilixxi perijodu adegwat ta’ adattament li ma jaqbiżx 18-il xahar li fihom is-CCP jenħtieġ li ssir konformi mar-rekwiżiti applikabbli għal CCPs tal-Grad 2.

(42)

Jenħtieġ li, fuq talba ta’ CCP tal-Grad 2, l-AETS tkun tista’ wkoll tqis sa liema punt il-konformità ta’ tali CCP mar-rekwiżiti applikabbli f’dak il-pajjiż terz tista’ tiġi mqabbla mal-konformità ta’ dik is-CCP mar-rekwiżiti tar-Regolament (UE) Nru 648/2012. Meta tagħmel dik il-valutazzjoni, jenħtieġ li l-AETS tqis l-att ta’ implimentazzjoni adottat mill-Kummissjoni li jiddetermina li l-arranġamenti legali u superviżorji tal-pajjiż terz fejn huwa stabbilit is-CCP huma ekwivalenti għal dawk tar-Regolament (UE) Nru 648/2012 u kwalunkwe kondizzjoni li għaliha tista’ tkun soġġetta l-applikazzjoni ta’ dak l-att ta’ implimentazzjoni. Sabiex tiżgura proporzjonalità, jenħtieġ li l-AETS tqis ukoll, meta tagħmel dik il-valutazzjoni, il-punt sa fejn l-istrumenti finanzjarji kklerjati mis-CCP huma denominati fil-muniti tal-Unjoni. Jenħtieġ li l-Kummissjoni tadotta att delegat li jispeċifika l-modalitajiet u l-kondizzjonijiet għall-valutazzjoni ta’ tali konformità komparabbli.

(43)	Jenħtieġ li l-AETS jkollha s-setgħat kollha meħtieġa biex tissorvelja CCPs rikonoxxuti ta’ pajjiżi terzi biex tiġi żgurata l-konformità kontinwa tagħhom mar-rekwiżiti tar-Regolament (UE) Nru 648/2012.

(44)

Biex tiġi ffaċilitata l-kondiviżjoni tal-informazzjoni u l-kooperazzjoni bejn l-AETS, l-awtoritajiet kompetenti tal-Istati Membri responsabbli għas-superviżjoni tas-CCPs u l-awtoritajiet kompetenti responsabbli għas-superviżjoni ta’ entitajiet li fuqhom l-operazzjonijiet ta’ CCPs ta’ pajjiżi terzi jista’ jkollhom impatt, jenħtieġ li l-AETS tistabbilixxi kulleġġ tas-CCPs ta’ pajjiżi terzi. Jenħtieġ li l-membri tal-kulleġġ ikunu kapaċi jitolbu li kwalunkwe kwistjoni speċifika fir-rigward ta’ CCPs ta’ pajjiżi terzi tiġi diskussa mill-Kumitat Superviżorju tas-CCPs.

(45)

Sabiex l-AETS tkun tista’ twettaq il-kompiti tagħha b’mod effettiv rigward is-CCPs ta’ pajjiżi terzi, jenħtieġ li s-CCPs ta’ pajjiżi terzi jħallsu tariffi superviżorji għall-kompiti superviżorji u amministrattivi tal-AETS. Jenħtieġ li t-tariffi jkopru l-ispejjeż assoċjati mal-applikazzjonijiet għar-rikonoxximent ta’ CCPs ta’ pajjiżi terzi u s-superviżjoni tagħhom. Jenħtieġ li l-Kummissjoni tadotta att delegat li jispeċifika aktar it-tipi ta’ tariffi, il-materji li għalihom it-tariffi jkunu dovuti, l-ammont tat-tariffi u l-metodu li bih għandhom jitħallsu.

(46)

Jenħtieġ li l-AETS tkun tista’ tagħmel investigazzjonijiet u spezzjonijiet fil-post ta’ CCPs tal-Grad 2 u ta’ partijiet terzi relatati li lilhom dawk is-CCPs ikunu esternalizzaw funzjonijiet operattivi, servizzi jew attivitajiet. Fejn rilevanti, jenħtieġ li l-awtoritajiet kompetenti responsabbli għas-superviżjoni tal-membri tal-ikklerjar stabbiliti fl-Unjoni jiġu infurmati dwar il-konklużjonijiet ta’ tali investigazzjonijiet u spezzjonijiet fil-post. Fejn ikun rilevanti għat-twettiq tal-kompiti tal-politika monetarja tagħhom, jenħtieġ li l-banek ċentrali tal-ħruġ fil-muniti kollha tal-Unjoni tal-istrumenti finanzjarji kklerjati jew li għandhom jiġu kklerjati mis-CCP jkunu jistgħu jitolbu li jipparteċipaw f’tali spezzjonijiet fil-post.

(47)	Jenħtieġ li l-AETS tkun tista’ timponi pagamenti perjodiċi ta’ penali biex iġġiegħel lis-CCPs ta’ pajjiżi terzi jtemmu ksur, jipprovdu informazzjoni kompleta u korretta mitluba mill-AETS jew jaċċettaw li ssirilhom investigazzjoni jew spezzjoni fil-post.

(48)

Jenħtieġ li l-AETS tkun tista’ timponi multi kemm fuq CCPs tal-Grad 1 kif ukoll fuq CCPs tal-Grad 2 meta ssib li jkunu wettqu, intenzjonalment jew b’negliġenza, ksur tar-Regolament (UE) Nru 648/2012 billi pprovdew informazzjoni skorretta jew qarrieqa lill-AETS. Barra dan jenħtieġ li l-AETS tkun tista’ timponi multi fuq CCPs tal-Grad 2 meta ssib li jkunu wettqu, intenzjonalment jew b’negliġenza, ksur tar-rekwiżiti addizzjonali applikabbli għalihom f’dak ir-Regolament. Fejn l-AETS tkun ivvalutat li CCP tal-Grad 2 fir-rigward tal-konformità tagħha mal-qafas legali applikabbli tal-pajjiż terz titqies li tikkonforma mar-rekwiżiti stabbiliti fl-Artikolu 16 u fit-Titoli IV u V ta’ tar-Regolament (UE) Nru 648/2012, l-aġir ta’ dik is-CCP jenħtieġ li ma jitqiesx bħala ksur ta’ dak ir-Regolament sal-punt li hija tikkonforma ma’ dawk ir-rekwiżiti komparabbli.

(49)

Il-multi jenħtieġ li jiġu imposti skont il-livell tal-gravità tal-ksur. Il-każijiet ta’ ksur jenħtieġ li jinqasmu fi gruppi differenti li għalihom jiġu allokati multi speċifiċi. Sabiex tiġi kkalkolata l-multa relatata ma’ ksur partikolari, l-AETS jenħtieġ li tuża metodoloġija f’żewġ fażijiet li tikkonsisti fl-iffissar ta’ ammont bażiku u l-aġġustament ta’ dak l-ammont bażiku, jekk ikun meħtieġ, b’ċerti koeffiċjenti. L-ammont bażiku jenħtieġ li jiġi stabbilit billi jitqies il-fatturat annwali tas-CCPs ikkonċernati ta’ pajjiż terz u l-aġġustamenti jenħtieġ li jsiru billi jiżdied jew jitnaqqas l-ammont bażiku permezz tal-applikazzjoni tal-koeffiċjenti rilevanti f’konformità ma’ dan ir-Regolament.

(50)	Dan ir-Regolament jistabbilixxi koeffiċjenti marbuta ma’ ċirkostanzi aggravanti u mitiganti sabiex l-AETS jkollha l-għodda meħtieġa biex timponi multa li tkun proporzjonali għall-gravità tal-ksur imwettaq minn CCP ta’ pajjiż terz, filwaqt li jitqiesu ċ-ċirkostanzi li fihom ikun twettaq il-ksur.

(51)	Id-deċiżjoni li timponi multi jew pagamenti perjodiċi ta’ penali jenħtieġ li tkun ibbażata fuq investigazzjoni indipendenti.

(52)	Qabel ma tittieħed deċiżjoni li timponi multi jew pagamenti perjodiċi ta’ penali, l-AETS jenħtieġ li tagħti lill-persuni soġġetti għall-proċedimenti l-opportunità li jinstemgħu sabiex ikunu rispettati d-drittijiet ta’ difiża tagħhom.

(53)

L-AETS jenħtieġ li żżomm lura milli timponi multi jew pagamenti perjodiċi ta’ penali fejn il-liberazzjoni mill-akkuża jew kundanna preċedenti li tirriżulta minn fatti identiċi, jew minn fatti li jkunu sostanzjalment l-istess, tkun diġà kisbet il-forza ta’ res judicata b’riżultat ta’ proċeduri kriminali taħt il-liġi nazzjonali.

(54)

Id-deċiżjonijiet tal-AETS li jimponu multi jew pagamenti perjodiċi ta’ penali jenħtieġ li jkunu infurzabbli u l-infurzar tagħhom jenħtieġ li jkun soġġett għar-regoli tal-proċedura ċivili li jkunu fis-seħħ fl-Istat li fit-territorju tiegħu jitwettaq. Ir-regoli tal-proċeduri ċivili jenħtieġ li ma jinkludux regoli tal-proċedura kriminali iżda jistgħu jinkludu regoli tal-proċedura amministrattiva.

(55)

Jenħtieġ li, fil-każ ta’ ksur li jsir minn CCP tal-Grad 2, l-AETS jkollha s-setgħa li tapplika firxa ta’ miżuri superviżorji, inkluż li tesiġi li CCP tal-Grad 2 ittemm il-ksur u, bħala l-aħħar miżura, li tirtira r-rikonoxximent fejn CCP tal-Grad 2 tkun kisret b’mod serju jew ripetut ir-Regolament (UE) Nru 648/2012. Il-miżuri superviżorji jenħtieġ li jkunu applikati mill-AETS b’kont meħud tan-natura u l-gravità tal-ksur u jenħtieġ li jirrispettaw il-prinċipju tal-proporzjonalità. Qabel tieħu deċiżjoni dwar miżuri superviżorji, l-AETS jenħtieġ li tagħti lill-persuni li jkunu soġġetti għall-proċeduri l-opportunità li jinstemgħu sabiex id-drittijiet tagħhom għal difiża jkunu rispettati. Fejn l-AETS tiddeċiedi li tirtira r-rikonoxximent, jenħtieġ li l-AETS tillimita t-tfixkil potenzjali tas-suq billi tiddefinixxi perijodu ta’ adattament xieraq ta’ mhux aktar minn sentejn.

(56)

Fir-rigward tal-validazzjoni mill-awtoritajiet kompetenti u l-AETS ta’ tibdil sinifikanti f’mudelli u parametri adottati biex jikkalkolaw ir-rekwiżiti tal-marġini ta’ CCP, jenħtieġ li jiġu ċċarati l-kontribuzzjonijiet għall-fond tal-inadempjenza, ir-rekwiżiti tal-kollateral, u mekkaniżmi oħra tal-kontroll tar-riskju, aspetti proċedurali u l-interazzjoni ta’ dik il-validazzjoni mad-deċiżjoni tal-kulleġġ. L-adozzjoni preliminari ta’ bidla sinifikanti fil-mudelli jew parametri jenħtieġ li tkun possibbli fejn meħtieġ, speċjalment fejn il-bidla rapida tagħhom tkun meħtieġa sabiex tiġi żgurata s-solidità tal-ġestjoni tar-riskju tas-CCPs.

(57)

Superviżjoni effettiva ta’ CCPs tiddependi fuq l-iżvilupp ta’ kompetenzi, l-għarfien espert u l-kapaċitajiet, kif ukoll fuq l-iżvilupp ta’ relazzjonijiet kooperattivi u skambji bejn istituzzjonijiet. Peress li dawk huma kollha proċessi li jiżviluppaw maż-żmien u jsegwu d-dinamika tagħhom stess, it-tfassil ta’ sistema superviżorja funzjonali, effettiva u effiċjenti għas-CCPs jenħtieġ li jqis l-evoluzzjoni potenzjali tagħha fit-tul. Għalhekk, id-diviżjoni tal-kompetenzi stabbilita f’dan ir-Regolament x’aktarx ser tevolvi hekk kif ir-rwol u l-kapaċitajiet tal-AETS, appoġġata mill-Kumitat Superviżorju tas-CCPs, jiżviluppaw. Bil-ħsieb li jiġi żviluppat approċċ superviżorju effiċjenti u reżiljenti rigward is-CCPs, jenħtieġ li l-Kummissjoni tirrevedi l-effettività tal-kompiti tal-AETS, b’mod partikolari dawk tal-Kumitat Superviżorju tas-CCPs, fit-trawwim ta’ applikazzjoni konverġenti u koerenti fl-Unjoni tar-Regolament (UE) Nru 648/2012 u tad-diviżjoni tar-responsabbiltajiet bejn l-istituzzjonijiet u l-korpi tal-Unjoni u tal-Istati Membri. Jenħtieġ li l-Kummissjoni tirrapporta wkoll dwar l-impatt tar-Regolament fuq il-kondizzjonijiet ekwivalenti ta’ kompetizzjoni fost CCPs u tivvaluta l-qafas għar-rikonoxximent u s-superviżjoni ta’ CCPs ta’ pajjiżi terzi. Jenħtieġ li l-Kummissjoni tippreżenta r-rapport lill-Parlament Ewropew u lill-Kunsill flimkien ma’ kwalunkwe proposta xierqa.

(58)

Sabiex tiġi żgurata l-applikazzjoni effettiva tar-regoli stabbiliti f’dan ir-Regolament relattivament għal CCPs ta’ pajjiżi terzi, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-Trattat dwar il-Funzjonament tal-Unjoni Ewropea (TFUE) fir-rigward tal-ispeċifikazzjoni ulterjuri tat-tip ta’ tariffi, il-materji li għalihom it-tariffi jkunu dovuti, l-ammont ta’ tariffi li għandhom jitħallsu u l-mod li bih għandhom jitħallsu; l-ispeċifikazzjoni ulterjuri tal-kriterji li jiddeterminaw jekk CCP ta’ pajjiż terz hijiex, jew x’aktarx li ssir, sistemikament importanti għall-istabbiltà finanzjarja tal-Unjoni jew ta’ wieħed jew aktar mill-Istati Membri tagħha; l-ispeċifikazzjoni ulterjuri tal-kriterji li jridu jintużaw fil-valutazzjonijiet tagħha tal-ekwivalenza ta’ pajjiżi terzi; l-ispeċifikazzjoni ta’ kif u taħt liema kondizzjonijiet ċerti rekwiżiti għandhom jiġu osservati minn CCPs ta’ pajjiżi terzi; l-ispeċifikazzjoni ulterjuri tar-regoli ta’ proċedura fir-rigward tal-impożizzjoni ta’ multi jew pagamenti perjodiċi ta’ penali, inklużi dispożizzjonijiet dwar id-drittijiet ta’ difiża, skadenzi, il-ġbir ta’ multi jew pagamenti perjodiċi ta’ penali kif ukoll il-perjodi ta’ limitazzjoni għall-impożizzjoni u l-infurzar ta’ pagamenti ta’ penali jew multi; u miżuri li jemendaw l-Anness IV sabiex jittieħed kont tal-iżviluppi fis-swieq finanzjarji. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (8). B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(59)

Sabiex ikunu żgurati kondizzjonijiet uniformi għall-implimentazzjoni ta’ dan ir-Regolament, u b’mod partikolari fir-rigward tar-rikonoxximent ta’ CCPs ta’ pajjiżi terzi u l-ekwivalenza tal-oqfsa legali ta’ pajjiżi terzi, jenħtieġ li jingħataw setgħat ta’ implimentazzjoni lill-Kummissjoni. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (9).

(60)

Sabiex tkun żgurata armonizzazzjoni konsistenti ta’ regoli u prattika superviżorja fir-rigward tal-estensjoni ta’ attivitajiet u servizzi, kulleġġi, ittestjar tal-istress u ttestjar retrospettiv, jenħtieġ li l-Kummissjoni tingħata s-setgħa li tadotta standards tekniċi regolatorji żviluppati mill-AETS fir-rigward ta’ dawn li ġejjin: il-kondizzjonijiet li taħthom servizzi jew attivitajiet addizzjonali li għalihom CCP tkun tixtieq testendi n-negozju tagħha ma jkunux koperti mill-awtorizzazzjoni inizjali; il-kondizzjonijiet li taħthom muniti tal-Unjoni għandhom jitqiesu bħala l-aktar rilevanti għall-fini tas-sħubija ta’ banek ċentrali tal-ħruġ fil-kulleġġi u d-dettalji tal-arranġamenti prattiċi għall-funzjonament ta’ kulleġġi; u l-kondizzjonijiet li taħthom ikunu sinifikanti tibdiliet fil-mudelli u l-parametri tas-CCPs. Jenħtieġ li l-Kummissjoni tadotta l-istandards tekniċi regolatorji skont l-Artikolu 290 tat-TFUE u skont l-Artikoli 10 sa 14 tar-Regolament (UE) Nru 1095/2010.

(61)

Minħabba li l-għanijiet ta’ dan ir-Regolament, jiġifieri li jiżdiedu s-sigurtà u l-effiċjenza tas-CCPs billi jiġu stipulati rekwiżiti uniformi għall-attivitajiet tagħhom, ma jistgħux jinkisbu b’mod suffiċjenti mill-Istati Membri iżda jistgħu, minħabba l-iskala u l-effetti tagħhom, jinkisbu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità, kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkisbu dawk l-għanijiet.

(62)

L-użu li tagħmel l-AETS mis-setgħa tagħha li tirrikonoxxi CCP ta’ pajjiż terz bħala CCP tal-Grad 1 jew CCP tal-Grad 2 jenħtieġ li jkun differit sa meta jiġu speċifikati aktar il-kriterji li jippermettu l-evalwazzjoni: (a) jekk CCP ta’ pajjiż terz hijiex sistemikament importanti jew le, jew jekk x’aktarx issir sistemikament importanti, għas-sistema finanzjarja tal-Unjoni jew ta’ wieħed jew aktar mill-Istati Membri tagħha; u (b) ta’ konformità komparabbli.

(63)	Ir-Regolament (UE) Nru 648/2012 għandu għalhekk jiġi emendat kif meħtieġ,

ADOTTAW DAN IR-REGOLAMENT:

Artikolu 1

Ir-Regolament (UE) Nru 648/2012 huwa emendat kif ġej:

(1)

fil-paragrafu 2 tal-Artikolu 6, il-punt (b) huwa sostitwit b’dan li ġej:

“(b)	is-CCPs li huma awtorizzati skont l-Artikolu 17 jew rikonoxxuti skont l-Artikolu 25 u d-data ta’ awtorizzazzjoni jew rikonoxximent rispettivament, li jindikaw is-CCPs li jkunu awtorizzati jew rikonoxxuti għall-iskop tal-obbligu tal-ikklerjar;”

(2)

fl-Artikolu 15, jiżdied il-paragrafu li ġej:

“3.

Sabiex tiġi żgurata l-applikazzjoni konsistenti ta’ dan l-Artikolu, l-AETS għandha, f’kooperazzjoni mas-SEBĊ, tiżviluppa abbozz ta’ standards tekniċi regolatorji li jispeċifikaw il-kondizzjonijiet li taħthom servizzi jew attivitajiet addizzjonali li għalihom CCP tkun tixtieq testendi n-negozju tagħha ma jkunux koperti mill-awtorizzazzjoni inizjali u għalhekk jeħtieġu estensjoni ta’ awtorizzazzjoni skont il-paragrafu 1 ta’ dan l-Artikolu u li jispeċifikaw ukoll il-proċedura biex jiġi kkonsultat il-kulleġġ stabbilit skont l-Artikolu 18 dwar jekk dawk il-kondizzjonijiet humiex sodisfatti jew le.

L-AETS għandha tippreżenta dak l-abbozz ta’ standards tekniċi regolatorji lill-Kummissjoni sat-2 ta’ Jannar 2021.

Il-Kummissjoni tingħata s-setgħa li tadotta l-istandards tekniċi regolatorji msemmija fl-ewwel subparagrafu skont l-Artikoli 10 sa 14 tar-Regolament (UE) Nru 1095/2010.”

(3)

fl-Artikolu 17, il-paragrafu 3 huwa sostitwit b’dan li ġej:

“3.

Fi żmien 30 jum ta’ xogħol mir-riċezzjoni tal-applikazzjoni, l-awtorità kompetenti għandha tivvaluta jekk l-applikazzjoni hijiex kompluta. Fejn l-applikazzjoni ma tkunx kompluta, l-awtorità kompetenti għandha tistabbilixxi data ta’ skadenza sa meta s-CCP applikanti għandha tipprovdi informazzjoni addizzjonali. Malli tirċievi tali informazzjoni addizzjonali, l-awtorità kompetenti għandha tibgħatha minnufih lill-AETS u lill-kulleġġ stabbilit f’konformità mal-Artikolu 18(1). Wara li tivvaluta li applikazzjoni tkun kompluta, l-awtorità kompetenti għandha tinnotifika lis-CCP applikanti u lill-membri tal-kulleġġ u lill-AETS kif meħtieġ.”

(4)

l-Artikolu 18 huwa emendat kif ġej:

(a)

il-paragrafu 1 huwa sostitwit b’dan li ġej:

“1.	Fi żmien 30 jum kalendarju mis-sottomissjoni ta’ applikazzjoni sħiħa f’konformità mal-Artikolu 17, l-awtorità kompetenti tas-CCP applikanti għandha tistabbilixxi, tamministra u tippresiedi kulleġġ li jiffaċilita t-twettiq tal-kompiti msemmija fl-Artikoli 15, 17, 30, 31, 32, 35, 49, 51 u 54.”;

(b)

fil-paragrafu 2, il-punt (a) huwa sostitwit b’dan li ġej:

“(a)	il-President jew kwalunkwe wieħed mill-membri indipendenti tal-Kumitat Superviżorju tas-CCPs imsemmija fil-punti (a) u (b) tal-Artikolu 24a(2);”;

(c)

fil-paragrafu 2, il-punt (c) huwa sostitwit b’dan li ġej:

“(c)

l-awtoritajiet kompetenti responsabbli għas-superviżjoni tal-membri tal-ikklerjar tas-CCP li huma stabbiliti fit-tliet Stati Membri bl-ikbar kontribuzzjonijiet għall-fond tal-inadempjenza tas-CCP imsemmija fl-Artikolu 42 ta’ dan ir-Regolament fuq bażi aggregata tul perijodu ta’ sena, inkluż fejn rilevanti, il-BĊE fil-qafas tal-kompiti li jikkonċernaw is-superviżjoni prudenzjali tal-istituzzjonijiet ta’ kreditu fi ħdan il-mekkaniżmu superviżorju uniku mogħtija lilu b’konformità mar-Regolament tal-Kunsill (UE) Nru 1024/2013 (*1).

(*1) Ir-Regolament tal-Kunsill (UE) Nru 1024/2013 tal-15 ta’ Ottubru 2013 li jikkonferixxi kompiti speċifiċi lill-Bank Ċentrali Ewropew fir-rigward ta’ politiki relatati mas-superviżjoni prudenzjali ta’ istituzzjonijiet ta’ kreditu (ĠU L 287, 29.10.2013, p. 63).”;"

(d)

fil-paragrafu 2, jiddaħħal il-punt li ġej:

“(ca)

l-awtoritajiet kompetenti responsabbli għas-superviżjoni tal-membri tal-ikklerjar tas-CCP, għajr dawk imsemmija fil-punt (c), soġġetti għall-kunsens tal-awtorità kompetenti tas-CCP. Dawk l-awtoritajiet kompetenti għandhom jitolbu l-kunsens tal-awtorità kompetenti tas-CCP biex jipparteċipaw fil-kulleġġ, u jiġġustifikaw it-talba bbażata fuq il-valutazzjoni tagħhom tal-impatt li d-diffikultà finanzjarja tas-CCP jista’ jkollha fuq l-istabbiltà finanzjarja tal-Istat Membru rispettiv tagħhom. Fejn l-awtorità kompetenti tas-CCP tirrifjuta t-talba, l-awtorità kompetenti tas-CCP għandha tipprovdi raġunijiet sħaħ u ddettaljati bil-miktub;”;

(e)

fil-paragrafu 2, jiżdied il-punt li ġej:

“(i)

il-banek ċentrali tal-ħruġ fil-muniti tal-Unjoni tal-istrumenti finanzjarji kklerjati jew li għandhom jiġu kklerjati mis-CCP għajr dawk imsemmija fil-punt (h), soġġett għall-kunsens tal-awtorità kompetenti tas-CCP. Dawk il-banek ċentrali tal-ħruġ għandhom jitolbu l-kunsens tal-awtorità kompetenti tas-CCP biex jipparteċipaw fil-kulleġġ, u jiġġustifikaw it-talba bbażata fuq il-valutazzjoni tagħhom tal-impatt li diffikultà finanzjarja tas-CCP jista’ jkollha fuq il-munita ta’ ħruġ rispettiva tagħhom. Fejn l-awtorità kompetenti tas-CCP tirrifjuta t-talba, l-awtorità kompetenti tas-CCP għandha tipprovdi raġunijiet sħaħ u ddettaljati bil-miktub.”;

(f)

fil-paragrafu 2, jiżdied is-subparagrafu li ġej:

“L-awtorità kompetenti tas-CCP għandha tippubblika fuq is-sit web tagħha lista tal-membri tal-kulleġġ. Dik il-lista għandha tiġi aġġornata mill-awtorità kompetenti tas-CCP mingħajr dewmien bla bżonn wara kwalunkwe tibdil fil-kompożizzjoni tal-kulleġġ. L-awtorità kompetenti tas-CCP għandha tinnotifika lill-AETS dik il-lista fi żmien 30 jum kalendarju wara l-istabbiliment tal-kulleġġ jew it-tibdil fil-kompożizzjoni tiegħu. L-AETS għandha tippubblika fuq is-sit web tagħha mingħajr dewmien bla bżonn il-lista tal-membri ta’ dak il-kulleġġ.”;

(g)

fil-paragrafu 4, jiżdied is-subparagrafu li ġej:

“Sabiex jiġi ffaċilitat it-twettiq tal-kompiti assenjati lill-kulleġġi skont l-ewwel subparagrafu, il-membri tal-kulleġġ imsemmija fil-paragrafu 2 għandhom ikunu intitolati li jikkontribwixxu għall-iffissar ta’ aġenda tal-laqgħat tal-kulleġġ, b’mod partikolari billi jżidu punti fl-aġenda ta’ laqgħa.”;

(h)

fil-paragrafu 5, it-tieni subparagrafu huwa sostitwit b’dan li ġej:

“Dak il-ftehim għandu jiddetermina l-arranġamenti prattiċi għall-funzjonament tal-kulleġġ, inklużi regoli dettaljati dwar:

(i)	il-proċeduri tal-vot kif imsemmija fl-Artikolu 19(3);

(ii)	il-proċeduri għall-iffissar tal-aġenda tal-laqgħat tal-kulleġġ;

(iii)

il-frekwenza tal-laqgħat tal-kulleġġ;

(iv)	il-format u l-ambitu tal-informazzjoni li għandha tiġi pprovduta mill-awtorità kompetenti tas-CCP lill-membri tal-kulleġġ, speċjalment fir-rigward tal-informazzjoni li trid tiġi provduta skont l-Artikolu 21(4);

(v)	il-perijodi ta’ żmien minimi xierqa għall-valutazzjoni tad-dokumentazzjoni rilevanti mill-membri tal-kulleġġ;

(vi)	il-modalitajiet ta’ komunikazzjoni bejn il-membri tal-kulleġġ;

Il-ftehim jista’ jiddetermina wkoll kompiti fdati lill-awtorità kompetenti tas-CCP jew membru ieħor tal-kulleġġ.”;

(i)

il-paragrafu 6 huwa sostitwit b’dan li ġej:

“6.

Sabiex jiġi żgurat il-funzjonament konsistenti u koerenti tal-kulleġġi madwar l-Unjoni, l-AETS, f’kooperazzjoni mas-SEBĊ, għandha tiżviluppa abbozz ta’ standards tekniċi regolatorji li jispeċifikaw il-kondizzjonijiet li taħthom il-muniti Ewropej imsemmija fil-punt (h) tal-paragrafu 2 għandhom jitqiesu bħala l-aktar rilevanti u d-dettalji tal-arranġamenti prattiċi msemmija fil-paragrafu 5.

L-AETS għandha tippreżenta l-abbozz ta’ standards tekniċi regolatorji lill-Kummissjoni sat-2 ta’ Jannar 2021.

Il-Kummissjoni hija mogħtija s-setgħa li tadotta l-istandards tekniċi regolatorji msemmijin fl-ewwel subparagrafu skont l-Artikoli 10 sa 14 tar-Regolament (UE) Nru 1095/2010.”;

(5)

l-Artikolu 19 huwa emendat kif ġej:

(a)

jiddaħħal il-paragrafu li ġej:

“1a.

Fejn il-kulleġġ jagħti opinjoni skont dan ir-Regolament, fuq talba ta’ kwalunkwe membru tal-kulleġġ u meta tiġi adottata b’maġġoranza tal-kulleġġ skont il-paragrafu 3 ta’ dan l-Artikolu, dik l-opinjoni tista’ tinkludi, minbarra d-determinazzjoni jekk is-CCP tikkonformax jew le ma’ dan ir-Regolament, rakkomandazzjonijiet immirati biex jindirizzaw in-nuqqasijiet tal-ġestjoni tar-riskju tas-CCP u jżidu r-reżiljenza tagħha.

Fejn il-kulleġġ ikun jista’ jagħti opinjoni, kwalunkwe bank ċentrali tal-ħruġ, li jkun membru tal-kulleġġ skont il-punti (h) u (i) tal-Artikolu 18(2), jista’ jadotta rakkomandazzjonijiet relatati mal-valuta li huwa joħroġ.”;

(b)

il-paragrafu 3 huwa sostitwit b’dan li ġej:

“3.

Opinjoni ta’ maġġoranza tal-kulleġġ għandha tiġi adottata fuq il-bażi ta’ maġġoranza sempliċi tal-membri tiegħu.

Għall-kulleġġi sa u li jinkludu 12-il membru, massimu ta’ żewġ membri tal-kulleġġ mill-istess Stat Membru għandu jkollhom vot u kull membru li jivvota għandu jkollu vot wieħed. Għall-kulleġġi li jkun fihom aktar minn 12-il membru, massimu ta’ tliet membri mill-istess Stat Membru għandu jkollhom vot u kull membru votanti għandu jkollu vot wieħed.

Fejn il-BĊE ikun membru tal-kulleġġ skont il-punti (c) u (h) tal-Artikolu 18(2), huwa għandu jkollu żewġ voti.

Il-membri tal-kulleġġ imsemmija fil-punti (a), (ca) u (i) tal-Artikolu 18(2) m’għandu jkollhom l-ebda drittijiet ta’ vot fuq l-opinjonijiet tal-kulleġġ.”;

(c)

jiżdied il-paragrafu li ġej:

“4.

Mingħajr preġudizzju għall-proċedura preskritta fl-Artikolu 17, l-awtorità kompetenti għandha debitament tikkunsidra l-opinjoni tal-kulleġġ li jkun wasal għaliha skont il-paragrafu 1 ta’ dan l-Artikolu, inkluża kwalunkwe rakkomandazzjoni possibbli mmirata biex tindirizza nuqqasijiet tal-ġestjoni tar-riskju tas-CCP u żżid ir-reżiljenza tagħha. Fejn l-awtorità kompetenti tal-kontroparti ċentrali ma taqbilx ma’ opinjoni tal-kulleġġ, inkluża kwalunkwe rakkomandazzjoni fiha mmirata biex jiġu indirizzati nuqqasijiet fi proċeduri ta’ ġestjoni tar-riskju tas-CCP u tiżdied ir-reżiljenza tagħha, id-deċiżjoni tagħha għandha tinkludi r-raġunijiet kollha u spjegazzjoni ta’ kull devjazzjoni sinifikanti minn dik l-opinjoni jew dawk ir-rakkomandazzjonijiet.”;

(6)

l-Artikolu 21 huwa emendat kif ġej:

(a)

il-paragrafu 1 huwa sostitwit b’dan li ġej:

“1.

Mingħajr preġudizzju għar-rwol tal-kulleġġ, l-awtoritajiet kompetenti msemmija fl-Artikolu 22 għandhom jeżaminaw l-arranġamenti, l-istrateġiji, il-proċessi u l-mekkaniżmi implimentati mill-kontropartijiet ċentrali biex jikkonformaw ma’ dan ir-Regolament u jevalwaw ir-riskji, inklużi, mill-inqas, riskji finanzjarji u operattivi, li għalihom ikunu, jew jistgħu jkunu, esposti CCPs.”;

(b)

il-paragrafu 3 huwa sostitwit b’dan li ġej:

“3.

L-awtoritajiet kompetenti għandhom jistabbilixxu l-frekwenza u l-grad ta’ dettall tar-rieżami u tal-evalwazzjoni msemmija fil-paragrafu 1, filwaqt li jqisu b’mod partikolari d-daqs, l-importanza sistemika, in-natura, l-iskala, il-kumplessità tal-attivitajiet u l-interkonnettività ma’ infrastrutturi oħra tas-swieq finanzjarji tas-CCPs ikkonċernati. Ir-rieżami u l-evalwazzjoni għandhom jiġu aġġornati mill-inqas fuq bażi annwali.

Is-CCPs għandhom ikunu soġġetti għal spezzjonijiet fil-post. Fuq talba tal-AETS, l-awtoritajiet kompetenti jistgħu jistiednu lill-persunal tal-AETS biex jipparteċipa f’ispezzjonijiet fil-post.

L-awtorità kompetenti tista’ tibgħat lill-AETS kwalunkwe informazzjoni riċevuta mingħand is-CCPs matul spezzjonijiet fil-post jew relattivament għalihom.”;

(c)

il-paragrafu 6 huwa sostitwit b’dan li ġej:

“6.

Sat-2 ta’ Jannar 2021, sabiex tiġi żgurata l-konsistenza fil-format, il-frekwenza u l-grad ta’ dettall tar-reviżjoni mwettqa mill-awtoritajiet nazzjonali kompetenti skont dan l-Artikolu, l-AETS għandha toħroġ linji gwida skont l-Artikolu 16 tar-Regolament (UE) Nru 1095/2010 biex tispeċifika aktar, b’mod li jkun adatt għad-daqs, l-istruttura u l-organizzazzjoni interna tas-CCPs u n-natura, l-ambitu u l-kumplessità tal-attivitajiet tagħhom, il-proċeduri u metodoloġiji komuni għar-rieżami superviżorju u l-proċess ta’ evalwazzjoni msemmijin fil-paragrafi 1 u 2 u fl-ewwel subparagrafu tal-paragrafu 3 ta’ dan l-Artikolu.”;

(7)

jiddaħħal l-Artikolu li ġej:

“Artikolu 23a

Kooperazzjoni superviżorja bejn l-awtoritajiet kompetenti u l-AETS fir-rigward ta’ CCPs awtorizzati

1. L-AETS għandha twettaq rwol ta’ koordinazzjoni bejn l-awtoritajiet kompetenti u fost il-kulleġġi bil-għan li tiżviluppa kultura superviżorja komuni u prattiki superviżorji konsistenti, li jiżguraw proċeduri uniformi u approċċi konsistenti, u jsaħħu l-konsistenza fir-riżultati ta’ superviżjoni, b’mod speċjali fir-rigward ta’ oqsma superviżorji li jkollhom dimensjoni transfruntiera jew impatt transfruntier possibbli.

2. L-awtoritajiet kompetenti għandhom jippreżentaw l-abbozzi ta’ deċiżjonijiet tagħhom lill-AETS qabel l-adozzjoni ta’ kwalunkwe att jew miżura skont l-Artikoli 7, 8, 14, 15, 29 sa 33, 35, 36 u 54.

L-awtoritajiet kompetenti jistgħu jippreżentaw ukoll abbozzi ta’ deċiżjonijiet lill-AETS qabel l-adozzjoni ta’ kwalunkwe att ieħor jew miżura oħra f’konformità mad-dmirijiet tagħhom taħt l-Artikolu 22(1).

3. Fi żmien 20 jum ta’ xogħol mir-riċezzjoni ta’ abbozz ta’ deċiżjoni ppreżentat f’konformità mal-paragrafu 2 relattivament għal Artikolu speċifiku, l-AETS għandha tagħti opinjoni dwar dak l-abbozz ta’ deċiżjoni lill-awtorità kompetenti fejn meħtieġ biex tiġi promossa applikazzjoni konsistenti u koerenti ta’ dak l-Artikolu.

Fejn l-abbozz tad-deċiżjoni ppreżentat lill-AETS f’konformità mal-paragrafu 2 juri nuqqas ta’ konverġenza jew ta’ koerenza fl-applikazzjoni ta’ dan ir-Regolament, l-AETS għandha toħroġ linji gwida jew rakkomandazzjonijiet biex tippromwovi l-konsistenza jew il-koerenza meħtieġa fl-applikazzjoni ta’ dan ir-Regolament skont l-Artikolu 16 tar-Regolament (UE) Nru 1095/2010.

4. Fejn l-AETS tadotta opinjoni f’konformità mal-paragrafu 3, l-awtorità kompetenti għandha tagħtiha l-konsiderazzjoni dovuta u għandha tinforma lill-AETS dwar kwalunkwe azzjoni jew nuqqas ta’ azzjoni sussegwenti fir-rigward tagħha. Fejn l-awtorità kompetenti ma taqbilx ma’ opinjoni tal-AETS, għandha tipprovdi kummenti lill-AETS dwar kwalunkwe devjazzjoni sinifikanti minn dik l-opinjoni.”;

(8)

l-Artikolu 24 huwa sostitwit b’dan li ġej:

“Artikolu 24

Sitwazzjonijiet ta’ emerġenza

L-awtorità kompetenti tas-CCP jew kwalunkwe awtorità rilevanti oħra għandha tinforma lill-AETS, lill-kulleġġ, lill-membri rilevanti tas-SEBĊ u lil awtoritajiet rilevanti oħra mingħajr dewmien mhux ġustifikat bi kwalunkwe sitwazzjoni ta’ emerġenza relatata ma’ CCP, inklużi żviluppi fi swieq finanzjarji, li jista’ jkollhom effett negattiv fuq il-likwidità tas-suq, it-trasmissjoni ta’ politika monetarja, l-operazzjoni mingħajr xkiel ta’ sistemi ta’ pagament jew l-istabbiltà tas-sistema finanzjarja fi kwalunkwe Stat Membru fejn is-CCP jew wieħed mill-membri tal-ikklerjar tagħha jkunu stabbiliti.”;

(9)

jiddaħħal il-Kapitolu li ġej:

“ KAPITOLU 3 A

Il-Kumitat Superviżorju tas-CCPs

Artikolu 24a

Kumitat Superviżorju tas-CCPs

1. L-AETS għandha tistabbilixxi kumitat intern permanenti skont l-Artikolu 41 tar-Regolament (UE) Nru 1095/2010 għall-finijiet tat-tħejjija ta’ abbozzi ta’ deċiżjonijiet għall-adozzjoni mill-Bord tas-Superviżuri u tat-twettiq tal-kompiti stabbiliti fil-paragrafi 7, 9 u 10 ta’ dan l-Artikolu (il-‘Kumitat Superviżorju tas-CCPs’).

2. Il-Kumitat Superviżorju tas-CCPs għandu jkun magħmul minn:

(a)	il-President, li għandu jkollu d-dritt tal-vot;

(b)	żewġ membri indipendenti, li għandu jkollhom id-dritt tal-vot;

(c)

l-awtoritajiet kompetenti tal-Istati Membri msemmija fl-Artikolu 22 ta’ dan ir-Regolament b’CCP awtorizzata, li għandu jkollhom id-dritt tal-vot; fejn Stat Membru jkun ħatar diversi awtoritajiet kompetenti, kull waħda mill-awtoritajiet kompetenti maħtura ta’ dan l-Istat Membru tista’ tiddeċiedi li taħtar rappreżentant wieħed għall-finijiet ta’ parteċipazzjoni skont dan il-punt, madankollu, għall-proċeduri ta’ votazzjoni stabbiliti fl-Artikolu 24c, ir-rappreżentanti tal-Istat Membru rispettiv għandhom flimkien jitqiesu bħala membru wieħed bid-dritt tal-vot.

(d)

Il-banek ċentrali tal-ħruġ li ġejjin:

(i)

fejn il-Kumitat Superviżorju tas-CCPs jiltaqa’ relattivament għal CCPs ta’ pajjiżi terzi, fir-rigward tat-tħejjija tad-deċiżjonijiet kollha li jikkonċernaw l-Artikoli msemmija fil-paragrafu 10 ta’ dan l-Artikolu b’rabta ma’ CCPs tal-Grad 2 u l-Artikolu 25(2a), il-banek ċentrali tal-ħruġ imsemmija fil-punt (f) tal-Artikolu 25(3) li jkunu talbu sabiex jissieħbu fil-Kumitat Superviżorju tas-CCPs, li ma għandux ikollhom id-dritt tal-vot;

(ii)

fejn il-Kumitat Superviżorju tas-CCPs jiltaqa’ relattivament għal CCPs awtorizzati f’konformità mal-Artikolu 14, fil-kuntest ta’ diskussjonijiet li jirrigwardaw il-punt (b) u s-sottopunt (iv) tal-punt (c) tal-paragrafu 7 ta’ dan l-Artikolu, il-banek ċentrali tal-ħruġ fil-muniti tal-Unjoni tal-istrumenti finanzjarji kklerjati minn CCPs awtorizzati li jkunu talbu sabiex jissieħbu fil-Kumitat Superviżorju tas-CCPs, li ma għandux ikollhom id-dritt tal-vot.

Is-sħubija għall-fini tas-subpunti (i) u (ii) għandha tingħata awtomatikament fuq talba bil-miktub ta’ darba indirizzata lill-President.

3. Il-President jista’ jistieden bħala osservaturi għal-laqgħat tal-Kumitat Superviżorju tas-CCPs, fejn xieraq u meħtieġ, lill-membri tal-kulleġġi msemmija fl-Artikolu 18.

4. Il-laqgħat tal-Kumitat Superviżorju tas-CCPs għandhom jiġu organizzati mill-President tiegħu fuq inizjattiva tiegħu stess jew fuq talba ta’ wieħed mill-membri tiegħu bid-dritt tal-vot. Il-Kumitat Superviżorju tas-CCPs għandu jiltaqa’ mill-inqas ħames darbiet f’sena.

5. Il-President u l-membri indipendenti tal-Kumitat Superviżorju tas-CCPs għandhom ikunu professjonisti indipendenti, full-time. Huma għandhom jinħatru mill-Bord tas-Superviżuri fuq il-bażi tal-mertu, il-ħiliet, l-għarfien ta’ kwistjonijiet tal-ikklerjar, ta’ wara n-negozjar, ta’ superviżjoni prudenzjali u kwistjonijiet finanzjarji, kif ukoll fuq il-bażi tal-esperjenza rilevanti għas-superviżjoni u r-regolamentazzjoni tas-CCPs, wara proċedura ta’ għażla miftuħa.

Qabel il-ħatra tal-President u tal-membri indipendenti tal-Kumitat Superviżorju tas-CCPs, u sa xahar wara l-għażla mill-Bord tas-Superviżuri, li għandu jissottometti lill-Parlament Ewropew il-lista mqassra tiegħu ta’ kandidati magħżula b’rispett għall-bilanċ bejn is-sessi, il-Parlament Ewropew, wara li jkun sema’ lill-kandidati magħżula, għandu japprovahom jew jirrifjutahom.

Fejn il-President jew kwalunkwe wieħed mill-membri indipendenti tal-Kumitat Superviżorju tas-CCPs ma jkunx għadu jissodisfa l-kondizzjonijiet meħtieġa għall-qadi ta’ dmirijietu jew jekk jinstab ħati ta’ mġiba ħażina serja, il-Kunsill jista’, fuq proposta mill-Kummissjoni li tkun ġiet approvata mill-Parlament Ewropew, jadotta deċiżjoni ta’ implimentazzjoni biex ineħħi lilu jew lilha mill-kariga. Il-Kunsill għandu jaġixxi b’maġġoranza kwalifikata.

Il-Parlament Ewropew jew il-Kunsill jistgħu jinformaw lill-Kummissjoni li jqisu bħala sodisfatti l-kondizzjonijiet għat-tneħħija tal-President jew ta’ wieħed mill-membri indipendenti tal-Kumitat Superviżorju tas-CCPs, u l-Kummissjoni għandha tagħti tweġiba għal dan.

Il-mandat tal-President u tal-membri indipendenti tal-Kumitat Superviżorju tas-CCPs għandu jkun ta’ ħames snin u jista’ jiġi estiż darba.

6. Il-President u l-membri indipendenti tal-Kumitat Superviżorju tas-CCPs ma għandux ikollhom xi karigi oħra fil-livell nazzjonali, tal-Unjoni, jew internazzjonali. Huma għandhom jaġixxu b’mod indipendenti u oġġettiv fl-interess uniku tal-Unjoni kollha kemm hi u la għandhom jitolbu u lanqas jieħdu struzzjonijiet mill-istituzzjonijiet jew mill-korpi tal-Unjoni, minn xi gvern ta’ Stat Membru jew minn xi korp pubbliku jew privat ieħor.

La l-Istati Membri, l-istituzzjonijiet jew il-korpi tal-Unjoni u lanqas xi korp pubbliku jew privat ieħor ma għandu jfittex li jinfluwenza lill-President u lill-membri indipendenti tal-Bord Superviżorju tas-CCPs fil-qadi ta’ dmirijiethom.

F’konformità mar-Regolamenti tal-Persunal imsemmija fl-Artikolu 68 tar-Regolament (UE) Nru 1095/2010, il-President u l-membri indipendenti tal-Kumitat Superviżorju tas-CCPs għandhom, wara li jitilqu mis-servizz, jibqgħu jkunu marbuta bid-dover li jaġixxu b’integrità u diskrezzjoni fir-rigward tal-aċċettazzjoni ta’ ċerti ħatriet jew benefiċċji.

7. B’rabta mas-CCPs awtorizzati jew li japplikaw għall-awtorizzazzjoni f’konformità mal-Artikolu 14 ta’ dan ir-Regolament, il-Kumitat Superviżorju tas-CCPs għandu, għall-fini tal-Artikolu 23a(1) ta’ dan ir-Regolament, iħejji deċiżjonijiet u jwettaq il-kompiti fdati lill-AETS fl-Artikolu 23a(3) ta’ dan ir-Regolament u fil-punti li ġejjin:

(a)	mill-inqas darba fis-sena, jagħmel analiżi ta’ reviżjoni bejn il-pari tal-attivitajiet superviżorji tal-awtoritajiet kompetenti kollha b’rabta mal-awtorizzazzjoni u s-superviżjoni tas-CCPs skont l-Artikolu 30 tar-Regolament (UE) Nru 1095/2010;

(b)	mill-inqas darba fis-sena, jibda u jikkoordina evalwazzjoni madwar l-Unjoni kollha tar-reżiljenza tas-CCPs għal żviluppi negattivi fis-suq skont l-Artikolu 32(2) tar-Regolament (UE) Nru 1095/2010;

(c)

jippromwovi l-iskambju u d-diskussjoni regolari fost l-awtoritajiet kompetenti maħtura skont l-Artikolu 22(1) ta’ dan ir-Regolament relattivament għal:

(i)	l-attivitajiet u d-deċiżjonijiet superviżorji rilevanti li ġew adottati mill-awtoritajiet kompetenti msemmijin fl-Artikolu 22 meta jwettqu dmirijiethom skont dan ir-Regolament fir-rigward tal-awtorizzazzjoni u s-superviżjoni tas-CCPs stabbiliti fit-territorju tagħhom;

(ii)	l-abbozzi ta’ deċiżjonijiet ippreżentati lill-AETS minn awtorità kompetenti f’konformità mal-ewwel subparagrafu tal-Artikolu 23a(2);

(iii)

l-abbozzi ta’ deċiżjonijiet ippreżentati lill-AETS minn awtorità kompetenti fuq bażi volontarja f’konformità mat-tieni subparagrafu tal-Artikolu 23a(2);

(iv)	żviluppi tas-suq rilevanti, inklużi sitwazzjonijiet jew avvenimenti li jaffettwaw jew li x’aktarx jaffettwaw is-solidità prudenzjali jew finanzjarja, jew ir-reżiljenza ta’ CCPs awtorizzati f’konformità mal-Artikolu 14 jew il-membri tal-ikklerjar tagħhom;

(d)	isir informat dwar, u jiddiskuti, l-opinjonijiet u r-rakkomandazzjonijiet kollha adottati mill-kulleġġi skont l-Artikolu 19 ta’ dan ir-Regolament, sabiex jikkontribwixxi għall-funzjonament konsistenti u koerenti tal-kulleġġi u jrawwem il-koerenza fl-applikazzjoni ta’ dan ir-Regolament bejniethom.

Għall-finijiet tal-punti (a) sa (d) tal-ewwel subparagrafu, l-awtoritajiet kompetenti għandhom jipprovdu lill-AETS bl-informazzjoni u d-dokumentazzjoni kollha rilevanti mingħajr dewmien mhux ġustifikat.

8. Fejn l-attivitajiet jew l-iskambju msemmija fil-punti (a) sa (d) tal-paragrafu 7 jiżvelaw nuqqas ta’ konverġenza u koerenza fl-applikazzjoni ta’ dan ir-Regolament, l-AETS għandha toħroġ il-linji gwida jew ir-rakkomandazzjonijiet neċessarji skont l-Artikolu 16 tar-Regolament (UE) Nru 1095/2010 jew opinjonijiet skont l-Artikolu 29 tar-Regolament (UE) Nru 1095/2010. Fejn evalwazzjoni msemmija fil-punt (b) tal-paragrafu 7 tiżvela nuqqasijiet fir-reżiljenza ta’ mill-inqas CCP waħda, l-AETS għandha toħroġ ir-rakkomandazzjonijiet neċessarji skont l-Artikolu 16 tar-Regolament (UE) Nru 1095/2010.

9. Barra minn hekk, il-Kumitat Superviżorju tas-CCPs jista’:

(a)

abbażi tal-attivitajiet tiegħu skont il-punti (a) sa (d) tal-paragrafu 7, jitlob lill-Bord tas-Superviżuri biex jikkunsidra jekk l-adozzjoni ta’ linji gwida, rakkomandazzjonijiet u opinjonijiet mill-AETS hix neċessarja sabiex jiġi indirizzat nuqqas ta’ konverġenza u koerenza fl-applikazzjoni ta’ dan ir-Regolament fost l-awtoritajiet u l-kulleġġi kompetenti. Il-Bord tas-Superviżuri għandu jikkunsidra dawn it-talbiet b’mod debitu u jipprovdi tweġiba adegwata;

(b)

jippreżenta opinjonijiet lill-Bord tas-Superviżuri dwar id-deċiżjonijiet li għandhom jittieħdu skont l-Artikolu 44 tar-Regolament (UE) Nru 1095/2010, għajr id-deċiżjonijiet imsemmijin fl-Artikoli 17 u 19 ta’ dak ir-Regolament, fir-rigward ta’ kompiti li jkunu ngħataw lill-awtoritajiet kompetenti msemmijin fl-Artikolu 22 ta’ dan ir-Regolament.

10. Il-Kumitat Superviżorju tas-CCPs għandu, fir-rigward tas-CCPs ta’ pajjiżi terzi, jħejji abbozzi ta’ deċiżjonijiet li għandhom jittieħdu mill-Bord tas-Superviżuri u jwettaq il-kompiti fdati lill-AETS fl-Artikoli 25, 25a, 25b, 25f sa 25q u 85(6).

11. Il-Kumitat Superviżorju tas-CCPs għandu, fir-rigward ta’ CCPs ta’ pajjiżi terzi, jikkondividi mal-kulleġġ tas-CCPs ta’ pajjiżi terzi msemmi fl-Artikolu 25c l-aġendi tal-laqgħat tiegħu qabel dawk il-laqgħat iseħħu, il-minuti tal-laqgħat tiegħu, l-abbozzi ta’ deċiżjonijiet kompleti li jippreżenta lill-Bord tas-Superviżuri u d-deċiżjonijiet finali adottati mill-Bord tas-Superviżuri.

12. Il-Kumitat Superviżorju tas-CCPs għandu jkun appoġġat minn persunal dedikat mill-AETS, li jkollu biżżejjed għarfien, ħiliet u esperjenza, sabiex:

(a)	iħejji l-laqgħat tal-Kumitat Superviżorju tas-CCPs;

(b)	iħejji l-analiżi neċessarja għall-Kumitat Superviżorju tas-CCPs biex iwettaq tal-kompiti tiegħu;

(c)	jappoġġa lill-Kumitat Superviżorju tas-CCPs fil-kooperazzjoni internazzjonali tiegħu fil-livell amministrattiv.

13. Għall-finijiet ta’ dan ir-Regolament, l-AETS għandha tiżgura s-separazzjoni strutturali bejn il-Kumitat Superviżorju tas-CCPs u funzjonijiet oħra msemmijin fir-Regolament (UE) Nru 1095/2010.

Artikolu 24b

Konsultazzjoni tal-banek ċentrali tal-ħruġ

1. Fir-rigward ta’ deċiżjonijiet li għandhom jittieħdu skont l-Artikoli 41, 44, 46, 50 u 54 li jirrigwardaw CCPs tal-Grad 2, il-Kumitat Superviżorju tas-CCPs għandu jikkonsulta lill-banek ċentrali tal-ħruġ imsemmijin fil-punt (f) tal-Artikolu 25(3). Kull bank ċentrali tal-ħruġ jista’ jirrispondi. Kwalunkwe risposta għandha tasal fi żmien 10 ijiem tax-xogħol mit-trażmissjoni tal-abbozz ta’ deċiżjoni. F’sitwazzjonijiet ta’ emerġenza, il-perijodu msemmi hawn fuq ma għandux ikun ta’ aktar minn 24 siegħa. Meta bank ċentrali tal-ħruġ jipproponi emendi jew joġġezzjona għall-abbozzi ta’ deċiżjonijiet skont l-Artikoli 41, 44, 46, 50 u 54, għandu jipprovdi r-raġunijiet kollha u fid-dettall, bil-miktub. Hekk kif jiskadi l-perijodu għall-konsultazzjoni, il-Kumitat Superviżorju tas-CCPs għandu jikkunsidra b’mod debitu l-emendi proposti mill-banek ċentrali tal-ħruġ.

2. Fejn il-Kumitat Superviżorju tas-CCPs ma jirriflettix fl-abbozz ta’ deċiżjoni tiegħu l-emendi proposti minn bank ċentrali tal-ħruġ, il-Kumitat Superviżorju tas-CCPs għandu jinforma lil dak il-bank ċentrali tal-ħruġ bil-miktub waqt li jiddikjara r-raġunijiet kollha tiegħu għalfejn ma jkunx ħa kont tal-emendi proposti minn dak il-bank ċentrali tal-ħruġ, u jipprovdi spjegazzjoni għal kwalunkwe devjazzjoni minn dawk l-emendi. Il-Kumitat Superviżorju tas-CCPs għandu jippreżenta lill-Bord tas-Superviżuri l-emendi proposti minn banek ċentrali tal-ħruġ u l-ispjegazzjonijiet tiegħu għalfejn ma jkunx ħa kont tagħhom flimkien mal-abbozz ta’ deċiżjoni tiegħu.

3. Fir-rigward tad-deċiżjonijiet li għandhom jittieħdu skont l-Artikoli 25(2c) u 85(6), il-Kumitat Superviżorju tas-CCPs għandu jfittex il-qbil tal-banek ċentrali tal-ħruġ imsemmijin fil-punt (f) tal-Artikolu 25(3) għall-kwistjonijiet relatati mal-muniti maħruġa minnhom. Għandu jkun ikkunsidrat li kull bank ċentrali tal-ħruġ ta l-qbil tiegħu sakemm il-bank ċentrali tal-ħruġ ma jipproponix emendi jew ma joġġezzjonax fi żmien għaxart ijiem tax-xogħol mit-trasmissjoni tal-abbozz ta’ deċiżjoni. Fejn bank ċentrali tal-ħruġ jipproponi emendi jew joġġezzjona għal abbozz ta’ deċiżjoni, huwa għandu jipprovdi r-raġunijiet kollha u fid-dettall, bil-miktub. Fejn bank ċentrali tal-ħruġ jipproponi emendi fir-rigward ta’ kwistjonijiet relatati mal-munita maħruġa minnu, il-Kumitat Superviżorju tas-CCPs jista’ biss jippreżenta lill-Bord tas-Superviżuri l-abbozz ta’ deċiżjoni kif emendat fir-rigward ta’ dawk il-kwistjonijiet. Fejn bank ċentrali tal-ħruġ joġġezzjona fir-rigward ta’ kwistjonijiet relatati mal-munita maħruġa minnu, il-Kumitat Superviżorju tas-CCPs ma għandux jinkludu dawk il-kwistjonijiet fl-abbozz ta’ deċiżjoni lill-Bord tas-Superviżuri għall-adozzjoni.

Artikolu 24c

Teħid ta’ deċiżjonijiet fi ħdan il-Kumitat Superviżorju tas-CCPs

Il-Kumitat Superviżorju tas-CCPs għandu jieħu d-deċiżjonijiet tiegħu permezz ta’ maġġoranza sempliċi tal-membri tiegħu bid-dritt tal-vot. F’każ li l-voti jiġu ndaqs, il-President għandu jkollu l-vot deċiżiv.

Artikolu 24d

Teħid ta’ deċiżjonijiet fi ħdan il-Bord tas-Superviżuri

Fejn il-Kumitat Superviżorju tas-CCPs jippreżenta abbozzi ta’ deċiżjonijiet lill-Bord ta’ Superviżuri skont l-Artikoli 25(2), 25(2a), 25(2b), 25(2c), 25(5), 25p, 85(6), 89(3b) ta’ dan ir-Regolament u addizzjonalment biss għal CCPs tal-Grad 2 skont l-Artikoli 41, 44, 46, 50 u 54 ta’ dan ir-Regolament, il-Bord tas-Superviżuri għandu jiddeċiedi dwar dawk l-abbozzi ta’ deċiżjonijiet skont l-Artikolu 44 tar-Regolament (UE) Nru 1095/2010 fi żmien għaxart ijiem tax-xogħol.

Fejn il-Kumitat Superviżorju tas-CCPs jippreżenta abbozzi ta’ deċiżjonijiet lill-Bord ta’ Superviżuri skont Artikoli għajr dawk imsemmijin fl-ewwel subparagrafu, il-Bord tas-Superviżuri għandu jiddeċiedi dwar dawk l-abbozzi ta’ deċiżjonijiet skont l-Artikolu 44 tar-Regolament (UE) Nru 1095/2010 fi żmien tlett ijiem tax-xogħol.

Artikolu 24e

Responsabbiltà

1. Il-Parlament Ewropew jew il-Kunsill jista’ jistieden lill-President u l-membri indipendenti tal-Kumitat Superviżorju tas-CCPs biex jagħmlu dikjarazzjoni filwaqt li jirrispettaw kompletament l-indipendenza tagħhom. Il-President u l-membri indipendenti tal-Kumitat Superviżorju tas-CCPs għandhom jagħmlu dik id-dikjarazzjoni quddiem il-Parlament Ewropew u jwieġbu kwalunkwe mistoqsija mressqa mill-Membri tiegħu kull meta jintalab dan.

2. Il-President u l-membri indipendenti tal-Kumitat Superviżorju tas-CCPs għandhom jirrapportaw bil-miktub dwar l-attivitajiet prinċipali tal-Kumitat Superviżorju tas-CCPs lill-Parlament Ewropew u lill-Kunsill meta jintalbu jagħmlu dan u mill-inqas 15-il jum qabel ma jagħmlu d-dikjarazzjoni msemmija fil-paragrafu 1.

3. Il-President u l-membri indipendenti tal-Kumitat Superviżorju tas-CCPs għandhom jirrapportaw kwalunkwe informazzjoni rilevanti mitluba mill-Parlament Ewropew fuq bażi ad-hoc u kunfidenzjali. Dak ir-rapport ma għandux ikopri informazzjoni kunfidenzjali relatata ma’ CCPs individwali.”;

(10)

l-Artikolu 25 huwa emendat kif ġej:

(a)

il-paragrafu 1 huwa sostitwit b’dan li ġej:

“1.	CCP stabbilita f’pajjiż terz tista’ tipprovdi biss servizzi ta’ kklerjar lil membri tal-ikklerjar jew lil ċentri tan-negozjar stabbiliti fl-Unjoni meta dik is-CCP tkun rikonoxxuta mill-AETS.”;

(b)

fil-paragrafu 2, jiżdied il-punt li ġej:

“(e)	is-CCP ma tkunx ġiet determinata bħala sistemikament importanti jew mhux probabbli ssir sistemikament importanti f’konformità mal-paragrafu 2a u għalhekk tkun CCP tal-Grad 1.”;

(c)

jiddaħħlu l-paragrafi li ġejjin:

“2a.

L-AETS għandha, wara li tikkonsulta lill-BERS u lill-banek ċentrali tal-ħruġ imsemmijin fil-punt (f) tal-paragrafu 3, tiddetermina jekk CCP ta’ pajjiż terz tkunx sistemikament importanti jew x’aktarx ser issir sistemikament importanti għall-istabbiltà finanzjarja tal-Unjoni jew ta’ wieħed jew aktar mill-Istati Membri tagħha (CCP tal-Grad 2) billi tieħu kont tal-kriterji kollha li ġejjin:

(a)

in-natura, id-daqs u l-kumplessità tan-negozju tas-CCP fl-Unjoni u barra l-Unjoni sa fejn in-negozju tagħha jista’ jkollu impatt sistemiku fuq l-Unjoni jew fuq Stat Membru wieħed, jew aktar, tagħha, inklużi:

(i)

il-valur f’termini ta’ aggregat u f’kull munita tal-Unjoni ta’ tranżazzjonijiet ikklerjati mis-CCP, jew l-espożizzjoni aggregata tas-CCP involuta f’attivitajiet ta’ kklerjar għall-membri tal-ikklerjar tagħha, u sal-punt li tkun disponibbli l-informazzjoni, il-klijenti u l-klijenti indiretti tagħhom stabbiliti fl-Unjoni, inkluż meta jkunu ġew iddeżinjati mill-Istati Membri bħala istituzzjonijiet sistemikament importanti oħra (O-SIIs) skont l-Artikolu 131(3) tad-Direttiva 2013/36/UE; u

(ii)	il-profil tar-riskju tas-CCP f’termini ta’, fost oħrajn, riskju legali, operattiv u tan-negozju;

(b)

l-effett li l-falliment tas-CCP jew it-tfixkil tagħha jkollhom fuq:

(i)	swieq finanzjarji, inkluża l-likwidità tas-swieq li sservi;

(ii)	istituzzjonijiet finanzjarji;

(iii)

is-sistema finanzjarja b’mod ġenerali; jew

(iv)	l-istabbiltà finanzjarja tal-Unjoni jew ta’ xi Stat Membru wieħed, jew aktar, tagħha;

(c)	l-istruttura tas-sħubija tal-ikklerjar tas-CCP inkluża, sa fejn tkun disponibbli l-informazzjoni, l-istruttura tan-netwerk tal-membri tal-ikklerjar tal-klijenti u l-klijenti indiretti, stabbiliti fl-Unjoni;

(d)	il-punt sa fejn servizzi alternattivi ta’ kklerjar ipprovduti minn CCPs oħra jeżistu fl-istrumenti finanzjarji denominati f’muniti tal-Unjoni għall-membri tal-ikklerjar u, sa fejn tkun disponibbli l-informazzjoni, għall-klijenti tagħhom u l-klijenti indiretti stabbiliti fl-Unjoni;

(e)

ir-relazzjonijiet, l-interdipendenzi, jew l-interazzjonijiet l-oħrajn tas-CCP ma’ infrastrutturi tas-swieq finanzjarji oħrajn, istituzzjonijiet finanzjarji oħrajn u s-sistema finanzjarja b’mod ġenerali sa fejn ikun probabbli li dan ikollu impatt fuq l-istabbiltà finanzjarja tal-Unjoni jew ta’ xi wieħed jew aktar mill-Istati Membri tagħha.

Il-Kummissjoni għandha tadotta att delegat f’konformità mal-Artikolu 82 biex tispeċifika aktar il-kriterji stabbiliti fl-ewwel subparagrafu sat-2 ta’ Jannar 2021.

Mingħajr preġudizzju għall-eżitu tal-proċess ta’ rikonoxximent, l-AETS għandha, wara li twettaq il-valutazzjoni msemmija fl-ewwel subparagrafu, tinforma lis-CCP applikanti jekk titqiesx bħala CCP tal-Grad 1 jew le fi żmien 30 jum tax-xogħol mid-determinazzjoni li l-applikazzjoni ta’ dik is-CCP tkun kompluta f’konformità mat-tieni subparagrafu tal-paragrafu 4.

2b.

Meta l-AETS tiddetermina li CCP tkun sistemikament importanti jew li x’aktarx ser issir sistemikament importanti (CCP tal-Grad 2) skont il-paragrafu 2a, għandha tirrikonoxxi biss li dik is-CCP tipprovdi ċerti servizzi jew attivitajiet tal-ikklerjar fejn, flimkien mal-kondizzjonijiet imsemmijin fil-punti (a) sa (d) tal-paragrafu 2, jiġu sodisfatti l-kondizzjonijiet li ġejjin:

(a)

is-CCP tikkonforma, fil-mument tar-rikonoxximent u minn hemm ’il quddiem fuq bażi kontinwa, mar-rekwiżiti stabbiliti fl-Artikolu 16 u fit-Titoli IV u V. Fir-rigward tal-konformità tas-CCP mal-Artikoli 41, 44, 46, 50 u 54, l-AETS għandha tikkonsulta l-banek ċentrali tal-ħruġ imsemmijin fil-punt (f) tal-paragrafu 3 skont il-proċedura stabbilita fl-Artikolu 24b(1). L-AETS għandha tikkunsidra, f’konformità mal-Artikolu 25a, sa liema punt il-konformità tas-CCP ma’ dawk ir-rekwiżiti hija sodisfatta mill-konformità tagħha ma’ rekwiżiti komparabbli applikabbli fil-pajjiż terz;

(b)

il-banek ċentrali tal-ħruġ imsemmija fil-punt (f) tal-paragrafu 3 ipprovdew lill-AETS konferma bil-miktub, fi żmien 30 jum tax-xogħol mid-determinazzjoni li CCP ta’ pajjiż terz mhijiex CCP tal-Grad 1 f’konformità mal-paragrafu 2a jew wara r-rieżami f’konformità mal-paragrafu 5, li s-CCP tikkonforma mar-rekwiżiti li ġejjin li dawk il-banek ċentrali tal-ħruġ setgħu imponew fit-twettiq tal-kompiti tal-politika monetarja tagħhom:

(i)	il-preżentazzjoni ta’ kwalunkwe informazzjoni li l-bank ċentrali tal-ħruġ jista’ jirrikjedi mat-talba motivata tiegħu, fejn dik l-informazzjoni ma tkunx inkisbet mod ieħor mill-AETS;

(ii)	il-kooperazzjoni sħiħa u debita mal-bank ċentrali tal-ħruġ fil-kuntest tal-valutazzjoni tar-reżiljenza tas-CCP għal żviluppi negattivi tas-suq imwettqa f’konformità mal-Artikolu 25b(3);

(iii)

il-ftuħ jew in-notifika ta’ intenzjoni ta’ ftuħ, skont il-kriterji u r-rekwiżiti rilevanti għall-aċċess, kont ta’ depożitu mal-lejl mal-bank ċentrali tal-ħruġ.

(iv)

il-konformità mar-rekwiżiti, applikati f’sitwazzjonijiet eċċezzjonali mill-bank ċentrali tal-ħruġ, fil-limiti tal-kompetenzi tiegħu biex jindirizza riskji tal-likwidità sistemiċi temporanji li jaffettwaw it-trasmissjoni tal-politika monetarja jew l-operat mingħajr xkiel tas-sistemi ta’ pagament, u li jikkonċernaw il-kontroll tar-riskju tal-likwidità, ir-rekwiżiti tal-marġni, il-kollateral, arranġamenti ta’ saldu jew arranġamenti tal-interoperabilità.

Ir-rekwiżiti msemmija fis-subpunt (iv) għandhom jiżguraw l-effiċjenza, is-solidità u r-reżiljenza tas-CCPs u jkunu allinjati ma’ dawk stabbiliti fl-Artikolu 16 u fit-Titoli IV u V ta’ dan ir-Regolament.

L-applikazzjoni tar-rekwiżiti msemmija fis-subpunt (iv) għandha tkun kondizzjoni għar-rikonoxximent għal perijodu limitat ta’ żmien ta’ mhux aktar minn sitt xhur. Meta fi tmiem dak il-perijodu, il-bank ċentrali tal-ħruġ iqis li s-sitwazzjoni eċċezzjonali għadha tippersisti, l-applikazzjoni tar-rekwiżiti għall-finijiet ta’ rikonoxximent tista’ tiġi estiża darba b’perijodu addizzjonali ta’ mhux aktar minn sitt xhur.

Qabel ma jimponi, jew jestendi l-applikazzjoni ta’, ir-rekwiżiti msemmija fis-subpunt (iv), il-bank ċentrali tal-ħruġ għandu jinforma lill-AETS, lill-banek ċentrali tal-ħruġ l-oħrajn imsemmijin fil-punt (f) tal-paragrafu 3 u lill-membri tal-kulleġġ tas-CCPs ta’ pajjiżi terzi tal-AETS u jipprovdilhom spjegazzjoni tal-effetti tar-rekwiżiti li biħsiebu jimponi fuq l-effiċjenza, is-solidità u r-reżiljenza tas-CCPs u b’ġustifikazzjoni dwar għalfejn ir-rekwiżiti huma neċessarji u proporzjonati biex jiżguraw it-trasmissjoni tal-politika monetarja jew l-operat mingħajr xkiel tas-sistemi ta’ pagament fir-rigward tal-valuta li huwa joħroġ. L-AETS għandha tippreżenta lill-bank ċentrali tal-ħruġ opinjoni fi żmien 10 ijiem tax-xogħol mit-trasmissjoni tal-abbozz ta’ rekwiżit jew l-abbozz ta’ estensjoni. F’sitwazzjonijiet ta’ emerġenza, il-perijodu msemmi hawn fuq ma għandux ikun ta’ aktar minn 24 siegħa. Fl-opinjoni tagħha, l-AETS għandha tikkunsidra b’mod partikolari l-effetti tar-rekwiżiti imposti fuq l-effiċjenza, is-solidità u r-reżiljenza tas-CCP. Il-banek ċentrali tal-ħruġ l-oħra msemmijin fil-punt (f) tal-paragrafu 3 jistgħu jippreżentaw opinjoni fl-istess limitu ta’ żmien. Hekk kif jiskadi l-perijodu għall-konsultazzjoni, il-bank ċentrali tal-ħruġ għandu jikkunsidra b’mod debitu l-emendi proposti fl-opinjonijiet tal-AETS jew tal-banek ċentrali tal-ħruġ imsemmijin fil-punt (f) tal-paragrafu 3.

Il-bank ċentrali tal-ħruġ għandu jinforma wkoll lill-Parlament Ewropew u lill-Kunsill qabel jestendi l-applikazzjoni ta’ rekwiżiti msemmija fis-subpunt (iv).

Il-bank ċentrali tal-ħruġ għandu jikkoopera u jikkondividi informazzjoni fuq bażi kontinwa mal-AETS u mal-banek ċentrali tal-ħruġ l-oħrajn imsemmijin fil-punt (f) tal-paragrafu 3 fir-rigward tar-rekwiżiti imsemmijin fis-subpunt (iv), b’mod partikolari fir-rigward tal-valutazzjoni tar-riskji ta’ likwidità sistemika u l-effetti tar-rekwiżiti imposti fuq l-effiċjenza, is-solidità u r-reżiljenza tas-CCPs.

Fejn bank ċentrali tal-ħruġ jimponi kwalunkwe wieħed mir-rekwiżiti msemmija f’dan il-punt wara li tkun ġiet rikonoxxuta CCP tal-Grad 2, il-konformità ma’ kwalunkwe tali rekwiżit għandu jitqies bħala kondizzjoni għar-rikonoxximent u l-banek ċentrali tal-ħruġ għandhom jipprovdu lill-AETS konferma bil-miktub, fi żmien 90 jum tax-xogħol, li s-CCP tikkonforma mar-rekwiżit.

Fejn bank ċentrali tal-ħruġ rilevanti ma jkunx ipprovda tweġiba bil-miktub lill-AETS fil-limitu ta’ żmien, l-AETS tista’ tqis dak ir-rekwiżit bħala sodisfatt;

(c)

is-CCP ipprovdiet lill-AETS:

(i)

b’dikjarazzjoni bil-miktub, iffirmata mir-rappreżentant legali tagħha, li tesprimi l-kunsens bla kondizzjonijiet tas-CCP biex:

—	tipprovdi fi żmien tlett ijiem ta’ xogħol wara trattament ta’ talba mill-AETS kwalunkwe dokument, rekord, informazzjoni u data miżmuma minn dik is-CCP fil-ħin li tkun ġiet notifikata t-talba; u

—	tippermetti lill-AETS li jkollha aċċess għal kwalunkwe wieħed mill-binjiet tan-negozju tas-CCP;

(ii)	b’opinjoni legali motivata minn espert legali indipendenti li tikkonferma li l-kunsens espress huwa validu u eżegwibbli skont il-liġijiet applikabbli rilevanti;

(d)	is-CCP implimentat il-miżuri kollha meħtieġa u stabbilixxiet il-proċeduri kollha meħtieġa biex tiżgura li jkun hemm konformità mar-rekwiżiti stabbiliti fil-punti (a) u (c);

(e)	il-Kummissjoni ma adottatx att ta’ implimentazzjoni skont il-paragrafu 2c.

2c.

L-AETS, wara li tikkonsulta mal-BERS u bi ftehim mal-banek ċentrali tal-ħruġ imsemmijin fil-punt (f) tal-paragrafu 3 f’konformità mal-Artikolu 24b(3) u b’mod proporzjonat mal-grad ta’ importanza sistemika tas-CCP skont il-paragrafu 2a ta’ dan l-Artikolu, tista’, abbażi ta’ valutazzjoni motivata b’mod sħiħ, tikkonkludi li CCP jew xi servizzi ta’ kklerjar tagħha huma ta’ importanza sistemika tant sostanzjali li jeħtieġ li dik is-CCP ma tiġix rikonoxxuta li tipprovdi ċerti servizzi jew attivitajiet ta’ kklerjar. Il-ftehim ta’ bank ċentrali tal-ħruġ għandu jirrelata biss mal-munita li joħroġ u mhux mar-rakkomandazzjoni fl-intier tagħha kif imsemmija fit-tieni subparagrafu ta’ dan il-paragrafu. Fil-valutazzjoni tagħha, l-AETS għandha wkoll:

(a)	tispjega kif il-konformità mal-kondizzjonijiet stabbiliti fil-paragrafu 2b ma tindirizzax b’mod suffiċjenti r-riskju għall-istabbiltà finanzjarja għall-Unjoni jew għal wieħed jew aktar mill-Istati Membri tagħha;

(b)	tiddeskrivi l-karatteristiċi tas-servizzi ta’ kklerjar ipprovduti mis-CCP, inkluż ir-rekwiżiti ta’ likwidità u ta’ saldu fiżiku assoċjati mal-forniment ta’ tali servizzi;

(c)

tipprovdi valutazzjoni teknika kwantitattiva tal-ispejjeż u l-benefiċċji u l-konsegwenzi ta’ deċiżjoni biex is-CCP ma tiġix rikonoxxuta biex tforni ċerti servizzi jew attivitajiet tal-ikklerjar, filwaqt li jittieħed kont:

(i)	tal-eżistenza ta’ sostituti alternattivi potenzjali għall-forniment tas-servizzi ta’ kklerjar kkonċernati fil-muniti kkonċernati lill-membri tal-ikklerjar, u sa fejn tkun disponibbli l-informazzjoni, il-klijenti tagħhom u l-klijenti indiretti stabbiliti fl-Unjoni;

(ii)	il-konsegwenzi potenzjali tal-inklużjoni tal-kuntratti pendenti miżmuma f’CCP fl-ambitu tal-att ta’ implimentazzjoni.

Abbażi tal-valutazzjoni tagħha, l-AETS għandha tirrakkomanda li l-Kummissjoni tadotta att ta’ implimentazzjoni li jikkonferma li dik is-CCP ma għandhiex tiġi rikonoxxuta biex tipprovdi ċerti servizzi jew attivitajiet ta’ kklerjar.

Il-Kummissjoni għandu jkollha minimu ta’ 30 jum ta’ xogħol li fihom tivvaluta r-rakkomandazzjoni tal-AETS.

Wara l-preżentazzjoni tar-rakkomandazzjoni msemmija fit-tieni subparagrafu, il-Kummissjoni tista’ tadotta, bħala miżura tal-aħħar rikors, att ta’ implimentazzjoni li jispeċifika:

(a)

li wara l-perijodu ta’ adattament speċifikat mill-Kummissjoni f’konformità mal-punt (b) ta’ dan is-subparagrafu, uħud mis-servizzi tal-ikklerjar jew kollha kemm huma ta’ dik is-CCP ta’ pajjiż terz ikunu jistgħu jiġu pprovduti biss lil membri tal-ikklerjar u lil ċentri tan-negozjar stabbiliti fl-Unjoni minn dik is-CCP wara li tkun ġiet awtorizzata tagħmel dan f’konformità mal-Artikolu 14;

(b)	perijodu ta’ adattament adegwat għas-CCP, il-membri tal-ikklerjar tagħha u l-klijenti tagħhom. Il-perijodu ta’ adattament ma għandux jaqbeż is-sentejn, u jista’ jiġi estiż darba biss b’perijodu addizzjonali ta’ sitt xhur fejn għadhom jeżistu r-raġunijiet għall-għoti ta’ perijodu ta’ adattament;

(c)	il-kondizzjonijiet li skonthom dik is-CCP tista’ tkompli tforni ċerti servizzi jew attivitajiet ta’ kklerjar matul il-perijodu ta’ adattament imsemmi fil-punt (b);

(d)	kwalunkwe miżura li għandha tittieħed matul il-perijodu ta’ adattament, sabiex jiġu limitati l-ispejjeż potenzjali għall-membri tal-ikklerjar u l-klijenti tagħhom, b’mod partikolari dawk stabbiliti fl-Unjoni.

Meta tispeċifika s-servizzi u perijodu ta’ adattament imsemmijin fil-punti (a) u (b) tar-raba’ subparagrafu, il-Kummissjoni għandha tikkunsidra:

(a)	il-karatteristiċi tas-servizzi offruti mis-CCP u s-sostitwibbiltà tagħhom;

(b)	jekk u sa liema punt it-tranżazzjonijiet ikklerjati pendenti għandhom jiġu inklużi fil-kamp ta’ applikazzjoni tal-att ta’ implimentazzjoni, b’kont meħud tal-konsegwenzi legali u ekonomiċi ta’ dik l-inklużjoni;

(c)	l-implikazzjonijiet ta’ spejjeż potenzjali għal membri tal-ikklerjar u, fejn dik l-informazzjoni tkun disponibbli, il-klijenti tagħhom, b’mod partikolari dawk stabbiliti fl-Unjoni.

Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 86(2).”;

(d)

il-paragrafu 3 huwa emendat kif ġej:

(i)

il-parti introduttorja hija sostitwita b’dan li ġej:

“3.	Meta tkun qed tivvaluta jekk ġewx sodisfatti l-kondizzjonijiet imsemmijin fil-punti (a) sa (d) tal-paragrafu 2, l-AETS għandha tikkonsulta:”;

(ii)

il-punt (f) huwa sostitwit b’dan li ġej:

“(f)	lill-banek ċentrali tal-ħruġ tal-valuti kollha tal-Unjoni tal-istrumenti finanzjarji kklerjati jew li għandhom jiġu kklerjati mis-CCP.”;

(e)

fil-paragrafu 4, it-tieni sal-ħames subparagrafi huma sostitwiti b’dan li ġej:

“Is-CCP applikanti għandha tipprovdi lill-AETS l-informazzjoni kollha neċessarja għar-rikonoxximent tagħha. Fi żmien 30 jum tax-xogħol minn meta tirċeviha, l-AETS għandha tivvaluta jekk l-applikazzjoni hijiex kompleta. Jekk l-applikazzjoni ma tkunx kompleta, l-AETS għandha tistabbilixxi limitu ta’ żmien sa meta s-CCP applikanti għandha tipprovdi informazzjoni addizzjonali. L-AETS għandha tibgħat minnufih l-informazzjoni kollha li tkun irċeviet mingħand is-CCP applikanti lill-kulleġġ tas-CCPs ta’ pajjiżi terzi.

Id-deċiżjoni dwar ir-rikonoxximent għandha tkun ibbażata fuq il-kondizzjonijiet stabbiliti fil-paragrafu 2 għal CCPs tal-Grad 1 u fil-punti (a) sa (d) tal-paragrafu 2 u l-paragrafu 2b għal CCPs tal-Grad 2. Għandha tkun indipendenti minn kwalunkwe valutazzjoni bħala l-bażi għad-deċiżjoni dwar l-ekwivalenza kif imsemmi fl-Artikolu 13(3). Fi żmien 180 jum ta’ xogħol mid-determinazzjoni li applikazzjoni tkun kompluta f’konformità mat-tieni subparagrafu, l-AETS għandha tinforma lis-CCP applikanti bil-miktub, bi spjegazzjoni motivata b’mod sħiħ, dwar jekk ikunx ingħata jew ikunx ġie rifjutat ir-rikonoxximent.”;

(f)	fil-paragrafu 4, is-sitt subparagrafu huwa sostitwit b’dan li ġej: “L-AETS għandha tippubblika fuq is-sit web tagħha lista tas-CCPs rikonoxxuti f’konformità ma’ dan ir-Regolament, filwaqt li tindika l-klassifikazzjoni tagħhom bħala CCPs tal-Grad 1 jew tal-Grad 2.”;

(g)

il-paragrafu 5 huwa sostitwit b’dan li ġej:

“5.

L-AETS għandha, wara li tikkonsulta mal-awtoritajiet u l-entitajiet imsemmija fil-paragrafu 3, tirrieżamina r-rikonoxximent ta’ CCP stabbilita f’pajjiż terz:

(a)	jekk dik is-CCP beħsiebha testendi jew tnaqqas il-firxa tal-attivitajiet u s-servizzi tagħha fl-Unjoni, f’liema każ is-CCP għandha tinforma lill-AETS b’dan billi tippreżenta l-informazzjoni kollha meħtieġa; u

(b)	fi kwalunkwe każ mill-inqas kull ħames snin.

Dak ir-rieżami għandu jitwettaq skont il-paragrafi 2 sa 4.

Fejn, wara r-rieżami msemmi fl-ewwel subparagrafu, l-AETS tiddetermina li CCP ta’ pajjiż terz li tkun ġiet ikklassifikata bħala CCP tal-Grad 1 għandha tiġi kklassifikata bħala CCP tal-Grad 2, l-AETS għandha tistabbilixxi perijodu ta’ adattament adegwat li ma għandux jeċċedi 18-il xahar li fihom is-CCP trid tikkonforma mar-rekwiżiti msemmijin fil-paragrafu 2b. L-AETS tista’ testendi dak il-perijodu ta’ żmien ta’ adattament b’mhux aktar minn sitt xhur addizzjonali fuq it-talba motivata tas-CCP jew tal-awtorità kompetenti responsabbli għas-superviżjoni tal-membri tal-ikklerjar, meta tali estensjoni tkun iġġustifikata minn ċirkostanzi eċċezzjonali u implikazzjonijiet għall-membri tal-ikklerjar stabbiliti fl-Unjoni.”;

(h)

il-paragrafu 6 huwa sostitwit b’dan li ġej:

“6.

Il-Kummissjoni tista’ tadotta att ta’ implimentazzjoni skont l-Artikolu 5 tar-Regolament (UE) Nru 182/2011, li jiddetermina li:

(a)	l-arranġamenti ġuridiċi u superviżorji ta’ pajjiż terz jiżguraw li s-CCPs awtorizzati f’dak il-pajjiż terz jikkonformaw fuq bażi kontinwa ma’ rekwiżiti ġuridikament vinkolanti li huma ekwivalenti għar-rekwiżiti stipulati fit-Titolu IV ta’ dan ir-Regolament;

(b)	dawk is-CCPs ikunu soġġetti għal superviżjoni u infurzar effettivi f’dak il-pajjiż terz fuq bażi kontinwa;

(c)	il-qafas legali ta’ dak il-pajjiż terz jipprevedi sistema ekwivalenti effettiva għar-rikonoxximent ta’ CCPs awtorizzati taħt reġimi legali ta’ pajjiżi terzi.

Il-Kummissjoni tista’ tippreżenta l-applikazzjoni tal-att ta’ implimentazzjoni msemmi fl-ewwel subparagrafu għat-twettiq effettiv ta’ kwalunkwe rekwiżit stabbilit fih minn pajjiż terz fuq bażi kontinwa u għall-kapaċità li l-AETS effettivament twettaq ir-responsabbiltajiet tagħha fir-rigward ta’ CCPs ta’ pajjiżi terzi rikonoxxuti skont il-paragrafi 2 u 2b jew b’rabta mal-monitoraġġ imsemmi fil-paragrafu 6b, inkluż permezz tal-approvazzjoni u l-applikazzjoni tal-arranġamenti dwar il-kooperazzjoni msemmijin fil-paragrafu 7.”;

(i)

jiddaħħlu l-paragrafi li ġejjin:

“6a.	Il-Kummissjoni tista’ tadotta att delegat skont l-Artikolu 82 biex tispeċifika aktar il-kriterji msemmijin fil-punti (a), (b) u (c) tal-paragrafu 6.

6b.

L-AETS għandha tissorvelja l-iżviluppi regolatorji u superviżorji f’pajjiżi terzi li għalihom ikunu ġew adottati l-atti ta’ implimentazzjoni skont il-paragrafu 6.

Fejn l-AETS tidentifika kwalunkwe żvilupp regolatorju jew superviżorju f’dawk il-pajjiżi terzi, li jista’ jkollu impatt fuq l-istabbiltà finanzjarja tal-Unjoni jew ta’ xi wieħed jew aktar mill-Istat Membru tagħha, għandha tgħarraf lill-Parlament Ewropew, lill-Kunsill, lill-Kummissjoni u lill-membri tal-kulleġġ tas-CCPs ta’ pajjiżi terzi msemmi fl-Artikolu 25c mingħajr dewmien. Kull informazzjoni bħal din għandha tiġi ttrattata b’mod kunfidenzjali.

L-AETS għandha tippreżenta rapport kunfidenzjali lill-Kummissjoni u lill-membri tal-kulleġġ tas-CCPs ta’ pajjiżi terzi msemmi fl-Artikolu 25c dwar l-iżviluppi regolatorji u superviżorji tal-pajjiżi terzi msemmijin fl-ewwel subparagrafu fuq bażi annwali.”;

(j)

il-paragrafu 7 huwa emendat kif ġej:

(i)

il-parti introduttorja hija sostitwita b’dan li ġej:

“7.

L-AETS għandha tistabbilixxi arranġamenti ta’ kooperazzjoni effettivi mal-awtoritajiet kompetenti rilevanti ta’ pajjiżi terzi li l-oqfsa legali u superviżorji tagħhom ġew rikonoxxuti bħala ekwivalenti għal dan ir-Regolament skont il-paragrafu 6. Dawn l-arranġamenti għandhom jispeċifikaw mill-inqas:”;

(ii)

il-punt (a) huwa sostitwit b’dan li ġej:

“(a)

il-mekkaniżmu għall-iskambju ta’ informazzjoni bejn l-AETS, il-banek ċentrali tal-ħruġ msemmija fil-punt (f) tal-paragrafu 3 u l-awtoritajiet kompetenti tal-pajjiżi terzi kkonċernati, inkluż l-aċċess għall-informazzjoni kollha mitluba mill-AETS rigward CCPs awtorizzati f’pajjiżi terzi, bħal tibdil sinifikanti għall-mudelli u l-parametri tar-riskju, l-estensjoni ta’ attivitajiet u servizzi tas-CCPs, tibdil fl-istruttura tal-kont tal-klijent u fl-użu ta’ sistemi ta’ pagamenti li jaffettwaw b’mod sostanzjali lill-Unjoni;”;

(iii)

il-punt (d) huwa sostitwit b’dan li ġej:

“(d)	il-proċeduri li jikkonċernaw il-koordinazzjoni ta’ attivitajiet superviżorji, inkluż il-ftehim ta’ awtoritajiet ta’ pajjiżi terzi biex jippermettu investigazzjonijiet u spezzjonijiet fil-post f’konformità mal-Artikoli 25 g u 25h rispettivament;”;

(iv)

jiżdiedu l-punti li ġejjin:

“(e)	il-proċeduri neċessarji għall-monitoraġġ effettiv tal-iżviluppi regolatorji u superviżorji f’pajjiż terz;

(f)	il-proċeduri għal awtoritajiet ta’ pajjiżi terzi biex jiżguraw l-infurzar effettiv ta’ deċiżjonijiet adottati mill-AETS skont l-Artikoli 25b, 25f sa 25 m, 25p u 25q.

(g)

il-proċeduri għal awtoritajiet ta’ pajjiżi terzi biex jinformaw lill-AETS, lill-kulleġġ tas-CCPs ta’ pajjiżi terzi msemmi fl-Artikolu 25c u lill-banek ċentrali tal-ħruġ imsemmijin fil-punt (f) tal-paragrafu 3 mingħajr dewmien mhux ġustifikat bi kwalunkwe sitwazzjoni ta’ emerġenza relatata mas-CCP rikonoxxuta, inkluż żviluppi fis-swieq finanzjarji, li jista’ jkollhom effett negattiv fuq il-likwidità tas-suq u l-istabbiltà tas-sistema finanzjarja tal-Unjoni jew ta’ wieħed mill-Istati Membri tagħha u l-proċeduri u l-pjanijiet ta’ kontinġenza għall-indirizzar ta’ dawn is-sitwazzjonijiet.

(h)

il-kunsens ta’ awtoritajiet ta’ pajjiż terz għall-kondiviżjoni ulterjuri ta’ kwalunkwe informazzjoni li jkunu pprovdew lill-AETS skont l-arranġamenti ta’ kooperazzjoni mal-awtoritajiet imsemmija fil-paragrafu 3 u l-membri tal-kulleġġ tas-CCPs ta’ pajjiżi terzi, soġġett għar-rekwiżiti ta’ segretezza professjonali stabbiliti fl-Artikolu 83;”;

(v)

jiżdied is-subparagrafu finali li ġej:

“Fejn l-AETS tikkunsidra li awtorità kompetenti ta’ pajjiż terz tonqos milli tapplika kwalunkwe waħda mid-dispożizzjonijiet stipulati f’arranġamenti ta’ kooperazzjoni stabbiliti f’konformità ma’ dan il-paragrafu, hija għandha tinforma lill-Kummissjoni b’mod kunfidenzjali u mingħajr dewmien b’dan. F’dan il-każ, il-Kummissjoni tista’ tiddeċiedi li tirrevedi l-att ta’ implimentazzjoni adottat f’konformità mal-paragrafu 6.”;

(11)

jiddaħħlu l-Artikoli li ġejjin:

“Artikolu 25a

Konformità komparabbli

1. CCP imsemmija fl-Artikolu 25(2b) tista’ tippreżenta talba motivata li l-AETS tivvaluta jekk fil-konformità tagħha mal-qafas applikabbli ta’ pajjiż terz, b’kont meħud tad-dispożizzjonijiet tal-att ta’ implimentazzjoni adottati f’konformità mal-Artikolu 25(6), dik is-CCP tistax titqies bħala konformi mar-rekwiżiti stabbiliti fl-Artikolu 16 t-Titoli IV u V. L-AETS għandha minnufih tibgħat it-talba lill-kulleġġ tas-CCPs ta’ pajjiżi terzi.

2. It-talba msemmija fil-paragrafu 1 għandha tipprovdi bażi fattwali għall-konstatazzjoni ta’ komparabbiltà u r-raġunijiet għalfejn il-konformità mar-rekwiżiti applikabbli fil-pajjiż terz tissodisfa r-rekwiżiti stabbiliti fl-Artikolu 16 u t-Titoli IV u V.

3. Il-Kummissjoni, sabiex jiġi żgurat li l-valutazzjoni msemmija fil-paragrafu 1 tirrifletti b’mod effettiv l-objettivi regolatorji tar-rekwiżiti stabbiliti fl-Artikolu 16 u t-Titoli IV u V u l-interessi tal-Unjoni kollha kemm huma, għandha tadotta att delegat biex tispeċifika dan li ġej:

(a)	l-elementi minimi li għandhom jiġu evalwati għall-finijiet tal-paragrafu 1 ta’ dan l-Artikolu;

(b)	il-modalitajiet u l-kondizzjonijiet biex titwettaq il-valutazzjoni.

Il-Kummissjoni għandha tadotta l-att delegat imsemmi fl-ewwel subparagrafu skont l-Artikolu 82 sat-2 ta’ Jannar 2021.

Artikolu 25b

Il-konformità kontinwa mal-kondizzjonijiet għar-rikonoxximent

1. L-AETS ser tkun responsabbli għat-twettiq tad-dmirijiet li jirriżultaw minn dan ir-Regolament għas-superviżjoni fuq bażi kontinwa tal-konformità ta’ CCPs tal-Grad 2 rikonoxxuti mar-rekwiżiti msemmijin fil-punt (a) tal-Artikolu 25(2b). Fir-rigward tad-deċiżjonijiet skont l-Artikoli 41, 44, 46, 50 u 54, l-AETS għandha tikkonsulta lill-banek ċentrali tal-ħruġ imsemmijin fil-punt (f) tal-Artikolu 25(3) f’konformità mal-Artikolu 24b(1).

L-AETS għandha tesiġi konferma minn kull CCP tal-Grad 2 mill-inqas fuq bażi annwali li r-rekwiżiti msemmijin fil-punti (a), (c) u (d) tal-Artikolu 25(2b) jibqgħu jiġu sodisfatti.

Fejn bank ċentrali tal-ħruġ imsemmi fil-punt (f) tal-Artikolu 25(3) jikkunsidra li CCP tal-Grad 2 ma tibqax tissodisfa l-kondizzjoni msemmija fil-punt (b) tal-Artikolu 25(2b), huwa għandu jinnotifika minnufih lill-AETS.

2. Fejn CCP tal-Grad 2 tonqos milli tagħti lill-AETS il-konferma msemmija fit-tieni subparagrafu tal-paragrafu 1 jew fejn l-AETS tirċievi notifika skont it-tielet subparagrafu tal-paragrafu 1, is-CCP għandha titqies bħala li ma għadhiex tissodisfa l-kondizzjonijiet għal rikonoxximent skont l-Artikolu 25(2b) u għandha tapplika l-proċedura stabbilita fl-Artikolu 25p(2), (3) u (4).

3. L-AETS għandha, f’kooperazzjoni mal-BERS, twettaq valutazzjonijiet, tar-reżiljenza ta’ CCPs tal-Grad 2 rikonoxxuti għal żviluppi negattivi fis-suq f’konformità mal-Artikolu 32(2) tar-Regolament (UE) Nru 1095/2010, f’koordinazzjoni mal-valutazzjonijiet imsemmija fil-punt (b) tal-Artikolu 24a(7). Il-banek ċentrali tal-ħruġ imsemmija fil-punt (f) tal-Artikolu 25(3) jistgħu jikkontribwixxu għal tali valutazzjoni fit-twettiq tal-kompiti tal-politika monetarja tagħhom. Fit-twettiq ta’ dawk il-valutazzjonijiet, l-AETS għandha tinkludi mill-inqas ir-riskji finanzjarji u operazzjonali, u tiżgura l-konsistenza mal-valutazzjonijiet tar-reżiljenza tas-CCPs tal-Unjoni mwettqa skont il-punt (b) tal-Artikolu 24a(7) ta’ dan ir-Regolament.

Artikolu 25c

Kulleġġ tas-CCPs ta’ pajjiżi terzi

1. L-AETS għandha tistabbilixxi kulleġġ tas-CCPs ta’ pajjiżi terzi biex tiġi ffaċilitata l-kondiviżjoni ta’ informazzjoni.

2. Il-kulleġġ għandu jkun magħmul minn:

(a)	il-President tal-Kumitat Superviżorju tas-CCPs, li għandu jippresiedi l-kulleġġ;

(b)	iż-żewġ membri indipendenti tal-Kumitat Superviżorju tas-CCPs;

(c)	l-awtoritajiet kompetenti msemmija fl-Artikolu 22; fi Stati Membri fejn inħatru aktar minn awtorità waħda bħala kompetenti f’konformità mal-Artikolu 22, dawk l-awtoritajiet għandhom jaqblu dwar rappreżentant komuni;

(d)	l-awtoritajiet kompetenti responsabbli għas-superviżjoni tal-membri tal-ikklerjar stabbiliti fl-Unjoni;

(e)	l-awtoritajiet kompetenti responsabbli għas-superviżjoni ta’ ċentri tan-negozjar stabbiliti fl-Unjoni, li qed jingħataw servizz jew li ser jingħataw servizz mis-CCPs;

(f)	l-awtoritajiet kompetenti li jissorveljaw lid-depożitarji ċentrali tat-titoli stabbiliti fl-Unjoni li s-CCPs huma konnessi jew beħsiebhom ikunu konnessi magħhom;

(g)	il-membri tas-SEBĊ.

3. Il-membri tal-kulleġġ jistgħu jitolbu li l-Kumitat Superviżorju tas-CCPs jiddiskuti kwistjonijiet speċifiċi fir-rigward ta’ CCP stabbilita f’pajjiż terz. It-tali talba għandha ssir bil-miktub u għandha tinkludi motivazzjoni dettaljata għat-talba. Il-Kumitat Superviżorju tas-CCPs għandu jikkunsidra kif xieraq tali talbiet u jipprovdi tweġiba xierqa.

4. L-istabbiliment u l-funzjonament tal-kulleġġ għandu jkun ibbażat fuq ftehim bil-miktub bejn il-membri kollha tiegħu. L-obbligu tas-segretezza professjonali skont l-Artikolu 83 għandu japplika għall-membri kollha tal-kulleġġ.

Artikolu 25d

Tariffi

1. L-AETS għandha titlob it-tariffi li ġejjin lil CCPs stabbiliti f’pajjiż terz f’konformità ma’ dan ir-Regolament u f’konformità mal-att delegat adottat skont il-paragrafu 3:

(a)	tariffi assoċjati mal-applikazzjonijiet għar-rikonoxximent skont l-Artikolu 25;

(b)	tariffi annwali assoċjati mal-kompiti tal-AETS f’konformità ma’ dan ir-Regolament fir-rigward tas-CCPs rikonoxxuti f’konformità mal-Artikolu 25.

2. It-tariffi msemmija fil-paragrafu 1 għandhom ikunu proporzjonati mal-fatturat tas-CCP ikkonċernata u għandhom ikopru l-ispejjeż kollha mġarrba mill-AETS għar-rikonoxximent u għat-twettiq tal-kompiti tagħha f’konformità ma’ dan ir-Regolament.

3. Il-Kummissjoni għandha tadotta att delegat f’konformità mal-Artikolu 82 sabiex tispeċifika aktar dan li ġej:

(a)	it-tipi ta’ tariffi;

(b)	il-kwistjonijiet li għalihom huma dovuti t-tariffi;

(c)	l-ammont tat-tariffi;

(d)

il-mod kif għandhom jitħallsu t-tariffi minn dawn li ġejjin:

(i)	CCP li tapplika għal rikonoxximent;

(ii)	CCP rikonoxxuta kklassifikata bħala CCP tal-Grad 1 f’konformità mal-Artikolu 25(2);

(iii)

CCP rikonoxxuta kklassifikata bħala CCP tal-Grad 2 f’konformità mal-Artikolu 25(2b).

Artikolu 25e

Eżerċizzju tas-setgħat imsemmija fl-Artikoli 25f sa 25h

Is-setgħat mogħtija lill-AETS jew kwalunkwe uffiċjal tal-AETS jew persuna oħra awtorizzata minnha mill-Artikoli 25f sa 25h ma għandhomx jintużaw biex jesiġu l-iżvelar ta’ informazzjoni jew dokumenti li huma soġġetti għall-privileġġ legali.

Artikolu 25f

Talba għal informazzjoni

1. L-AETS tista’ b’talba sempliċi jew b’deċiżjoni, titlob li s-CCPs rikonoxxuti u l-partijiet terzi relatati li lilhom dawk is-CCPs ikunu esternalizzaw funzjonijiet jew attivitajiet operazzjonali biex jipprovdu l-informazzjoni kollha neċessarja biex l-AETS tkun tista’ twettaq dmirijietha skont dan ir-Regolament.

2. Meta tibgħat talba sempliċi għal informazzjoni skont il-paragrafu 1, l-AETS għandha tindika dan kollu li ġej:

(a)	ir-referenza għal dan l-Artikolu bħala l-bażi legali tat-talba;

(b)	il-fini tat-talba;

(c)	l-informazzjoni meħtieġa;

(d)	il-limitu ta’ żmien biex tingħata l-informazzjoni;

(e)	tinforma lill-persuna li tkun intalbet l-informazzjoni li mhijiex obbligata tipprovdi l-informazzjoni, iżda f’każ ta’ tweġiba volontarja għat-talba, l-informazzjoni pprovduta ma għandhiex tkun skorretta jew qarrieqa;

(f)	il-multa prevista fl-Artikolu 25j flimkien mal-punt (a) tat-Taqsima V tal-Anness III, meta t-tweġibiet għall-mistoqsijiet li jsiru jkunu skorretti jew qarrieqa.

3. Meta titlob li tingħata informazzjoni skont il-paragrafu 1 b’deċiżjoni, l-AETS għandha tindika dan kollu li ġej:

(a)	ir-referenza għal dan l-Artikolu bħala l-bażi legali tat-talba;

(b)	il-fini tat-talba;

(c)	l-informazzjoni meħtieġa;

(d)	il-limitu ta’ żmien biex tingħata l-informazzjoni;

(e)	il-pagamenti perjodiċi ta’ penali previsti fl-Artikolu 25k meta l-produzzjoni tal-informazzjoni mitluba ma tkunx kompluta;

(f)	il-multa prevista fl-Artikolu 25j flimkien mal-punt (a) tat-Taqsima V tal-Anness III, imposta fejn ma tingħatax l-informazzjoni meħtieġa jew fejn it-tweġibiet għall-mistoqsijiet li jsiru jkunu skorretti jew qarrieqa; u

(g)	id-dritt għal appell tad-deċiżjoni quddiem il-Bord tal-Appell tal-AETS u għal rieżami tad-deċiżjoni mill-Qorti tal-Ġustizzja tal-Unjoni Ewropea (‘il-Qorti tal-Ġustizzja’) f’konformità mal-Artikoli 60 u 61 tar-Regolament (UE) Nru 1095/2010.

4. Il-persuni msemmijin fil-paragrafu 1 jew ir-rappreżentanti tagħhom u, fil-każ ta’ persuni ġuridiċi jew assoċjazzjonijiet mingħajr personalità ġuridika, il-persuni awtorizzati biex jirrappreżentawhom bil-liġi jew mill-kostituzzjoni tagħhom għandhom jipprovdu l-informazzjoni mitluba. Avukati debitament awtorizzati li jaġixxu jistgħu jipprovdu l-informazzjoni f’isem il-klijenti tagħhom. Dawn tal-aħħar għandhom jibqgħu responsabbli b’mod sħiħ jekk l-informazzjoni mogħtija tkun mhux kompluta, skorretta jew qarrieqa.

5. L-AETS għandha tibgħat, mingħajr dewmien, kopja tat-talba sempliċi jew tad-deċiżjoni tagħha lill-awtorità kompetenti rilevanti tal-pajjiż terz fejn huma domiċiljati jew stabbiliti l-persuni msemmijin fil-paragrafu 1 ikkonċernati mit-talba għall-informazzjoni.

Artikolu 25g

Investigazzjonijiet ġenerali

1. Sabiex twettaq dmirijietha skont dan ir-Regolament, l-AETS tista’ twettaq l-investigazzjonijiet neċessarji fir-rigward tas-CCPs tal-Grad 2 u l-partijiet terzi relatati li lilhom dawk is-CCPs jkunu esternalizzaw funzjonijiet operattivi, servizzi jew attivitajiet. Għal dak il-għan, l-uffiċjali u persuni oħrajn awtorizzati mill-AETS għandu jkollhom is-setgħa li:

(a)	jeżaminaw kwalunkwe rekord, data, proċedura u kwalunkwe materjal ieħor rilevanti għat-twettiq tal-kompiti tagħha irrispettivament mill-mezz li jkunu miżmumin fih;

(b)	jieħdu jew jakkwistaw kopji ċċertifikati ta’ tali rekords, data, proċeduri u materjal ieħor jew siltiet minnhom;

(c)	isejħu u jsaqsu lil CCPs tal-Grad 2 jew ir-rappreżentanti jew il-persunal tagħhom għal spjegazzjonijiet bil-fomm jew bil-miktub dwar fatti jew dokumenti relatati mas-suġġett u l-fini tal-ispezzjoni u li jirreġistraw it-tweġibiet;

(d)	jintervistaw kwalunkwe persuna fiżika jew ġuridika oħra li tagħti l-kunsens li tiġi intervistata bil-fini li tinġabar informazzjoni relatata mas-suġġett tal-investigazzjoni;

(e)	jitolbu rekords tat-telefon u tat-traffiku tad-data.

Il-banek ċentrali tal-ħruġ imsemmija fil-punt (f) tal-Artikolu 25(3) jistgħu, fuq talba motivata lill-AETS, jipparteċipaw f’tali investigazzjonijiet fejn dawk l-investigazzjonijiet ikunu rilevanti għat-twettiq tal-kompiti tal-politika monetarja tagħhom.

Il-kulleġġ tas-CCPs ta’ pajjiżi terzi msemmi fl-Artikolu 25c għandu jiġi infurmat mingħajr dewmien mhux ġustifikat dwar kwalunkwe sejba li tista’ tkun rilevanti għat-twettiq tal-kompiti tiegħu.

2. L-uffiċjali u persuni oħra awtorizzati mill-AETS għall-finijiet tal-investigazzjonijiet imsemmijin fil-paragrafu 1 għandhom jeżerċitaw is-setgħat tagħhom meta jipproduċu awtorizzazzjoni bil-miktub li tispeċifika s-suġġett u l-fini tal-investigazzjoni. Dik l-awtorizzazzjoni għandha tindika wkoll il-pagamenti perjodiċi ta’ penali previsti fl-Artikolu 25k meta l-produzzjoni tar-rekords, data, proċeduri jew kwalunkwe materjal ieħor meħtieġ, jew it-tweġibiet għall-mistoqsijiet li jsiru lil CCPs tal-Grad 2 ma jingħatawx jew ma jkunux kompleti, u l-multi previsti fl-Artikolu 25j flimkien mal-punt (b) tat-Taqsima V tal-Anness III, meta t-tweġibiet għall-mistoqsijiet li jsiru lil CCPs tal-Grad 2 jkunu skorretti jew qarrieqa.

3. Is-CCPs tal-Grad 2 huma meħtieġa jippreżentaw ruħhom għall-investigazzjonijiet imnedija abbażi ta’ deċiżjoni tal-AETS. Id-deċiżjoni għandha tispeċifika s-suġġett u l-fini tal-investigazzjoni, il-pagamenti perjodiċi ta’ penali previsti fl-Artikolu 25k ta’ dan ir-Regolament, ir-rimedji legali disponibbli skont ir-Regolament (UE) Nru 1095/2010 kif ukoll id-dritt għal rieżami tad-deċiżjoni mill-Qorti tal-Ġustizzja.

4. Qabel ma tinnotifika lil CCP tal-Grad 2 dwar investigazzjoni, l-AETS għandha tinforma lill-awtorità kompetenti rilevanti tal-pajjiż terz fejn ser titwettaq l-investigazzjoni dwar l-investigazzjoni u l-identità tal-persuni awtorizzati. L-uffiċjali tal-awtorità kompetenti tal-pajjiż terz konċernat, fuq talba tal-AETS, jistgħu jassistu lil dawk il-persuni awtorizzati fit-twettiq ta’ dmirijiethom. L-uffiċjali tal-awtorità kompetenti tal-pajjiż terz konċernat jistgħu wkoll jattendu għall-investigazzjonijiet. L-investigazzjonijiet imwettqa f’pajjiż terz f’konformità ma’ dan l-Artikolu għandhom jitwettqu skont l-arranġamenti ta’ kooperazzjoni stabbiliti mill-awtorità kompetenti rilevanti tal-pajjiż terz.

Artikolu 25h

Spezzjonijiet fil-post

1. Sabiex twettaq dmirijietha skont dan ir-Regolament, l-AETS tista’ twettaq l-ispezzjonijiet fil-post kollha meħtieġa fi kwalunkwe bini, art jew proprjetà ta’ negozju ta’ CCPs tal-Grad 2 u l-partijiet terzi relatati li lilhom dawk is-CCPs ikunu esternalizzaw funzjonijiet operattivi, servizzi jew attivitajiet.

Il-banek ċentrali tal-ħruġ imsemmijin fil-punt (f) tal-Artikolu 25(3) jistgħu jressqu talba motivata lill-AETS biex jipparteċipaw f’tali spezzjonijiet fil-post fejn dan ikun rilevanti għat-twettiq tal-kompiti tal-politika monetarja tagħhom.

2. L-uffiċjali u persuni oħrajn awtorizzati mill-AETS biex iwettqu spezzjonijiet fil-post jistgħu jidħlu fi kwalunkwe bini tan-negozju, art jew proprjetà tal-persuni ġuridiċi soġġetti għal deċiżjoni ta’ spezzjoni adottata mill-AETS u għandu jkollhom is-setgħat kollha stipulati fl-Artikolu 25 g(1). Għandu jkollhom ukoll is-setgħa li jissiġillaw kwalunkwe bini tan-negozju u kotba jew reġistri għall-perijodu ta’ spezzjoni u sal-punt neċessarju għaliha.

3. F’biżżejjed żmien qabel l-ispezzjoni, l-AETS għandha tinnotifika l-ispezzjoni lill-awtorità kompetenti rilevanti tal-pajjiż terz fejn tkun ser ssir l-ispezzjoni. Fejn it-twettiq xieraq u l-effiċjenza tal-ispezzjoni hekk jeħtieġu, l-AETS, wara li tinforma l-awtorità kompetenti rilevanti tal-pajjiż terz, tista’ twettaq l-ispezzjoni fil-post mingħajr notifika minn qabel lis-CCP. L-ispezzjonijiet imwettqa f’pajjiż terz f’konformità ma’ dan l-Artikolu għandhom jitwettqu f’konformità mal-arranġamenti ta’ kooperazzjoni stabbiliti mal-awtorità kompetenti rilevanti tal-pajjiż terz.

L-uffiċjali u persuni oħrajn awtorizzati mill-AETS biex iwettqu spezzjoni fil-post għandhom jeżerċitaw is-setgħat tagħhom meta jipproduċu awtorizzazzjoni bil-miktub li tispeċifika s-suġġett u l-fini tal-investigazzjoni u l-pagamenti perjodiċi ta’ penali previsti fl-Artikolu 25k meta l-persuni kkonċernati ma jissottomettux ruħhom għall-ispezzjoni.

4. CCPs tal-Grad 2 għandhom jissottomettu ruħhom għal spezzjonijiet fil-post ordnati b’deċiżjoni tal-AETS. Id-deċiżjoni għandha tispeċifika s-suġġett u l-fini tal-ispezzjoni, tiffissa d-data meta din għandha tibda u tindika l-pagamenti perjodiċi ta’ penali previsti fl-Artikolu 25k, ir-rimedji legali disponibbli skont ir-Regolament (UE) Nru 1095/2010 kif ukoll id-dritt għal rieżami tad-deċiżjoni mill-Qorti tal-Ġustizzja.

5. L-uffiċjali tal-awtorità kompetenti tal-pajjiż terz fejn għandha titwettaq l-ispezzjoni, kif ukoll dawk awtorizzati jew maħtura minnha, jistgħu, fuq it-talba tal-AETS, jassistu attivament lill-uffiċjali u l-persuni l-oħra awtorizzati mill-AETS. L-uffiċjali tal-awtorità kompetenti rilevanti tal-pajjiż terz jistgħu jattendu wkoll l-ispezzjonijiet fil-post.

6. L-AETS tista’ titlob ukoll li l-awtoritajiet kompetenti tal-pajjiż terz iwettqu kompiti investigattivi speċifiċi u spezzjonijiet fil-post kif previst f’dan l-Artikolu u fl-Artikolu 25 g(1) f’isimha.

7. Fejn l-uffiċjali u persuni oħrajn li jakkumpanjawhom awtorizzati mill-AETS jsibu li persuna topponi spezzjoni ordnata skont dan l-Artikolu, l-AETS tista’ titlob lill-awtorità kompetenti kkonċernata tal-pajjiż terz tagħtihom l-għajnuna neċessarja, inkluża, fejn xieraq, l-għajnuna tal-pulizija jew ta’ awtorità ta’ infurzar oħra ekwivalenti, sabiex ikunu jistgħu jwettqu l-ispezzjoni tagħhom fil-post.

Artikolu 25i

Regoli proċedurali biex jittieħdu miżuri superviżorji u jiġu imposti multi

1. Fejn, fit-twettiq ta’ dmirijietha skont dan ir-Regolament, l-AETS ssib li hemm indikazzjonijiet serji tal-eżistenza possibbli ta’ fatti li jistgħu jikkostitwixxu wieħed jew aktar mit-tipi ta’ ksur elenkati fl-Anness III, l-AETS għandha taħtar uffiċjal indipendenti tal-investigazzjoni fi ħdan l-AETS biex jinvestiga l-kwistjoni. L-uffiċjal maħtur m għandux jiġi involut jew ikun ġie involut direttament jew indirettament fil-proċess tar-rikonoxximent jew superviżjoni tas-CCP ikkonċernata u għandu jwettaq il-funzjonijiet tiegħu indipendentement mill-AETS.

2. L-uffiċjal tal-investigazzjoni għandu jinvestiga l-ksur allegat, filwaqt li jieħu kont ta’ kwalunkwe kumment ippreżentat mill-persuni li jkunu soġġetti għall-investigazzjonijiet, u għandu jippreżenta fajl komplet bis-sejbiet tiegħu lill-AETS.

Sabiex iwettaq il-kompiti tiegħu, l-uffiċjal tal-investigazzjoni jista’ jeżerċita s-setgħa li jirrikjedi informazzjoni skont l-Artikolu 25f u jwettaq investigazzjonijiet u spezzjonijiet fil-post skont l-Artikoli 25 g u 25 h. Meta juża dawk is-setgħat, l-uffiċjal tal-investigazzjoni għandu jikkonforma mal-Artikolu 25e.

Meta jwettaq il-kompiti tiegħu, l-uffiċjal tal-investigazzjoni għandu jkollu aċċess għad-dokumenti u l-informazzjoni kollha miġbura mill-AETS fl-attivitajiet tagħha.

3. Meta jlesti l-investigazzjoni tiegħu u qabel ma jippreżenta l-fajl bis-sejbiet tiegħu lill-AETS, l-uffiċjal tal-investigazzjoni għandu jagħti lill-persuni soġġetti għall-investigazzjonijiet l-opportunità li jinstemgħu fir-rigward tal-kwistjonijiet li jkunu qed jiġu investigati. L-uffiċjal tal-investigazzjoni għandu jibbaża s-sejbiet tiegħu biss fuq fatti li l-persuni kkonċernati kellhom l-opportunità jikkummentaw dwarhom.

Matul l-investigazzjonijiet taħt dan l-Artikolu, id-drittijiet tad-difiża tal-persuni kkonċernati għandhom jiġu rrispettati b’mod sħiħ.

4. Meta jippreżenta l-fajl bis-sejbiet tiegħu lill-AETS, l-uffiċjal tal-investigazzjoni għandu jinnotifika dak il-fatt lill-persuni li jkunu soġġetti għall-investigazzjonijiet. Il-persuni soġġetti għall-investigazzjonijiet għandhom ikunu intitolati li jkollhom aċċess għall-fajl, soġġett għall-interess leġittimu ta’ persuni oħrajn fil-protezzjoni tas-sigrieti kummerċjali tagħhom. Id-dritt ta’ aċċess għall-fajl ma għandux jestendi għal informazzjoni kunfidenzjali jew id-dokumenti preparatorji interni tal-AETS.

5. Abbażi tal-fajl li jkun fih is-sejbiet tal-uffiċjal tal-investigazzjoni u, meta jintalab mill-persuni kkonċernati, wara li tkun semgħet lill-persuni soġġetti għall-investigazzjonijiet f’konformità mal-Artikolu 25 l, l-AETS għandha tiddeċiedi jekk wieħed jew aktar mit-tipi ta’ ksur elenkati fl-Anness III jkunx twettaq mill-persuni li kienu soġġetti għall-investigazzjonijiet, u, f’tali każ, għandha tieħu miżura superviżorja skont l-Artikolu 25q u timponi multa skont l-Artikolu 25j.

6. L-uffiċjal tal-investigazzjoni ma għandux jipparteċipa f’deliberazzjonijiet tal-AETS jew b’xi mod ieħor jintervjeni fil-proċess ta’ teħid ta’ deċiżjoni tal-AETS.

7. Il-Kummissjoni għandha tadotta atti delegati f’konformità mal-Artikolu 82 biex tispeċifika aktar ir-regoli ta’ proċedura għall-eżerċitar tas-setgħa ta’ impożizzjoni ta’ multi jew pagamenti perjodiċi ta’ penali, inkluż dispożizzjonijiet dwar id-drittijiet tad-difiża, dispożizzjonijiet temporali, u l-ġbir ta’ multi jew pagamenti perjodiċi ta’ penali, u l-perijodi ta’ limitazzjoni għall-impożizzjoni u l-infurzar tal-penali.

8. L-AETS għandha tirreferi kwistjonijiet lill-awtoritajiet nazzjonali xierqa għal investigazzjoni u prosekuzzjoni kriminali possibbli meta, fit-twettiq ta’ dmirijietha skont dan ir-Regolament, hija ssib li jkun hemm indikazzjonijiet serji tal-eżistenza possibbli ta’ fatti li hi taf li jkunu jistgħu jikkostitwixxu reat kriminali skont il-qafas legali applikabbli tal-pajjiż terz. Barra minn hekk, l-AETS għandha żżomm lura milli timponi multi jew pagamenti perjodiċi ta’ penali meta tkun konxja li liberazzjoni minn akkuża jew kundanna preċedenti li tirriżulta minn fatt jew fatti identiċi li jkunu sostanzjalment l-istess tkun diġà saret res judicata bħala riżultat tal-proċeduri kriminali skont il-liġi nazzjonali.

Artikolu 25j

Multi

1. Fejn, skont l-Artikolu 25i(5), l-AETS ssib li CCP tkun wettqet intenzjonalment jew b’negliġenza wieħed mit-tipi ta’ ksur elenkati fl-Anness III, din għandha tadotta deċiżjoni li timponi multa f’konformità mal-paragrafu 2 ta’ dan l-Artikolu.

Ksur minn CCP jitqies li twettaq intenzjonalment jekk l-AETS ssib fatturi oġġettivi li juru li s-CCP jew id-diriġenza għolja tagħha aġixxew deliberatament biex jitwettaq il-ksur.

2. L-ammonti bażiċi tal-multi msemmijin fil-paragrafu 1 għandhom ikunu sa darbtejn l-ammont tal-profitti miksuba jew telf evitat minħabba l-ksur fejn dawn ikun jistgħu jiġu ddeterminati, jew sa 10 % tad-dħul annwali totali, kif definit fid-dritt rilevanti tal-Unjoni, ta’ persuna ġuridika fis-sena ta’ negozju preċedenti.

3. L-ammonti bażiċi stabbiliti fil-paragrafu 2 jiġu aġġustati, jekk meħtieġ, filwaqt li jitqiesu tal-fatturi aggravanti jew mitiganti skont il-koeffiċjenti rilevanti stabbiliti fl-Anness IV.

Il-koeffiċjenti aggravanti rilevanti jiġu applikati wieħed wieħed għall-ammont bażiku. Jekk ikunu applikabbli aktar minn koeffiċjent aggravanti wieħed, id-differenza bejn l-ammont bażiku u l-ammont li jirriżulta mill-applikazzjoni ta’ kull koeffiċjent aggravanti individwali għandha tiżdied mal-ammont bażiku.

Il-koeffiċjenti mitiganti rilevanti jiġu applikati wieħed wieħed għall-ammont bażiku. Jekk ikun applikabbli aktar minn koeffiċjent mitiganti wieħed, id-differenza bejn l-ammont bażiku u l-ammont li jirriżulta mill-applikazzjoni ta’ kull koeffiċjent mitiganti individwali għandha titnaqqas mill-ammont bażiku.

4. Minkejja l-paragrafi 2 u 3, l-ammont tal-multa ma għandux jaqbeż 20 % tad-dħul annwali tas-CCP fis-sena tan-negozju preċedenti iżda, jekk is-CCP tkun kisbet benefiċċju finanzjarju direttament jew indirettament mill-ksur, l-ammont tal-multa jkun għall-inqas ugwali għal dak il-benefiċċju.

Fejn xi att jew ommissjoni ta’ CCP jikkostitwixxu aktar minn ksur wieħed elenkat fl-Anness III, għandha tapplika biss l-ogħla multa kalkolata skont il-paragrafi 2 u 3 u relatata ma’ wieħed minn dan il-ksur.

Artikolu 25k

Ħlasijiet perjodiċi ta’ penali

1. L-AETS għandha, permezz ta’ deċiżjoni, timponi pagamenti perjodiċi ta’ penali sabiex iġġiegħel lil:

(a)	CCP tal-Grad 2 ittemm il-ksur skont deċiżjoni meħuda f’konformità mal-punt (a) tal-Artikolu 25q(1);

(b)	persuna msemmija fl-Artikolu 25f(1) tipprovdi informazzjoni kompleta li tkun ġiet rikjesta b’deċiżjoni f’konformità mal-Artikolu 25f;

(c)

CCP tal-Grad 2:

(i)	tissottometti ruħha għal investigazzjoni u b’mod partikolari tipproduċi reġistri, data, proċeduri jew kwalunkwe materjal ieħor meħtieġ b’mod komplut u tikkompleta u tikkoreġi informazzjoni oħra pprovduta f’investigazzjoni mnedija b’deċiżjoni meħuda skont l-Artikolu 25 g; jew

(ii)	tissottometti ruħha għal spezzjoni fil-post ordnata b’deċiżjoni skont l-Artikolu 25 h.

2. Il-pagament perjodiku ta’ penali għandu jkun effettiv u proporzjonat. Il-pagament perjodiku ta’ penali għandu jiġi impost għal kull ġurnata ta’ dewmien.

3. Minkejja l-paragrafu 2, l-ammont tal-pagamenti tal-penali perjodiċi għandu jkun 3 % tal-fatturat medju ta’ kuljum fis-sena tan-negozju preċedenti, jew, f’każ ta’ persuni fiżiċi, 2 % tad-dħul medju ta’ kuljum fis-sena kalendarja preċedenti. Għandu jiġi kkalkolat mid-data stipulata fid-deċiżjoni li timponi l-pagamenti perjodiċi ta’ penali.

4. Il-pagament perjodiku ta’ penali għandu jiġi impost għal perijodu massimu ta’ sitt xhur wara n-notifika tad-deċiżjoni tal-AETS. Wara li dak il-perijodu jintemm, l-AETS għandha tirrevedi l-miżura.

Artikolu 25l

Smigħ tal-persuni kkonċernati

1. Qabel ma tieħu ebda deċiżjoni dwar multa jew pagament perjodiku ta’ penali skont l-Artikoli 25j u 25k, l-AETS għandha tagħti lill-persuni soġġetti għall-proċeduri l-opportunità li jinstemgħu fir-rigward tas-sejbiet tagħha. L-AETS għandha tibbaża d-deċiżjonijiet tagħha unikament fuq sejbiet li l-persuni soġġetti għall-proċeduri kellhom l-opportunità li jikkummentaw dwarhom.

L-ewwel subparagrafu ta’ dan il-paragrafu ma għandux japplika fejn tkun meħtieġa azzjoni urġenti li tipprevjeni li ssir ħsara sinifikanti u imminenti lis-sistema finanzjarja. F’każ bħal dan, l-AETS tista’ tadotta deċiżjoni interim u għandha tagħti lill-persuni kkonċernati l-opportunità li jinstemgħu kemm jista’ jkun malajr wara li tieħu d-deċiżjoni tagħha.

2. Id-drittijiet tad-difiża tal-persuni soġġetti għall-proċeduri għandhom jiġu rispettati b’mod sħiħ matul il-proċeduri. Għandhom ikunu intitolati jkollhom aċċess għall-fajl tal-AETS, soġġett għall-interess leġittimu ta’ persuni oħrajn fil-protezzjoni tas-sigrieti kummerċjali tagħhom. Id-dritt ta’ aċċess għall-fajl ma għandux jestendi għal informazzjoni kunfidenzjali jew id-dokumenti preparatorji interni tal-AETS.

Artikolu 25m

L-iżvelar, in-natura, l-infurzar u l-allokazzjoni tal-multi u l-pagamenti tal-penali perjodiċi

1. L-AETS għandha tiżvela lill-pubbliku kull multa u pagament perjodiku ta’ penali li jkun ġie impost skont l-Artikoli 25j u 25k ta’ dan ir-Regolament sakemm tali żvelar lill-pubbliku ma jippreġudikax b’mod serju s-swieq finanzjarji jew jikkawża dannu sproporzjonat lill-partijiet involuti. Tali żvelar ma għandux jinkludi data personali fil-qafas tar-Regolament (KE) Nru 45/2001.

2. Il-multi u l-pagamenti perjodiċi ta’ penali imposti skont l-Artikoli 25j u 25k għandhom ikunu ta’ natura amministrattiva.

3. Meta l-AETS tiddeċiedi li ma timponi ebda multa jew pagament ta’ penali, hija għandha tinforma lill-Parlament Ewropew, lill-Kunsill, lill-Kummissjoni u lill-awtoritajiet kompetenti rilevanti tal-pajjiż terz kif meħtieġ u għandha tippreżenta r-raġunijiet għad-deċiżjoni tagħha.

4. Il-multi u l-pagamenti perjodiċi ta’ penali imposti skont l-Artikoli 25j u 25k għandhom ikunu infurzabbli.

L-infurzar għandu jkun regolat mir-regoli ta’ proċedura ċivili fis-seħħ fl-Istat Membru jew fil-pajjiż terz fejn jitwettaq.

5. L-ammonti tal-multi u tal-pagamenti perjodiċi ta’ penali għandhom jiġu allokati lill-baġit ġenerali tal-Unjoni Ewropea.

Artikolu 25n

Rieżami mill-Qorti tal-Ġustizzja

Il-Qorti tal-Ġustizzja għandu jkollha ġurisdizzjoni illimitata biex tirrieżamina deċiżjonijiet li bihom l-AETS tkun imponiet multa jew ħlas perjodiku ta’ penali. Hija tista’ tannulla, tnaqqas jew iżżid il-multa jew il-pagament perjodiku ta’ penali imposti.

Artikolu 25o

Emendi għall-Anness IV

Sabiex jiġu kkunsidrati żviluppi fis-swieq finanzjarji, il-Kummissjoni tingħata s-setgħa li tadotta atti delegati skont l-Artikolu 82 dwar miżuri għall-emendar tal-Anness IV.

Artikolu 25p

L-irtirar tar-rikonoxximent

1. Mingħajr preġudizzju għall-Artikolu 25q u soġġetta għall-paragrafi li ġejjin, l-AETS, wara li tikkonsulta lill-awtoritajiet u l-entitajiet imsemmijin fl-Artikolu 25(3), għandha tirtira deċiżjoni ta’ rikonoxximent adottata skont l-Artikolu 25 fejn:

(a)	is-CCP ikkonċernata ma tkunx għamlet użu tar-rikonoxximent fi żmien sitt xhur, b’mod espress tirrinunzja r-rikonoxximent jew ma tkunx għadha involuta fin-negozju għal aktar minn sitt xhur;

(b)	is-CCP ikkonċernata tkun kisbet ir-rikonoxximent permezz ta’ dikjarazzjonijiet foloz jew b’xi mezz irregolari ieħor;

(c)

is-CCP ikkonċernata tkun kisret b’mod serju u sistematiku xi waħda mill-kondizzjonijiet għar-rikonoxximent stabbiliti fl-Artikolu 25 jew ma tkunx għadha konformi ma’ xi waħda minn dawk il-kondizzjonijiet u f’xi waħda minn dawk is-sitwazzjonijiet ma tkunx ħadet l-azzjoni ta’ rimedju rikjesta mill-AETS f’perijodu ta’ żmien stabbilit b’mod adegwat ta’ mhux aktar minn sitt xhur;

(d)

l-AETS ma tkunx tista’ teżerċita b’mod effikaċi r-responsabbiltajiet tagħha taħt dan ir-Regolament fuq is-CCP ikkonċernata, minħabba n-nuqqas min-naħa tal-awtorità tal-pajjiż terz tas-CCP li tipprovdi lill-AETS bl-informazzjoni rilevanti kollha jew tikkoopera mal-AETS f’konformità mal-Artikolu 25(7);

(e)	l-att ta’ implimentazzjoni msemmi fl-Artikolu 25(6) jkun ġie irtirat jew sospiż, jew xi waħda mill-kondizzjonijiet marbutin miegħu ma tkunx aktar sodisfatta.

L-AETS tista’ tillimita l-irtirar tar-rikonoxximent għal servizz, attività, jew klassi partikolari ta’ strumenti finanzjarji.

Meta tkun qed tiddetermina d-data tad-dħul fis-seħħ tad-deċiżjoni tal-irtirar tar-rikonoxximent, l-AETS għandha tagħmel ħilitha biex timminimizza t-tfixkil potenzjali tas-suq u tipprevedi perijodu ta’ adattament adegwat li ma għandux ikun aktar minn sentejn.

2. Qabel ma tirtira r-rikonoxximent skont il-punt (c) tal-paragrafu 1 ta’ dan l-Artikolu, l-AETS għandha tqis il-possibbiltà li tapplika miżuri taħt il-punti (a), (b) u (c) tal-Artikolu 25q(1).

Jekk l-AETS tiddetermina li ma tkunx ittieħdet l-azzjoni korrettiva fil-perijodu ta’ żmien stabbilit ta’ mhux aktar minn sitt xhur skont il-punt (c) tal-ewwel subparagrafu tal-paragrafu 1 ta’ dan l-Artikolu jew li l-azzjoni meħuda ma tkunx adegwata, u wara li tikkonsulta lill-awtoritajiet imsemmijin fl-Artikolu 25(3), l-AETS għandha tirtira d-deċiżjoni tar-rikonoxximent.

3. L-AETS għandha, mingħajr dewmien mhux ġustifikat, tinnotifika lill-awtorità kompetenti rilevanti tal-pajjiż terz dwar deċiżjoni li jiġi rtirat ir-rikonoxximent ta’ CCP rikonoxxuta.

4. Kwalunkwe waħda mill-awtoritajiet imsemmija fl-Artikolu 25(3), li tqis li tkun ġiet sodisfatta waħda mill-kondizzjonijiet imsemmija fil-paragrafu 1, tista’ titlob lill-AETS teżamina jekk ġewx sodisfatti l-kondizzjonijiet għall-irtirar tar-rikonoxximent ta’ CCP rikonoxxuta jew tar-rikonoxximent tagħha ta’ servizz, attività jew klassi partikolari ta’ strumenti finanzjarji. Meta l-AETS tiddeċiedi li ma tirtirax ir-rikonoxximent tas-CCP ikkonċernata, hija għandha tipprovdi r-raġunijiet kollha lill-awtorità rikjedenti.

Artikolu 25q

Miżuri superviżorji mill-AETS

1. Fejn, f’konformità mal-Artikolu 25i(5), l-AETS ssib li CCP tal-Grad 2 tkun wettqet wieħed mit-tipi ta’ ksur elenkati fl-Anness III, hija għandha tieħu waħda jew aktar mid-deċiżjonijiet li ġejjin:

(a)	tesiġi li s-CCP ittemm il-ksur;

(b)	timponi multi skont l-Artikolu 25j;

(c)	toħroġ avviżi pubbliċi;

(d)	tirtira r-rikonoxximent tas-CCP, jew tar-rikonoxximent tagħha ta’ servizz, attività jew klassi partikolari ta’ strumenti finanzjarji, skont l-Artikolu 25p.

2. Meta tieħu d-deċiżjonijiet imsemmijin fil-paragrafu 1, l-AETS għandha tqis in-natura u s-serjetà tal-ksur, filwaqt li tqis il-kriterji li ġejjin:

(a)	it-tul ta’ żmien u l-frekwenza tal-ksur;

(b)	jekk il-ksur kixifx dgħufijiet serji jew sistemiċi fil-proċeduri tas-CCP jew fis-sistemi tal-amministrazzjoni jew tal-kontrolli interni tagħha;

(c)	jekk ir-reat finanzjarju ġiex ikkawżat, iffaċilitat jew inkella ġiex attribwit b’mod ieħor għall-ksur;

(d)	jekk il-ksur twettaqx intenzjonalment jew b’negliġenza.

3. Mingħajr dewmien mhux ġustifikat, l-AETS għandha tinnotifika kwalunkwe deċiżjoni adottata skont il-paragrafu 1 lis-CCP ikkonċernata, u għandha tikkomunikaha lill-awtoritajiet kompetenti rilevanti tal-pajjiż terz u lill-Kummissjoni. Għandha tiżvela pubblikament kull deċiżjoni bħal din fis-sit tal-web tagħha fi żmien għaxart ijiem tax-xogħol mid-data tal-adozzjoni tagħha.

Meta tagħmel id-deċiżjoni tagħha pubblika kif imsemmi fl-ewwel subparagrafu, l-AETS għandha tagħmel pubbliku wkoll id-dritt tas-CCP ikkonċernata li tappella d-deċiżjoni, il-fatt, fejn rilevanti, li dan l-appell ikun sar, waqt li tispeċifika li dan l-appell ma għandux effett ta’ sospensjoni, u l-fatt li huwa possibbli li l-Bord tal-Appell tal-AETS jissospendi l-applikazzjoni tad-deċiżjoni kkontestata skont l-Artikolu 60(3) tar-Regolament (UE) Nru 1095/2010.”;

(12)	fl-Artikolu 32(1), jiżdied is-subparagrafu li ġej: “Il-valutazzjoni tal-awtorità kompetenti fir-rigward tan-notifika prevista fl-Artikolu 31(2) u l-informazzjoni msemmija fl-Artikolu 31(3), għandhom ikunu soġġetti għal opinjoni tal-kulleġġ skont l-Artikolu 19.”;

(13)

fl-Artikolu 35(1), l-aħħar subparagrafu huwa sostitwit b’dan li ġej:

“CCP ma għandhiex testernalizza attivitajiet ewlenin marbuta mal-ġestjoni tar-riskju għajr jekk din l-esternalizzazzjoni tiġi approvata mill-awtorità kompetenti. Id-deċiżjoni tal-awtorità kompetenti għandha tkun soġġetta għal opinjoni tal-kulleġġ skont l-Artikolu 19.”;

(14)

l-Artikolu 49 huwa emendat kif ġej:

(a)

il-paragrafu 1 huwa sostitwit b’dan li ġej:

“1.

CCP għandha regolarment teżamina l-mudelli u l-parametri adottati biex jiġu kkalkolati r-rekwiżiti tal-marġini, il-kontribuzzjonijiet tal-fond tal-inadempjenza, ir-rekwiżiti tal-kollateral u mekkaniżmi oħra tal-kontroll tar-riskju tagħha. Għandha tissottometti l-mudelli għal testijiet tal-istress rigorużi u frekwenti biex tivvaluta r-reżiljenza tagħhom f’kondizzjonijiet tas-suq estremi iżda plawżibbli u għandha twettaq ittestjar retrospettiv biex tivvaluta l-affidabbiltà tal-metodoloġija adottata. Is-CCP għandha tikseb validazzjoni indipendenti, għandha tinforma lill-awtorità kompetenti tagħha u lill-AETS bir-riżultati tat-testijiet imwettqa u għandha tikseb il-validazzjoni tagħhom f’konformità mal-paragrafi 1a, 1b, 1c, 1d u 1e qabel l-adozzjoni ta’ kwalunkwe bidla sinifikanti fil-mudelli u l-parametri.

Il-mudelli u l-parametri adottati, inkluż kwalunkwe bidla sinifikanti għalihom, għandhom ikunu soġġetti għal opinjoni tal-kulleġġ skont il-paragrafi li ġejjin.

L-AETS għandha tiżgura li l-informazzjoni dwar ir-riżultati tat-testijiet tal-istress tiġi mgħoddija lill-ASE, lis-SEBĊ u lill-Bord Uniku ta’ Riżoluzzjoni sabiex ikunu jistgħu jivvalutaw l-esponiment tal-impriżi finanzjarji għall-inadempjenza tas-CCPs.”;

(b)

jiddaħħlu l-paragrafi li ġejjin:

“1a.

Fejn CCP jkollha l-intenzjoni li tadotta kwalunkwe bidla sinifikanti fil-mudelli u l-parametri msemmija fil-paragrafu 1, għandha tapplika mal-awtorità kompetenti u mal-AETS għall-validazzjoni ta’ dik il-bidla. Is-CCP għandha tinkludi validazzjoni indipendenti tal-bidla maħsuba għall-applikazzjonijiet tagħha. L-awtorità kompetenti u l-AETS għandhom, kull waħda minnhom, jikkonfermaw li rċevew l-applikazzjoni kompluta lis-CCP.

1b.	Fi żmien 50 jum ta’ xogħol minn meta jirċievu l-applikazzjonijiet kompluti, l-awtorità kompetenti u l-AETS għandhom, kull waħda minnhom, iwettqu valutazzjoni tar-riskju tal-bidla sinifikanti u jippreżentaw ir-rapporti tagħhom lill-kulleġġ stabbilit f’konformità mal-Artikolu 18.

1c.

Fi żmien 30 jum ta’ xogħol minn meta jirċievi r-rapporti msemmija fil-paragrafu 1b, il-kulleġġ għandu jadotta opinjoni ta’ maġġoranza f’konformità mal-Artikolu 19(3). Minkejja l-adozzjoni proviżorja f’konformità mal-paragrafu 1e, l-awtorità kompetenti ma għandhiex tadotta deċiżjoni li tagħti jew tirrifjuta l-validazzjoni ta’ tibdil sinifikanti għall-mudelli u l-parametri sakemm tali opinjoni tiġi adottata mill-kulleġġ, għajr jekk il-kulleġġ ma jkunx adotta dik l-opinjoni fil-limitu ta’ żmien.

1d.

Fi żmien 90 jum ta’ xogħol minn meta jirċievu l-applikazzjonijiet imsemmija fil-paragrafu 1a, l-awtorità kompetenti u l-AETS għandhom, kull waħda minnhom, jinformaw lis-CCP u lil xulxin bil-miktub, inkluża spjegazzjoni motivata b’mod sħiħ, dwar jekk il-validazzjoni tkunx ingħatat jew tkunx ġiet rifjutata.

1e.

Is-CCP ma tista’ tadotta ebda bidla sinifikanti għall-mudelli u l-parametri msemmija fil-paragrafu 1 qabel ma tikseb il-validazzjonijiet mill-awtorità kompetenti tagħha u mill-AETS. L-awtorità kompetenti, bi ftehim mal-AETS, tista’ tippermetti adozzjoni proviżorja ta’ bidla sinifikanti ta’ dawk il-mudelli jew il-parametri qabel il-validazzjonijiet tagħhom fejn debitament ġustifikat.”;

(c)

jiżdied il-paragrafu li ġej:

“5.

Sabiex jiġu żgurati kondizzjonijiet uniformi tal-applikazzjoni ta’ dan l-Artikolu, l-AETS għandha, wara li tikkonsulta mal-ABE, awtoritajiet kompetenti rilevanti oħra u l-membri tas-SEBĊ, tiżviluppa abbozz ta’ standards tekniċi regolatorji li jispeċifikaw il-kondizzjonijiet li skonthom ikunu sinifikanti l-bidliet fil-mudelli u l-parametri msemmija fil-paragrafu 1.

L-AETS għandha tippreżenta dan l-abbozz ta’ standards tekniċi regolatorji lill-Kummissjoni sat-2 ta’ Jannar 2021.

Il-Kummissjoni tingħata s-setgħa li tadotta l-istandards tekniċi regolatorji msemmija fl-ewwel subparagrafu skont l-Artikoli 10 sa 14 tar-Regolament (UE) Nru 1095/2010.”;

(15)

l-Artikolu 82 huwa emendat kif ġej:

(a)

il-paragrafi 2, 3 u 4 huma sostitwiti b’dan li ġej:

“2.

Is-setgħa ta’ adozzjoni ta’ atti delegati msemmija fl-Artikolu 1(6), l-Artikolu 4(3a), l-Artikolu 25(2a), l-Artikolu 25(6a), l-Artikolu 25a(3), l-Artikolu 25d(3), l-Artikolu 25i(7), l-Artikolu 25o, l-Artikolu 64(7), l-Artikolu 70, l-Artikolu 72(3), u l-Artikolu 85(2) hija mogħtija lill-Kummissjoni għal perijodu ta’ żmien indeterminat.

Id-delega tas-setgħa msemmija fl-Artikolu 1(6), l-Artikolu 4(3a), l-Artikolu 25(2a), l-Artikolu 25(6a), l-Artikolu 25a(3), l-Artikolu 25d(3), l-Artikolu 25i(7), l-Artikolu 25o, l-Artikolu 64(7), l-Artikolu 70, l-Artikolu 72(3) u l-Artikolu 85(2) tista’ tiġi revokata fi kwalunkwe mument mill-Parlament Ewropew jew mill-Kunsill. Deċiżjoni ta’ revoka għandha ttemm id-delega ta’ setgħa speċifikata f’dik id-deċiżjoni. Għandha ssir effettiva fil-jum wara l-pubblikazzjoni tad-deċiżjoni f’Il-Ġurnal Uffiċjali tal-Unjoni Ewropea jew f’data aktar tard speċifikata fih. Ma għandhiex taffettwa l-validità ta’ kwalunkwe att delegat li jkun diġà fis-seħħ.

4.	Qabel ma’ tadotta att delegat, il-Kummissjoni għandha timpenja ruħha biex tikkonsulta lill-AETS u għandha tikkonsulta lill-esperti maħtura minn kull Stat Membru f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet.”;

(b)

il-paragrafu 6 huwa sostitwit b’dan li ġej:

“6.

Att delegat adottat skont l-Artikolu 1(6), l-Artikolu 4(3a), l-Artikolu 25(2a), l-Artikolu 25(6a), l-Artikolu 25a(3), l-Artikolu 25d(3), l-Artikolu 25i(7), l-Artikolu 25o, l-Artikolu 64(7), l-Artikolu 70, l-Artikolu 72(3) u l-Artikolu 85(2) għandu jidħol fis-seħħ biss jekk ma tkun ġiet espressa l-ebda oġġezzjoni min-naħa tal-Parlament Ewropew jew tal-Kunsill fi żmien tliet xhur min-notifika ta’ dak l-att lill-Parlament Ewropew u lill-Kunsill jew jekk, qabel jiskadi dak il-perijodu, kemm il-Parlament Ewropew kif ukoll il-Kunsill ikunu infurmaw lill-Kummissjoni li mhumiex ser iqajmu oġġezzjoni. Dak il-perijodu għandu jiġi estiż bi tliet xhur fuq inizjattiva tal-Parlament Ewropew jew tal-Kunsill.”;

(16)

fl-Artikolu 85, jiżdiedu l-paragrafi li ġejjin:

“6.

L-AETS għandha, f’kooperazzjoni mal-BERS, u fi ftehim, f’konformità mal-Artikolu 24b(3), mal-banek ċentrali tal-ħruġ tal-valuti kollha tal-Unjoni tal-istrumenti finanzjarji kklerjati jew li għandhom jiġu kklerjati minn CCP ta’ pajjiż terz li għaliha huwa indirizzat l-att ta’ implimentazzjoni msemmi fit-tieni subparagrafu tal-Artikolu 25(2c), tippreżenta rapport lill-Kummissjoni dwar l-applikazzjoni tad-dispożizzjonijiet ta’ dak l-att ta’ implimentazzjoni, li b’mod partikolari jivvaluta jekk ir-riskju għall-istabbiltà finanzjarja tal-Unjoni jew ta’ wieħed jew aktar mill-Istati Membri tagħha jkunx mitigat b’mod suffiċjenti. L-AETS għandha tippreżenta r-rapport tagħha lill-Kummissjoni fi żmien 12-il xahar minn tmiem il-perijodu ta’ adattament determinat skont il-punt (b) tar-raba’ subparagrafu tal-Artikolu 25(2c). Il-ftehim ta’ bank ċentrali tal-ħruġ għandu jirrelata biss mal-munita li joħroġ u mhux mar-rapport fl-intier tiegħu.

Fi żmien 12-il xahar mit-trasmissjoni tar-rapport imsemmi fl-ewwel subparagrafu, il-Kummissjoni għandha tħejji rapport dwar l-applikazzjoni tad-dispożizzjonijiet ta’ dak l-att ta’ implimentazzjoni. Il-Kummissjoni għandha tippreżenta r-rapport tagħha lill-Parlament Ewropew u lill-Kunsill, flimkien ma’ kwalunkwe proposta adegwata.

Sat-2 ta’ Jannar 2023, il-Kummissjoni għandha tħejji rapport li jivvaluta l-effettività ta’:

(a)	il-kompiti tal-AETS, b’mod partikolari l-Kumitat Superviżorju tas-CCPs, fit-trawwim tal-konverġenza u l-koerenza tal-applikazzjoni ta’ dan ir-Regolament fost l-awtoritajiet kompetenti msemmija fl-Artikolu 22 u l-kulleġġi msemmija fl-Artikolu 18;

(b)	il-qafas għar-rikonoxximent u s-superviżjoni tas-CCPs ta’ pajjiżi terzi;

(c)	il-qafas biex jiġu ggarantiti kondizzjonijiet ekwivalenti ta’ kompetizzjoni fost is-CCPs awtorizzati skont l-Artikolu 14 kif ukoll fost is-CCPs awtorizzati u s-CCPs ta’ pajjiżi terzi rikonoxxuti skont l-Artikolu 25;

(d)	id-diviżjoni tar-responsabbiltajiet bejn l-AETS, l-awtoritajiet kompetenti u l-banek ċentrali tal-ħruġ.

Il-Kummissjoni għandha tissottometti r-rapport lill-Parlament Ewropew u lill-Kunsill flimkien ma’ kwalunkwe proposta adatta.”;

(17)

fl-Artikolu 89, jiddaħħlu l-paragrafi li ġejjin:

“3a.

L-AETS ma għandhiex teżerċita s-setgħat tagħha skont l-Artikolu 25(2a), (2b) u (2c) sad-data tad-dħul fis-seħħ tal-atti delegati msemmijin fit-tieni subparagrafu tal-Artikolu 25(2a) u fl-Artikolu 25a(3) u, relattivament għas-CCPs li fir-rigward tagħhom l-AETS ma tkunx adottat deċiżjoni ta’ rikonoxximent skont l-Artikolu 25 qabel l-1 ta’ Jannar 2020, sad-data tad-dħul fis-seħħ tal-att ta’ implimentazzjoni rilevanti msemmi fl-Artikolu 25(6).

3b.	L-AETS għandha tistabbilixxi u tamministra kulleġġ skont l-Artikolu 25c għas-CCPs kollha rikonoxxuti skont l-Artikolu 25 qabel l-1 ta’ Jannar 2020 fi żmien erba’ xhur mid-data tad-dħul fis-seħħ tal-att delegat imsemmi fit-tieni subparagrafu tal-Artikolu 25(2a).

3c.

L-AETS għandha tirrieżamina d-deċiżjonijiet dwar ir-rikonoxximent adottati skont l-Artikolu 25(1) qabel id-data tad-dħul fis-seħħ tal-atti delegati msemmijin fit-tieni subparagrafu tal-Artikolu 25(2a) u fl-Artikolu 25a(3) fi żmien 18-il xahar mid-data tad-dħul fis-seħħ tal-att delegat imsemmi fit-tieni subparagrafu tal-Artikolu 25(2a), f’konformità mal-Artikolu 25(5).

Fejn, wara r-rieżami msemmi fl-ewwel subparagrafu ta’ dan il-paragrafu, l-AETS tiddetermina li CCP li tkun ġiet rikonoxxuta qabel l-1 ta’ Jannar 2020 jenħtieġ li tiġi klassifikata bħala CCP tal-Grad 2 f’konformità mal-Artikolu 25(2a), l-AETS għandha tistabbilixxi perijodu ta’ adattament adegwat li ma għandux jeċċedi 18-il xahar li fihom is-CCP għandha tikkonforma mar-rekwiżiti msemmijin fl-Artikolu 25(2b). L-AETS tista’ testendi dak il-perijodu tal-adattament b’mhux aktar minn sitt xhur addizzjonali fuq it-talba motivata tas-CCP jew ta’ kwalunkwe waħda mill-awtoritajiet kompetenti responsabbli għas-superviżjoni tal-membri tal-ikklerjar fl-Unjoni, fejn tali estensjoni tkun iġġustifikata minn ċirkostanzi eċċezzjonali u mill-impatt fuq il-membri tal-ikklerjar stabbiliti fl-Unjoni.”;

(18)

l-Artikolu 90 huwa sostitwit b’dan li ġej:

“Artikolu 90

Persunal u riżorsi tal-AETS

Sat-2 ta’ Jannar 2022, l-AETS għandha tivvaluta l-ħtiġijiet tagħha rigward persunal u riżorsi minn meta tieħu s-setgħat u d-dmirijiet tagħha taħt dan ir-Regolament u għandha tippreżenta rapport lill-Parlament Ewropew, lill-Kunsill u lill-Kummissjoni.”;

(19)	it-testi stipulati fl-Anness għal dan ir-Regolament huma miżjuda bħala l-Annessi III u IV.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Strasburgu, it-23 ta’ Ottubru 2019.

Għall-Parlament Ewropew

Il-President

D. M. SASSOLI

Għall-Kunsill

Il-President

T. TUPPURAINEN

(1) ĠU C 385 15.11.2017, p. 3.

(2) ĠU C 434, 15.12.2017, p. 63.

(3) Il-Pożizzjoni tal-Parlament Ewropew tat-18 ta’ April 2019 (għadha ma ġietx ippubblikata fil-Ġurnal Uffiċjali) u d-Deċiżjoni tal-Kunsill tal-15 ta’ Ottubru 2019.

(4) Ir-Regolament (UE) Nru 648/2012 tal-Parlament Ewropew u tal-Kunsill tal-4 ta’ Lulju 2012 dwar derivati OTC, kontropartijiet ċentrali u repożitorji tad-data dwar it-tranżazzjonijiet (ĠU L 201, 27.7.2012, p. 1).

(5) Regolament (UE) 2019/834 tal-Parlament Ewropew u tal-Kunsill tal-20 ta’ Mejju 2019 li jemenda r-Regolament (UE) Nru 648/2012 fir-rigward tal-obbligu tal-ikklerjar, is-sospensjoni tal-obbligu tal-ikklerjar, ir-rekwiżiti tar-rapportar, it-tekniki tal-mitigazzjoni tar-riskju għal kuntratti tad-derivattivi OTC mhux ikklerjati minn kontroparti ċentrali, ir-reġistrazzjoni u s-superviżjoni ta’ repożitorji tat-tranżazzjonijiet u r-rekwiżiti għar-repożitorji tat-tranżazzjonijiet (ĠU L 141, 28.5.2019, p. 42).

(6) Regolament (UE) Nru 1095/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/77/KE (ĠU L 331, 15.12.2010, p. 84).

(7) Regolament tal-Kunsill (UE) Nru 1024/2013 tal-15 ta’ Ottubru 2013 li jikkonferixxi kompiti speċifiċi lill-Bank Ċentrali Ewropew fir-rigward ta’ politiki relatati mas-superviżjoni prudenzjali ta’ istituzzjonijiet ta’ kreditu (ĠU L 287, 29.10.2013, p. 63).

(8) ĠU L 123, 12.5.2016, p. 1.

(9) Regolament (UE) Nru 182/2011 tal-Parlament Ewropew u tal-Kunsill tas-16 ta’ Frar 2011 li jistabbilixxi r-regoli u l-prinċipji ġenerali dwar il-modalitajiet ta’ kontroll mill-Istati Membri tal-eżerċizzju mill-Kummissjoni tas-setgħat ta’ implimentazzjoni (ĠU L 55, 28.2.2011, p. 13).

ANNESS

Dawn it-testi li ġejjin jiżdiedu bħala l-Annessi III u IV tar-Regolament (UE) Nru 648/2012.

“ANNESS III

Lista ta’ ksur imsemmi fl-Artikolu 25j(1)

Ksur relatat ma’ rekwiżiti kapitali:

(a)	CCP tal-Grad 2 tikser l-Artikolu 16(1) jekk ma jkollhiex kapital inizjali permanenti u disponibbli ta’ mill-inqas EUR 7,5 miljun;

(b)

CCP tal-Grad 2 tikser l-Artikolu 16(2) jekk ma jkollhiex kapital, inkluż dħul u riżervi miżmuma, li jkun proporzjonat għar-riskju li jirriżulta mill-attivitajiet tagħha u li dejjem ikun suffiċjenti sabiex jiżgura stralċ jew ristrutturar ordnat tal-attivitajiet fuq perijodu ta’ żmien adatt u protezzjoni adegwata lis-CCP kontra riskji tal-kreditu, tal-kontroparti, tas-suq, operazzjonali, legali u kummerċjali li mhumiex diġà koperti minn riżorsi finanzjarji speċifiċi kif imsemmi fl-Artikoli 41 sa 44.

II.

Ksur relatat ma’ rekwiżiti organizzazzjonali jew kunflitti ta’ interess:

(a)

CCP tal-Grad 2 tikser l-Artikolu 26(1) jekk ma jkollhiex arranġamenti ta’ governanza robusti, li jinkludu struttura organizzattiva ċara b’linji ta’ responsabilità ddefiniti sew, trasparenti u konsistenti, proċessi effettivi għall-identifikazzjoni, l-immaniġġjar, il-monitoraġġ u r-rapportar tar-riskji li għalihom hi jew tista’ tkun esposta, u mekkaniżmi tal-kontroll interni adegwati, inklużi proċeduri amministrattivi u kontabilistiċi sodi;

(b)	CCP tal-Grad 2 tikser l-Artikolu 26(2) jekk ma tadottax politiki u proċeduri adegwati li jkunu effettivi biżżejjed sabiex jiżguraw il-konformità, inkluża dik tal-maniġers u l-impjegati tagħha, ma’ dan ir-Regolament;

(c)	CCP tal-Grad 2 tikser l-Artikolu 26(3) jekk ma żżommx jew topera struttura organizzattiva li tiżgura l-kontinwità u l-funzjonament ordnat fit-twettiq tas-servizzi u l-attivitajiet tagħha jew jekk ma tħaddimx sistemi, riżorsi u proċeduri adegwati u proporzjonali;

(d)	CCP tal-Grad 2 tikser l-Artikolu 26(4) jekk ma żżommx separazzjoni ċara bejn il-linji tar-rapportar għall-immaniġġjar tar-riskju u dawk għal operazzjonijiet oħra tas-CCP;

(e)	CCP tal-Grad 2 tikser l-Artikolu 26(5) jekk ma tadottax, ma timplimentax jew ma żżommx fis-seħħ politika ta’ rimunerazzjoni li tippromwovi ġestjoni tar-riskju soda u effikaċi u li ma toħloqx inċentivi biex titnaqqas ir-rigorożità tal-istandards tar-riskji;

(f)

CCP tal-Grad 2 tikser l-Artikolu 26(6) jekk ma żżommx sistemi tat-teknoloġija tal-informazzjoni adegwati biex jittrattaw il-kumplessità, il-varjetà u t-tip tas-servizzi u l-attivitajiet imwettqa sabiex jiġu żgurati standards għolja ta’ sigurtà u l-integrità u l-kunfidenzjalità tal-informazzjoni miżmuma;

(g)	CCP tal-Grad 2 tikser l-Artikolu 26(7) jekk ma tagħmilx l-arranġamenti ta’ governanza tagħha, ir-regoli li jirregolaw is-CCP, jew il-kriterji ta’ ammissjoni tagħha għal sħubija tal-ikklerjar disponibbli għall-pubbliku mingħajr ħlas;

(h)	CCP tal-Grad 2 tikser l-Artikolu 26(8) jekk ma tkunx soġġetta għal verifiki frekwenti u indipendenti, jew jekk ma tikkomunikax ir-riżultati ta’ dawk il-verifiki lill-bord jew jekk ma tagħmilx dawk ir-riżultati disponibbli għall-AETS;

(i)	CCP tal-Grad 2 tikser l-Artikolu 27(1) jew it-tieni subparagrafu tal-Artikolu 27(2) jekk ma tiżgurax li d-diriġenza għolja u l-membri tal-bord ikunu ta’ reputazzjoni tajba u ta’ esperjenza biżżejjed biex jiżguraw l-immaniġġjar sod u prudenti tas-CCP;

(j)

CCP tal-Grad 2 tikser l-Artikolu 27(2) jekk ma tiżgurax li mill-inqas terz, iżda mhux anqas minn tnejn, mill-membri ta’ dak il-bord ikunu indipendenti jew jekk ma tistedinx lir-rappreżentanti tal-klijenti tal-membri tal-ikklerjar għal-laqgħat tal-bord għal kwistjonijiet rilevanti għall-Artikoli 38 u 39 jew jekk torbot il-kumpens tal-membri independenti u l-membri l-oħra mhux eżekuttivi tal-bord mal-prestazzjoni kummerċjali tas-CCP;

(k)	CCP tal-Grad 2 tikser l-Artikolu 27(3) jekk ma tiddeterminax b’mod ċar ir-rwoli u r-responsabiltajiet tal-bord jew billi ma tagħmilx il-minuti tal-laqgħat tal-bord disponibbli għall-AETS jew għall-awdituri;

(l)

CCP tal-Grad 2 tikser l-Artikolu 28(1) jekk ma tistabbilixxix kumitat tar-riskju jew ma tgħammarx lil dak il-kumitat tar-riskju b’rappreżentanti tal-membri tal-ikklerjar tagħha, membri indipendenti tal-bord u rappreżentanti tal-klijenti tagħha, jekk tgħammar lill-kumitat tar-riskju b’tali mod li wieħed minn dawk il-gruppi ta’ rappreżentanti jkollu maġġoranza fil-kumitat tar-riskju, jew jekk ma tinformax lill-AETS bl-attivitajiet u d-deċiżjonijiet tal-kumitat tar-riskju meta l-AETS tkun talbet li tiġi informata kif dovut;

(m)

CCP tal-Grad 2 tikser l-Artikolu 28(2) jekk ma tiddeterminax b’mod ċar il-mandat, l-arranġamenti ta’ governanza biex tiġi żgurata l-indipendenza tagħha, il-proċeduri operazzjonali, il-kriterji tal-ammissjoni jew il-mekkaniżmu li bih jiġu eletti l-membri tal-kumitat tar-riskju, jew jekk ma tagħmilx dawk l-arranġamenti ta’ governanza pubblikament disponibbli jew jekk ma tiddeterminax li l-kumitat tar-riskju jkun presedut minn membru tal-bord indipendenti u jirrapporta direttament lill-bord u jkollu laqgħat regolari;

(n)

CCP tal-Grad 2 tikser l-Artikolu 28(3) jekk ma tippermettix lill-kumitat tar-riskju jagħti parir lill-bord dwar kwalunkwe arranġament li jista’ jkollu impatt fuq il-ġestjoni tar-riskji tas-CCP jew jekk ma tagħmilx sforzi raġonevoli biex tikkonsulta l-kumitat tar-riskju dwar żviluppi li jkollhom impatt fuq il-ġestjoni tar-riskju tas-CCP f’sitwazzjonijiet ta’ emerġenza;

(o)	CCP tal-Grad 2 tikser l-Artikolu 28(5) jekk ma tinfurmax minnufih lill-AETS bi kwalunkwe deċiżjoni li fiha l-bord jiddeċiedi li ma jsegwix il-parir tal-kumitat tar-riskju;

(p)	CCP tal-Grad 2 tikser l-Artikolu 29(1) jekk ma żżommx ir-rekords kollha dwar is-servizzi u l-attività pprovduti minn dik is-CCP għal perijodu ta’ mhux inqas minn għaxar snin, li huma meħtieġa sabiex l-AETS tkun tista’ timmonitorja l-konformità tas-CCP ma’ dan ir-Regolament;

(q)

CCP tal-Grad 2 tikser l-Artikolu 29(2) billi ma żżommx, għal perijodu ta’ mhux anqas minn għaxar snin wara t-terminazzjoni ta’ kuntratt, l-informazzjoni kollha dwar il-kuntratti kollha li tkun ipproċessat b’tali mod li jippermetti l-identifikazzjoni tat-termini oriġinali ta’ transazzjoni qabel l-ikklerjar minn dik is-CCP;

(r)

CCP tal-Grad 2 tikser l-Artikolu 29(3) jekk ma tagħmilx ir-rekords u l-informazzjoni msemmija fil-paragrafi 1 u 2 tal-Artikolu 29, jew l-informazzjoni kollha dwar il-pożizzjonijiet tal-kuntratti kklerjati, irrispettivament mill-post fejn ikunu twettqu t-transazzjonijiet, disponibbli fuq talba għall-AETS u għall-membri rilevanti tas-SEBĊ;

(s)

CCP tal-Grad 2 tikser l-Artikolu 30(1) jekk ma tinfurmax, jew tagħmel dan b’mod falz jew mhux komplut, lill-AETS bl-identitajiet tal-azzjonisti jew membri tagħha, kemm jekk diretti jew indiretti, persuni fiżiċi jew ġuridiċi, li għandhom parteċipazzjoni kwalifikatorja jew bl-ammonti ta’ dawn il-parteċipazzjonijiet;

(t)	CCP tal-Grad 2 tikser l-Artikolu 30(4) jekk tippermetti li l-persuni msemmijin fl-Artikolu 30(1) jeżerċitaw influwenza li aktarx li tkun ta’ preġudizzju għall-ġestjoni soda u prudenti tas-CCP;

(u)

CCP tal-Grad 2 tikser l-Artikolu 31(1) jekk ma tinnotifikax, jew tinnotifika b’mod falz jew mhux komplut, lill-AETS bi kwalunkwe bidla fil-ġestjoni tagħha jew jekk ma tipprovdix lill-AETS l-informazzjoni neċessarja kollha biex tivvaluta l-konformità mal-Artikolu 27(1) jew mat-tieni subparagrafu tal-Artikolu 27(2);

(v)

CCP tal-Grad 2 tikser l-Artikolu 33(1) jekk ma żżommx fis-seħħ jew ma toperax arranġamenti organizzattivi u amministrattivi effettivi bil-miktub għall-identifikazzjoni u l-immaniġġar ta’ kwalunkwe konflitt ta’ interess potenzjali bejnha, inklużi l-maniġers tagħha, l-impjegati tagħha, jew kwalunkwe persuna b’kontroll dirett jew indirett jew konnessjonijiet mill-qrib, u l-membri tal-ikklerjar tagħha jew il-klijenti tagħhom magħrufin mas-CCP jew billi ma żżommx fis-seħħ jew ma timplimentax proċeduri adegwati bl-għan tas-soluzzjoni ta’ konflitti ta’ interess possibbli;

(w)

CCP tal-Grad 2 tikser l-Artikolu 33(2) jekk ma tiżvelax b’mod ċar in-natura ġenerali jew is-sorsi tal-konflitti ta’ interess, qabel ma taċċetta transazzjonijiet ġodda mill-membru tal-ikklerjar ikkonċernat, lill-membru tal-ikklerjar jew lil klijent ikkonċernat ta’ dak il-membru tal-ikklerjar li huwa magħruf mis-CCP meta l-arranġamenti organizzazzjonali jew amministrattivi ta’ dik is-CCP biex timmaniġġja konflitt ta’ interess ma jkunux biżżejjed biex jiżguraw, b’fiduċja raġonevoli, li r-riskji ta’ ħsara għall-interess ta’ membru tal-ikklerjar jew klijent jiġu evitati;

(x)

CCP tal-Grad 2 tikser l-Artikolu 33(3) jekk ma tikkunsidrax fl-arranġamenti bil-miktub tagħha kwalunkwe ċirkostanza, li hija jew għandha tkun konxja minnha, li tista’ twassal għal konflitt ta’ interess li jirriżulta b’konsegwenza tal-istruttura u l-attivitajiet tan-negozju ta’ impriżi oħra li magħhom hija għandha relazzjoni ta’ impriża prinċipali jew sussidjarja;

(y)

CCP tal-Grad 2 tikser l-Artikolu 33(5) jekk ma tiħux il-passi raġonevoli kollha għall-prevenzjoni ta’ kwalunkwe użu ħażin tal-informazzjoni miżmuma fis-sistemi tagħha jew biex tipprevjeni l-użu ta’ dik l-informazzjoni għal attivitajiet kummerċjali oħrajn, jew minn persuna fiżika li għandha rabta mill-qrib ma’ CCP jew persuna ġuridika li għandha relazzjoni ta’ impriża prinċipali jew sussidjarja mas-CCP waqt li tuża l-informazzjoni konfidenzjali rreġistrata f’dik is-CCP għal kwalunkwe użu kummerċjali mingħajr il-kunsens mogħti minn qabel tal-klijent li lilu tkun tappartjeni din l-informazzjoni kunfidenzjali;

(z)	CCP tal-Grad 2 tikser l-Artikolu 36(1) jekk ma taġixxix b’mod ġust u professjonali skont l-aħjar interessi tal-membri tal-ikklerjar tagħha u l-klijenti tagħhom;

(aa)	CCP tal-Grad 2 tikser l-Artikolu 36(2) jekk ma jkollhiex regoli aċċessibbli, trasparenti u ġusti biex tittratta l-ilmenti fil-pront;

(ab)

CCP tal-Grad 2 tikser l-Artikolu 37(1) jew (2) jekk tuża, fuq bażi kontinwa, kriterji ta’ ammissjoni diskriminatorji, mhux trasparenti jew soġġettivi, jew jekk tonqos b’mod ieħor milli tiżgura aċċess ġust u miftuħ għal dik is-CCP fuq bażi kontinwa jew jekk tonqos milli tiżgura fuq bażi kontinwa li l-membri tal-ikklerjar tagħha jkollhom riżorsi finanzjarji u kapaċità operattiva suffiċjenti biex iwettqu l-obbligi li jirriżultaw mill-parteċipazzjoni f’dik is-CCP, jew jekk tonqos milli tagħmel rieżami komprensiv tal-konformità mill-membri tal-ikklerjar tagħha fuq bażi annwali;

(ac)	CCP tal-Grad 2 tikser l-Artikolu 37(4) jekk tonqos milli jkollha proċeduri oġġettivi u trasparenti għas-sospensjoni u l-ħruġ ordnat ta’ membri tal-ikklerjar li ma jibqgħux jissodisfaw il-kriterji msemmijin fl-Artikolu 37(1);

(ad)	CCP tal-Grad 2 tikser l-Artikolu 37(5) jekk tirrifjuta l-aċċess għal membru tal-ikklerjar li jissodisfa l-kriterji msemmijin fl-Artikolu 37(1) meta dan ir-rifjut għall-aċċess ma jkunx debitament ġustifikat bil-miktub u bbażat fuq analiżi tar-riskju komprensiva;

(ae)	CCP tal-Grad 2 tikser l-Artikolu 38(1) jekk ma tippermettix lill-klijenti tal-membri tal-ikklerjar tagħha aċċess separat għas-servizzi speċifiċi pprovduti;

(af)	CCP tal-Grad 2 tikser l-Artikolu 39(7) jekk ma toffrix il-livelli differenti ta’ segregazzjoni msemmijin f’dak il-paragrafu skont termini kummerċjali raġonevoli.

III.

Ksur relatat ma’ rekwiżiti operazzjonali:

(a)

CCP tal-Grad 2 tikser l-Artikolu 34(1) jekk ma tistabbilixxix, ma timplimentax jew ma żżommx fis-seħħ politika ta’ kontinwità tan-negozju adegwata u pjan ta’ rkupru minn diżastru bl-għan li tiżgura l-preservazzjoni tal-funzjonijiet tagħha, l-irkupru fil-ħin tal-operazzjonijiet u t-twettiq tal-obbligi tas-CCP, li tal-inqas għandu jippermetti l-irkupru tat-tranżazzjonijiet kollha fil-waqt tat-taqlib sabiex jippermetti li s-CCP tkompli topera b’ċertezza u tikkompleta s-saldu fid-data skedata;

(b)

CCP tal-Grad 2 tikser l-Artikolu 34(2) jekk ma tistabbilixxix, ma timplimentax jew ma żżommx fis-seħħ proċedura adegwata li tiżgura saldu fil-ħin u ordnat jew it-trasferiment tal-assi u tal-pożizzjonijiet tal-klijenti u tal-membri tal-ikklerjar fil-każ li r-rikonoxximent jiġi rtirat f’konformità ma’ deċiżjoni skont l-Artikolu 25;

(c)	CCP tal-Grad 2 tikser it-tieni subparagrafu tal-Artikolu 35(1) billi testernalizza attivitajiet ewlenin marbuta mal-ġestjoni tar-riskju ta’ dik is-CCP mingħajr l-approvazzjoni mill-AETS;

(d)

CCP tal-Grad 2 tikser l-Artikolu 39(1) jekk ma żżommx rekords u kontijiet separati li jippermettulha, fi kwalunkwe ħin u mingħajr dewmien, li tiddistingwi fil-kontijiet mas-CCP l-assi u l-pożizzjonijiet miżmumin għall-kont ta’ membru tal-ikklerjar wieħed mill-assi u l-pożizzjonijiet miżmumin għall-kont ta’ kwalunkwe membru tal-ikklerjar ieħor u mill-assi tagħha stess;

(e)

CCP tal-Grad 2 tikser l-Artikolu 39(2) jekk ma toffrix li żżomm u ma żżommx, meta hekk mitluba, rekords u kontijiet separati li jippermettu li kull membru tal-ikklerjar jiddistingwi fil-kontijiet mas-CCP l-assi u l-pożizzjonijiet ta’ dak il-membru tal-ikklerjar minn dawk miżmumin għall-kontijiet tal-klijenti tagħha;

(f)

CCP tal-Grad 2 tikser l-Artikolu 39(3) jekk ma toffrix li żżomm u ma żżommx, meta hekk mitluba, rekords u kontijiet separati li jippermettu li kull membru tal-ikklerjar jiddistingwi fil-kontijiet mas-CCP l-assi u l-pożizzjonijiet miżmumin għall-kont ta’ klijent minn dawk miżmumin għall-kont ta’ klijenti oħrajn, jew jekk ma toffrix lill-membri tal-ikklerjar tagħha l-possibilità li jiftħu iktar kontijiet f’isimhom stess għall-kont tal-klijenti tagħhom meta hekk mitluba;

(g)

CCP tal-Grad 2 tikser l-Artikolu 40 jekk ma tkejjilx u tivvaluta l-likwidità tagħha u l-espożizzjonijiet tal-kreditu tagħha għal kull membru tal-ikklerjar u, fejn rilevanti, għal CCP oħra li magħha tkun ikkonkludiet arranġament dwar l-interoperabbiltà, fuq bażi ta’ kważi ħin reali jew jekk ma jkollhiex aċċess għas-sorsi tal-ipprezzar rilevanti sabiex tkun tista’ tkejjel l-espożizzjonijiet tagħha b’mod effettiv fuq bażi raġonevoli ta’ kost;

(h)

CCP tal-Grad 2 tikser l-Artikolu 41(1) jekk ma timponix, ma tappellax għall-marġini jew ma tiġborx marġini biex tillimita l-espożizzjonijiet tal-kreditu tagħha mill-membri tal-ikklerjar tagħha, u fejn rilevanti, minn CCPs li magħhom tkun ikkonkludiet arranġament dwar l-interoperabilità, jew jekk timponi, tappella għall-marġini, jew tiġbor marġini li ma jkunux suffiċjenti biex ikopru l-espożizzjonijiet li s-CCP tistma li ser iseħħu sal-likwidazzjoni tal-pożizzjonijiet rilevanti jew biex ikopru t-telfiet li jirriżultaw minn tal-inqas 99 % tal-movimenti fl-espożizzjonijiet fuq firxa adegwata ta’ żmien jew suffiċjenti biex jiżguraw li CCP tikkollateralizza b’mod sħiħ l-espożizzjonijiet tagħha mal-membri tal-ikklerjar kollha tagħha, u meta rilevanti mas-CCPs kollha li magħhom ikollha arranġamenti dwar l-interoperabilità, mill-inqas fuq bażi ta’ kuljum, jew, jekk meħtieġ, biex jittieħed kont ta’ kwalunkwe effett potenzjalment proċikliku;

(i)

CCP tal-Grad 2 tikser l-Artikolu 41(2) jekk tonqos milli tadotta mudelli u parametri meta tistabbilixxi r-rekwiżiti tal-marġini tagħha li jaqbdu l-karatteristiċi tar-riskju tal-prodotti kklerjati b’kont meħud tal-intervall bejn il-ġbir tal-marġini, il-likwidità tas-suq u l-possibilità ta’ bidliet tul id-durata tat-tranżazzjoni;

(j)	CCP tal-Grad 2 tikser l-Artikolu 41(3) jekk ma tappellax għall-marġini u ma tiġborx il-marġini fuq bażi ta’ matul l-istess jum, tal-inqas meta jinqabżu l-livelli limitu predefiniti;

(k)

CCP tal-Grad 2 tikser l-Artikolu 42(3) jekk ma żżommx fis-seħħ fond tal-inadempjenza li tal-inqas jippermettilha tirreżisti, taħt kondizzjonijiet tas-suq estremi iżda plawsibbli, l-inadempjenza tal-membru tal-ikklerjar li għalih għandha l-akbar espożizzjonijiet, jew tat-tieni jew it-tielet l-akbar membri tal-ikklerjar jekk is-somma tal-espożizzjonijiet tagħhom tkun akbar, jew jekk tiżviluppa xenarji li ma jinkludux l-aktar perijodi volatili li jkunu ġew esperjenzati mis-swieq li lilhom is-CCP tipprovdi s-servizzi tagħha u firxa ta’ xenarji futuri potenzjali, li jqisu l-bejgħ għall-għarrieda ta’ riżorsi finanzjarji u tnaqqis rapidu fil-likwidità tas-suq;

(l)

CCP tal-Grad 2 tikser l-Artikolu 43(2) jekk il-fond tal-inadempjenza tagħha msemmi fl-Artikolu 42 u r-riżorsi finanzjarji l-oħrajn tagħha msemmijin fl-Artikolu 43(1) ma jippermettulhiex li tkun tista’ tirreżisti f’kull ħin l-inadempjenza ta’ mill-inqas iż-żewġ membri tal-ikklerjar li għalihom għandha l-akbar espożizzjonijiet taħt kondizzjonijiet tas-suq estremi iżda plawsibbli;

(m)	CCP tal-Grad 2 tikser l-Artikolu 44(1) jekk ma jkollhiex aċċess f’kull ħin għal likwidità adegwata biex twettaq is-servizzi u l-attivitajiet tagħha jew jekk ma tkejjilx ta’ kuljum il-ħtiġijiet potenzjali ta’ likwidità tagħha;

(n)	CCP tal-Grad 2 tikser l-Artikolu 45(1), (2) u (3) jekk ma tużax il-marġini li jiddaħħlu minn membru tal-ikklerjar inadempjenti qabel riżorsi finanzjarji oħra biex jiġi kopert it-telf;

(o)	CCP tal-Grad 2 tikser l-Artikolu 45(4) jekk ma tużax riżorsi proprji ddedikati qabel ma tuża l-kontribuzzjonijiet għall-fond tal-inadempjenza ta’ membri tal-ikklerjar li mhumiex inadempjenti;

(p)

CCP tal-Grad 2 tikser l-Artikolu 46(1) jekk taċċetta kwalunkwe ħaġa oħra għajr kollateral likwidu ħafna b’riskju minimu ta’ kreditu u tas-suq sabiex tkopri l-espożizzjoni inizjali u kontinwa tagħha għall-membri tal-ikklerjar tagħha meta kollateral ieħor ma jkunx permess skont l-att delegat adottat mill-Kummissjoni skont l-Artikolu 46(3);

(q)	CCP tal-Grad 2 tikser l-Artikolu 47(1) jekk tinvesti r-riżorsi finanzjarji tagħha għajr fi flus kontanti jew fi strumenti finanzjarji likwidi ħafna b’riskju minimu tas-suq u ta’ kreditu u li jkunu kapaċi li jiġu llikwidati b’mod rapidu b’effett avvers minimu fuq il-prezz;

(r)

CCP tal-Grad 2 tikser l-Artikolu 47(3) jekk ma tiddepożitax strumenti finanzjarji skjerati bħala marġini jew bħala kontribuzzjonijiet għall-fond tal-inadempjenza ma’ operaturi ta’ sistemi ta’ saldu ta’ titoli li jiżguraw il-protezzjoni sħiħa ta’ dawk l-istrumenti finanzjarji meta dawk ikunu disponibbli, jew jekk ma tużax arranġamenti oħra sikuri ħafna ma’ istituzzjonijiet finanzjarji awtorizzati;

(s)

CCP tal-Grad 2 tikser l-Artikolu 47(4) jekk tagħmel depożiti ta’ flus kontanti għajr permezz ta’ arranġamenti sikuri ħafna ma’ istituzzjonijiet finanzjarji awtorizzati jew inkella permezz tal-użu tal-faċilitajiet permanenti ta’ depożiti tal-banek ċentrali jew mezzi komparabbli oħrajn provduti mill-banek ċentrali;

(t)

CCP tal-Grad 2 tikser l-Artikolu 47(5) jekk tiddepożita assi ma’ parti terza mingħajr ma tiżgura li l-assi li jappartjenu lill-membri tal-ikklerjar ikunu identifikabbli b’mod separat mill-assi li jappartjenu lis-CCP u mill-assi li jappartjenu lil dik il-parti terza permezz ta’ kontijiet b’titoli differenti fil-kotba tal-parti terza jew kwalunkwe miżuri ekwivalenti oħrajn li jilħqu l-istess livell ta’ protezzjoni, jew jekk ma jkollhiex aċċess minnufih għall-istrumenti finanzjarji meta dan ikun meħtieġ;

(u)	CCP tal-Grad 2 tikser l-Artikolu 47(6) jekk tinvesti l-kapital tagħha jew l-ammonti li jirriżultaw mir-rekwiżiti stipulati fl-Artikoli 41 sa 44 fit-titoli tagħha stess jew dawk tal-impriża prinċipali jew sussidjarja tagħha;

(v)

CCP tal-Grad 2 tikser l-Artikolu 48(1) jekk ma jkollhiex proċeduri dettaljati li għandhom jiġu segwiti meta membru tal-ikklerjar ma jikkonformax mar-rekwiżiti ta’ parteċipazzjoni stabbiliti fl-Artikolu 37 fil-limitu taż-żmien u skont il-proċeduri stabbiliti mis-CCP, jew jekk ma tistabbilixxix fid-dettall il-proċeduri li għandhom jiġu segwiti f’każ li l-inadempjenza ta’ membru tal-ikklerjar ma tkunx iddikjarata mis-CCP, jew jekk ma tagħmilx rieżami ta’ dawn il-proċeduri annwalment;

(w)

CCP tal-Grad 2 tikser l-Artikolu 48(2) jekk tonqos milli tieħu azzjoni minnufih biex tillimita t-telf u l-pressjonijiet ta’ likwidità li jirriżultaw minn inadempjenzi tal-membri tal-ikklerjar u milli tiżgura li l-għeluq totali ta’ kwalunkwe pożizzjonijiet tal-membru tal-ikklerjar ma jfixkilx l-operazzjonijiet tagħha jew jesponi lill-membri tal-ikklerjar mhux inadempjenti għal telf li ma jistgħux jantiċipaw jew jikkontrollaw;

(x)	CCP tal-Grad 2 tikser l-Artikolu 48(3) jekk tonqos milli tinforma lill-EMSA minnufih qabel ma tiġi ddikjarata jew skattata l-proċedura ta’ inadempjenza;

(y)

CCP tal-Grad 2 tikser l-Artikolu 48(4) jekk ma tivverifikax li l-proċeduri tal-inadempjenza tagħha huma infurzabbli u ma tiħux il-passi raġonevoli kollha biex tiżgura li jkollha s-setgħat legali biex tillikwida l-pożizzjonijiet proprjetarji tal-membru tal-ikklerjar inadempjenti u biex tittrasferixxi jew tillikwida l-pożizzjonijiet tal-klijent tal-membru tal-ikklerjar inadempjenti;

(z)

CCP tal-Grad 2 tikser l-Artikolu 49(1) jekk ma teżaminax regolarment il-mudelli u l-parametri adottati biex jiġu kkalkolati r-rekwiżiti tal-marġini tagħha, il-kontribuzzjonijiet tal-fond tal-inadempjenza, ir-rekwiżiti tal-kollateral u mekkaniżmi oħra tal-kontroll tar-riskju, u jekk ma tissottoponix il-mudelli għal testijiet tal-istress rigorużi u frekwenti biex tivvaluta r-reżiljenza tagħhom f’kondizzjonijiet tas-suq estremi iżda plawżibbli; jekk ma twettaqx ittestjar retrospettiv biex tivvaluta l-affidabbiltà tal-metodoloġija adottata, jew jekk tonqos milli tikseb validazzjoni indipendenti, jew jekk tonqos milli tinforma lill-AETS bir-riżultati tat-testijiet imwettqa; jew jekk tonqos milli tikseb il-validazzjoni mill-AETS qabel ma tadotta ebda bidla sinifikattiva fil-mudelli u l-parametri fejn l-AETS ma ppermettietx adozzjoni proviżorja ta’ dik il-bidla qabel il-validazzjoni tagħha;

(aa)

CCP tal-Grad 2 tikser l-Artikolu 49(2) jekk ma tittestjax regolarment l-aspetti ewlenin tal-proċeduri tal-inadempjenza tagħha jew jekk tonqos milli tieħu l-passi raġonevoli kollha biex tiżgura li l-membri tal-ikklerjar kollha jifhmuhom u jkollhom fis-seħħ arranġamenti adegwati biex jirrispondu għal każ ta’ inadempjenza;

(ab)	CCP tal-Grad 2 tikser l-Artikolu 50(1) jekk ma tużax, fejn ikun prattiku jew disponibbli, flus tal-bank ċentrali biex issalda t-tranżazzjonijiet tagħha jew jekk ma tiħux passi biex tillimita b’mod strett ir-riskji ta’ saldu bi flus kontanti meta ma jintużawx il-flus tal-bank ċentrali;

(ac)	CCP tal-Grad 2 tikser l-Artikolu 50(3) jekk ma teliminax ir-riskji prinċipali permezz tal-użu ta’ mekkaniżmi ta’ konsenja kontra ħlas sa fejn possibbli, meta dik is-CCP ikollha obbligu li tagħmel jew tirċievi konsenji ta’ strumenti finanzjarji;

(ad)	CCP tal-Grad 2 tikser l-Artikolu 50a jew l-Artikolu 50b jekk ma tikkalkolax KCCP kif speċifikat f’dawk l-Artikoli jew jekk ma timxix mar-regoli għall-kalkolu ta’ KCCP stabbilit fl-Artikoli 50a(2), 50b u 50d;

(ae)	CCP tal-Grad 2 tikser l-Artikolu 50a(3) jekk tikkalkula KCCP inqas minn darba kull tliet xhur jew inqas frekwentement milli rikjest mill-AETS skont l-Artikolu 50a(3);

(af)

CCP tal-Grad 2 tikser l-Artikolu 51(2) jekk ma jkollhiex aċċess mhux diskriminatorju, kemm għad-data li tkun teħtieġ għat-twettiq tal-funzjonijiet tagħha minn ċentru tan-negozjar sal-punt li s-CCP tikkonforma mar-rekwiżiti operazzjonali u tekniċi stabbiliti minn dak iċ-ċentru tan-negozjar u għas-sistema ta’ saldu rilevanti;

(ag)	CCP tal-Grad 2 tikser l-Artikolu 52(1) jekk tidħol f’arranġament dwar l-interoperabbiltà mingħajr ma tissodisfa l-ebda wieħed mir-rekwiżiti stipulati fil-punti (a) sa (d) ta’ dak il-paragrafu;

(ah)	CCP tal-Grad 2 tikser l-Artikolu 53(1) jekk ma tiddistingwix fil-kontijiet l-assi u l-pożizzjonijiet miżmumin għall-kont ta’ CCP li tkun daħlet f’arranġament dwar l-interoperabbiltà magħha;

(ai)	CCP tal-Grad 2 tikser l-Artikolu 54(1) jekk tidħol f’arranġament dwar l-interoperabbiltà mingħajr l-approvazzjoni minn qabel tal-AETS.

IV.

Ksur relatat mat-trasparenza u d-disponibbiltà tad-data:

(a)	CCP tal-Grad 2 tikser l-Artikolu 38(1) jekk ma tiżvelax pubblikament il-prezzijiet u t-tariffi ta’ kull servizz provdut separatament, inkluż skontijiet u ribassi u l-kondizzjonijiet għall-benefiċċju minn tali tnaqqis;

(b)	CCP tal-Grad 2 tikser l-Artikolu 38(1) jekk ma tiżvelax l-informazzjoni dwar il-kostijiet u d-dħul tas-servizzi tagħha lill-AETS;

(c)	CCP tal-Grad 2 tikser l-Artikolu 38(2) jekk ma tiżvelax lill-membri tal-ikklerjar tagħha u lill-klijenti tagħhom ir-riskji assoċjati mas-servizzi pprovduti;

(d)

CCP tal-Grad 2 tikser l-Artikolu 38(3) jekk ma tiżvelax lill-membri tal-ikklerjar tagħha jew lill-AETS l-informazzjoni dwar il-prezz użata għall-kalkolu tal-espożizzjonijiet tagħha fi tmiem il-jum lill-membri tal-ikklerjar tagħha jew jekk ma tiżvelax pubblikament il-volum tat-transazzjonijiet ikklerjati għal kull strument ikklerjat mis-CCP fuq bażi aggregata;

(e)

CCP tal-Grad 2 tikser l-Artikolu 38(4) jekk ma tiżvelax pubblikament ir-rekwiżiti operazzjonali u tekniċi marbutin mal-protokolli tal-komunikazzjoni li jkopru l-formati tal-kontenut u tal-messaġġ li hija tuża fl-interazzjoni ma’ partijiet terzi, inkluż ir-rekwiżiti operazzjonali u tekniċi msemmijin fl-Artikolu 7;

(f)

CCP tal-Grad 2 tikser l-Artikolu 38(5) jekk ma tiżvelax pubblikament kull ksur mill-membri tal-ikklerjar tal-kriterji msemmijin fl-Artikolu 37(1) jew tar-rekwiżiti stipulati fl-Artikolu 38(1), għajr meta l-AETS tikkunsidra li dan l-iżvelar ikun jikkostitwixxi theddida għall-istabbiltà finanzjarja jew il-fiduċja tas-suq jew jipperikola serjament is-swieq finanzjarji jew jikkawża danni sproporzjonati lill-partijiet involuti;

(g)

CCP tal-Grad 2 tikser l-Artikolu 38(6) jekk ma tipprovdix lill-membri tal-ikklerjar tagħha għodda ta’ simulazzjoni sabiex huma jkunu jistgħu jiddeterminaw l-ammont ta’ marġni inizjali addizzjonali, fuq bażi grossa, li s-CCP tkun tista’ teħtieġ mal-ikklerjar ta’ tranżazzjoni ġdida jew jekk tagħmel dik l-għodda aċċessibbli fuq bażi mhux sikura;

(h)	CCP tal-Grad 2 tikser l-Artikolu 38(7) jekk ma tipprovdix lill-membri tal-ikklerjar tagħha informazzjoni dwar il-mudelli ta’ marġni inizjali użati minnha kif dettaljat fil-punti (a), (b) u (c) tat-tieni sentenza ta’ dak il-paragrafu;

(i)	CCP tal-Grad 2 tikser l-Artikolu 39(7) jekk ma tiżvelax pubblikament il-livelli tal-protezzjoni u l-ispejjeż assoċjati mal-livelli differenti ta’ segregazzjoni li hija tipprovdi;

(j)	CCP tal-Grad 2 tikser l-Artikolu 49(3) jekk ma tiżvelax pubblikament aspetti ewlenin fir-rigward tal-mudell tal-immaniġġjar tar-riskji tagħha jew il-preżunzjonijiet adottati għat-twettiq tat-test tal-istress imsemmi fl-Artikolu 49(1);

(k)

CCP tal-Grad 2 tikser l-Artikolu 50(2) jekk ma tiddikjarax b’mod ċar l-obbligi tagħha fir-rigward tal-konsenji ta’ strumenti finanzjarji, inkluż jekk ikollhiex obbligu li tagħmel jew tirċievi konsenja ta’ strument finanzjarju jew li tindennizza lill-parteċipanti għal telf imġarrab fil-proċess tal-konsenja.

(l)	CCP tal-Grad 2 tikser l-Artikolu 50c(1) jekk ma tirrapportax l-informazzjoni msemmija fil-punti (a) sa (e) tal-Artikolu 50c(1) lil dawk il-membri tal-ikklerjar tagħha li huma istituzzjonijiet jew lill-awtoritajiet kompetenti tagħhom;

(m)	CCP tal-Grad 2 tikser l-Artikolu 50c(2) jekk tinnotifika lil dawk il-membri tal-ikklerjar tagħha li huma istituzzjonijiet inqas minn darba kull tliet xhur jew inqas frekwentement milli rikjest mill-AETS skont l-Artikolu 50c(2).

Ksur relatat ma’ ostakli għall-attivitajiet superviżorji:

(a)

CCP tikser l-Artikolu 25f billi tonqos milli tipprovdi informazzjoni bi tweġiba għal deċiżjoni li tirrikjedi informazzjoni skont l-Artikolu 25f(3), jew billi tipprovdi informazzjoni mhux korretta jew qarrieqa bi tweġiba għal talba sempliċi għall-informazzjoni mill-AETS f’konformità mal-Artikolu 25f(2) jew bi tweġiba għal deċiżjoni mill-AETS li tkun teħtieġ l-informazzjoni f’konformità mal-Artikolu 25f(3);

(b)	CCP jew ir-rappreżentanti tagħha jwettqu ksur jekk jipprovdu tweġibiet inkorretti jew li jiżgwidaw għal mistoqsijiet li jkunu saru skont punt (c) tal-Artikolu 25 g(1);

(c)	CCP tikser punt (e) tal-Artikolu 25 g(1) jekk ma tkunx konformi mat-talba tal-AETS għal rekords tat-telefon jew tat-traffiku tad-data;

(d)	CCP tal-Grad 2 twettaq ksur jekk ma tkunx konformi fil-ħin dovut ma’ miżura superviżorja meħtieġa minn deċiżjoni adottata mill-AETS skont l-Artikolu 25q;

(e)	CCP tal-Grad 2 twettaq ksur jekk ma toqgħodx għal spezzjoni fil-post meħtieġa minn deċiżjoni ta’ spezzjoni adottata mill-AETS skont l-Artikolu 25 h.

ANNESS IV

Lista tal-koeffiċjenti marbutin ma’ fatturi aggravanti u mitiganti għall-applikazzjoni tal-Artikolu 25j(3)

Il-koeffiċjenti li ġejjin għandhom ikunu applikabbli, b’mod kumulattiv, għall-ammonti bażiċi msemmijin fl-Artikolu 25j(2):

Koeffiċjenti ta’ aġġustament marbutin ma’ fatturi aggravanti:

(a)	jekk il-ksur jitwettaq ripetutament, għal kull darba li jiġi ripetut, għandu japplika koeffiċjent addizzjonali ta’ 1,1;

(b)	jekk il-ksur jitwettaq għal aktar minn sitt xhur, għandu japplika koeffiċjent addizzjonali ta’ 1,5;

(c)	jekk il-ksur ikun żvela dgħufijiet sistemiċi fl-organizzazzjoni tas-CCP, b’mod partikolari fil-proċeduri, fis-sistemi ta’ ġestjoni jew il-kontrolli interni tagħha, għandu japplika koeffiċjent ta’ 2,2;

(d)	jekk il-ksur ikollu impatt negattiv fuq il-kwalità tal-attivitajiet u s-servizzi tas-CCP, għandu japplika koeffiċjent ta’ 1,5;

(e)	jekk il-ksur twettaq intenzjonalment, għandu japplika koeffiċjent ta’ 2;

(f)	jekk ma ttieħdet l-ebda azzjoni ta’ rimedju minn meta kien identifikat il-ksur, għandu japplika koeffiċjent ta’ 1,7;

(g)	jekk id-diriġenza għolja tas-CCP ma tkunx ikkooperat mal-AETS fit-twettiq tal-investigazzjonijiet tagħha, għandu japplika koeffiċjent ta’ 1,5.

II.

Koeffiċjenti ta’ aġġustament marbutin ma’ fatturi mitiganti:

(a)	jekk il-ksur ikun twettaq għal inqas minn għaxart ijiem ta’ xogħol, għandu jiġi applikat koeffiċjent ta’ 0,9;

(b)	jekk id-diriġenza għolja tas-CCP tista’ turi li ħadet il-miżuri kollha neċessarji biex tipprevjeni l-ksur, għandu japplika koeffiċjent ta’ 0,7;

(c)	jekk is-CCP tkun ġibdet l-attenzjoni tal-AETS għall-ksur malajr, b’mod effettiv u sħiħ, għandu japplika koeffiċjent ta’ 0,4;

(d)	jekk is-CCP tkun ħadet miżuri volontarji biex tiżgura li ksur simili ma jkunx jista’ jseħħ fil-futur, għandu japplika koeffiċjent ta’ 0,6.

”.