(1)

Rekwiżiti prudenzjali robusti huma parti integrali mill-kundizzjonijiet regolatorji li fihom l-istituzzjonijiet finanzjarji jistgħu jipprovdu servizzi fl-Unjoni. Flimkien mal-istituzzjonijiet ta' kreditu, id-ditti tal-investiment huma soġġetti għar-Regolament (UE) Nru 575/2013 tal-Parlament Ewropew u tal-Kunsill (4) u għad-Direttiva 2013/36/UE tal-Parlament Ewropew u tal-Kunsill (5) fir-rigward tat-trattament u tas-superviżjoni prudenzjali tagħhom, filwaqt li l-awtorizzazzjoni tagħhom u rekwiżiti organizzazzjonali u tal-imġiba oħra huma stabbiliti fid-Direttiva 2004/65/KE tal-Parlament Ewropew u tal-Kunsill (6).

(2)

Ir-reġimi prudenzjali eżistenti skont ir-Regolament (UE) Nru 575/2013 u d-Direttiva 2013/36/UE huma fil-parti l-kbira bbażati fuq iterazzjonijiet suċċessivi tal-istandards regolatorji internazzjonali stabbiliti għal gruppi bankarji kbar mill-Kumitat ta' Basel dwar is-Superviżjoni Bankarja u jindirizzaw b'mod parzjali biss ir-riskji speċifiċi inerenti għall-attivitajiet diversi għal għadd kbir ta' ditti tal-investiment. Għaldaqstant, jenħtieġ li l-vulnerabbiltajiet u r-riskji speċifiċi inerenti għal dawn id-ditti tal-investiment jiġu indirizzati b'mod speċifiku permezz ta' arranġamenti prudenzjali xierqa u proporzjonati fil-livell tal-Unjoni.

(3)

Ir-riskji li d-ditti tal-investiment infushom iġarrbu u joħolqu għall-klijenti tagħhom u għas-swieq usa' li joperaw fihom jiddependu fuq in-natura u l-volum tal-attivitajiet tagħhom, inkluż jekk id-ditti tal-investiment jaġixxux bħala aġenti għall-klijenti tagħhom u ma jkunux parti għat-transazzjonijiet li jirriżultaw infushom, jew jekk jaġixxux bħala prinċipali għan-negozji.

(4)

Jenħtieġ li rekwiżiti prudenzjali solidi jiżguraw li d-ditti tal-investiment jiġu ġestiti b'mod ordnat u fl-aħjar interessi tal-klijenti tagħhom. Jenħtieġ li jieħdu f'kunsiderazzjoni l-potenzjal li d-ditti tal-investiment u l-klijenti tagħhom jidħlu għal teħid ta' riskju eċċessiv u l-gradi differenti ta' riskju mġarrab u maħluq mid-ditti tal-investiment. Bl-istess mod, jenħtieġ li r-rekwiżiti prudenzjali jimmiraw li jevitaw li jimponu piż amministrattiv żejjed fuq id-ditti tal-investiment.

(5)

Ħafna mir-rekwiżiti prudenzjali li jirriżultaw mill-qafas tar-Regolament (UE) Nru 575/2013 u d-Direttiva 2013/36/UE huma mfassla biex jindirizzaw ir-riskji komuni affaċċjati mill-istituzzjonijiet ta' kreditu. Għalhekk, ir-rekwiżiti eżistenti huma fil-parti l-kbira kkalibrati biex jippreservaw il-kapaċità ta' self tal-istituzzjonijiet ta' kreditu tul iċ-ċikli ekonomiċi u biex jiġu protetti d-depożitanti u l-kontribwenti minn falliment possibbli, u mhumiex imfassla biex jindirizzaw il-profili tar-riskju differenti kollha tad-ditti tal-investiment. Id-ditti tal-investiment m'għandhomx portafolli kbar ta' self fil-livell tal-konsumatur u korporattiv u ma jiħdux depożiti. Il-probabbiltà li l-falliment tagħhom jista' jkollu impatt detrimentali fuq l-istabbiltà finanzjarja ġenerali hija inqas milli fil-każ tal-istituzzjonijiet ta' kreditu. B'hekk, ir-riskji affaċċjati u maħluqa mill-parti l-kbira tad-ditti tal-investiment huma sostanzjalment differenti mir-riskji affaċċjati u maħluqa mill-istituzzjonijiet ta' kreditu u jenħtieġ li differenza bħal din tkun riflessa b'mod ċar fil-qafas prudenzjali tal-Unjoni.

(6)

Ir-rekwiżiti prudenzjali li għalihom huma suġġetti d-ditti tal-investiment skont ir-Regolament (UE) Nru 575/2013 u d-Direttiva 2013/36/UE huma bbażati fuq dawk tal-istituzzjonijiet ta' kreditu. Id-ditti tal-investiment li l-ambitu tal-awtorizzazzjoni tagħhom hu limitat għal servizzi ta' investiment speċifiċi li mhumiex fil-mira tal-qafas prudenzjali attwali huma soġġetti għal ħafna eżenzjonijiet minn dawk ir-rekwiżiti. Dawk l-eżenzjonijiet jirrikonoxxu li dawk id-ditti tal-investiment ma jġarrbux riskji tal-istess natura bħall-istituzzjonijiet ta' kreditu. Id-ditti tal-investiment li jwettqu attivitajiet li huma fil-mira tal-qafas prudenzjali attwali u li jinvolvu negozjar fi strumenti finanzjarji fuq bażi limitata huma soġġetti għal rekwiżiti korrispondenti tal-qafas f'termini ta' kapital iżda huma eliġibbli għal eżenzjonijiet f'oqsma oħra, bħal-likwidità, l-iskoperturi kbar u l-ingranaġġ. Id-ditti tal-investiment li l-ambitu tal-awtorizzazzjoni tagħhom mhuwiex soġġett għal dawk il-limitazzjonijiet huma soġġetti għall-istess rekwiżiti prudenzjali bħall-istituzzjonijiet ta' kreditu.

(7)

In-negozjar ta' strumenti finanzjarji, kemm għall-finijiet ta' ġestjoni tar-riskju, ta' ħħeġġjar jew ta' ġestjoni tal-likwidità jew għat-teħid ta' pożizzjonijiet direzzjonali dwar il-valur tal-istrumenti maż-żmien, hu attività li fiha kemm l-istituzzjonijiet ta' kreditu kif ukoll id-ditti tal-investiment huma awtorizzati għal negozjar akkont tagħhom infushom u li diġà hu indirizzat mill-qafas prudenzjali tar-Regolament (UE) Nru 575/2013. Għalhekk, sabiex jiġu evitati kundizzjonijiet mhux ekwivalenti ta' kompetizzjoni li jistgħu jwasslu għal arbitraġġ regolatorju bejn l-istituzzjonijiet ta' kreditu u d-ditti tal-investiment f'dan il-qasam, jenħtieġ li r-rekwiżiti tal-fondi proprji li jirriżultaw minn dawk ir-regoli li jindirizzaw ir-riskju jkomplu japplikaw ukoll għal dawk id-ditti tal-investiment. L-iskoperturi ta' dawk id-ditti tal-investiment għall-kontropartijiet tan-negozjar tagħhom fi transazzjonijiet speċifiċi u r-rekwiżiti tal-fondi proprji korrispondenti huma koperti wkoll mir-regoli u, għalhekk, jenħtieġ li jibqgħu japplikaw għad-ditti tal-investiment b'mod issimplifikat. Finalment, ir-regoli dwar l-iskoperturi kbar tal-qafas prudenzjali kurrenti huma rilevanti wkoll meta l-iskoperturi li jiġu nnegozjati ta' dawn id-ditti tal-investiment għal kontropartijiet speċifiċi jkunu partikolarment kbar u b'hekk jiġġeneraw sors ikkonċentrat b'mod eċċessiv ta' riskju għal ditta tal-investiment mill-inadempjenza tal-kontroparti. Għalhekk, jenħtieġ li dawk ir-regoli jkomplu japplikaw għad-ditti tal-investiment b'mod issimplifikat.

(8)

Differenzi fl-applikazzjoni tal-qafas prudenzjali eżistenti fi Stati Membri differenti jheddu l-kundizzjonijiet ekwivalenti ta' kompetizzjoni għad-ditti tal-investiment fl-Unjoni. Dawk id-differenzi jirriżultaw mill-kumplessità ġenerali tal-applikazzjoni tal-qafas għal ditti tal-investiment differenti fuq il-bażi tas-servizzi li jipprovdu, fejn xi awtoritajiet nazzjonali jaġġustaw jew jissimplifikaw it-tali applikazzjoni fil-liġi jew fil-prattika nazzjonali. Billi l-qafas prudenzjali eżistenti ma jindirizzax ir-riskji kollha affaċċjati u maħluqa minn ċerti tipi ta' ditti tal-investiment, ġew applikati supplimentazzjonijiet kapitali kbar għal ċerti ditti tal-investiment f'ċerti Stati Membri. Jenħtieġ li jiġu stabbiliti dispożizzjonijiet uniformi li jindirizzaw dawk ir-riskji biex tiġi żgurata superviżjoni prudenzjali armonizzata tad-ditti tal-investiment madwar l-Unjoni.

(9)

Għaldaqstant hemm bżonn ta' reġim prudenzjali speċifiku għal ditti tal-investiment li mhumiex sistemiċi fid-dawl tad-daqs u tal-interkonnessjoni tagħhom ma' atturi finanzjarji u ekonomiċi oħra. Jenħtieġ li, madankollu, id-ditti sistemiċi tal-investiment jibqgħu soġġetti għall-qafas prudenzjali eżistenti skont ir-Regolament (UE) Nru 575/2013 u d-Direttiva 2013/36/UE. Dawk id-ditti tal-investiment huma subsett ta' ditti tal-investiment li għalihom bħalissa japplika l-qafas stabbilit fir-Regolament (UE) Nru 575/2013 u d-Direttiva 2013/36/UE u li ma jibbenefikawx minn eżenzjonijiet iddedikati minn kwalunkwe wieħed mir-rekwiżiti prinċipali tagħhom. L-akbar u l-aktar ditti tal-investiment interkonnessi għandhom mudelli kummerċjali u profili tar-riskju li huma simili għal dawk ta' istituzzjonijiet ta' kreditu sinifikanti. Dawn jipprovdu servizzi "qishom bankarji" u jissottoskrivu riskji fuq skala sinifikanti. Barra minn hekk, ditti sistemiċi tal-investiment huma kbar biżżejjed, u għandhom mudelli kummerċjali u profili tar-riskju li jirrappreżentaw theddida għall-funzjonament stabbli u ordnat tas-swieq finanzjarji bl-istess mod bħal istituzzjonijiet ta' kreditu kbar. Għalhekk huwa adatt li dawk id-ditti tal-investiment jibqgħu soġġetti għar-regoli stabbiliti fir-Regolament (UE) Nru 575/2013 u d-Direttiva 2013/36/UE.

(10)

Ir-reġim prudenzjali speċifiku għad-ditti tal-investiment li, minħabba d-daqs u l-interkonnessjoni tagħhom ma' atturi finanzjarji u ekonomiċi oħra, mhumiex meqjusa sistemiċi jenħtieġ li jindirizza l-prattiki kummerċjali speċifiċi ta' tipi differenti ta' ditti tal-investiment. Jenħtieġ li d-ditti tal-investiment bl-akbar possibbiltà li jiġġeneraw riskji għall-klijenti, għas-swieq jew għall-funzjonament ordnat tad-ditti tal-investiment infushom ikunu soġġetti għal rekwiżiti prudenzjali ċari u effettivi mfassla għal dawk ir-riskji speċifiċi. Dawk ir-rekwiżiti prudenzjali jenħtieġ li jiġu kkalibrati b'mod proporzjonat għat-tip ta' ditta tal-investiment, għall-aħjar interessi tal-klijenti ta' dak it-tip ta' ditta tal-investiment u għall-promozzjoni tal-funzjonament mexxej u ordnat tas-swieq li fihom jopera dak it-tip ta' ditta tal-investiment. Jenħtieġ li dawn jimmitigaw l-oqsma identifikati ta' riskju u jgħinu fl-iżgurar li, jekk ditta tal-investiment tfalli, din tkun tista' tiġi stralċata b'mod ordnat bi tfixkil minimu għall-istabbiltà tas-swieq finanzjarji.

(11)

Ir-reġim previst f'dan ir-Regolament jenħtieġ li ma jaffettwax l-obbligi ta' produtturi maħtura fis-suq f'ċentri tan-negozjar skont id-Direttiva 2014/65/UE biex jipprovdu kwotazzjonijiet u jkunu preżenti fis-suq fuq bażi kontinwa.

(12)

Ir-reġim prudenzjali għad-ditti tal-investiment li, minħabba d-daqs u l-interkonnessjoni tagħhom ma' atturi finanzjarji u ekonomiċi oħra, mhumiex meqjusa sistemiċi, jenħtieġ li japplika għal kull ditta tal-investiment fuq bażi individwali. Madankollu, sabiex tiġi ffaċilitata l-applikazzjoni tar-rekwiżiti prudenzjali għad-ditti tal-investiment fl-Unjoni li huma parti minn gruppi bankarji, biex jiġi evitat it-tfixkil ta' ċerti mudelli tan-negozju li r-riskji tagħhom huma diġà koperti mill-applikazzjoni tar-regoli prudenzjali, jenħtieġ li d-ditti tal-investiment jkunu jistgħu japplikaw ir-rekwiżiti tar-Regolament (UE) Nru 575/2013 u d-Direttiva 2013/36/UE fejn adegwat, soġġetti għall-approvazzjoni mill-awtoritajiet kompetenti, dment li d-deċiżjoni tagħhom li jagħmlu dan ma tkunx ġejja minn minn skopijiet ta' arbitraġġ regolatorju. Barra minn hekk, billi r-riskji mġarrba minn ditti żgħar u mhux interkonnessi tal-investiment huma limitati fil-parti l-kbira tagħhom, jenħtieġ li dawn jitħallew iħaddmu eżenzjoni mir-rekwiżiti prudenzjali speċifiċi għad-ditti tal-investiment fejn ikunu parti minn grupp bankarju jew grupp ta' ditti tal-investiment bi kwartieri ġenerali u soġġetti għas-superviżjoni konsolidata skont ir-Regolament (UE) Nru 575/2013 u d-Direttiva 2013/36/UE jew skont dan ir-Regolament u d-Direttiva (UE) 2019/2034 tal-Parlament Ewropew u tal-Kunsill (7), kif applikabbli, fl-istess Stat Membru, bħal dawk l-oqsfa prudenzjali jenħtieġ li jkopru dawk ir-riskji f'każijiet bħal dawn.Sabiex jiġi rifless it-trattament eżistenti ta' gruppi tad-ditti tal-investiment skont ir-Regolament (UE) Nru 575/2013 u d-Direttiva 2013/36/UE, għad-ditti tal-investiment li jikkonsistu biss minn ditti tal-investiment, jew fejn il-konsolidazzjoni skont ir-Regolament (UE) Nru 575/2013 ma tapplikax, jenħtieġ li l-impriża prinċipali fi gruppi bħal dawn tintalab tkun konformi mar-rekwiżiti ta' dan ir-Regolament abbażi tas-sitwazzjoni konsolidata tal-grupp. Alternattivament, minflok konsolidazzjoni prudenzjali, fejn gruppi ta' ditti tal-investiment bħal dawn jirriflettu strutturi u profili tar-riskju aktar sempliċi, l-awtoritajiet kompetenti jistgħu jippermettu lill-impriżi prinċipali fil-grupp biex ikollhom kapital suffiċjenti biex jappoġġaw il-valur kontabilistiku tal-parteċipazzjonijiet tiegħu fis-sussidjarji. Meta jagħmlu parti minn grupp ta' assigurazzjoni, id-ditti tal-investiment żgħar u mhux interkonnessi jenħtieġ li jitħallew ukoll jagħmlu użu minn eżenzjoni minn rekwiżiti ta' divulgazzjoni.

(13)

Sabiex id-ditti tal-investiment ikunu jistgħu jkomplu jibbażaw fuq il-fondi proprji eżistenti tagħhom biex jissodisfaw ir-rekwiżiti tal-fondi proprji tagħhom skont il-qafas prudenzjali speċifiku għad-ditti tal-investiment, jenħtieġ li d-definizzjoni u l-kompożizzjoni tal-fondi proprji jiġu allinjati mar-Regolament (UE) Nru 575/2013. Dan jinkludi tnaqqis sħiħ tal-entrati tal-karta bilanċ u mill-fondi proprji f'konformità mar-Regolament (UE) Nru 575/2013, bħal assi ta' taxxa differita u parteċipazzjonijiet ta' strumenti kapitali ta' entitajiet oħra tas-settur finanzjarju. Madankollu, jenħtieġ li d-ditti tal-investiment jkunu jistgħu jeżentaw parteċipazzjonijiet mhux sinifikanti ta' strumenti kapitali f'entitajiet tas-settur finanzjarju mit-tnaqqis jekk jinżammu għal skopijiet ta' negozjar biex jappoġġaw il-ġenerazzjoni tas-suq f'dawn l-istrumenti. Sabiex il-kompożizzjoni tal-fondi proprji tiġi allinjata mar-Regolament (UE) Nru 575/2013, il-proporzjonijiet korrispondenti tat-tipi tal-fondi proprji ġew riflessi fil-kuntest ta' dan ir-Regolament. Sabiex jiġi żgurat li r-rekwiżiti jkunu proporzjonati man-natura, l-ambitu u l-kumplessità tal-attivitajiet tad-ditti tal-investiment u li huma faċilment aċċessibbli għad-ditti tal-investiment f'dan ir-Regolament, il-Kummissjoni jenħtieġ li tirrieżamina l-adegwatezza li jitkompla l-allinjament tad-definizzjoni u l-kompożizzjoni tal-fondi proprji ma' dak tar-Regolament (UE) Nru 575/2013.

(14)

Sabiex jiġi żgurat li d-ditti tal-investiment dejjem ikunu jistgħu joperaw fuq il-bażi tal-livell tal-fondi proprji meħtieġ għall-awtorizzazzjoni tagħhom, jenħtieġ li, f'kull waqt, id-ditti tal-investiment jissodisfaw rekwiżit kapitali minimu permanenti daqs il-kapital inizjali meħtieġ għall-awtorizzazzjoni biex iwettqu s-servizzi ta' investiment rilevanti stabbiliti f'konformità mad-Direttiva (UE) 2019/2034.

(15)

Sabiex tiġi żgurata applikazzjoni sempliċi tar-rekwiżit tal-fondi proprji minimu għal ditti tal-investiment żgħar u mhux interkonnessi, jenħtieġ li dawn ikollhom fondi proprji li jlaħħaq mal-ogħla bejn ir-rekwiżit kapitali minimu permanenti tagħhom jew kwart tal-ispejjeż ġenerali fissi tagħhom imkejla fuq il-bażi tal-attività tagħhom tas-sena preċedenti. Id-ditti tal-investiment żgħar u mhux interkonnessi li jippreferu jeżerċitaw aktar kawtela u jevitaw effetti ta' preċipizju fil-każ ta' riklassifikazzjoni jenħtieġ li ma jiġux imwaqqfa milli jżommu fondi proprji f'eċċess ta', jew japplikaw miżuri li jkunu aktar stretti minn dawk meħtieġa minn dan ir-Regolament.

(16)

Biex jingħata kont lir-riskji akbar ta' ditti tal-investiment li mhumiex żgħar u mhux interkonnessi, jenħtieġ li r-rekwiżit tal-fondi proprji minimu għal tali ditti jkun is-somma tal-ogħla tar-rekwiżit tal-fondi proprji minimu tagħhom, kwart mill-ispejjeż ġenerali fissi tagħhom għas-sena preċedenti, jew inkella s-somma tar-rekwiżit tagħhom skont is-sett ta' fatturi tar-riskju mfassla għad-ditti tal-investiment ("fatturi-K") li jistabbilixxi l-kapital b'rabta mar-riskji fil-linji ta' azzjoni speċifiċi tad-ditti tal-investiment.

(17)

Jenħtieġ li d-ditti tal-investiment jitqiesu li huma żgħar u mhux interkonnessi għal-finijiet tar-rekwiżiti prudenzjali speċifiċi għad-ditti tal-investiment meta ma jwettqux servizzi ta' investiment li jġorru riskju għoli għall-klijenti, għas-swieq jew għalihom stess u li d-daqs tagħhom ifisser li għandhom anqas probabbiltà li jikkawżaw impatti negattivi mifruxa għall-klijenti u għas-swieq jekk jimmaterjalizzaw riskji inerenti fin-negozju tagħhom jew jekk ifallu. Għalhekk, jenħtieġ li ditti tal-investiment żgħar u mhux interkonnessi jiġu ddefiniti bħala dawk li ma jinnegozjawx f'isimhom jew li jġarrbu riskju min-negozjar ta' strumenti finanzjarji, m'għandhomx assi jew flus ta' klijenti, għandhom assi kemm taħt immaniġġar ta' portafolli diskrezzjonali u arranġamenti mhux diskrezzjonali (ta' konsulenza) ta' anqas minn EUR 1,2 biljun, jimmaniġġaw anqas minn EUR 100 miljun kull jum f'ordnijiet tal-klijenti f'negozji fi flus jew anqas minn EUR 1 biljun kull jum ta' ordnijiet tal-klijenti f'derivati, u għandhom karta tal-bilanċ iżgħar minn EUR 100 miljun inkluż elementi li ma jidhrux fuq il-karta tal-bilanċ u dħul annwali gross totali mit-twettiq tas-servizzi ta' investiment tagħhom ta' anqas minn EUR 30 miljun.

(18)

Sabiex jiġi evitat arbitraġġ regolatorju u biex jitnaqqsu l-inċentivi għad-ditti tal-investiment biex jirristrutturaw l-operazzjonijiet tagħhom biex jevitaw milli jaqbżu l-livelli limitu li jekk jaqbżuhom ma jikkwalifikawx bħala ditti tal-investiment żgħar u mhux interkonnessi, il-livelli limitu għall-assi mmaniġġati, għall-ordnijiet tal-klijenti mmaniġġati, għad-daqs tal-karta tal-bilanċ u għad-dħul annwali gross totali jenħtieġ li jiġu applikati fuq bażi kkombinata għad-ditti tal-investiment kollha li huma parti mill-istess grupp. Il-kondizzjonijiet l-oħrajn, jiġifieri jekk ditta tal-investiment iżżommx flus tal-klijenti, tamministrax jew tissalvagwardjax assi tal-klijenti, jew tinnegozjax strumenti finanzjarji u ġġarrabx riskju tas-suq jew tal-kontroparti, huma binarji u ma jħallu ebda lok għat-tali ristrutturar, u għalhekk, jenħtieġ li jiġu vvalutati fuq bażi individwali. Sabiex jiġu koperti l-mudelli kummerċjali li qed jevolvu u r-riskji li jirrappreżentaw fuq bażi kontinwa, dawk il-kondizzjonijiet u l-livelli limitu jenħtieġ li jiġu vvalutati fuq bażi ta' tmiem il-jum bl-eċċezzjoni taż-żamma ta' flus tal-klijenti, li jenħtieġ li tiġi vvalutata fuq bażi ta' dakinhar u d-daqs tal-karta tal-bilanċ u d-dħul annwali gross totali, li jenħtieġ li jiġu vvalutati fuq il-bażi tas-sitwazzjoni tad-ditta tal-investiment fi tmiem is-sena finanzjarja preċedenti.

(19)

Ditta tal-investiment li taqbeż il-livelli limitu regolatorji jew tonqos milli tissodisfa l-kondizzjonijiet l-oħra jenħtieġ li ma tkunx meqjusa bħala waħda żgħira u mhux interkonnessa u jenħtieġ li tiġi soġġetta għar-rekwiżiti għad-ditti tal-investiment l-oħra, soġġetti għad-dispożizzjonijiet transizzjonali speċifiċi stabbiliti f'dan ir-Regolament. Jenħtieġ li dan jinkuraġġixxi lid-ditti tal-investiment biex jippjanaw l-attivitajiet kummerċjali tagħhom biex jikkwalifikaw biċ-ċar bħala ditti tal-investiment żgħar u mhux interkonnessi. Għal ditta tal-investiment li ma tissodisfax ir-rekwiżiti biex titqies bħala żgħira u mhux interkonnessa bl-għan li tikkwalifika għat-tali trattament, jenħtieġ li tiġi pprovduta fażi ta' monitoraġġ fejn dik id-ditta tal-investiment tissodisfa l-kondizzjonijiet u tibqa' f'livelli anqas mil-livelli limitu rilevanti għal mill-inqas sitt xhur konsekuttivi.

(20)

Jenħtieġ li d-ditti tal-investiment kollha jikkalkolaw ir-rekwiżit tal-fondi proprji tagħhom b'referenza għal sett ta' fatturi-K li jkopru r-Riskju Għall-Klijent ("RtC"), ir-Riskju għas-Suq ("RtM") u r-Riskju għad-Ditta ("RtF"). Il-fatturi-K taħt l-RtC ikopru assi mmaniġġati tal-klijenti u pariri kontinwi (K-AUM), flus tal-klijenti miżmuma (K-CMH), assi ssalvagwardjati u amministrati (K-ASA) u ordnijiet tal-klijenti mmaniġġati (K-COH).

(21)

Il-fattur-K taħt l-RtM ikopri r-riskju ta' pożizzjoni netta (K-NPR) f'konformità mad-dispożizzjonijiet dwar ir-riskju tas-suq tar-Regolament (UE) Nru 575/2013 jew, meta permess mill-awtorità kompetenti għal tipi speċifiċi ta' ditti tal-investiment li jinnegozjaw f'isimhom permezz ta' membri tal-ikklerjar, fuq il-bażi ta' marġini totali rikjesti minn membru tal-ikklerjar ta' ditta tal-investiment (K-CMG). Jenħtieġ li ditti tal-investiment ikollhom l-għażla li japplikaw simultanjament K-NPR u K-CMG abbażi tal-portafoll.

(22)

Il-fatturi-K taħt l-RtF ikopru l-iskopertura ta' ditta tal-investiment għall-inadempjenza tal-kontropartijiet tan-negozjar tagħhom (K-TCD) f'konformità mad-dispożizzjonijiet issimplifikati għar-riskju ta' kreditu tal-kontroparti fuq il-bażi tar-Regolament (UE) Nru 575/2013, ir-riskju tal-konċentrazzjoni fi skoperturi kbar ta' ditta tal-investiment għal kontropartijiet speċifiċi fuq il-bażi tad-dispożizzjonijiet ta' dak ir-Regolament li japplikaw għal skoperturi kbar fil-portafoll tan-negozjar (K-CON), u riskji operazzjonali mill-fluss ta' negozjar ta' kuljum ta' ditta tal-investiment (K-DTF).

(23)

Ir-rekwiżit tal-fondi proprji kumplessiv taħt il-fatturi-K hu s-somma tar-rekwiżiti tal-fatturi-K skont l-RtC, l-RtM u l-RtF. K-AUM, K-ASA, K-CMH, K-COH u K-DTF huma relatati mal-volum ta' attività li jsir riferiment għalih minn kull fattur-K. Il-volumi għal K-CMH, K-ASA, u K-DTF huma kkalkolati fuq il-bażi ta' medja riportata mid-disa' xhur preċedenti. Il-volum għal K-COH huwa kkalkolat fuq il-bażi ta' medja riportata mis-sitt xhur preċedenti, filwaqt li għall-K-AUM il-kalkolu hu bbażat fuq il-15-il xahar preċedenti. Il-volumi huma mmultiplikati bil-koeffiċjenti korrispondenti stabbiliti f'dan ir-Regolament biex jiġi ddeterminat ir-rekwiżit tal-fondi proprji. Ir-rekwiżiti tal-fondi proprji għal K-NPR huma dderivati mir-Regolament (UE) Nru 575/2013, filwaqt li r-rekwiżiti tal-fondi proprji għal K-CON u għal K-TCD jużaw applikazzjoni ssimplifikata tar-rekwiżiti korrispondenti skont dak ir-Regolament għat-trattament ta' skoperturi kbar fil-portafoll tan-negozjar u tar-riskju ta' kreditu tal-kontroparti, rispettivament. L-ammont ta' fattur-K hu żero jekk ditta tal-investiment ma twettaqx l-attività rilevanti.

(24)

Il-fatturi-K taħt l-RtC huma indikaturi li jkopru l-linji ta' azzjoni tad-ditti tal-investiment li minnhom jista' jiġi supponut li jiġi ġġenerat dannu għall-klijenti jekk jinqalgħu problemi. K-AUM ikopri r-riskju ta' dannu għall-klijenti minn immaniġġar diskrezzjonali żbaljat tal-portafolli tal-klijenti jew eżekuzzjoni dgħajfa u jipprovdi serħan il-moħħ u l-klijent jibbenefika f'termini tal-kontinwità tas-servizz tal-immaniġġar ta' portafolli fis-seħħ u tal-pariri dwar l-investimenti. K-ASA jkopri r-riskju ta' salvagwardja u ta' amministrazzjoni tal-assi tal-konsumaturi, u jiżgura li d-ditti tal-investiment iżommu kapital proporzjonat għat-tali bilanċi, indipendentement minn jekk dawn ikunux fuq il-karta tal-bilanċ tagħha stess jew segregati f'kontijiet ta' partijiet terzi. K-CMH ikopri r-riskju ta' potenzjal ta' dannu meta ditta tal-investiment iżżomm il-flus tal-klijenti tagħha, b'kont meħud ta' jekk humiex fuq il-karta tal-bilanċ tagħha stess jew segregati f'kontijiet ta' partijiet terzi u arranġamenti oħra skont il-liġi nazzjonali applikabbli, dment li l-flus tal-klijenti jkunu salvagwardjati fil-każ ta' falliment, insolvenza, jew dħul f'riżoluzzjoni jew amministrazzjoni tad-ditta tal-investiment. K-CMH jeskludi flus tal-klijenti li huma depożitati fuq kont tal-bank (tal-kustodju) f'isem il-klijent innifsu, meta d-ditta tal-investiment ikollha aċċess għall-flus tal-klijenti permezz ta' mandat ta' parti terza. K-COH ikopri r-riskju potenzjali għall-klijenti ta' ditta tal-investiment li teżegwixxi l-ordnijiet (f'isem il-klijent, u mhux f'isem id-ditta tal-investiment infisha), pereżempju bħala parti mis-servizzi ta' eżekuzzjoni biss għall-klijenti jew meta ditta tal-investiment tkun parti minn katina għall-ordnijiet tal-klijenti.

(25)

Il-fattur-K għall-RtM għad-ditti tal-investiment li jinnegozjaw f'isimhom hu bbażat fuq ir-regoli għar-riskju tas-suq għal pożizzjonijiet fi strumenti finanzjarji, f'munita barranija, u f'komoditajiet f'konformità mar-Regolament (UE) Nru 575/2013. Dan jippermetti lid-ditti tal-investiment biex jagħżlu li japplikaw l-approċċ standardizzat, l-approċċ standardizzat alternattiv skont ir-Regolament (UE) Nru 575/2013, jew l-għażla li jużaw mudelli interni, ladarba dawk iż-żewġ approċċi tal-aħħar isiru applikabbli għal istituzzjonijiet tal-kreditu mhux biss għal skopijiet ta' rappurtar iżda wkoll għal skopijiet ta' rekwiżiti tal-fondi proprji. Sadanittant, u għall-inqas matul il-ħames snin ta' wara d-data tal-applikazzjoni ta’ dan ir-Regolament, jenħtieġ li d-ditti tal-investiment japplikaw il-qafas tar-riskju tas-suq (approċċ standardizzat jew, jekk applikabbli, mudelli interni) tar-Regolament (UE) Nru 575/2013 għall-iskop tal-kalkolu tal-K-NPR tagħhom. Jekk id-dispożizzjonijiet stipulati fil-Kapitoli 1a u 1b tat-Titolu IV tal-Parti Tlieta tar-Regolament (UE) Nru 575/2013 kif emendat bir-Regolament (UE) 2019/876 tal-Parlament Ewropew u tal-Kunsill (8) ma jsirux applikabbli għall-istituzzjonijiet ta' kreditu għal skopijiet ta' rekwiżiti tal-fondi proprji, jenħtieġ li d-ditti tal-investiment ikomplu japplikaw ir-rekwiżiti stabbiliti fit-Titolu IV tal-Parti Tlieta tar-Regolament (UE) Nru 575/2013 għall-iskop tal-kalkolu tal-K-NPR tagħhom. Alternattivament, ir-rekwiżit tal-fondi proprji tad-ditti tal-investiment li jinnegozjaw fi strumenti finanzjari b'pożizzjonijiet li huma soġġetti għall-ikklerjar jista', soġġett għall-approvazzjoni tal-awtorità kompetenti u għal ċerti kondizzjonijiet, ikun daqs l-ammont ta' marġini totali rikjesti mill-membru tal-ikklerjar tagħhom, immultiplikat b'multiplikatur fiss. Jenħtieġ li l-użu tal-K-CMG ikun predikat primarjament fuq attività ta' negozjar tad-ditta tal-investiment li taqa' b'mod sħiħ jew sostanzjalment taħt dan l-approċċ. Madankollu, l-awtorità kompetenti tad-ditta tal-investiment tista' wkoll tippermetti lid-ditta tal-investiment biex tagħmel użu parzjali tal-approċċ K-CMG, dment li dan l-approċċ jintuża għall-pożizzjonijiet kollha li huma soġġetti għall-ikklerjar jew il-proviżjonament ta' marġni u li jiġi applikat wieħed mill-metodi alternattivi għall-K-NPR għal portafolli li mhumiex soġġetti għall-ikklerjar. Sabiex jiġi żgurat li r-rekwiżiti jkunu proporzjonati għan-natura, l-iskop u l-kumplessità tal-attivitajiet tad-ditti tal-investiment u li huma faċilment aċċessibbli għad-ditti tal-investiment f'dan ir-Regolament, jenħtieġ li kwalunkwe rieżami li jsir sussegwentement dwar l-applikazzjoni tal-metodi għall-kalkolu tal-fatturi-K jinkludi l-adegwatezza li l-kalkolu tal-KNPR ikompli jiġi allinjat mar-regoli għar-riskju tas-suq għal pożizzjonijiet tal-portafoll tan-negozjar fi strumenti finanzjarji, f'munita barranija, u f'komoditajiet f'konformità mar-Regolament (UE) Nru 575/2013.

(26)

Għad-ditti tal-investiment li jinnegozjaw f'isimhom stess, il-fatturi-K għal K-TCD u għal K-CON skont l-RtF jikkostitwixxu applikazzjoni ssimplifikata tar-regoli stabbiliti fir-Regolament (UE) Nru 575/2013 dwar ir-riskju ta' kreditu tal-kontroparti u r-riskju ta' skopertura kbira, rispettivament. K-TCD ikopri r-riskju għal ditta tal-investiment minn kontropartijiet għal derivati barra l-Borża (OTC), fi transazzjonijiet ta' riakkwist, fi transazzjonijiet ta' għoti jew ta' teħid b'self ta' titoli u ta' komoditajiet, fi transazzjonijiet b'saldu fit-tul, fi transazzjonijiet ta' self b'marġini, kull transazzjoni ta' finanzjament tat-titoli oħra, kif ukoll mir-riċevituri ta' self mogħti mid-ditta tal-investiment fuq bażi anċillari bħala parti minn servizz ta' investiment li jonqsu milli jissodisfaw l-obbligi tagħhom, billi jimmultiplika l-valur tal-iskoperturi, fuq il-bażi tal-kost ta' sostituzzjoni u supplimentazzjoni għal skopertura futura potenzjali, bil-fatturi ta' riskju bbażati fuq ir-Regolament (UE) Nru 575/2013, b'kunsiderazzjoni tal-effetti ta' mitigazzjoni tan-netting effettiv u tal-iskambju ta' kollateral. Sabiex jiġi allinjat aktar it-trattament tar-riskju ta' kreditu tal-kontroparti mar-Regolament (UE) Nru 575/2013, jenħtieġ li jiżdiedu wkoll multiplikatur fiss ta' 1,2 u multiplikatur għall-aġġustament tal-valwazzjoni tal-kreditu (CVA) biex il-valur attwali tas-suq tar-riskju ta' kreditu tal-kontroparti jiġi rifless fid-ditta tal-investiment fi transazzjonijiet speċifiċi. K-CON ikopri r-riskju tal-konċentrazzjoni b'rabta ma' kontropartijiet individwali jew ferm konnessi mis-settur privat li magħhom id-ditti jkollhom skoperturi akbar minn 25 % tal-fondi proprji tagħhom, jew livelli limitu alternattivi speċifiċi b'rabta mal-istituzzjonijiet ta' kreditu jew ma' ditti tal-investiment oħra, billi jimponi supplimentazzjoni kapitali f'konformità mar-Regolament (UE) Nru 575/2013 għal skoperturi eċċessivi ogħla minn dawk il-limiti. Finalment, K-DTF ikopri r-riskji operazzjonali għal ditta tal-investiment f'volumi kbar ta' negozji konklużi f'isimha stess jew għal klijenti għan-nom tagħha stess f'jum wieħed li jistgħu jirriżultaw minn proċessi, nies u sistemi interni inadegwati jew li fallew jew minn avvenimenti esterni, fuq il-bażi tal-valur nozzjonali tan-negozji ta' kuljum, aġġustati għaż-żmien sal-maturità tad-derivati tar-rati tal-interess sabiex jiġu limitati ż-żidiet fir-rekwiżiti tal-fondi proprji, b'mod partikolari għal kuntratti ta' terminu qasir fejn ir-riskji operazzjonali perċepiti huma aktar baxxi.

(27)

Jenħtieġ li d-ditti tal-investiment kollha jimmonitorjaw u jikkontrollaw ir-riskju tal-konċentrazzjoni tagħhom, inkluż fir-rigward tal-klijenti tagħhom. Madankollu, ditti tal-investiment li huma soġġetti għal rekwiżit tal-fondi proprji minimu biss skont il-fatturi-K jenħtieġ li jirrapportaw lill-awtoritajiet kompetenti dwar ir-riskji tal-konċentrazzjoni tagħhom. Għal ditti tal-investiment speċjalizzati f'derivati ta' komoditajiet bi skoperturi kkonċentrati kbar għal kontropartijiet mhux finanzjarji, il-limiti għar-riskju tal-konċentrazzjoni jistgħu jinqabżu mingħajr kapital addizzjonali taħt K-CON dment li huma jaqdu skopijiet kummerċjali, ta' teżor jew ta' ġestjoni tar-riskju.

(28)

Jenħtieġ li d-ditti tal-investiment kollha jkollhom proċeduri interni biex jissorveljaw u jimmaniġġaw ir-rekwiżiti ta' likwidità tagħhom. Dawk il-proċeduri huma maħsuba biex jgħinu fl-iżgurar li d-ditti tal-investiment ikunu jistgħu jiffunzjonaw b'mod ordnat maż-żmien, mingħajr il-ħtieġa li titwarrab il-likwidità b'mod speċifiku għal żminijiet ta' stress. Għal dak l-għan, jenħtieġ li d-ditti tal-investiment kollha jżommu minimu ta' terz mir-rekwiżit tal-ispejjeż ġenerali fissi tagħhom f'assi likwidi f'kull waqt. Madankollu, jenħtieġ li l-awtoritajiet kompetenti jkunu jistgħu jeżentaw ditti tal-investiment żgħar u mhux interkonnessi minn dak ir-rekwiżit. Jenħtieġ li dawk l-assi likwidi jkunu ta' kwalità għolja u allinjati ma' dawk elenkati fir-Regolament Delegat tal-Kummissjoni (UE) 2015/61 (9), flimkien mat-telf impost li japplika għal dawn l-assi skont dak ir-Regolament Delegat. Biex jingħata kont tad-differenza fil-profili tal-likwidità tad-ditti tal-investiment meta mqabbla mal-istituzzjonijiet ta' kreditu, il-lista ta' assi likwidi adegwati jenħtieġ li tiġi ssupplimentata mill-flus proprji mhux mirhuna u depożiti għal terminu qasir tad-ditta tal-investiment (li jenħtieġ li ma tinkludi ebda flus tal-klijenti jew strumenti finanzjarji li jappartjenu għall-klijenti), u ċerti strumenti finanzjarji li għalihom hemm suq likwidu. Jekk mhux eżenti minn rekwiżiti tal-likwidità, ditti tal-investiment żgħar u mhux interkonnessi, kif ukoll ditti tal-investiment li mhumiex liċenzjati biex iwettqu attivitajiet ta' negozjar jew sottoskrizzjoni, jistgħu jinkludu wkoll entrati relatati mad-debituri tan-negozju u tariffi jew kummissjonijiet riċevibbli fi żmien 30 jum bħala assi likwidi, dment li dawn l-entrati ma jaqbżux it-terz tar-rekwiżit minimu tal-likwidità, li ma jgħoddux għal kwalunkwe rekwiżit addizzjonali tal-likwidità impost mill-awtorità kompetenti, u li dawn ikunu soġġetti għal telf impost ta' 50 %. F'ċirkustanzi eċċezzjonali, id-ditti tal-investiment jenħtieġ li jitħallew jaqgħu f'livell anqas mil-livell limitu meħtieġ billi jimmonetizzaw l-assi likwidi tagħhom biex ikopru r-rekwiżiti ta' likwidità, dment li jinnotifikaw lill-awtorità kompetenti tagħhom minnufih. Il-garanziji finanzjarji kollha pprovduti lill-klijenti li jistgħu jwasslu għal ħtiġijiet ta' likwidità akbar jekk skattati jenħtieġ li jnaqqsu l-ammont ta' assi likwidi disponibbli b'mill-inqas 1.6 % tal-valur totali tat-tali garanziji. Sabiex jiġi żgurat li r-rekwiżiti jkunu proporzjonati għan-natura, l-iskop u l-kumplessità tal-attivitajiet tad-ditti tal-investiment u li huma faċilment aċċessibbli għad-ditti tal-investiment fil-kamp ta' applikazzjoni ta' dan ir-Regolament, jenħtieġ li jsir sussegwentement rieżami dwar l-adegwatezza tal-assi likwidi li huma eliġibbli li jilħqu r-rekwiżit tal-likwidità minimu, inkluż l-allinjament kontinwu ma' dawk elenkati fir-Regolament Delegat (UE) 2015/61, flimkien mat-telf impost li japplika għal dawk l-assi skont ir-Regolament Delegat.

(29)

Jenħtieġ li jiġi żviluppat qafas ta' rapportar regolatorju korrispondenti proporzjonat flimkien mar-reġim prudenzjali l-ġdid u jenħtieġ li dan jitfassal bir-reqqa għan-negozju tad-ditti tal-investiment u għar-rekwiżiti tal-qafas prudenzjali. Jenħtieġ li l-obbligi ta' rapportar għad-ditti tal-investiment jikkonċernaw il-livell u l-kompożizzjoni tal-fondi proprji tagħhom, ir-rekwiżiti tal-fondi proprji tagħhom stess, il-bażi għall-kalkolu tar-rekwiżiti kapitali tagħhom, il-profil tal-attività u d-daqs tagħhom b'rabta mal-parametri għall-kunsiderazzjoni tad-ditti tal-investiment bħala żgħar u mhux interkonnessi, ir-rekwiżiti ta' likwidità tagħhom u l-aderenza tagħhom għad-dispożizzjonijiet dwar ir-riskju tal-konċentrazzjoni. Jenħtieġ li ditti tal-investiment żgħar u mhux interkonnessi jiġu eżentati mir-rapportar dwar ir-riskju ta' konċentrazzjoni u jenħtieġ li jkunu mitluba jirrapportaw dwar ir-rekwiżiti tal-likwidità biss fejn tali rekwiżiti japplikaw għalihom. Jenħtieġ li l-Awtorità Superviżorja Ewropea (l-Awtorità Bankarja Ewropea) stabbilit mir-Regolament (UE) Nru 1093/2010 tal-Parlament Ewropew u tal-Kunsill (10) (ABE) tiżviluppa abbozz ta' standards tekniċi ta' implimentazzjoni biex tispeċifika ulterjorment il-mudelli u l-arranġamenti dettaljati għal dak ir-rapportar regolatorju u biex tispeċifika il-mudelli għall-iżvelar tal-fondi proprji. Jenħtieġ li dawk l-istandards ikunu proporzjonati għall-iskala u għall-kumplessità ta' ditti tal-investiment differenti u jenħtieġ li, b'mod partikolari, jqisu jekk id-ditti tal-investiment għandhomx jitqiesu bħala żgħar u mhux interkonnessi.

(30)

Sabiex jipprovdu trasparenza lill-investituri tagħhom u lis-swieq usa', id-ditti tal-investiment li mhumiex meqjusa bħala żgħar u mhux interkonnessi jenħtieġ li jiddivulgaw pubblikament il-livelli ta' fondi proprji, ir-rekwiżiti tal-fondi proprji, l-arranġamenti ta' governanza, u l-politiki u l-prattiki ta' remunerazzjoni tagħhom. Jenħtieġ li ditti tal-investiment żgħar u mhux interkonnessi ma jkunux soġġetti għal rekwiżiti ta' divulgazzjoni pubblika, ħlief meta dawn joħorġu strumenti tal-Grad 1 Addizzjonali biex jipprovdu trasparenza lill-investituri f'dawn l-istrumenti.

(31)

Jenħtieġ li d-ditti tal-investiment japplikaw politiki ta' remunerazzjoni newtrali fir-rigward tas-sessi f'konformità mal-prinċipju stabbilit fl-Artikolu 157 tat-Trattat dwar il-Funzjonament tal-Unjoni Ewropea (TFUE). Jenħtieġ li jsiru xi kjarifiki dwar id-divulgazzjonijiet tar-remunerazzjoni. Ir-rekwiżiti tad-divulgazzjoni li jirrigwardaw ir-remunerazzjoni stabbilita f'dan ir-Regolament jenħtieġ li jkunu kompatibbli mal-għanijiet tar-regoli tar-remunerazzjoni, prinċipalment sabiex jiġu stabbiliti u jinżammu, għal kategoriji tal-persunal li l-attivitajiet professjonali tagħhom ikollhom impatt materjali fuq il-profil tar-riskju tad-ditti tal-investiment, politiki u prattiki ta' remunerazzjoni li jkunu konsistenti mal-ġestjoni effikaċi tar-riskji. Barra minn hekk, id-ditti tal-investiment li jibbenefikaw minn deroga minn ċerti regoli dwar ir-remunerazzjoni jenħtieġ li jintalbu jiddivulgaw informazzjoni li tikkonċerna din id-deroga.

(32)

Sabiex tiġi ffaċilitata transizzjoni mingħajr problemi għal ditti tal-investiment, mir-rekwiżiti tar-Regolament (UE) Nru 575/2013 u d-Direttiva 2013/36/UE għar-rekwiżiti skont dan ir-Regolament u d-Direttiva (UE) 2019/2034, huwa xieraq li jiġu previsti miżuri transizzjonali xierqa. B'mod partikolari, għal perijodu ta' ħames snin mid-data tal-applikazzjoni ta' dan ir-Regolament, ditti tal-investiment li għalihom ir-rekwiżiti tal-fondi proprji skont dan ir-Regolament ikunu aktar mid-doppju meta mqabbel mar-rekwiżit tal-fondi proprji tagħhom skont ir-Regolament (UE) Nru 575/2013 u d-Direttiva 2013/36/UE jenħtieġ li jkunu jistgħu jimmitigaw l-effetti ta' żidiet potenzjali billi jillimitaw ir-rekwiżit tal-fondi proprji għad-doppju tar-rekwiżit tal-fondi proprji rilevanti tagħhom skont ir-Regolament (UE) Nru 575/2013 u d-Direttiva 2013/36/UE.

(33)

Sabiex ma jkunx hemm żvantaġġ ġdid għad-ditti tal-investiment ġodda bi profili simili għad-ditti tal-investiment eżistenti, id-ditti tal-investiment li qatt ma kienu soġġetti għar-rekwiżiti kapitali skont ir-Regolament (UE) Nru 575/2013 u d-Direttiva 2013/36/UE jenħtieġ li jkunu jistgħu jillimitaw ir-rekwiżiti tal-fondi proprji tagħhom skont dan ir-Regolament għad-doppju tal-ispejjeż ġenerali fissi tagħhom għal perijodu ta' ħames snin mid-data tal-applikazzjoni ta' dan ir-Regolament.

(34)

Bl-istess mod, id-ditti tal-investiment li kienu soġġetti biss għal rekwiżit kapitali inizjali skont ir-Regolament (UE) Nru 575/2013 u d-Direttiva 2013/36/UE u li għalihom ir-rekwiżiti tal-fondi proprji skont dan ir-Regolament ser jiżdiedu b'aktar mid-doppju meta mqabbla mas-sitwazzjoni tagħhom skont ir-Regolament (UE) Nru 575/2013 u d-Direttiva 2013/36/UE, jenħtieġ li jkunu jistgħu jillimitaw ir-rekwiżit kapitali tagħhom skont dan ir-Regolament għad-doppju tar-rekwiżit kapitali inizjali tagħhom skont ir-Regolament (UE) Nru 575/2013 u d-Direttiva 2013/36/UE għal perijodu ta' ħames snin mid-data tal-applikazzjoni ta' dan ir-Regolament, bl-eċċezzjoni tad-ditti lokali msemmija fil-punt (2)(b) tal-Artikolu 4(1) tar-Regolamnet (UE) Nru 575/2013, kif emendat bir-Regolament (UE) 2019/876, li jenħtieġ li jkunu soġġetti għal rekwiżit tal-fondi proprji transizzjonali speċifiku li jirrifletti l-livell akbar ta' riskju tagħhom. Għall-finijiet tal-proporzjonalità, jenħtieġ ukoll li jiġu pprovduti rekwiżiti tal-fondi proprji transizzjonali speċifiċi għal ditti tal-investiment iżgħar u dawk li jipprovdu firxa limitata ta' servizzi ta' investiment fil-każ li ma jibbenefikawx minn limitazzjoni tar-rekwiżiti tal-fondi proprji skont dan ir-Regolament għad-doppju tar-rekwiżiti tal-kapital inizjali skont ir-Regolament (UE) Nru 575/2013, kif emendat bir-Regolament (UE) 2019/630 tal-Parlament Ewropew u tal-Kunsill (11), u d-Direttiva 2013/36/UE, kif emendata bid-Direttiva (UE) 2019/878 tal-Parlament Ewropew u tal-Kunsill (12) iżda li r-rekwiżit tal-fondi proprji kapitali vinkolanti tagħhom skont dan ir-Regolament jiżdied meta mqabbel mas-sitwazzjoni tagħhom skont ir-Regolament (UE) Nru 575/2013, kif emendat bir-Regolament (UE) 2019/630.

(35)

Dawk il-miżuri tranżizzjonali jenħtieġ, meta applikabbli, li jkunu disponibbli wkoll għad-ditti tal-investiment imsemmija fl-Artikolu 498 tar-Regolament (UE) Nru 575/2013 li jeżenta lil dawk id-ditti tal-investiment mir-rekwiżiti ta' fondi proprji skont dak ir-Regolament, għax ir-rekwiżiti għall-kapital inizjali fir-rigward ta' dawn id-ditti tal-investiment jiddependi fuq is-servizzi jew l-attivitajiet ta' investiment li jipprovdu. Għal perijodu ta' ħames snin mid-data ta' applikazzjoni ta' dan ir-Regolament, ir-rekwiżiti tal-fondi proprji tagħhom skont id-dispożizzjonijiet tranżizzjonali ta' dan ir-Regolament jenħtieġ li jkunu kkalkulati fuq dawk il-livelli applikabbli.

(36)

Għal perijodu ta' ħames snin mid-data tal-applikazzjoni ta' dan ir-Regolament, jew sad-data tal-applikazzjoni tal-bidliet adottati skont ir-Regolament (UE) Nru 575/2013 u d-Direttiva 2013/36/UE dwar ir-rekwiżiti tal-fondi proprji għar-riskju tas-suq skont il-Kapitoli 1a u 1b tat-Titolu IV tal-Parti Tlieta tar-Regolament (UE) Nru 575/2013, kif emendat bir-Regolament (UE) 2019/876, skont liema jiġi l-aħħar, ditti tal-investiment soġġetti għad-dispożizzjonijiet korrispondenti ta' dan ir-Regolament jenħtieġ li jibqgħu jikkalkulaw ir-rekwiżit tal-fondi proprji tagħhom fil-portafoll tan-negozjar skont ir-Regolament (UE) Nru 575/2013, kif emendat bir-Regolament (UE) 2019/630.

(37)

L-akbar ditti tal-investiment li jipprovdu servizzi importanti tas-suq tal-operaturi u servizzi bankarji importanti ta' investiment (in-negozjar akkont tagħhom infushom fi strumenti finanzjarji jew is-sottoskrizzjoni għal strumenti finanzjarji jew it-tqegħid ta' strumenti finanzjarji fuq bażi ta' impenn sod) għandhom mudelli kummerċjali u profili tar-riskju li huma simili għal dawk ta' istituzzjonijiet ta' kreditu sinifikanti. L-attivitajiet tagħhom jiskopruhom għar-riskju ta' kreditu, primarjament fil-forma ta' riskju ta' kreditu tal-kontroparti kif ukoll ta' riskju tas-suq għal pożizzjonijiet li jieħdu għalihom stess, b'rabta mal-klijenti u anki jekk le. B'hekk, dawn jippreżentaw riskju għall-istabbiltà finanzjarja, minħabba d-daqs u l-importanza sistemika tagħhom.

(38)

Dawk id-ditti tal-investiment il-kbar jippreżentaw sfida addizzjonali fir-rigward tas-superviżjoni prudenzjali effettiva tagħhom mill-awtoritajiet nazzjonali kompetenti. Għad li l-akbar ditti tal-investiment jipprovdu servizzi bankarji ta' investiment b'mod transfruntier fuq skala sinifikanti, bħala ditti tal-investiment dawn huma soġġetti għal superviżjoni prudenzjali mill-awtoritajiet maħtura skont id-Direttiva 2014/65/UE, li mhux bilfors ikunu l-istess awtoritajiet kompetenti bħal dawk maħtura taħt id-Direttiva 2013/36/UE. Dan jista' jirriżulta f'kundizzjonijiet mhux ekwivalenti ta' kompetizzjoni fl-applikazzjoni tar-Regolament (UE) Nru 575/2013 u tad-Direttiva 2013/36/UE fl-Unjoni u jipprevjeni lis-superviżuri milli jiksbu perspettiva prudenzjali ġenerali li hi essenzjali għall-indirizzar effettiv tar-riskji assoċjati ma' ditti ta-investiment transfruntiera kbar. Konsegwentement, is-superviżjoni prudenzjali tista' ssir anqas effettiva u tista' anke tfixkel il-kompetizzjoni fl-Unjoni. Għaldaqstant, jenħtieġ li l-akbar ditti tal-investiment jingħataw l-istatus ta' istituzzjonijiet ta' kreditu biex joħolqu sinerġiji fir-rigward tas-superviżjoni tal-attivitajiet transfruntiera tas-suq tal-operaturi fi grupp ta' pari, biex jiġu promossi kundizzjonijiet ekwivalenti ta' kompetizzjoni, u tkun tista' ssir superviżjoni konsistenti bejn il-gruppi.

(39)

Dawk id-ditti tal-investiment, bis-saħħa li ser isiru istituzzjonijiet ta' kreditu, jenħtieġ għalhekk li jibqgħu jkunu suġġetti għar-Regolament (UE) Nru 575/2013 u d-Direttiva 2013/36/UE u jkunu soġġetti għas-superviżjoni mill-awtoritajiet kompetenti, inkluż mill-Bank Ċentrali Ewropew fil-qafas tal-Mekkaniżmu Superviżorju Uniku, inkarigat mill-istituzzjonijiet ta' kreditu. Dan jiżgura li s-superviżjoni prudenzjali tal-istituzzjonijiet ta' kreditu tiġi implimentata b'mod koerenti u effikaċi, u li l-ġabra unika ta' regoli għas-servizzi finanzjarji tiġi applikata bl-istess mod għall-istituzzjonijiet ta' kreditu kollha fid-dawl tal-importanza sistemika tagħhom. Sabiex jiġi evitat l-arbitraġġ regolatorju u jitnaqqsu r-riskji ta' ċirkomvenzjoni, jenħtieġ li l-awtoritajiet kompetenti jagħmlu ħilithom biex jevitaw sitwazzjonijiet fejn gruppi potenzjalment sistemiċi jistrutturaw l-operazzjonijiet tagħhom b'tali mod li ma jaqbżux il-limiti stabbiliti fil-punt (1)(b) tal-Artikolu 4(1) tar-Regolament (UE) Nru 575/2013 u jevitaw l-obbligu li jiksbu awtorizzazzjoni bħala istituzzjonijiet ta' kreditu skont l-Artikolu 8a tad-Direttiva 2013/36/UE.

(40)

Jenħtieġ li d-ditti tal-investiment il-kbar konvertiti f'istituzzjonijiet ta' kreditu jitħallew jieħdu depożiti jew fondi ripagabbli oħra mingħand il-pubbliku u jagħtu krediti għall-kont tagħhom biss ladarba jkunu kisbu l-awtorizzazzjoni għal dawk l-attivitajiet f'konformità mad-Direttiva 2013/36/UE. It-twettiq ta' dawn l-attivitajiet kollha, inkluż li jittieħdu depożiti jew fondi ripagabbli oħra mill-pubbliku u l-għoti ta' krediti għall-kont tagħhom stess, jenħtieġ li ma jkunx rekwiżit meħtieġ sabiex l-impriżi jitqiesu bħala istituzzjonijiet ta' kreditu. Għalhekk, jenħtieġ li l-bidla fid-definizzjoni ta' istituzzjoni ta' kreditu introdotta b'dan ir-Regolament tkun mingħajr preġudizzju għar-reġimi nazzjonali ta' awtorizzazzjoni implimentati mill-Istati Membri f'konformità mad-Direttivi 2013/36/UE u (UE) 2019/2034, inkluż kwalunkwe dispożizzjoni li l-Istati Membri jistgħu jikkunsidraw adatta għall-fini li jiġu ċċarati l-attivitajiet li ditti tal-investiment kbar li jaqgħu taħt id-definizzjoni emendata ta' istituzzjonijiet ta' kreditu huma permessi li jibdew.

(41)

Barra minn hekk, is-superviżjoni tal-istituzzjonijiet ta' kreditu fuq bażi kkonsolidata timmira li tiżgura, fost l-oħrajn, l-istabbiltà tas-sistema finanzjarja u, sabiex tkun effettiva, jenħtieġ li tiġi applikata għall-gruppi kollha, inkluż dawk li l-impriża prinċipali tagħhom ma tkunx istituzzjoni ta' kreditu jew ditta tal-investiment. Għalhekk, l-istituzzjonijiet ta' kreditu kollha, inkluż dawk li qabel kellhom l-istatus ta' ditti tal-investiment, jenħtieġ li jkunu soġġetti għar-regoli dwar is-superviżjoni individwali u konsolidata tal-impriża prinċipali mill-awtoritajiet kompetenti skont it-Taqsima I tal-Kapitolu 3 tat-Titolu VII tad-Direttiva 2013/36/UE.

(42)

Barra minn hekk, huwa possibbli li ditti tal-investiment kbar li mhumiex ta' importanza sistemika iżda li jinnegozjaw akkont tagħhom infushom, li jissottoskrivu strumenti finanzjarji jew li jqiegħdu strumenti finanzjarji fuq bażi ta' impenn sod ikollhom mudelli kummerċjali u profili tar-riskju li huma simili għal dawk ta' istituzzjonijiet sistemiċi oħra. Minħabba d-daqs u l-attivitajiet tagħhom, huwa possibbli li tali ditti tal-investiment jippreżentaw xi riskji għall-istabbiltà finanzjarja u, minkejja li l-konverżjoni tagħhom f'istituzzjonijiet ta' kreditu mhijiex meqjusa adegwata fid-dawl tan-natura u l-kumplessità tagħhom, jenħtieġ li huma jibqgħu soġġetti għall-istess trattament prudenzjali bħall-istituzzjonijiet ta' kreditu. Sabiex jiġi evitat arbitraġġ regolatorju u jitnaqqsu r-riskji ta' ċirkomvenzjoni, jenħtieġ li l-awtoritajiet kompetenti jfittxu wkoll li jevitaw sitwazzjonijiet fejn id-ditti tal-investiment jistrutturaw l-operazzjonijiet tagħhom b'tali mod li ma jaqbżux il-limitu massimu ta' EUR 15-il biljun relatat mal-valur totali tal-assi fil-livelli individwali jew ta' grupp, jew li jillimitaw bla bżonn id-diskrezzjoni tal-awtoritajiet kompetenti biex jissoġġettaw id-ditti tal-investiment għar-rekwiżiti tar-Regolament (UE) Nru 575/2013 u għall-konformità mar-rekwiżiti prudenzjali stabbiliti fid-Direttiva 2013/36/UE, f'konformità mal-Artikolu 5 tad-Direttiva (UE) 2019/2034.

(43)

Ir-Regolament (UE) Nru 600/2014 tal-Parlament Ewropew u tal-Kunsill (13) introduċa reġim armonizzat tal-Unjoni għall-għoti ta' aċċess għal ditti tal-pajjiżi terzi li jipprovdu servizzi ta' investiment u attivitajiet lil kontropartijiet eliġibbli u lil klijenti professjonali li huma stabbiliti fl-Unjoni. L-aċċess għas-suq intern huwa kondizzjonali fuq li l-Kummissjoni tadotta deċiżjoni ta' ekwivalenza u li l-Awtorità Superviżorja Ewropea (Awtorità Ewropea tat-Titoli u s-Swieq) STABBILITA Bir-Regolament (UE) Nru 1095/2010 tal-Parlament Ewropew u tal-Kunsill (14) (ESMA) tirreġistra lid-ditta mill-pajjiż terz. Huwa importanti li l-valutazzjoni tal-ekwivalenza ssir fuq il-bażi tal-liġi applikabbli rilevanti tal-Unjoni u li jkun hemm l-għodda effettivi biex jimmonitorjaw li l-kondizzjonijiet li fihom tkun ingħatat l-ekwivalenza. Għal dawn ir-raġunijiet, ditti reġistrati minn pajjiżi terzi jenħtieġ li jkunu meħtieġa jirrapportaw kull sena lill-ESMA informazzjoni dwar l-iskala u l-ambitu tas-servizzi pprovduti u l-attivitajiet imwettqa fl-Unjoni. Kooperazzjoni superviżorja fir-rigward tal-monitoraġġ, l-infurzar u t-twettiq tal-kundizzjonijiet ta' ekwivalenza jenħtieġ li titjieb ukoll.

(44)

Bil-għan li jiġu żgurati kundizzjonijiet ekwivalenti ta' kompetizzjoni u tiġi promossa t-trasparenza tas-suq tal-Unjoni, ir-Regolament (UE) Nru 600/2014 jenħtieġ li jiġi emendat sabiex jissoġġetta l-kwotazzjonijiet tal-internalizzaturi sistemiċi, it-titjib fil-prezzijiet u l-prezzijiet ta' eżekuzzjoni għar-reġim tad-daqs tal-fluttwazzjonijiet meta jinnegozjaw bid-daqsijiet kollha. Konsegwentement, jenħtieġ li l-istandards tekniċi regolatorji applikabbli attwalment relatati mar-reġim ta' daqs tal-fluttwazzjonijiet japplikaw ukoll għall-kamp ta' applikazzjoni estiż tar-Regolament (UE) Nru 600/2014.

(45)

Biex tiġi żgurata l-protezzjoni tal-investitur u l-integrità u l-istabilità tas-swieq finanzjarji fl-Unjoni, il-Kummissjoni, meta tadotta deċiżjoni ta' ekwivalenza, jenħtieġ li tqis ir-riskji potenzjali li joħolqu s-servizzi u l-attivitajiet li d-ditti minn pajjiż terz jistgħu jwettqu fl-Unjoni wara dik id-deċiżjoni. L-importanza sistemika tagħhom jenħtieġ titqies abbażi ta' kriterji bħalma huma l-iskala u l-ambitu probabbli tal-forniment ta' servizz u ta' twettiq ta' attivitajiet mid-ditti mill-pajjiż terz ikkonċernat. Għall-istess għan, jenħtieġ li l-Kummissjoni tkun tista' tqis jekk pajjiż terz huwiex identifikat bħala ġurisdizzjoni li ma tikkooperax għal skopijiet ta' taxxa skont il-politika rilevanti tal-Unjoni jew bħala pajjiż terz b'riskju għoli skont l-Artikolu 9(2) tad-Direttiva (UE) 2015/849 tal-Parlament Ewropew u tal-Kunsill (15). Jenħtieġ li l-Kummissjoni tikkunsidra rekwiżiti speċifiċi prudenzjali, organizzazzjonali jew tal-kondotta tan-negozju bħala ekwivalenti biss meta jinkiseb l-istess effett. Barra minn hekk, jenħtieġ li l-Kummissjoni tkun tista', fejn adegwat, tadotta deċiżjonijiet ekwivalenti limitati għal servizzi u attivitajiet speċifiċi jew kategoriji ta' servizzi u attivitajiet kif elenkati fit-Taqsima A tal-Anness I għad-Direttiva 2014/65/UE.

(46)

L-ABE, bil-parteċipazzjoni tal-ESMA, ħarġet rapport ibbażat fuq analiżi ta' sfond, ġbir ta' data u konsultazzjoni dettaljati għal reġim prudenzjali ppersonalizzat għad-ditti mhux sistemiċi kollha tal-investiment li jservi bħala l-bażi għall-qafas prudenzjali rivedut għad-ditti tal-investiment.

(47)

Sabiex tiġi żgurata l-applikazzjoni armonizzata ta' dan ir-Regolament, jenħtieġ li l-ABE tiżviluppa abbozz ta' standards tekniċi regolatorji biex tispeċifika l-ambitu u l-metodi għall-konsolidazzjoni prudenzjali tal-gruppi ta' ditti tal-invetiment, il-kalkolu tal-ispejjeż ġenerali fissi, il-kejl tal-fatturi-K, l-ispeċifikar tal-kunċett tal-kontijiet segregati fir-rigward tal-flus tal-klijenti, l-aġġustament tal-koeffiċjenti għal K-DTF f'każijiet ta’ kundizzjonijiet ta' stress tas-suq, il-kalkolu għall-istabbiliment ta' rekwiżiti ta' fondi proprji daqs il-marġni totali rikjest mill-membri tal-ikklerjar, il-mudelli għad-divulgazzjonijiet pubbliċi inkluż fir-rigward tal-politika tal-investiment tad-ditti tal-investiment u għar-rapportar regolatorju meħtieġa skont dan ir-Regolament u l-informazzjoni li għandha tiġi pprovduta lill-awtoritajiet kompetenti relatata mal-limiti massimi biex tkun rikjesta awtorizzazzjoni bħala istituzzjoni ta' kreditu. Jenħtieġ li l-Kummissjoni jkollha s-setgħa li tissupplimenta dan ir-Regolament billi tadotta l-istandards tekniċi regolatorji żviluppati mill-ABE permezz ta' atti delegati skont l-Artikolu 290 TFUE u f'konformità mal-Artikoli 10 sa 14 tar-Regolament (UE) Nru 1093/2010. Il-Kummissjoni u l-ABE jenħtieġ li jiżguraw li dawk l-istandards tekniċi regolatorji jistgħu jiġu applikati mid-ditti tal-investiment kollha kkonċernati b'mod li jkun proporzjonat man-natura, l-iskala u l-kumplessità ta' dawk id-ditti tal-investiment u l-attivitajiet tagħhom.

(48)

Il-Kummissjoni jenħtieġ li jkollha wkoll is-setgħa li tadotta l-istandards tekniċi ta' implimentazzjoni żviluppati mill-ABE u mill-ESMA permezz ta' atti ta' implimentazzjoni skont l-Artikolu 291 TFUE u f'konformità mal-Artikolu 15 tar-Regolament (UE) Nru 1093/2010 u l-Artikolu 15 tar-Regolament (UE) Nru 1095/2010.

(49)

Sabiex tiġi żgurata l-applikazzjoni uniformi ta' dan ir-Regolament u biex jitqiesu l-iżviluppi fis-swieq finanzjarji, jenħtieġ li s-setgħa li tadotta atti skont l-Artikolu 290 TFUE tiġi ddelegata lill-Kummissjoni tissupplimenta dan ir-Regolament billi tiċċara d-definizzjonijiet f'dan ir-Regolament. Huwa ta' importanza partikolari li l-Kummissjoni twettaq konsultazzjonijiet xierqa matul il-ħidma ta' tħejjija tagħha, anke fil-livell ta' esperti, u li dawk il-konsultazzjonijiet jitwettqu f'konformità mal-prinċipji stabbiliti fil-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet (16). B'mod partikolari, biex tiġi żgurata parteċipazzjoni ugwali fit-tħejjija ta' atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta' atti delegati.

(50)

Sabiex tiġi żgurata ċertezza legali u jiġu evitati duplikazzjonijiet bejn il-qafas prudenzjali attwali applikabbli kemm għall-istituzzjonijiet ta' kreditu kif ukoll għad-ditti tal-investiment u dan ir-Regolament, ir-Regolament (UE) Nru 575/2013 u d-Direttiva 2013/36/UE jenħtieġ li jiġu emendati biex id-ditti tal-investiment jitneħħew mill-kamp ta' applikazzjoni tagħhom. Madankollu, ditti tal-investiment li huma parti minn grupp bankarju jenħtieġ li jibqgħu soġġetti għad-dispożizzjonijiet tar-Regolament (UE) Nru 575/2013 u tad-Direttiva 2013/36/UE li huma rilevanti għall-grupp bankarju, bħad-dispożizzjonijiet dwar impriża prinċipali intermedja tal-UE msemmija fl-Artikolu 21b tad-Direttiva 2013/36/UE u r-regoli dwar il-konsolidament prudenzjali stipulati fil-Kapitolu 2 tat-Titolu II tal-Ewwel Parti tar-Regolament (UE) Nru 575/2013.

(51)

Minħabba li l-għan ta' dan ir-Regolament, jiġifieri li jwaqqaf qafas prudenzjali effettiv u proporzjonat biex jiġi żgurat li d-ditti tal-investiment li huma awtorizzati joperaw fl-Unjoni joperaw fuq bażi finanzjarjament solida u huma ġestiti b'mod ordnat inkluż, fejn rilevanti, fl-aħjar interessi tal-klijenti tagħhom, ma jistax jinkiseb b'mod suffiċjenti mill-Istati Membri iżda jista', minħabba l-iskala u l-effetti tiegħu jinkiseb aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F'konformità mal-prinċipju ta' proporzjonalità, kif stabbilit f'dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-għan,