REGOLAMENT DELEGAT TAL-KUMMISSJONI (UE) 2019/1681

tal-1 ta’ Awwissu 2019

li jemenda r-Regolament (UE) Nru 692/2011 tal-Parlament Ewropew u tal-Kunsill dwar l-istatistika Ewropea dwar it-turiżmu, fir-rigward tal-iskadenzi għat-trażmissjoni u l-adattament tal-Annessi I u II

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 692/2011 tal-Parlament Ewropew u tal-Kunsill tas-6 ta’ Lulju 2011 dwar l-istatistika Ewropea dwar it-turiżmu u li jħassar id-Direttiva tal-Kunsill 95/57/KE (1), u b’mod partikolari l-Artikolu 3(2) u l-Artikolu 9(5) tiegħu,

Billi:

(1)	Ir-Regolament (UE) Nru 692/2011 jistabbilixxi l-iskadenzi għat-trażmissjoni tal-istatistika Ewropea dwar it-turiżmu.

(2)

It-tempestività hija element essenzjali tal-kwalità tal-istatistika uffiċjali, u l-iżvilupp tekniku jippermetti lill-awtoritajiet tal-istatistika jipproduċu data b’inqas dewmien. Għalhekk jenħtieġ jitqassru l-iskadenzi għat-trażmissjoni tad-data ta’ kull xahar dwar l-okkupazzjoni tal-istabbilimenti tal-akkomodazzjoni turistika, filwaqt li jitqiesu l-prattiki tal-ġbir tad-data eżistenti fl-Istati Membri.

(3)

Il-ġlieda kontra l-istaġunalità tibqa’ azzjoni kruċjali għall-awtoritajiet pubbliċi u l-operaturi ekonomiċi fil-qasam tat-turiżmu fil-livell nazzjonali, reġjonali u ta’ destinazzjoni. Għalhekk, id-data ta’ kull xahar dwar l-iljieli mqattgħin fl-istabbilimenti tal-akkomodazzjoni turistika jenħtieġ tiġi trażmessa fil-livell reġjonali.

(4)

It-turiżmu huwa wieħed mill-oqsma ekonomiċi li jikkontribwixxu għall-opportunitajiet kif ukoll għall-isfidi tal-bliet Ewropej, u jkejjel ir-rilevanza tat-turiżmu għall-iżvilupp ta’ bliet individwali, kif ukoll jikkontribwixxi għal valutazzjoni komparattiva, analiżi u tfassil ta’ strateġiji tal-iżvilupp rilevanti. Għalhekk jenħtieġ tiġi trażmessa data dwar l-iljieli mqattgħin fl-istabbilimenti tal-akkomodazzjoni turistika fi bliet kbar jew intensivi fit-turiżmu.

(5)

It-turiżmu huwa kontributur ewlieni għall-ekonomija blu b’potenzjal qawwi għal impjiegi u tkabbir sostenibbli, u t-turiżmu kostali jista’ jiġi analizzat aħjar għal gradi differenti ta’ urbanizzazzjoni taż-żona. Għalhekk jenħtieġ tiġi trażmessa data dwar l-iljieli mqattgħin fl-istabbilimenti tal-akkomodazzjoni turistika li b’mod konġunt tanalizza n-natura kostali jew mhux kostali u l-grad ta’ urbanizzazzjoni.

(6)

It-turiżmu huwa attività ekonomika fejn id-deċiżjonijiet dwar il-provvista u d-domanda spiss isiru fil-livell ta’ destinazzjoni, lil hinn mil-livell tar-reġjuni NUTS 2 li għalihom id-data hija disponibbli bir-Regolament (UE) Nru 692/2011. Għalhekk, id-data dwar l-iljieli mqattgħin fl-istabbilimenti tal-akkomodazzjoni turistika jenħtieġ tiġi trażmessa fil-livell ta’ reġjuni NUTS 3.

(7)

Id-Direttiva (UE) 2015/2302 tal-Parlament Ewropew u tal-Kunsill tal-25 ta’ Novembru 2015 dwar il-vjaġġi kollox kompriż (package travel) u arranġamenti tal-ivvjaġġar marbuta (2) tapplika għall-pakketti offruti għall-bejgħ jew mibjugħa minn kummerċjanti lil vjaġġaturi u għal arranġamenti tal-ivvjaġġar konness li jiġu ffaċilitati minn kummerċjanti lil vjaġġaturi.

(8)

L-offerta u l-użu ta’ servizzi tal-akkomodazzjoni u t-trasport permezz ta’ pjattaformi online jistgħu jagħtu għażla akbar lill-klijenti u joħolqu opportunitajiet intraprenditorjali ġodda għan-negozji u ċ-ċittadini, li jiġġeneraw effetti sekondarji pożittivi u negattivi; u l-fenomenu jista’ jitkejjel mill-perspettiva tad-domanda permezz tal-qafas għall-istatistika Ewropea dwar it-turiżmu. Għalhekk jenħtieġ isiru adattamenti għall-varjabbli u għall-ikkategorizzar tal-vjaġġi turistiċi.

(9)	Għalhekk ir-Regolament (UE) Nru 692/2011 jenħtieġ jiġi emendat skont dan, filwaqt li ma jkunx jimponi piżijiet amministrattivi addizzjonali sinifikanti fuq l-Istati Membri u fuq dawk li jwieġbu,

ADOTTAT DAN IR-REGOLAMENT:

Artikolu 1

Ir-Regolament (UE) Nru 692/2011 huwa emendat kif ġej:

(1)

Fl-Artikolu 9, il-paragrafu (4) jinbidel b’dan li ġej:

“4. L-Istati Membri għandhom jittrażmettu:

(a)	id-data validata annwali mniżżla fit-Taqsimiet 1 u 2 tal-Anness I fi żmien sitt (6) xhur wara tmiem il-perjodu ta’ referenza, sakemm mhux speċifikat mod ieħor fl-Anness I;

(b)	id-data validata ta’ kull xahar elenkata fit-Taqsima 2 tal-Anness I fi żmien tmien (8) ġimgħat wara tmiem il-perjodi ta’ referenza għas-snin ta’ referenza 2020 u 2021, u fi żmien sitt (6) ġimgħat wara tmiem il-perjodu ta’ referenza mis-sena ta’ referenza 2022;

(c)	id-data validata mniżżla fit-Taqsima 4 tal-Anness I fi żmien disa’ (9) xhur wara tmiem il-perjodu ta’ referenza, jekk l-Istat Membru kkonċernat jagħżel li jittrażmettiha;

(d)	id-data validata mniżżla fl-Anness II fi żmien sitt (6) xhur wara tmiem il-perjodu ta’ referenza.”;

(2)

L-Anness I huwa emendat kif ġej:

(a)

fit-Taqsima 2, il-punt “A. Il-varjabbli u l-ikkategorizzar li għandhom jiġu trażmessi għad-data annwali”, huwa emendat kif ġej:

(i)

l-ewwel ringiela tat-tabella taħt “(1) Fil-livell NUTS 2 reġjonali u fil-livell nazzjonali”, hija sostitwita b’dan li ġej:

Tip ta’ akkomodazzjoni

Varjabbli

Ikkategorizzar

“Total (kull tip ta’ stabbilimenti tal-akkomodazzjoni turistika)

In-numru tal-iljieli mqattgħin minn residenti fl-istabbilimenti tal-akkomodazzjoni turistika

In-numru tal-iljieli mqattgħin minn dawk mhux residenti fl-istabbilimenti tal-akkomodazzjoni turistika

Tip ta’ lokalità (a) u (b)

Reġjuni tal-livell NUTS 3

Xhur tas-sena ta’ referenza [fakultattivi jekk il-livell NUTS 2 ikun ikopri l-Istat Membru kollu]”

(ii)

fit-Tabella “(2) Fil-livell nazzjonali”, tiżdied ir-ringiela li ġejja fuq:

Tip ta’ akkomodazzjoni

Varjabbli

Ikkategorizzar

“Total (kull tip ta’ stabbilimenti tal-akkomodazzjoni turistika)

In-numru tal-iljieli mqattgħin minn residenti fl-istabbilimenti tal-akkomodazzjoni turistika

In-numru tal-iljieli mqattgħin minn dawk mhux residenti fl-istabbilimenti tal-akkomodazzjoni turistika

Tip ta’ lokalità (a) flimkien ma’ Tip ta’ lokalità (b)

Bliet”

(b)	il-punt “D. Indikaturi fundamentali rapidi” jitħassar;

(c)

fit-Taqsima 3 jiżdied il-punt F li ġej:

“F. Bliet

Il-bliet li għalihom għandha tiġi trasmessa d-data għandhom ikunu skont l-Artikolu 4b(3) tar-Regolament (KE) Nru 1059/2003 u għandhom jinkludu mill-inqas:

—	lil dawk il-bliet li, flimkien, jammontaw għal 90 % tal-iljieli mqattgħin kull sena f’akkomodazzjoni turistika fil-bliet tal-pajjiż;

—	il-belt kapitali;

—	il-bliet kollha b’200 000 abitant jew aktar.

Għal dan il-għan, il-bliet huma l-unità amministrattiva lokali (LAU) fejn mill-inqas 50 % tal-popolazzjoni tgħix f’ċentri urbani; ċentru urban huwa raggruppament ta’ ċelloli kontigwi tal-grilja ta’ 1 km2 b’densità ta’ mill-inqas 1 500 abitant għal kull km2 u lkoll flimkien jilħqu popolazzjoni ta’ mill-inqas 50 000 abitant. Il-Kummissjoni (Eurostat) flimkien mal-Istati Membri għandha taġġorna l-lista tal-bliet b’mod regolari. L-Istati Membri għandhom jittrażmettu d-data għall-aktar lista riċenti tal-ibliet disponibbli fil-31 ta’ Diċembru tas-sena ta’ referenza.”;

(3)

Fl-Anness II, it-Taqsima 2, il-punt “A. Varjabbli li jridu jiġu trażmessi”, ir-ringieli 8 sa 15 tat-tabella, jiġu sostitwiti b’dan li ġej:

Varjabbli

Kategoriji li għandhom jiġu trażmessi

Perjodiċità

“8.

Mezz ewlieni tat-trasport

(a)	Bl-ajru (servizzi ta’ titjira, titjira skedata jew mikrija, jew servizzi tal-ajru oħrajn)

(b)	Bl-ilma (bħal linji tal-passiġġieri u laneċ, kruċjieri, dgħajjes tad-divertiment, bastimenti mikrijin)

(c)

Ferrovija

(d)	Xarabank, kowċ (regolari/skedati jew okkażjonali/mhux skedati)

(d1)	[fakultattiva] Xarabank jew kowċ regolari/skedata

(d2)	[fakultattiva] Xarabank jew kowċ okkażjonali/mhux skedata

(e)	Vettura motorizzata privata (proprjetà jew mikrija it-tul, inkluż il-karozza ta’ ħbieb/qraba)

(f)	Vettura motorizzata mikrija (inklużi pjattaformi ta’ ride-sharing jew car-sharing)

(g)	Oħrajn (pereżemju bir-rota)

Annwali

Mezz ewlieni tal-akkomodazzjoni

(a)	Akkommodazzjoni mikrija: lukandi jew akkomodazzjoni simili

(b)	Akkommodazzjoni mikrija: siti ta’ kampeġġ, karavan jew parkeġġi tat-trejlers (mhux residenzjali)

(c)	Akkommodazzjoni mikrija: bħal dar, villa, appartament; kamra jew kmamar mikrija f’residenza

(d)	Akkommodazzjoni mikrija: akkomodazzjoni oħra mikrija (bħal hostels taż-żgħażagħ, marinas, stabbilimenti tas-saħħa)

(e)	Akkomodazzjoni mhux mikrija: villeġġjatura privata

(f)	Akkomodazzjoni mhux mikrija: Akkommodazzjoni pprovduta mingħajr ħlas minn qraba jew ħbieb

(g)	Akkomodazzjoni mhux mikrija: Akkomodazzjoni mhux mikrija ta’ tip ieħor

Annwali

10.

L-ibbukkjar tal-vjaġġ: ibbukkjar bl-Internet tal-mezz ewlieni tal-akkomodazzjoni

(a)

Iva

(b)

Triennali

11.

L-ibbukkjar tal-vjaġġ: il-mod tal-ibbukkjar għall-mezz ewlieni tal-akkomodazzjoni

(a)	Direttament mal-fornitur tal-akkomodazzjoni

(b)	Permezz ta’ aġenzija tal-ivvjaġġar, operatur turistiku, portal jew aġenzija tal-kiri tal-vaganzi jew ta’ proprjetajiet għal żmien qasir li telenka diversi fornituri tal-akkomodazzjoni

(c)	Ma kien meħtieġ l-ebda bbukkjar

Triennali

11a.

[Għal vjaġġi biss b’akkomodazzjoni bbukkjata bl-Internet permezz ta’ aġenzija tal-ivvjaġġar, operatur turistiku, portal jew aġenzija tal-kiri tal-vaganzi jew ta’ proprjetajiet għal żmien qasir; għal vjaġġi biss li l-mezz ewlieni tal-akkomodazzjoni tagħhom ikun “akkomodazzjoni mikrija: bħal dar, villa, appartament; kamra jew kmamar mikrijin f’residenza”]

L-ibbukkjar tal-mezz ewlieni tal-akkomodazzjoni permezz ta’ sit web jew applikazzjoni bħal Airbnb, Booking.com, Expedia, Homeaway

(a)

Iva

(b)

Triennali

12.

L-ibbukkjar tal-vjaġġ: ibbukkjar bl-Internet tal-mezz ewlieni tat-trasport

(a)

Iva

(b)

Triennali

13.

L-ibbukkjar tal-vjaġġ: il-mod tal-ibbukkjar għall-mezz ewlieni tat-trasport

(a)	Direttament mal-fornitur tat-trasport

(b)	Permezz ta’ aġenzija tal-ivvjaġġar, operatur turistiku, portal

(c)	Ma kien meħtieġ l-ebda bbukkjar

Triennali

13a.

[Fakultattiv] [Għal vjaġġi biss li t-trasport tagħhom hu bbukkjat bl-Internet permezz ta’ aġenzija tal-ivvjaġġar, operatur turistiku, portal]

L-ibbukkjar tal-mezz ewlieni tat-trasport permezz ta’ sit web jew applikazzjoni bħal BlaBlaCar

(a)

Iva

(b)

Triennali

14.

L-ibbukkjar tal-vjaġġ: vjaġġ b’kollox inkluż

(a)

Iva

(b)

Triennali

15.

L-ibbukkjar tal-vjaġġ: ibbukkjar bl-Internet tal-pakkett

(a)

Iva

(b)

Triennali

15a.

In-nefqa tat-turist individwali matul il-vjaġġ fuq il-pakketti

Annwali”

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mill-1 ta’ Jannar 2020.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, l-1 ta’ Awwissu 2019.

Għall-Kummissjoni

Il-President

Jean-Claude JUNCKER

(1) ĠU L 192, 6.7.2011, p. 17.

(2) ĠU L 326, 11.12.2015, p. 1.