(1)

Ir-Regolament (UE) 2017/625 jistabbilixxi r-regoli dwar it-twettiq ta’ kontrolli uffiċjali mill-awtoritajiet kompetenti tal-Istati Membri fuq prodotti li jidħlu fl-Unjoni sabiex jivverifikaw il-konformità mal-leġiżlazzjoni dwar il-katina agroalimentari tal-Unjoni.

(2)

L-Artikolu 47(1)(b) tar-Regolament (UE) 2017/625 jispeċifika l-kategoriji tal-prodotti soġġetti għall-kontrolli uffiċjali fil-post ta’ kontroll fuq il-fruntiera tal-ewwel wasla fl-Unjoni. Dawk il-prodotti li joriġinaw mill-annimali, prodotti ġerminali, prodotti sekondarji mill-annimali, u prodotti tal-ikel li jkun fihom kemm prodotti li joriġinaw mill-pjanti kif ukoll prodotti pproċessati li joriġinaw mill-annimali (prodotti komposti).

(3)

Meta kunsinni ta’ ċerti prodotti msemmija fl-Artikolu 47(1)(b) tar-Regolament (UE) 2017/625 jiġu importati fl-Unjoni, f’ċerti każijiet, il-leġiżlazzjoni tal-Unjoni tipprevedi li t-trasport tagħhom mill-post ta’ kontroll fuq il-fruntiera tal-wasla sal-istabbiliment fil-post tad-destinazzjoni u l-wasla tagħhom fil-post tad-destinazzjoni fl-Unjoni irid jiġi mmonitorjat, sabiex jiġi evitat kwalunkwe riskju għas-saħħa pubblika u dik tal-annimali.

(4)

Id-Direttiva tal-Kunsill 97/78/KE (2) tistabbilixxi r-regoli li jirregolaw l-organizzazzjoni tal-verifiki veterinarji fuq prodotti li jidħlu fl-Unjoni minn pajjiżi terzi u l-kundizzjonijiet li jirrigwardaw it-trasport ta’ prodotti li jridu jiġu mmonitorjati skont il-leġiżlazzjoni tal-Unjoni mill-post ta’ spezzjoni fil-fruntiera tal-wasla sal-istabbiliment fil-post tad-destinazzjoni. Dawn ir-regoli jipprevedu, fost l-oħrajn, li l-kunsinni ta’ tali prodotti jridu jintbagħtu mill-post ta’ spezzjoni fil-fruntiera tal-wasla sal-istabbiliment fil-post tad-destinazzjoni taħt is-superviżjoni tal-awtorità kompetenti f’vetturi li ma jnixxux jew kontejners issiġillati mill-awtorità kompetenti.

(5)

Barra minn hekk, għal ċerti prodotti sekondarji tal-annimali mhux maħsuba għall-konsum mill-bniedem, ir-Regolament tal-Kummissjoni (UE) Nru 142/2011 (3) jeħtieġ li t-trasport ta’ kunsinni ta’ prodotti sekondarji bħal dawn jitwettaq f’konformità mar-regoli stabbiliti fid-Direttiva 97/78/KE. Dawk il-prodotti sekondarji tal-annimali jinkludu ċertu demm u prodotti tad-demm, ikel għall-annimali domestiċi, minbarra ikel nej għall-annimali domestiċi, xaħmijiet imdewba importati għal skopijiet barra mill-katina tal-għalf għal annimali mrobbijin fi rziezet, qarn u prodotti tal-qarn, eskluż qarn mitħun, u qwieqeb u prodotti ta’ qwieqeb, minbarra qwieqeb mitħuna, maħsuba għall-produzzjoni ta’ fertilizzanti organiċi jew ta’ materjali li jtejbu l-ħamrija.

(6)

Id-dritt tal-Unjoni jipprevedi wkoll il-monitoraġġ tal-kunsinni ta’ kaċċa selvaġġa bil-fer u mhux imqaxxra, f’konformità mar-regoli għat-twettiq ta’ kontrolli uffiċjali speċifiċi stabbiliti skont l-Artikolu 77(1)(b) tar-Regolament (UE) 2017/625 u skont ir-regoli addizzjonali dwar is-saħħa pubblika għal prodotti li joriġinaw minn annimali u oġġetti tal-ikel li jkun fihom kemm prodotti li joriġinaw mill-pjanti kif ukoll prodotti pproċessati li joriġinaw mill-annimali (“prodotti komposti”) li joriġinaw minn, u jirritornaw lejn, l-Unjoni wara rifjut ta’ dħul minn pajjiż terz stabbilit f’konformità mal-Artikolu 77(1)(h) tar-Regolament (UE) 2017/625.

(7)

Id-Direttiva 97/78/KE tħassret bir-Regolament (UE) 2017/625 b’effett mill-14 ta’ Diċembru 2019. Huwa għalhekk xieraq li jiġu stabbiliti regoli għall-monitoraġġ tat-trasport u tal-wasla tal-kunsinni ta’ ċerti prodotti msemmija fl-Artikolu 47(1)(b) tar-Regolament (UE) 2017/625 mill-post ta’ kontroll fuq il-fruntiera tal-wasla sal-istabbiliment fil-post tad-destinazzjoni. Jenħtieġ li dawn ir-regoli japplikaw fejn it-trasport mill-post ta’ kontroll fuq il-fruntiera tal-wasla sal-istabbiliment fil-post tad-destinazzjoni fl-Unjoni u l-wasla fl-istabbiliment tad-destinazzjoni huwa meħtieġ li jkun immonitorjat f’konformità mal-leġiżlazzjoni tal-Unjoni.

(8)

Sabiex ikun hemm monitoraġġ effettiv tat-trasport u l-wasla ta’ kunsinni mill-post ta’ kontroll fuq il-fruntiera tal-wasla sa meta jaslu fl-istabbiliment fil-post tad-destinazzjoni tagħhom, il-prodotti jenħtieġ li jiġu ttrasportati direttament lejn l-istabbiliment fil-post tad-destinazzjoni indikat fid-Dokument Sanitarju Komuni tad-Dħul (CHED).

(9)

Sabiex jiġi evitat kwalunkwe riskju għas-saħħa tal-annimali u għas-saħħa pubblika, jenħtieġ li jsir monitoraġġ tal-wasla tal-prodotti fl-istabbiliment fil-post tad-destinazzjoni indikat fiċ-CHED (“post ta’ destinazzjoni”). Jenħtieġ li l-awtorità kompetenti tal-post ta’ kontroll fuq il-fruntiera tal-wasla tindika lill-awtorità kompetenti responsabbli għat-twettiq tal-kontrolli uffiċjali fl-istabbiliment fil-post tad-destinazzjoni li l-prodotti jkunu telqu mill-post ta’ spezzjoni fuq il-fruntiera u jkunu fi triqithom lejn l-istabbiliment fil-post tad-destinazzjoni indikat fiċ-CHED. Jekk il-prodotti ma jaslux fl-istabbiliment fil-post tad-destinazzjoni, l-awtorità kompetenti tal-post ta’ kontroll fuq il-fruntiera tal-wasla u l-awtorità kompetenti responsabbli għall-istabbiliment fil-post tad-destinazzjoni jenħtieġ li jagħtu bidu għal azzjoni ta’ segwitu xierqa f’konformità mar-Regolament (UE) 2017/625 fir-rigward tal-operatur responsabbli għall-kunsinna.

(10)

Jenħtieġ li d-dispożizzjonijiet ta’ dan ir-Regolament japplikaw mingħajr preġudizzju għad-dispożizzjonijiet rilevanti tar-Regolament (UE) Nru 952/2013 tal-Parlament Ewropew u tal-Kunsill (4) dwar is-superviżjoni doganali.

(11)

Ir-Regolament (KEE, Euratom) Nru 1182/71 tal-Kunsill (5) jiddetermina r-regoli ġenerali applikabbli għall-perjodi, għad-dati u għal-limiti ta’ żmien sabiex tiġi żgurata l-applikazzjoni uniformi tal-liġi tal-Unjoni. Għalhekk, jenħtieġ li r-regoli stabbiliti f’dak ir-Regolament jitqiesu għall-kalkolu tal-limiti ta’ żmien stabbiliti f’dan ir-Regolament.

(12)

Ir-Regolament (UE) 2017/625 japplika mill-14 ta’ Diċembru 2019. Għaldaqstant, ir-regoli stabbiliti b’dan ir-Regolament jenħtieġ li japplikaw ukoll minn dik id-data,