(1)

L-Artikolu 12 tar-Regolament (UE) Nru 1380/2013 jipprevedi li l-Kummissjoni tista' tadotta miżuri ta' emerġenza għal raġunijiet imperattivi ta' urġenza debitament iġġustifikati b'rabta ma' theddida serja għall-konservazzjoni tar-riżorsi bijoloġiċi tal-baħar. Fuq talba motivata ta' Stat Membru jew fuq l-inizjattiva tagħha, il-Kummissjoni tista', sabiex ittaffi din it-theddida, tadotta miżuri ta' emerġenza ta' dan it-tip fl-għamla ta' atti ta' implimentazzjoni li japplikaw immedjatament għal perjodu massimu ta' sitt xhur.

(2)

Barra minn hekk, il-paragrafu 2 tal-Artikolu 5 tar-Regolament (UE) 2016/1139 tal-Parlament Ewropew u tal-Kunsill (2) jipprevedi li jridu jittieħdu miżuri ta' rimedju meta l-parir xjentifiku jindika li l-bijomassa riproduttiva ta' stokk tal-ħut kopert f'dak ir-Regolament ikun taħt il-livell minimu tal-punt ta' referenza li taħtu jista' jkun hemm tnaqqis fil-kapaċità riproduttiva. Dawk il-miżuri ta' rimedju jridu jiżguraw ir-ristabbiliment malajr tal-istokk ikkonċernat għal-livelli ogħla minn dawk li għandhom il-kapaċità li jipproduċu r-rendiment massimu sostenibbli (MSY).

(3)

Skont il-parir xjentifiku tal-Kunsill Internazzjonali għall-Esplorazzjoni tal-Baħar (ICES), l-istokk tal-bakkaljaw tal-Lvant tal-Baltiku (Gadus morhua) qed ibati minn livell fil-bijomassa li tant huwa baxx li mhuwiex sostenibbli billi qed jonqos ir-reklutaġġ, minħabba fatturi ambjentali u minħabba bidliet fl-ekosistema li qegħdin iwasslu għal mortalità naturali għolja u mortalità eċċessiva, meta jitqies l-istat tal-istokk, minħabba s-sajd. L-istokk qiegħed ibati u mistenni li l-potenzjal riproduttiv tiegħu se jonqos. Fl-2017 ir-reklutaġġ kien wasal fl-aktar punt baxx fis-sensiela kronoloġika tal-ICES, u hemm il-possibbiltà li fl-2018 ir-reklutaġġ reġa' tbaxxa. Il-bijomassa riproduttiva tinsab f'livell fost l-aktar livelli baxxi minn kemm ilhom jiġu osservati l-livelli, u l-bijomassa tal-bakkaljaw ta' daqs kummerċjali bħalissa tinsab fl-aktar livell baxx osservat mis-snin ħamsin. Barra minn hekk, l-ICES qed jistma li l-bijomassa se tibqa' taħt il-punt ta' referenza għas-sostenibbiltà fit-terminu medju, anki mingħajr ma jsir ebda sajd. Għaldaqstant, fil-parir dwar l-istokkijiet għall-2020, l-ICES huwa favur li ma jinqabadx dan il-ħut.

(4)

Il-konservazzjoni tal-istokk tal-bakkaljaw tal-Lvant tal-Baltiku hija mhedda serjament minħabba r-riskju ta' ħsara serja għall-kapaċità riproduttiva ta' dak l-istokk ikkawżata mit-tnaqqis kbir tal-bijomassa riproduttiva. Barra minn hekk, l-ICES huwa tal-fehma li kull livell ta' sajd se jkun tal-ftit bakkaljaw ta' daqs kummerċjali li fadal, u b'hekk se jikkawża aktar deterjorament fl-istruttura tal-istokk u jkompli jnaqqas il-potenzjal riproduttiv tiegħu, li diġà wasal fl-iktar punt storiku baxx. Barra minn hekk, l-aqwa staġun għar-riproduzzjoni tal-bakkaljaw tal-Baltiku jibda minn Mejju u jwassal sa Awwissu. Għalhekk jeżistu raġunijiet imperattivi ġġustifikati għall-urġenza biex jiġu adottati miżuri ta' emerġenza, għaliex, l-ewwel nett, il-bijomassa tal-bakkaljaw tal-Lvant tal-Baltiku tinsab f'livell tant baxx li l-istokk ma jistax jiġġedded u b'hekk hemm it-theddida li tikkollassa, it-tieni, jekk jitkompla s-sajd ta' dak l-istokk, dan iżid ir-riskju tal-kollass, u t-tielet, bħalissa għaddej l-istaġun ewlieni tar-riproduzzjoni.

(5)

Jekk l-Istati Membri jwettqu l-miżuri ta' emerġenza skont l-Artikolu 13 tar-Regolament (UE) Nru 1380/2013 ma jkunx biżżejjed biex titranġa ruħha s-sitwazzjoni, għaliex dawn ma jiżgurawx metodu uniformi fiż-żoni kollha fejn jinsab l-istokk. Barra minn hekk, f'dan l-istadju, l-Istati Membri mhux kollha adottaw dawn il-miżuri jew għandhom pjan li jadottawhom. Fl-aħħar nett, f'laqgħa tal-Grupp tal-Istati Membri tal-Baħar Baltiku (il-BaltFish) fl-4 ta' Ġunju 2019, l-Istati Membri ma setgħux jaqblu dwar metodu komuni.

(6)

Minħabba li ma hemmx biżżejjed miżuri min-naħa tal-Istati Membri, u billi l-azzjoni hija urġenti biex jiġi evitat aktar deterjorament tal-istruttura tal-istokk u aktar tnaqqis tal-potenzjal riproduttiv tiegħu, jixraq li jiġu previsti miżuri ta' rimedju fil-livell tal-Unjoni abbażi tal-Artikolu 12 tar-Regolament (UE) Nru 1380/2013.

(7)

Iż-żona ta' ġestjoni tal-bakkaljaw tal-Lvant tal-Baltiku hija magħmula mis-subdiviżjonijet tal-ICES 25 sa 32. Fis-subdiviżjoni tal-ICES 24 jinsab bakkaljaw mill-istokk tal-Lvant tal-Baltiku u bakkaljaw mill-istokk tal-Punent tal-Baltiku, iżda l-biċċa l-kbira tal-qabdiet huma tal-istokk tal-Lvant tal-Baltiku. Biex tingħata protezzjoni tajba lill-istokk tal-Lvant tal-Baltiku, u biex il-qabdiet ma jkunux ikkonċentrati fuq l-istokk tal-Lvant tal-Baltiku fis-subdiviżjoni tal-ICES 24, huwa essenzjali li l-miżuri ta' emerġenza jkopru s-subdiviżjoni tal-ICES 24.

(8)

Fid-dawl tal-parir xjentifiku, jixraq li s-sajd tal-istokk tal-bakkaljaw tal-Lvant tal-Baltiku jkun ipprojbit sal-aħħar tas-sena. Madankollu l-miżura trid tkun proporzjonata mal-obbjettiv tagħha wkoll.

(9)

Skont l-ICES, il-kwantitajiet u l-qabdiet tal-bakkaljaw huma ftit ħafna fis-subdiviżjonijiet tal-ICES 27 sa 32. Billi l-implimentazzjoni tal-miżuri ta' dan ir-Regolament titfa' piż mhux negliġibbli fuq l-amministrazzjoni u fuq is-sajjieda, ikun sproporzjonat li fil-kamp ta' applikazzjoni ta' dan ir-Regolament jiddaħħlu ż-żoni fejn bilkemm hemm bakkaljaw tal-Baltiku.

(10)

Barra minn hekk, għall-bastimenti ta' inqas minn 12-il metru tul li jużaw irkaptu passiv, jixraq li s-sajd tal-bakkaljaw fis-subdiviżjoni 24 sa sitt mili nawtiċi mix-xatt ikun eżentat mill-projbizzjoni tas-sajd fiż-żoni fejn il-fond tal-baħar ikun inqas minn 20 metru billi l-iżjed bakkaljaw li jinsab fiż-żoni kostali baxxi tas-subdiviżjoni 24 huwa l-bakkaljaw tal-Punent tal-Baltiku.

(11)

Barra minn hekk, minħabba s-severità potenzjali tal-implikazzjonijet soċjoekonomiċi ta' projbizzjoni tas-sajd totali, jixraq li jkun fil-mira s-sajd tal-bakkaljaw minn bastimenti bħal dawk tat-tkarkir tal-qiegħ li jistadu l-biċċa l-kbira tal-bakkaljaw mill-istokk tal-Lvant tal-Baltiku fis-subdiviżjonijiet 24, 25 u 26. Bil-kuntrarju, jixraq li jkunu eżentati mill-projbizzjoni l-qabdiet inċidentali inevitabbli tal-attivitajiet tas-sajd li mhumiex diretti lejn il-bakkaljaw, li jew jitwettqu b'irkaptu attiv b'daqs tal-malja li ma jkunx iżjed minn 45 mm fis-subdiviżjonijiet 24, 25 u 26, inkella minn bastimenti iqsar minn 12-il metru li jistadu b'irkaptu passiv fis-subdiviżjonijiet 25 u 26, jew fis-subdiviżjoni 24 sa sitt mili nawtiċi mix-xatt f'żoni fejn il-fond tal-baħar ikun iżjed minn 20 metru u, ikun x'ikun il-fond, 'il barra minn sitt mili nawtiċi mix-xatt. Dan għaliex dawk l-attivitajiet tas-sajd għandhom effett limitat fuq il-livelli ġenerali tal-qabdiet tal-bakkaljaw, u meta titqies id-diffikultà li dak li jkun jistad, fl-ambitu ta' sajd imħallat għall-istokkijiet kollha fl-istess ħin b'rendiment massimu sostenibbli. L-ICES jistma li dawk imsemmijin l-ewwel jirrappreżentaw madwar 1,5 % tal-ħatt l-art totali ta' bakkaljaw. L-ammont tal-qabdiet inċidentali li jinħatt l-art minn dak imsemmi l-aħħar huwa żgħir, iżda billi l-kwantità preċiża mhijiex magħrufa, jenħtieġ li l-qabdiet inċidentali jkunu limitati għal 10 % tal-ħatt l-art ta' kull vjaġġ tas-sajd.

(12)

L-għadd ta' bastimenti iqsar minn 12-il metru tul li jużaw rkaptu passiv u li jaqbdu l-bakkaljaw b'mod inċidentali jenħtieġ li ma jkunx iżjed minn dak li kien hemm fil-perjodu mill-1 ta' Jannar 2018 sat-30 ta' Ġunju 2019. Billi l-bastimenti tal-Unjoni li jistadu bix-xbieki tat-tkarkir, bit-tartaruni Daniżi jew b'irkaptu simili b'daqs tal-malja li ma jkunx ikbar minn 45 mm ma jistgħux jistadu l-bakkaljaw, ma hemmx għalfejn jiġi limitat l-għadd ta' dawn il-bastimenti.

(13)

Il-miżuri previsti f'dan ir-Regolament se jitressqu lill-Kumitat għas-Sajd u l-Akkwakultura biex dan jagħti l-opinjoni tiegħu.

(14)

Minħabba l-urġenza, jenħtieġ li dan ir-Regolament jidħol fis-seħħ immedjatament wara l-pubblikazzjoni tiegħu.