(1)

F'Mejju 2013, il-Kunsill, permezz tar-Regolament ta' Implimentazzjoni tal-Kunsill (UE) Nru 412/2013 (2), impona dazju anti-dumping definittiv fuq l-importazzjonijiet ta' oġġetti taċ-ċeramika li jintużaw fuq il-mejda u fil-kċina li joriġinaw mir-Repubblika tal-Poplu taċ-Ċina (“iċ-Ċina” jew “ir-RPĊ”). Id-dazji anti-dumping individwali li bħalissa huma fis-seħħ ivarjaw minn 13,1 % sa 26,1 %. Il-produtturi esportaturi kollha li kkooperaw u li mhumiex fil-kampjun irċivew dazju ta' 17,9 % u l-kumpaniji l-oħra kollha huma soġġetti għad-dazju residwu ta' 36,1 % (“il-miżuri oriġinali”). L-investigazzjoni li wasslet għall-impożizzjoni tal-miżuri oriġinali minn hawn 'il quddiem ser issir referenza għaliha bħala “l-investigazzjoni oriġinali”.

(2)

Wara l-pubblikazzjoni ta' notifika tal-iskadenza imminenti tal-miżuri oriġinali, (3) fl-2017 il-Federazzjoni Ewropea għall-Oġġetti Ornamentali u għal fuq il-Mejda (“FEPF” jew “l-applikant”), li tirrappreżenta aktar minn 28 % mill-produzzjoni totali tal-Unjoni ta' oġġetti taċ-ċeramika li jintużaw fuq il-mejda u fil-kċina, talbet it-tnedija ta' rieżami ta' skadenza. Argumentat li l-iskadenza tal-miżuri oriġinali aktarx twassal għal kontinwazzjoni tad-dumping u għal kontinwazzjoni jew rikorrenza ta' dannu għall-industrija tal-Unjoni.

(3)

Fil-15 ta' Mejju 2018, il-Kummissjoni ħabbret, permezz ta' notifika ppubblikata f'Il-Ġurnal Uffiċjali tal-Unjoni Ewropea (4) (“in-Notifika ta' Bidu”), il-bidu ta' rieżami ta' skadenza tal-miżuri oriġinali applikabbli skont l-Artikolu 11(2) tar-Regolament (UE) 2016/1036 tal-Parlament Ewropew u tal-Kunsill tat-8 ta' Ġunju 2016 dwar il-protezzjoni kontra l-importazzjonijiet li huma oġġett ta' dumping minn pajjiżi mhux membri tal-Unjoni Ewropea (5) (“ir-Regolament bażiku”).

(4)

L-investigazzjoni dwar il-kontinwazzjoni ta' dumping kienet tkopri l-perjodu mill-1 ta' April 2017 sal-31 ta' Marzu 2018 (“il-perjodu tal-investigazzjoni għal rieżami”). L-eżami tax-xejriet rilevanti għall-valutazzjoni tal-probabbiltà ta' kontinwazzjoni ta' dannu jew ta' rikorrenza ta' dannu kien ikopri l-perjodu mill-1 ta' Jannar 2014 sa tmiem il-perjodu tal-investigazzjoni għal rieżami (“il-perjodu taħt kunsiderazzjoni”).

(5)

Fin-Notifika ta' Bidu, il-Kummissjoni stiednet lill-partijiet interessati kollha biex jipparteċipaw fl-investigazzjoni. B'mod partikolari, hi avżat lill-partijiet li ġejjin dwar il-bidu tar-rieżami ta' skadenza: l-applikant, il-produtturi magħrufa fl-Unjoni u l-assoċjazzjonijiet rilevanti tagħhom, il-produtturi esportaturi magħrufa fir-RPĊ, l-importaturi mhux relatati magħrufa fl-Unjoni u l-awtoritajiet fir-RPĊ.

(6)

Il-partijiet interessati kollha ġew mistiedna jesprimu l-fehmiet tagħhom, jippreżentaw l-informazzjoni u jipprovdu evidenza ta' sostenn fil-limiti ta' żmien stabbiliti fin-Notifika ta' Bidu. Il-partijiet interessati ngħataw ukoll l-opportunità li jitolbu bil-miktub għal seduta ta' smigħ mis-servizzi ta' investigazzjoni tal-Kummissjoni u/jew mill-Uffiċjal tas-Seduta fil-proċedimenti kummerċjali.

(7)

Il-produtturi konformi tal-Unjoni, irrappreżentati mill-applikant, talbu lill-Kummissjoni żżomm isimhom kunfidenzjali biex jevitaw riskju possibbli ta' ritaljazzjoni mill-awtoritajiet lokali Ċiniżi u/jew minn atturi privati fir-RPĊ. Dawn saħqu li l-iżvelar tal-identitajiet tal-ilmentaturi jista' potenzjalment ikollu impatt negattiv serju fuq l-attivitajiet kummerċjali u fuq ir-relazzjoni tagħhom mal-kontropartijiet Ċiniżi li magħhom kellhom rabtiet b'saħħithom.

(8)

Il-Kummissjoni vvalutat dawn it-talbiet u l-evidenza ta' sostenn ipprovduta. Hi kkonkludiet li tabilħaqq kien hemm evidenza ta' riskju sinifikanti ta' ritaljazzjoni. Fuq din il-bażi, hi tat trattament kunfidenzjali lill-ismijiet tal-produtturi li għamlu l-ilment (6).

(9)

Fin-Notifika ta' Bidu, il-Kummissjoni ddikjarat li hija tista' tieħu kampjun minn fost il-partijiet interessati f'konformità mal-Artikolu 17 tar-Regolament bażiku.

(10)

Fin-Notifika ta' Bidu, il-Kummissjoni ddikjarat li hi kienet għażlet b'mod provviżorju kampjun ta' produtturi tal-Unjoni, skont l-Artikolu 17(1) tar-Regolament bażiku. Qabel il-bidu, kien hemm 25 produttur tal-Unjoni li pprovdew l-informazzjoni mitluba għall-għażla tal-kampjun u esprimew ir-rieda tagħhom li jikkooperaw mal-Kummissjoni. Fuq din il-bażi, il-Kummissjoni kienet għażlet b'mod proviżorju kampjun ta' erba' produtturi, li kienu nstabu li jirrappreżentaw l-industrija tal-Unjoni (7). L-għażla kienet saret fuq il-bażi tal-volumi ta' produzzjoni tal-produtturi tal-prodott simili, tad-daqs, tal-post ġeografiku fl-Unjoni u tas-segment tal-prodott. L-erba' produtturi tal-Unjoni koprew it-tipi ewlenin kollha tal-prodott u kienu jinsabu f'erba' Stati Membri. Minn dawn il-produtturi, tnejn kienu intrapriżi żgħar u medji (SMEs (8)). Il-kampjun proviżorju kien jammonta għal aktar minn 10 % tal-produzzjoni totali stmata tal-Unjoni fl-2017.

(11)

Wara l-istabbiliment tal-kampjun proviżorju, wieħed mill-kampjuni produtturi informa lill-Kummissjoni li hu kien immarka lilu nnifsu bi żball bħala SME meta, fil-fatt, ma kienx. Biex iżżomm kampjun rappreżentattiv, il-Kummissjoni emendat il-kampjun proviżorju tagħha biex dan ikun jinkludi SME addizzjonali oħra (9). Il-kampjun finali li rriżulta kien jinkludi ħames produtturi tal-Unjoni, li tnejn minnhom kienu SMEs, li koprew it-tipi ewlenin kollha tal-prodott u li kienu jinsabu f'ħames Stati Membri (10). Dan il-kampjun kien jirrappreżenta aktar minn 10 % mill-produzzjoni totali stmata tal-industrija tal-Unjoni fl-2017.

(12)

Il-Kamra tal-Kummerċ taċ-Ċina għall-Esportazzjonijiet u għall-Importazzjonijiet ta' Prodotti Industrijali Ħfief u ta' Oġġetti tal-Artiġjanat Artistiku (“CCCLA”), ikkummentat fuq il-perċentwal baxx ta' rappreżentattività tal-kumpaniji fil-kampjun (aktar minn 10 %) meta dan jitqabbel mal-investigazzjoni oriġinali (aktar minn 20 %). Madankollu, il-Kummissjoni qieset li fid-dawl tal-karattru frammentat tal-industrija tal-oġġetti taċ-ċeramika li jintużaw fuq il-mejda u l-ħtieġa li jiġu inklużi kumpaniji kemm kbar kif ukoll żgħar li jipproduċu tipi differenti tal-prodott fi Stati Membri differenti, il-kampjun kien jinkludi l-akbar volum rappreżentattiv ta' bejgħ li seta' raġonevolment jiġi investigat fiż-żmien disponibbli.

(13)

Biex tiddeċiedi jekk il-kampjunar kienx meħtieġ u, jekk iva, biex tagħżel kampjun, il-Kummissjoni talbet lill-importaturi mhux relatati biex jipprovdu l-informazzjoni speċifikata fin-Notifika ta' Bidu. Ħmistax-il importatur daħlu f'kuntatt mal-Kummissjoni, u tnax minn dawn ipprovdew l-informazzjoni meħtieġa. Fid-dawl tal-għadd ta' tweġibiet, il-Kummissjoni ddeċidiet li tillimita n-numru ta' importaturi li kienet se tinvestiga u għażlet kampjun. Skont l-Artikolu 17(1) tar-Regolament bażiku, il-Kummissjoni għażlet żewġ kumpaniji li kienu jikkorrispondu għall-akbar volum rappreżentattiv ta' importazzjonijiet u ta' bejgħ tal-prodott taħt rieżami fl-Unjoni li seta' jiġi investigat b'mod raġonevoli fiż-żmien disponibbli (11). Skont iċ-ċifri rrapportati fl-istadju tat-teħid tal-kampjun, il-kumpaniji fil-kampjun kienu jirrappreżentaw 2 – 5 % tal-importazzjonijiet tal-prodott ikkonċernat matul il-perjodu tal-investigazzjoni għal rieżami.

(14)

Biex tiddeċiedi jekk it-teħid ta' kampjuni kienx meħtieġ u, jekk iva, biex tagħżel kampjun, il-Kummissjoni talbet lill-produtturi esportaturi kollha fir-RPĊ biex jipprovdu l-informazzjoni speċifikata fin-Notifika ta' Bidu. Barra minn hekk, din talbet lill-Missjoni tar-Repubblika tal-Poplu taċ-Ċina għall-Unjoni Ewropea biex tidentifika u/jew tikkuntattja lil produtturi esportaturi oħrajn, jekk hemm, li jistgħu jkunu interessati jipparteċipaw fl-investigazzjoni.

(15)

Ħames mija u erbgħa u tletin (534) produttur esportatur Ċiniż / grupp ta' produtturi esportaturi Ċiniżi rritornaw il-formoli tal-kampjunar u qablu li jiddaħħlu fil-kampjun. Dawn il-produtturi esportaturi Ċiniżi li kkooperaw flimkien kienu jirrappreżentaw madwar 82 % u 76 % mill-volumi tal-bejgħ Ċiniżi u mill-valur tal-oġġetti taċ-ċeramika li jintużaw fuq il-mejda u fil-kċina lejn l-Unjoni matul il-perjodu tal-investigazzjoni għal rieżami. Wara li analizzat l-informazzjoni mogħtija mill-produtturi esportaturi Ċiniżi, il-Kummissjoni ddeċidiet li tillimita l-investigazzjoni tagħha għal numru raġonevoli ta' produtturi esportaturi billi użat kampjun skont l-Artikolu 17(1) tar-Regolament bażiku. Fid-29 ta' Ġunju 2018 (nota għall-fajl Nru. t18.007505), il-Kummissjoni għażlet kampjun ta' tliet gruppi ta' produtturi esportaturi fuq il-bażi tal-akbar volum ta' bejgħ lejn l-Unjoni matul il-perjodu tal-investigazzjoni għal rieżami. Skont il-Eurostat, it-tliet gruppi fil-kampjun kienu jkopru madwar 8,8 % mit-total tal-esportazzjonijiet Ċiniżi lejn l-Unjoni fil-perjodu tal-investigazzjoni għal rieżami (12).

(16)

Is-CCCLA kkumentat dwar il-perċentwal baxx ta' rappreżentattività tal-kumpaniji fil-kampjun meta dan jitqabbel mal-investigazzjoni oriġinali (kważi 20 %). Madankollu, il-Kummissjoni qieset li fid-dawl tal-karattru frammentat tal-industrija tal-oġġetti taċ-ċeramika li jintużaw fuq il-mejda, l-għażla tat-tliet l-akbar gruppi f'termini tal-bejgħ tal-esportazzjonijiet iddikjarat tagħhom lejn l-Unjoni kien l-akbar volum rappreżentattiv ta' esportazzjonijiet li seta' raġonevolment jiġi investigat fiż-żmien disponibbli.

(17)

Fil-25 ta' Lulju 2018, wieħed mill-gruppi fil-kampjun (13) informa lis-servizzi tal-Kummissjoni dwar id-deċiżjoni tiegħu li jirtira mill-kooperazzjoni u ma jissottomettix tweġiba għall-kwestjonarju. Imbagħad, f'konformità mal-Artikolu 17(4) tar-Regolament bażiku, il-Kummissjoni ddeċidiet li tagħżel kampjun ġdid billi żżid grupp ieħor, ir-raba' l-akbar f'termini tal-bejgħ fl-Unjoni matul il-perjodu tal-investigazzjoni għal rieżami (14).

(18)

Il-Kummissjoni bagħtet kwestjonarji lit-tliet gruppi fil-kampjun ta' produtturi esportaturi Ċiniżi u lill-gvern tar-RPĊ (“GOC”), lill-ħames produtturi tal-Unjoni fil-kampjun u liż-żewġ importaturi mhux relatati fil-kampjun. Iż-żewġ gruppi ta' produtturi esportaturi Ċiniżi, l-erba' produtturi tal-Unjoni fil-kampjun u ż-żewġ importaturi fil-kampjun ipprovdew tweġibiet kompluti għall-kwestjonarju.

(19)

Produttur żgħir minnhom tal-Unjoni informa lill-Kummissjoni li ma kienx ser ikun jista' jipprovdi tweġiba sinifikattiva għall-kwestjonarju u, għaldaqstant, irtira l-kooperazzjoni tiegħu. Minħabba l-istadju tardiv fil-proċedura, ma kienx possibbli li l-kumpanija fil-kampjun jittiħdilha postha minn kumpanija oħra. L-irtirar tal-kumpanija kellu impatt fuq ir-rappreżentattività tal-kampjun, peress li dan tnaqqas għal tliet produtturi kbar u għal SME waħda minflok żewġ SMEs. Madankollu, il-kampjun emendat xorta waħda kien jirrappreżenta aktar minn 10 % mill-produzzjoni totali stmata tal-industrija tal-Unjoni fl-2017, u kien jinkludi s-segmenti tal-prodott rilevanti kollha (porċellana, oġġetti tal-ħaġar u oġġetti taċ-ċaqquf), kumpaniji kbar u SMEs kif ukoll żamm ukoll firxa ġeografika rappreżentattiva (erba' Stati Membri (15)).

(20)

Grupp mill-produtturi esportaturi Ċiniżi fil-kampjun ipprovda tweġiba serjament insuffiċjenti għall-kwestjonarju b'taqsimiet dwar il-bejgħ domestiku u l-kostijiet li tħallew vojta, li ma ppermettiex lill-Kummissjoni tikseb l-informazzjoni kollha li hi qieset neċessarja għall-investigazzjoni. Konsegwentement, il-Kummissjoni informat lil dan il-grupp li, f'dak li għandu x'jaqsam ma' dan il-grupp, hi tista' tibbaża s-sejbiet tagħha fuq il-fatti disponibbli kif stipulat fl-Artikolu 18 tar-Regolament bażiku (16).

(21)

Il-Kummissjoni vverifikat l-informazzjoni kollha li qieset neċessarja biex tiġi stabbilita l-probabbiltà ta' kontinwazzjoni tad-dumping u tad-dannu u tal-interess tal-Unjoni. Saru żjarat ta' verifika fil-bini tal-partijiet interessati li ġejjin:

(22)

B'mod simili għat-talba li għamlu l-produtturi ilmentaturi tal-Unjoni fl-istadju tal-bidu kif spjegat aktar 'il fuq fil-premessa (7), il-produtturi tal-Unjoni fil-kampjun talbu li l-identitajiet tagħhom jinżammu kunfidenzjali għaliex kienu beżgħana li jistgħu jaffaċċjaw ritaljazzjoni minn klijenti jew minn kompetituri kkonċernati minn din l-investigazzjoni, skont l-Artikolu 19(1) tar-Regolament bażiku. Il-Kummissjoni eżaminat b'mod individwali l-merti ta' kull talba ta' kunfidenzjalità. Stabbilixxiet li tabilħaqq kien hemm evidenza ta' possibbiltà sinifikanti ta' ritaljazzjoni f'kull każ u aċċettat li l-ismijiet ta' dawn il-kumpaniji jenħtieġ li ma jiġux żvelati (17). Barra minn hekk, il-Kummissjoni qieset li ma kienx xieraq li jiġu żvelati l-ħames Stati Membri fejn kienu jinsabu l-kumpaniji fil-kampjun peress li dan ukoll inevitabbilment kien jiżvela l-identità tal-kumpaniji kkonċernati.

(23)

Is-CCCLA, kemm qabel kif ukoll wara l-iżvelar finali, ddikjarat li n-nuqqas ta' żvelar tal-identità tal-produtturi tal-Unjoni fil-kampjun kien jikkostitwixxi ksur serju tad-drittijiet tad-difiża ta' partijiet interessati oħra. L-ewwel nett, hija sostniet li ma ngħatat l-ebda informazzjoni dwar ir-rabtiet tal-produtturi tal-Unjoni ma' kumpaniji Ċiniżi fl-istess settur. Madankollu, fin-nota tal-fajl li kien fiha l-valutazzjoni tagħha tal-evidenza mressqa mill-produtturi tal-Unjoni, il-Kummissjoni indikat ir-rabtiet li jeżistu mal-kumpaniji Ċiniżi li jistgħu jiġu kompromessi mill-iżvelar tal-identità tal-produtturi tal-Unjoni (18). It-tieni, is-CCCLA kkritikat li l-anonimità timpedilha milli tipprovdi kummenti sinifikattivi fuq ir-rappreżentattività tal-kampjun, milli tiddetermina jekk kumpanija fil-kampjun tipproduċix prodotti tad-ditta jew mhux tad-ditta u milli tivverifika l-korrettezza tas-sejbiet ta' dannu tal-Kummissjoni.

(24)

Skont il-ġurisprudenza tal-Qorti tal-Ġustizzja, il-protezzjoni tad-drittijiet tad-difiża jridu jkunu, fejn meħtieġ, rikonċiljati mal-prinċipju ta' kunfidenzjalità, li hu stipulat b'mod speċifiku fl-Artikolu 19 tar-Regolament bażiku (19). Filwaqt li din ir-rikonċiljazzjoni tippermetti r-riċeviment ta' sommarji mhux kunfidenzjali ta' informazzjoni bħal din (mwettqa, pereżempju, fil-forma ta' firxiet u/jew elementi indiċjati ta' informazzjoni), fejn din l-informazzjoni ma twassalx għall-iżvelar tas-sigrieti tan-negozju, din mhijiex assoluta.

(25)

Il-Kummissjoni, billi applikat dan il-prinċipju, żgurat matul l-investigazzjoni attwali li l-kwistjonijiet rilevanti kollha jistgħu jiġu vverifikati u indirizzati fil-fajls disponibbli għal spezzjoni mill-partijiet interessati. Dawn il-fajls kienu jinkludu noti dwar l-għażla tal-kampjun u r-rappreżentattività tiegħu, is-sottomissjonijiet miftuħa tal-produtturi tal-Unjoni fil-kampjun inklużi l-firxiet u/jew informazzjoni indiċizzata u komunikazzjoni rilevanti oħra ma' dawk il-kumpaniji u mar-rappreżentanti tagħhom, bħal rigward il-perċentwal ta' prodotti tad-ditta manifatturati mill-kumpaniji differenti fil-kampjun. Ma ntużat ebda informazzjoni oħra, għajr dik li kellha verżjoni miftuħa żvelata lill-partijiet interessati, fl-għażla tal-kumpaniji fil-kampjun jew fid-determinazzjoni tas-sejbiet ta' dannu tal-Kummissjoni. Għalhekk, l-iżvelar tal-ismijiet ta' dawn il-kumpaniji ma kienx jipprovdi lill-partijet interessati b'xi informazzjoni addizzjonali li kienet tkun rilevanti għall-verifika tal-korrettezza tas-sejbiet tal-Kummissjoni. B'hekk, il-Kummissjoni qieset li l-informazzjoni pprovduta fid-dokumenti żvelati lill-partijiet interessati kienet suffiċjenti biex jiġu ssodisfati d-drittijiet tad-difiża tal-partijiet interessati, filwaqt li l-iżvelar tal-ismijiet tal-produtturi tal-Unjoni aktarx li kien jikkawża dannu ekonomiku irreperabbli u sproporzjonat lilhom. Għalhekk, it-talba ġiet miċħuda.

(26)

Fid-dawl tal-evidenza suffiċjenti disponibbli fil-bidu tal-investigazzjoni li kellha t-tendenza li turi l-eżistenza ta' distorsjonijiet sinifikanti fir-RPĊ skont it-tifsira tal-punt (b) tal-Artikolu 2(6a) tar-Regolament bażiku, il-Kummissjoni qieset li kien xieraq li tibda l-investigazzjoni fuq il-bażi tal-Artikolu 2(6a) tar-Regolament bażiku.

(27)

Konsegwentement, biex tiġbor id-data meħtieġa għall-applikazzjoni eventwali tal-Artikolu 2(6a) tar-Regolament bażiku, fin-Notifika ta' Bidu l-Kummissjoni stiednet lill-produtturi magħrufa kollha fir-RPC biex jipprovdu l-informazzjoni mitluba fl-Anness III għan-Notifika ta' Bidu fir-rigward tal-inputs użati għall-produzzjoni tal-prodott taħt rieżami. Iż-żewġ produtturi li bagħtu tweġibiet għall-kampjunar issottomettew ukoll l-informazzjoni mitluba fl-Anness III.

(28)

Biex tikseb l-informazzjoni li hi qieset li kienet meħtieġa għall-investigazzjoni tagħha fir-rigward tal-allegati distorsjonijiet sinifikanti skont it-tifsira tal-punt (b) tal-Artikolu 2(6a) tar-Regolament bażiku, il-Kummissjoni bagħtet ukoll kwestjonarju lill-GOC. F'dan il-kwestjonarju, il-GOC ġie mistieden jagħti l-fehmiet tiegħu dwar l-evidenza fit-talba tal-applikant, dwar kwalunkwe evidenza oħra fil-fajl li tikkonċerna l-eżistenza ta' distorsjonijiet sinifikanti, inkluż speċifikament ir-Rapport, kif ukoll dwar l-adegwatezza tal-applikazzjoni tal-Artikolu 2(6a) tar-Regolament bażiku f'dan il-każ inkwistjoni. Ma waslet l-ebda tweġiba.

(29)

Fin-Notifika ta' Bidu, il-Kummissjoni stiednet ukoll lill-partijiet interessati kollha jesprimu l-fehmiet tagħhom, jissottomettu informazzjoni u jipprovdu evidenza ta' sostenn rigward l-adegwatezza tal-applikazzjoni tal-Artikolu 2(6a) tar-Regolament bażiku fi żmien 37 jum mid-data tal-pubblikazzjoni ta' din in-Notifika f'Il-Ġurnal Uffiċjali tal-Unjoni Ewropea.

(30)

Fin-Notifika ta' Bidu, il-Kummissjoni speċifikat ukoll li, fid-dawl tal-evidenza disponibbli, din jista' jkollha bżonn tagħżel pajjiż rappreżentattiv xieraq skont l-Artikolu 2(6a)(a) tar-Regolament bażiku biex jiġi ddeterminat il-valur normali fuq il-bażi ta' prezzijiet jew ta' valuri referenzjarji mhux distorti.

(31)

Fit-18 ta' Lulju 2018, il-Kummissjoni ppubblikat l-ewwel nota għall-fajl (20) (“in-Nota tat-18 ta' Lulju”) li tfittex il-fehmiet tal-partijiet interessati dwar is-sorsi rilevanti li tista' tuża l-Kummissjoni għad-determinazzjoni tal-valur normali, f'konformità mat-tieni inċiż tal-Artikolu 2(6a)(e) tar-Regolament bażiku. Fuq il-bażi tat-tweġibiet għall-Anness III għan-Notifika ta' Bidu, il-Kummissjoni pprovdiet lista tal-fatturi kollha tal-produzzjoni bħall-materjali, l-enerġija u l-manodopera li ntużaw fil-produzzjoni ta' oġġetti taċ-ċeramika li jintużaw fuq il-mejda u fil-kċina mill-produtturi esportaturi. Barra minn hekk, fuq il-bażi tal-kriterji li ggwidaw l-għażla tal-prezzijiet jew tal-valuri referenzjarji mhux distorti, il-Kummissjoni identifikat tliet pajjiżi rappreżentattivi potenzjali: il-Brażil, it-Tajlandja u t-Turkija.

(32)

Il-Kummissjoni tat l-opportunità lill-partijiet interessati kollha biex jikkummentaw. Il-Kummissjoni rċeviet kummenti mingħand is-CCCLA u l-applikant.

(33)

Il-Kummissjoni indirizzat il-kummenti li rċeviet mingħand il-partijiet interessati fit-tieni nota (21) dwar is-sorsi għad-determinazzjoni tal-valur normali, datata d-9 ta' Ottubru 2018 (“in-Nota tad-9 ta' Ottubru”). Fin-Nota tad-9 ta' Ottubru, il-Kummissjoni speċifikat ukoll il-lista ta' fatturi tal-produzzjoni u kkonkludiet li, f'dak l-istadju, it-Turkija kienet l-aktar pajjiż rappreżentattiv xieraq skont l-ewwel inċiż tal-Artikolu 2(6a)(a) tar-Regolament bażiku. Il-Kummissjoni stiednet lill-partijiet interessati jikkummentaw. Il-Kummissjoni rċeviet kummenti mingħand is-CCCLA u l-applikant. Dan ir-Regolament indirizza dawn il-kummenti fit-taqsima 3.2.3 aktar 'il quddiem.

(34)

Fis-26 ta' April 2019, il-Kummissjoni żvelat il-fatti u l-kunsiderazzjonijiet essenzjali li abbażi tagħhom kellha l-ħsieb li żżomm id-dazji anti-dumping fis-seħħ (“l-iżvelar finali”). Il-partijiet kollha ngħataw perjodu ta' 20 jum li fih setgħu jikkummentaw dwar id-divulgazzjoni. Saret seduta ta' smigħ fil-17 ta' Mejju 2019 fuq talba tas-CCCLA.

(35)

Il-kummenti li saru mill-partijiet interessati ġew ikkunsidrati mill-Kummissjoni u tqiesu fejn kien xieraq.

(36)

Il-prodott ikkonċernat hu l-istess bħal dak fl-investigazzjoni oriġinali, jiġifieri l-oġġetti taċ-ċeramika li jintużaw fuq il-mejda u fil-kċina, minbarra oġġetti taċ-ċeramika li jaħżnu kondimenti jew imtieħen żgħar tal-ħwawar u l-partijiet taċ-ċeramika tagħhom li jitħnu, mtieħen tal-kafè taċ-ċeramika, senniena tas-skieken taċ-ċeramika, għodod tal-kċina taċ-ċeramika li jintużaw għall-qtugħ, tħin, tħakkik, tfettit, brix u tqaxxir, u ġebel tal-pizza taċ-ċeramika cordierite tat-tip użat għall-ħami tal-pizza jew il-ħobż, li bħalissa jaqgħu taħt il-kodiċijiet NM ex 6911 10 00, ex 6912 00 21, ex 6912 00 23, ex 6912 00 25 u ex 6912 00 29 (kodiċijiet TARIC 6911100090, 6912002111, 6912002191, 6912002310, 6912002510 u 6912002910) u li joriġinaw mir-Repubblika tal-Poplu taċ-Ċina (“il-prodott ikkonċernat”).

(37)

Oġġetti taċ-ċeramika li jintużaw fuq il-mejda u fil-kċina jistgħu jkunu tal-porċellana (inkluż tal-kina / tal-porċellana fina), ta' fuħħar komuni, tal-ġebel, taċ-ċaqquf jew ta' fuħħar fin jew xi materjal ieħor. Il-prodott finali taċ-ċeramika jiddependi mit-tip u mill-kompożizzjoni tal-materja prima ewlenija bħat-tafal, il-kawlina, il-feldspar u l-kwarz.

(38)

L-oġġetti taċ-ċeramika li jintużaw fuq il-mejda u fil-kċina jiġu kkummerċjalizzati f'varjetà kbira ta' forom li komplew jevolvu tul iż-żmien. Dawn jintużaw f'firxa wiesgħa ta' postijiet, eż. djar, lukandi, ristoranti jew stabbilimenti ta' indukrar u primarjament huma maħsuba biex jidħlu f'kuntatt mal-ikel.

(39)

Kif stabbilit fl-investigazzjoni oriġinali, oġġetti taċ-ċeramika li jintużaw fuq il-mejda u fil-kċina li huma mmanifatturati u mibjugħa mill-industrija tal-Unjoni fl-Unjoni u oġġetti taċ-ċeramika li jintużaw fuq il-mejda manifatturati u mibjugħa fis-suq domestiku tar-RPĊ u oġġetti taċ-ċeramika li jintużaw fuq il-mejda u fil-kċina importati fl-Unjoni mir-RPĊ għandhom l-istess karatteristiċi fiżiċi u kimiċi bażiċi u l-istess użi finali. Għalhekk, huma meqjusin bħala prodotti simili fis-sens tal-Artikolu 1(4) tar-Regolament bażiku.

(40)

F'konformità mal-Artikolu 11(2) tar-Regolament bażiku, il-Kummissjoni eżaminat jekk huwiex probabbli li l-iskadenza tal-miżuri fis-seħħ twassal għal kontinwazzjoni tad-dumping mir-RPĊ.

(41)

Fuq il-bażi tal-Eurostat, matul il-perjodu tal-investigazzjoni għal rieżami, iċ-Ċina esportat 376 421 tunnellata ta' oġġetti taċ-ċeramika li jintużaw fuq il-mejda u fil-kċina lejn l-Unjoni b'valur totali ta' EUR 671 978 000. Għall-istess perjodu, il-volum u l-valur iddikjarati tal-esportazzjonijiet tal-produtturi esportaturi Ċiniżi li kkooperaw kienu ta' 292 866 tunnellata u ta' EUR 484 020 950, li jikkorrispondu għal 78 % u għal 72 %, rispettivament. F'industirja frammentata bħal dik tal-oġġetti taċ-ċeramika li jintużaw fuq il-mejda, dan jista' jitqies bħala livell għoli ta' kooperazzjoni.

(42)

Fl-istess ħin, wieħed mill-erba' gruppi fil-kampjun irtira l-kooperazzjoni mingħajr ma pprovda tweġiba għall-kwestjonarju u ieħor ipprovda tweġiba serjament insuffiċjenti għall-kwestjonarju li ma kinitx tippermetti lill-Kummissjoni li tikseb l-informazzjoni kollha li kienet tqis neċessarja. Barra minn hekk, it-tielet grupp fil-kampjun iddeċieda li jirtira l-kooperazzjoni matul iż-żjara ta' verifika (22). Matul il-verifika ta' dan il-grupp, il-Kummissjoni sabet li d-data pprovduta fit-tweġiba għall-kwestjonarju ma setgħetx tiġi verifikata b'mod suffiċjenti minħabba nuqqas ta' evidenza sottostanti. B'mod partikolari, il-kumpanija naqset milli tipprovdi dokumentazzjoni li tipprovdi evidenza tal-output tal-produzzjoni kif ukoll dokumentazzjoni li tikkonċerna l-kunsinna tal-materja prima / tal-oġġetti lesti matul il-perjodu tal-investigazzjoni għal rieżami. Lanqas ċerti dokumenti elettroniċi, bħal ordnijiet ta' xiri u kuntratti ta' xiri relatati ma' tranżazzjonijiet ta' provvista matul il-perjodu tal-investigazzjoni għal rieżami, ma kienu disponibbli fil-bini tal-kumpanija. Barra minn hekk, għal tal-anqas tranżazzjoni waħda, id-dokumentazzjoni pprovduta ma kinitx tikkorrispondi għall-informazzjoni / għad-dokumentazzjoni verifikata li l-Kummissjoni kienet irċiviet mingħand il-fornitur tal-kumpanija. Dawn is-sejbiet kollha jsostnu l-konklużjoni li l-informazzjoni pprovduta ma kinitx affidabbli u li parti mill-produzzjoni u l-oriġini tal-bejgħ tal-esportazzjonijiet lejn l-UE matul il-perjodu tal-investigazzjoni għal rieżami kienu ddikjarati ħażin.

(43)

B'hekk, tlieta mill-erba' gruppi fil-kampjun, minkejja l-qbil inizjali tagħhom, eventwalment ma kkooperawx fl-investigazzjoni. Il-Kummissjoni infurmat lill-kumpaniji inkwistjoni kif ukoll lill-awtoritajiet taċ-Ċina (23) li, skont l-Artikolu 18 tar-Regolament bażiku, hi tista' tibbaża s-sejbiet tagħha rigward il-kontinwazzjoni u / jew ir-rikorrenza tad-dumping fuq il-fatti disponibbli.

(44)

Skont l-Artikolu 2(1) tar-Regolament bażiku, “il-valur normali għandu normalment ikun ibbażat fuq il-prezzijiet imħallsa jew pagabbli, fil-kors ordinarju tal-kummerċ, minn klijenti indipendenti fil-pajjiż esportatur”.

(45)

Madankollu, skont l-Artikolu 2(6a)(a) tar-Regolament bażiku, “f'każ li jiġi determinat […] li mhuwiex xieraq li jintużaw prezzijiet u kostijiet domestiċi fil-pajjiż esportatur minħabba l-eżistenza f'dak il-pajjiż ta' distorsjonijiet sinifikanti fis-sens tal-punt (b), il-valur normali għandu jiġi kkalkolat esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew valuri ta' riferiment mingħajr distorsjoni”, u “għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għall-profitti” (“kostijiet amministrattivi, tal-bejgħ u ġenerali u għall-profitti” jissejħu “SG&A” minn hawn 'il quddiem).

(46)

Kif spjegat aktar hawn taħt, il-Kummissjoni kkonkludiet fl-investigazzjoni preżenti li, fuq il-bażi tal-evidenza disponibbli, l-applikazzjoni tal-Artikolu 2(6a) tar-Regolament bażiku kienet xierqa.

(47)

L-Artikolu 2(6a)(b) tar-Regolament bażiku jiddefinixxi “distorsjonijiet sinifikanti huma dawk id-distorsjonijiet li jseħħu meta l-prezzijiet jew il-kostijiet irrapportati, inklużi l-kostijiet tal-materja prima u tal-enerġija, ma jkunux ir-riżultat ta' forzi tas-suq ħieles peress li dawn ikunu affettwati minn intervent sostanzjali tal-gvern. Meta tkun valutata l-eżistenza ta' distorsjonijiet sinifikanti għandha tingħata attenzjoni, inter alia, lill-impatt potenzjali ta' element wieħed jew aktar mis-segwenti:

(48)

Skont l-Artikolu 2(6a)(b) tar-Regolament bażiku, il-valutazzjoni tal-eżistenza ta' distorsjonijiet sinifikanti skont it-tifsira tal-Artikolu 2(6a)(a) jenħtieġ li tqis, fost affarijiet oħra, il-lista mhux eżawrjenti ta' elementi fid-dispożizzjoni msemmija l-ewwel. Skont l-Artikolu 2(6a)(b) tar-Regolament bażiku, fil-valutazzjoni tal-eżistenza ta' distorsjonijiet sinifikanti, għandu jiġi kkunsidrat l-impatt potenzjali ta' wieħed jew aktar minn dawn l-elementi fuq il-prezzijiet u l-kostijiet fil-pajjiż esportatur tal-prodott ikkonċernat. Tabilħaqq, peress li dik il-lista mhix kumulattiva, mhux l-elementi kollha jridu jitqiesu għal sejba ta' distorsjonijiet sinifikanti. Barra minn hekk, l-istess ċirkustanzi fattwali jistgħu jintużaw biex tintwera l-eżistenza ta' element wieħed jew aktar mil-lista. Madankollu, kwalunkwe konklużjoni dwar distorsjonijiet sinifikanti skont it-tifsira tal-Artikolu 2(6a)(a) trid issir fuq il-bażi tal-evidenza kollha disponibbli. Il-valutazzjoni ġenerali dwar l-eżistenza ta' distorsjonijiet tista' tqis ukoll il-kuntest ġenerali u s-sitwazzjoni fil-pajjiż esportatur, b'mod partikolari meta l-kunċett ta' “ekonomija tas-suq soċjalista” mnaqqax fil-Kostituzzjoni Ċiniża u fis-sistema ġuridika kollha jipprovdi lill-gvern b'setgħat sostanzjali biex jintervjeni fl-ekonomija b'tali mod li l-prezzijiet u l-kostijiet ma jkunux ir-riżultat tal-iżvilupp ħieles tal-forzi tas-suq.

(49)

L-Artikolu 2(6a)(c) tar-Regolament bażiku jipprevedi li “[f]ejn il-Kummissjoni jkollha indikazzjonijiet fondati sew tal-eżistenza potenzjali ta' distorsjonijiet sinifikanti kif imsemmija fil-punt (b) f'ċertu pajjiż jew f'ċertu settur f'dak il-pajjiż, u fejn ikun xieraq għall-applikazzjoni effettiva ta' dan ir-Regolament, il-Kummissjoni għandha tipproduċi, tippubblika u taġġorna regolarment rapport li jiddeskrivi ċ-ċirkostanzi tas-suq imsemmija fil-punt (b) f'dak il-pajjiż jew settur”.

(50)

F'dak ir-rigward, il-Kummissjoni qabel kienet ipproduċiet id-“Dokument ta' Ħidma tal-Persunal tal-Kummissjoni dwar Distorsjonijiet Sinifikanti fl-Ekonomija tar-Repubblika tal-Poplu taċ-Ċina għall-Finijiet ta' Investigazzjonijiet għad-Difiża tal-Kummerċ” (minn hawn 'il quddiem imsejjaħ “ir-Rapport”). Ir-Rapport jindika l-eżistenza ta' intervent sostanzjali tal-gvern f'bosta livelli tal-ekonomija, inklużi distorsjonijiet speċifiċi f'ħafna fatturi ewlenin tal-produzzjoni (bħall-art, l-enerġija, il-kapital, il-materja prima u x-xogħol), kif ukoll f'setturi speċifiċi (bħas-settur taċ-ċeramika). Ir-Rapport tqiegħed fil-fajl tal-investigazzjoni fl-istadju tal-bidu. It-talba kien fiha wkoll evidenza rilevanti li tikkomplementa r-Rapport.

(51)

It-talba kienet issostni allegazzjonijiet dwar distorsjonijiet sinifikanti skont it-tifsira tal-Artikolu 2(6a)(b) imsemmi aktar 'il fuq, b'mod komplementari għar-Rapport.

(52)

L-ewwel nett, l-applikant irrefera fit-Taqsima 3.B.i. tat-talba, għall-eżistenza ta' distorsjonijiet sinifikanti fiċ-Ċina, kif stabbilit fir-Rapport. L-applikant kompla jiftaħ dwar din l-informazzjoni f'dokument separat mehmuż mat-talba tiegħu (ir-“rapport ta' ThinkDesk”) (24).

(53)

Fuq il-bażi tad-dokumenti msemmija hawn fuq, l-applikant allega l-eżistenza ta' distorsjonijiet b'rabta mal-fatturi tal-produzzjoni. Barra minn hekk, l-applikant allega l-eżistenza ta' rabtiet bejn dawk li jfasslu l-politiki fiċ-Ċina u l-bords tat-tmexxija ta' kumpaniji li jipproduċu oġġetti li jintużaw fuq il-mejda u fil-kċina, kwalifikati mill-applikant bħala “relattivament kbar”.

(54)

It-talba tal-applikant tipprovdi wkoll eżempji ta' appoġġ sostanzjali mill-Istat għall-produtturi ta' oġġetti li jintużaw fuq il-mejda u fil-kċina matul l-aħħar snin. Ir-rapport ta' ThinkDesk jixħet dawl fuq il-benefiċċji finanzjarji u l-miżuri ta' appoġġ mogħtija lis-settur taċ-ċeramika mill-awtoritajiet Ċiniżi. Barra minn hekk, ir-rapport imsemmi hawn fuq isemmi l-eżistenza ta' politika ekonomika li tagħti spinta lill-kapaċitajiet innovattivi u lit-titjib tat-teknoloġija fi ħdan is-settur taċ-ċeramika. F'dan ir-rigward, dan isemmi ċerti miżuri ta' appoġġ finanzjarju mogħtija mill-gvernijiet fil-livelli amministrattivi kollha (25).

(55)

Fost miżuri ta' appoġġ oħra, l-applikant wera l-eżistenza ta' appoġġ mill-gvern għall-esportazzjonijiet fil-forma ta' rifużjonijiet tal-VAT jew assigurazzjoni fuq il-krediti tal-esportazzjoni permezz taċ-China Export & Credit Insurance Corporation (Sinosure) li hi proprjetà tal-Istat, li l-produtturi Ċiniżi taċ-ċeramika bbenefikaw minnhom (26). Barra minn hekk, ir-rapport ta' ThinkDesk jispjega r-rilevanza tal-industrija taċ-ċeramika għall-ekonomiji lokali li wasslet għal appoġġ finanzjarju u mhux monetarju b'saħħtu minn gvernijiet reġjonali (27). Barra minn hekk, l-intrapriżi ngħataw appoġġ finanzjarju relatat mal-kummerċjalizzazzjoni, mal-privattivi u mat-trademarks (28).

(56)

L-applikant bbaża ruħu fuq ir-Rapport u r-rapport ta' ThinkDesk biex jasserixxu r-rwol dominanti kurrenti tal-Istat fl-ekonomija Ċiniża u kkonkluda li s-settur tal-oġġetti taċ-ċeramika li jintużaw fuq il-mejda u fil-kċina kien soġġett għal distorsjonijiet sinifikanti tas-suq.

(57)

Il-Kummissjoni eżaminat jekk kienx xieraq li jintużaw prezzijiet u kostijiet domestiċi fiċ-Ċina minħabba l-eżistenza ta' distorsjonijiet sinifikanti fit-tifsira tal-punt (b) tal-Artikolu 2(6a) tar-Regolament bażiku. Il-Kummissjoni għamlet dan fuq il-bażi tal-evidenza disponibbli fil-fajl, inkluża l-evidenza li kienet tinsab fir-Rapport, li hija msejsa fuq sorsi disponibbli pubblikament. Dik l-analiżi kopriet l-eżami tal-interventi sostanzjali tal-gvern fl-ekonomija tar-RPĊ b'mod ġenerali, iżda wkoll is-sitwazzjoni speċifika tas-suq fis-settur rilevanti, inkluż il-prodott taħt rieżami.

(58)

Skont it-Taqsima 5.2.2 tan-Notifika ta' Bidu u skont l-Artikolu 2(6a)(c) tar-Regolament bażiku, il-partijiet interessati kollha ġew mistiedna biex jirribattu, jikkummentaw jew jissupplimentaw l-evidenza li kienet tinsab fil-fajl tal-investigazzjoni fil-bidu, u dan pjuttost juri l-eżistenza ta' distorsjonijiet sinifikanti. L-ebda wieħed mill-produtturi esportaturi ma għamel użu minn din il-possibbiltà. Barra minn hekk, il-produtturi esportaturi ġew mistiedna speċifikament fil-kwestjonarju tal-produtturi esportaturi biex jagħmlu dikjarazzjonijiet u jipprovdu evidenza ta' sostenn jekk iqisu li xi wħud mill-kostijiet tagħhom jew kollha, ma kinux affettwati minn distorsjonijiet sinifikanti. Wieħed mill-produtturi esportaturi ddikjara li ma kienx hemm distorsjoni fl-ispejjeż tal-materja prima tiegħu. Madankollu, minkejja talba espressa qabel il-verifika, ma pprovda l-ebda evidenza ta' sostenn fuq il-post. Barra minn hekk, kif spjegat fil-premessa (42) aktar' il fuq, saħansitra ddeċieda li ma jibqax jikkoopera.

(59)

Wara d-divulgazzjoni, is-CCCLA affermat li l-Ftehim Anti-dumping tad-WTO ma jipprevedix l-ostaklu proċedurali tal-kummenti fuq ir-Rapport tal-pajjiż. Il-Kummissjoni nnutat li din l-affermazzjoni hija marbuta mal-pożizzjoni tas-CCCLA dwar il-konformità tad-WTO mal-metodoloġija l-ġdida li hija indirizzata hawn taħt fil-premessi (126) u (127). Għaldaqstant, din id-dikjarazzjoni ġiet miċħuda.

(60)

Wara d-divulgazzjoni, is-CCCLA sostniet ukoll li fl-ebda punt il-produtturi esportaturi Ċiniżi ma offrew opportunità sinifikanti biex juru li ma kinux ġew affettwati individwalment mid-distorsjonijiet sinifikanti msemmija fir-Rapport u fir-rapport ta' ThinkDesk. Barra minn hekk, is-CCCLA sostniet li, skont il-metodoloġija l-ġdida tal-UE dwar l-anti-dumping (ir-Regolament (UE) 2017/2321 tal-Parlament Ewropew u tal-Kunsill tat-12 ta' Diċembru 2017), esportatur individwali ma kellux aktar l-opportunità li juri li seta' jiġi ttrattat b'mod separat mill-allegata sitwazzjoni tal-pajjiż kollu, għall-kuntrarju tal-metodoloġija applikabbli għar-RPĊ skont l-Artikolu 2(7) tal-verżjoni preċedenti tar-Regolament bażiku li kienet tippermetti li l-esportaturi individwali jingħataw trattament ta' ekonomija tas-suq jekk setgħu juru dan. Għaldaqstant, is-CCCLA sostniet li l-Kummissjoni kienet kisret il-prinċipju ta' amministrazzjoni tajba, tal-proċess ġust u tad-drittijiet tad-difiża fir-rigward tagħha u l-esportaturi Ċiniżi kollha, u kisret l-Artikolu 41 tal-Karta tad-Drittijiet Fundamentali tal-UE.

(61)

Il-Kummissjoni tfakkar li l-prinċipju ta' amministrazzjoni tajba, meta jikkostitwixxi l-espressjoni ta' dritt speċifiku bħad-dritt li l-kwistjonijiet li jirrigwardaw persuna jiġu ttrattati b'mod imparzjali, ġust u fi żmien raġonevoli, kif previst fl-Artikolu 41 tal-Karta tad-Drittijiet Fundamentali, irid jitqies bħala regola tad-dritt tal-UE li l-għan tagħha huwa li tagħti lill-individwi drittijiet. Madankollu, skont il-ġurisprudenza, il-prinċipju ta' amministrazzjoni tajba, fih innifsu, ma jagħtix drittijiet lill-individwi, ħlief meta dan ikun jikkostitwixxi l-espressjoni ta' drittijiet speċifiċi (29). F'dan ir-rigward, ta' min jinnota, li kuntrarjament għat-talbiet tas-CCCLA, il-partijiet kollha kellhom il-possibbiltà matul l-investigazzjoni għar-rieżami tal-iskadenza biex jikkummentaw fuq l-eżistenza ta' distorsjonijiet sinifikanti, ir-rabta mal-prodott ikkonċernat u l-effetti tagħhom fuq in-negozju tagħhom. Il-produtturi esportaturi setgħu wieġbu t-taqsima F-5 tal-kwestjonarju. Produttur esportatur wieħed seta' pprova jġib evidenza li ssostni l-pretensjoni tiegħu, li l-ispejjeż tal-materja prima mhumiex distorti. Kif imsemmi fil-premessa (58), l-ebda waħda minn dawn il-partijiet ma' għażlet li tagħmel dan. Għaldaqstant, dawn il-partijiet interessati ma jistgħux jinvokaw il-prinċipju ta' amministrazzjoni tajba, kif stipulat fl-Artikolu 41 tad-Karta tad-Drittijiet Fundamentali tal-UE għad-dikjarazzjoni tagħhom dwar l-eżistenza ta' distorsjonijiet sinifikanti għall-produttur esportatur kkonċernat. Barra minn hekk, argumenti teoretiċi bbażati fuq tqabbil astratt bejn verżjonijiet differenti tal-leġiżlazzjoni anti-dumping mhumiex rilevanti fil-kuntest tal-Artikolu 41 tal-Karta, peress li l-Kummissjoni hija marbuta legalment li ssegwi l-leġiżlazzjoni fis-seħħ. Minkejja dan, il-Kummissjoni tinnota wkoll li skont l-Artikolu 2(6a)(a), it-2 sottoparagrafu, it-tielet inċiż tar-Regolament bażiku, il-kostijiet domestiċi tal-esportaturi jistgħu jintużaw biex jiġi interpretat il-valur normali “sal-punt li huma stabbiliti b'mod pożittiv eżenti minn distorsjonijiet, abbażi ta' evidenza preċiża u xierqa”. Dan ifisser li s-sitwazzjoni individwali ta' produttur esportatur tista' tiġi kkunsidrata, jekk dan ir-rekwiżit jiġi sodisfatt, sabiex il-kostijiet tiegħu stess jintużaw biex jiġi stabbilit il-valur normali. Fi kwalunkwe każ, il-Kummissjoni tfakkar li s-CCCLA ma tistax tinvoka dritt proċedurali li ma jaffettwahiex personalment u b'mod negattiv, allura ma tistax titlob il-ksur ta' dritt speċifiku li jirrigwarda personalment il-membri tagħha.

(62)

Għalhekk, il-Kummissjoni ċaħdet l-argumentazzjoni li kien hemm ksur tal-Artikolu 41 tal-Karta.

(63)

Is-sistema ekonomika Ċiniża hi bbażata fuq il-kunċett ta' “ekonomija tas-suq soċjalista”. Dan il-kunċett huwa minqux fil-Kostituzzjoni Ċiniża u jiddetermina l-governanza ekonomika taċ-Ċina. Il-prinċipju ewlieni huwa s-“sjieda pubblika soċjalista tal-mezzi tal-produzzjoni, jiġifieri s-sjieda min-nies kollha u s-sjieda kollettiva mill-persuni li jaħdmu”. L-ekonomija tal-Istat hi “l-forza mexxejja tal-ekonomija nazzjonali” u l-Istat għandu l-mandat “li jiżgura l-konsolidazzjoni u t-tkabbir tagħha” (30). Konsegwentement, l-istruttura ġenerali tal-ekonomija Ċiniża mhux biss tippermetti interventi sostanzjali tal-gvern fl-ekonomija, iżda tali interventi huma mogħtija mandat espliċitu. Il-kunċett tas-supremazija tas-sjieda pubblika fuq dik privata jinfirex fis-sistema legali kollha u huwa enfasizzat bħala prinċipju ġenerali fil-leġiżlazzjonijiet ċentrali kollha. Il-liġi tal-proprjetà Ċiniża hija eżempju ewlieni: hija tirreferi għall-istadju primarju tas-soċjaliżmu u tafda lill-Istat biex iħares is-sistema ekonomika bażika li taħtha s-sjieda pubblika għandha rwol dominanti. Forom oħra ta' sjieda huma tollerati, fejn il-liġi tippermettilhom jiżviluppaw spalla ma' spalla mas-sjieda tal-Istat (31).

(64)

Barra minn hekk, skont il-liġi taċ-Ċina, l-ekonomija tas-suq soċjalista hi żviluppata taħt it-tmexxija tal-Partit Komunista Ċiniż (CCP). L-istrutturi tal-Istat Ċiniż u tas-CCP huma marbutin ma' xulxin f'kull livell (legali, istituzzjonali, personali) u jifformaw sovrastruttura li fiha r-rwoli tas-CCP u tal-Istat ma jistgħux jintgħarfu. Wara emenda fil-Kostituzzjoni Ċiniża f'Marzu 2018, ir-rwol ewlieni tas-CCP ingħata prominenza saħansitra akbar billi ġie affermat mill-ġdid fit-test tal-Artikolu 1 tal-Kostituzzjoni. Wara l-ewwel sentenza diġà eżistenti tad-dispożizzjoni: “is-sistema soċjalista hija s-sistema bażika tar-Repubblika Popolari taċ-Ċina”, iddaħħlet it-tieni sentenza ġdida li tgħid: “[i]l-karatteristika li tiddefinixxi s-soċjaliżmu b'karatteristiċi Ċiniżi hija t-tmexxija tal-Partit Komunista taċ-Ċina.” (32) Dan juri l-kontroll mhux kontestat u dejjem akbar tas-CCP fuq is-sistema ekonomika taċ-Ċina. Din it-tmexxija u dan il-kontroll huma inerenti għas-sistema Ċiniża u jmorru ferm lil hinn mis-sitwazzjoni abitwali ta' pajjiżi oħra fejn il-gvernijiet jeżerċitaw kontroll makroekonomiku ġenerali li fil-limiti tiegħu hemm forzi tas-suq ħieles.

(65)

L-Istat Ċiniż iwettaq politika ekonomika intervenzjonista biex isegwi għanijiet li jikkoinċidu mal-aġenda politika stipulata mis-CCP, minflok ma jirrifletti l-kundizzjonijiet ekonomiċi prevalenti f'suq ħieles (33). L-għodod ekonomiċi intervenzjonisti użati mill-awtoritajiet Ċiniżi jinqasmu f'diversi friegħi, inklużi s-sistema tal-ippjanar industrijali, is-sistema finanzjarja, kif ukoll il-livell tal-ambjent regolatorju.

(66)

L-ewwel nett, fuq il-livell ta' kontroll amministrattiv ġenerali, id-direzzjoni tal-ekonomija Ċiniża hija rregolata minn sistema kumplessa ta' ppjanar industrijali li taffettwa l-attivitajiet ekonomiċi kollha fil-pajjiż. Dawn il-pjanijiet kollha jkopru matriċi komprensiva u kumplessa ta' setturi u politiki trasversali u huma preżenti fil-livelli kollha tal-gvern. Il-pjanijiet fil-livell provinċjali huma dettaljati, filwaqt li l-pjanijiet nazzjonali jistabbilixxu miri usa'. Il-pjanijiet jispeċifikaw ukoll il-mezz biex jiġu appoġġjati l-industriji/is-setturi rilevanti kif ukoll il-perjodi ta' żmien li fihom jeħtieġ li jintlaħqu l-objettivi. Xi pjanijiet għad fihom miri espliċiti tal-produzzjoni, filwaqt li din kienet karatteristika regolari fiċ-ċikli tal-ippjanar preċedenti. Taħt il-pjanijiet, setturi industrijali u/jew proġetti individwali qed jiġu identifikati bħala prijoritajiet (pożittivi jew negattivi) skont il-prijoritajiet tal-gvern u huma attribwiti lilhom għanijiet speċifiċi ta' żvilupp (titjib industrijali, espansjoni internazzjonali, eċċ.). L-operaturi ekonomiċi, kemm privati kif ukoll tal-Istat, iridu jaġġustaw effettivament l-attivitajiet tan-negozju tagħhom skont ir-realtajiet imposti mis-sistema tal-ippjanar. Dan mhux biss minħabba n-natura vinkolanti tal-pjanijiet iżda anki minħabba li l-awtoritajiet Ċiniżi rilevanti fil-livelli kollha tal-gvern jaderixxu mas-sistema ta' pjanijiet u jużaw is-setgħat mogħtija lilhom skont kif ikun meħtieġ, biex b'hekk jisfurzaw lill-operaturi jikkonformaw mal-prijoritajiet stabbiliti fil-pjanijiet (ara wkoll it-taqsima 3.2.2.5 hawn taħt) (34).

(67)

It-tieni nett, fuq il-livell tal-allokazzjoni tar-riżorsi finanzjarji, is-sistema finanzjarja taċ-Ċina hija ddominata mill-banek kummerċjali tal-Istat. Dawn il-banek, meta jkunu qed jistabbilixxu u jimplementaw il-politika tas-self tagħhom, iridu jallinjaw ruħhom mal-objettivi tal-politika industrijali tal-gvern minflok ma jivvalutaw qabel kollox il-merti ekonomiċi ta' proġett partikolari (ara wkoll it-taqsima 3.2.2.8 hawn taħt) (35). L-istess japplika għall-komponenti l-oħra tas-sistema finanzjarja Ċiniża, bħas-swieq tal-istokks, is-swieq tal-bonds, is-swieq tal-ekwità privata, eċċ. Barra minn hekk, dawn il-partijiet tas-settur finanzjarju differenti mis-settur bankarju huma istituzzjonalment u operazzjonalment stabbiliti b'mod li mhuwiex xprunat biex jisfrutta bl-aħjar mod il-funzjonament effiċjenti tas-swieq finanzjarji iżda biex jiżgura l-kontroll u jippermetti l-intervent mill-Istat u mis-CCP (36).

(68)

It-tielet nett, fil-livell ta' ambjent regolatorju, l-interventi mill-Istat fl-ekonomija jieħdu għadd ta' forom. Pereżempju, ir-regoli tal-akkwist pubbliku jintużaw regolarment sabiex jintlaħqu għanijiet ta' politika differenti mill-effiċjenza ekonomika, u b'hekk jimminaw il-prinċipji bbażati fuq is-suq fil-qasam. Il-leġiżlazzjoni applikabbli tistabbilixxi speċifikament li l-akkwist pubbliku għandu jitmexxa bil-għan li jiffaċilita l-kisba tal-miri mfassla mill-politiki tal-Istat. Madankollu, in-natura ta' dawn l-għanijiet għadha mhix iddefinita, u dan iħalli marġni wiesa' ta' apprezzament għall-korpi tat-teħid ta' deċiżjonijiet (37). Bl-istess mod, fil-qasam tal-investiment, il-gvern Ċiniż iżomm kontroll u influwenza sinifikanti fuq id-destinazzjoni u l-kobor tal-investiment kemm tal-Istat kif ukoll privat. L-iskrinjar tal-investiment, kif ukoll diversi inċentivi, restrizzjonijiet, u projbizzjonijiet relatati mal-investiment jintużaw mill-awtoritajiet bħala għodda importanti biex jiġu appoġġjati l-għanijiet tal-politika industrijali bħaż-żamma tal-kontroll tal-Istat fuq setturi ewlenin jew it-tisħiħ tal-industrija domestika (38).

(69)

Fil-qosor, il-mudell ekonomiku Ċiniż huwa bbażat fuq ċerti assjomi bażiċi li jipprevedu u jinkoraġġixxu bosta interventi tal-gvern. Tali interventi sostanzjali tal-gvern jinsabu f'kunflitt mal-azzjoni libera tal-forzi tas-suq, u dan jirriżulta fid-distorsjoni tal-allokazzjoni effettiva tar-riżorsi f'konformità mal-prinċipji tas-suq (39).

(70)

Fir-RPĊ, l-intrapriżi li joperaw taħt is-sjieda, il-kontroll u/jew is-superviżjoni jew il-gwida politika tal-Istat jirrappreżentaw sehem essenzjali mill-ekonomija.

(71)

Fir-rigward tas-sjieda Statali, peress li l-industrija Ċiniża tal-oġġetti taċ-ċeramika li jintużaw fuq il-mejda u fil-kċina hi frammentata ħafna, diffiċli li jinħarġu konklużjonijiet ġenerali rigward ix-xejriet tas-sjieda tas-settur. It-talba tal-applikant kienet tanalizza disa' kumpaniji elenkati, li huma manifatturi relattivament kbar ta' oġġetti li jintużaw fuq il-mejda u fil-kċina u li jesportaw sehem sinifikanti mill-produzzjoni tagħhom. Skont l-applikant, fi tmienja minn dawn id-disa' kumpaniji l-Istat kellu fil-mument tal-analiżi sehem sa 5 %, filwaqt li diversi entitajiet li kienu proprjetà Statali kellhom sehem kumulattiv ta' kważi 50 % fid-disa' kumpanija (40). Il-parteċipazzjonijiet kapitali tal-Istat f'kumpaniji prinċipali oħra li jipproduċu oġġetti taċ-ċeramika li jintużaw fuq il-mejda u fil-kċina (41) jvarjaw minn 46,5 % f'Jiangsu Gaochun, (42) aktar minn 30,34 % f'Jingdezhen Redleaf Ceramics, (43) sa 33 % f'Sanyuan Ceramics (44). Il-Kummissjoni m'għandhiex ċifri għad-dispożizzjoni tagħha dwar il-kumpaniji Ċiniżi l-oħra fis-settur. Għaldaqstant, l-evidenza fil-fajl ma ssostnix sejba ta' sjieda Statali sinifikanti fl-industrija tal-oġġetti taċ-ċeramika li jintużaw fuq il-mejda u fil-kċina.

(72)

Fir-rigward tal-kontroll mill-Istat, il-gvern u s-CCP iħaddnu strutturi li jiżguraw l-influwenza kontinwa tagħhom fuq l-intrapriżi. L-Istat (u f'ħafna aspetti anki s-CCP) mhux biss jifformula u jissorvelja b'mod attiv l-implimentazzjoni ta' politiki ekonomiċi ġenerali minn intrapriżi individwali, iżda jsostni d-drittijiet tiegħu li jieħu sehem fit-teħid ta' deċiżjonijiet operazzjonali. L-elementi li jindikaw l-eżistenza ta' kontroll tal-gvern fuq l-intrapriżi fis-settur tal-oġġetti taċ-ċeramika li jintużaw fuq il-mejda u fil-kċina huma elaborati aktar fit-taqsima 3.2.2.4 aktar 'il quddiem.

(73)

F'dak li għandu x'jaqsam mas-superviżjoni u mal-gwida politiċi mill-Istat fis-settur taċ-ċeramika, l-analiżi hi stabbilita fit-taqsimiet 3.2.2.4 u 3.2.2.5 aktar 'il quddiem. Bil-livell għoli ta' kontroll u ta' intervent mill-gvern fis-settur taċ-ċeramika kif deskritt hawn taħt, anki produtturi tas-settur privat ta' oġġetti taċ-ċeramika li jintużaw fuq il-mejda u fil-kċina lanqas ma jitħallew joperaw bil-kundizzjonijiet tas-suq.

(74)

Fuq il-bażi ta' dan li ntqal hawn fuq, il-Kummissjoni kkonkludiet li s-suq tal-oġġetti taċ-ċeramika li jintużaw fuq il-mejda u fil-kċina fir-RPĊ kien moqdi sew minn intrapriżi soġġetti għal kontroll jew għal superviżjoni jew gwida politika mill-gvern Ċiniż.

(75)

L-Istat Ċiniż jinsab f'pożizzjoni li jinterferixxi fil-prezzijiet u fil-kostijiet permezz tal-preżenza Statali fid-ditti. B'mod partikolari, iċ-ċelloli tas-CCP fl-intrapriżi, bi sjieda Statali u anki dawk bi sjieda privata, jirrappreżentaw mekkaniżmu importanti li permezz tiegħu l-Istat jista' jinterferixxi fid-deċiżjonijiet kummerċjali. Skont il-liġi tal-kumpaniji tar-RPĊ, f'kull kumpanija għandha tiġi stabbilita organizzazzjoni tas-CCP (li jkollha mill-anqas tliet membri tas-CCP kif speċifikat fil-Kostituzzjoni tas-CCP (45)) u l-kumpanija għandha tipprovdi l-kundizzjonijiet meħtieġa għall-attivitajiet tal-organizzazzjoni tal-partit. Fil-passat, dan ir-rekwiżit jidher li mhux dejjem ġie segwit jew infurzat strettament. Madankollu, tal-anqas mill-2016, is-CCP saħħaħ il-pretensjonijiet tiegħu li jikkontrolla d-deċiżjonijiet kummerċjali fl-SOEs bħala kwistjoni ta' prinċipju politiku. Hu rrapportat ukoll li s-CCP jeżerċita pressjoni fuq il-kumpaniji privati biex iqiegħdu l-“patrijottiżmu” bħala prijorità u jsegwu d-dixxiplina tal-partit (46). Fl-2017, ġie rrapportat li kienu jeżistu ċelloli tal-partiti f'madwar 70 % ta' madwar 1,86 miljun kumpanija bi sjieda privata, li rriżulta fi pressjoni dejjem akbar biex l-organizzazzjonijiet tas-CCP ikollhom l-aħħar kelma fir-rigward tad-deċiżjonijiet kummerċjali fil-kumpaniji rispettivi tagħhom (47). Dawn ir-regoli huma ta' applikazzjoni ġenerali fl-ekonomija Ċiniża kollha, fost is-setturi kollha, inkluż is-settur taċ-ċeramika. B'hekk, huwa stabbilit li dawn ir-regoli japplikaw ukoll għall-produtturi ta' oġġetti taċ-ċeramika li jintużaw fuq il-mejda u fil-kċina u għall-fornituri tal-inputs tagħhom.

(76)

B'mod speċifiku fis-settur tal-oġġetti taċ-ċeramika li jintużaw fuq il-mejda u fil-kċina, jeżistu rabtiet b'saħħithom bejn il-proċessi ta' teħid ta' deċiżjonijiet tal-kumpaniji Ċiniżi li jagħmlu oġġetti taċ-ċeramika li jintużaw fuq il-mejda u fil-kċina, u l-Istat, b'mod partikolari s-CCP. Ir-rapport ta' ThinkDesk isemmi l-ismijiet tal-persuni li jokkupaw karigi maniġerjali f'sitta minn dawk il-kumpaniji li jaqdu jew qdew karigi Statali jew pubbliċi (48). Il-Kummissjoni stabbiliet fuq il-bażi ta' sorsi oħra li, b'rabta ma' tlieta minn dawn il-produtturi ewlenin ta' oġġetti taċ-ċeramika li jintużaw fuq il-mejda: il-president tal-bord tad-diretturi u maniġer ġenerali tal-kumpanija fil-kampjun Guangdong Songfa Ceramics Co. Ltd, wieħed mill-akbar esportaturi fis-suq tal-Unjoni, serva bħala delegat għall-11-il Kungress Nazzjonali tal-Poplu taċ-Ċina (49) u kien membru tat-12-il Kungress tal-Poplu tal-Provinċja ta' Guangdong (50); il-president ta' kumpanija oħra elenkata ta' Guangdong - Great Wall of Cultural Group Holding Co Ltd. - kellu l-kariga ta' delegat għall-imsemmi 12-il Kungress tal-Poplu tal-Provinċja ta' Guangdong (51); il-president tal-kumpanija kkwotata Guangdong Sitong Group Co., Ltd. kien membru wkoll tal-Kumitat Muniċipali ta' Chaozhou tal-Konferenza Konsultattiva Politika tal-Poplu (52); barra minn hekk, il-viċi president u maniġer ġenerali tal-istess kumpanija kien qed jokkupa fl-istess ħin il-kariga ta' membru tal-kumitat Permanenti tat-13-il Kungress Muniċipali tal-Poplu ta' Chaozhou (53). Barra minn hekk, il-Kummissjoni stabbilixxiet li l-kandidati kollha li kellhom jiġu eletti fl-2018 bħala direttur mhux indipendenti fil-bord ta' Songfa Ceramics Co. Ltd kienu membri tas-CCP (54).

(77)

Il-Kummissjoni sabet ukoll fir-rigward ta' Songfa Ceramics li fl-2017 u fl-2018 il-kumpanija bbenefikat minn trasferimenti finanzjarji li ġew definiti fil-kontijiet tagħha bħala “sussidji għall-ispejjeż għall-attivitajiet tal-membri tal-Partit b'rabta ma' ‘żewġ tipi ġodda ta' organizzazzjonijiet’” (55). It-terminu “żewġ tipi ġodda ta' organizzazzjonijiet” jiddefinixxi politika Statali mmirata lejn il-ħolqien ta' organizzazzjonijiet ta' bażi (essenzjalment ċelloli tal-partit) f'intrapriżi korporattivi u f'“organizzazzjonijiet soċjali” (56). Indipendentement mill-ammont ta' trasferimenti finanzjarji lil Songfa, is-sempliċi fatt li jeżistu hu prova tar-rabta mill-qrib bejn l-intrapriżi li jipproduċu l-prodotti taċ-ċeramika u s-CCP, u l-fatt li s-CCP jiżviluppa l-attivitajiet tiegħu fi ħdan il-kumpanija.

(78)

Il-preżenza u l-intervent tal-Istat fis-swieq finanzjarji (ara wkoll it-taqsima 3.2.2.8 hawn taħt) kif ukoll fil-provvista ta' materja prima u ta' inputs iħallu effett ta' distorsjoni addizzjonali fuq is-suq (57).

(79)

Fuq il-bażi ta' dan kollu li ntqal hawn fuq, il-Kummissjoni kkonkludiet li l-preżenza tal-Istat fid-ditti fis-settur tal-oġġetti taċ-ċeramika li jintużaw fuq il-mejda u fil-kċina, kif ukoll fis-settur finanzjarju u f'setturi ta' inputs oħrajn, flimkien mal-qafas deskritt fit-taqsima 3.2.2.3 u fit-taqsimiet sussegwenti, tippermetti lill-GOC jinterferixxi fir-rigward tal-prezzijiet u tal-kostijiet.

(80)

Id-direzzjoni tal-ekonomija Ċiniża hi sa ċertu punt sinifikanti ddeterminata minn sistema elaborata ta' ppjanar li tistabbilixxi l-prijoritajiet u tippreskrivi l-għanijiet li fuqhom iridu jiffokaw il-gvernijiet ċentrali u lokali. Jeżistu pjanijiet rilevanti fil-livelli kollha tal-gvern u dawn ikopru kważi s-setturi ekonomiċi kollha. L-objettivi stabbiliti mill-istrumenti tal-ippjanar huma ta' natura vinkolanti u l-awtoritajiet f'kull livell amministrattiv jimmonitorjaw l-implimentazzjoni tal-pjanijiet mil-livell l-aktar baxx korrispondenti tal-gvern. B'mod ġenerali, is-sistema ta' ppjanar fiċ-Ċina tirriżulta f'riżorsi mmexxija għal setturi mfassla bħala strateġiċi jew inkella politikament importanti mill-gvern, minflok ma jiġu allokati f'konformità mal-forzi tas-suq (58).

(81)

Is-settur taċ-ċeramika taċ-Ċina, li jinkludi l-produzzjoni ta' oġġetti taċ-ċeramika għall-konsum, bħal oġġetti taċ-ċeramika li jintużaw fuq il-mejda u fil-kċina, hu settur li jirrekjedi ħafna ħaddiema, li jħaddan valur tradizzjonali fiċ-Ċina, u b'rabta ma' dan, l-Istat Ċiniż kien qed jissorvelja, imexxi u jimmaniġġja mill-qrib l-iżvilupp tiegħu permezz ta' diversi dokumenti ta' ppjanar (59). Il-produzzjoni ta' oġġetti taċ-ċeramika li jintużaw fuq il-mejda u fil-kċina hi rregolata minn ġabra ta' regoli taċ-Ċina relatata mal-industriji ħfief, permezz tal-istrument prevalenti tat-13-il Pjan ta' Żvilupp tal-Industrija Ħafifa għas-snin 2016-2020. Dan il-Pjan tal-aħħar isemmi jiddikjara b'mod partikolari li għas-setturi kollha koperti (għaldaqstant anki għas-settur tal-oġġetti li jintużaw fuq il-mejda u fil-kċina), hu jimplimenta l-ispirtu tad-deċiżjonijiet meħuda fil-Kungress Nazzjonali tas-CPC u f'firxa ta' Sessjonijiet Plenarji tat-18-il Kungress tal-Partit. Dan il-pjan jimponi diversi dispożizzjonijiet fis-setturi koperti (inkluż is-settur tal-oġġetti taċ-ċeramika li jintużaw fuq il-mejda u fil-kċina) rigward il-ġestjoni tal-provvista u tad-domanda, l-organizzazzjoni strutturali korporattiva, il-ġestjoni tal-katina ta' valur, ix-xejriet tal-esportazzjonijiet, kif ukoll l-ippjanar tal-produzzjoni u tal-investimenti. Jistabbilixxi mira ta' tkabbir annwali ta' 6-7 % għall-valur miżjud fis-setturi kkonċernati. Jelenka wkoll għadd ta' miżuri ta' appoġġ, li l-għan tagħhom hu b'mod partikolari li jiggwidaw lill-intrapriżi tal-industrija ħafifa biex jiksbu kompetittività internazzjonali (60). Għas-settur taċ-ċeramika, dan jistipula dispożizzjonijiet dettaljati ħafna dwar l-iżvilupp tal-prodotti. Fost l-oħrajn, b'rabta mal-prodotti tal-pożati u r-reċipjenti għal fuq il-mejda u tal-oġġetti tal-kċina taċ-ċeramika, l-Istat jordna “l-iżvilupp bi prijorità ta' prodotti tal-konsum b'riżorsi baxxi bħall-porċellana fina ta' grad għoli, porċellana b'livell għoli ta' kwarz, porċellana biż-żieda ta' terra, porċellana b'livell għoli ta' feldspar, u prodotti ekoloġiċi taċ-ċeramika għad-dar mingħajr dissoluzzjoni qawwija ta' metall; jissaħħu l-kapaċitajiet tal-intrapriżi għall-innovazzjoni u għat-tfassil tal-produzzjoni; jiżdied il-valur miżjud tal-prodotti; jissaħħu l-legat u l-iżvilupp tat-tekniki tradizzjonali taċ-ċeramika artistika; jiġu żviluppati prodotti fini taċ-ċeramika artistika ta' prijorità; jiġu żviluppati materjali b'purità għolja, ultrafini taċ-ċeramika u ta' prijorità bi prestazzjonijiet straordinarji bħal materjali b'saħħa kbira, b'reżistenza għolja, li jifilħu għal temperatura għolja, reżistenti għall-korrużjoni, reżistenti għal xokkijiet termali, reżistenti għal metall imdewweb eċċ, materjali għall-iskambju tas-sħana f'ċeramika bi prestazzjonijiet għolja, materjali għal membrani ġodda taċ-ċeramika bi prestazzjoni għolja, materjali taċ-ċeramika tad-dar ta' kwalità għolja.” (61) Fih ukoll dispożizzjonijiet rigward l-attivitajiet ta' esportazzjoni tal-kumpaniji: “[…] Il-ħakma attiva ta' swieq ġodda u emerġenti bħal-Lvant Nofsani, ir-Russja, l-Afrika, l-Ewropa, ix-Xlokk tal-Asja, il-Punent tal-Asja, l-Amerka t'Isfel, l-Amerka Ċentrali, eċċ.”; “it-tisħiħ tal-kooperazzjoni internazzjonali fil-kapaċità tal-produzzjoni, l-appoġġ għall-intrapriżi ta' ditti biex ‘jilħqu’ [swieq barranin], it-twaqqif ta' ċentri loġistiċi u ta' ċentri ta' distribuzzjoni fi swieq kbar tal-bejgħ,[…]” (62). Bħala waħda mill-miżuri għall-implimentazzjoni tal-għanijiet imsemmija hawn fuq, il-Pjan jistipula l-istrumenti Ċiniżi li jimmaniġġjaw id-dħul fis-suq – b'mod partikolari l-leġiżlazzjoni li tirrestrinġi l-investimenti f'ċerti setturi: “Il-Kunsill tal-Istat għandu jistabbilixxi b'mod ċar, fil-forma ta' lista, l-industriji, l-oqsma, is-setturi kummerċjali li fihom l-operazzjonijiet ta' investiment huma projbiti jew ristretti.” Barra minn hekk, l-Istat jelenka fil-Pjan firxa ta' miżuri ta' appoġġ li se tkun disponibbli biex jiġu sostnuti s-setturi kkonċernati (għaldaqstant anki l-produzzjoni tal-oġġetti taċ-ċeramika li jintużaw fuq il-mejda u fil-kċina) bħal, fost l-oħrajn, fondi ta' innovazzjoni, self preferenzjali, inċentivi għall-esportazzjoni, trasferimenti finanzjarji, ħelsien mit-taxxa, ħelsien mill-kost tal-użu tal-art jew skemi ta' stabbilizzazzjoni tal-impjiegi. L-evidenza fil-fajl ipprovdut fit-talba tal-Applikant, u bbażata fuq ir-Rapporti Annwali ta' diversi kumpaniji li jagħmlu oġġetti taċ-ċeramika li jintużaw fuq il-mejda u fil-kċina tinkludi eżempji tat-tali miżuri ta' sostenn (63).

(82)

L-intervent tal-GOC fis-settur tal-oġġetti taċ-ċeramika li jintużaw fuq il-mejda u fil-kċina ma jidhirix biss mill-Pjan ċentrali deskritt hawn fuq, iżda anki minn firxa sħiħa ta' dokumenti ta' ppjanar minn fuq għal isfel maħruġa fil-livelli kollha – minn nazzjonali sa munċipali. Eżempju speċifiku hu l-Provinċja ta' Guangdong, li tospita l-ogħla numru ta' produtturi esportaturi li kkooperaw f'din l-investigazzjoni, u tirrappreżenta l-akbar produzzjoni ta' oġġetti taċ-ċeramika fiċ-Ċina (64). F'din il-Provinċja, bejn l-2016 u l-2018 is-settur kien irregolat minn Pjan reġjonali - il-pjan ta' azzjoni dwar it-triq għat-trasformazzjoni u għall-aġġornar tat-teknoloġija tal-industrija taċ-ċeramika ta' Guangdong (minn hawn 'il quddiem il-“Pjan ta' Azzjoni ta' Guangdong”) (65). F'konformità mad-dokumenti ta' ppjanar ċentrali, il-Pjan ta' Azzjoni ta' Guangdong jistipula b'mod partikolari, fost l-objettivi ewlenin tiegħu, “l-ottimizzazzjoni kontinwa tal-istrutturi industrijali: [permezz taż-]żieda sinifikanti [tas-]sehem ta' […] prodotti b'valur miżjud għoli; il-[bini] ta' mill-anqas żewġ bażijiet ta' dimostrazzjoni nazzjonali għal mudell ġdid ta' industrijalizzazzjoni; [it-]trawwim [ta'] tal-anqas: żewġ raggruppamenti industrijali ta' aktar minn RMB 50 biljun, 1-2 intrapriżi (gruppi) b'introjtu annwali min-negozju prinċipali ta' aktar minn RMB 10 biljun, u 40 intrapriża b'introjtu annwali min-negozju prinċipali ta' aktar minn RMB 1 biljun.” (66) It-tali Pjan ta' Azzjoni jordna wkoll “it-titjib tal-livell ta' żvilupp industrijali”, fost l-oħrajn: billi “jiġu ottimizzati r-raggruppamenti industrijali: billi jkompli jitħaffef il-bini ta' bażijiet tal-produzzjoni taċ-ċeramika bħal Foshan, Chaozhou, Meizhou u Qingyuan”, billi “[Tiġi] estiża l-katina ta' valur tal-industrija: bl-integrazzjoni attiva fil-katina ta' valur tal-industrija taċ-ċeramika globali,” [u] “bil-parteċipazzjoni attiva fl-iskambji u fil-kooperazzjoni internazzjonali: billi [jsir] użu sħiħ minn żewġ tipi ta' riżorsi (67) u minn żewġ tipi ta' swieq (68), bl-implimentazzjoni tal-istrateġija ta' espansjoni barra mill-pajjiż (go-out strategy), bit-titjib tal-kompetittività internazzjonali tal-industrija.” (69) Il-Pjan ta' Azzjoni ta' Guangdong, filwaqt li jsegwi l-linji tat-13-il FYP ċentrali dwar l-Industriji Ħfief, jistabbilixxi gwida mmirata b'mod speċifiku għall-iżvilupp tal-prodotti li għandha tiġi adottata mill-produtturi taċ-ċeramika ta' Guangdong: “Fir-rigward taċ-ċeramika (artistika) għad-dar: l-iżvilupp ta' settijiet ta' livell għoli u kompluti ta' prodotti kif ukoll ċeramika għad-dar mibdula fi prodotti tal-arti u ċeramika artistika mibdula fi prodotti tad-dar; l-iżvilupp konġunt ta' materjali bħal ċeramika tal-ħġieġ, porċellana msaħħa, kina fina, porċellana tal-manjeżja, porċellana b'livell għoli ta' kwarz, enamel ta' grad għoli, eċċ; l-iżvilupp ta' żilġiet fini tal-kulur.” (70) Fl-aħħar mill-aħħar, il-Pjan ta' Azzjoni jistabbilixxi distribuzzjoni speċifika tar-rwoli fir-rigward tal-implimentazzjoni tad-dispożizzjonijiet tiegħu, filwaqt li jassenja dawn il-kompiti ta' eżekuzzjoni, b'mod partikolari: għall-Kummissjoni Ekonomika u tat-Teknoloġija tal-Informazzjoni tal-Provinċja fit-“teħid tar-riedni fil-koordinazzjoni u fl-iggwidar tat-trasformazzjoni u tal-aġġornament tal-industrija taċ-ċeramika fil-provinċja kollha”, għad-Dipartiment tal-Ħarsien tal-Ambjent tal-Provinċja fis-“superviżjoni u fl-iggwidar tal-awtoritajiet lokali għall-ħarsien tal-ambjent li, skont il-liġi, jipproċedu għall-evalwazzjoni u għall-approvazzjoni tal-ħarsien tal-ambjent, għall-awtorizzazzjoni tal-ħarsien tal-ambjent u għas-superviżjoni u għall-ġestjoni ambjentali ta' kuljum ta' proġetti tal-industrija taċ-ċeramika,”, għad-Dipartimenti tal-art u tar-riżorsi, tal-finanzi, tat-tassazzjoni u tal-enerġija elettrika tal-Provinċja fit-“twettiq ta' dmirijiethom biex jiżguraw li l-politiki rilevanti jkunu implimentati kif xieraq”, u għal kull awtorità kompetenti tal-belt għall-ekonomija u għat-teknoloġija tal-informazzjoni fl-“iżgurar tal-koordinazzjoni u tal-kooperazzjoni msaħħa tad-dipartimenti rilevanti kif ukoll il-ġestjoni konġunta, biex jiġi żgurat li l-proġetti ta' trasformazzjoni u ta' aġġornat tal-intrapriżi ewlenin jitwaqqfu minnfih, skont l-iskeda ppjanata.” (71)

(83)

Kif muri fil-premessa ta' qabel rigward il-Provinċja ta' Guangdong, il-ġestjoni tas-settur taċ-ċeramika fil-Provinċja tinżel sal-aktar livell lokali. Bħala eżempju, il-produtturi ta' oġġetti taċ-ċeramika fil-Belt ta' Chaozhou - wieħed mis-siti ta' produzzjoni taċ-ċeramika ewlenin (72) (imsemmi fil-Pjan ta' Azzjoni ta' Guangdong) - huma marbuta li jirrispettaw il-pjan settorjali lokali wkoll: il-Pjan Direzzjonali u l-Pjan ta' Azzjoni tal-Belt ta' Chaozhou għat-Trasformazzjoni u għall-Aġġornament Teknoloġiku tas-Settur taċ-Ċeramika (73) (minn hawn 'il quddiem imsejjaħ il-Pjan ta' Azzjoni ta' Chaozhou), li minnu nnifsu jissodisfa l-ittra ta' pjan industrijali ġenerali għall-belt (it-13-il FYP għall-Iżvilupp Ekonomiku u Soċjali tal-Belt ta' Chaozhou) (74). Il-Pjan ta' Azzjoni ta' Chaozhou b'mod partikolari ta struzzjonijiet speċifiċi dwar x'għandha tikseb il-belt f'termini tal-istruttura u tal-produzzjoni industrijali – l-għanijiet kienu jikkonsistu, pereż. f'li l-belt tospita ta' tal-anqas ħames produtturi b'valur tal-produzzjoni annwali ta' aktar minn RMB 500 miljun jew tal-anqas għaxar kumpaniji li jiġu kkwotati fis-suq tal-istokks (bl-appoġġ ta' miżuri speċjali tal-Istat (75)) sal-2018. Il-Pjan ta' Azzjoni ta' Chaozhou rregola wkoll l-għanijiet tal-belt f'termini tal-istruttura tal-prodotti: sa tmiem il-perjodu ta' ppjanar, tal-anqas 10 % tal-intrapriżi l-kbar kellhom jużaw teknoloġija għolja, filwaqt li s-sehem ta' prodotti introdotti ġodda kien ikollu jgħodd għal tal-anqas 10 % mill-fatturat (76).

(84)

Chaozhou mhix l-unika belt fejn l-operazzjonijiet tal-kumpaniji huma soġġetti għall-ippjanar tal-Istat: il-manifatturi taċ-ċeramika fil-belt ta' Foshan, bażi kbira oħra ta' produzzjoni taċ-ċeramika msemmija fil-Pjan ta' Azzjoni ta' Guangdong, huma soġġetti għall-Pjan tal-Muniċipalità ta' Foshan għall-iżvilupp ta' industrija moderna taċ-ċeramika 2010-2020 (“il-Pjan ta' Foshan”) (77). Skont id-dokument imsemmi l-aħħar, l-industrija lokali trid tissawwar mill-ġdid “skont il-prinċipju ta' appoġġ ta' numru kbir ta' intrapriżi, ta' trasformazzjoni u ta' aġġornar ta' ċerti intrapriżi, ta' trasformazzjoni u ta' eliminazzjoni ta' numru ta' intrapriżi”, filwaqt li tiġi żgurata t-trasformazzjoni gradwali tal-industrija taċ-ċeramika kurrenti minn industrija ta' livell baxx għal waħda ta' livell għoli (78). Il-Pjan ta' Foshan stabbilixxa firxa gradwali ta' miri kwantitattivi u kwalitattivi tal-produzzjoni għall-kumpaniji lokali: sal-2012 “iż-żamma tal-iżvilupp kostanti u tat-tkabbir moderat tal-industrija biex jintlaħqu t-RMB 72 biljun; jiġi żgurat li jkun hemm 10 intrapriżi li l-valur tal-produzzjoni annwali tagħhom jaqbeż il-RMB 1 biljun; gradwalment għandhom ifeġġu industriji taċ-ċeramika tal-kostruzzjoni, taċ-ċeramika sanitarja, taċ-ċeramika artistika, ta' ċeramika speċjali u dawk kreattivi taċ-ċeramika ta' livell għoli”; sal-2015 “iż-żamma tal-iżvilupp kostanti u tat-tkabbir moderat tal-industrija biex tilħaq it-RMB 80 biljun; jiġi żgurat li jkun hemm żewġ intrapriżi li l-valur tal-produzzjoni annwali tagħhom jaqbeż iż-RMB 2 biljun u 15-il intrapriża li l-valur tal-produzzjoni annwali tagħhom jaqbeż il-RMB 1 biljun; [u] is-sehem relattiv tal-industriji taċ-ċeramika tal-kostruzzjoni, taċ-ċeramika sanitarja, taċ-ċeramika artistika, taċ-ċeramika speċjali u tal-industriji kreattivi taċ-ċeramika fl-industrija kumplessiva taċ-ċeramika għandu jiżdied b'mod sinifikanti.”; filwaqt li fit-terminu medju u fit-tul (2016-2020), f'konformità mal-pjan ta' Foshan: “il-volum tal-produzzjoni għandu jżomm il-pożizzjoni fuq quddiem nett taċ-Ċina fl-industrija taċ-ċeramika kif ukoll sehem importanti tal-industrija taċ-ċeramika tad-dinja [u] indikaturi bħall-valur u l-volum tal-produzzjoni ġenerali taċ-ċeramika, il-profitt, il-proporzjon tan-nefqa fuq ir-R&Ż, il-kontenut ekonomiku ġenerali, eċċ. għandhom jilħqu livell relattivament għoli, biex jiġi żgurat li Foshan effettivament issir il-belt kapitali taċ-ċeramika' tad-dinja.” (79)

(85)

Il-Kummissjoni kkunsidrat li l-ġabra msemmija hawn fuq ta' evidenza rigward is-settur tal-oġġetti taċ-ċeramika li jintużaw fuq il-mejda u fil-kċina kien biżżejjed biex jitqies li l-politiki jew il-miżuri pubbliċi jinfluwenzaw il-forzi tas-suq ħieles fis-settur taċ-ċeramika.

(86)

Fi kwalunwke każ, rigward id-distorsjonijiet fil-materja prima, is-CCCLA allegat li ma kienet teżisti ebda distorsjoni fil-materja prima użata fil-produzzjoni tal-prodott taħt rieżami. Is-CCCLA ma pprovidet ebda evidenza li ssostni l-allegazzjoni tagħha. Il-Kummissjoni tinnota li filwaqt li hi ma kinitx meħtieġa tagħmel analiżi bħal din fir-rigward tal-materja prima użata fil-produzzjoni tal-prodott taħt rieżami biex tistabbilixxi li l-ordnijiet pubbliċi jaffettwaw il-forzi tas-suq ħieles fis-settur tal-oġġetti li jintużaw fuq il-mejda, hi sabet numru enormi ta' dokumenti u ta' miżuri tal-ordnijiet pubbliċi li għandhom il-potenzjal li jinfluwenzaw il-libertà tal-forzi tas-suq fis-suq tal-materja prima użata fil-produzzjoni ta' oġġetti taċ-ċeramika li jintużaw fuq il-mejda u fil-kċina.

(87)

Fir-rigward tal-kwarz (kodiċi SA 250510), li jintuża ħafna mill-industrija taċ-ċeramika fiċ-Ċina, il-pjan komprensiv ta' Jiangxi (80) għar-riżorsi minerali 2016-2020 (81) jelenka l-kwarz mitħun fi trab bħala wieħed mill-minerali soġġetti għall-ġestjoni tal-politika tal-Istat, b'mod partikolari wieħed li għalih iridu jiżdiedu s-sigurtà tal-provvista u l-kapaċità tal-provvista (82). It-trab tal-kwarz hu inkluż ukoll fil-mekkaniżmu ta' regolamentazzjoni kwantitattiva tal-Istat għall-iżvilupp u għall-użu bħala wieħed mill-minerali li l-estrazzjoni u l-iżvilupp tiegħu għandhom jitħeġġu (83). Ir-ramel tal-kwarz għaċ-ċeramika jissemma wkoll fit-13-il FYP Nazzjonali dwar ir-Riżorsi Nazzjonali 2016-2020 (84) bħala wieħed mill-minerali li għalihom japplikaw kriterji dwar id-daqs minimu għall-ftuħ ta' minjieri (85).

(88)

Fir-rigward tal-bentonit (kodiċi SA 250810), materja prima oħra użata f'ċerti proċessi tal-manifattura tal-oġġetti taċ-ċeramika li jintużaw fuq il-mejda u fil-kċina, il-pjan komprensiv ta' Jiangxi għar-riżorsi minerali (ara aktar 'il fuq) jelenkah bħala wieħed mill-minerali li għalihom l-iżvilupp u l-esplorazzjoni jridu jitħaffu “biex il-vantaġġ tar-riżorsa jissarraf f'vantaġġ ekonomiku mill-aktar fis possibbli” (86).

(89)

Fir-rigward tal-pigmenti (kodiċi SA 320710), li jintużaw ħafna fil-produzzjoni ta' oġġetti taċ-ċeramika li jintużaw fuq il-mejda u fil-kċina, dawn jissemmew fil-Pjan ta' żvilupp għall-kapaċitajiet tal-industrija, tat-teknoloġija u tal-innovazzjoni (2016-2020), (87) bħala waħda mill-oqsma ta' żvilupp ta' prijorità tal-industrija petrokimika u kimika, bl-Istat li jordna fil-pjan biex “tiġi żgurata l-produzzjoni sostnuta ta' madwar 1 000 tunnellata pigmenti tal-ftaloċjanina, pigmenti organiċi eteroċikliċi u tipi oħra ta' pigmenti organiċi” (88).

(90)

Fir-rigward tal-ġipsum (kodiċi SA 252010), din il-materja prima tissemma fit-13-il FYP nazzjonali dwar ir-riżorsi minerali (ara aktar 'il fuq) bħala wieħed mill-minerali li għalihom japplikaw kriterji dwar id-daqs minimu għall-ftuħ ta' minjieri (89).

(91)

Finalment, il-kawlina (kodiċi SA 2507), li tikkostitwixxi waħda mill-materji primi ewlenin fil-produzzjoni ta' oġġetti taċ-ċeramika li jintużaw fuq il-mejda u fil-kċina, hi koperta minn diversi dokumenti ta' ppjanar reġjonali u lokali li jindirizzaw il-ġestjoni tal-estrazzjoni u tal-produzzjoni. B'mod partikolari, il-Pjan dwar ir-Riżorsi Minerali tal-Provinċja ta' Guangxi (90) (2016-2020) (91) jistabbilixxi dispożizzjonijiet rigward il-Bażi Industrija tar-Riżorsi tal-Kawlina f'Hepu, u dan jimplika “l-espansjoni tal-estrazzjoni tal-ħamrija tal-kawlina ta' Hepu, it-titjib tal-kapaċità u tal-livell ta' proċessar fil-fond tal-kawlina, u l-iffokar fuq l-iżvilupp taċ-ċeramika tal-kostruzzjoni, sanitarja, għad-dar u artistika, tal-industrija tal-kawlina għall-karta u għat-tpinġija, u ż-żieda ulterjuri tal-valur miżjud tal-prodotti minerali; sal-2020, l-istabbiliment ta' qafas bi tmien intrapriżi ċentrali sa għaxra għall-ipproċessar fil-fond tal-kawlina, u t-trasformazzjoni taż-żona ta' Hepu f'bażi ta' produzzjoni ewlenija tal-kawlina fuq livell nazzjonali.” (92) Dan fih ukoll dispożizzjonijiet immirati lejn it-tiswir tal-istrutturi u tal-kapaċità tal-estrazzjoni industrijali, inkluż fir-rigward tal-provvista tal-kawlina: “Skont il-ħtiġijiet tal-iżvilupp ekonomiku u soċjali, aħna nippromwovu bis-saħħa l-iżvilupp ta' karatteristiċi speċifiċi, ta' vantaġġi u ta' industriji tar-riżorsi minerali emerġenti. L-enfasi fuq minerali bħal […], il-kawlina, […], filwaqt li jitqiesu l-kundizzjonijiet tar-riżorsi, f'oqsma b'kapaċità ta' relevanza ambjentali b'saħħitha u b'faċilitajiet komprensivi ta' appoġġ, aħna għandna nippromwovu l-bini ta' minjieri kbar u medji b'kompetittività fis-suq, niżguraw il-konċentrazzjoni tal-industrija u l-iżvilupp skont skala b'mod effettiv biex intejbu l-livell tal-kapaċità tal-provvista, l-estrazzjoni u tal-użu tal-minerali ewlenin” (93). Finalment, il-Pjan jirregola l-kapaċitajiet minimi tal-produzzjoni għall-kumpaniji tal-estrazzjoni billi jistabbilixxi volumi minimi tal-estrazzjoni skont il-kategorija tal-kumpaniji, inkluż għall-produzzjoni tal-kawlina (94).

(92)

Is-suq għall-produzzjoni tal-kawlina hu kopert ukoll mill-Pjan dwar ir-Riżorsi Minerali tal-Provinċja ta' Guangdong (2016-2020) (95), li hu ta' importanza partikolari, peress li l-Provinċja ta' Guangdong hi importanti għall-produzzjoni taċ-ċeramika (ara l-premessa (82)). B'mod simili għall-Pjan dwar il-Provinċja ta' Guangxi deskritt hawn fuq, il-Pjan ta' Guangdong jipproponi diversi dispożizzjonijiet rigward il-ġestjoni u l-ippjanar tal-estrazzjoni u tal-produzzjoni tal-minerali, inkluż fir-rigward tal-kawlina. B'mod partikolari, fost il-kunċetti ta' gwida tiegħu, dan jistabbilixxi: “(…) jitħaffu l-azzjonijiet u l-miri strateġiċi biex jiġi żgurat avvanz qawwi fir-rigward tal-prospettar tal-minerali, it-titjib tal-pjanijiet ta' esplorazzjoni, ta' estrazzjoni u ta' protezzjoni tar-riżorsi” jew it-“tfassil ulterjuri ta' riformi strutturali min-naħa tal-provvista” (96).

(93)

Bħal fil-każ tal-produzzjoni tal-oġġetti taċ-ċeramika li jintużaw fuq il-mejda u fil-kċina, id-dokumenti ta' ppjanar rigward il-kawlina jestendu mill-provinċja kkonċernata sal-livell muniċipali. Bħala eżempju, il-belt ta' Beihai, fil-Provinċja ta' Guangxi (ara aktar 'il fuq), għandha l-pjan tagħha stess dedikat għall-ġestjoni tar-riżorsi minerali (97), li fih dispożizzjonijiet dwar l-estrazzjoni u l-produzzjoni tal-kawlina. B'mod partikolari, għan-nisġa industrijali tal-belt dan il-pjan jistabbilixxi l-miri ta' estrazzjoni, ta' produzzjoni u ta' użu li ġejjin għar-riżorsi minerali: “sal-2020, l-iżgurar tal-iżvilupp ekonomiku kostanti tal-industrija tal-estrazzjoni tal-belt sħiħa, l-iżgurar li l-industrija tal-minerali tilħaq l-RMB 450 miljun f'valur tal-produzzjoni u volum tal-produzzjoni ta' minerali ta' 9 miljun tunnellata,” u l-għanijiet industrijali li ġejjin, inkluż għall-kawlina u għar-ramel tal-kwarz: “fuq il-bażi tal-kapaċità tal-estrazzjoni eżistenti, enfasi fuq l-estrazzjoni u l-użu tal-kawlina u tar-ramel tal-kwarz biex jintużaw għall-ħġieġ [u] jitwaqqfu l-akbar bażi ta' proċessar, ta' importazzjoni u ta' esportazzjoni ta' Guangxi għall-kawlina (fuħħar taċ-ċeramika), għar-ramel tal-kwarz b'purità għolja u għal prodotti minerali mhux ferrużi oħra, l-akbar bażi tal-manifattura taċ-ċeramika, u l-akbar bażi tal-produzzjoni tas-siment.” (98) Il-Pjan ifassal ukoll miri għall-2025, inkluż għaż-żidiet fl-użu u fil-produzzjoni: “L-iżvilupp bis-saħħa tal-estrazzjoni u tal-użu ta' materjali mhux ferrużi u tal-kostruzzjoni; l-enfasi fuq l-iżvilupp tal-industriji tal-proċessar fil-fond bħall-kawlina, ir-ramel tal-kwarz li għandu jintuża għall-ħġieġ, eċċ; l-istinkar biex jiġi żgurat li l-industrija minerali tilħaq is-RMB 600 miljun f'valur tal-produzzjoni sal-2025;[…]; l-espansjoni u l-industrijalizzazzjoni effettivi u sinifikanti tal-estrazzjoni; iż-żieda sinifikanti fl-użu ekonomiku u intensiv tar-riżorsi minerali”. B'mod partikolari dan jindika wkoll l-għan ċar tal-awtoritajiet lokali, li hu li “jiksbu ġestjoni komprensiva tal-industrija tal-minerali.” (99) Wieħed mill-elementi li fuqhom hi msejsa din il-politika ta' ġestjoni hija r-regolamentazzjoni tal-istruttura u tal-produzzjoni tal-industrija lokali: “Id-determinazzjoni ta' żona tal-estrazzjoni prinċipali waħda għall-belt sħiħa: Żona tal-estrazzjoni importanti tal-kawlina f'Hepu, li tkopri 542,49km2. F'din iż-żona tal-estrazzjoni prinċipali bħalissa hemm 6 minjieri kbar tal-kawlina. Sal-2020, l-għadd ta' minjieri tal-kawlina f'din iż-żona tal-estrazzjoni prinċipali għandu jkun ikkontrollat billi jinżamm għal tmienja jew anqas u d-daqs tal-produzzjoni għandu jkun kbir jew medju. Fost it-tmien żoni previsti, seba' żoni diġà ġew delineati, u waħda għadha trid tiġi delineata.” (100)

(94)

Kif muri fid-Dokumenti tal-ippjanar imsemmija aktar 'il fuq, jidher li l-GOC jiggwida l-iżvilupp tas-settur tal-pożati u r-reċipjenti għal fuq il-mejda u tal-oġġetti tal-kċina taċ-ċeramika skont firxa wiesgħa ta' għodod tal-politika u ta' direttivi li huma relatati, fost l-oħrajn: mal-kompożizzjoni u r-ristrutturar tas-suq, mal-materja prima, mal-investiment, mal-ġestjoni tal-kapaċità, mal-medda ta' prodotti, mal-post ġeografiku, mat-titjib, eċċ. Permezz ta' dawn il-mezzi u ta' oħrajn, il-GOC jidderieġi u jikkontrolla firxa sħiħa ta' aspetti fl-iżvilupp u fil-funzonament tas-settur (101). Il-problema attwali ta' kapaċità eċċessiva fis-settur tal-oġġetti taċ-ċeramika li jintużaw fuq il-mejda u fil-kċina, kif deskritta fit-taqsima 3.3.1 hawn taħt, hija bla dubju l-aktar illustrazzjoni ċara tal-implikazzjonijiet tal-politiki tal-GOC u tad-distorsjonijiet li jirriżultaw (102).

(95)

Kollox ma' kollox, il-Kummissjoni stabbilixxiet li l-GOC għandu ordnijiet pubbliċi fis-seħħ li jinfluwenzaw il-forzi tas-suq ħieles fis-settur tal-oġġetti taċ-ċeramika li jintużaw fuq il-mejda u fil-kċina, inkluża l-materja prima użata f'dak is-settur.

(96)

Skont l-informazzjoni fil-fajl, is-sistema Ċiniża tal-falliment mhijiex adegwata biex tilħaq l-objettivi ewlenin tagħha stess, bħal dawk ta' saldu ġust tal-pretensjonijiet u tad-djun u ta' salvagwardja tad-drittijiet u tal-interessi legali tal-kredituri u tad-debituri. Dan jidher li hu msejjes fil-fatt li filwaqt li l-liġi Ċiniża dwar il-falliment tiddependi b'mod formali fuq prinċipji li huma simili għal dawk applikati fil-liġijiet korrispondenti f'pajjiżi oħra barra ċ-Ċina, is-sistema Ċiniża hi kkaratterizzata minn nuqqas ta' infurzar sistematiku. L-għadd ta' fallimenti jibqa' notorjament baxx fir-rigward tad-daqs tal-ekonomija tal-pajjiż, mhux l-inqas minħabba li l-proċedimenti ta' insolvenza jbatu minn għadd ta' nuqqasijiet, li effettivament jiffunzjonaw bħala diżinċentiv għall-preżentazzjonijiet ta' fallimenti. Barra minn hekk, ir-rwol tal-Istat fil-proċedimenti ta' insolvenza għadu wieħed b'saħħtu u attiv, li spiss ikollu influwenza diretta fuq l-eżitu tal-proċedimenti (103).

(97)

Barra minn hekk, in-nuqqasijiet tas-sistema tad-drittijiet ta' proprjetà huma partikolarment ovvji fir-rigward tas-sjieda tad-drittijiet tal-art u tal-użu tal-art fiċ-Ċina (104). L-art kollha hija proprjetà tal-Istat Ċiniż (art rurali ta' proprjetà kollettiva u art urbana tal-Istat). L-allokazzjoni tagħha tibqa' dipendenti biss fuq l-Istat. Hemm dispożizzjonijiet legali li għandhom l-għan li jallokaw drittijiet għall-użu tal-art b'mod trasparenti u bi prezzijiet tas-suq, pereżempju, billi jintroduċu proċeduri ta' offerti. Madankollu, dawn id-dispożizzjonijet ma jiġux rispettati b'mod regolari, fejn ċerti akkwirenti jiksbu l-art tagħhom mingħajr ħlas jew b'rati aktar baxxi mir-rati tas-suq (105). Barra minn dan, l-awtoritajiet spiss isegwu għanijiet politiċi speċifiċi, inkluż l-implimentazzjoni tal-pjanijiet ekonomiċi, meta jkunu qed jallokaw l-art (106).

(98)

Għalhekk, jidher li l-liġijiet Ċiniżi dwar il-fallimenti u l-proprjeta ma jaħdmux kif suppost, u li dan jirriżulta f'distorsjonijiet meta ditti insolventi jkunu qed jinżammu fil-wiċċ u meta jiġu allokati d-drittijiet tal-użu tal-art fir-RPĊ. Dawn il-liġijiet japplikaw ukoll fir-rigward tal-produzzjoni ta' oġġetti taċ-ċeramika li jintużaw fuq il-mejda u fil-kċina. Barra minn hekk, il-Kummissjoni diġà stabbilixxiet fl-imgħoddi li s-settur ibbenefika minn operazzjonijiet tad-drittijiet tal-użu tal-art, li kienu soġġetti għal distorsjonijiet mill-Istat (107).

(99)

Fid-dawl ta' dan li ntqal hawn fuq, il-Kummissjoni kkonkludiet li kien hemm applikazzjoni diskriminatorja jew infurzar inadegwat tal-liġijiet dwar il-fallimienti u l-proprjetà fis-settur tal-oġġetti taċ-ċeramika li jintużaw fuq il-mejda u fil-kċina.

(100)

Sistema ta' pagi bbażati fuq is-suq ma tistax tiżviluppa kompletament fiċ-Ċina minħabba li l-ħaddiema u l-impjegaturi huma mxekkla fid-drittijiet tagħhom għal organizzazzjoni kollettiva. Iċ-Ċina ma rratifikatx għadd ta' konvenzjonijiet essenzjali tal-Organizzazzjoni Internazzjonali tax-Xogħol (ILO, International Labour Organisation), b'mod partikolari dawk dwar il-libertà ta' assoċjazzjoni u dwar in-negozjar kollettiv (108). Skont il-liġi nazzjonali, hemm organizzazzjoni tat-trejdunjins waħda biss li hija attiva. Madankollu, din l-organizzazzjoni mhijiex indipendenti mill-awtoritajiet tal-Istat u l-involviment tagħha fin-negozjar kollettiv u fil-protezzjoni tad-drittijiet tal-ħaddiema għadu rudimentali (109). Barra minn hekk, il-mobbiltà tal-forza tax-xogħol Ċiniża hija ristretta mis-sistema ta' reġistrazzjoni tal-unitajiet domestiċi, li tillimita l-aċċess għall-firxa sħiħa tal-benefiċċji tas-sigurtà soċjali u ta' benefiċċji oħrajn għar-residenti lokali ta' żona amministrattiva partikolari. Dan tipikament jirriżulta f'ħaddiema li ma jkollhomx ir-reġistrazzjoni tar-residenza lokali u jsibu ruħhom f'pożizzjoni ta' impjieg vulnerabbli u jirċievu introjtu aktar baxx mid-detenturi tar-reġistrazzjoni tar-residenza (110). Dawn is-sejbiet iwasslu għad-distorsjoni tal-kostijiet tal-pagi fiċ-Ċina.

(101)

Kif intqal hawn fuq, il-kostijiet lavorattivi jirrappreżentaw sehem sinifikanti mill-kost tal-produzzjoni tal-prodott taħt rieżami, peress li dan hu proċess li jirrekjedi ħafna ħaddiema. Is-settur taċ-ċeramika, li jinkludi l-produzzjoni ta' oġġetti li jintużaw fuq il-mejda hu soġġett għas-sistema legali dwar ix-xogħol taċ-Ċina li ġiet deskritta. Għaldaqstant, is-settur imsemmi l-aħħar hu affettwat mid-distorsjonijiet tal-kostijiet tal-pagi kemm direttament (meta jkun qed jagħmel il-prodott ikkonċernat) kif ukoll indirettament (meta jkollu aċċess għall-kapital jew inputs minn kumpaniji soġġetti għall-istess sistema tax-xogħol fiċ-Ċina).

(102)

Fuq il-bażi ta' dan li ntqal hawn fuq, il-Kummissjoni kkonkludiet li l-kostijiet tal-pagi kienu distorti fis-settur tal-oġġetti taċ-ċeramika li jintużaw fuq il-mejda u fil-kċina.

(103)

L-aċċess għall-kapital għal atturi korporattivi fiċ-Ċina huwa soġġett għal diversi distorsjonijiet.

(104)

L-ewwel nett, is-sistema finanzjarja Ċiniża hi kkaratterizzata mill-pożizzjoni b'saħħitha tal-banek tal-Istat (111) li, meta jagħtu aċċess għal finazjament, iqisu kriterji oħra minbarra l-vijabbiltà ekonomika ta' proġett. B'mod simili għall-SOEs mhux finanzjarji, il-banek jibqgħu marbutin mal-Istat mhux biss permezz tas-sjieda iżda wkoll permezz ta' azzjonijiet personali (l-ogħla diriġenti tal-istituzzjonijiet finanzjarji tal-Istat fl-aħħar mill-aħħar jinħatru mis-CCP) (112) u, għal darb'oħra eżatt bħal fil-każ tal-SOEs mhux finanzjarji, il-banek jimplimentaw b'mod regolari ordnijiet pubbliċi mfassla mill-gvern. Meta jagħmlu dan, il-banek jikkonformaw ma' obbligu legali li jmexxu n-negozju tagħhom f'konformità mal-ħtiġijiet tal-iżvilupp ekonomiku u soċjali nazzjonali u skont il-gwida tal-politiki industrijali tal-Istat (113). Dan jiġi amplifikat permezz ta' regoli eżistenti addizzjonali, li jmexxu l-finanzi f'setturi li l-gvern jagħżel bħala mħeġġa jew li b'xi mod ieħor huma importanti (114).

(105)

Filwaqt li huwa rikonoxxut li diversi dispożizzjonijiet legali jirreferu għall-ħtieġa li jiġu rrispettati l-imġiba bankarja normali u r-regoli prudenzjali bħall-ħtieġa li tiġi eżaminata l-affidabbiltà kreditizja tal-mutwatarju, l-evidenza kbira, inklużi s-sejbiet li saru fl-investigazzjonijiet għad-difiża tal-kummerċ, tissuġġerixxi li dawn id-dispożizzjonijiet għandhom biss rwol sekondarju fl-applikazzjoni tad-diversi strumenti legali.

(106)

Barra minn hekk, il-klassifikazzjonijiet tal-bonds u tal-kreditu ta' spiss jiġu distorti għal diversi raġunijiet, inkluż il-fatt li l-valutazzjoni tar-riskju hija influwenzata mill-importanza strateġika tad-ditta għall-gvern Ċiniż u s-saħħa ta' kwalunkwe garanzija impliċita mill-gvern. L-estimi jissuġġerixxu bil-qawwa li l-klassifikazzjonijiet tal-kreditu Ċiniżi sistematikament jikkorrispondu għal klassifikazzjonijiet internazzjonali aktar baxxi.

(107)

Dan jirriżulta fi preġudizzju għas-self lil SOEs, ditti privati kbar u konnessi sewwa u ditti f'setturi industrijali ewlenin, li jimplika li d-disponibbiltà u l-kost tal-kapital mhumiex ugwali għall-atturi kollha fis-suq.

(108)

It-tieni, il-kostijiet tas-self inżammu artifiċjalment baxxi sabiex jistimolaw it-tkabbir tal-investiment. Dan wassal għall-użu eċċessiv ta' investiment kapitali b'redditi dejjem aktar baxxi fuq l-investiment. Dan huwa muri mit-tkabbir riċenti fl-ingranaġġ korporattiv fis-settur tal-Istat, minkejja tnaqqis qawwi fil-profittabbiltà, li jissuġġerixxi li l-mekkaniżmi li jaħdmu fis-sistema bankarja ma jsegwux ir-reazzjonijiet kummerċjali normali.

(109)

It-tielet nett, għalkemm il-liberalizzazzjoni nominali tar-rata tal-imgħax inkisbet f'Ottubru 2015, is-sinjali tal-prezzijiet għadhom mhumiex ir-riżultat tal-forzi tas-suq ħieles, iżda huma influwenzati minn distorsjonijiet ikkawżati mill-gvern. Tabilħaqq, is-sehem ta' self bir-rata ta' referenza jew taħtha għadu jirrappreżenta 45 % tas-self kollu u r-rikors għal kreditu mmirat jidher li żdied, billi dan is-sehem żdied notevolment mill-2015, minkejja l-kundizzjonijiet ekonomiċi li sejrin għall-agħar. Rati tal-imgħax artifiċjalment baxxi jirriżultaw fi prezzijiet baxxi u, konsegwentement, fl-użu eċċessiv tal-kapital.

(110)

It-tkabbir kumplessiv tal-kreditu fiċ-Ċina jindika deterjorament tal-effiċjenza tal-allokazzjoni tal-kapital mingħajr l-ebda sinjal ta' ssikkar tal-kreditu li jkun mistenni f'ambjent tas-suq mingħajr distorsjoni. B'riżultat ta' dan, is-self improduttiv żdied malajr fis-snin riċenti. Quddiem sitwazzjoni ta' żieda tad-dejn f'riskju, il-gvern Ċiniż għażel li jevita l-inadempjenzi. Konsegwentement, il-kwistjonijiet ta' dejn mitluf ġew ittrattati permezz ta' dejn ta' riportament, sabiex b'hekk inħolqu l-hekk imsejħa kumpaniji “zombie”, jew permezz tat-trasferiment tas-sjieda tad-dejn (pereżempju permezz ta' fużjonijiet jew swaps ta' dejn għal ekwità), mingħajr ma neċessarjament titneħħa l-problema kumplessiva tad-dejn jew jiġu indirizzati l-kawżi ewlenin tagħha.

(111)

Essenzjalment, minkejja l-passi meħuda riċentement sabiex jiġi lliberalizzat is-suq, is-sistema ta' kreditu korporattiva fiċ-Ċina hija affettwata minn kwistjonijiet u distorsjonijiet sistemiċi sinifikanti li jirriżultaw mir-rwol mifrux kontinwu tal-Istat fis-swieq tal-kapital.

(112)

Il-produzzjoni tal-oġġetti taċ-ċeramika li jintużaw fuq il-mejda u fil-kċina jew il-fornituri tal-materja prima u ta' inputs oħra wkoll jibbenefikaw minn din is-sistema finanzjarja. B'mod partikolari, ċerti produtturi Ċiniżi tal-pożati u reċipjenti għal fuq il-mejda u tal-oġġetti tal-kċina taċ-ċeramika kienu rċivew appoġġ mill-Istat mhux konformi mas-suq fil-passat riċenti, li kellu l-karatteristiċi ta' appoġġ finanzjarju mogħti skont termini mhux kummerċjali (115). Għalhekk, dan l-appoġġ imsemmi l-aħħar u l-intervent ġenerali sostanzjali tal-gvern fis-sistema finanzjarja deskritta hawn fuq iwasslu biex il-kundizzjonijiet tas-suq jiġu affettwati b'mod sever fil-livelli kollha.

(113)

Fid-dawl ta' dan li ntqal hawn fuq, il-Kummissjoni kkonkludiet li l-produtturi tal-oġġetti taċ-ċeramika li jintużaw fuq il-mejda u fil-kċina kellhom aċċess għall-finanzjament mogħti mill-istituzzjonijiet li jimplimentaw l-objettivi tal-ordni pubbliku jew li b'xi mod ieħor mhumiex jaġixxu b'mod indipendenti mill-istat.

(114)

Il-Kummissjoni nnotat li d-distorsjonijiet deskritti fir-Rapport huma karatteristiċi tal-ekonomija Ċiniża. L-evidenza disponibbli turi li l-fatti u l-karatteristiċi tas-sistema Ċiniża kif deskritta hawn fuq fit-Taqsimiet 3.2.2.2. – 3.2.2.5. kif ukoll fil-Parti A tar-Rapport japplikaw fil-pajjiż kollu u fi ħdan is-setturi tal-ekonomija. L-istess japplika għad-deskrizzjoni tal-fatturi tal-produzzjoni kif stabbilit hawn fuq fit-Taqsimiet 3.2.2.6. - 3.2.2.8. ta' hawn fuq u fil-Parti B tar-Rapport.

(115)

Fil-kummenti tagħha tat-30 ta' Lulju 2018 għan-Nota tat-18 ta' Lulju 2018, is-CCCLA oġġezzjonat għall-applikazzjoni tal-Artikolu 2(6a) tar-Regolament bażiku. Fil-fehma tagħha, il-Kummissjoni l-ewwel missha tivverifika d-distorsjoni(jiet) sinifikanti allegati fl-industrija Ċiniża tal-oġġetti taċ-ċeramika li jintużaw fuq il-mejda u fil-kċina u tagħmel determinazzjoni pożittiva, kif jesiġi l-Artikolu 2(6a)(a), qabel ma tfittex data dwar il-kost tal-produzzjoni (“COP”) minn sorsi alternattivi. Fil-kummenti addizzjonali tagħha tat-13 ta' Awwissu 2018, is-CCCLA spjegat li l-produtturi esportaturi Ċiniżi normalment ma jimportawx il-15-il tip ta' materja prima użati għall-prodott ikkonċernat, iżda jixtruhom mis-suq lokali. Barra minn hekk, hi argumentat li “l-ilmentatur ma ddikjarax li hemm distorsjoni sinifikanti fis-suq tal-materja prima taċ-Ċina u l-Kummissjoni lanqas ma sabet din fir-‘rapport dwar il-pajjiż’ tagħha rigward distorsjoni possibbli fiċ-Ċina f'dak li għandu x'jaqsam mal-materja prima tal-industrija taċ-ċeramika”. Għaldaqstant, skont is-CCCLA, ma kienx hemm raġuni biex jiġu ssostitwiti l-prezzijiet tax-xiri domestiċi attwali tal-esportaturi Ċiniżi għal dawn il-15-il tip ta' materja prima mal-prezzijiet tal-importazzjoni mill-Brażil, mit-Tajlandja u mit-Turkija. Il-punt hu mtenni fil-kummenti tad-19 ta' Ottubru 2018, li skont dan il-Kummissjoni missha tħares lejn il-prezzijiet tax-xiri prorpji tal-produtturi esportaturi Ċiniżi għall-materja prima tagħhom.

(116)

Il-Kummissjoni stiednet lis-CCCLA biex tissostanzja d-dikjarazzjoni tagħha b'“evidenza preċiża u xierqa” kif jeħtieġ it-tielet inċiż tal-Artikolu 2(6a)(a) tar-Regolament bażiku. Madankollu, la s-CCCLA u lanqas xi waħda mill-kumpaniji fil-kampjun li kienu jappartjenu għas-CCCLA ma għamlu dan, u waħda mill-kumpaniji fil-kampjun temmet il-kooperazzjoni tagħha matul il-verifika fuq il-post.

(117)

Il-Kummissjoni tfakkar li biex jiġu prodotti oġġetti taċ-ċeramika li jintużaw fuq il-mejda u fil-kċina, hemm bżonn ta' firxa wiesgħa ta' inputs. Il-kumpaniji fil-kampjun kienu jġibu dawn l-inputs miċ-Ċina. Meta l-produtturi tal-oġġetti taċ-ċeramika li jintużaw fuq il-mejda u fil-kċina jixtru/jikkuntrattaw dawn l-inputs, il-prezzijiet li jħallsu (u li jiġu rreġistrati bħala l-kostijiet tagħhom) ikunu esposti b'mod ċar għall-istess distorsjonijiet sistemiċi msemmija hawn fuq. Pereżempju, il-fornituri tal-inputs jimpjegaw forza tax-xogħol li hija soġġetta għad-distorsjonijiet. Huma jistgħu jissellfu flus li jkunu soġġetti għad-distorsjonijiet fuq is-settur finanzjarju jew l-allokazzjoni tal-kapital. Barra minn hekk, dawn huma soġġetti għas-sistema ta' ppjanar li tapplika fil-livelli kollha tal-gvern u tas-setturi.

(118)

Bħala konsegwenza, mhux biss jistgħu ma jintużawx il-prezzijiet tal-bejgħ domestiċi tal-prodott ikkonċernat, iżda l-kostijiet kollha tal-inputs (inklużi l-materja prima, l-enerġija, l-art, il-finanzjament, il-manodopera, eċċ) huma affettwati wkoll għaliex il-formazzjoni tal-prezz tagħhom hi affettwata minn intervent sostanzjali tal-gvern, kif deskritt fil-Partijiet A u B tar-Rapport. Tabilħaqq, l-interventi tal-gvern deskritti fir-rigward tal-allokazzjoni tal-kapital, l-art, ix-xogħol, l-enerġija u l-materja prima huma preżenti fir-RPĊ kollha. Dan ifisser, pereżempju, li input li minnu nnifsu kien prodott fiċ-Ċina permezz tal-kombinazzjoni ta' firxa ta' fatturi tal-produzzjoni huwa espost għal distorsjonijiet sinifikanti. L-istess japplika għall-input tal-input u l-bqija.

(119)

Wara d-divulgazzjoni, is-CCCLA għamlet diversi kummenti rigward l-applikazzjoni mill-Kummissjoni tal-Artikolu 2(6a)(b) tar-Regolament bażiku.

(120)

Is-CCCLA sostniet l-ewwel li s-sejbiet tal-Kummissjoni dwar l-eżistenza ta' distorsjonijiet sinifikanti fis-settur Ċiniż ta' oġġetti taċ-ċeramika li jintużaw fuq il-mejda u fil-kċina naqsu milli jilħqu l-istandards ta' sorsi oġġettivi u ta' valur probatorju suffiċjenti, fis-sens li ddependew b'mod predominanti fuq ir-Rapport tal-Kummissjoni u r-rapport ta' ThinkDesk. Ir-Rapport tal-Kummissjoni ma jikkostitwixxix analiżi oġġettiva tal-ekonomija u tal-politiki ekonomiċi fiċ-Ċina, iżda kellu biss ir-rwol li jiffaċilita l-kompitu tal-applikant li jressaq każ ta' evidenza suffiċjenti dwar distorsjonijiet sinifikanti filwaqt li jiffaċilita l-kompitu tal-Kummissjoni biex tagħmel sejbiet f'dan ir-rigward. Bl-istess mod, fil-fehma tas-CCCLA, ir-rapport ta' ThinkDesk ffaċilita l-kompitu tal-applikant li jħejji t-talba tiegħu u l-kompitu tal-Kummissjoni li tagħmel sejbiet rigward l-eżistenza ta' distorsjonijiet sinifikanti fl-industrija Ċiniża taċ-ċeramika u tal-oġġetti li jintużaw fuq mejda. F'dan is-sens, skont is-CCCLA, iż-żewġ dokumenti tħejjew bi skop speċifiku u għalhekk ma setgħux jitqiesu bħala oġġettivi, u x'aktarx li jħallu barra l-elementi fattwali fl-analiżi dwar l-eżistenza ta' distorsjonijiet sinifikanti. Barra minn hekk, huma kienu ppreparati sew qabel il-bidu tar-rieżami ta' skadenza, u s-CCCLA sostniet li l-Kummissjoni ma għamlet l-ebda sejba ġdida lil hinn mill-kontenut tad-dokumenti tal-aħħar.

(121)

Il-Kummissjoni fakkret li r-Rapport tagħha jikkostitwixxi korp ta' evidenza li tqiegħed fil-fajl tal-investigazzjoni, kif previst fl-Artikolu 2(6a)(c) tar-Regolament bażiku. Ir-rapport ġie ppubblikat fil-21 ta' Diċembru 2017, u dan jipprovdi opportunità biex kulħadd (jiġifieri mhux biss għall-partijiet ta' investigazzjoni partikolari dwar l-anti-dumping) jissottometti kummenti, jirribatti, u jissupplimenta l-evidenza li tinsab fir-Rapport. Sal-lum, il-Kummissjoni ma rċeviet l-ebda kontribut bħal dan dwar ir-Rapport li jqajjem dubju dwar l-oġġettività tiegħu. Barra minn hekk, is-CCCLA nnifisha ma pprovdiet l-ebda element speċifiku li jirribatti l-evidenza jew il-konklużjonijiet legali li jinsabu fir-Rapport. Għaldaqstant, ma ġiex muri għaliex ir-Rapport kien se jkun nieqes mill-oġġettività, u l-argumentazzjoni li r-Rapport ma għandux jintuża bħala bażi f'din l-investigazzjoni ġie rrifjutat. Bl-istess mod, is-CCCLA setgħet ikkontestat kwalunkwe element fattwali jew legali mir-rapport ta' ThinkDesk bħal kwalunkwe sottomissjoni oħra mill-ilmentatur. Peress li l-assoċjazzjoni ma tat l-ebda dettall għaliex l-informazzjoni li hemm fih ma kinitx oġġettiva, id-dikjarazzjoni li l-Kummissjoni missha warrbet ir-rapport ta' ThinkDesk, ġiet miċħuda.

(122)

Is-CCCLA kompliet tirreaġixxi għall-fatt li ż-żewġ rapporti kienu ppreparati sew qabel il-bidu tar-reviżjoni ta' skadenza. Hija sostniet li l-Kummissjoni ma għamlet l-ebda sejba ġdida apparti l-kontenut tad-dokumenti tal-aħħar.

(123)

Il-Kummissjoni ma qablitx ma' din il-fehma. F'din l-investigazzjoni, kienet stabbiliet li l-evidenza rilevanti li tinsab fir-Rapport hija pertinenti u applikabbli għall-investigazzjoni ta' rieżami ta' skadenza attwali u għalhekk kienet qieset dan fil-valutazzjoni tal-eżistenza ta' distorsjonijiet sinifikanti fir-RPĊ. Bl-istess mod, fir-rigward tar-rapport ta' ThinkDesk, il-Kummissjoni għamlet użu mill-kontenut tiegħu biex tiggwida r-riċerka tagħha fir-rigward ta' elementi addizzjonali speċifikament rilevanti għas-settur ta' oġġetti taċ-ċeramika li jintużaw fuq il-mejda u fil-kċina. Il-Kummissjoni kompliet tirreferi wkoll għall-evidenza u r-riċerka addizzjonali sostanzjali li jinsabu b'mod partikolari fit-Taqsima 3.2.2.5 dwar ir-rabta bejn id-distorsjonijiet orizzontali fiċ-Ċina u s-settur ikkonċernat, li jmorru ferm lil hinn mill-evidenza li tinsab kemm fir-Rapport kif ukoll fir-rapport ta' ThinkDesk. Din ir-riċerka ppermettiet li l-Kummissjoni tagħmel bosta sejbiet addizzjonali dwar l-eżistenza ta' distorsjonijiet sinifikanti fis-settur tal-oġġetti taċ-ċeramika li jintużaw fuq il-mejda u fil-kċina. Għaldaqstant, il-Kummissjoni ma laqgħetx il-pretensjoni tal-CCCLA.

(124)

Is-CCCLA ssottomettiet ukoll li s-sejbiet ta' distorsjonijiet sinifikanti saru mingħajr l-ebda analiżi kwantitattiva. Fil-fehma tas-CCCLA, l-analiżi ta' dawn id-distorsjonijiet għandha tiġi sostnuta bi tqabbil tal-prezzijiet jew il-kostijiet irrappurtati mill-produtturi esportaturi individwali mal-prezzijiet jew il-kostijiet f'suq ħieles, sabiex jiġi ġġudikat il-kobor tad-distorsjonijiet.

(125)

L-Artikolu 2(6a)(b) tar-Regolament bażiku jipprevedi fl-ewwel sentenza li “d-distorsjonijiet sinifikanti huma dawk id-distorsjonijiet li jseħħu meta prezzijiet jew kostijiet irrappurtati, inklużi l-kostijiet ta' materji primi u ta' enerġija, ma jkunux ir-riżultat ta' forzi tas-suq ħieles għax ikunu affettwati minn intervent sostanzjali tal-gvern.” It-tieni sentenza ta' din id-dispożizzjoni tiggwida lill-Kummissjoni dwar kif għandha tivvaluta l-eżistenza ta' distorsjonijiet sinifikanti: “meta tkun valutata l-eżistenza ta' distorsjonijiet sinifikanti għandha tingħata attenzjoni, inter alia, lill-impatt potenzjali ta' element wieħed jew aktar […]” elenkati fl-inċiżi tal-Artikolu 2(6a)(b). Konsegwentement, kif spjegat fil-premessa (48) hawn fuq u f'konformità mal-Artikolu 2(6a)(b), il-valutazzjoni tal-Kummissjoni dwar l-eżistenza ta' distorsjonijiet sinifikanti bħal dawn hija r-riżultat ta' valutazzjoni ġenerali tal-elementi rilevanti li hemm fl-inċiżi ta' dik id-dispożizzjoni biex isir paragun tal-prezz reali bejn il-prezzijiet jew il-kostijiet ta' produttur esportatur bi prezzijiet jew kostijiet mhux distorti f'suq ħieles. Barra minn hekk, kif speċifikat ukoll fl-istess premessa (48), il-valutazzjoni ġenerali dwar l-eżistenza ta' distorsjonijiet tista' tqis ukoll il-kuntest ġenerali u s-sitwazzjoni fil-pajjiż esportatur u s-sistema legali kollha li tipprovdi lill-gvern b'setgħat sostanzjali biex jintervjeni fl-ekonomija b'tali mod li l-prezzijiet u l-ispejjeż ma jkunux ir-riżultat ta' żvilupp liberu tal-forzi tas-suq. L-istandard preskritt fil-leġiżlazzjoni jirrigwarda l-impatt “potenzjali” ta' wieħed jew aktar mill-kriterji rilevanti elenkati fl-inċiżi tal-Artikolu 2(6a)(b) li jinterferixxu mal-prezzijiet u l-kostijiet, u ma hemm l-ebda rekwiżit fil-leġiżlazzjoni biex issir analiżi kwantitattiva reali bbażata fuq tqabbil bejn il-prezzijiet u l-kostijiet ta' parametri referenzjarji mhux distorti mal-kostijiet u l-prezzijiet tal-produtturi esportaturi biex tiġi ddeterminata l-eżistenza ta' distorsjonijiet sinifikanti fil-pajjiż u s-settur ikkonċernat. Għaldaqstant, din l-affermazzjoni ġiet irrifjutata.

(126)

Fl-aħħar nett, is-CCCLA argumentat li wara l-iskadenza tat-Taqsima 15 tal-Protokoll ta' Adeżjoni taċ-Ċina mad-WTO (minn hawn' il quddiem “il-Protokoll”), l-UE ma għandhiex tiddevja mill-metodoloġija standard biex tistabbilixxi l-valur normali, jiġifieri li tuża biss prezzijiet u kostijiet domestiċi tal-pajjiż esportatur, sakemm l-ADA ma jippermettix mod ieħor. Fid-dawl ta' dan ta' hawn fuq, l-UE jenħtieġ li ssegwi l-metodoloġija standard skont l-Artikolu 2 tal-ADA. Barra minn hekk, is-CCCLA sostniet ukoll li l-ADA “ma jipprovdix il-possibbiltà sostantiva li tiġi stabbilita l-eżistenza ta' distorsjonijiet sinifikanti”. Peress li ma hemm l-ebda bażi legali la fl-ADA u lanqas fil-GATT tal-1994 għal din l-azzjoni speċifika, id-determinazzjoni tal-eżistenza ta' distorsjonijiet sinifikanti u, bħala riżultat ta' dan, il-kostruzzjoni tal-valur normali mhumiex konsistenti mal-Artikoli 1, 2, 6.1 u 18.1 tal-Ftehim Antidumping (“ADA”).

(127)

F'dan il-każ, il-Kummissjoni applikat ir-regoli rilevanti li jinsabu fl-Artikolu 2(6a) tar-Regolament bażiku. Il-leġiżlatur tal-UE adotta dawn ir-regoli filwaqt li kkonsidra totalment l-obbligi tal-UE skont il-liġi tad-WTO. Il-Kummissjoni nnutat li ma hemm l-ebda regola assoluta fil-liġi tad-WTO biex dejjem jinbena valur normali fuq il-bażi ta' spejjeż u kostijiet domestiċi. Barra minn hekk, il-Kummissjoni ma qablitx mal-fehma li t-Taqsima 15 tal-Protokoll ma hix rilevanti għall-investigazzjonijiet dwar id-dumping li jirrigwarda liċ-Ċina u fakkret li għaddejja litigazzjoni dwar dan fl-ambitu tas-sistema tad-WTO għas-soluzzjoni ta' tilwim, li fiha ddefendiet din il-fehma b'riferiment għall-formulazzjoni tal-ittra (d), l-iskop tagħha u l-istorja ta' negozjati dwar din id-dispożizzjoni. Għaldaqstant, il-Kummissjoni ma laqgħetx dawn l-affermazzjonijiet.

(128)

L-analiżi stabbilita fit-Taqsimiet minn 3.2.2.2. sa 3.2.2.9. li tinkludi eżami tal-evidenza disponibbli kollha fir-rigward tal-intervent taċ-Ċina fl-ekonomija tagħha inġenerali kif ukoll fis-settur taċ-ċeramika (inkluż il-prodott taħt rieżami) uriet li l-prezzijiet jew il-kostijiet, inklużi l-kostijiet tal-materja prima, tal-enerġija u tal-manodopera, mhumiex ir-riżultat ta' forzi tas-suq ħieles għaliex dawn huma affettwati minn intervent sostanzjali tal-gvern skont it-tifsira tal-Artikolu 2(6a)(b) tar-Regolament bażiku kif muri mill-impatt attwali jew potenzjali ta' wieħed jew aktar mill-elementi rilevanti elenkati fih. Abbażi ta' dan, u fin-nuqqas ta' kwalunkwe kooperazzjoni mill-GOC, il-Kummissjoni kkonkludiet li mhuwiex xieraq li jintużaw prezzijiet u kostijiet domestiċi biex jiġi stabbilit il-valur normali f'dan il-każ.

(129)

Konsegwentement, il-Kummissjoni pproċediet sabiex tibni l-valur normali esklussivament abbażi tal-kostijiet tal-produzzjoni u tal-bejgħ li jirriflettu l-prezzijiet jew il-parametri referenzjarji mingħajr distorsjoni, jiġifieri, f'dan il-każ, abbażi tal-kostijiet korrispondenti tal-produzzjoni u tal-bejgħ f'pajjiż rappreżentattiv xieraq, f'konformità mal-Artikolu 2(6a)(a) tar-Regolament bażiku, kif diskuss fit-Taqsima li ġejja.

(130)

Wara li ddeterminat li d-distorsjonijiet sinifikanti jaffettwaw il-prezzijiet u / jew il-kostijiet fis-settur Ċiniż tal-oġġetti taċ-ċeramika li jintużaw fuq il-mejda u fil-kċina, skont l-Artikolu 2(6a)(b) tar-Regolament bażiku, il-Kummissjoni bniet il-valur normali fuq il-bażi tal-kostijiet tal-produzzjoni u l-bejgħ f'post rappreżentattiv xieraq, skont l-Artikolu 2(6a)(a) tar-Regolament bażiku.

(131)

L-għażla tal-pajjiż rappreżentattiv kienet ibbażata fuq il-kriterji li ġejjin:

(132)

Kif spjegat fil-premessa (31), fin-Nota tat-18 ta' Lulju l-Kummissjoni informat lill-partijiet interessati li kienet identifikat tliet pajjiżi rappreżentattivi possibbli: il-Brażil, it-Tajlandja u t-Turkija, u stiednet lill-partijiet interessati jikkummentaw u jissuġġerixxu pajjiżi oħra. Kemm is-CCCLA kif ukoll l-applikant ipprovdew għadd ta' kummenti dwar il-pajjiżi rappreżentattivi possibbli, iżda l-ebda wieħed minnhom ma ppropona pajjiż ieħor.

(133)

Il-Brażil, it-Tajlandja u t-Turkija lkoll huma klassifikati bħala pajjiżi b'livell simili ta' żvilupp ekonomiku bħar-RPĊ, jiġifieri dawn ilkoll huma klassifikati bħala pajjiżi “b'introjtu medju superjuri” mill-Bank Dinji.

(134)

Is-CCCLA kkummentat li (117) fl-2017 l-ING per capita tat-Turkija kien ferm ogħla minn dak taċ-Ċina jew tal-Brażil. B'mod simili, l-applikant innota wkoll (118) li l-PDG per capita tal-2016 fil-Brażil kien simili ħafna għal dak taċ-Ċina filwaqt li l-PDG per capita tat-Turkija kien ferm ogħla. B'hekk, iż-żewġ partijiet iddikjaraw li dan il-kriterju juri għaliex it-Turkija kienet għażla ħażina.

(135)

Ir-Regolament bażiku jirreferi għal “pajjiż xieraq b'livell simili ta' żvilupp ekonomiku”. Konsegwentement, ir-Regolament bażiku ma jidderiġix lill-Kummissjoni biex tagħżel il-pajjiż bl-eqreb livell ta' ING jew PDG per capita għal dak taċ-Ċina. Minflok, il-kriterju rilevanti hu s-similarità tal-livell ta' żvilupp ekonomiku. Biex tiġi stabbilita similarità bħal din, xieraq li tintuża l-klassifikazzjoni tal-introjtu medju superjuri mill-Bank Dinji għall-perjodu rilevanti għaliex din il-klassifikazzjoni hi bbażata fuq diversi kriterji ekonomiċi oġġettivi meta jiġu identifikati għadd ta' pajjiżi potenzjalment xierqa b'livell simili ta' żvilupp. Peress li t-tliet pajjiżi kollha kemm huma kienu inklużi fl-istess kategorija tal-bażi ta' data tal-Bank Dinji, dawn ilkoll tqiesu li jissodisfaw il-kriterju stabbilit fl-ewwel inċiż tal-Artikolu 2(6a)(a) tar-Regolament bażiku. B'hekk, il-Kummissjoni kkonkludiet li t-tliet pajjiżi li huma kienu jissodisfaw dan il-kriterju b'mod ugwali u, għalhekk, il-kumment ġie miċħud.

(136)

Prattikament il-pajjiżi kollha tad-dinja jipproduċu xi kwantità tal-prodott taħt rieżami. Wara l-analiżi tad-data disponibbli u b'mod partikolari tad-data mill-Global Trade Atlas (“GTA”) (119) u minn Orbis Bureau van Dijk (“Orbis”), (120) il-Kummissjoni identifikat il-Brażil, it-Tajlandja u t-Turkija bħala pajjiżi rappreżentattivi possibbli għal din l-investigazzjoni.

(137)

Fil-kummenti tagħha, is-CCCLA esprimiet it-tħassib tagħha rigward id-differenzi kbar bejn il-prezzijiet medji tal-importazzjoni għall-fatturi tal-produzzjoni rrapportati mill-Brażil, mit-Tajlandja u mit-Turkija. Hi allegat li dawn id-differenzi huma primarjament dovuti għall-kwantità tal-importazzjonijiet. Bħala regola, kwantitajiet inferjuri ta' importazzjonijiet jattiraw prezzijiet ogħla. Is-CCCLA esprimiet ukoll dubji fuq il-preċiżjoni tal-prezzijiet tal-importazzjoni espressi bil-livell tal-kodiċi tas-Sistema Armonizzata (SA) b'6 figuri u stiednet lill-Kummissjoni tuża kodiċijiet ta' livell ogħla bi 8 figuri. Fir-rigward tad-disponibbiltà tad-data finanzjarja, is-CCCLA nnotat li l-profitt u l-SG&A tat-Turkija u tal-Brażil huma bbażati fuq kumpanija waħda jew tnejn biss u, għalhekk, jistgħu jkunu influwenzati minn fatturi okkażjonali (bħall-bejgħ ta' prodotti tad-ditta), filwaqt li ċ-ċifri għat-Tajlandja huma bbażati fuq medja ta' 8 kumpaniji. B'hekk, is-CCCLA argumentat li għandha tingħażel it-Tajlandja.

(138)

Min-naħa l-oħra, l-applikant argumenta li l-Brażil għandu jintuża bħala pajjiż rappreżentattiv. Hu asserixxa li tnejn mit-tmien kumpaniji Tajlandiżi identifikati mill-Kummissjoni ma kinux jidhru li jipproduċu l-prodott taħt rieżami u li ma kienx hemm data finanzjarja riċenti disponibbli għat-Tajlandja. L-applikant semma wkoll li fl-investigazzjoni oriġinali, produttur Tajlandiż ma setax jipprovdi data f'livell suffiċjenti ta' dettall. L-applikant argumenta li l-ispejjeż tal-bejgħ, ġenerali u amministrattivi (“SG&A”) u l-profitt tal-produttur Brażiljan proposti fit-talba ta' rieżami kienu fil-parti l-kbira allinjati mal-SG&A tal-produtturi tal-Unjoni u mal-profitti li jkunu jistennew li jiksbu fin-nuqqas ta' importazzjonijiet oġġett ta' dumping. L-applikant innota wkoll li l-SG&A medji u ċ-ċifri tal-profitt tal-produtturi Tajlandiżi kienu baxxi wisq u li għal tnejn minnhom il-livelli ta' profitt kienu anqas mill-profitt fil-mira stabbilit mill-investigazzjoni oriġinali. L-applikant iddikjara li l-produttur Brażiljan propost minnu rnexxielu jħejji u jissottometti l-informazzjoni mitluba dwar il-kost.

(139)

Bħala tweġiba għal dawn id-dikjarazzjonijiet, il-Kummissjoni nnotat li d-differenzi fil-prezzijiet medji tal-importazzjoni, bħala tali, ma jfissrux li d-data mhix affidabbli. Dment li l-kwantitajiet tal-importazzjonijiet tal-fatturi tal-produzzjoni jkunu rappreżentattivi biżżejjed u ma jkun hemm l-ebda ċirkustanza speċifika oħra li tagħmilhom mhux rappreżentattivi jew mhux xierqa, ma hemm l-ebda raġuni oġġettiva għaliex għandhom jiġu esklużi jew kwalunkwe wieħed mill-pajjiżi proposti. F'dak li għandu x'jaqsam mal-livell ta' klassifikazzjoni, il-Kummissjoni għandha l-għan li tuża l-aktar livell xieraq u dettaljat possibbli fuq il-bażi tal-informazzjoni disponibbli fil-fajl. Sa issa l-produtturi esportaturi Ċiniżi pprovdew il-kodiċijiet Ċiniżi ta' 8 ċifri għal-livell li f'ħafna każijiet fil-fatt kienu jikkorrispondu għal kodiċi SA b'6 ċifri peress li l-aħħar żewġ ċifri kienu “00”. F'każijiet li fihom dan ikun possibbli, il-Kummissjoni tidentifika u tuża l-kodiċijiet ekwivalenti tal-livell ta' 8 ċifri fin-nomenklatura tal-pajjiż rappreżentattiv. Fin-nuqqas ta' kwalunkwe dikjarazzjoni konkreta dwar xi fattur konkret tal-produzzjoni, il-Kummissjoni użat id-data kif spjegat f'aktar dettall fil-premessa (155) aktar 'l isfel.

(140)

Barra minn hekk, il-fatt li ċ-ċifri finanzjarji (bħall-SG&A u l-profitt) għat-Tajlandja kienu bbażati fuq aktar kumpaniji minn dawk taż-żewġ pajjiżi l-oħra, effettivament ma jfissirx li kienu aktar affidabbli. Fi kwalunkwe każ, ir-Regolament bażiku jirrekjedi “data rilevanti” li trid “tkun disponibbli minnufih” mingħajr ma jispeċifika li dan għandu jkun l-aktar sett wiesa' ta' data. Barra minn hekk, id-disponibbiltà tal-kontijiet awditjati mill-kumpanija Torka tippermetti lill-Kummissjoni biex teskludi l-impatt ta' kwalunkwe avveniment jew attività straordinarji miċ-ċifri finanzjarji, jekk applikabbli. Dan ma jistax jingħad għall-kumpaniji taż-żewġ pajjiżi l-oħra. B'hekk, l-aktar data dettaljata disponibbli kienet għall-kumpanija Torka. Fuq il-bażi ta' dan li ntqal hawn fuq, it-talbiet tas-CCCLA ġew miċħuda.

(141)

Rigward id-dikjarazzjoni tal-applikant rigward il-livell ta' SG&A u ta' profitt tal-produttur Brażiljan, il-Kummissjoni nnotat li l-kwistjoni ta' jekk il-livelli ta' SG&A u ta' profitt fil-pajjiż rappreżentattiv kinux allinjati ma' dawk tal-produtturi tal-Unjoni jew mal-aspettattivi tagħhom ma kinitx rilevanti biex jingħażel l-aktar pajjiż rappreżentattiv xieraq. Barra minn hekk, għall-kuntrarju tad-dikjarazzjoni tal-applikant, id-data finanzjarja u ċ-ċifri dwar il-kostijiet tal-produttur Brażiljan identifikat fit-talba għal rieżami ma kinux disponibbli pubblikament. Konsegwentement, it-talbiet tal-applikant ġew miċħuda.

(142)

Il-Kummissjoni analizzat bir-reqqa d-data rilevanti kollha li kienet disponibbli fil-fajl dwar il-fatturi kollha tal-produzzjonijiet fit-tliet pajjiżi rappreżentattivi potenzjali kollha u nnotat dan li ġej:

(143)

Fuq il-bażi tal-effett kombinat ta' dawn il-fatturi kollha, il-Kummissjoni qieset li t-Turkija kienet l-aktar pajjiż rappreżentattiv xieraq għal din l-investigazzjoni. Fin-nota tad-9 ta' Ottubru, il-Kummissjoni infurmat lill-partijiet interessati dwar l-intenzjoni tagħha li tuża lit-Turkija bħala pajjiż rappreżentattiv u stiednet lill-partijiet interessati jikkummentaw.

(144)

Fil-kummenti tiegħu (123) wara n-nota tad-9 ta' Ottubru, l-applikant iddikjara li meta għażlet l-aktar pajjiż rappreżentattiv xieraq, il-Kummissjoni użat biss tnejn mill-erba' kriterji stipulati mill-Artikolu 2(6a)(a) tar-Regolament bażiku. L-applikant talab lill-Kummissjoni tiżvela l-parametri referenzjarji finali u aġġornati għall-fatturi kollha tal-produzzjoni li fuq il-bażi tagħhom għandu jiġi stabbilit il-valur normali. Finalment, l-applikant talab ukoll biex il-Kummissjoni tivvaluta l-impatt fuq il-valur normali tal-iżviluppi politiċi u ekonomiċi riċenti fit-Turkija li wasslu għal tnaqqis sinifikanti fil-valur tal-Lira Torka.

(145)

Bħala tweġiba għal dawn il-kummenti, il-Kummissjoni kkonfermat li kif diġà ġie spjegat fil-premessi minn (133) sa (142), it-tliet kriterji ewlenin kollha ġew analizzati bir-reqqa meta ntgħażel il-pajjiż rappreżentattiv. Ir-raba' kriterju dwar il-livell adegwat ta' ħarsien soċjali u tal-ambjent hu applikabbli biss f'każijiet li fihom l-ebda pajjiż ma jkun jista' jingħażel fuq il-bażi tal-ewwel tliet kriterji, li madankollu ma kienx il-każ f'din l-investigazzjoni. Hekk kif irrikonoxxa l-applikant ukoll, l-iżvalutazzjoni tal-Lira Torka seħħet wara l-perjodu tal-investigazzjoni għal rieżami u, għal din ir-raġuni, il-Kummissjoni ma ratx li hemm raġuni l-għala għandha tevalwa l-impatt ta' din fuq il-valur normali. It-talba tal-applikant li jrid jiġi pprovdut biċ-ċifri u bis-sorsi tal-fatturi differenti ta' produzzjoni ma kinitx tikkostitwixxi argumenti relatati mal-għażla tal-pajjiż rappreżentattiv, u ġiet indirizzata fit-tabella 1 aktar 'il isfel.

(146)

Is-CCCLA fil-kummenti tagħha (124) ma qablitx mal-konklużjoni tal-Kummissjoni peress li t-tliet pajjiżi rappreżentattivi possibbli kollha kienu jissodisfaw bl-istess mod l-ewwel kriterju b'livell simili ta' żvilupp ekonomiku. Is-CCCLA argumentat li billi bbażat sempliċiment fuq il-klassifikazzjoni tal-introjtu medju superjuri tal-Bank Dinji, il-Kummissjoni kellha grupp ta' 56 pajjiż li fosthom ħafna (bħall-Guinea Ekwatorjali, Fiġi, il-Gżejjer Marshall, Nauru, St. Lucia, eċċ.) ċertament li ma setgħux jitqiesu li għandhom livell simili ta' żvilupp ekonomiku bħaċ-Ċina. Barra minn hekk, is-CCCLA ma qablitx mal-Kummissjoni li t-Turkija biss kellha informazzjoni disponibbli b'mod pubbliku dwar il-kostijiet lavorattivi. Biex tissostanzja d-dikjarazzjoni tagħha, is-CCCLA rreferiet għal investigazzjoni oħra (125) li fiha t-Tajlandja ġiet proposta bħala pajjiż rappreżentattiv. Finalment, is-CCCLA ddikjarat li ċ-ċifri tal-SG&A u tal-profitt relattivament għoljin tal-produttur Tork (meta mqabbla maċ-ċifri medji tal-produtturi Tajlandiżi u / jew tal-produtturi Ċiniżi) kienu dovuti għall-fatt li l-produttur Tork kien primarjament qed ibigħ prodotti tad-ditta li jattiraw prezzijiet ogħla. Skont is-CCCLA, peress li l-produtturi esportaturi Ċiniżi ma kinux jesportaw prodotti tad-ditta l-istruttura tal-kost u tal-profitt tagħhom tvarja minn dik tal-kumpanija Torka u b'hekk dan irendi d-data tat-Turkija mhux adegwata biex tieħu post id-data taċ-Ċina. Biex tissostanzja d-dikjarazzjoni tagħha, is-CCCLA evokat l-aġġustament 'l isfel fil-valur normali Brażiljan dovut għall-markar li sar fl-investigazzjoni oriġinali. Il-Kummissjoni żammet il-pożizzjoni tagħha li kull pajjiż kien jissodisfa bl-istess mod il-kriterju dwar il-livell simili ta' żvilupp ekonomiku peress li lkoll kienu klassifikati bħala pajjiżi b'introjtu medju superjuri. Madankollu, id-deċiżjoni dwar l-aktar pajjiż rappreżentattiv xieraq ma ttiħditx b'mod iżolat iżda bħala valutazzjoni kombinata tat-tliet kriterji elenkati fil-premessa (131) aktar 'il fuq u kif spjegat fin-nota tad-9 ta' Ottubru.

(147)

Rigward id-dikjarazzjoni dwar id-data pubblikament disponibbli, il-Kummissjoni saħqet li l-għażla tal-aktar pajjiż rappreżentattiv xierqa hi eżerċizzju ta' kull każ għalih, li jqis fost l-oħrajn l-ispeċifiċitajiet l-oħra tal-prodott taħt rieżami, il-perjodu tal-investigazzjoni għal rieżami u speċifiċitajiet oħra tal-każ. Għal din ir-raġuni, għażla f'każ ma timplikax li l-istess pajjiż ikun l-aħjar għażla għal każ ieħor ukoll. Fi kwalunkwe każ, fil-każ invokat mis-CCCLA, it-Turkija ma kinitx fost il-pajjiżi possibbli kkunsidrati u, għalhekk, l-għażla ma kinitx bejn it-Tajlandja u t-Turkija. Il-Kummissjoni tfakkar li l-għażla tal-pajjiż rappreżentattiv issir fuq bażi ta' kull każ għalih. Barra minn hekk, kif spjegat fil-premessa (142) aktar 'il fuq, il-Kummissjoni għażlet lit-Turkija fuq il-bażi tal-effett kombinat ta' għadd ta' fatturi, li minnhom wieħed kien tabilħaqq id-disponibbiltà ta' data speċifika għas-settur dwar il-ħinijiet tax-xogħol u l-kostijiet lavorattivi fil-livell tal-kumpaniji (għall-kuntrarju tal-pagi). Is-CCCLA ma pprovdietx xi data disponibbli b'mod simili għat-Tajlandja, u lanqas il-Kummissjoni ma rnexxielha ssib data dettaljata bħal din.

(148)

Id-dikjarazzjoni dwar in-nuqqas ta' adegwatezza tad-data dwar l-SG&A u l-profitt tal-produttur Tork minħabba l-marka ma kinitx sostanzjata biżżejjed. B'mod partikolari, is-CCCLA naqset milli turi għaliex u kemm il-bejgħ ta' prodotti tad-ditta jirriżulta f'SG&A ogħla għal kumpanija partikolari. Barra minn hekk, il-Kummissjoni kienet tal-fehma li ma kienx hemm biżżejjed evidenza fil-fajl li tissostanzja d-dikjarazzjoni li l-kumpanija Torka tbigħ biss jew primarjament prodotti tad-ditta. Għall-kuntrarju, il-Kummissjoni sabet li l-informazzjoni fuq is-sit web tal-kumpanija Torka tindika (126) li Kutahya Porselen Sanayii A.S. kienet tbigħ kemm prodotti tad-ditta kif ukoll prodotti mhux tad-ditta. B'hekk, it-talbiet kemm tal-applikant kif ukoll tas-CCCLA ġew miċħuda.

(149)

Wara d-divulgazzjoni, is-CCCLA sostniet li r-rata tal-kambju tal-Lira Torka apparagun tal-Euro żvalutat ruħha b'25 % matul il-PIR. Żvalutazzjoni ta' dan il-kobor allegatament għandha impatt tremend fuq il-kostijiet u l-prezzijiet fit-Turkija u x'aktarx tirriżulta f'distorsjonijiet li huma “inkomparabbilment ogħla minn dak li l-Kummissjoni tista' tassumi li huwa l-każ fiċ-Ċina”. Għalhekk, it-Turkija jenħtieġ li ma tintgħażilx bħala pajjiż rappreżentattiv xieraq.

(150)

Il-Kummissjoni tenniet li l-għażla tal-pajjiż rappreżentattiv kienet ibbażata fuq il-kriterji msemmija fil-premessa (131). L-impatt potenzjali ta' żvalutazzjoni tal-munita mhuwiex fost dawk il-kriterji. Nnutat ukoll li kienet ikkalkula l-parametri referenzjarji abbażi tar-rati tal-kambju ta' kull xahar u ġibdet il-medja minnhom għall-perjodu kollu tal-investigazzjoni għal rieżami. B'riżultat ta' dan, l-impatt potenzjali tal-varjazzjonijiet fir-rata tal-kambju fuq il-valur annwali tal-parametru referenzjarju kien eliminat. F'kull każ, is-CCCLA ma wrietx kif l-iżvalutazzjoni tal-Lira Torka fil-fatt kienet taffettwa l-valur tal-fatturi tal-produzzjoni u l-inputs fit-Turkija, u jekk iva, x'kien se jkun l-impatt reali fuq dawn il-valuri. Għalhekk il-Kummissjoni rrifjutat din l-argumentazzjoni.

(151)

Wara d-divulgazzjoni, is-CCCLA kkontestat l-affidabilità tad-data tal-SG&A u tal-profitt irrappurtati mill-produttur Tork, fejn sostniet li dan ma setax ikun realistiku għaliex l-SG&A li jammontaw għal 33,14 % normalment jirriżultaw f'falliment, filwaqt li l-kumpanija Torka kienet għadha qed turi profitt ta' 17,8 %. Hija staqsiet jekk minflok setgħetx tintuża data tal-SG&A u tal-profitt minn pajjiż rappreżentattiv ieħor.

(152)

Il-Kummissjoni l-ewwel innotat li s-CCCLA naqset milli tipprovdi xi evidenza ta' sostenn għall-affermazzjoni tagħha u ma rreferiet għall-ebda parti speċifika tal-kontijiet awditjati tal-produttur Tork, u dan jissuġġerixxi li mhumiex affidabbli. Il-Kummissjoni ma kellha l-ebda evidenza fil-fajl li tindika li l-SG&A u l-profitt miksuba mill-kumpanija Torka jistgħu jkunu influwenzati, pereżempju, minn anormalitajiet fil-proċess tal-produzzjoni. F'kull każ, il-Kummissjoni fakkret li d-data tal-SG&A u tal-profitt tal-kumpanija kienu murija bħala perċentwal tal-kostijiet tal-oġġetti mibjugħa, u mhux bħala perċentwal tal-fatturat. Barra minn hekk, kif spjegat fil-premessa (222) ta' hawn taħt, uħud mill-produtturi tal-Unjoni fil-kampjun għandhom livell simili ta' SG&A, u dan huwa komparabbli kemm għal dak tal-produtturi Ċiniżi fil-kampjun kif ukoll għal dak fil-kontijiet tal-kumpanija Torka li ntużat. Għalhekk, il-Kummissjoni qieset li d-data tal-SG&A u tal-profitt tal-kumpanija Torka kienet raġonevoli. Konsegwentement, it-talba tas-CCCLA ġiet miċħuda.

(153)

Fid-dawl tal-analiżi msemmija hawn fuq, u tad-data disponibbli fil-fajl, il-Kummissjoni użat id-data tat-Turkija u tal-kumpanija Torka Kutahya Porselen Sanayi A.S. biex tistabbilixxi l-kostijiet korrispondenti tal-produzzjoni u tal-bejgħ f'pajjiż rappreżentattiv xieraq skont l-Artikolu 2(6a)(a) tar-Regolament bażiku.

(154)

Fin-Nota tad-9 ta' Ottubru, il-Kummissjoni ddikjarat li, biex tibni l-valur normali skont l-Artikolu 2(6a)(a) tar-Regolament bażiku, kellha l-ħsieb li tuża d-data dwar l-importazzjoni disponibbli fil-GTA għal materja prima, l-informazzjoni pprovduta mill-Istitut Statistiku tat-Turkija (“Turksta”) (127) dwar il-ħaddiema, l-elettriku u l-gass naturali u d-data finanzjarja tal-kumpanija Torka Kutahya Porselen Sanayi A.S. għall-SG&A u għall-profitt kif disponibbli fil-kontijiet awditjati tagħha mqiegħda għad-dispożizzjoni pubblikament minn Orbis.

(155)

It-tabella li ġejja tiġbor fil-qosor il-fatturi tal-produzzjoni użati fil-kalkoli bil-kodiċijiet SA jew bil-kodiċijiet nazzjonali korrispondenti tagħhom użati rispettivament fiċ-Ċina jew fit-Turkija u l-valuri unitarji mill-GTA jew mill-bażi ta' data ta' Turkstat:

Tabella 1

Fatturi tal-produzzjoni għall-oġġetti taċ-ċeramika li jintużaw fuq il-mejda

(156)

Kien hemm differenza konsiderevoli bejn il-kumpaniji anki fi ħdan grupp ta' produtturi esportaturi rigward il-materja prima użata, speċjalment għad-diversi tipi ta' tafal u ta' żilġa. B'mod partikolari, fil-grupp li kkoopera, il-Kummissjoni sabet li matul il-perjodu tal-investigazzjoni għal rieżami, kumpanija waħda ġabet it-taħlita lesta, l-hekk imsejjaħ “pasta ħadra” imsawwar minn tipi differenti ta' tafal, filwaqt li l-oħra ġabet il-materja prima individwali kollha b'mod separat u ħalltithom il-kumpanija stess. Matul il-perjodu tal-investigazzjoni għal rieżami, din il-kumpanija ġabet tal-anqas 25 materjal tal-input differenti għall-produzzjoni tagħha tat-tafal li l-aktar ħamsa importanti minnhom kienu jirrappreżentaw 92 % mill-kost totali tal-materja prima tat-tafal. B'mod simili, filwaqt li kumpanija minnhom kienet tixtri ż-żebgħa lesta, l-oħra kienet tixtri kważi 40 materjal tal-input differenti għall-produzzjoni tagħha taż-żilġa, li l-aktar ħamsa importanti minnhom kienu jirrappreżentaw 90 % mill-kostijiet totali tal-materja prima taż-żilġa jew taż-żebgħat. Għaldaqstant, il-Kummissjoni ħadmet bl-aktar ħames varjanti importanti kemm għat-tafal kif ukoll għaż-żebgħat/żilġiet. Intuża approċċ simili għall-produzzjoni tal-forom, fejn materjal wieħed tal-input minn 12-il materjal tal-input kien jirrappreżenta aktar minn 97 % tal-kostijiet totali tal-materja prima tal-forom. Konsegwentement, il-materjali intermedjarji, iż-żilġa, l-forom u ż-żebgħat ma ġewx elenkati fit-tabella 1, iżda l-aktar materjali tal-input importanti użati għall-produzzjoni ta' kull wieħed minnhom.

(157)

Għall-matera prima kollha, il-prezz unitarju mhux distort ġie ddeterminat bil-prezz medju ponderat tal-importazzjoni għall-pajjiż rappreżentant mill-pajjiżi terzi kollha. Madankollu, l-importazzjonijiet mir-RPĊ ġew esklużi minħabba d-distorsjonijiet sinifikanti eżistenti f'dan il-pajjiż kif stabbiliti fit-taqsima 3.2.2.10 aktar 'il fuq. Fejn hemm bżonn, volumi mhux rappreżentattivi bi prezzijiet unitarji għoljin b'mod mhux raġonevoli tneħħew mill-bażi tad-data.

(158)

Biex jiġi stabbilit il-prezz mhux distort tal-materja prima kif imwassla fil-fabbrika ta' produttur minn pajjiż rappreżentattiv, il-Kummissjoni normalment kienet iżżid id-dazju tal-importazzjoni tal-pajjiż rappreżentattiv mal-prezz tal-importazzjoni u stima tal-kostijiet tat-trasport. Madankollu, f'dan il-każ, peress li l-marġini tad-dumping, kif spjegati fil-premessa (174) hawn taħt, diġà kienu tant għoljin li kienu jikkonfermaw l-eżistenza ta' dumping matul il-perjodu tal-investigazzjoni għal rieżami, żieda fil-marġni tad-dumping bħala riżultat ta' dan l-aġġustament mhijiex rilevanti għall-eżitu ta' dan ir-rieżami.

(159)

Il-bord tas-silika tqies bħala konsumabbli u kien jirrappreżenta madwar [1 – 5 %] (128) tal-kost totali tal-manifattura tal-grupp Hunan matul il-perjodu tal-investigazzjoni għal rieżami. Dawn il-kostijiet ma ġewx sostitwiti b'mod individwali bi prezz referenzjarju rappreżentattiv. Minflok, il-perċentwal tal-kost tal-konsumabbli fuq il-kost tal-materja prima tal-produttur esportatur imbagħad ġie traspost għall-kost tal-materja prima stabbilit fuq il-bażi ta' prezzijiet mhux distorti.

(160)

L-Istatut Statistiku tat-Turkija jippubblika informazzjoni dettaljata dwar il-pagi f'setturi ekonomiċi differenti fit-Turkija. Il-Kummissjoni użat il-pagi rrappurtati fis-settur tal-manifattura għall-2016, għall-attività ekonomika C.23 (Manifattura ta' prodotti minerali mhux metalliċi oħra) (129) skont il-klassifikazzjoni NACE Rev.2 (130). Il-valur medju ta' kull xahar tal-2016 ġie aġġustat kif xieraq għall-inflazzjoni bl-użu tal-indiċi tal-prezzijiet tal-produtturi domestiċi (131) kif ġie ppubblikat mill-Istitut Statistiku Tork.

(161)

Il-prezz tal-elettriku għall-kumpaniji (utenti industrijali) fit-Turkija hu ppubblikat mill-Istitut Statistiku tat-Turkija fl-istqarrijiet għall-istampa regolari tiegħu. Il-Kummissjoni użat id-data dwar il-prezzijiet tal-elettriku industrijali fil-medda tal-konsum korrispondenti f'Kuruș/kWh (132) kif ippubblikata fit-28 ta' Settembru 2018 (biex ikun kopert il-perjodu tal-investigazzjoni għal rieżami) (133).

(162)

Il-prezz tal-gass naturali għall-kumpaniji (utenti industrijali) fit-Turkija hu ppubblikat mill-Istitut Statistiku tat-Turkija fl-istqarrijiet għall-istampa regolari tiegħu. Il-Kummissjoni użat l-iskeda tariffarja korrispondenti bbażata fuq livell simili ta' konsum (134) li tkopri l-perjodu tal-investigazzjoni għal rieżami (135).

(163)

Il-kost tal-ilma għall-użu industrijali fit-Turkija huwa ppubblikat mill-Presidenza tal-Uffiċċju tal-Investiment tar-Repubblika tat-Turkija (136) abbażi tad-data pprovduta minn tliet sorsi reġjonali; l-Amministrazzjoni tal-Ilma u tad-Drenaġġ ta' Istanbul, ta' Eskisehir u ta' Antalya. Il-Kummissjoni użat id-data ta' Eskisehir peress li l-kumpanija Torka użata għall-SG&A u għall-profitt tinsab f'dan ir-reġjun.

(164)

Skont ir-raba' paragrafu tal-Artikolu 2(6a)(a) tar-Regolament bażiku, “il-valur normali maħdum għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti”.

(165)

Biex jiġi stabbilit valur mhux distort, għall-SG&A u għall-profitti, il-Kummissjoni użat id-data finanzjarja mill-kumpanija Torka Kutahya Porselen Sanayi A.S. Aktar preċiżament, il-Kummissjoni użat iċ-ċifri tal-SG&A u tal-profitt kif irrappurtati fil-kontijiet awditjati tal-kumpanija għas-sena 2017 u fl-ewwel rapport trimestrali għall-2018. Fuq il-bażi tal-informazzjoni disponibbli tal-kumpanija, il-maġġoranza tal-attività kummerċjali kienet tikkonċerna l-prodott ikkonċernat u fuq il-bażi tal-informazzjoni mir-rapporti finanzjarji, ma seħħ l-ebda avveniment straordinarju matul dan il-perjodu li kien jesiġi l-aġġustament tad-data rrappurtata. Il-perċentwal tal-SG&A u tal-profitti ġie kkoreġut għal livell mill-fabbrika billi tnaqqsu l-kostijiet tal-imballaġġ u tat-trasport mill-SG&A totali u mill-fatturat.

(166)

B'riżultat ta' dan, żdiedu l-entrati li ġejjin fil-kost mhux distort tal-manifattura:

(167)

Sabiex jiġi stabbilit il-valur normali maħdum, il-Kummissjoni adottat il-metodoloġija li ġejja. L-ewwel nett, il-Kummissjoni stabbilixxiet il-kostijiet mhux distorti tal-manifattura. Il-Kummissjoni mbagħad immultiplikat il-fatturi tal-użu kif osservati fil-livell tal-proċess ta' produzzjoni tal-produttur esportatur li kkoopera għall-materjali, ix-xogħol, l-elettriku u l-ilma bil-kostijiet mhux distorti għal kull unità osservata fil-pajjiż rappreżentattiv, jiġifieri t-Turkija. Barra minn hekk, għall-oġġetti ta' konsum (il-bords tas-silika) imsemmija fil-premessa (159) hawn fuq, il-Kummissjoni applikat perċentwal ugwali għas-sehem tal-produzzjoni fuq il-kostijiet tal-manifattura rrappurtati mill-produttur esportatur fuq il-kostijiet ta' manifattura diretti mhux distorti.

(168)

It-tieni, il-Kummissjoni applikat l-SG&A u l-profitt ta' Kutahya Porselen Sanayi A.S. mal-kostijiet ta' manifattura murija hawn fuq.

(169)

Fuq il-bażi ta' li ntqal hawn fuq, għall-produttur esportatur li kkoopera, il-Kummissjoni bniet il-valur normali għal kull tip ta' prodott fuq bażi ta' kif joħroġ mill-fabbrika, f'konformità mal-Artikolu 2(6a)(a) tar-Regolament bażiku.

(170)

Il-produttur esportatur li kkoopera kien jesporta l-prodott ikkonċernat direttament għand klijenti indipendenti fl-Unjoni. Għalhekk, il-prezz tal-esportazzjoni kien il-prezz li effettivament tħallas jew li kien pagabbli għall-prodott ikkonċernat meta jinbiegħ biex jiġi esportat lejn l-Unjoni, skont l-Artikolu 2(8) tar-Regolament bażiku.

(171)

Il-Kummissjoni qabblet il-valur normali maħdum kif stabbilit f'konformità mal-Artikolu 2(6a)(a) tar-Regolament bażiku fuq bażi ta' kif joħroġ mill-fabbrika mal-prezz tal-esportazzjoni fil-livell ta' kif joħroġ mill-fabbrika lejn l-Unjoni.

(172)

Bl-għan li jiġi żgurat tqabbil ġust bejn il-valur normali u l-prezz tal-esportazzjoni, sar provvediment xieraq fil-forma ta' aġġustamenti għad-differenzi li jaffettwaw il-prezzijiet u l-komparabbiltà tal-prezzijiet skont l-Artikolu 2(10) tar-Regolament bażiku. Il-bejgħ kollu mill-esportazzjoni kien fuq il-livell ta' FOB, u għalhekk il-prezz tal-esportazzjoni ġie aġġustat għall-kostijiet tat-trasport intern, tal-immaniġġjar u tat-tagħbija, tal-imballaġġ, għat-tariffi bankarji u l-kostijiet ta' kreditu (fil-medda ta' bejn 10 % u 15 %).

(173)

Il-kwistjoni ta' jekk għandux jiġi aġġustat il-valur normali għar-rifużjoni parzjali tal-VAT fuq l-esportazzjonijiet tħalliet miftuħa peress li l-marġini tad-dumping diġà kienu stabbilixxew l-eżistenza ta' dumping matul il-perjodu tal-investigazzjoni għal rieżami. Għaldaqstant, żieda fil-marġni tad-dumping bħala riżultat tal-aġġustament tal-VAT mhix rilevanti għall-eżitu ta' dan ir-rieżami.

(174)

Abbażi ta' dan, il-marġni medju peżat ta' dumping tal-grupp Hunan Hualian, espress bħala perċentwal tal-prezz CIF tal-grupp fil-fruntiera tal-Unjoni, bid-dazju mhux imħallas, kien ta' 35,1 %.

(175)

Skont il-Eurostat, matul il-perjodu tal-investigazzjoni għal rieżami, il-prezz medju tal-esportazzjoni miċ-Ċina (CIF) tal-prodott ikkonċernat lejn l-Unjoni kien ta' madwar 1,8 EUR/kg. Dan huwa taħt il-medja, stmat fil-livell CIF, il-prezz tal-esportazzjoni fl-istess perjodu tal-produttur esportatur li kkoopera kien ta' [2,0 — EUR 2.4/kg] (137).

(176)

Il-kalkolu bil-valur normali medju tal-produttur esportatur li kkoopera u bil-prezz medju tal-esportazzjoni miċ-Ċina (aġġustat għal EXW fuq il-bażi tad-data disponibbli (138)) matul il-perjodu tal-investigazzjoni għal rieżami għall-marġni tad-dumping kien fil-medda ta' (minn 65 % sa 75 %). Li kieku l-Kummissjoni kellha tuża l-valur normali stabbilit mill-industrija tal-Unjoni fit-talba għal rieżami, il-marġni tad-dumping kien ikun saħansitra ogħla. Dan ifisser li fuq il-bażi tal-fatti disponibbli, l-esportazzjonijiet miċ-Ċina tal-prodott ikkonċernat lejn l-Unjoni matul il-perjodu tal-investigazzjoni għal rieżami kienu jinbiegħu bi prezzijiet li huma oġġett ta' dumping.

(177)

Fuq il-bażi tad-data tal-produttur esportatur li kkoopera, il-grupp Hunan Hualian, id-dumping kompla matul il-perjodu tal-investigazzjoni għal rieżami b'marġni tad-dumping ta' 35 %. B'mod simili, fuq il-bażi ta' data statistika fil-pajjiż kollu (Eurostat), l-esportazzjonijiet Ċiniżi tal-prodott ikkonċernat kienu jinbiegħu fl-Unjoni bi prezzijiet li huma oġġett ta' dumping matul il-perjodu tal-investigazzjoni għal rieżami, b'marġni tad-dumping ta' madwar 70 %.

(178)

Għalhekk, il-Kummissjoni kkonkludiet li d-dumping tkompla matul il-perjodu tal-investigazzjoni għal rieżami.

(179)

Wara s-sejba tal-eżistenza tad-dumping matul il-perjodu tal-investigazzjoni għal rieżami, il-Kummissjoni investigat il-probabbiltà ta' kontinwazzjoni ta' dumping jekk il-miżuri jiġu rrevokati. Biex tagħmel dan, il-Kummissjoni analizzat l-elementi addizzjonali li ġejjin: il-kapaċità tal-produzzjoni u l-kapaċità żejda fir-RPĊ, il-komportament ta' pprezzar tal-produtturi esportaturi Ċiniżi fi swieq oħra, u l-attraenza tas-suq tal-Unjoni.

(180)

Iċ-Ċina hija l-akbar esportatur fid-dinja ta' oġġetti taċ-ċeramika li jintużaw fuq il-mejda u fil-kċina u għandha għexieren ta' eluf ta' produtturi attivi ta' kobor differenti (139). Fit-talba għal rieżami, l-applikant allega li ċ-Ċina għandha kapaċità ta' produzzjoni ta' 5,5 miljun tunnellata b'kapaċità żejda li kienet tilħaq aktar minn 36 % fl-2016, li kien previst li sal-2021 ma tonqosx taħt it-30 % (140). Il-kapaċità tal-produzzjoni ta' dan il-kobor kollu tfisser li ċ-Ċina waħedha tista' tkopri diversi drabi l-konsum totali tal-Unjoni li kien stmat għal madwar 634 000 tunnellata matul il-perjodu tal-investigazzjoni għal rieżami (ara l-premessa (205) aktar 'il quddiem). Il-problema tal-kapaċità żejda ġiet rikonoxxuta wkoll fir-rapporti finanzjarji ta' wħud mill-produtturi Ċiniżi l-kbar (141).

(181)

Wara l-impożizzjoni tal-miżuri, l-esportazzjonijiet ta' oġġetti taċ-ċeramika li jintużaw fuq il-mejda komplew jidħlu fl-Unjoni fi kwantitajiet kbar u baqgħu jirrappreżentaw kważi 60 % mill-konsum tal-Unjoni kif spjegat f'aktar dettall fit-taqsima 4.3.1 aktar 'il quddiem. Dan jindika li l-produtturi esportaturi Ċiniżi ta' oġġetti taċ-ċeramika li jintużaw fuq il-mejda għandhom relazzjonijiet kummerċjali b'saħħithom mal-klijenti tagħhom fl-Unjoni.

(182)

Fuq il-bażi ta' dan li ntqal hawn fuq, il-Kummissjoni kkonkludiet li ċ-Ċina kienet fost l-akbar produtturi ta' oġġetti taċ-ċeramika li jintużaw fuq il-mejda fid-dinja u kellha kapaċità ta' riżerva sinifikanti, li fid-dawl tar-relazzjonijiet kummerċjali b'saħħithom eżistenti, faċilment setgħet tiġi esportata lejn l-Unjoni jekk jitneħħew il-miżuri.

(183)

B'mod simili għall-bejgħ tal-Unjoni, l-esportazzjonijiet kollha lejn pajjiżi terzi kienu jinbiegħu lil klijenti indipendenti u fuq bażi tal-FOB. B'hekk, skont l-Artikolu 2(8) tar-Regolament bażiku, il-Kummissjoni użat il-prezz tal-esportazzjoni realment imħallas jew pagabbli għall-prodott ikkonċernat meta jinbiegħ għall-esportazzjoni fil-bqija tad-dinja.

(184)

Il-valur normali nħadem kif spjegat fil-premessi (154) - (167) ta' hawn fuq.

(185)

Il-Kummissjoni qabblet il-valur normali maħdum mal-prezz tal-esportazzjoni lejn pajjiżi terzi fil-livell ta' kif joħroġ mill-fabbrika skont l-Artikolu 2(10) tar-Regolament bażiku. Għaldaqstant, il-prezz tal-esportazzjoni ta' FOB ġie aġġustat għall-kostijiet tat-trasport intern, tal-immaniġġjar u tat-tagħbija, tal-imballaġġ, għat-tariffi bankarji u l-kostijiet ta' kreditu (fil-medda ta' bejn 10 % u 15 %).

(186)

It-tqabbil ta' hawn fuq irriżulta f'marġni tad-dumping ta' madwar 57 % għall-produttur esportatur li kkoopera matul il-perjodu tal-investigazzjoni għal rieżami.

(187)

Skont il-GTA, iċ-Ċina (142) esportat 1 523 910 tunnellata li jammontaw għal 3 755 428 981 RMB jew għall-valur FOB medju ta' 19,09 RMB/kg.

(188)

Il-valur normali nħadem kif spjegat fil-premessi (154) - (167) ta' hawn fuq.

(189)

Il-Kummissjoni qabblet il-valur normali maħdum mal-prezz tal-esportazzjoni fil-livell EXW skont l-Artikolu 2(10) tar-Regolament bażiku. Għaldaqstant il-prezz tal-esportazzjoni ta' FOB ġie aġġustat għall-kostijiet tat-trasport intern, tal-immaniġġjar u tat-tagħbija, tal-imballaġġ, għat-tariffi bankarji u l-kostijiet ta' kreditu (fil-medda ta' bejn 10 % u 15 %).

(190)

It-tqabbil ta' hawn fuq wera marġni ta' dumping għall-pajjiż kollu għall-esportazzjonijiet lejn il-pajjiżi terzi kollha (eskluża l-Unjoni) f'medda ta' bejn 15 - 24 %.

(191)

Il-Kummissjoni sabet li matul il-perjodu tal-investigazzjoni għal rieżami, l-esportazzjonijiet lejn pajjiżi terzi nbiegħu bi prezzijiet oġġett ta' dumping mill-produttur esportatur li kkoopera. Il-Kummissjoni sabet ukoll li fuq il-bażi tal-istatistiki disponibbli, l-esportazzjonijiet Ċiniżi lejn il-bqija tad-dinja wkoll kienu jinbiegħu bi prezzijiet oġġett ta' dumping.

(192)

B'hekk, il-Kummissjoni kkonkludiet li matul il-perjodu tal-investigazzjoni għal rieżami, seħħ dumping fi swieq terzi wkoll.

(193)

L-Unjoni hi wieħed mill-akbar swieq tal-oġġetti taċ-ċeramika li jintużaw fuq il-mejda fid-dinja. Kif diġà ssemma fil-premessa (181) ta' hawn fuq, wara l-impożizzjoni tal-miżuri antidumping fl-2012, l-esportazzjonijiet Ċiniżi tal-prodott ikkonċernat komplew jidħlu fl-Unjoni fi kwantitajiet sinifikanti. Matul il-perjodu tal-investigazzjoni għal rieżami, l-esportazzjonijiet Ċiniżi lejn l-Unjoni tal-oġġetti taċ-ċeramika li jintużaw fuq il-mejda kienu jirrappreżentaw kważi 60 % mill-konsum tal-Unjoni. Dan juri biċ-ċar li l-Unjoni baqgħet suq destinatarju attraenti u importanti għall-oġġetti taċ-ċeramika li jintużaw fuq il-mejda u fil-kċina Ċiniżi.

(194)

L-importazzjonijiet miċ-Ċina tal-prodott ikkonċernat komplew jidħlu fis-suq tal-Unjoni bi prezzijiet li huma oġġett ta' dumping. Il-Kummissjoni sabet ukoll li r-RPĊ kienet l-akbar esportatur tal-oġġetti taċ-ċeramika li jintużaw fuq il-mejda u fil-kċina fid-dinja u kellha kapaċitajiet ta' riżerva sinifikanti.

(195)

Barra minn hekk, il-Kummissjoni sabet li l-politika tal-ipprezzar tal-produtturi esportaturi Ċiniżi fi swieq terzi tappoġġja l-probabbiltà ta' kontinwazzjoni ta' dumping lejn l-Unjoni, jekk il-miżuri jitħallew jiskadu.

(196)

Finalment, il-Kummissjoni stabbilixxiet li s-suq tal-Unjoni kien għadu suq attraenti għall-produtturi esportaturi Ċiniżi tal-oġġetti taċ-ċeramika li jintużaw fuq il-mejda anki wara l-impożizzjonijiet tal-miżuri.

(197)

Fid-dawl ta' dan li ntqal hawn fuq, il-Kummissjoni kkonkludiet li kien hemm probabbiltà qawwija li t-tħassir tal-miżuri anti-dumping jirriżulta f'żieda fl-esportazzjonijiet ta' oġġetti taċ-ċeramika li jintużaw fuq il-mejda mir-RPĊ lejn l-Unjoni bi prezzijiet li huma oġġett ta' dumping.

(198)

Matul il-perjodu tal-investigazzjoni għal rieżami, il-prodott simili kien immanifatturat fl-Unjoni minn aktar minn 130 produttur magħruf. Il-produzzjoni hi kkonċentrata fir-Repubblika Ċeka, fi Franza, fil-Ġermanja, fl-Italja, fil-Polonja, fil-Portugall, fir-Rumanija u fir-Renju Unit. Il-produzzjoni totali tal-Unjoni ġiet stmata għal 279 339 tunnellata matul il-PIR fuq il-bażi tad-data estrapolata tal-Eurostat, kontroverifikata u aġġustata fuq il-bażi tat-tweġibiet għall-kwestjonarju li ġew ippreżentati mill-produtturi tal-Unjoni fil-kampjun u d-data li ġiet ippreżentata mill-applikant. Il-produtturi tal-Unjoni li jirrappreżentaw il-produzzjoni totali tal-Unjoni jikkostitwixxu l-industrija tal-Unjoni skont it-tifsira tal-Artikoli 4(1) u 5(4) tar-Regolament bażiku.

(199)

Wara l-bidu, produttur tal-Unjoni minnhom ippreżenta dubji dwar l-affidabbiltà tad-data użata mill-applikanti fit-talba għal rieżami. B'mod partikolari, il-kumpanija sostniet li d-data invokata mill-applikanti mhijiex trasparenti għal partijiet terzi u fil-biċċa l-kbira mhijiex ibbażata fuq data uffiċjali tal-Eurostat jew tal-Prodcom, iżda fuq data mingħand assoċjazzjonijiet ta' produtturi tal-Unjoni li jappoġġaw it-talba għal rieżami. Il-kumpanija sostniet li, abbażi tad-data Prodcom waħedha, l-applikant ma kienx ikollu pożizzjoni fit-talba tiegħu għal rieżami, peress li dan ikun jirrappreżenta biss 21,8 % tal-produzzjoni tal-Unjoni.

(200)

Is-CCCLA kkummentat ukoll fuq l-affidabbiltà tad-data użata fit-talba għal rieżami. Sostniet li l-informazzjoni dwar il-prezzijiet użata ma kinitx affidabbli peress li l-kalkoli tad-dumping, tat-twaqqigħ tal-prezzijiet u tal-bejgħ taħt il-prezz ma kkunsidrawx il-karatteristiċi tal-prodott bħad-dekorazzjoni, il-perċezzjoni tal-konsumatur jew il-marka.

(201)

L-ewwel il-Kummissjoni nnotat li skont l-Artikolu 11(2) tar-Regolament bażiku, hi kienet wettqet eżami dettaljat qabel il-bidu tal-investigazzjoni. Din analizzat id-data fit-talba u kkuntattjat lill-produtturi magħrufa kollha tal-Unjoni biex jipprovdu wkoll data dwar il-produzzjoni kif ukoll il-pożizzjoni tagħhom fir-rigward tal-ilment.

(202)

It-tieni, il-metodoloġija applikata għall-kalkolu taċ-ċifri tal-produzzjoni fit-talba kienet l-istess bħal dik applikata matul l-investigazzjoni oriġinali skont l-Artikolu 11(9) tar-Regolament bażiku. Il-kjarifiki dwar il-metodoloġija ġew ipprovduti fit-talba għar-rieżami stess kif ukoll f'aktar sottomissjonijiet mill-applikant wara l-bidu tal-investigazzjoni.

(203)

It-tielet, il-kalkoli magħmula mill-applikant fit-talba għal rieżami tabilħaqq kienu bbażati fuq ammont limitat ta' tipi ta' prodotti u ma qisux il-karatteristiċi aktar fini tal-prodott. Madankollu, ma kienx ikun possibbli li l-applikant jipprovdi kalkolu aktar sofistikat dak iż-żmien. Informazzjoni dettaljata dwar id-differenzi fil-prezzijiet filwaqt li jitqiesu t-tipi differenti u l-karatteristiċi tal-prodott mhix disponibbli għall-pubbliku jew raġonevolment disponibbli. Fiż-żmien tal-bidu, u fuq il-bażi tad-data disponibbli f'dak iż-żmien, il-Kummissjoni kienet sodisfatta li kien hemm biżżejjed sostenn (leġittimazzjoni) u biżżejjed evidenza biex tibda l-investigazzjoni tar-rieżami. Għalhekk, it-talbiet ġew miċħuda.

(204)

Il-konsum fl-Unjoni ġie stabbilit fuq il-bażi tal-istatistiki tal-Eurostat dwar l-importazzjonijiet u l-volumi tal-bejgħ fl-Unjoni mill-industrija tal-Unjoni, kif sottomessi mill-applikant. Dawn il-volumi ta' bejgħ ġew kontroverifikati u aġġornati fejn kien hemm bżonn rigward l-informazzjoni verifikata mill-produtturi tal-Unjoni fil-kampjun.

(205)

Matul il-perjodu kkunsidrat, il-konsum tal-Unjoni żviluppa kif ġej:

Tabella 1

(206)

Matul il-perjodu kkunsidrat, il-konsum tal-Unjoni żdied b'5,9 %.

(207)

Fuq il-bażi tad-data tal-Eurostat, il-volum tal-importazzjonijiet, is-sehem tas-suq u l-prezzijiet medji tal-importazzjonijiet tal-prodott ikkonċernat żviluppaw kif stabbilit hawn taħt:

Tabella 2

(208)

Il-volum tal-importazzjonijiet totali mir-RPĊ żdied b'5 % matul il-perjodu kkunsidrat u kien jammonta għal 356 667 tunnellata matul il-perjodu tal-investigazzjoni għal rieżami. Għad li l-importazzjonijiet kienu għadhom f'livell għoli, dawn naqsu minn mindu ġew imposti l-miżuri anti-dumping proviżorji f'Novembru 2012. Is-sehem mis-suq tal-importazzjonijiet Ċiniżi kellu tnaqqis simili mindu saret l-investigazzjoni oriġinali, b'varjazzjoni żgħira biss matul il-perjodu kkunsidrat u baqgħet relattivament stabbli fil-livell ta' 56,2 % matul il-PIR. Jista' jiġi raġonevolment supponut li t-tnaqqis u l-istabbilizzazzjoni kurrenti tal-ishma mis-suq huma r-riżultat tal-miżuri anti-dumping fis-seħħ.

(209)

Matul il-perjodu kkunsidrat, il-prezz tal-importazzjonijiet mir-RPĊ lejn l-Unjoni żviluppa kif ġej:

Tabella 3

(210)

Matul il-perjodu kkunsidrat, il-prezzijiet tal-importazzjonijiet Ċiniżi żdiedu b'10 %, minn EUR 1 626/tunnellata għal EUR 1 791/tunnellata. Dan huwa l-prezz medju tal-importazzjoni għal kull tunnellata tal-importazzjonijiet kollha tal-prodott ikkonċernat u għalhekk, ix-xejra tista' tiġi affettwata mill-bidliet fit-taħlita tal-prodott.

(211)

Sar tqabbil tal-prezzijiet tal-bejgħ fis-suq tal-Unjoni bejn il-prezzijiet medji ponderati tal-bejgħ tal-produtturi tal-Unjoni fil-kampjun għal klijenti indipendenti fis-suq tal-Unjoni u l-prezzijiet medji ponderati tal-produtturi esportaturi fil-kampjun mir-RPĊ. Il-prezzijiet tal-bejgħ rilevanti tal-produtturi tal-Unjoni ġew aġġustati fejn meħtieġ għal livell tal-prezz mill-fabbrika, jiġifieri esklużi l-kostijiet tat-trasport fl-Unjoni, il-kostijiet tal-kummissjonijiet u wara t-tnaqqis tal-iskontijiet u tar-ribassi.

(212)

Fil-kummenti tagħha is-CCCLA ddikkjarat li l-produtturi Ċiniżi kienu jbigħu prodotti ġeneriċi biss filwaqt li l-produtturi tal-Unjoni jbigħu prodotti raffinati u tad-ditta (143).

(213)

Fl-investigazzjoni oriġinali, il-prezzijiet tal-industrija tal-Unjoni kienu ġew aġġustati biex iqisu d-differenzi fil-kwalità, fil-livell ta' kummerċ u fil-marka. Fil-kwalità, kien ġie konkluż li minn perspettiva tal-konsumaturi, prodotti ta' kwalità ta' grad inferjuri jikkompetu ma' prodotti ta' kwalità tal-grad A fis-suq tal-Unjoni. B'konsegwenza ta' dan, il-prezzijiet tal-prodotti ta' grad aktar baxx ġew aġġustati għall-prezzijiet fil-livell ta' grad A (144).

(214)

Madankollu ma sarx aġġustament simili fl-investigazzjoni attwali għal rieżami. Instab li l-produtturi Ċiniżi u tal-Unjoni fil-kampjun ibigħu fil-livelli ta' kwalità ta' grad A, B jew AB. Il-produtturi Ċiniżi pproduċew prodotti ta' kwalità ta' grad inferjuri (ta' grad C u anqas), iżda dawn ma ġewx esportati lejn l-Unjoni matul il-perjodu tal-investigazzjoni għal rieżami. Il-produtturi tal-Unjoni kienu jipproduċu wkoll prodotti ta' kwalità ta' grad inferjuri wkoll, iżda dawn il-prodotti kienu jesportawhom lejn pajjiżi terzi jew inkella kienu jbigħuhom bi prezzijiet baxxi ħafna lil karitajiet jew bħala prodotti ta' skart. F'dan il-każ imsemmi l-aħħar, dan il-bejgħ u l-prezzijiet ma ġewx inklużi fil-kalkoli.

(215)

Id-differenza fil-kwalità bejn il-livelli ta' kwalità ta' grad A, B u AB hi marġinali apparagun tad-differenza mal-livelli inferjuri (grad C u aktar). Barra minn hekk, gradazzjoni bħal din mhix universali jew ibbażata fuq xi standards adottati mill-industrija kollha iżda hi pjuttost speċifika għall-kumpaniji. Dan ifisser li produttur jaf jittikketta prodott bħala ta' kwalità ta' grad A, li kumpanija oħra kienet tittikketta bħala ta' kwalità ta' grad B li kieku pproduċietu fil-fabbrika tagħha stess. L-investigazzjoni wriet li, f'ċerti każijiet, produttur tal-Unjoni biegħ l-istess prodott bl-istess speċifikazzjonijiet u karatteristiċi fiżiċi lill-istess klijent bħal produttur Ċiniż, filwaqt li mhux bilfors jattribwilu l-istess grad ta' kwalità fis-sistema tal-produzzjoni interna tiegħu. Peress li ma setgħet issir l-ebda distinzjoni oġġettiva bejn il-prodotti ta' kwalità ta' grad A, B u AB, prodotti b'din il-kwalifikazzjoni tqiegħdu fl-istess kategorija ta' kwalità. Dan ifisser li l-produtturi tal-Unjoni u Ċiniżi kienu jbigħu prodotti ta' livell ta' kwalità simili fis-suq tal-Unjoni matul il-perjodu tal-investigazzjoni għal rieżami. Għalhekk, il-Kummissjoni kkonkludiet li ma kien meħtieġ l-ebda aġġustament relatat mal-kwalità.

(216)

L-aġġustamenti saru wkoll fl-investigazzjoni oriġinali biex jitqiesu d-differenzi fil-livell ta' kummerċ. Dak iż-żmien, il-produtturi Ċiniżi fil-kampjun kienu jbigħu l-prodotti tagħhom kważi esklużivament fil-livell tal-bejjiegħa bl-ingrossa, filwaqt li fuq in-naħa tal-UE l-bejgħ kien isir ukoll fil-livell tal-konsumatur u f'livelli oħra wkoll. Peress li din id-differenza fil-katini tad-distribuzzjoni affettwat il-livelli tal-prezzijiet, il-prezzijiet tal-Unjoni ġew aġġustati biex jittieħed kont ta' dan (145).

(217)

Madankollu, fl-investigazzjoni attwali għal rieżami, kemm il-produtturi Ċiniżi fil-kampjun kif ukoll il-produtturi tal-Unjoni fil-kampjun, il-bejgħ tagħhom fil-biċċa l-kbira għamluh lill-bejjiegħa bl-ingrossa u lid-distributuri, iżda ammont sinifikanti ta' bejgħ għamluh lil bejjiegħa bl-imnut u oħrajn. Barra minn hekk, l-investigazzjoni stabbilixxiet li kwalunkwe differenza fil-prezz innotat bejn il-livelli ta' kummerċ ma kinitx issegwi xejra loġika. Għaldaqstant ġie konkluż li, fid-dawl tal-livelli komparabbli ta' kummerċ u ta' nuqqas ta' rabta ċara bejn il-livell ta' kummerċ u l-issettjar tal-prezzijiet, ma kienx hemm bżonn li jiġu aġġustati l-prezzijiet tal-industrija tal-Unjoni fuq din il-bażi.

(218)

Fl-investigazzjoni oriġinali, saru aġġustamenti wkoll biex jiġi newtralizzat element tal-prezz marbut mal-marka. Dak iż-żmien instab li l-produtturi esportaturi Ċiniżi ma kinux ibigħu prodotti tad-ditta iżda, minflok, prodotti b'“tikketta privata” jew ġeneriċi, filwaqt li l-produtturi tal-UE kienu jbigħu taħlita ta' prodotti li fil-parti l-kbira tagħhom kienu tad-ditta u prodotti ġeneriċi wkoll. Peress li l-prodotti tad-ditta normalment ikunu pperċepiti mill-klijenti bħala li juru ċertu prestiġju, kwalità u disinn garantiti, dawn iġibu prezzijiet ogħla fis-suq meta mqabbla ma' prodotti ġeneriċi, minkejja li jkollhom l-istess karatteristiċi fiżiċi u tekniċi. Biex dan l-effett fuq il-prezz jiġi newtralizzat, sar aġġustament fil-prezzijiet tal-industrija tal-Unjoni (146).

(219)

Madankollu, fl-investigazzjoni attwali għal rieżami, is-sitwazzjoni nbidlet minn dik oriġinali. Il-produtturi Ċiniżi fil-kampjun mhux biss ibigħu prodotti ġeneriċi iżda anki prodotti tad-ditta, filwaqt li l-produtturi tal-UE fil-kampjun bħalissa jbigħu aktar prodotti mhux tad-ditta milli tad-ditta. Barra minn hekk, l-investigazzjoni wriet li l-produtturi Ċiniżi u tal-Unjoni f'xi każijiet anki jbigħu prodotti identiċi bl-istess speċifikazzjonijiet u karatteristiċi fiżiċi lill-istess klijenti (ara l-premessa (215)).

(220)

B'hekk, il-Kummissjoni ċaħdet it-talba tas-CCCLA li l-produtturi Ċiniżi kienu jbigħu prodotti ġeneriċi biss filwaqt li l-produtturi tal-Unjoni jbigħu prodotti raffinati u tad-ditta.

(221)

B'mod aktar ġenerali u kif spjegat ukoll fl-investigazzjoni oriġinali, il-valur addizzjonali ta' prodott tad-ditta ġeneralment ma jkunx jista' jiġi kkwantifikat b'mod preċiż peress li jiddependi fuq ħafna fatturi differenti, bħall-perċezzjoni tal-klijent, ir-rikonoxximent tal-marka kummerċjali u fatturi mhux kwantifikabbli oħrajn (147). Għal uħud mill-produtturi tal-Unjoni fil-kampjun, pereżempju, il-prodotti tad-ditta jaf ikollhom valur addizzjonali minħabba r-rikonoxximent tal-isem f'ċerti reġjuni speċifiċi jew fl-Istati Membri, filwaqt li l-istess prodotti tad-ditta jaf ikunu anqas magħrufa f'reġjuni jew fi Stati Membri oħra. Għaldaqstant, għal dawn il-produtturi tal-Unjoni fil-kampjun, kważi esklużivament fi prezzijiet ogħla.

(222)

Fil-kummenti tagħha, is-CCCLA argumentat ukoll li perċentwal għoli ta' SG&A (jiġifieri 40 %) huwa indikattiv tal-bejgħ ta' prodotti tad-ditta (148). Madankollu, id-data verifikata tal-produtturi tal-Unjoni fil-kampjun turi livell ta' SG&A għal produttur tal-Unjoni li jbigħ kważi esklużivament prodotti tad-ditta, li hu kważi l-istess bħall-SG&A għal produttur tal-Unjoni li jbigħ kważi esklużivament prodotti mhux tad-ditta. Tabilħaqq, l-erba' produtturi kollha fil-kampjun għandhom livell simili ta' SG&A, li hu simili wkoll jew anqas minn tal-produtturi Ċiniżi fil-kampjun kif ukoll minn dak fil-kontijiet awditjati tal-kumpanija Torka użata f'din l-investigazzjoni. Għaldaqstant għal dawn il-produtturi, il-markar ta' prodotti ma jissarrafx f'SG&A ogħla (ara wkoll il-premessi (146) u (148)).

(223)

Għaldaqstant, minħabba t-taħlita ta' prodotti tad-ditta u ġeneriċi mibjugħa mill-produtturi Ċiniżi u tal-Unjoni fil-kampjun u fid-dawl ta' apprezzament tal-pożizzjoni tal-kumpaniji fis-suq tal-Unjoni, l-istrateġija ta' pprezzar u l-livelli ta' SG&A, it-talbiet li għamlet is-CCCLA ġew miċħuda u l-Kummissjoni kkonkludiet li ma kienx hemm bżonn li l-prezzijiet tal-Unjoni jiġu aġġustati għall-markar.

(224)

Il-prezzijiet tal-industrija tal-Unjoni tqabblu mal-prezzijiet mitluba mill-produtturi esportaturi Ċiniżi aġġustati għas-CIF fil-fruntiera tal-Unjoni. Il-prezzijiet CIF imbagħad ġew aġġustati 'l fuq għall-kostijiet ta' wara l-importazzjoni, jiġifieri għall-iżdoganar tal-merkanzija, il-kostijiet ta' mmaniġġjar u ta' tagħbija tal-merkanzija, id-dazji doganali konvenzjonali u d-dazji anti-dumping. Abbażi tal-metodoloġija msemmija hawn fuq, it-tqabbil wera li matul il-perjodu tal-investigazzjoni għal rieżami, l-importazzjonijiet tal-prodott ikkonċernat waqqgħu l-prezzijiet tal-industrija tal-Unjoni bi 17,7 %.

(225)

Skont l-Artikolu 3(5) tar-Regolament bażiku, l-eżami tal-impatt tal-importazzjonijiet li huma l-oġġett ta' dumping fuq l-industrija tal-Unjoni kien jinkludi evalwazzjoni tal-fatturi u l-indiċijiet ekonomiċi kollha li affettwaw l-istat tal-industrija tal-Unjoni matul il-perjodu kkunsidrat.

(226)

L-indikaturi makroekonomiċi (il-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem mis-suq, l-impjiegi, il-produttività, il-kobor tal-marġini tad-dumping u l-irkupru mill-effetti tad-dumping tal-passat) ġew ivvalutati fil-livell tal-industrija kollha tal-Unjoni. Il-valutazzjoni kienet ibbażata fuq l-informazzjoni pprovduta mill-applikant, kontrovverifikata mat-tweġibiet ivverifikati għall-kwestjonarju tal-produtturi tal-Unjoni inklużi fil-kampjun u mal-istatistiki uffiċjali disponibbli.

(227)

L-analiżi tal-indikaturi mikroekonomiċi (l-istokkijiet, il-prezzijiet tal-bejgħ, il-profittabbiltà, il-fluss tal-flus, l-investimenti, ir-redditu fuq l-investimenti, il-possibbiltà li jiġi ġġenerat il-kapital, il-pagi u l-ispiża tal-produzzjoni) twettqet fil-livell tal-produtturi tal-Unjoni inklużi fil-kampjun. Il-valutazzjoni kienet ibbażata fuq l-informazzjoni tagħhom, li ġiet debitament ivverifikata matul żjarat ta' verifika fuq il-post.

(228)

L-industrija tal-Unjoni hi frammentata ħafna iżda fil-parti l-kbira tista' tinqasam f'żewġ segmenti: l-SMEs u kumpaniji akbar. Għal ċerti indikaturi mikroekonomiċi (il-prezz tal-bejgħ, il-fluss tal-flus, l-investimenti, il-paga medja għal kull impjegat, l-istokkijiet, il-profittabbiltà u l-kost tal-produzzjoni), ir-riżultati tal-kumpaniji fil-kampjun ġew ponderati skont is-sehem tas-segment li għalih kienet tappartjeni għalih dik il-kumpanija speċifika. Għal dan il-għan intużaw il-piż speċifiku f'termini ta' volumi ta' produzzjoni għal kull segment fis-settur totali tal-oġġetti taċ-ċeramika li jintużaw fuq il-mejda (42 % SMEs, 58 % kumpaniji kbar). Dan żgura li s-sitwazzjoni tal-kumpaniji iżgħar tkun riflessa kif xieraq biex jiġi evitat żbilanċ fl-analiżi ġenerali tad-dannu minħabba r-riżultati tal-kumpaniji l-kbar.

(229)

Matul il-perjodu kkunsidrat, il-produzzjoni, il-kapaċità tal-produzzjoni u l-użu tal-kapaċità tal-industrija tal-Unjoni żviluppaw kif ġej:

Tabella 5

(230)

Minn dan isegwi li kien hemm żieda modesta fil-volum tal-produzzjoni (b'6 %) u fil-kapaċità (bi 2 %), filwaqt li l-użu tal-kapaċità żdied b'4 % tul il-perjodu kkunsidrat sabiex laħaq 85 %.

(231)

Matul il-perjodu taħt kunsiderazzjoni, il-bejgħ fl-Unjoni mill-industrija tal-Unjoni żviluppa kif ġej:

Tabella 6

(232)

Il-bejgħ mill-industrija tal-Unjoni fis-suq tal-Unjoni żdied bi 11 % matul il-perjodu kkunsidrat. Fl-istess ħin, is-sehem mis-suq tal-industrija tal-Unjoni żdied biss bi ftit, minn 29,6 % għal 31,0 %.

(233)

Matul il-perjodu kkunsidrat, il-livell tal-impjiegi u l-produttività fi ħdan l-industrija tal-Unjoni żviluppaw kif ġej:

Tabella 7

(234)

Matul il-perjodu kkunsidrat, l-impjiegi żdiedu b'6 %. Il-produttività tal-forza tax-xogħol tal-produtturi tal-Unjoni, imkejla bħala produzzjoni (tunnellati) għal kull persuna impjegata kull sena, baqgħet stabbli matul il-perjodu kkunsidrat. Din l-istabbiltà hi dovuta parzjalment għall-isforzi tal-industrija tal-Unjoni fis-snin ta' qabel biex twieġeb għall-pressjoni li ġejja mill-importazzjonijiet oġġett ta' dumping mir-RPĊ f'dak iż-żmien, li diġà kienet qed iżżid il-produttività għal livelli għoljin qabel il-perjodu kkunsidrat.

(235)

Matul il-perjodu kkunsidrat, il-produzzjoni tal-industrija tal-Unjoni żdiedet b'6 % filwaqt li l-volum tal-bejgħ lil klijenti mhux relatati fl-Unjoni żdied bi 11 %. Dan hu spjegat minn tnaqqis fil-bejgħ għall-esportazzjoni mill-industrija tal-Unjoni. L-industrija tal-Unjoni rnexxielha tibbenefika minn tkabbir fis-suq tal-Unjoni, għad li dawk il-faċilitajiet li kienu affettwati aktar mill-użu aktar baxx tal-kapaċità osservat matul l-investigazzjoni oriġinali għadhom f'fażi ta' rkupru. L-ishma mis-suq tal-industrija tal-Unjoni baqgħu stabbli matul il-perjodu kkunsidrat kollu kemm hu.

(236)

Matul il-perjodu tal-investigazzjoni għal rieżami, id-dumping issokta f'livell sinifikanti, kif spjegat taħt it-Taqsima 3 ta' hawn fuq. Hu nnotat li l-produtturi Ċiniżi waqqgħu l-prezzijiet tal-bejgħ tal-industrija tal-Unjoni f'livell sinifikanti.

(237)

Matul il-perjodu kkunsidrat, l-industrija tal-Unjoni wriet sinjali ta' rkupru mill-effetti ta' dumping fil-passat. Il-produzzjoni, il-bejgħ u s-sehem mis-suq tal-Unjoni lkoll żdiedu mill-investigazzjoni oriġinali 'l hawn, filwaqt li l-volum tal-importazzjonijiet mir-RPĊ u s-sehem mis-suq tagħhom naqsu. Madankollu, il-produzzjoni, il-kapaċità u l-impjiegi tal-Unjoni, minkejja li żdiedu, xorta għadhom mhumiex fil-livell li ntlaħaq fl-2008, li kien il-bidu tal-perjodu kkunsidrat fl-investigazzjoni oriġinali. Dak iż-żmien, l-industrija tal-Unjoni kienet diġà meqjusa bħala waħda fi stat fraġli minħabba l-volumi kbar ta' importazzjonijiet Ċiniżi bi prezzijiet baxxi fis-suq tal-Unjoni li kienu żdiedu b'mod qawwi fl-2002-2004 (149). Għaldaqstant, il-Kummissjoni kkonkludiet li l-industrija tal-Unjoni reġgħet kisbet ċertu spazju ekonomiku iżda xorta waħda għadha ma rkupratx kompletament mid-dumping sinifikanti imgħoddi.

(238)

Matul il-perjodu kkunsidrat, il-livelli tal-istokkijiet tal-produtturi tal-Unjoni inklużi fil-kampjun żviluppaw kif ġej:

Tabella 8

(239)

Il-livell tal-istokkijiet tal-għeluq tal-industrija tal-Unjoni naqas f'termini assoluti bi 22 % matul il-perjodu kkunsidrat. Madankollu, dan mhuwiex indikatur kruċjali peress li l-industrija eżaminata bażikament taħdem skont l-ordnijiet.

(240)

Matul il-perjodu kkunsidrat, kemm il-prezzijiet tal-industrija tal-Unjoni kif ukoll il-kost tal-produzzjoni żdiedu bi 12 %.

(241)

Il-Kummissjoni stabbilixxiet il-profittabbiltà tal-produtturi tal-Unjoni inklużi fil-kampjun billi ħadmet il-profitt nett qabel it-taxxa tal-bejgħ tal-prodott simili lil klijenti mhux relatati fl-Unjoni bħala perċentwal tal-fatturat ta' dak il-bejgħ. Matul il-perjodu kkunsidrat, il-profittabbiltà tal-industrija tal-Unjoni ċċaqalqet bejn l-aktar punt baxx tagħha ta' 2,0 % fl-2016 u l-ogħla punt tagħha ta' 3,7 % fl-2017, filwaqt li naqset b'0,4 punti perċentwali bejn l-2014 u l-perjodu tal-investigazzjoni għal rieżami. Hija baqgħet taħt il-profittabbiltà miksuba matul l-investigazzjoni oriġinali (3,5 % matul dak il-perjodu ta' investigazzjoni). Barra minn hekk, il-profittabbiltà baqgħet sew taħt il-profitt fil-mira li tqies aċċettabbli fl-investigazzjoni oriġinali (jiġifieri 6,0 %).

(242)

Matul il-perjodu kkunsidrat, il-fluss tal-flus tal-industrija tal-Unjoni żdied b'21 %, filwaqt li l-livell tal-investimenti żdied b'25 %. Madankollu, ta' min jinnota li din iż-żieda hi dovuta għar-riżultati ta' waħda biss mill-kumpaniji (il-kbar), li rnexxielha tagħmel investimenti sinifikanti sabiex tespandi l-kapaċità ta' produzzjoni tagħha. L-investimenti tat-tliet kumpaniji l-oħra baqgħu stabbli jew naqsu b'mod sinifikanti.

(243)

Bejn l-2014 u l-perjodu tal-investigazzjoni għal rieżami, it-tnaqqis fir-redditu fuq l-investiment, definit bħala l-profitt f'perċentwal tal-valur kontabilistiku nett tal-investimenti, kien ogħla mit-tiċkin tal-profittabbiltà matul il-perjodu kkunsidrat kollu kemm hu. Matul l-istess perjodu, il-livelli medji tal-paga żdiedu bi ftit, iżda inqas mill-kost unitarju tal-produzzjoni.

(244)

L-analiżi tad-dannu turi li s-sitwazzjoni tal-industrija tal-Unjoni tjiebet b'mod sinifikanti fil-perjodu kkunsidrat. Ħafna mill-indikaturi tad-dannu wrew xejra pożittiva. Il-fatt li l-industrija tal-Unjoni bbenefikat mill-miżuri jintwera, fost l-oħrajn, minn żieda fil-produzzjoni, fil-volumi tal-bejgħ tal-Unjoni, fis-sehem mis-suq u fil-prezzijiet tal-bejgħ. Għaldaqstant, fuq il-bażi ta' dan li ntqal hawn fuq, il-Kummissjoni kkonkludiet li l-industrija tal-Unjoni ma sofrietx dannu materjali skont it-tifsira tal-Artikolu 3(5) tar-Regolament bażiku matul il-perjodu tal-investigazzjoni għal rieżami.

(245)

Minkejja dan, anki jekk l-industrija tal-Unjoni bdiet tirkupra mid-dannu tal-passat, dan l-irkupru miexi b'pass kajman. Fid-dawl tal-volumi sinifikanti ta' importazzjoni li baqgħu jiġu mir-RPĊ bi prezzijiet li jwaqqgħu l-prezzijiet tal-industrija tal-Unjoni, il-profittabilità tal-industrija tal-Unjoni baqgħet taħt il-profitt fil-mira, u dan juri li tinsab f'sitwazzjoni fraġli.

(246)

Wara d-divulgazzjoni, is-CCCLA sostniet li l-Kummissjoni ma kellhiex tasal għal din il-konklużjoni peress li kważi l-indikaturi ekonomiċi kollha fl-investigazzjoni juru xejra pożittiva. Madankollu, kif spjegat fil-premessi (244) u (245) hawn fuq, l-industrija tal-Unjoni rkuprat biss bil-mod mill-intorduzzjoni tal-miżuri 'l hawn. Fiż-żmien tal-impożizzjoni tal-miżuri wara l-investigazzjoni oriġinali, l-industrija tal-Unjoni ġarrbet dannu materjali u għalhekk kienet f'diffikultajiet ekonomiċi kbar. Ix-xejra pożittiva tal-makroindikaturi tal-industrija tal-Unjoni f'termini relattivi għaldaqstant ma għandhomx jitqiesu b'mod iżolat minn dan il-punt tat-tluq debboli, f'ċifri assoluti fil-bidu tal-investigazzjoni attwali. Flimkien mal-profittabbiltà konsistentement baxxa tal-industrija tal-Unjoni kif ukoll l-importazzjonijiet sinifikanti li għadhom għaddejjin mir-RPĊ, l-industrija tal-Unjoni għadha mhix f'sitwazzjoni fejn faċilment tiflaħ għar-rikorrenza tal-importazzjonijiet oġġett ta' dumping f'volumi akbar. Dan jidher ukoll fit-Taqsima 5.4 hawn taħt, fejn twettqet simulazzjoni biex jiġi vvalutat x'jiġri lill-industrija tal-Unjoni jekk il-miżuri jitħallew jiskadu. Għalhekk, il-Kummissjoni ċaħdet din it-talba.

(247)

Kif ġie determinat fit-taqsima 3 hawn fuq, l-importazzjonijiet Ċiniżi saru f'livelli ta' prezzijiet li kienu oġġett ta' dumping matul il-perjodu tal-investigazzjoni għal rieżami u teżisti l-probabbiltà li jitkompla d-dumping f'każ li l-miżuri jitħallew jiskadu. Għalhekk, f'konformità mal-Artikolu 11(2) tar-Regolament bażiku, il-Kummissjoni eżaminat kemm hu probabbli li jerġa' jseħħ dannu materjali, jekk il-miżuri kontra r-RPĊ jitħallew jiskadu.

(248)

Biex tkun stabbilita l-probabbiltà ta' rikorrenza tad-dannu, ġew analizzati l-elementi li ġejjin: il-kapaċità tal-produzzjoni u l-kapaċitajiet ta' riżerva fir-RPĊ, kemm hu attraenti s-suq tal-Unjoni, inkluża l-eżistenza ta' miżuri anti-dumping jew kompensatorji fuq oġġetti taċ-ċeramika li jintużaw fuq il-mejda u fil-kċina f'pajjiżi terzi oħra, il-politika tal-prezzijiet tal-produtturi esportaturi Ċiniżi fi swieq oħra ta' pajjiżi terzi, u l-effett fuq is-sitwazzjoni tal-industrija tal-Unjoni.

(249)

Ir-RPĊ hu bil-bosta l-akbar esportatur fid-dinja ta' oġġetti taċ-ċeramika li jintużaw fuq il-mejda u fil-kċina. Jammonta għal madwar 70 % tal-esportazzjonijiet globali tad-dinja. L-UE hi l-aktar suq tal-esportazzjoni importanti għar-RPĊ, fuq il-bażi tal-valur totali esportat matul l-aħħar snin. (150)

(250)

Kif spjegat fil-premessi minn (180) sa (182) aktar 'il fuq, il-produtturi fir-RPĊ għandhom kapaċitajiet tal-produzzjoni sinifikanti u, għaldaqstant, kapaċità ta' riżerva li tisboq bil-bosta l-konsum totali tal-Unjoni matul il-perjodu tal-investigazzjoni għal rieżami.

(251)

Is-suq tal-Unjoni huwa fid-dinja l-akbar importatur tal-prodott ikkonċernat (151). Barra dan, kif muri fit-Tabella 1 hawn fuq, il-konsum fl-Unjoni tal-prodott ikkonċernat żdied bejn l-2014 u l-PIR minn 598 829 tunnellata għal 634 255 tunnellata. Dan juri li l-konsum fl-Unjoni għadu b'saħħtu u qed jikber. Minħabba d-daqs relattivament kbir tiegħu u l-konsum tiegħu li qed jiżdied b'mod kostanti, is-suq tal-Unjoni għadu attraenti għall-produtturi esportaturi Ċiniżi.

(252)

Qabel ma ġew imposti l-miżuri, l-importazzjonijiet Ċiniżi kienu jirrappreżentaw medja ta' madwar nofs miljun tunnellata, filwaqt li ammontaw għal 356 667 tunnellata matul il-perjodu tal-investigazzjoni għal rieżami. Il-fatt li l-importazzjonijiet Ċiniżi, għalkemm f'livell aktar baxx (ara t-Tabella 2 hawn fuq), ma waqqfux wara l-impożizzjoni tal-miżuri, jikkonferma li l-produtturi esportaturi Ċiniżi jsibu s-suq tal-Unjoni attraenti u jkomplu jbigħu fis-suq tal-Unjoni.

(253)

Barra minn hekk, il-miżuri li jiddefendu l-kummerċ kontra l-oġġetti taċ-ċeramika Ċiniżi li jintużaw fuq il-mejda u fil-kċina huma fis-seħħ f'pajjiżi terzi oħra, li juru l-istess tip ta' politika ta' pprezzar osservata għall-esportazzjonijiet Ċiniżi lejn l-Unjoni (152). Il-miżuri għad-difiża tal-kummerċ se jagħmluha aktar diffiċli għall-produtturi esportaturi Ċiniżi biex jesportaw lejn dawn is-swieq, u dan jkompli jżid l-attraenza tas-suq tal-Unjoni fejn dawn l-esportazzjonijiet jistgħu jintbagħtu.

(254)

Element ieħor li juri l-attraenza tas-suq tal-Unjoni hu l-istrateġija ta' pprezzar tal-produtturi esportaturi Ċiniżi. Il-prezzijiet tal-esportazzjoni tal-produtturi esportaturi Ċiniżi fil-kampjun tal-prodott ikkonċernat huma ogħla għal swieq ta' pajjiżi terzi milli għall-Unjoni (ara l-premessa (188) hawn fuq). Barra minn hekk, dawn xorta waħda huma ferm anqas mill-prezzijiet tal-industrija tal-Unjoni fis-suq tal-Unjoni. Matul il-PIR, il-prezz medju tal-esportazzjonijiet tal-produtturi esportaturi Ċiniżi lejn is-suq tal-Unjoni kien ferm anqas mill-prezz tal-industrija tal-Unjoni fis-suq tal-Unjoni. Fil-fatt, l-importazzjonijiet Ċiniżi għandhom kważi l-anqas prezzijiet fis-suq tal-Unjoni. Il-ftit pajjiżi terzi li jesportaw bi prezzijiet orħos jirrappreżentaw biss frazzjoni mill-importazzjonijiet totali fl-Unjoni, b'potenzjal ta' tkabbir li mhuwiex komparabbli mad-daqs tal-faċilitajiet tal-produzzjoni fir-RPĊ. Madankollu, jista' jkun raġonevolment mistenni li l-importazzjonijiet Ċiniżi se jidħlu fis-suq tal-Unjoni bi prezzijiet oġġett ta' dumping jekk il-miżuri jitħallew jiskadu, b'kunsiderazzjoni sħiħa jew parzjali tal-ammont tad-dazji anti-dumping kurrenti.

(255)

Minħabba l-kapaċitajiet ta' riżerva għolja fir-RPĊ, l-attraenza tas-suq tal-Unjoni u l-politika tal-ipprezzar tal-produtturi esportaturi Ċiniżi kif spjegat fil-qosor hawn fuq fil-premessi minn (249) sa (254), huwa probabbli li volumi sinifikanti ta' oġġetti taċ-ċeramika li jintużaw fuq il-mejda u fil-kċina bi prezz baxx jkunu disponibbli għall-bejgħ/ridirezzjonar lejn l-Unjoni diġà fi żmien qasir f'każ li l-miżuri jitħallew jiskadu.

(256)

Biex tivvaluta l-impatt probabbli ta' żieda fl-importazzjonijiet Ċiniżi bi prezz baxx fuq l-industrija tal-Unjoni, il-Kummissjoni l-ewwel ħarset lejn telf potenzjali tas-sehem mis-suq. Issimulat l-impatt possibbli f'każ li l-produtturi esportaturi mill-pajjiżi kkonċernati jżidu l-esportazzjonijiet tagħhom lejn l-Unjoni biex jiksbu sehem mis-suq tal-Unjoni li jkun simili għal dak miksub fil-perjodu ta' investigazzjoni oriġinali, jiġifieri, qabel l-impożizzjoni tal-miżuri. Dan ikun ifisser tnaqqis fil-produzzjoni ta' 12 000 tunnellata mill-produturi tal-Unjoni fil-kampjun, u żieda ta' 67 800 tunnellata fl-importazzjonijiet mir-RPĊ. Kif stabbilit fl-investigazzjoni oriġinali, volum bħal dan ta' importazzjonijiet oġġett ta' dumping tal-prodott ikkonċernat kien biżżejjed biex jikkawża dannu materjali lill-industrija tal-Unjoni.

(257)

Għal din l-analiżi, il-Kummissjoni qieset li l-prezzijiet tal-produtturi esportaturi mir-RPĊ u dawk tal-industrija tal-Unjoni jibqgħu l-istess bħalma kienu matul il-PIR. Barra minn hekk, il-Kummissjoni assumiet li s-sehem mis-suq akbar tal-esportaturi Ċiniżi hu ferm probabbli li jittieħed mill-industrija tal-Unjoni. It-Tabella 11 ta' hawn taħt turi li s-sehem mis-suq mitluf mir-RPĊ minn mindu ġew imposti l-miżuri anti-dumping fil-parti l-kbira mar għand l-industrija tal-Unjoni.

Tabella 11

(258)

It-telf tal-volum tal-bejgħ iwassal għal rati ta' użu tal-kapaċità aktar baxxi u għal żieda fil-kost medju tal-produzzjoni. Min-naħa tiegħu dan iwassal għal deterjorament tas-sitwazzjoni finanzjarja tal-industrija tal-Unjoni u għal tnaqqis tal-profittabbiltà tagħha li diġà kienet ferm anqas mill-profitt fil-mira u naqset matul il-perjodu kkunsidrat. Bl-applikazzjoni ta' stima konservattiva tat-tnaqqis fil-produzzjoni għall-produtturi tal-Unjoni fil-kampjun (nofs it-tnaqqis possibbli stabbilit fil-premessa (256) li jammonta għal 6 000 tunnellata), l-analiżi tal-impatt uriet li f'każ li l-miżuri jitħassru, l-industrija tal-Unjoni ssofri telf ta' 8,5 % fuq il-fatturat.

(259)

Inkella, l-industrija tal-Unjoni tista' tiddeċiedi li tbaxxi l-livelli tal-prezzijiet tagħha biex tipprova żżomm il-volum tal-bejgħ u s-sehem mis-suq tagħha. Dan ikun iwassal għal deterjorament ulterjuri tas-sitwazzjoni finanzjarja tagħha u, fid-dawl tal-livell ta' profittabbiltà diġà baxx miksub fil-PIR, iġiegħel lill-industrija tal-Unjoni tagħmel aktar telf.

(260)

Fuq il-bażi ta' dan li ntqal hawn fuq, il-Kummissjoni kkonkludiet li t-tħassir tal-miżuri fuq l-importazzjonijiet mir-RPĊ probabbilment iwassal għal rikorrenza ta' dannu materjali għall-industrija tal-Unjoni.

(261)

F'konformità mal-Artikolu 21 tar-Regolament bażiku, il-Kummissjoni eżaminat jekk iż-żamma tal-miżuri oriġinali tmurx kontra l-interess tal-Unjoni b'mod ġenerali. Id-determinazzjoni tal-interessi tal-Unjoni kienet ibbażata fuq apprezzament tad-diversi interessi involuti, jiġifieri dawk tal-industrija tal-Unjoni fuq naħa waħda, u dawk tal-importaturi u ta' partijiet oħra fuq in-naħa l-oħra.

(262)

Il-Kummissjoni fakkret li, fl-investigazzjoni oriġinali tqies li l-adozzjoni tal-miżuri ma tmurx kontra l-interessi tal-Unjoni. Barra minn hekk, il-fatt li l-investigazzjoni preżenti hija rieżami, li b'hekk tanalizza sitwazzjoni li fiha l-miżuri anti-dumping diġà kienu fis-seħħ, jippermetti l-valutazzjoni ta' kwalunkwe impatt negattiv mhux dovut fuq il-partijiet ikkonċernati mill-miżuri anti-dumping attwali.

(263)

Abbażi ta' dan, ġie eżaminat jekk, minkejja l-konklużjonijiet dwar il-probabbiltà ta' rikorrenza ta' dumping u rikorrenza ta' dannu, kienx hemm raġunijiet konvinċenti li jwasslu għall-konklużjoni li mhuwiex fl-interess tal-Unjoni li jinżammu l-miżuri f'dan il-każ partikolari.

(264)

L-investigazzjoni wriet li jekk il-miżuri jiskadu, dan x'aktarx ikollu effett negattiv sinifikanti fuq l-industrija tal-Unjoni. Is-sitwazzjoni tal-industrija tal-Unjoni se tiddeterjora malajr f'termini tal-volumi aktar baxxi tal-bejgħ u l-prezzijiet tal-bejgħ li jirriżultaw fi tnaqqis qawwi fil-profittabbiltà. Min-naħa l-oħra, il-kontinwazzjoni tal-miżuri tippermetti li l-industrija tal-Unjoni tkompli tirkupra mid-dannu tal-passat ikkawżat mill-importazzjonijiet oġġett ta' dumping, u li tisfrutta l-potenzjal tagħha f'suq tal-Unjoni li ma jkunx affettwat minn prattiki kummerċjali inġusti.

(265)

Produttur tal-Unjoni li ma ddaħħalx fil-kampjun u s-CCCLA ddikjaraw li estensjoni tal-miżuri ma tkunx fl-interess tal-produtturi tal-Unjoni. Skont dawn, id-dazji anti-dumping ma għenux lill-produtturi tal-Unjoni, li ma rnexxilhomx iżidu s-sehem mis-suq, il-volumi tal-bejgħ jew il-prezzijiet tagħhom. Barra minn hekk, id-dazji anti-dumping żiedu l-prezz tal-prodotti akkwistati mill-produtturi tal-Unjoni biex il-portafoll tagħhom jkun komplut.

(266)

Madankollu, l-analiżi tad-dannu fit-taqsima 4 t'hawn fuq (il-premessi minn (198) sa (245)) uriet li fil-fatt, l-industrija tal-Unjoni qed tirkupra mill-effetti dannużi tal-importazzjonijiet li huma l-oġġett ta' dumping mir-RPĊ. Tabilħaqq, l-industrija tal-Unjoni esperjenzat żieda fis-sehem mis-suq minn 20,9 % fil-perjodu ta' investigazzjoni oriġinali (2011) għal 31 % fil-PIR (ara t-Tabella 11 hawn fuq), filwaqt li l-produtturi tal-Unjoni fil-kampjun kienu kapaċi jżidu l-volumi tal-bejgħ tagħhom minn 152 095 tunnellata fl-2011 għal 196 484 fil-PIR, u l-prezzijiet minn EUR 3 615 għal kull tunnellata fl-2011 għal EUR 3 853 fil-PIR. Din iż-żieda fil-prezz kienet possibbli minkejja ż-żieda fil-kost tal-importazzjonijiet tal-prodotti mir-RPĊ minn xi wħud mill-produtturi tal-Unjoni biex jiddiversifikaw il-portafoll tagħhom. Għalhekk, il-Kummissjoni ċaħdet din it-talba.

(267)

Wara l-iżvelar, is-CCCLA semmiet il-fatt li produttur wieħed tal-Unjoni ma appoġġax l-impożizzjoni tal-miżuri. Hija sostniet li dan il-produttur ma kienx jimmanifattura t-tipi kollha ta' oġġetti taċ-ċeramika li jintużaw fuq il-mejda u fil-kċina, u li l-portafoll tiegħu jikkompletah bi prodotti li ġejjin mir-RPĊ, u jiddependi fuq sors ta' provvista affidabbli mir-RPĊ. Bl-istess mod, is-CCCLA argumentat li ż-żewġ importaturi fil-kampjun jiddikjaraw li l-produtturi tal-Unjoni mhumiex kapaċi jwasslu l-kwalità u l-kwantitajiet meħtieġa fis-suq tal-Unjoni, minħabba pereżempju spejjeż tax-xogħol għoljin. Dan juri, skont is-CCCLA, il-kumplimentarjetà bejn il-prodotti tal-Unjoni u l-importazzjonijiet Ċiniżi li joħolqu taħlita ta' interessi fost l-industrija tal-Unjoni.

(268)

Il-Kummissjoni nnutat li dawn l-argumenti jikkonċidu mal-pożizzjoni ta' żewġ importaturi mhux relatati, li l-Kummissjoni vvlutat fil-premessi minn (271) sa (277). Fin-nuqqas ta' kwalunkwe element ġdid, dawn għalhekk ma jistgħux jinfluwenzaw l-ibbilanċjar tal-interessi skont it-test tal-interessi tal-Unjoni.

(269)

Abbażi ta' dak li ntqal hawn fuq ġie konkluż li ż-żamma tal-miżuri anti-dumping fis-seħħ hija fl-interess tal-industrija tal-Unjoni.

(270)

Fl-istadju tal-bidu ta' din l-investigazzjoni, 45 importatur magħruf mhux relatat ġew ikkuntattjati u mistiedna jikkooperaw. Kif intqal fil-premessa (13) aktar 'il fuq, ħmistax-il importatur daħlu f'kuntatt u tnejn minnhom ġew inklużi fil-kampjun u mlew il-formola tal-kwestjonarju.

(271)

Iż-żewġ kumpaniji kienu kontra l-kontinwazzjoni tal-miżuri, primarjament għaliex kienu jemmnu li l-produtturi tal-Unjoni mhumiex kapaċi jipprovdu l-kwalità u l-kwantitajiet meħtieġa għas-suq tal-Unjoni. Fil-fehma tagħhom, il-produzzjoni tal-Unjoni hi anqas flessibbli u anqas adattabbli għad-domanda li tinbidel meta mqabbla mal-produzzjoni Ċiniża. Il-kumpaniji ġew mistoqsija wkoll x'jiġri li kieku d-dazji kellhom jiġu revokati. Għal dan, iż-żewġ kumpaniji wieġbu li, fil-fehma tagħhom, il-prezzijiet Ċiniżi jiżdiedu filwaqt li, b'mod parallel, il-klijenti mill-Unjoni jitolbu prezzijiet orħos. Dan, skont il-kumpaniji fil-kampjun, ikun iwassal għal tnaqqis fil-marġini għall-importaturi.

(272)

Fl-investigazzjoni oriġinali nstab li, fid-dawl tal-profitti u tas-sorsi tal-provvista tal-importaturi, l-impożizzjoni tal-miżuri ma jkollhiex impatt avvers b'mod sinifikanti fuq is-sitwazzjoni tal-importaturi mhux relatati tal-prodott ikkonċernat. Fl-investigazzjoni attwali l-analiżi tad-data vverifikata wriet li, bħala medja, il-prodott ikkonċernat jammonta għal [30 - 40 %] tal-bejgħ tal-kumpaniji (153). Iż-żewġ importaturi li kkooperaw għamlu l-profitt matul il-perjodu tal-investigazzjoni għal rieżami, bi profitt medju fuq il-prodott ikkonċernat mir-RPĊ ta' [5 - 9 %] (154). Għalkemm il-profitt medju kien kemxejn inqas minn [6 - 10 %] tal-investigazzjoni oriġinali, xorta kien b'saħħtu. Iż-żewġ kumpaniji jġibu l-importazzjonijiet tagħhom tal-prodott ikkonċernat kważi esklużivament mir-RPĊ.

(273)

Importatur mhux relatat u mhux inkluż fil-kampjun iddikjara li l-produtturi tal-Unjoni ma jfornux il-prodotti li dan l-importatur partikolari jġib mir-RPĊ. Il-prodotti ta' dan l-importatur huma primarjament oġġetti dekorati li jiġu ppakkjati b'mod individwali f'kaxxi għar-rigali bl-istess disinn li jkollha l-porċellana. Skont l-importatur, il-produzzjoni ta' dawn l-oġġetti teħtieġ ħafna ħaddiema u, minħabba l-kostijiet lavorattivi ogħla fl-Unjoni, din tkun tiswa wisq biex tiġi prodotta mill-industrija tal-Unjoni.

(274)

Madankollu, l-investigazzjoni żvelat li l-produtturi tal-Unjoni huma kapaċi jipproduċu u fil-fatt huma jipproduċu oġġetti dekorati mballati b'mod individwali jew f'settijiet żgħar f'kaxxi għar-rigali dekorati. Minkejja dan, għal dawk l-importaturi li jġibu l-oġġetti tagħhom mir-RPĊ, il-kontinwazzjoni tal-miżuri jista' jkollha effett negattiv fuq is-sitwazzjoni finanzjarja tagħhom. Madankollu, peress li dawn l-oġġetti huma ta' natura speċjalizzata u, għalhekk, jirrappreżentaw sehem żgħir biss mill-importazzjonijiet mir-RPĊ, dan l-effett mhuwiex mistenni jkollu effett negattiv sinifikanti fuq is-sitwazzjoni ġenerali tal-importaturi. Għalhekk, il-Kummissjoni ċaħdet din it-talba.

(275)

L-importatur mhux relatat u mhux inkluż fil-kampjun ukoll iddikjara li ma kienx hemm differenza bejn prodotti tal-porċellana dekorati u dawk bojod fl-investigazzjoni. Skont l-importatur, ftit biss huma l-fuħħara li jipproduċu oġġetti dekorati fl-Unjoni, li jfisser li l-importazzjonijiet mir-RPĊ huma neċessarji biex tiġi ssodisfata din it-tip ta' domanda.

(276)

Madankollu, l-investigazzjoni wriet li mill-prodotti kollha mibjugħa matul il-PIR mill-produtturi tal-Unjoni fil-kampjun, 30 % kienu oġġetti dekorati. Barra minn hekk, it-tqabbil bejn il-prodotti Ċiniżi u tal-Unjoni sar fuq il-bażi tat-tip ta' prodott, fejn il-prodotti ġew raggruppati skont il-karatteristiċi li ġejjin: tip ta' materjal taċ-ċeramika, tip ta' oġġett, forma bażika, tiżjin u żilġa. Dan ifisser li, pereżempju, oġġetti dekorati biss li huma prodotti fl-Unjoni tqabblu ma' oġġetti dekorati importati mir-RPĊ, oġġetti b'żilġa kkulurita tqabblu ma' oġġetti b'żilġa kkulurita filwaqt li oġġetti bojod tqabblu ma' oġġetti bojod. Għaldaqstant, din id-dikjarazzjoni ma tistax tiġi aċċettata.

(277)

Minħabba l-marġni ta' profitt b'saħħtu tal-importaturi fil-kampjun minkejja l-impożizzjoni ta' miżuri antidumping, flimkien mal-fatt li l-importaturi jemmnu li l-marġni ta' profitt tagħhom se jitnaqqas jekk il-miżuri jiġu revokati, huwa probabbli li ż-żamma tal-miżuri eżistenti ma jkollhiex effett negattiv sinifikanti fuq l-attività tal-importaturi mhux relatati tal-prodott ikkonċernat.

(278)

Bħal fl-investigazzjoni oriġinali, l-ebda parti li tirrappreżenta l-interessi tal-utenti finali bħall-assoċjazzjonijiet tal-konsumaturi, ma ppreżentaw ruħhom jew ikkooperaw b'xi mod fl-investigazzjoni. Fin-nuqqas kontinwu ta' kooperazzjoni mill-utenti f'dan ir-rieżami ta' skadenza, il-Kummissjoni tikkunsidra li s-sejbiet tagħha fl-investigazzjoni oriġinali għadhom validi u li l-kontinwazzjoni tal-miżuri ma taffettwax b'mod negattiv lill-konsumaturi bħalma huma l-unitajiet domestiċi, jew għallinqas ma taffettwahomx b'mod sinifikanti.

(279)

Produttur tal-Unjoni mhux fil-kampjun sostna li r-revoka tal-miżuri se jagħti vantaġġ lill-konsumaturi tal-Unjoni għax i.) il-prodott huwa prodott finali, li jfisser li d-dazji għandhom impatt dirett fuq il-konsumaturi, ii.) il-prodotti Ċiniżi jwieġbu għal domanda differenti mill-prodotti tal-Unjoni u iii.) proporzjon kbir tal-konsumaturi tal-Unjoni huwa affettwat mid-dazji minħabba s-sehem mis-suq għoli tar-RPĊ fis-suq tal-Unjoni. Is-CCCLA sostniet ukoll li billi l-oġġetti taċ-ċeramika li jintużaw fuq il-mejda u fil-kċina huma prodott finali, id-dazji anti-dumping jolqtu direttament lill-konsumaturi tal-Unjoni peress li ma hemm l-ebda industrija intermedja biex tassorbi l-ispejjeż. Importatur mhux relatat mhux inkluż fil-kampjun innota li d-dazji anti-dumping tabilħaqq wasslu biex iżid il-prezzijiet tiegħu għall-konsumatur.

(280)

Hu improbabbli ħafna li r-revoka tal-miżuri tkun tirriżulta fit-tnaqqis tal-prezzijiet bl-ammont sħiħ tad-dazji. Anke fix-xenarju improbabbli fejn il-prezzijiet tal-konsumatur jonqsu bl-ammont sħiħ tad-dazji antidumping attwali, il-kost annwali għall-konsumaturi jitnaqqas b'inqas minn EUR 1 (155). Peress li l-miżuri ma jistgħux jitqiesu li kellhom impatt sinifikanti fuq il-konsumaturi, il-Kummissjoni ċaħdet dawn it-talbiet.

(281)

Fl-ibbilanċjar tal-interessi differenti li jikkompetu ma' xulxin fl-Unjoni, il-Kummissjoni tat kunsiderazzjoni speċjali lill-ħtieġa li jiġu eliminati l-effetti ta' dumping dannuż li jfixklu l-kummerċ u biex terġa' tiġi restawrata l-kompetizzjoni effettiva. Minn naħa, il-kontinwazzjoni tal-miżuri tkun tħares lil industrija importanti tal-Unjoni, inklużi ħafna intrapriżi żgħar u medji, kontra l-probabbiltà ta' rikorrenza ta' dannu. Min-naħa l-oħra, il-valutazzjoni tas-sitwazzjoni tal-importaturi u tal-utenti kif ukoll in-nuqqas ta' kooperazzjoni mill-utenti juru biċ-ċar li l-kontinwazzjoni tal-miżuri ma jkollhiex impatt negattiv sproporzjonat fuqhom.

(282)

Għaldaqstant, il-Kummissjoni kkonkludiet li ma hemmx raġunijiet konvinċenti għall-interessi tal-Unjoni sabiex ma jinżammux il-miżuri anti-dumping definittivi fuq l-importazzjonijiet tal-oġġetti li jintużaw fuq il-mejda u fil-kċina li joriġinaw mir-RPĊ.

(283)

Minn dan li ntqal hawn fuq isegwi li l-miżuri anti-dumping applikabbli għall-importazzjonijiet ta' oġġetti taċ-ċeramika li jintużaw fuq il-mejda u fil-kċina li joriġinaw miċ-Ċina għandhom jinżammu.

(284)

Kumpanija tista' titlob l-applikazzjoni ta' rati ta' dazju anti-dumping individwali jekk sussegwentement hija tbiddel l-isem tal-entità tagħha. It-talba trid tiġi indirizzata lill-Kummissjoni (156). It-talba jrid ikun fiha l-informazzjoni rilevanti kollha li turi li l-bidla ma taffettwax id-dritt tal-kumpanija li tibbenifika mir-rata tad-dazju li tapplika għaliha. Jekk il-bidla fl-isem tal-kumpanija ma jaffettwax id-dritt tagħha li tibbenefika mir-rata ta' dazju li tapplika għaliha, avviż dwar il-bidla tal-isem jiġi ppubblikat f'Il-Ġurnal Uffiċjali tal-Unjoni Ewropea.

(285)

Fid-dawl tal-Artikolu 109 tar-Regolament 2018/1046 (157), meta ammont irid jiġi rimborżat wara sentenza tal-Qorti tal-Ġustizzja tal-Unjoni Ewropea, ir-rata tal-imgħax jenħtieġ li tkun ir-rata applikata mill-Bank Ċentrali Ewropew għall-operazzjonijiet ta' rifinanzjament prinċipali tiegħu, kif ippubblikat fis-serje C ta' Il-Ġurnal Uffiċjali tal-Unjoni Ewropea fl-ewwel jum kalendarju ta' kull xahar.

(286)

Il- Kumitat stabbilit permezz tal-Artikolu 15(1) tar-Regolament (UE) 2016/1036 ma tax opinjoni.