(1)

Fl-2013 il-Kummissjoni adottat ir-Regolament ta' Implimentazzjoni (UE) Nru 185/2013 (2) li jipprevedi tnaqqis minn ċerti kwoti tas-sajd allokati lil Spanja fl-2013 u fis-snin sussegwenti minħabba s-sajd żejjed ta' ċertu kwota tal-kavalli fl-2009. Dak ir-Regolament stabbilixxa tnaqqis mill-kwota tal-kavalli fid-Diviżjoni 8c tal-ICES, fis-Subżoni 9 u 10 tiegħu u fl-ilmijiet tal-Unjoni taż-żona 34.1.1 tas-CECAF u tnaqqis mill-kwota tal-inċova fis-Subżona 8 tal-ICES.

(2)

Il-flotta kostali ta' Spanja tiddependi ħafna fuq il-kavalli u l-profittabbiltà tagħha diġà hija baxxa ħafna. Barra minn hekk, għall-2019 il-kwota hija 20 % inqas minn dik għall-2018 u t-tnaqqis b'rabta mal-kavalli se jkompli għaddej sal-2023. Il-pressjoni tas-sajd fuq l-istokk mhix se tiżdied meta mqabbla ma' dik li diġà hija permessa mir-Regolament tal-Kunsill (UE) 2019/124 (3) billi wieħed jippermetti tnaqqis inqas għall-kavalli fl-2019 biss. Sabiex jiġu evitati konsegwenzi soċjali u ekonomiċi kemm għas-settur tas-sajd ikkonċernat u kemm għall-industrija tal-ipproċessar marbuta miegħu, jenħtieġ li l-kwantitajiet li jitnaqqsu f'sena partikulari ma jaqbżux it-33 % tal-kwota annwali tal-kavalli. Meta l-kwantità li trid titnaqqas tkun taqbeż it-33 % tal-kwota annwali tal-kavalli, jenħtieġ li r-Regolament ta' Implimentazzjoni (UE) Nru 185/2013 jiġi emendat sabiex titnaqqas il-kwantità annwali li trid titnaqqas filwaqt li jittawwal kif xieraq il-perjodu tat-tnaqqis.

(3)

Spanja għandha kwota ta' 24 597 tunnellata ta' kavalli fid-Diviżjoni 8c tal-ICES, fis-Subżoni 9 u 10 tiegħu u fl-ilmijiet tal-Unjoni taż-żona 34.1.1 tas-CECAF għall-2019, filwaqt li t-tnaqqis previst fir-Regolament ta' Implimentazzjoni (UE) Nru 185/2013 għal dik is-sena huwa ta' 9 240 tunnellata, jiġifieri ta' 38 % tal-kwota Spanjola. B'hekk jenħtieġ li l-ammonti li jridu jitnaqqsu fl-2019 jitnaqqsu sabiex ikunu jirrappreżentaw 33 % tal-kwota u jenħtieġ li d-differenza tiżdied mal-ammonti li jridu jitnaqqsu fl-2023.

(4)

Spanja talbet li t-tnaqqis mill-kwota tal-kavalli għall-2019 jitnaqqas mill-5 544 tunnellata stabbiliti oriġinarjament għal 4 421 tunnellata. Id-differenza tirrappreżenta 0,1 % mit-TAC totali, allura l-impatt bijoloġiku fuq l-istokk huwa minimu, iżda xorta waħda huwa importanti għas-sajd fuq skala żgħira. It-tnaqqis li se jsir fl-2023 mill-istess kwota se jiżdied mill-269 tunnellata stabbiliti oriġinarjament għal 1 392 tunnellata. Il-proporzjon oriġinali tat-tnaqqis mill-kwoti tal-kavalli u tal-inċova se jvarja minn sena għall-oħra, iżda se jinżamm l-istess tul il-perjodu kollu tal-2019 sal-2023. L-ammonti li jridu jitnaqqsu fl-2023 se jibqgħu taħt l-ammonti annwali tat-tnaqqis stabbiliti għall-perjodu mill-2016 sal-2022.

(5)

It-tibdil fl-ammonti mnaqqsin mill-kwoti tal-kavalli u tal-inċova fl-2019 se jkompli jiżgura li ma jinqabżux l-opportunitajiet tas-sajd għall-2019 għal dawk l-ispeċijiet. Dan se jkun konformi mal-objettivi tal-Politika Komuni tas-Sajd.

(6)

Għalhekk jenħtieġ li r-Regolament ta' Implimentazzjoni (UE) Nru 185/2013 jiġi emendat kif xieraq.

(7)

Il-miżuri previsti f'dan ir-Regolament huma skont l-opinjoni tal-Kumitat għas-Sajd u l-Akkwakultura,