ANNESS

IR-REKWIŻITI TEKNIĊI TAL-ASSIGURAZZJONI TAL-KWALITÀ RIGWARD IL-KONTENUT TAR-RAPPORTI TA' KWALITÀ TAL-ISTATISTIKA EWROPEA DWAR IL-PREZZIJIET TAL-GASS NATURALI U TAL-ELETTRIKU

Ir-rapporti tal-kwalità għandu jkun fihom informazzjoni dwar il-kriterji kollha tal-kwalità stabbiliti fl-Artikolu 12(1) tar-Regolament (KE) Nru 223/2009.

1.   IR-RILEVANZA:

Fir-rapporti ta' kwalità, l-Istati Membri għandhom jipprovdu l-informazzjoni li ġejja:

(a)	deskrizzjoni tal-utenti, il-ħtiġijiet rispettivi tagħhom u ġustifikazzjoni ta' dawn il-ħtiġijiet;

(b)	il-proċeduri użati għall-kejl tas-sodisfazzjon tal-utenti u l-produzzjoni tar-riżultati;

(c)	kemm hija disponibbli l-istatistika meħtieġa.

2.   IL-PREĊIŻJONI:

Ir-rapporti ta' kwalità għandhom jinkludu:

(a)	valutazzjoni tal-preċiżjoni li tiġbor fil-qosor il-komponenti varji tas-sett tad-data;

(b)	deskrizzjoni tal-erruri waqt it-teħid tal-kampjuni;

(c)	deskrizzjoni ta' erruri oħrajn.

3.   IT-TEMPESTIVITÀ U L-PUNTWALITÀ:

L-Istati Membri għandhom jirrapportaw dwar:

(a)	it-tul taż-żmien bejn l-avveniment jew il-fenomenu li jkunu qed jiddeskrivu u d-disponibbiltà tad-data (it-tempestività);

(b)	it-tul taż-żmien bejn id-data mmirata tat-twassil tad-data u d-data proprja tat-twassil tad-data (il-puntwalità);

(c)	l-għadd ta' iterazzjonijiet meħtieġa biex ikun hemm data vvalidata għalkollox (iterazzjonijiet ta' validazzjoni).

4.   L-AĊĊESSIBBILTÀ U Ċ-ĊAREZZA:

L-Istati Membri għandhom jirrapportaw dwar il-kundizzjonijiet u l-mezzi li bihom l-utenti jistgħu:

(a)	jiksbu u jużaw id-data (inkluż, iżda mhux limitat għal stqarrijiet tal-aħbarijiet, pubblikazzjonijiet, bażijiet tad-data online, aċċess għall-mikrodata);

(b)	jinterpretaw id-data bħall-għoti ta' dokumentazzjoni dwar il-metodoloġija u l-ġestjoni tal-kwalità.

5.   IL-KOMPARABBILTÀ:

L-Istati Membri għandhom jirrapportaw dwar kemm hija komparabbli l-istatistika:

(a)	bejn iż-żoni ġeografiċi;

(b)	tul iż-żmien

6.   IL-KOERENZA:

L-Istati Membri għandhom jirrapportaw dwar kemm l-istatistika hi:

(a)	rikonċiljabbli mad-data miksuba minn sorsi oħra (koerenza transsettorjali);

(b)	konsistenti fi ħdan sett ta' data partikolari (koerenza interna).

L-Istati Membri għandhom jirrapportaw ukoll dwar l-aspetti ta' kwalità addizzjonali li ġejjin:

1.   IL-ĠESTJONI TAL-KWALITÀ:

L-Istati Membri għandhom jirrapportaw dwar is-sistemi u l-oqfsa fis-seħħ għall-ġestjoni tal-kwalità tal-prodotti u l-proċessi statistiċi. Għandhom jirrapportaw ukoll dwar il-valutazzjoni tagħhom tal-kwalità tad-data.

2.   IR-REVIŻJONI TAD-DATA:

L-Istati Membri għandhom jispjegaw għalfejn tkun ġiet riveduta d-data validata. Ir-raġunijiet jistgħu jinkludu informazzjoni ta' sors ġdid tad-data disponibbli, metodi ġodda jew informazzjoni rilevanti oħra. Ir-rapport għandu jinkludi wkoll id-data, id-daqs u id-daqs tar-reviżjonijiet.

B'konformità mal-Artikolu 7(3) tar-Regolament (UE) 2016/1952, dawk ir-rapporti għandhom jinkludu informazzjoni dwar l-ambitu u l-ġbir tad-data, il-kriterji tal-kalkolu, il-metodoloġija u s-sorsi tad-data użati, u kull tibdil li jsirilhom.

1.   IL-PREŻENTAZZJONI STATISTIKA:

L-Istati Membri għandhom jipprovdu d-deskrizzjoni li ġejja tad-data mxerrda li tista' tintwera lill-utenti bħala tabelli, graffs jew mapep:

(a)	deskrizzjoni tad-data;

(b)	sistema tal-klassifikazzjoni;

(c)	kopertura tas-setturi;

(d)	kunċetti u definizzjonijiet tal-istatistika;

(e)	unità tal-istatistika;

(f)	popolazzjoni tal-istatistika;

(g)	żona ta' referenza (ambitu ġeografiku);

(h)	kopertura taż-żmien (it-tul taż-żmien meta d-data hi disponibbli);

(i)	perjodu ta' referenza (il-perjodu kopert mir-rapport);

(j)	unità tal-kejl.

2.   L-IPPROĊESSAR TAL-ISTATISTIKA:

Ir-rapporti ta' kwalità għandhom ikopru deskrizzjoni tal-proċeduri kollha użati għall-ġbir, il-validazzjoni u l-kompilazzjoni tad-data u għall-kisba ta' informazzjoni ġdida.

3.   IL-POLITIKA TAR-RILAXX:

Ir-rapporti ta' kwalità għandhom jirrapportaw dwar ir-regoli għat-tixrid tad-data fil-livell nazzjonali.

4.   IL-FREKWENZA TAT-TIXRID:

Ir-rapporti għandhom jindikaw ukoll il-frekwenza kif għandha tinxtered id-data fil-livell nazzjonali.

B'konformità mal-prinċipji tal-istatistika stabbiliti fil-punti (e) u (f) tal-Artikolu 2(1) tar-Regolament (KE) Nru 223/2009, l-Istati Membri għandhom jirrapportaw dwar:

1.   IL-KUNFIDENZJALITÀ:

Ir-rapporti ta' kwalità għandhom jinkludu informazzjoni dwar il-miżuri leġiżlattivi jew proċeduri formali oħra, li jevitaw l-iżvelar mhux awtorizzat tad-data li jista' jikkawża l-identifikazzjoni diretta jew indiretta ta' persuna jew entità ekonomika. Jiddeskrivu wkoll ir-regoli applikati biex tkun żgurata l-kunfidenzjalità tal-istatistika u jkun evitat l-iżvelar mhux awtorizzat.

2.   L-ISPEJJEŻ U L-PIŻIJIET:

Ir-rapporti ta' kwalità għandhom jinkludu informazzjoni dwar l-ispejjeż u l-piżijiet assoċjati mal-ġbir u l-produzzjoni tal-prodott statistiku.