(1)

Ir-Regolament tal-Kunsill (KE) Nru 926/2009 (2), impona dazju definittiv antidumping fuq importazzjonijiet ta' ċerti pajpijiet u tubi mingħajr saldaturi, tal-ħadid jew tal-azzar (seamless pipes and tubes — “SPT”) li joriġinaw mir-Repubblika tal-Poplu taċ-Ċina (“RPĊ”).

(2)

F'Diċembru 2009, Hubei Xinyegang Steel Co. Ltd (“Hubei”), wieħed mill-produtturi esportaturi tal-SPT fir-RPĊ, ippreżenta rikors għall-annullament tar-Regolament (KE) Nru 926/2009, quddiem il-Qorti Ġenerali. Bis-sentenza tad-29 ta' Jannar 2014 fil-Kawża T-528/09 (3), il-Qorti Ġenerali annullat ir-Regolament (KE) Nru 926/2009 sa fejn dan jimponi dazji antidumping fuq l-esportazzjonijiet ta' SPT prodotti minn Hubei u jiġbor dazji provviżorji imposti fuq dawn l-esportazzjonijiet.

(3)

F'April 2014, għadd ta' produtturi tal-Unjoni tal-SPT appellaw din is-sentenza quddiem il-Qorti tal-Ġustizzja tal-Unjoni Ewropea fil-Kawżi C-186/14 P u C-193/14 P (4).

(4)

Sadanittant, fis-7 ta' Diċembru 2015, wara talba għal rieżami tal-iskadenza skont l-Artikolu 11(2) tar-Regolament tal-Kunsill (KE) Nru 1225/2009 (5), il-Kummissjoni, permezz tar-Regolament ta' Implimentazzjoni (UE) 2015/2272 (6), estendiet id-dazji fuq l-importazzjonijiet tal-SPT mir-RPĊ, inklużi dawk applikabbli għall-SPT prodotti minn Hubei.

(5)

Fis-7 ta' April 2016, fis-sentenza tagħha fil-Kawżi Magħquda C-186/14 P u C-193/14 P, il-Qorti tal-Ġustizzja tal-Unjoni Ewropea ċaħdet l-appelli kontra s-sentenza tal-Qorti Ġenerali fil-Kawża T-528/09, u b'hekk ikkonfermat is-sentenza tal-Qorti Ġenerali.

(6)

Fit-3 ta' Ġunju 2016, sabiex jagħtu effett lis-sentenzi msemmija hawn fuq, is-servizzi tal-Kummissjoni neħħew isem Hubei mill-grupp ta' kumpaniji elenkati taħt il-kodiċi addizzjonali TARIC A 950 u elenkaw lil Hubei separatament taħt il-kodiċi addizzjonali TARIC C 129 (l-hekk imsejħa “deċiżjoni tal-Kummissjoni tat-3 ta' Ġunju 2016”). Dik il-modifika tal-kodiċi TARIC tirrifletti l-annullament tal-Qorti tad-dazji antidumping fuq l-importazzjonijiet tal-SPT prodotti minn Hubei.

(7)

Fis-7 ta' Ġunju 2016, għadd ta' produtturi tal-Unjoni tal-SPT ippreżentaw rikors quddiem il-Qorti Ġenerali għall-annullament tal-bidliet fil-bażi tad-data tat-TARIC. Permezz tas-sentenza tat-18 ta' Ottubru 2018, fil-Kawża T-364/16 (7), il-Qorti Ġenerali annullat l-hekk imsejħa deċiżjoni tal-Kummissjoni tat-3 ta' Ġunju 2016 li tneħħi lil Hubei mil-lista ta' kumpaniji elenkati taħt il-kodiċi addizzjonali TARIC A 950 u li telenkaha taħt il-kodiċi addizzjonali TARIC C 129.

(8)

Fis-sentenza tagħha fil-Kawża T-364/16, il-Qorti Ġenerali kkonfermat li l-Kummissjoni kienet korretta li tikkunsidra li l-konformità, mas-sentenzi preċedenti tas-7 ta' April 2016 u tad-29 ta' Jannar 2014, f'konformità mal-Artikolu 266 tat-Trattat dwar il-Funzjonament tal-Unjoni Ewropea, kienet timplika li d-dazji antidumping stabbiliti bir-Regolament ta' Implimentazzjoni (UE) 2015/2272 ma kellhomx jibqgħu jinġabru fuq l-oġġetti prodotti minn Hubei (8).

(9)

Madankollu, il-Qorti Ġenerali qieset li l-annullament tar-Regolament (KE) Nru 926/2009, sa fejn jikkonċerna lil Hubei, ma jistax awtomatikament jimplika l-eliminazzjoni mill-ordni ġuridiku tal-UE tad-dispożizzjonijiet tar-Regolament ta' Implimentazzjoni (UE) 2015/2272, li ma ġewx annullati mill-Qrati tal-Unjoni Ewropea (9). Għalhekk, peress li r-Regolament ta' Implimentazzjoni (UE) 2015/2272 irid jiġi preżunt li huwa legali, il-Kummissjoni kien imissha emendatu jew ħassritu permezz ta' regolament (10).

(10)

Fid-dawl tal-konstatazzjonijiet tal-Qorti Ġenerali fil-Kawża T-364/16 u f'konformità mar-regola tal-ekwivalenza tal-forma, ir-Regolament ta' Implimentazzjoni (UE) 2015/2272 jenħtieġ li jiġi emendat sabiex ineħħi lil Hubei mill-ambitu tal-miżuri antidumping applikabbli għall-importazzjonijiet tal-SPT mir-RPĊ b'effett retroattiv mid-data tad-dħul fis-seħħ tal-imsemmi regolament.

(11)

Ir-rimborż jew ir-remissjoni jenħtieġ li jintalbu mingħand l-awtoritajiet doganali nazzjonali skont il-leġiżlazzjoni doganali applikabbli.

(12)

Fid-dawl tal-ġurisprudenza riċenti tal-Qorti tal-Ġustizzja (11), huwa xieraq li tiġi prevista r-rata tal-imgħax ta' inadempjenza li trid titħallas f'każ ta' rimborż ta' dazji definittivi. Dan għaliex id-dispożizzjonijiet rilevanti fis-seħħ li jikkonċernaw id-dazji doganali ma jipprevedux din ir-rata ta' interess u l-applikazzjoni tar-regoli nazzjonali twassal għal distorsjonijiet mhux dovuti bejn l-operaturi ekonomiċi skont liema Stat Membru jintgħażel għall-iżdoganar tal-merkanzija.

(13)

Fit-13 ta' Diċembru 2018, il-Kummissjoni wriet, lill-partijiet interessati, l-intenzjoni tagħha li temenda r-Regolament (UE) 2015/2272 biex tneħħi lil Hubei mil-lista ta' kumpaniji li fuq il-prodotti tagħhom jiġu imposti dazji antidumping u r-raġunament sottostanti dik l-emenda.

(14)

Il-miżuri previsti f'dan ir-Regolament huma skont l-opinjoni tal-Kumitat stabbilit bl-Artikolu 15(1) tar-Regolament bażiku (EU) 2016/1036,