(1)

Il-Prinċipju 10 tal-Pilastru Ewropew tad-Drittijiet Soċjali (2), ipproklamat f’Gothenburg fis-17 ta’ Novembru 2017, jiddikjara li kull ħaddiem għandu dritt għal ambjent tax-xogħol li ma jagħmilx ħsara lis-saħħa, sikur u adattat kif suppost. Id-dritt għal livell għoli ta’ protezzjoni għas-saħħa u s-sikurezza fuq il-post tax-xogħol, u għal ambjent tax-xogħol li huwa adattat għall-ħtiġijiet professjonali tal-ħaddiema u li jgħinhom jipparteċipaw fis-suq tax-xogħol għal perjodu estiż jinkludi wkoll il-protezzjoni mill-esponiment għall-aġenti kimiċi fuq il-post tax-xogħol.

(2)

Il-Kummissjoni enfasizzat b’mod ċar il-ħtieġa li tkompli titjieb il-protezzjoni tal-ħaddiema mill-esponiment għas-sustanzi kimiċi perikolużi fuq il-post tax-xogħol fil-Komunikazzjoni tagħha msejħa “Iktar Saħħa u Sikurezza fuq ix-Xogħol għal Kulħadd” (3).

(3)

Skont id-Direttiva 98/24/KE, il-Kummissjoni għandha tipproponi l-għanijiet tal-Unjoni Ewropea (l-UE) fil-forma ta’ valuri ta’ limitu indikattiv ta’ esponiment okkupazzjonali (IOELVs) li jridu jiġu stabbiliti fil-livell tal-UE biex il-ħaddiema jiġu protetti mir-riskji li jirriżultaw mill-esponiment għal sustanzi kimiċi perikolużi.

(4)

L-Artikolu 3(2) tad-Direttiva 98/24/KE jagħti s-setgħa lill-Kummissjoni tistabbilixxi jew tirrevedi l-IOELVs, filwaqt li tqis id-disponibbiltà tal-metodi tat-teknika tal-kejl abbazi ta’ miżuri adottati skont il-proċedura stabbilita fl-Artikolu 17 tad-Direttiva tal-Kunsill 89/391/KEE (4).

(5)

L-Artikolu 3(1) tad-Direttiva 98/24/KE jiddikjara li l-Kummissjoni għandha tevalwa, permezz ta’ valutazzjoni xjentifika indipendenti tal-aħħar data xjentifika disponibbli, ir-relazzjoni bejn l-effetti tal-aġenti kimiċi perikolużi fuq is-saħħa u l-livell tal-esponiment okkupazzjonali.

(6)

Il-Kummissjoni hija megħjuna f’dan il-kompitu mill-Kumitat Xjentifiku għal-Limiti tal-Espożizzjoni għal Aġenti Kimiċi fuq il-Post tax-Xogħol (is-SCOEL), stabbilit permezz tad-Deċiżjoni tal-Kummissjoni 2014/113/UE (5).

(7)

Skont id-Direttiva 98/24/KE, “valur ta’ limitu ta’ esponiment okkupazzjonali” tfisser, sakemm ma jkunx speċifikat mod ieħor, il-limitu tal-medja ta’ ponderazzjoni tal-ħin tal-konċentrazzjoni ta’ aġent kimiku fl-arja fiż-żona tat-teħid tan-nifs ta’ ħaddiem, b’rabta ma’ perjodu referenzjarju speċifikat.

(8)

L-IOELVs huma valuri ta’ limitu ta’ esponiment okkupazzjonali bbażati fuq is-saħħa, miksuba mill-iktar data xjentifika riċenti disponibbli u adottati mill-Kummissjoni, b’kunsiderazzjoni tad-disponibbiltà tat-tekniki tal-kejl. Dawn huma livelli ta’ limitu tal-esponiment li taħthom, b’mod ġenerali, aġent kimiku partikolari ma jkunx mistenni jħalli effetti negattivi wara esponiment għalih għal żmien qasir jew ta’ kuljum tul il-ħajja professjonali. Dawn jikkostitwixxu l-għanijiet tal-UE u huma mfassla biex jgħinu lil min jimpjega jiddetermina r-riskji u jivvalutahom u jimplimenta miżuri preventivi u protettivi, b’konformità mad-Direttiva 98/24/KE.

(9)

B’konformità mar-rakkomandazzjonijiet tas-SCOEL, l-IOELVs huma stabbiliti b’rabta ma’ perjodu referenzjarju ta’ medja ta’ ponderazzjoni tal-ħin ta’ tmien sigħat (il-valuri ta’ limitu ta’ esponiment fit-tul) u, għal ċerti aġenti kimiċi, għal perjodi referenzjarji iqsar, b’mod ġenerali ta’ medja ta’ ponderazzjoni tal-ħin ta’ 15-il minuta (il-valuri ta’ limitu ta’ esponiment fil-qosor), biex jitqiesu l-effetti li jirriżultaw minn esponiment għal żmien qasir.

(10)

Għal kull aġent kimiku li għalih ġie stabbilit IOELV fil-livell tal-UE, l-Istati Membri huma meħtieġa jistabbilixxu valur ta’ limitu nazzjonali ta’ esponiment okkupazzjonali. Huma u jagħmlu dan, għandhom iqisu l-valur ta’ limitu tal-UE, filwaqt li jiddeterminaw in-natura tal-valur ta’ limitu nazzjonali b’konformità mal-leġiżlazzjoni u mal-prattika nazzjonali.

(11)

L-IOELVs huma parti importanti mill-arranġamenti ġenerali għall-protezzjoni tal-ħaddiema mir-riskji tas-saħħa li jirriżultaw mill-esponiment għal sustanzi kimiċi perikolużi.

(12)

B’konformità mal-Artikolu 3 tad-Direttiva 98/24/KE, is-SCOEL ivvaluta r-rabta bejn l-effetti tal-aġenti kimiċi elenkati fl-għaxar (10) entrati fl-Anness ta’ din id-Direttiva fuq is-saħħa u l-livell tal-esponiment okkupazzjonali. B’mod simili, huwa rrakkomanda li jiġu stabbiliti l-IOELVs għal dawn l-aġenti kimiċi kollha għar-rotta tat-teħid tan-nifs tal-esponiment b’rabta mal-perjodu referenzjarju ta’ medja ta’ ponderazzjoni tal-ħin ta’ tmien sigħat. Għalhekk huwa xieraq li jiġu stabbiliti l-valuri ta’ limitu ta’ esponiment fit-tul għall-aġenti kollha msemmija fl-Anness ta’ din id-Direttiva.

(13)

Għal uħud minn dawn l-aġenti kimiċi, jiġifieri għall-anilina, għat-trimetilammina, għat-2-fenilpropan (il-kumen), għall-aċetat tas-sek-butil, għall-4-amminotoluwen, għall-aċetat tal-isobutil, għall-alkoħol tal-isoamil, għall-aċetat tan-n-butil u għat-triklorur tal-fosforil, is-SCOEL irrakkomanda wkoll li jiġu stabbiliti l-valuri ta’ limitu ta’ esponiment fil-qosor.

(14)

Għal ċertu sustanzi, hemm bżonn li titqies il-possibbiltà ta’ penetrazzjoni mill-ġilda sabiex jiġi żgurat l-aqwa livell ta’ protezzjoni possibbli. Fost l-aġenti kimiċi elenkati fl-entrati fl-Anness ta’ din id-Direttiva, is-SCOEL identifika l-possibbiltà ta’ assorbiment sinifikanti mill-ġilda fil-każ tal-anilina, tat-2-fenilpropan (il-kumen) u tal-4-amminotoluwen. Għalhekk huwa xieraq li fl-Anness ta’ din id-Direttiva, minbarra li jingħataw l-IOELVs għal dawn l-aġenti kimiċi, jiġu inklużi notazzjonijiet li jindikaw il-possibbiltà ta’ assorbiment sinifikanti tagħhom mill-ġilda.

(15)

Wieħed minn dawk l-aġenti kimiċi, jiġifieri t-2-fenilpropan (il-kumen), bħalissa huwa elenkat fl-Anness tad-Direttiva tal-Kummissjoni 2000/39/KE (6). Is-SCOEL irrakkomanda li jiġi stabbilit IOELVġdid għal din is-sustanza. Jixraq għalhekk li jiġi inkluż valur ta’ limitu rivedut għat-2-fenilpropan (il-kumen) fl-Anness ta’ din id-Direttiva u li titħassar l-entrata korrispondenti mill-Anness tad-Direttiva 2000/39/KE.

(16)

B’konformità mad-Dikjarazzjoni politika konġunta tat-28 ta’ Settembru 2011 tal-Istati Membri u tal-Kummissjoni dwar id-dokumenti ta’ spjegazzjoni (7), l-Istati Membri ntrabtu li, f’każijiet ġustifikati, jakkumpanjaw in-notifika tal-miżuri ta’ traspożizzjoni tagħhom b’dokument wieħed jew aktar li jispjegaw ir-relazzjoni bejn il-komponenti ta’ direttiva u l-partijiet korrispondenti tal-istrumenti ta’ traspożizzjoni nazzjonali.

(17)

Fir-rigward ta’ din id-Direttiva, il-Kummissjoni tqis li t-trażmissjoni ta’ dawn id-dokumenti f’forma ta’ tabella li turi l-korrelazzjoni bejn il-miżuri nazzjonali u din id-Direttiva hija ġustifikata, minħabba li għal ċerti aġenti diġà jeżistu valuri ta’ limitu nazzjonali ta’ esponiment okkupazzjonali fil-leġiżlazzjoni nazzjonali, u minħabba d-diversità u n-natura teknika tal-istrumenti legali fil-livell nazzjonali biex jiġu stabbiliti l-valuri ta’ limitu ta’ esponiment okkupazzjonali.

(18)

Il-Kumitat ta’ Konsulenza dwar is-Sigurtà u s-Saħħa fuq il-Post tax-Xogħol ġie kkonsultat b’konformità mal-Artikolu 3(2) tad-Direttiva 98/24/KE u dan ta l-opinjonijiet tiegħu fis-6 ta’ Diċembru 2017 u fil-31 ta’ Mejju 2018. Il-Kumitat irrikonoxxa li bħalissa jeżistu sfidi fir-rigward tad-disponibbiltà tal-metodoloġiji tal-kejl li jistgħu jintużaw biex juru l-konformità mal-valuri ta’ limitu proposti għat-triklorur tal-fosforil u għall-alkoħol tal-isoamil, u li jenħtieġ li jsiru sforzi biex tiġi żgurata d-disponibbiltà ta’ tekniki adattati għal dan sal-aħħar tal-perjodu tat-traspożizzjoni.

(19)

Il-miżuri previsti f’din id-Direttiva huma skont l-opinjoni tal-Kumitat dwar il-Progress Tekniku stabbilit skont l-Artikolu 17 tad-Direttiva 89/391/KEE.