DIRETTIVA DELEGATA TAL-KUMMISSJONI (UE) 2019/176

tas-16 ta' Novembru 2018

li temenda, għall-finijiet ta' adattament għall-progress xjentifiku u tekniku, l-Anness III tad-Direttiva 2011/65/UE tal-Parlament Ewropew u tal-Kunsill fir-rigward ta' eżenzjoni għaċ-ċomb fis-saff tal-kisi ta' ċerti dijodi

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva 2011/65/UE tal-Parlament Ewropew u tal-Kunsill tat-8 ta' Ġunju 2011 dwar ir-restrizzjoni tal-użu ta' ċerti sustanzi perikolużi fit-tagħmir elettriku u elettroniku (1), u b'mod partikolari l-Artikolu 5(1)(a) tagħha,

Billi:

(1)	Id-Direttiva 2011/65/UE teżiġi li l-Istati Membri jiżguraw li t-tagħmir elettriku u elettroniku mqiegħed fis-suq ma jkunx fih ċerti sustanzi perikolużi elenkati fl-Anness II ta' dik id-Direttiva. Dak ir-rekwiżit ma japplikax għall-applikazzjonijiet elenkati fl-Anness III tad-Direttiva 2011/65/UE.

(2)	Il-kategoriji differenti tat-tagħmir elettriku u elettroniku li għalihom tapplika d-Direttiva 2011/65/UE (kategoriji 1 sa 11) huma elenkati fl-Anness I ta' dik id-Direttiva.

(3)

Iċ-ċomb hu sustanza ristretta elenkata fl-Anness II tad-Direttiva 2011/65/UE. Iżda l-użu taċ-ċomb fis-saff tal-kisi ta' dijodi b'vultaġġ għoli abbażi ta' korp tal-ħġieġ tal-borat taż-żingu kien eżentat mir-restrizzjoni u bħalissa hu elenkat fl-entrata 37 tal-Anness III ta' dik id-Direttiva. Għall-kategoriji 1 sa 7 u 10, l-iskadenza ta' dik l-eżenzjoni kienet il-21 ta' Lulju 2016.

(4)	Il-Kummissjoni rċeviet applikazzjoni għal tiġdid ta' dik l-eżenzjoni qabel il-21 ta' Jannar 2015, skont l-Artikolu 5(5) tad-Direttiva 2011/65/UE. L-eżenzjoni tibqa' valida sakemm tkun ġiet adottata deċiżjoni dwar dik l-applikazzjoni.

(5)

Id-dijodi b'vultaġġ għoli (HVD) jintużaw fil-provvisti tal-enerġija esterni tat-tagħmir tal-IT u tat-telekomunikazzjoni u għall-applikazzjonijiet awtomobilistiċi. Waqt il-proċess tal-manifattura tal-HVD, iċ-ċomb li hemm fil-bċejjeċ tal-ħġieġ jiddissolvi fis-soluzzjoni tal-kisi, li jwassal għal madwar 2,5 % ta' kontenut taċ-ċomb fis-saff tal-kisi tad-dijodi. B'hekk, iċ-ċomb mhux qed jiġi miżjud b'mod intenzjonat iżda hu r-riżultat ta' kontaminazzjoni tal-ħġieġ li fih iċ-ċomb.

(6)

Mhuwiex xjentifikament u teknikament prattiku li tiġi evitata l-kontaminazzjoni tas-saff tal-kisi tal-HVD u ma jeżisti l-ebda sostitut affidabbli fis-suq. L-eżenzjoni ma ddgħajjifx il-protezzjoni tal-ambjent u tas-saħħa li jagħti r-Regolament (KE) Nru 1907/2006 tal-Parlament Ewropew u tal-Kunsill (2). Għaldaqstant jenħtieġ li l-eżenzjoni tal-użu taċ-ċomb fis-saff tal-kisi ta' dijodi b'vultaġġ għoli abbażi ta' korp tal-ħġieġ tal-borat taż-żingu tiġġedded għall-kategoriji 1 sa 7 u 10.

(7)

Peress li mhuwiex prattiku li jitneħħa ċ-ċomb billi tiġi evitata l-kontaminazzjoni għall-applikazzjonijiet ikkonċernati u ma jeżisti l-ebda sostitut affidabbli fis-suq, jenħtieġ li tiġġedded l-eżenzjoni għall-kategoriji 1 sa 7 u 10 għall-perjodu massimu ta' validità ta' ħames snin sal-21 ta' Lulju 2021. Fid-dawl tar-riżultati tal-isforzi li għaddejjin biex tinsab sostituzzjoni affidabbli, aktarx li t-tul tal-eżenzjoni mhux se jħalli impatti negattivi fuq l-innovazzjoni.

(8)

Għall-kategoriji l-oħra għajr il-kategoriji 1 sa 7 u l-kategorija 10, l-eżenzjoni attwali tibqa' valida għall-perjodi ta' validità stabbiliti fit-tieni subparagrafu tal-Artikolu 5(2) tad-Direttiva 2011/65/UE. Għal raġunijiet ta' ċarezza, jenħtieġ li d-dati tal-iskadenza jiżdiedu fl-Anness III ta' dik id-Direttiva.

(9)	Għalhekk jenħtieġ li d-Direttiva 2011/65/UE tiġi emendata skont dan,

ADOTTAT DIN ID-DIRETTIVA:

Artikolu 1

L-Anness III tad-Direttiva 2011/65/UE hu emendat kif stabbilit fl-Anness ta' din id-Direttiva.

Artikolu 2

1. L-Istati Membri għandhom jadottaw u jippubblikaw, sa mhux iktar tard minn mid-29 ta' Frar 2020 il-liġijiet, ir-regolamenti u d-dispożizzjonijiet amministrattivi meħtieġa biex jikkonformaw ma' din id-Direttiva. Għandhom jikkomunikaw minnufih lill-Kummissjoni t-testi ta' dawk id-dispożizzjonijiet.

Dawn għandhom japplikaw dawk id-dispożizzjonijiet mill-1 ta' Marzu 2020.

Meta l-Istati Membri jadottaw dawk id-dispożizzjonijiet, dawn għandhom jinkludu referenza għal din id-Direttiva jew ikunu akkumpanjati minn dik ir-referenza meta ssir il-pubblikazzjoni uffiċjali tagħhom. L-Istati Membri għandhom jiddeterminaw kif għandha ssir dik ir-referenza.

2. L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tad-dritt nazzjonali li jadottaw fil-qasam kopert minn din id-Direttiva.

Artikolu 3

Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha f'Il-Ġurnal Uffiċjali tal-Unjoni Ewropea.

Artikolu 4

Din id-Direttiva hija indirizzata lill-Istati Membri.

Magħmul fi Brussell, is-16 ta' Novembru 2018.

Għall-Kummissjoni

Il-President

Jean-Claude JUNCKER

(1) ĠU L 174, 1.7.2011, p. 88.

(2) Ir-Regolament (KE) Nru 1907/2006 tal-Parlament Ewropew u tal-Kunsill tat-18 ta' Diċembru 2006 dwar ir-reġistrazzjoni, il-valutazzjoni, l-awtorizzazzjoni u r-restrizzjoni ta' sustanzi kimiċi (REACH) u li jistabbilixxi Aġenzija Ewropea għas-Sustanzi Kimiċi (ĠU L 396, 30.12.2006, p. 1).