(1)

Skont l-Artikolu 121 tat-Trattat, l-Istati Membri għandhom jippromwovu finanzi pubbliċi sodi fuq terminu medju permezz tal-koordinazzjoni tal-politika ekonomika u s-sorveljanza multilaterali sabiex tiġi evitata l-okkorrenza ta’ defiċits pubbliċi eċċessivi.

(2)

Il-Patt ta’ Stabbiltà u Tkabbir (PST) huwa bbażat fuq l-objettiv ta’ finanzi pubbliċi sodi bħala mezz tat-tisħiħ tal-kundizzjonijiet għall-istabbiltà tal-prezzijiet u għal tkabbir sostenibbli b’saħħtu li jwassal għall-ħolqien ta’ impjiegi.

(3)

Fit-22 ta’ Ġunju 2018 il-Kunsill sab f’konformità mal-Artikolu 121(4) tat-Trattat li fl-2017 kienet seħħet devjazzjoni sinifikanti osservata mill-objettiv baġitarju fuq terminu medju. Fid-dawl ta’ dik id-devjazzjoni sinifikanti stabbilita, fit-22 ta’ Ġunju 2018 il-Kunsill ħareġ Rakkomandazzjoni (2), li fiha jirrakkomanda li l-Ungerija tieħu l-miżuri meħtieġa biex tiżgura li r-rata ta’ tkabbir nominali tan-nefqa primarja netta tal-gvern (3) ma qabżidx it-2,8 % fl-2018, li tikkorrispondi għal aġġustament strutturali annwali ta’ 1 % tal- prodott domestiku gross (PDG). Huwa rrakkomanda wkoll li l-Ungerija tuża kwalunkwe qligħ mhux mistenni għat-tnaqqis tad-defiċit, biex b’hekk il-pajjiż jitqiegħed fuq perkors ta’ aġġustament xieraq lejn l-objettiv baġitarju fuq terminu medju. Fl-4 ta’ Diċembru 2018 il-Kunsill ikkonkluda li l-Ungerija ma kinitx ħadet azzjoni effettiva b’reazzjoni għar-Rakkomandazzjoni tiegħu tat-22 ta’ Ġunju 2018. Fuq din il-bażi, fl-4 ta’ Diċembru 2018 il-Kunsill ħareġ Rakkomandazzjoni riveduta (4) biex l-Ungerija tieħu l-miżuri neċessarji biex ikun żgurat li r-rata ta’ tkabbir nominali tan-nefqa primarja netta tal-gvern ma tkunx ogħla minn 3,3 % fl-2019, li jikkorrispondi għal aġġustament strutturali annwali ta’ 1 % tal-PDG.

(4)

Fl-2018, fuq il-bażi tat-tbassir tar-rebbiegħa 2019 tal-Kummissjoni u tad-data dwar l-eżitu tal-2018 ivvalidata mill-Eurostat, it-tkabbir tan-nefqa primarja netta tal-gvern kien ħafna ogħla mill-valur referenzjarju tan-nefqa, li jindika devjazzjoni sinifikanti (devjazzjoni ta’ 1,3 % tal-PDG). Il-bilanċ strutturali ddeterjora għal -3,7 % tal-PDG minn -3,4 % tal-PDG fl-2017, li jindika wkoll devjazzjoni sinifikanti mill-aġġustament strutturali rakkomandat (devjazzjoni ta’ 1,3 % tal-PDG). Id-daqs tad-devjazzjoni indikat mill-bilanċ strutturali huwa affettwat b’mod negattiv minn nuqqasijiet fid-dħul sostanzjali kif ukoll minn nfiq ogħla fl-investiment f’kuntest ta’ ekonomija fi żminijiwet tajbin, filwaqt li huwa stmat li dan ibbenefika b’mod marġinali mit-tnaqqis fin-nefqa fuq l-imgħax. Il-valur referenzjarju tan-nefqa huwa affettwat b’mod negattiv ħafna mit-tkabbir potenzjali tal-PDG fuq perjodu medju applikat fil-kalkolu tiegħu, li jinkludi tkabbir potenzjali baxx ħafna tal-PDG fil-perjodu ta’ wara l-kriżi. Barra minn hekk, id-deflatur tal-PDG li fuqu huwa bbażat il-valur referenzjarju tan-nefqa ma jidhirx li jqis sew il-pressjonijiet miżjuda tal-kost li jaffettwaw l-infiq pubbliku. Wara aġġustament għal dawk il-fatturi kollha, il-parametru referenzjarju tan-nefqa jidher li jirrifletti b’mod adegwat l-isforz fiskali u għadu jindika devjazzjoni sinifikanti. B’kont meħud ta’ dawk il-fatturi, iż-żewġ indikaturi jikkonfermaw devjazzjoni sinifikanti mir-rekwiżiti tal-fergħa preventiva tal-PST fl-2018.

(5)

Fil-5 Ġunju 2019, wara valutazzjoni ġenerali, il-Kummissjoni sabet li fl-Ungerija teżisti devjazzjoni osservata sinifikanti mill-perkors ta’ aġġustament lejn l-objettiv baġitarju fuq terminu medju u ħarġet twissija lill-Ungerija skont l-Artikolu 121(4) tat-Trattat u l-ewwel subparagrafu tal-Artikolu 10(2) tar-Regolament (KE) Nru 1466/97.

(6)

Skont it-tieni subparagrafu tal-Artikolu 10(2) tar-Regolament (KE) Nru 1466/97, fi żmien xahar mid-data tal-adozzjoni tat-twissija, il-Kunsill għandu jindirizza rakkomandazzjoni lill-Istat Membru kkonċernat biex jieħu l-miżuri ta’ politika neċessarji. Ir-Regolament (KE) Nru 1466/97 jipprevedi li r-rakkomandazzjoni tistabbilixxi skadenza ta’ mhux aktar minn ħames xhur sa meta l-Istat Membru għandu jindirizza d-devjazzjoni. Fuq din il-bażi skadenza tal-15 ta’ Ottubru 2019 għall-Ungerija biex tindirizza d-devjazzjoni tidher xierqa. Sa din l-iskadenza, jenħtieġ li l-Ungerija tirrapporta l-azzjoni li tkun ittieħdet b’reazzjoni għal din ir-Rakkomandazzjoni.

(7)

Fuq il-bażi tal-projettazzjonijiet tal-marġni tal-potenzjal tal-produzzjoni tat-tbassir tar-rebbiegħa 2019 tal-Kummissjoni, fl-2019 u fl-2020 l-Ungerija ser tibqa’ fi żminijiet ekonomiċi tajba. Filwaqt li fl-2019 il-PDG reali huwa stmat li jikber skont il-PDG potenzjali (3,7 %), fl-2020, it-tkabbir tal-PDG reali (2,8 %) huwa mbassar li jkun aktar baxx mill-potenzjal ta’ tkabbir (3,6 %). Il-proporzjon tad-dejn tal-gvern ġenerali tal-Ungerija huwa ogħla mil-limitu ta’ 60 % tal-PDG. Għalhekk, l-isforz strutturali minimu meħtieġ mir-Regolament (KE) Nru 1466/97 u mill-matriċi ta’ aġġustamenti miftehma b’mod komuni taħt il-parti preventiva tal-Patt ta’ Stabbiltà u Tkabbir, li tikkunsidra ċ-ċirkostanzi ekonomiċi prevalenti u l-problemi possibbli dwar is-sostenibbiltà, jammonta għal mill-anqas 0,75 % tal-PDG kemm għall-2019 kif ukoll għall-2020.

(8)

Id-defiċit strutturali tal-Ungerija żdied b’1,46 % tal-PDG fl-2017 u b’0,3 % tal-PDG fl-2018, għal 3,7 % tal-PDG fl-2018. Huwa projettat fit-tbassir tar-rebbiegħa 2019 tal-Kummissjoni li ser jonqos mill-2019. Biex jikkomplementa r-rekwiżit tal-aġġustament minimu meħtieġ fl-2019, hemm bżonn li jsir sforz addizzjonali biex jagħmel tajjeb għad-devjazzjonijiet kumulati u biex l-Ungerija tinġieb lura fuq il-pjan ta’ konsolidament xieraq wara t-telf mill-2017. Jidher li sforz addizzjonali ta’ 0,25 % tal-PDG fl-2019, meta mqabbel ma’ dak li jirriżulta mill-matriċi ta’ aġġustamenti miftehma b’mod komuni taħt il-parti preventiva tal-Patt ta’ Stabbiltà u Tkabbir, ikun xieraq fid-dawl tal-entità tad-devjazzjoni sinifikanti osservata mill-pjan ta’ aġġustament rakkomandat lejn l-objettiv ta’ terminu medju u dan jaċċellera l-aġġustament lura lejn l-objettiv baġitarju ta’ terminu medju. L-isforz meħtieġ għall-2019 huwa konformi mal-aġġustament rakkomandat mill-Kunsill fl-4 ta’ Diċembru 2018. Għall-2020, ir-rekwiżit tal-aġġustament minimu ta’ 0,75 % tal-PDG jidher xieraq, li jiddependi fuq il-konformità mal-aġġustament mitlub fl-2019.

(9)

It-titjib meħtieġ tal-bilanċ strutturali b’1 % tal-PDG kemm għall-2019 u 0,75 % tal-PDG fl-2020 huwa konsistenti mar-rata ta’ tkabbir nominali tan-nefqa primarja netta tal-gvern li ma tkunx ogħla minn 3,3 % fl-2019 u 4,7 % fl-2020.

(10)

Il-tbassir tar-rebbiegħa 2019 tal-Kummissjoni jipproġetta titjib fil-bilanċ strutturali b’0,4 % tal-PDG fl-2019 u b’0,6 % tal-PDG ulterjuri fl-2020. Għalhekk, titjib strutturali ta’ 1 % tal-PDG fl-2019 u ta’ 0,75 % tal-PDG fl-2020 jissarraf fi ħtieġa li jiġu adottati miżuri b’rendiment strutturali totali ta’ 0,6 % tal-PDG fl-2019 u miżuri addizzjonali b’rendiment strutturali ta’ 0,2 % tal-PDG fl-2020 meta mqabbel mal-linja bażi fit-tbassir tar-rebbiegħa 2019 tal-Kummissjoni.

(11)

Jekk l-Ungerija tonqos milli taġixxi fuq rakkomandazzjonijiet preċedenti biex tikkoreġi d-devjazzjoni sinifikanti osservata tinħoloq il-ħtieġa li tittieħed azzjoni urġenti sabiex il-politika fiskali tagħha tinġieb lura għal perkors prudenti.

(12)

Sabiex jinkisbu l-miri baġitarji rakkomandati, huwa kruċjali li l-Ungerija tadotta u timplimenta b’mod rigoruż il-miżuri meħtieġa u tagħmel monitoraġġ mill-qrib tal-iżvilupp tal-infiq kurrenti.

(13)

Jenħtieġ li l-Ungerija tirrapporta dwar l-azzjoni li ttieħdet b’reazzjoni għal din ir-Rakkomandazzjoni sal-15 ta’ Ottubru 2019.

(14)

Huwa xieraq li din ir-Rakkomandazzjoni tkun pubblikata,

(1)

(2)

(3)

Din ir-rakkomandazzjoni hija indirizzata lill-Ungerija.