(1)

Is-suġġett tal-proposta għal inizjattiva taċ-ċittadini bl-isem “Inwaqqfu t-tneħħija tal-pinen tal-klieb il-baħar – Inwaqqfu l-kummerċ” jirreferi għal dan li ġej: “Għalkemm it-tneħħija tal-pinen tal-klieb il-baħar abbord bastimenti tal-UE u fl-ibħra tal-UE hija pprojbita u l-klieb il-baħar iridu jinħattu bil-pinen imwaħħla ma’ ġisimhom b’mod naturali, l-UE hija waħda fost l-akbar esportaturi ta’ pinen u ċentru tat-tranżitu għall-kummerċ globali tal-pinen.”

(2)

L-għanijiet tal-proposta għal inizjattiva taċ-ċittadini jirreferu għal dan li ġej: “L-UE hija attur ewlieni fl-isfruttament tal-klieb il-baħar u billi l-ispezzjonijiet fuq il-baħar ma jseħħux spiss il-pinen qegħdin jinżammu, jiġu trasbordati, jew jitħattew fl-UE. Għandna l-għan li ntemmu l-kummerċ tal-pinen fl-UE fosthom l-importazzjoni, l-esportazzjoni u t-tranżitu ta’ pinen ħlief jekk ikunu mwaħħla b’mod naturali ma’ ġisem l-annimal. Billi t-tneħħija tal-pinen tal-klieb il-baħar tostakola l-miżuri ta’ konservazzjoni, qegħdin nitolbu li r-Regolament (UE) Nru 605/2013 tal-Parlament Ewropew u tal-Kunsill (2) jiġi estiż ukoll għall-kummerċ tal-pinen u għaldaqstant qegħdin nappellaw lill-Kummissjoni biex tfassal regolament ġdid li jestendi “l-pinen imwaħħla b’mod naturali” għall-kummerċ kollu ta’ klieb il-baħar u raj fl-UE.”

(3)

It-Trattat dwar l-Unjoni Ewropea (TUE) isaħħaħ iċ-ċittadinanza tal-Unjoni u jqawwi aktar il-funzjonament demokratiku tal-Unjoni billi jipprevedi, fost l-oħrajn, li kull ċittadin ikollu d-dritt li jipparteċipa fil-ħajja demokratika tal-Unjoni permezz ta’inizjattiva taċ-ċittadini Ewropej.

(4)

Għal dan l-għan, jenħtieġ li l-proċeduri u l-kundizzjonijiet meħtieġa għal inizjattiva taċ-ċittadini jkunu ċari, sempliċi, faċli biex jintużaw u proporzjonati man-natura tal-inizjattiva taċ-ċittadini, sabiex tiġi mħeġġa l-parteċipazzjoni taċ-ċittadini u biex l-Unjoni ssir iktar aċċessibbli.

(5)

B’rabta mas-suġġett tal-inizjattiva proposta, jistgħu jiġu adottati atti ġuridiċi tal-Unjoni għall-finijiet tal-implimentazzjoni tat-Trattati:

(6)

Għal dawn ir-raġunijiet, il-proposta ta’ inizjattiva taċ-ċittadini ma taqax b’mod ċar barra mill-qafas tas-setgħat tal-Kummissjoni li tressaq proposta għal att legali tal-Unjoni għall-fini tal-implimentazzjoni tat-Trattati, b’konformità mal-Artikolu 4(2)(b) tar-Regolament.

(7)

Barra minn hekk, il-kumitat taċ-ċittadini ġie ffurmat u l-persuni ta’ kuntatt inħatru skont l-Artikolu 3(2) tar-Regolament, u l-inizjattiva taċ-ċittadini proposta la tidher li hija manifestament abbużiva, fiergħa jew vessatorja, u lanqas ma tidher li tmur biċ-ċar kontra l-valuri tal-Unjoni, kif stipulati fl-Artikolu 2 tat-TUE.

(8)

Għaldaqstant il-proposta għal inizjattiva taċ-ċittadini bl-isem “Inwaqqfu t-tneħħija tal-pinen tal-klieb il-baħar – Inwaqqfu l-kummerċ” ġiet irreġistrata.