(1)

Ir-Regolament (UE) 2017/2394 jistabbilixxi dispożizzjoni għall-kooperazzjoni bejn l-awtoritajiet kompetenti nnominati mill-Istati Membri bħala responsabbli għall-infurzar tal-liġijiet tal-Unjoni li jipproteġu l-interessi tal-konsumaturi. Id-dispożizzjoni stabbilita minn dak ir-Regolament tinkludi dispożizzjoni għal mekkaniżmu ta’ assistenza reċiproka, dispożizzjoni għal azzjonijiet ikkoordinati u dispożizzjoni għall-ħruġ ta’ twissijiet fil-każ ta’ ksur possibbli ta’ dawk il-liġijiet. L-Istati Membri u l-Kummissjoni huma wkoll intitolati li jagħtu setgħa lil entitajiet oħrajn biex joħorġu twissijiet (f’dak il-każ imsejħa “twissijiet esterni”).

(2)

L-Artikolu 35 tar-Regolament (UE) 2017/2394 jitlob li l-Kummissjoni tistabbilixxi u żżomm bażi ta’ data elettronika għall-komunikazzjonijiet kollha bejn l-awtoritajiet kompetenti, l-uffiċċji uniċi ta’ kooperazzjoni u l-Kummissjoni skont dak ir-Regolament. Dik il-bażi ta’ data trid tkun aċċessibbli direttament mill-awtoritajiet kompetenti, l-uffiċċji uniċi ta’ kooperazzjoni u l-Kummissjoni. L-Artikolu 35 ta’ dak ir-Regolament jeħtieġ ukoll li l-informazzjoni prevista mill-entitajiet li joħorġu twissijiet esterni jinħażnu u jiġu pproċessati f’dik l-istess bażi ta’ data, iżda dawn l-entitajiet ma jridx ikollhom aċċess għall-bażi ta’ data. Barra minn hekk, jekk l-Awtorità Bankarja Ewropea tiġi mistiedna taġixxi bħala osservatur skont l-Artikolu 23(3) ta’ dak ir-Regolament, ikollha bżonn tkun tista’ taċċessa l-bażi ta’ data elettronika għal dak l-iskop limitat sabiex tkun tista’ tosserva l-komunikazzjonijiet rilevanti.

(3)

Is-Sistema multilingwi ta’ Informazzjoni tas-Suq Intern (“IMI”) stabbilita mir-Regolament (UE) Nru 1024/2012 tal-Parlament Ewropew u tal-Kunsill (2) tista’ tkun għodda effettiva fl-implimentazzjoni tad-dispożizzjonijiet ta’ kooperazzjoni amministrattiva stabbiliti fl-Artikoli 11 sa 23 (mekkaniżmu ta’ assistenza reċiproka u azzjonijiet ikkoordinati) u l-Artikoli 26, 27 u 28 (twissijiet, twissijiet esterni u skambju ta’ informazzjoni oħra rilevanti għall-identifikazzjoni ta’ ksur) tar-Regolament (UE) 2017/2394. Għaldaqstant, id-Deċiżjoni ta’ Implimentazzjoni tal-Kummissjoni (UE) 2019/2212 (3) ġiet adottata biex tagħmel dawk id-dispożizzjonijiet ta’ kooperazzjoni amministrattiva soġġetti għal proġett pilota skont l-Artikolu 4 tar-Regolament (UE) Nru 1024/2012. Huwa għalhekk xieraq li tiġi identifikata l-IMI bħala s-sistema li trid tintuża biex tiġi pprovduta l-bażi ta’ data elettronika għall-komunikazzjonijiet li jsiru skont dawk id-dispożizzjonijiet.

(4)

L-IMI ma għandha tintuża għall-ebda komunikazzjoni oħra bejn l-awtoritajiet kompetenti, l-uffiċċji uniċi ta’ kooperazzjoni u l-Kummissjoni skont ir-Regolament (UE) 2017/2394 (pereżempju, ma għandhiex tintuża għall-komunikazzjonijiet relatati ma’ sweeps skont l-Artikolu 29 ta’ dak ir-Regolament) peress li l-komunikazzjonijiet l-oħra kollha jistgħu jsiru b’mod aktar effikaċi bl-użu ta’ mezzi tekniċi oħrajn.

(5)

Sabiex jitnaqqsu l-piżijiet amministrattivi u tiġi evitata d-duplikazzjoni żejda, jenħtieġ li r-reġistrazzjoni fl-IMI tal-awtoritajiet kompetenti ta’ Stat Membru, l-uffiċċju uniku ta’ kooperazzjoni u l-entitajiet li joħorġu twissijiet esterni jkunu jikkostitwixxu komunikazzjoni tal-informazzjoni li trid tiġi kkomunikata minn dak l-Istat Membru lill-Kummissjoni skont l-Artikolu 8(1)(a) u (b) ta’ dak ir-Regolament. Dan ma jaffettwax l-obbligu tal-Istati Membri li jikkomunikaw l-identità u d-dettalji ta’ kuntatt tal-korpi nnominati tagħhom jew kull bidla sussegwenti f’dik l-informazzjoni lill-Kummissjoni.

(6)

L-Artikolu 34 tar-Regolament (UE) 2017/2394 jippermetti li l-awtoritajiet kompetenti jużaw bħala prova kull informazzjoni, dokument, riżultanza, dikjarazzjoni, kopja vera ċċertifikata jew intelligence kkomunikata lilhom skont dak ir-Regolament, fuq l-istess bażi ta’ dokumenti simili miksuba fl-Istat Membru tagħhom stess. Għal dak l-għan, jenħtieġ li l-awtoritajiet kompetenti, l-uffiċċji uniċi ta’ kooperazzjoni u l-Kummissjoni jkunu jistgħu jisiltu awtomatikament, mill-bażi ta’ data elettronika, sommarju ċċertifikat diġitalment tal-komunikazzjonijiet li jikkonċernawhom.

(7)

L-Artikolu 13(2) tar-Regolament (UE) 2017/2394 jitlob li t-talbiet għal assistenza reċiproka jintbagħtu lill-uffiċċju uniku ta’ kooperazzjoni tal-Istat Membru u li l-uffiċċju uniku ta’ kooperazzjoni jkun imbagħad responsabbli li jgħaddi t-talba lill-awtorità kompetenti xierqa f’dak l-Istat Membru. Ma teżisti l-ebda regola ta’ koordinament bħal din għat-twissijiet u informazzjoni oħra mibgħuta skont l-Artikoli 26, 27 u 28 ta’ dak ir-Regolament. Għalhekk, sabiex jiġi żgurat li t-twissijiet u informazzjoni oħra mibgħuta skont dawk l-Artikoli jkunu aċċessibbli biss mill-awtoritajiet kompetenti fi Stat Membru, li jkunu ikkonċernati jew possibbilment ikkonċernati mill-ksur inkwistjoni, jenħtieġ li l-Istati Membri jkunu obbligati jassenjaw il-kompitu li jirċievu l-komunikazzjonijiet deħlin mibgħuta skont dawk l-Artikoli lill-uffiċċju uniku ta’ kooperazzjoni tagħhom jew tal-inqas lil waħda mill-awtoritajiet kompetenti tagħhom u li mbagħad tallokahom lill-awtoritajiet kompetenti xierqa f’dak l-Istat Membru. Dan il-kompitu ma hemmx għalfejn jiġi applikat għal komunikazzjonijiet deħlin mibgħuta skont l-Artikoli 15 sa 23 tar-Regolament (UE) 2017/2394 peress li, fi kwalunkwe każ, azzjonijiet ikkoordinati jinbdew biss abbażi ta’ twissijiet maħruġin skont l-Artikolu 26 ta’ dak ir-Regolament.

(8)

L-Artikolu 33 tar-Regolament (UE) 2017/2394 jistabbilixxi regoli dwar l-użu u d-divulgazzjoni ta’ informazzjoni kkomunikata matul l-applikazzjoni ta’ dak ir-Regolament u dwar is-segretezza professjonali u kummerċjali. Jenħtieġ li l-bażi ta’ data elettronika tkun tinkludi funzjonalità li tippermetti lill-awtoritajiet kompetenti, lill-uffiċċji uniċi ta’ kooperazzjoni, lill-entitajiet li joħorġu twissijiet esterni u lill-Kummissjoni jindikaw jekk l-informazzjoni pprovduta minnhom tridx tinfetaħ għad-divulgazzjoni skont il-paragrafu 3 ta’ dak l-Artikolu mingħajr il-ħtieġa ta’ aktar konsultazzjoni.

(9)

Il-miżuri previsti f’din id-Deċiżjoni huma skont l-opinjoni tal-Kumitat stabbilit mill-Artikolu 38(1) tar-Regolament (UE) 2017/2394,