(1)

Id-Deċiżjoni ta’ Implimentazzjoni tal-Kummissjoni (UE) 2018/2031 (2) se tapplika mid-data wara dik li fiha t-Trattati ma jibqgħux japplikaw għar-Renju Unit u fit-territorju tiegħu sakemm ma jidħolx fis-seħħ ftehim dwar il-ħruġ sa dik id-data. Din tipprevedi li se tiskadi fit-30 ta’ Marzu 2020.

(2)

Fid-29 ta’ Ottubru 2019, bi ftehim mar-Renju Unit, il-Kunsill Ewropew adotta d-Deċiżjoni (UE) 2019/1810 (3) li testendi l-perjodu previst fl-Artikolu 50(3) tat-Trattat dwar l-Unjoni Ewropea sal-31 ta’ Jannar 2020. Minħabba dik l-estensjoni oħra, il-perjodu tal-applikazzjoni tad-Deċiżjoni ta’ Implimentazzjoni (UE) 2018/2031 ma jkunx twil biżżejjed biex il-membri u l-klijenti tal-ikklerjar stabbiliti fl-Unjoni jkollhom iċ-ċertezza tad-dritt u l-prevedibbiltà meħtieġa fil-każ li r-Renju Unit joħroġ mill-Unjoni mingħajr ftehim.

(3)

Mill-31 ta’ Diċembru 2018, l-ammont nozzjonali pendenti ta’ derivattivi OTC huwa aktar minn EUR 500 triljun mad-dinja kollha, li minnhom 75 % huma derivattivi tar-rati tal-imgħax u kważi 20 % oħra huma derivattivi f’munita barranija. Madwar 30 % tad-derivattivi OTC kollha huma denominati f’euro u f’muniti oħra tal-Unjoni. Is-suq tal-ikklerjar ċentrali tad-derivattivi OTC huwa kkonċentrat ħafna, partikolarment is-suq tal-ikklerjar ċentrali ta’ derivattivi OTC tar-rata tal-imgħax denominati f’euro, li aktar minn 90% minnhom huma kklerjati f’CCP waħda stabbilita fir-Renju Unit. Fl-2017, 97 % tad-derivattivi OTC tar-rata tal-imgħax denominati f’euro ġew ikklerjati f’dak is-CCP, li jenfasizza li l-parteċipanti fis-suq qegħdin jieħdu passi biex iħejju ruħhom għall-ħruġ tar-Renju Unit.

(4)

Madankollu, ir-raġunijiet sottostanti tad-Deċiżjoni ta’ Implimentazzjoni (UE) 2018/2031 għadhom japplikaw. B’mod partikolari, għad hemm riskji potenzjali fir-rigward tal-istabbiltà finanzjarja tal-Unjoni u tal-Istati Membri tagħha fil-każ tal-ħruġ mingħajr ftehim , u x’aktarx li dawn se jippersistu wara t-30 ta’ Marzu 2020. Barra minn hekk, il-membri u l-klijenti tal-ikklerjar stabbiliti fl-Unjoni għandhom bżonn ċertezza tad-dritt u prevedibbiltà għal perjodu suffiċjenti ta’ żmien wara l-ħruġ potenzjali tar-Renju Unit mill-Unjoni mingħajr ftehim. Minkejja dan, ir-raġunijiet tad-durata limitata ta’ dik id-Deċiżjoni għadhom jippersistu wkoll, partikolarment b’rabta mal-inċertezzi li jiċċirkondaw ir-relazzjoni futura bejn ir-Renju Unit u l-Unjoni, kif ukoll l-impatt potenzjali fuq l-istabbiltà finanzjarja tal-Unjoni u tal-Istati Membri tagħha u dwar l-integrità tas-Suq Uniku. Għaldaqstant, id-Deċiżjoni ta’ Implimentazzjoni (UE) 2018/2031 għandha tibqa’ b’durata limitata.

(5)

Għaldaqstant, jenħtieġ li d-Deċiżjoni ta’ Implimentazzjoni (UE) 2018/2031 tiġi emendata biex tipprevedi l-perjodu ta’ applikazzjoni ta’ sena waħda.

(6)

Il-Kummissjoni se tissokta l-monitoraġġ dwar jekk il-kundizzjonijiet sottostanti tad-Deċiżjoni ta’ Implimentazzjoni (UE) 2018/2031 ikunux għadhom qed jiġu ssodisfati matul l-applikazzjoni tad-Deċiżjoni ta’ Implimentazzjoni.

(7)

Barra minn hekk, meta jitqiesu l-emendi għar-Regolament (UE) Nru 648/2012 adottati mill-Parlament Ewropew u mill-Kunsill, li se jkunu daħlu fis-seħħ qabel ma d-Deċiżjoni tieqaf tapplika, kwalunkwe deċiżjoni potenzjali ulterjuri se tqis il-kundizzjonijiet u l-iżviluppi tas-suq finanzjarju, kif ukoll l-iskopertura tal-membri u klijenti tal-ikklerjar li jkunu stabbiliti fl-Unjoni għar-riskju ta’ konċentrazzjoni li jinħoloq mis-CCPs stabbiliti fir-Renju Unit. Fil-każ li tali skopertura titqies ta’ ħsara għall-istabbiltà finanzjarja tal-Unjoni, kwalunkwe Deċiżjoni potenzjali ulterjuri tista’ tipprova ttaffi r-riskju sistemiku fil-konfront tal-Unjoni billi jiġi llimitat l-aċċess ta’ dawk il-membri u l-klijenti tal-ikklerjar għal ċerti prodotti, attivitajiet jew servizzi li jingħataw mis-CCPs stabbiliti fir-Renju Unit. Għal dan il-għan, il-Kummissjoni qed tippjana li tagħmel l-intenzjoni tagħha magħrufa sa mhux aktar tard minn sitt xhur mid-data tal-iskadenza.

(8)

Din id-Deċiżjoni jenħtieġ li tidħol fis-seħħ b’urġenza biex tiġi żgurata ċ-ċertezza ġuridika għall-membri u l-klijenti tal-ikklerjar stabbiliti fl-Unjoni.

(9)

Il-miżuri previsti f’din id-Deċiżjoni huma konformi mal-opinjoni tal-Kumitat Ewropew tat-Titoli.