(1)

Fis-6 ta’ Mejju 2013, il-Kummissjoni ppreżentat lill-Parlament Ewropew u lill-Kunsill proposta għal Regolament dwar il-produzzjoni u d-disponibbiltà fis-suq ta’ materjal riproduttiv tal-pjanti. Il-proposta kellha l-mira li tikkonsolida u taġġorna l-leġiżlazzjoni eżistenti sabiex jiġu indirizzati diversi oqsma ta’ tħassib, bħal: il-kumplessità, ir-riġidità u l-frammentazzjoni tal-leġiżlazzjoni eżistenti; l-implimentazzjoni mhux armonizzata tiegħu fl-Istati Membri, li tirriżulta f’ostakoli għall-istabbiliment ta’ kondizzjonijiet ekwivalenti ta’ kompetizzjoni għall-operaturi kollha; il-ħtieġa li jtejjeb l-allinjament tiegħu ma’ atti leġiżlattivi oħra li jikkonċernaw is-settur u l-koerenza tiegħu ma’ politiki oħra; l-eżistenza ta’ lok għal tnaqqis fl-ispejjeż u titjib fl-effiċjenza; il-ħtieġa ta’ adattament għall-progress tekniku fit-tnissil tal-pjanti u għall-evoluzzjoni tas-suq Ewropew u dak globali tal-materjal riproduttiv tal-pjanti; u l-konservazzjoni tal-agrobijodiversità u r-riżorsi ġenetiċi tal-pjanti.

(2)

Fil-11 ta’ Marzu 2014, il-Parlament Ewropew irrifjuta l-proposta tal-Kummissjoni u appella lill-Kummissjoni biex tirtira l-proposta u tippreżenta waħda ġdida (1). Fis-16 ta’ Ġunju 2014, il-Kunsill esprima appoġġ ġenerali għal rapport tal-Presidenza li jinkludi orjentazzjonijiet għal proposta riveduta possibbli tal-Kummissjoni. Il-Kummissjoni rtirat il-proposta fil-programm ta’ ħidma tagħha għall-2015, u ma ppreżentatx waħda ġdida.

(3)

Il-Kunsill iqis li t-tħassib li l-Kummissjoni kellha l-għan li tindirizza permezz tal-proposta tagħha tal-2013 għadu rilevanti, u li huwa meħtieġ studju sabiex jiġu vvalutati l-opzjonijiet biex jiġi aġġornat il-qafas leġiżlattiv eżistenti, f’konformità mal-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (2), u b’mod partikolari l-paragrafu 10 tiegħu dwar l-applikazzjoni tal-Artikolu 225 u 241 tat-Trattat dwar il-Funzjonament tal-Unjoni Ewropea,