(1)

Filwaqt li jqis l-impenji internazzjonali tal-Unjoni biex tiżgura l-ġestjoni sostenibbli tar-riżorsi bijoloġiċi tal-baħar (1), ir-Regolament tal-Kunsill (KE) Nru 1005/2008 (2) stabbilixxa sistema sabiex tipprevjeni, tiskoraġġixxi u telimina s-sajd illegali, mhux irrappurtat u mhux irregolat (is-sajd IUU). Ir-Regolament tal-Kummissjoni (KE) Nru 1010/2009 (3) jistabbilixxi r-regoli ddettaljati għall-implimentazzjoni tar-Regolament (KE) Nru 1005/2008. Is-sistema sabiex tipprevjeni, tiskoraġġixxi u telimina s-sajd IUU hija element importanti tal-politika komuni tas-sajd tal-Unjoni (4) u, b’hekk, hija objettiv importanti ta’ interess pubbliku ġenerali tal-Unjoni u tal-Istati Membri tal-UE.

(2)

Skont l-Artikoli 25 sa 28 tar-Regolament (KE) Nru 1005/2008, il-Kummissjoni twettaq analiżi biex tidentifika l-bastimenti tas-sajd li jkunu qed iwettqu s-sajd IUU u, skont l-Artikoli 31 sa 33 tal-istess Regolament, hija ssegwi proċeduri biex tidentifika l-pajjiżi terzi li ma jikkooperawx fil-ġlieda kontra s-sajd IUU. Skont l-Artikolu 51 tar-Regolament (KE) Nru 1005/2008 u skont l-Artikoli 49 u 50 tar-Regolament (KE) Nru 1010/2009, il-Kummissjoni u l-Istati Membri jikkomunikaw u jiskambjaw l-informazzjoni bejniethom biex jiffaċilitaw l-infurzar tar-Regolament (KE) Nru 1005/2008 min-naħa tal-Istati Membri. Skont l-Artikolu 51 tar-Regolament (KE) Nru 1005/2008 u skont l-Artikolu 51 tar-Regolament (KE) Nru 1010/2009, huma jistgħu jiskambjaw informazzjoni dwar is-sajd IUU ma’ pajjiżi terzi u ma’ organizzazzjonijiet internazzjonali. L-analiżi u l-proċeduri tal-Kummissjoni u l-iskambju tal-informazzjoni tagħha mal-Istati Membri, ma’ pajjiżi terzi jew ma’ organizzazzjonijiet internazzjonali jaf jiffukaw fuq il-bastimenti tas-sajd, fosthom fuq is-sidien tagħhom u, meta jkun xieraq, fuq l-operaturi tagħhom, li jistgħu jkunu persuni fiżiċi jew ġuridiċi, kif ukoll fuq pajjiżi terzi.

(3)

Waqt l-analiżi u l-proċeduri u għall-finijiet tal-assistenza reċiproka skont l-Artikolu 51 tar-Regolament (KE) Nru 1005/2008 u skont l-Artikoli 49, 50 u 51 tar-Regolament (KE) Nru 1010/2009 b’rabta mas-sajd allegat li huwa sajd IUU, inevitabbilment tiġi pproċessata data personali skont it-tifsira tal-Artikolu 3(1) tar-Regolament (UE) 2018/1725 tal-Parlament Ewropew u tal-Kunsill (5). Jeħtieġ li l-Kummissjoni tipproċessa t-tali data biex twettaq il-kompiti li ngħatawlha bħala awtorità pubblika skont ir-Regolament (KE) Nru 1005/2008 u r-Regolament (KE) Nru 1010/2009. L-analiżi u l-proċeduri li jitwettqu b’rabta mas-sajd IUU jikkostitwixxu funzjonijiet ta’ monitoraġġ, funzjonijiet ta’ spezzjoni jew funzjonijiet regolatorji marbutin mal-eżerċitar ta’ awtorità uffiċjali fil-każijiet imsemmijin fl-Artikolu 25(1)(c), (g) u (h) tar-Regolament (UE) 2018/1725.

(4)

Għall-finijiet tal-analiżi u tal-proċeduri li hija twettaq, tal-assistenza u tal-informazzjoni li hija tagħti lill-Istati Membri u tal-informazzjoni li hija tiskambja ma’ pajjiżi terzi jew ma’ organizzazzjonijiet b’rabta mas-sajd IUU, il-Kummissjoni tipproċessa l-informazzjoni li tikseb jew li tirċievi mingħand persuni ġuridiċi, persuni fiżiċi, l-awtoritajiet tal-Istati Membri (bħalma huma l-awtoritajiet nazzjonali kompetenti nnotifikati lill-Kummissjoni skont l-Artikoli 15(2), 17(8), 21(3) u 39(4) tar-Regolament (KE) Nru 1005/2008), l-awtoritajiet ta’ pajjiżi terzi, b’mod partikulari tal-Istati tal-bandiera, u l-korpi u l-organizzazzjonijiet internazzjonali, b’mod partikulari l-organizzazzjonijiet u l-arranġamenti reġjonali tal-ġestjoni tas-sajd. Waqt l-analiżi u l-proċeduri tagħha, il-Kummissjoni tista’ tipproċessa wkoll informazzjoni ddokumentata kif xieraq li tikseb jew li tirċievi minn sorsi ppubblikati, minn sorsi anonimi (bħall-kollaboraturi fil-ġustizzja) jew minn sorsi identifikati (bħaċ-ċittadini, l-organizzazzjonijiet mhux governattivi u l-impriżi fis-settur tas-sajd), li jeħtieġu li titħares l-identità tagħhom.

(5)

Il-Kummissjoni tibgħat l-informazzjoni u l-analiżi tagħha lill-awtoritajiet kompetenti tal-Istati Membri u lil awtoritajiet u korpi oħrajn fil-kuntest tal-kooperazzjoni bilaterali jew multilaterali mal-awtoritajiet u mal-organizzazzjonijiet tal-Istati Membri jew ta’ pajjiżi terzi, b’mod partikulari mal-organizzazzjonijiet jew mal-arranġamenti reġjonali tal-ġestjoni tas-sajd, kif meħtieġ skont ir-Regolament (KE) Nru 1005/2008 u skont ir-Regolament (KE) Nru 1010/2009 jew kif meħtieġ u kif ikun xieraq fil-kuntest tal-analiżi u tal-proċeduri. Hija titlob lill-Istati tal-bandiera jew lill-Istati Membri tal-bandiera jieħdu azzjoni u jibagħtu l-informazzjoni dwar is-sajd preżunt li huwa sajd IUU lis-sidien ta’ bastiment u, meta jkun xieraq, lill-operaturi tiegħu biex tissalvagwardja d-drittijiet ta’ difiża tas-sidien ta’ bastiment u tal-operaturi tiegħu u biex tiżgura l-applikazzjoni effiċjenti u effettiva tar-regoli tal-UE biex jiġi evitat, jiġi skuraġġut u jiġi eliminat is-sajd IUU.

(6)

L-attivitajiet ta’ pproċessar tad-data personali skont it-tifsira tal-Artikolu 3(3) tar-Regolament (UE) 2018/1725 li jitwettqu huma u jsiru l-analiżi u l-proċeduri b’rabta mas-sajd IUU, isiru qabel ma l-Kummissjoni tidentifika b’mod formali l-bastimenti li huma preżunti li qed iwettqu sajd IUU u qabel ma din tibda l-proċeduri biex tniżżel bastiment fil-lista tal-Unjoni tal-bastimenti li jwettqu sajd IUU u qabel ma l-Kummissjoni tidentifika b’mod formali l-pajjiżi terzi li hija tqis li huma pajjiżi terzi li ma jikkooperawx fil-ġlieda kontra s-sajd IUU. Dawn ikomplu jsiru waqt l-analiżi u l-proċeduri, waqt id-djalogi li jsiru mal-awtoritajiet ta’ pajjiżi terzi u anke wara li jintemmu l-analiżi u l-proċeduri (pereżempju biex tiġi vvalutata l-ħtieġa li jinbdew analiżi u proċeduri ġodda minħabba li l-Kummissjoni tingħata informazzjoni ġdida). F’dak li għandu x’jaqsam mad-data personali skambjata mal-Istati Membri, ma’ pajjiżi terzi jew ma’ organizzazzjonijiet internazzjonali, l-attivitajiet ta’ pproċessar tad-data personali jitwettqu minn meta l-Kummissjoni tirċievi d-data, matul l-analiżi li jwettqu l-Istati Membri, l-pajjiżi terzi jew l-organizzazzjonijiet internazzjonali, u anke wara. Id-data tinżamm għal kemm ikun hemm bżonn biex jitlestew l-analiżi u l-proċeduri fl-Istati Membri, f’pajjiżi terzi u fl-organizzazzjonijiet internazzjonali. F’każijiet eċċezzjonali, din tista’ tinżamm anke wara dan il-perjodu jekk dan ikun meħtieġ biex jiġi żgurat li l-Unjoni tissodisfa l-obbligi tagħha.

(7)

Il-kategoriji tad-data personali pproċessata mill-Kummissjoni jinkludu d-data ta’ identifikazzjoni u ta’ kuntatt, id-data professjonali u d-data marbuta mas-suġġett tal-analiżi jew tal-proċedura jew ippreżentata b’rabta miegħu, b’mod partikulari d-data marbuta mal-bastimenti tas-sajd, mal-pożizzjoni ġeografika tagħhom u mal-attivitajiet tas-sajd tagħhom, id-data marbuta mas-sidien, mal-kaptani u mal-membri tal-ekwipaġġ tal-bastimenti, id-data marbuta mal-persuni involuti fl-ipproċessar u fil-kummerċjalizzazzjoni tal-prodotti tas-sajd u d-data dwar il-kollaboraturi fil-ġustizzja.

(8)

Id-data personali tinħażen f’ambjent elettroniku jew fiżiku sigur biex jiġi evitat l-aċċess illegali għaliha jew it-trasferiment tagħha lil persuni li ma għandhomx ħtieġa ta’ tagħrif. Id-data personali tinżamm fis-servizzi tal-Kummissjoni li huma kompetenti għall-affarijiet marittimi u s-sajd, li huma responsabbli għall-analiżi u għall-proċeduri u għall-għoti ta’ assistenza u ta’ informazzjoni lill-Istati Membri, lill-pajjiżi terzi u lill-organizzazzjonijiet internazzjonali, u tinżamm għall-perjodu kollu meħtieġ għall-analiżi u għall-proċeduri u għall-analiżi min-naħa tal-Istati Membri, tal-pajjiżi terzi u tal-organizzazzjonijiet internazzjonali biex jiġu indirizzati l-każijiet apparenti ta’ sajd IUU, għall-analiżi ta’ segwitu u għall-perjodu ta’ ritenzjoni amministrattiva wara li l-fajl jingħalaq definittivament (6).

(9)

Hija u twettaq il-kompiti tagħha, il-Kummissjoni hija obbligata tħares id-drittijiet tal-persuni fiżiċi b’rabta mal-ipproċessar tad-data personali rrikonoxxuti fl-Artikolu 8(1) tal-Karta tad-Drittijiet Fundamentali tal-Unjoni Ewropea u fl-Artikolu 16(1) tat-Trattat dwar il-Funzjonament tal-Unjoni Ewropea (it-TFUE), kif implimentati permezz tar-Regolament (UE) 2018/1725. Fl-istess ħin, il-Kummissjoni għandha obbligi speċifiċi skont ir-Regolament (KE) Nru 1005/2008 biex tipprevjeni, tiskoraġġixxi u telimina s-sajd IUU, li jitolbuha twettaq analiżi u ssegwi l-proċeduri, filwaqt li tħares ir-regoli ta’ kunfidenzjalità u s-segretezza professjonali (7), kif ukoll id-drittijiet ta’ difiża tal-persuni fiżiċi jew ġuridiċi li dwarhom ikunu qed isiru l-analiżi u l-proċeduri (8).

(10)

F’ċerti ċirkustanzi, id-drittijiet tas-suġġetti tad-data skont ir-Regolament (UE) 2018/1725 jkunu jridu jiġu rrikonċiljati mal-ħtiġijiet li jitwettqu analiżi u proċeduri b’rabta mas-sajd IUU, kif ukoll mal-ħarsien sħiħ tad-drittijiet fundamentali u tal-libertajiet ta’ suġġetti oħrajn tad-data. Għal dak il-għan, l-Artikolu 25 tar-Regolament (UE) 2018/1725 jagħti l-possibbiltà lill-Kummissjoni tirrestrinġi l-applikazzjoni tal-Artikoli 14 sa 17 u tal-Artikoli 19, 20 u 35 tar-Regolament (UE) 2018/1725, kif ukoll tal-Artikolu 4 tiegħu, sa fejn id-dispożizzjonijiet tiegħu jikkorrispondu għad-drittijiet u għall-obbligi previsti fl-Artikoli 14 sa 17 u fl-Artikoli 19 u 20 ta’ dak ir-Regolament.

(11)

Skont il-politika komuni tas-sajd tal-Unjoni, il-Kummissjoni għandha tapplika b’mod effettiv u effiċjenti r-regoli tal-UE biex jiġi evitat, jiġi skuraġġut u jiġi eliminat is-sajd IUU. Sabiex tagħmel dan, filwaqt li tħares l-istandards tal-protezzjoni tad-data personali skont ir-Regolament (UE) 2018/1725, jeħtieġ jiġu adottati regoli interni li permezz tagħhom il-Kummissjoni tkun tista’ tirrestrinġi d-drittijiet tas-suġġetti tad-data skont l-Artikolu 25 tar-Regolament (UE) 2018/1725.

(12)

Jenħtieġ li dawn ir-regoli interni jkopru l-attivitajiet kollha tal-ipproċessar li l-Kummissjoni twettaq hija u teżerċita s-setgħat u l-obbligi tagħha skont ir-Regolament (KE) Nru 1005/2008 u r-Regolament (KE) Nru 1010/2009. Jenħtieġ li dawn ir-regoli japplikaw għall-attivitajiet tal-ipproċessar li jitwettqu matul l-analiżi u l-proċeduri kollha b’rabta mas-sajd IUU, minn meta l-Kummissjoni tirċievi d-data personali li tista’ tkun rilevanti għall-identifikazzjoni tal-bastimenti tas-sajd li jkunu qed iwettqu sajd IUU jew għall-identifikazzjoni tal-pajjiżi terzi li ma jikkooperawx, matul l-analiżi u l-proċeduri u d-djalogi li jsiru mal-awtoritajiet ta’ pajjiżi terzi, u anke wara, ladarba l-bastimenti jew il-pajjiżi terzi jkunu ġew identifikati b’mod formali skont l-Artikolu 27 jew l-Artikolu 33 tar-Regolament (KE) Nru 1005/2008, jekk dan ikun meħtieġ biex jitwettqu l-analiżi ta’ segwitu jew biex jiġi żgurat li l-Unjoni tissodisfa l-obbligi tagħha.

(13)

Jenħtieġ li dawn ir-regoli interni ma jibqgħux japplikaw għall-attivitajiet tal-ipproċessar marbutin ma’ data personali li tkun ġiet żvelata lis-suġġetti tad-data skont l-Artikolu 26(2)(d) jew (3)(d) u l-Artikolu 27(6)(a) tar-Regolament (KE) Nru 1005/2008. F’dak li għandu x’jaqsam mal-attivitajiet tal-ipproċessar li jitwettqu fil-kuntest tal-assistenza pprovduta lill-Istati Membri u tal-informazzjoni skambjata ma’ pajjiżi terzi u ma’ organizzazzjonijiet, jenħtieġ li dawn ir-regoli japplikaw minn meta l-Kummissjoni tirċievi d-data personali li hija mbagħad tgħaddi lill-Istati Membri, lill-pajjiżi terzi jew lill-organizzazzjoni internazzjonali sakemm dawn l-Istati Membri, il-pajjiżi terzi jew l-organizzazzjoni internazzjonali jwettqu l-analiżi u l-proċeduri biex jindirizzaw il-każijiet apparenti ta’ sajd IUU u matul dawn l-analiżi u l-proċeduri, u anke wara, jekk dan ikun meħtieġ biex jitwettqu l-analiżi ta’ segwitu u biex jiġi żgurat li l-Unjoni tissodisfa l-obbligi tagħha.

(14)

Biex tikkonforma mal-Artikoli 14, 15 u 16 tar-Regolament (UE) 2018/1725, jenħtieġ li l-Kummissjoni tgħarraf lill-individwi kollha bl-attivitajiet tagħha li jinvolvu l-ipproċessar tad-data personali tagħhom u bid-drittijiet tagħhom b’mod trasparenti u koerenti billi tippubblika avviżi dwar il-protezzjoni tad-data fuq is-sit web tagħha. Meta dan ikun rilevanti, jenħtieġ li l-Kummissjoni tippreżenta salvagwardji addizzjonali biex tiżgura li s-suġġetti tad-data jkunu avżati b’mod individwali u kif xieraq.

(15)

Mingħajr preġudizzju għall-Artikoli 14(5) u 16(5) tar-Regolament (UE) 2018/1725, abbażi tal-Artikolu 25 ta’ dak ir-Regolament, il-Kummissjoni għandha l-possibbiltà tirrestrinġi l-għoti tal-informazzjoni lis-suġġetti tad-data dwar l-ipproċessar tad-data personali tagħhom u l-applikazzjoni tad-drittijiet l-oħrajn tagħhom sabiex tipproteġi s-setgħat tagħha li twettaq l-analiżi u l-proċeduri skont ir-Regolament (KE) Nru 1005/2008. F’dan ir-rigward, jista’ jkun hemm bżonn li l-Kummissjoni tirrestrinġi l-applikazzjoni ta’ dawk id-drittijiet u l-obbligi skont l-Artikolu 25(1)(c) u (g) ta’ dak ir-Regolament, meta jkun se jiġi pperikolat l-għan tal-funzjonijiet ta’ monitoraġġ, tal-funzjonijiet ta’ spezzjoni jew tal-funzjonijiet regolatorji tagħha b’rabta mal-implimentazzjoni effettiva tal-politika komuni tas-sajd tal-Unjoni.

(16)

Barra minn hekk, biex tinżamm il-kooperazzjoni effettiva, jista’ jkun hemm bżonn li l-Kummissjoni tirrestrinġi l-applikazzjoni tad-drittijiet tas-suġġetti tad-data sabiex tipproteġi l-attivitajiet tal-ipproċessar ta’ istituzzjonijiet, korpi, uffiċċji u aġenziji oħrajn tal-Unjoni jew tal-awtoritajiet tal-Istati Membri. Il-Kummissjoni tista’ tagħmel dan f’sitwazzjoni fejn l-għan tat-tali restrizzjoni min-naħa ta’ istituzzjoni, korp, uffiċċju jew aġenzija oħra tal-Unjoni jew min-naħa ta’ awtorità ta’ Stat Membru jkun ipperikolat jekk hija ma tapplikax restrizzjoni ekwivalenti għall-istess data personali. Għal dak il-għan, jenħtieġ li l-Kummissjoni tikkonsulta lil dawk l-istituzzjonijiet, lil dawk il-korpi, lil dawk l-uffiċċji, lil dawk l-aġenziji u lil dawk l-awtoritajiet dwar ir-raġunijiet rilevanti għaliex ġew imposti r-restrizzjonijiet u dwar il-ħtieġa u l-proporzjonalità tat-tali restrizzjonijiet.

(17)

Il-Kummissjoni jista’ jkollha tirrestrinġi wkoll l-għoti ta’ informazzjoni lis-suġġetti tad-data u l-applikazzjoni ta’ drittijiet oħrajn tagħhom b’rabta mad-data personali li hija tirċievi mingħand pajjiżi terzi jew mingħand organizzazzjonijiet internazzjonali, sabiex tikkoopera ma’ dawk il-pajjiżi jew ma’ dawk l-organizzazzjonijiet u, b’hekk, tissalvagwardja objettiv importanti ta’ interess pubbliku ġenerali tal-Unjoni, kif imsemmi fl-Artikolu 25(1)(c) tar-Regolament (UE) 2018/1725. Madankollu, f’ċerti ċirkustanzi l-interess tad-drittijiet fundamentali tas-suġġett tad-data jista’ jegħleb l-interess tal-kooperazzjoni internazzjonali.

(18)

Barra minn hekk, il-Kummissjoni jista’ jkollha tirrestrinġi l-għoti tal-informazzjoni lis-suġġetti tad-data u l-applikazzjoni ta’ drittijiet oħrajn tagħhom b’rabta mad-data personali li tkun irċeviet minn sorsi anonimi jew minn sorsi identifikati (bħall-kollaboraturi fil-ġustizzja) li jeħtieġu l-protezzjoni tad-drittijiet u tal-libertajiet tagħhom, skont l-Artikolu 25(1)(h) tar-Regolament (UE) 2018/1725.

(19)

Għalhekk, il-Kummissjoni identifikat ir-raġunijiet imniżżlin fl-Artikolu 25(1)(c), (g) u (h) tar-Regolament (UE) 2018/1725 bħala r-raġunijiet għar-restrizzjonijiet li jista’ jkun hemm bżonn jiġu applikati għall-attivitajiet tal-ipproċessar tad-data li jitwettqu fil-kuntest tal-analiżi u tal-proċeduri tagħha b’rabta mas-sajd IUU.

(20)

Jenħtieġ li kull restrizzjoni li ssir abbażi ta’ din id-Deċiżjoni tkun meħtieġa u proporzjonata u tkun tqis ir-riskji li jkun hemm għad-drittijiet u għal-libertajiet tas-suġġetti tad-data.

(21)

Jenħtieġ li l-Kummissjoni tittratta r-restrizzjonijiet kollha b’mod trasparenti u tirreġistra kull applikazzjoni fis-sistema ta’ rekords korrispondenti.

(22)

Il-Kummissjoni hija l-kontrollur u taġixxi permezz tas-servizz tagħha li huwa kompetenti għall-affarijiet marittimi u s-sajd, li huwa responsabbli għall-analiżi u għall-proċeduri li jitwettqu b’rabta mas-sajd IUU u għall-għoti ta’ assistenza lill-Istati Membri u ta’ informazzjoni lil pajjiżi terzi u lil organizzazzjonijiet internazzjonali dwar każijiet ta’ sajd allegat li huwa sajd IUU.

(23)

Skont l-Artikolu 25(8) tar-Regolament (UE) 2018/1725, il-kontrolluri jistgħu jiddifferixxu l-għoti tal-informazzjoni dwar ir-raġunijiet għall-applikazzjoni ta’ restrizzjoni lis-suġġett tad-data jew ma jagħtuhx it-tali informazzjoni jekk l-għoti ta’ dik l-informazzjoni jkun jikkomprometti b’xi mod jew ieħor l-għan tar-restrizzjoni. Dan huwa l-każ, b’mod partikulari, fil-każ tar-restrizzjonijiet previsti fl-Artikoli 16 u 35 ta’ dak ir-Regolament.

(24)

Jenħtieġ li l-Kummissjoni tirrevedi b’mod regolari r-restrizzjonijiet imposti sabiex tiżgura li d-drittijiet tas-suġġett tad-data li jiġi infurmat skont l-Artikoli 16 u 35 tar-Regolament (UE) 2018/1725 jiġu ristretti biss għall-perjodu li jkun meħtieġ biex il-Kummissjoni tkun tista’ twettaq l-analiżi u l-proċeduri b’rabta mas-sajd IUU.

(25)

Meta jiġu ristretti drittijiet oħrajn tas-suġġetti tad-data, jenħtieġ li l-kontrollur jivvaluta każ b’każ jekk il-komunikazzjoni tar-restrizzjoni tikkompromettix l-għan tagħha jew le.

(26)

Jenħtieġ li l-Uffiċjal tal-Protezzjoni tad-Data tal-Kummissjoni jwettaq rieżami indipendenti tal-applikazzjoni tar-restrizzjonijiet bil-għan li jiżgura l-konformità ma’ din id-Deċiżjoni.

(27)

Din id-Deċiżjoni hija adottata għall-finijiet tal-Artikolu 25 tar-Regolament (UE) 2018/1725 u jenħtieġ li tidħol fis-seħħ fit-tielet jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea biex il-Kummissjoni tkun tista’ tirrestrinġi mill-ewwel l-applikazzjoni ta’ ċerti drittijiet u ta’ ċerti obbligi skont l-Artikolu 25 tar-Regolament (UE) 2018/1725 sabiex l-analiżi u l-proċeduri biex jiġu indirizzati l-każijiet ta’ sajd IUU ma jitqegħdux f’periklu.

(28)

Il-Kontrollur Ewropew għall-Protezzjoni tad-Data ġie kkonsultat u ta l-opinjoni tiegħu fis-17 ta’ Lulju 2019,