|
18.10.2019 |
MT |
Il-Ġurnal Uffiċjali tal-Unjoni Ewropea |
L 265/10 |
DEĊIŻJONI TA’ IMPLIMENTAZZJONI TAL-KUMMISSJONI (UE) 2019/1738
tas-16 ta’ Ottubru 2019
li tawtorizza lir-Renju tad-Danimarka jikkonkludi ftehimiet ma’ Greenland u l-Gżejjer Faeroe rispettivament għat-trasferimenti ta’ fondi
(notifikata bid-dokument C(2019) 7302)
(It-test bid-Daniż biss huwa awtentiku)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2015/847 tal-Parlament Ewropew u tal-Kunsill tal-20 ta’ Mejju 2015 dwar l-informazzjoni li takkumpanja t-trasferimenti ta’ fondi u li jħassar ir-Regolament (KE) Nru 1781/2006 (1), b’mod partikolari l-Artikolu 24 tiegħu,
Wara li kkunsidrat it-talba tar-Renju tad-Danimarka skont l-Artikolu 24 tar-Regolament (UE) 2015/847,
Billi:
|
(1) |
Skont id-Deċiżjoni tal-Kummissjoni 2012/43/UE (2), id-Danimarka ngħatat deroga fir-rigward tat-trasferimenti ta’ fondi bejn Greenland u l-Gżejjer Faeroe rispettivament u d-Danimarka. |
|
(2) |
Fl-1 ta’ Mejju 2019, id-Danimarka talbet it-tiġdid tad-deroga skont l-Artikolu 24 tar-Regolament (UE) 2015/847 għat-trasferimenti ta’ fondi bejn Greenland u l-Gżejjer Faeroe rispettivament u d-Danimarka. |
|
(3) |
L-Istati Membri ġew mgħarrfa permezz ta’ proċedura bil-miktub tal-Kumitat għall-Prevenzjoni tal-Ħasil tal-Flus u tal-Iffinanzjar tat-Terroriżmu fid-19 ta’ Lulju 2019 li l-Kummissjoni qieset li kienet irċeviet l-informazzjoni meħtieġa biex tevalwa t-talba tad-Danimarka. |
|
(4) |
La Greenland u lanqas il-Gżejjer Faeroe ma jifformaw parti mit-territorju tal-Unjoni kif stabbilit skont l-Artikolu 52 tat-Trattat dwar l-Unjoni Ewropea u l-Artikolu 355 tat-Trattat dwar il-Funzjonament tal-Unjoni Ewropea. Dawk it-territorji jiffurmaw parti miż-żona monetarja tad-Danimarka. Għaldaqstant Greenland u l-Gżejjer Faeroe huma konformi mal-kriterju stabbilit fil-punt (a) tat-tieni subparagrafu tal-Artikolu 24(1) tar-Regolament (UE) 2015/847. |
|
(5) |
Il-fornituri tas-servizzi ta’ pagament fi Greenland u l-Gżejjer Faeroe jipparteċipaw direttament f’sistemi ta’ ħlasijiet u saldu fid-Danimarka, b’mod partikolari fi Kronos u Sumclearing. Għaldaqstant dawn huma konformi mal-kriterju stabbilit fil-punt (b) tat-tieni subparagrafu tal-Artikolu 24(1) tar-Regolament (UE) 2015/847. |
|
(6) |
Sabiex ir-regolamenti tal-Unjoni jkunu applikabbli għal Greenland u għall-Gżejjer Faeroe, id-Danimarka jenħtieġ li tadotta leġiżlazzjoni speċifika f’dan is-sens. L-adozzjoni mid-Danimarka tal-Liġi nru 325 tat-30.3.2019 għall-Gżejjer Faeroe u Liġi nru 326 tat-30.3.2019 għal Greenland tiżgura li dawk it-territorji jkunu inkorporaw fl-ordni legali tagħhom dispożizzjonijiet li jikkorrispondu ma’ dawk tar-Regolament (UE) 2015/847. |
|
(7) |
Għalhekk, kemm Greenland kif ukoll il-Gżejjer Faeroe adottaw l-istess regoli bħal dawk stabbiliti skont ir-Regolament (UE) 2015/847 u jesiġu li l-fornituri tas-servizzi ta’ ħlasijiet rispettivi tagħhom japplikawhom u b’hekk jissodisfaw il-kriterju stabbilit fil-punt (c) tat-tieni subparagrafu tal-Artikolu 24(1) ta’ dak ir-Regolament. |
|
(8) |
Għalhekk huwa xieraq li d-Danimarka tingħata d-deroga mitluba. |
|
(9) |
Il-miżuri li jsir provvediment għalihom f’din id-Deċiżjoni huma konformi mal-opinjoni tal-Kumitat għall-Prevenzjoni tal-Ħasil tal-Flus u tal-Iffinanzjar tat-Terroriżmu. |
ADOTTAT DIN ID-DEĊIŻJONI:
Artikolu 1
Ir-Renju tad-Danimarka għandu jingħata l-awtorizzazzjoni li jikkonkludi ftehim ma’ Greenland u mal-Ġżejjer Faeroe rispettivament, bil-għan li t-trasferimenti ta’ fondi bejn kull wieħed minn dawn it-territorji u d-Danimarka jiġu trattati bħala trasferimenti ta’ fondi fi ħdan id-Danimarka għall-finijiet tar-Regolament (UE) 2015/847.
Artikolu 2
Id-Deċiżjoni 2012/43/UE qiegħda titħassar.
Artikolu 3
Din id-Deċiżjoni hija indirizzata lir-Renju tad-Danimarka.
Magħmul fi Brussell, is-16 ta’ Ottubru 2019.
Għall-Kummissjoni
Věra JOUROVÁ
Membru tal-Kummissjoni
(2) Id-Deċiżjoni tal-Kummissjoni 2012/43/UE tal-25 ta’ Jannar 2012 li tawtorizza lir-Renju tad-Danimarka jikkonkludi ftehimiet mal-Groenlandja (sic) u l-Gżejjer Faeroe għat-trasferimenti ta’ fondi bejn id-Danimarka u kull wieħed minn dawn it-territorji li għandhom jiġu ttrattati bħala trasferimenti ta’ fondi fid-Danimarka, skont ir-Regolament (KE) Nru 1781/2006 tal-Parlament Ewropew u tal-Kunsill (ĠU L 24, 27.1.2012, p. 12).