(1)

L-Istati Membri u l-Unjoni jaħdmu biex jiżviluppaw strateġija kkoordinata għall-impjiegi u b'mod partikolari biex jippromwovu forza tax-xogħol b'ħiliet, imħarrġa u li kapaċi tadatta, kif ukoll swieq tax-xogħol li jwieġbu għat-tibdil ekonomiku, bil-ħsieb li jintlaħqu l-objettivi ta' impjieg sħiħ u ta' progress soċjali stabbiliti fl-Artikolu 3 tat-Trattat dwar l-Unjoni Ewropea.

(2)

F'konformità mat-Trattat dwar il-Funzjonament tal-Unjoni Ewropea (TFUE), l-Unjoni żviluppat u implimentat strumenti għall-koordinazzjoni tal-politika għall-politiki fiskali, makroekonomiċi u strutturali. Bħala parti minn dawk l-istrumenti, il-linji gwida għall-politiki dwar l-impjiegi tal-Istati Membri, stabbiliti fl-Anness għad-Deċiżjoni tal-Kunsill (UE) 2018/1215 (4) (“il-linji gwida dwar l-impjiegi”) -u l-linji gwida ġenerali għall-politiki ekonomiċi tal-Istati Membri u tal-Unjoni stabbiliti fir-Rakkomandazzjoni tal-Kunsill (UE) 2015/1184 (5) jiffurmaw il-linji gwida integrati għall-implimentazzjoni tal-istrateġija Ewropa 2020 (“il-linji gwida integrati”). Dawn jiggwidaw l-implimentazzjoni tal-politika fl-Istati Membri u fl-Unjoni, filwaqt li jirriflettu l-interdipendenza bejn l-Istati Membri. Is-sett ta' politiki u ta' riformi kkoordinati tal-Unjoni u nazzjonali li jirriżulta jikkostitwixxi ġabra ġenerali xierqa ta' politiki ekonomiċi u soċjali li jenħtieġ li tikseb effetti sekondarji pożittivi.

(3)

Is-Semestru Ewropew jiġbor flimkien strumenti differenti f'qafas ġenerali għas-sorveljanza multilaterali integrata tal-politiki ekonomiċi, baġitarji, soċjali u dwar l-impjiegi u għandu l-għan li jilħaq il-miri tal-Ewropa 2020, inkluż dawk dwar l-impjiegi, l-edukazzjoni u t-tnaqqis tal-faqar, kif stabbilit fid-Deċiżjoni tal-Kunsill 2010/707/UE (6). Filwaqt li jiġu promossi l-objettivi ta' politika ta' spinta lill-investimenti, ta' riformi strutturali u tal-iżgurar ta' politiki fiskali responsabbli, is-Semestru Ewropew issaħħaħ u ġie ssimplifikat kontinwament mill-2015. B'mod partikolari, issaħħet l-enfasi tiegħu fuq l-impjiegi u fuq il-qasam soċjali; u ġie approfondit id-djalogu mal-Istati Membri, mas-sħab soċjali u mar-rappreżentanti tas-soċjetà ċivili.

(4)

F'Novembru 2017 il-Parlament Ewropew, il-Kunsill u l-Kummissjoni ffirmaw proklamazzjoni interistituzzjonali għal Pilastru Ewropew tad-Drittijiet Soċjali, li tistabbilixxi 20 prinċipju u dritt sabiex jiġi appoġġat il-funzjonament tajjeb u ġust tas-swieq tax-xogħol u tas-sistemi tal-protezzjoni soċjali. Il-Pilastru Ewropew tad-Drittijiet Soċjali jikkostitwixxi qafas ta' referenza għall-monitoraġġ tal-prestazzjoni soċjali u tal-impjiegi tal-Istati Membri, sabiex jiġu xprunati r-riformi fil-livell nazzjonali u sabiex iservi ta' boxxla għal proċess imġedded ta' konverġenza fl-Unjoni kollha.

(5)

Il-linji gwida integrati jenħtieġ li jiffurmaw il-bażi għar-rakkomandazzjonijiet speċifiċi għall-pajjiżi li l-Kunsill jista' jindirizza lill-Istati Membri. Jenħtieġ li l-Istati Membri jagħmlu użu sħiħ mill-Fond Soċjali Ewropew u minn fondi oħra tal-Unjoni meta jimplimentaw il-linji gwida dwar l-impjiegi. Minkejja li d-destinatarji tal-linji gwida integrati huma l-Istati Membri u l-Unjoni, jenħtieġ li l-linji gwida dwar l-impjiegi jiġu implimentati fi sħubija mal-awtoritajiet nazzjonali, reġjonali u lokali kollha, bl-involviment mill-qrib tal-parlamenti, kif ukoll tas-sħab soċjali u tar-rappreżentanti tas-soċjetà ċivili.

(6)

Jenħtieġ li l-Kumitat tal-Impjiegi u l-Kumitat tal-Protezzjoni Soċjali jimmonitorjaw il-mod kif jiġu implimentati l-politiki rilevanti fid-dawl tal-linji gwida dwar l-impjiegi, f'konformità mal-mandati rispettivi tagħhom abbażi tat-TFUE. Jenħtieġ li dawk il-kumitati u korpi preparatorji oħra tal-Kunsill involuti fil-koordinazzjoni tal-politiki ekonomiċi u soċjali jaħdmu mill-qrib flimkien. Jenħtieġ li jinżamm id-djalogu dwar il-politiki bejn il-Parlament Ewropew, il-Kunsill u l-Kummissjoni, b'mod partikolari fir-rigward tal-linji gwida dwar l-impjiegi.

(7)

Il-Kumitat tal-Protezzjoni Soċjali ġie kkonsultat.

(8)

Jenħtieġ li l-linji gwida dwar l-impjiegi jibqgħu stabbli sabiex jiġi żgurat li ssir enfasi fuq l-implimentazzjoni tagħhom. Wara valutazzjoni ta' żviluppi fis-swieq tax-xogħol u s-sitwazzjoni soċjali mill-adozzjoni tal-linji gwida dwar l-impjiegi fl-2018, ġie determinat li l-ebda aġġornament mhu meħtieġ. Ir-raġunijiet għall-adozzjoni tal-linji gwida dwar l-impjiegi fl-2018 jibqgħu validi, u għalhekk jenħtieġ li dawk il-linji gwida jinżammu,