(1)

Fis-17 ta' Lulju 2009, l-awtoritajiet Rumeni nnotifikaw lill-Kummissjoni l-konverżjoni ppjanata ta' dejn pubbliku ta' Oltchim S.A. (“Oltchim”) f'ekwità. Fis-7 ta' Marzu 2012, b'Deċiżjoni tal-Kummissjoni 2013/246/UE (2) fil-każ SA.29041 – Miżuri ta' sostenn favur Oltchim SA Râmnicu Vâlcea (“id-deċiżjoni tal-2012 tal-Kummissjoni”), il-Kummissjoni kkonkludiet li l-konverżjoni tad-dejn ta' RON 1 049 miljun (EUR 231 miljun) ma kinitx tinvolvi għajnuna mill-Istat. Dik il-konklużjoni kienet ibbażata fuq l-impenn sod tal-Gvern Rumen li jipprivatizza Oltchim bis-sħiħ, inkluża l-parteċipazzjoni sħiħa li tirriżulta għall-awtoritajiet pubbliċi wara l-konverżjoni tad-dejn.

(2)

Wara t-tentattiv li ma rnexxiex ta' privatizzazzjoni ta' Oltchim, l-awtoritajiet Rumeni fetħu kuntatti mal-Kummissjoni f'Ottubru 2012 biex iħejju n-notifika formali tal-għajnuna ta' salvataġġ lil Oltchim (reġistrata bħala SA.35558).

(3)

F'Novembru 2012, l-istampa rrapportat li l-awtoritajiet Rumeni kienu kkonkludew ftehim mal-banek kredituri ta' Oltchim għall-finanzjament tat-tkomplija tal-produzzjoni ta' Oltchim. F'dan il-kuntest, il-Kummissjoni ddeċidiet li tiftaħ każ ex officio reġistrat bħala SA.36086 u permezz ta' ittra tat-18 ta' Jannar 2013 talbet lir-Rumanija tipprovdi informazzjoni. Ir-Rumanija wieġbet għal din it-talba fis-7 ta' Frar 2013. Il-Kummissjoni talbet informazzjoni addizzjonali fit-18 ta' Frar 2013 li għaliha r-Rumanija wieġbet fil-11 ta' Marzu 2013. Ir-Rumanija ssottomettiet informazzjoni addizzjonali matul laqgħa f'Ġunju 2013 u permezz ta' ittra tal-25 ta' Settembru 2013.

(4)

Permezz ta' ittri tal-5 ta' Awwissu 2014, tas-16 ta' Ottubru 2014 u tat-3 ta' Marzu 2015, il-Kummissjoni talbet informazzjoni addizzjonali li għaliha r-Rumanija wieġbet rispettivament fil-15 ta' Settembru 2014, fis-26 ta' Novembru 2014, fis-26 ta' Marzu 2015 u fis-16 ta' April 2015. Fil-11 ta' Mejju 2015, il-Kummissjoni talbet informazzjoni addizzjonali li r-Rumanija pprovdiet f'laqgħa tas-26 ta' Mejju 2015 u permezz ta' ittri tal-10 ta' Ġunju 2015 u tal-25 ta' Ġunju 2015. Fit-3 ta' Settembru 2015, il-Kummissjoni talbet informazzjoni addizzjonali li r-Rumanija pprovdiet fl-10 ta' Settembru 2015. Ir-Rumanija ppreżentat ukoll informazzjoni spontanja fit-22 ta' Ottubru 2015 u talbet laqgħat, li seħħew fit-23 ta' Ottubru 2015 u fit-22 ta' Jannar 2016.

(5)

Permezz ta' ittra datata t-8 ta' April 2016, il-Kummissjoni informat lir-Rumanija li hi kienet iddeċidiet li tiftaħ il-proċedura stabbilita fl-Artikolu 108(2) TFUE fil-każ SA.36086.Id-deċiżjoni tal-Kummissjoni li tiftaħ il-proċedura ġiet ippubblikata f'Il-Ġurnal Uffiċjali tal-Unjoni Ewropea (3). Il-Kummissjoni stiednet lill-partijiet interessati biex jippreżentaw il-kummenti tagħhom dwar l-għajnuna.

(6)

Il-Kummissjoni rċiviet il-kummenti inizjali tar-Rumanija (il-15 ta' Ġunju 2016) u ta' erba' partijiet interessati. Il-kummenti tal-partijiet terzi ingħaddew lir-Rumanija, li ngħatat l-opportunità li tirreaġixxi; il-kummenti tagħha waslu permezz ta' ittra datata t-28 ta' Novembru 2016.

(7)

Permezz ta' ittra datata d-29 ta' Lulju 2016, ir-Rumanija pproponiet modifika fil-proċess ta' bejgħ ta' Oltchim bl-għan li tinkiseb diskontinwità ekonomika. L-awtoritajiet Rumeni fornew informazzjoni addizzjonali (fl-14 ta' Settembru 2016, fl-4 ta' Novembru 2016 u fil-5 ta' Diċembru 2016), u mmodifikaw it-termini tal-proċess ta' bejgħ inizjali.

(8)

Wara l-iskambji msemmija hawn fuq, id-ditta ta' konsulenza AT Kearney, fil-kwalità tagħha ta' rappreżentant ta' Oltchim (“il-Bejjiegħ”), ipprovdiet rapporti suċċessivi dwar il-progress tal-bejgħ tal-assi ta' Oltchim fis-27 ta' Jannar 2017, fl-4 ta' April 2017, fil-25 ta' Lulju 2017, fil-15 ta' Settembru 2017, fil-21 ta' Novembru 2017, fit-18 ta' Jannar 2018, u fis-16 ta' Lulju 2018. (4)

(9)

Matul il-proċess ta' bejgħ, diversi partijiet terzi intervjenew u l-awtoritajiet Rumeni pprovdew kummenti fuq kull wieħed minn dawn l-interventi.

(10)

Talba addizzjonali għal informazzjoni ntbagħtet lir-Rumanija fis-26 ta' Jannar 2018 li għaliha r-Rumanija wieġbet fis-16 ta' Mejju 2018.

(11)

Oltchim hi waħda mill-akbar kumpaniji petrokimiċi fir-Rumanija u fix-Xlokk tal-Ewropa. L-Istat Rumen (bħalissa permezz tal-Ministeru tal-Ekonomija) għandu parteċipazzjoni kontrollanti ta' 54,8 % fil-kumpanija.

(12)

Oltchim primarjament tipproduċi soda kawstika likwida, ossidu-poljoli tal-propilen, plastifikanti u osso-alkoħols. Oltchim hi l-akbar produttur ta' soda kawstika likwida fis-suq Ewropew (sehem mis-suq tal-UE ta' 41 % fl-2015), l-uniku produttur taż-żibeġ tas-soda kawstika fl-Ewropa Ċentrali, kif ukoll l-uniku produttur ta' klorur tal-polivinil u tal-polieteri fir-Rumanija u t-tielet fl-Ewropa. Oltchim tesporta aktar minn 74 % tal-produzzjoni tagħha ġewwa u barra l-Ewropa (5).

(13)

Oltchim hi l-impjegatur industrijali ewlieni f'Vâlcea (reġjun Rumen assistit skont l-Artikolu 107(3)(a) TFUE). Fl-2015, Oltchim kienet tħaddem 2 208 impjegati, li 1 982 impjegat minnhom kienu fis-sit ta' Râmnicu Vâlcea u 226 impjegat fis-sit ta' Pitești – Petrochemical Division Bradu.

(14)

Oltchim għandha storja twila ta' diffikultajiet ekonomiċi. Tul il-perjodu 1995-2000, daħlet f'sensiela ta' kuntratti għal self kummerċjali, sostnuta minn garanziji tal-gvern. Oltchim ma setgħetx tħallas lura s-self u l-banek eżerċitaw il-garanziji tal-gvern. Fl-2002, il-Ministeru tal-Finanzi ttrasferixxa d-dejn ta' Oltchim li rriżulta mill-garanziji tal-gvern lill-aġenzija tal-privatizzazzjoni Rumena (“AAAS” (6)). Il-Ministeru tal-Finanzi kompla jagħmel il-ħlasijiet skont il-garanziji tal-gvern sa Diċembru 2006 u mill-ġdid ittrasferixxa lil AAAS kull pretensjoni li rriżultat mill-pagamenti sussegwenti magħmula fuq il-bażi tal-garanziji skattati.

(15)

Tul is-snin 2007-2012 is-sitwazzjoni finanzjarja ta' Oltchim marret għall-agħar, hekk kif il-kontijiet finanzjarji tagħha sistematikament urew telf operatorju dejjem akbar, telf akkumulat u fondi proprji negattivi. Fil-31 ta' Diċembru 2012 (qabel ma daħlet f'insolvenza) il-kontijiet finanzjarji ta' Oltchim urew telf operatorju ta' EUR 62.9 miljun, telf nett ta' EUR 127,8 miljun u telf akkumulat ta' EUR 383 miljun.

(16)

Ir-Rumanija għamlet diversi tentattivi biex tipprivatizza lil Oltchim (fl-2001, fl-2003, fl-2006, fl-2007 u fl-2008) iżda dawn dejjem fallew.

(17)

Speċifikament, fl-2001 l-Istat innegozja u ffirma mal-kumpanija Kanadiża tal-estrazzjoni Exall Resources il-bejgħ ta' parteċipazzjoni ta' 53,2 %. Hekk kif ix-xerrej naqas milli jħallas il-valur tal-ishma (USD 10 miljun, jiġifieri madwar EUR 8,9 miljun (7)) u naqas milli jiggarantixxi l-investimenti teknoloġiċi u ambjentali mwiegħda, il-ftehim ma baqax imfittex (8). Fl-2002, l-Istat iddeċieda li jipprova sejħa ġdida għall-privatizzazzjoni, billi rrikorra għall-konverżjoni tad-dejn ta' AVAS (il-prekursur tal-AAAS) f'ekwità. Madankollu, l-iskadenza għall-preżentazzjoni tal-offerti ġiet posposta darbtejn u minħabba l-oppożizzjoni ta' investitur potenzjali u tal-azzjonisti ta' minoranza, inkluż permezz ta' azzjoni quddiem il-Qorti, fl-2003 l-offerta ġiet revokata (9). Sussegwentement, wara r-revoka fl-2006 ta' konverżjoni tad-dejn oriġinarjament approvata fl-2003, l-awtoritajiet Rumeni reġgħu ppruvaw jipprivatizzaw lil Oltchim flimkien mad-dejn fl-2006 u fl-2008. Madankollu, skont l-awtoritajiet Rumeni, ebda investitur ma kien interessat jixtri lil Oltchim f'kundizzjonijiet bħal dawn (10).

(18)

Permezz tad-deċiżjoni tal-2012 tal-Kummissjoni, il-Kummissjoni ddeċidiet li l-konverżjoni ppjanata tad-dejn ta' RON 1 049 miljun f'ekwità favur AAAS (11) (madwar EUR 231) ma kinitx tinvolvi għajnuna mill-Istat. Id-deċiżjoni kienet ibbażata fuq l-impenn sod meħud mir-Rumanija li tipprivatizza s-sehem pubbliku sħiħ li jirriżulta mill-konverżjoni tad-dejn sa mhux aktar tard minn tmiem Mejju 2012, kif espress f'żewġ ittri mill-Prim Ministri rispettivi dak iż-żmien (12).

(19)

Il-Kummissjoni kienet ta' din il-fehma wara li analizzat kritikament ir-rapporti mħejjija mill-konsulenti indipendenti (13) u sottomessi mill-awtoritajiet Rumeni matul il-proċedimenti. Dawk ir-rapporti qabblu r-rikavati minn likwidazzjoni ta' Oltchim ma' dawk ta' privatizzazzjoni. Fix-xenarju ta' likwidazzjoni, il-valur tal-assi ta' Oltchim ġie stmat bħala RON 692 055 000 (EUR 152,2 miljun), li jinkludu RON 264 119 000 għal assi mirhuna u RON 427 936 000 għal assi mhux mirhuna (14).

(20)

Skont ir-rapport tal-2011 ta' Raiffeisen, fix-xenarju ta' likwidazzjoni AAAS kien ikollha tiġbor madwar RON 105,4 miljun (madwar EUR 23 miljun), li jirrappreżentaw 12 % mill-pretensjoni totali tagħha.

(21)

Dan l-ammont tqabbel mal-valur tal-pretensjoni ta' AAAS f'xenarju ta' konverżjoni tad-dejn flimkien mal-privatizzazzjoni. F'dan ix-xenarju, skont il-metodu użat biex jiġi stmat il-valur tal-intrapriża, il-valur tas-suq ta' Oltchim ġie stmat għal bejn EUR 28 miljun u EUR 97 miljun. Wara l-konverżjoni tad-dejn tagħha f'ekwità u l-privatizzazzjoni sussegwenti, AAAS kienet tiggwadanja bejn EUR 22,9 miljun u EUR 79,5 miljun (15).

(22)

Fir-rigward ta' dan it-tqabbil, il-Kummissjoni kkonkludiet li: “jekk il-kumpanija tiġi kompletament privatizzata fi żmien qasir wara l-qlib tad-dejn, il-miżura notifikata (il-qlib tad-dejn segwit minn privatizzazzjoni sħiħa) ma tfissirx vantaġġ għal Oltchim peress li din il-miżura tippermetti lill-kreditur pubbliku AVAS li jirkupra aktar milli kieku iddeċieda li jpoġġi lill-kumpanija fi stralċ. F'dan ir-rigward, il-Kummissjoni tieħu nota tal-impenn li sar mill-awtoritajiet Rumeni li jipprivatizzaw il-kumpanija b'mod sħiħ sal-31 ta' Mejju 2012.” (16)

(23)

Madankollu, Oltchim ma implimentatx il-konverżjoni ta' dejn f'ekwità tad-dejn ta' AAAS kif approvata mid-deċiżjoni tal-2012 tal-Kummissjoni. Il-produzzjoni kienet għadha kif ġiet sospiża f'Awwissu 2012 wara rifjut mill-fornitur ewlieni tal-elettriku ta' Oltchim Electrica S.A. (“Electrica”) milli jipprovdi servizzi mingħajr ma jitħallas.

(24)

Eżatt wara li Oltchim waqqfet l-operat, l-awtoritajiet Rumeni bdew jibagħtu sinjali ċari lill-pubbliku dwar il-fatt li kienu lesti li jagħmlu kull sforz possibbli biex isalvaw lil Oltchim. Ftit jiem wara biss qabel id-data tal-privatizzazzjoni, il-Ministeru tal-Ekonomija tar-Rumanija ta' dak iż-żmien indika bejn ġimagħtejn sa erba' ġimgħat bħala perjodu ta' żmien għat-tnedija mill-ġdid tal-produzzjoni ta' Oltchim. Dan ġie kkwotat jgħid li hu kien “iddiskuta mal-maniġment tal-kumpless li kellu pjan li jerġa' jiftaħ l-installazzjonijiet” (17).

(25)

Fit-22 ta' Settembru 2012, il-proċess ta' privatizzazzjoni falla, b'xi kawżi pendenti quddiem il-qrati nazzjonali b'rabta mal-proċess ta' privatizzazzjoni (18).

(26)

Wara li l-privatizzazzjoni falliet, is-sitwazzjoni finanzjarja ta' Oltchim kompliet sejra għall-agħar. Matul il-perjodu eżatt wara li falliet il-privatizzazzjoni, l-awtoritajiet Rumeni tennew li kienu lesti li jagħmlu dak li hemm bżonn biex isalvaw lil Oltchim (19).

(27)

Fl-1 ta' Ottubru 2012, kienet prevista strateġija ġdida għat-tħejjija tal-attività ta' Oltchim li tinkludi sostenn finanzjarju fil-forma ta' għajnuna ta' salvataġġ. F'artiklu kontemporanju fl-istampa, il-Prim Ministru Rumen ta' dak iż-żmien spjega li l-proċedura ta' privatizzazzjoni kienet falliet u żid li, “illum irridu nispjegaw il-pjan ta' riżerva biex ikomplu l-attivitajiet, insalvaw l-impjiegi u nħejju proċedura ta' privatizzazzjoni ġdida, f'kundizzjonijiet differenti ħafna li tjiebu b'mod konsiderevoli.” (20) Fuq l-istess nota, il-Prim Ministru ħabbar ftehim pendenti ma' diversi kredituri għas-salvataġġ tal-kumpanija: “Il-pjan ta' ftuħ mill-ġdid ta' Oltchim se jiġi ppreżentat nhar il-Ħamis u se jipprovdi għall-passi li jmiss fl-impjant ta' Vâlcea […], il-Ministru tal-Ekonomija, tal-Kummerċ u tal-Ambjent Kummerċjali […] u l-Ministru tal-Finanzi se jibdew jiddiskutu b'mod uffiċjali mal-kredituri ewlenin kollha, ma' AVAS, ma' Electrica u mat-tliet banek li huma l-kredituri ewlenin ta' Oltchim: BCR, Banca Transilvania u CEC. Flimkien magħhom, nhar il-Ħamis se nippreżentaw il-pjan biex inniedu lil Oltchim mill-ġdid, li jistabbilixxi biċ-ċar il-passi neċessarji għal maniġment ġdid f'Oltchim, biex jiġi ffinanzjat il-ftuħ mill-ġdid tal-produzzjoni, il-perjodu tal-attività, il-ħlas tas-salarji pendenti u t-tħejjija għall-privatizzazzjoni li hu ferm probabbli li ser isseħħ matul l-2013, f'kundizzjonijiet li mhumiex dawk li qed isseħħ fihom bħalissa”. (21)

(28)

Fis-17 ta' Ottubru 2012, is-Segretarju tal-Istat tal-Ministeru tal-Ekonomija ddikjara lill-istampa li partijiet minn Oltchim kienu se jinfetħu mill-ġdid f'temp ta' ftit jiem u li l-Gvern kellu l-għan li jagħti għajnuna ta' salvataġġ ta' EUR 20 miljun lil Oltchim (22).

(29)

Fl-24 ta' Ottubru 2012, Oltchim irnexxielha terġa' tniedi l-produzzjoni tagħha bis-saħħa ta' tibdil fil-kundizzjonijiet kummerċjali mogħtija lil Oltchim minn żewġ fornituri pubbliċi (CET Govora u National Salt Company Salrom) (23):

(30)

Fil-15 ta' Novembru 2012, il-Ministru tal-Ekonomija għamel dikjarazzjonijiet lill-istampa dwar l-impenn tal-Gvern li jżomm lil Oltchim ħajja: “L-idea ta' insolvenza kienet tispiċċa bla kontroll li kieku kkonkludejna l-ftehim mal-kredituri ewlenin. Din hi r-raġuni għaliex ikkonkludejna ftehim ta' riorganizzazzjoni, ristrutturar ikkontrollat, flimkien mal-kredituri l-kbar ta' Oltchim. Jiġifieri, biex ma jisbaħx għada filgħodu bil-kredituri l-kbar - il-banek, il-kredituri privat, in-negozjanti, il-fornituri ta' materja prima – li jitolbu l-insolvenza ta' Oltchim. B'dan il-ftehim qed nimmiraw li nkunu nistgħu nerġgħu nniedu, insalvaw, nirristrutturaw lil Oltchim b'mod ikkontrollat, bi ftehim mal-kredituri.” (25)

(31)

Fit-23 ta' Novembru 2012, il-Ministeru tal-Finanzi, il-Ministeru tal-Affarijiet Ekonomiċi, il-Ministeru tat-Trasport u l-Infrastruttura, l-AAAS u l-OPSPI (26) ffirmaw Memorandum ta' Ftehim (“il-Memorandum”) mal-kredituri ta' Oltchim, jiġifieri l-varji banek privati u tal-Istat, kif ukoll impriżi tal-Istat bħal Electrica, Salrom, CFR Marfă SA. Il-partijiet għall-Memorandum qablu li l-Ministeru tal-Ekonomija u OPSPI jkunu jirreġistraw kumpanija veikolu bi skop speċjali (SPV) ħielsa minn djun b'kapital statali sħiħ (Oltchim SPV), mhux aktar tard mill-1 ta' Jannar 2013, biex il-banek ikunu jistgħu jipprovdu s-sostenn ta' finanzjament neċessarju b'mod sigur għat-tkomplija tal-produzzjoni f'Oltchim. F'dan ir-rigward, bl-Ordni ta' Emerġenza tal-Gvern Nru 59/2012, il-Gvern ordna lill-Ministeru tal-Affarijiet Ekonomiċi biex jiftaħ proċeduri legali għat-twaqqif ta' kumpanija SPV.

(32)

Madankollu, filwaqt li l-Memorandum u l-objettivi tiegħu nżammu, il-Ministeru tal-Affarijiet Ekonomiċi temporanjament abbanduna l-pjanijiet ta' twaqqif fuq bażi ta' terminu qasir tal-veikolu SPV ta' Oltchim. Minflok, Oltchim, fuq talba tagħha stess, daħlet fi proċedimenti ta' insolvenza rregolati mil-Liġi Nru 85/2006 (“il-liġi dwar l-insolvenza”) fit-30 ta' Jannar 2013.

(33)

Il-liġi dwar l-insolvenza tistabbilixxi proċedura kollettiva għall-kopertura tal-obbligazzjonijiet ta' debitur f'kundizzjoni ta' insolvenza.

(34)

Ladarba kumpanija tidħol fi proċedura ta' insolvenza kollettiva, is-setgħa deċiżjonali fuq l-attivitajiet tal-amministrazzjoni ta' dik il-kumpanija timxi mill-azzjonisti għal amministratur speċjali li għandu jaġixxi fl-aħjar interess tal-kumpanija (27). Wara l-irtirar tad-dritt ta' amministrazzjoni, imbagħad il-kumpanija tkun rappreżentata u titmexxa minn riċevent/likwidatur imqabbad mill-Qorti, skont l-għażla magħżula. Imbagħad il-mandat tal-amministratur speċjali jitnaqqas għar-rappreżentazzjoni tal-aħjar interessi tal-azzjonisti.

(35)

Il-laqgħa tal-azzjonisti ġenerali tal-kumpanija taħtar ir-riċevent speċjali li jrid ikun approvat mill-Qorti (l-hekk imsejjaħ riċevent imqabbad mill-Qorti). Sal-iskadenza stabbilita mill-ġudikant fl-insolvenza (imħallef b'setgħat speċjali fi proċedimenti ta' falliment u ta' insolvenza), ir-riċevent imqabbad mill-Qorti jew il-likwidatur għandu jħejji u jippreżenta lill-ġudikant fl-insolvenza rapport dwar ir-raġunijiet u ċ-ċirkustanzi li wasslu għall-insolvenza tad-debitur (28). Ir-rapport għandu jispeċifika jekk hemmx xi possibbiltà għar-riorganizzazzjoni tal-attività tad-debitur jew kwalunkwe raġuni li ma tippermettix għar-riorganizzazzjoni tiegħu. F'dan il-każ imsemmi l-aħħar, ir-riċevent imqabbad mill-Qorti għandu jipproponi l-proċedimenti ta' falliment. Jekk ir-riċevent imqabbad mill-Qorti jindika l-irkupru possibbli tal-attività tad-debitur fuq il-bażi ta' pjan ta' riorganizzazzjoni ġudizzjarja (“il-Pjan ta' Riorganizzazzjoni” jew “il-Pjan”), dan jispeċifika min ser iħejji l-pjan ta' riorganizzazzjoni (id-debitur, jew ir-riċevent imqabbad mill-Qorti waħdu jew flimkien ma' wieħed jew diversi mill-kredituri).

(36)

Wara l-proċedimenti ta' ftuħ, il-pretensjonijiet kollha tal-kredituri jiġu sospiżi u ma jkunux jistgħu jsiru oħrajn ġodda (29). Il-fornituri kollha ta' servizzi (elettriku, gass, ilma, telefonija) m'għandhomx ikunu intitolati jbiddlu, jirrifjutaw jew iwaqqfu b'mod temporanju t-tali servizzi lid-debitur f'każ li dan tal-aħħar ikollu l-kapaċità ta' konsumatur kaptiv (30).

(37)

Ir-riċevent imqabbad mill-Qorti għandu jinnotifika lill-kredituri biex jippreżentaw dikjarazzjoni tal-pretensjonijiet kontra d-debitur f'terminu perentorju legali stabbilit mid-deċiżjoni tal-ġudikant fl-insolvenza- fil-bidu tal-proċedimenti ta' insolvenza. Fuq din il-bażi, ir-riċevent imqabbad mill-Qorti iħejji l-hekk imsejħa lista preliminari ta' kredituri. Lista bħal din għandha tinkludi lill-kredituri f'żewġ kategoriji ewlenin: kredituri garantiti (kredituri bi pretensjonijiet miżmuma minn entitajiet li jibbenefikaw minn kollaterali fuq l-oġġetti mill-patrimonju tad-debitur, indipendentement minn jekk dan huwiex id-debitur ewlieni jew garanti terza għall-persuni li jibbenefikaw mill-kollaterali) u kredituri mhux garantiti (kredituri bi pretensjonijiet li ma jibbenefikawx minn xi garanzija kontra l-patrimonju tad-debitur). Kategoriji oħra ta' pretensjonijiet li għandhom jiddaħħlu fil-lista huma: kredituri tas-salarji u baġitarji.

(38)

Id-debitur, il-kredituri u kwalunkwe parti interessata oħra għandhom dritt li jappellaw quddiem il-ġudikant fl-insolvenza kontra l-lista preliminari tal-kredituri (31). Wara li l-appelli kollha jiġu deċiżi, ir-riċevent imqabbad mill-Qorti jħejji lista finali ta' kredituri, li turi l-ammont, il-prijorità u l-kundizzjoni (garantita jew mhux garantita) ta' kull pretensjoni u jibgħatha lill-Qorti għall-approvazzjoni. Ladarba l-appelli kollha jiġu deċiżi, il-lista ssir finali.

(39)

Il-liġi dwar l-insolvenza tipprevedi żewġ proċeduri alternattivi:

(40)

Ir-riorganizzazzjoni ġudizzjarja hi l-proċedura applikata għad-debitur biex iħallas id-djun tiegħu wara riorganizzazzjoni tal-attivitajiet tiegħu u skont pjan ta' pagament. Din il-proċedura timplika t-tħejjija, l-approvazzjoni, l-implimentazzjoni u l-osservazzjoni ta' pjan ta' riorganizzazzjoni, li jista' jipprovdi, fis-sħuħija tiegħu jew b'mod separat, għal: (a) ristrutturar operazzjonali u/jew finanzjarju tad-debitur; (b) ristrutturar korporattiv b'emenda tal-istruttura tal-kapital tal-ishma; jew (c) limitazzjoni tal-attività b'likwidazzjoni ta' ċerti assi.

(41)

Ir-riċevent imqabbad mill-Qorti jħejji l-pjan ta' riorganizzazzjoni flimkien mal-Lista ta' Kredituri u jibagħtu lill-Qorti għall-approvazzjoni. Il-pjan irid jiġi diskuss u approvat mill-kredituri wkoll. Il-liġi dwar l-insolvenza tipprovdi għall-kategoriji distinti li ġejjin ta' pretensjonijiet, li jivvotaw b'mod separat: (a) pretensjonijiet garantiti, (b) pretensjonijiet tas-salarji, (c) pretensjonijiet baġitarji, (d) pretensjonijiet mhux garantiti stabbiliti skont l-Artikolu 96(1), jiġifieri l-hekk imsejħa fornituri essenzjali, (e) pretensjonijiet mhux garantiti oħra (32).

(42)

F'konformità mal-Artikoli 100 u 101 tal-liġi dwar l-insolvenza:

(43)

F'konformità mad-definizzjoni fl-Artikolu 3(21) tal-liġi dwar l-insolvenza, it-terminu “kategorija żvantaġġata” jfisser kategorija ta' pretensjonijiet li għaliha l-pjan ta' riorganizzazzjoni jistipula tal-anqas waħda mill-modifiki li ġejjin għal dik il-kategorija:

(44)

Meta d-deċiżjoni li tikkonferma pjan issir effettiva, l-attività tad-debitur għandha tiġi riorganizzata kif xieraq, bil-pretensjonijiet u d-drittijiet tal-kredituri u tal-partijiet l-oħra kkonċernati jiġu emendati kif previst mill-pjan. Jekk ma jiġi kkonfermat ebda pjan, il-ġudikant fl-insolvenza għandu jordna l-ftuħ immedjat tal-proċedura ta' falliment.

(45)

Il-proċedura ta' falliment tfisser likwidazzjoni tal-assi tad-debitur biex jiġu koperti l-obbligazzjonijiet, segwita mit-tħassir tad-debitur mir-reġistru.

(46)

F'konformità mal-Artikolu 107 tal-liġi dwar l-insolvenza, debitur jidħol fil-proċedura ta' falliment fil-każijiet li ġejjin:

(47)

Matul il-proċedura ta' falliment, hemm żewġ kategoriji ta' assi soġġetti għal bejgħ (assi mirhuna/garantiti u assi mhux mirhuna/mhux garantiti) u, għaldaqstant, żewġ modi ta' distribuzzjoni tal-ammonti riċevuti minn bejgħ fost il-kredituri (l-Artikolu 121 għal assi mirhuna u l-Artikolu 123 għal assi mhux mirhuna u għal kwalunkwe surplus li jifdal mill-bejgħ tal-assi mirhuna). Il-likwidazzjoni għandha tibda eżatt wara t-tlestija tal-inventarju tal-assi mill-patrimonju tad-debitur mil-likwidatur. L-assi jistgħu jinbiegħu flimkien – bħala grupp operazzjonali – jew individwalment. Skont iċ-ċirkustanzi tal-każ u, jekk possibbli, l-assi tad-debitur għandhom jiġu stmati individwalment u f'daqqa, bħala grupp funzjonali.

(48)

Skont l-Artikolu 121 tal-liġi dwar l-insolvenza, japplika l-ordni li ġej ta' distribuzzjoni tal-fondi miksuba mill-bejgħ tal-assi mirhuna tad-debitur: (1) taxxi, bolol u spejjeż oħra relatati mal-bejgħ ta' tali assi, inklużi l-ispejjeż imġarrba għall-preservazzjoni u għall-amministrazzjoni ta' tali assi, kif ukoll remunerazzjoni tal-likwidaturi; u (2) pretensjonijiet tal-kredituri garantiti.

(49)

F'każ li l-ammonti miksuba mill-bejgħ tal-assi mirhuna ma jkunux biżżejjed għall-ħlas sħiħ tal-kredituri garantiti, il-kredituri garantiti għandu jkollhom pretensjonijiet mhux garantiti għad-differenza. Jekk wara l-ħlas tal-ammonti lill-kredituri garantiti, ikun hemm surplus, dan jitqassam fost il-kredituri mhux garantiti.

(50)

Skont l-Artikolu 123 tal-liġi dwar l-insolvenza, il-pretensjonijiet għandhom jitħallsu kif ġej: (1) taxxi, bolol u spejjeż oħra relatati mal-proċedura, (2) pretensjonijiet tas-salarji, (3) krediti mogħtija minn istituzzjonijiet ta' kreditu wara l-ftuħ tal-proċedimenti, kif ukoll il-pretensjonijiet li jirriżultaw mill-preservazzjoni tal-attività tad-debitur wara l-proċedimenti ta' ftuħ (djun kurrenti), (4) pretensjonijiet baġitarji, (5-7) pretensjonijiet oħra (bħal benefiċċji tat-tfal, benefiċċji tal-familja, self tal-bank), (8) pretensjonijiet mhux garantiti oħra.

(51)

Permezz tad-deċiżjoni tal-Kredituri fil-laqgħa tal-15 ta' April 2013, Rominsolv S.p.r.l u B.D.O. – Business Restructuring S.p.r.l. (“R/BDO”) inħatru bħala r-riċeventi uffiċjali ta' Oltchim (“il-Konsorzju”). Din il-ħatra ġiet ikkonfermata mill-Qorti fit-13 ta' Mejju 2013.

(52)

Matul is-seduta tal-Qorti tad-19 ta' Ġunju 2013, Oltchim esprimiet l-intenzjoni tagħha li tidħol f'riorganizzazzjoni ġudizzjarja u tħallas il-pretensjonijiet permezz ta' pjan ta' riorganizzazzjoni. Din it-talba kienet ibbażata fuq “Rapport dwar il-kawżi tal-insolvenza” mħejji mill-Konsorzju) f'konformità mal-Artikolu 59(1) sa (3) tal-liġi dwar l-insolvenza. Ir-Rapport dwar il-kawżi tal-insolvenza semma li kien hemm possibbiltà reali ta' riorganizzazzjoni effettiva tal-attività tad-debitur, taħt pjan ta' riorganizzazzjoni ssorveljat mill-qorti, li hu kellu l-għan li jħejji u jippreżenta lill-Qorti.

(53)

Fit-3 ta' Ġunju 2013, ir-riċeventi mqabbda mill-Qorti qabbdu lil Winterhill S.r.l għall-evalwazzjoni tal-valur tas-suq u tal-valur tal-likwidazzjoni tal-assi ta' Oltchim (“ir-Rapport ta' Winterhill”), pass neċessarju għat-tħejjija tal-pjan ta' ħlas.

(54)

Winterhill S.r.l iddeterminat il-valur tas-suq tal-assi ta' Oltchim u l-valur tal-likwidazzjoni tagħhom f'konformità mal-Istandards Internazzjonali dwar il-Valwazzjoni kif ġej:

(55)

Ir-Rapport ta' Winterhill evalwa l-klassijiet ta' assi differenti ta' Oltchim (34) billi uża metodi ta' valwazzjoni differenti skont it-tip ta' assi evalwat (metodu ta' tqabbil tas-suq jew metodu tal-kost nett tas-sostituzzjoni).

(56)

Rigward il-valwazzjoni tal-assi fissi (impjanti, tagħmir u makkinarju), ir-Rapport ta' Winterhill ħareġ stima tal-hekk imsejħa valur tas-suq in situ u valur tas-suq ex situ. Skont ir-Rapport ta' Winterhill, il-valur tas-suq in situ jimplika li l-impjant hu operazzjonali għalkollox għal użu ulterjuri fis-sit operazzjonali tiegħu. Dan il-valur iqis l-ispejjeż tal-installazzjoni, jiġifieri elettrika u mekkanika, li jkunu sinifikanti fil-każ ta' tali impjanti. Il-valur tas-suq ex situ jimplika li l-impjant mhuwiex operazzjonali u l-assi individwali jiġu evalwati b'rabta mat-tneħħija tagħhom bl-ispejjeż kontra x-xerrej. Fil-każ ta' Oltchim, it-tagħmir elettriku u mekkaniku tqies li ma kellu ebda valur sinifikanti u, skont il-kumplessità tiegħu, lanqas impatt negattiv fuq il-valur ta' assi. Il-valur tal-likwidazzjoni tal-assi fissi ġie definit fir-Rapport ta' Winterhill bħala l-valur tas-suq ex situ nieqes il-kostijiet stmati għaż-żarmar u għat-tneħħija mill-bini industrijali. Dan il-valur kien jinkludi stima tal-kostijiet għat-tindif u għat-tħejjija tal-assi għall-bejgħ, li kienu mistennija li jkunu sinifikanti fil-każ ta' Oltchim, minħabba n-natura niġġiesa u perikoluża ta' ħafna materjali użati fl-impjanti. Kien jinkludi wkoll allokazzjonijiet għal spejjeż ta' kummerċjalizzazzjoni, spejjeż tal-bejgħ, tariffi tal-bejjiegħa u kostijiet tal-persunal involut.

(57)

Fl-20 ta' Lulju 2013, Winterhill S.r.l. lestiet il-valwazzjoni tagħha. Ir-Rapport ta' Winterhill ta stima tas-suq ta' Oltchim għal EUR 293,7 miljun (madwar RON 1 270 miljun) u l-valur tal-likwidazzjoni bħala EUR 141 miljun (RON 636 miljun), li EUR 108 miljun minnhom (RON 491 miljun) għal assi garantiti u madwar EUR 32 miljun (RON 145 miljun) għal assi mhux garantiti (35).

(58)

Ir-Rapport ta' Winterhill ġie ppreżenta lil-Laqgħa tal-Kredituri fit-2 ta' Diċembru 2013 u approvat fl-4 ta' Diċembru 2013. Għall-ewwel, AAAS xeħtet dubju fuq l-evalwazzjoni li kienet tinsab fir-Rapport ta' Winterhill u ppreżentat ilment kontra d-deċiżjoni tal-Laqgħa tal-Kredituri li approvatu. Konsegwentement, il-Qorti approvat kontroll doppju tar-rapport ta' valwazzjoni u, finalment, ċaħdet il-kontestazzjoni ta' AAAS, filwaqt li nnotat ukoll li AAAS ma rabtitx il-vot tagħha dwar il-Pjan mar-riżultat ta' rieżaminazzjoni ta' dak ir-rapport (36).

(59)

Fuq il-bażi tar-Rapport ta' Winterhill, f'Lulju 2013, ir-riċeventi mqabbda mill-Qorti ħejjew il-Pjan ta' Riorganizzazzjoni ta' Oltchim. L-iskop ewlieni tal-Pjan kien li jsib investitur ġdid li jieħu f'idejn l-assi/in-negozju ta' Oltchim. Il-bejgħ jista' jsir skont kwalunkwe waħda mit-tliet għażliet proposti:

(60)

Oltchim SPV kienet tkun kumpanija ħielsa minn djun. Oltchim SPV kienet tieħu f'idejn l-parti funzjonali ta' Oltchim SA bħala negozju avvjat. (37) Oltchim SPV għandha tkun 100 % proprjetà ta' Oltchim SA u jkollha l-għan li tinbiegħ lil investitur f'temp ta' sena sa tliet snin. Il-prezz għall-bejgħ tal-ishma ta' Oltchim SPV kien stmat għal EUR 306 miljun u l-prezz minimu tal-bidu kellu jiġi stabbilit f'livell ogħla minn dak l-ammont partikolari. Dan il-prezz ġie stmat b'referenza għall-MV ta' EUR 293,7 miljun stabbilit fir-Rapport ta' Winterhill (38).

(61)

Peress li ċerti assi trasferiti lil Oltchim SPV kienu ipotekati lil uħud mill-kredituri ta' Oltchim SA, l-oġġetti tal-garanzija tagħhom ikun sostitwit mal-ishma maħruġa minn Oltchim SPV b'mod proporzjonat għall-ammonti tal-garanzija tagħhom. B'hekk, il-kredituri garantiti jkunu intitolati (fi żmien 10 ijiem wara l-konferma tal-pjan ta' riorganizzazzjoni mil-ġudikant fl-insolvenza) biex jirrikorru għat-tneħħija tal-garanziji eżistenti fuq l-assi wara l-ħlas sħiħ tal-prezz tal-ishma ta' Oltchim SPV.

(62)

Il-kredituri ta' Oltchim kellhom jitħallsu skont l-ammonti pprovduti fil-Pjan ta' Ħlas (ara Table 3 aktar 'il quddiem).

(63)

Il-kredituri ta' Oltchim setgħu jikkonvertu d-djun tagħhom f'ekwità (l-ishma ta' Oltchim SA) b'mod proporzjonat u skont l-ammonti pprovduti fil-Pjan ta' Ħlas (ara Table 3 aktar 'il quddiem); jew

(64)

Uħud mid-djun mal-Istat jitħallsu bi trasferiment tal-assi ta' Oltchim SA, jiġifieri l-art, il-binjiet, mingħajr ħlas.

(65)

Il-Pjan kien jipprevedi żewġ xenarji għall-kontinwazzjoni tal-attività ta' Oltchim, jiġifieri:

(66)

Il-Pjan speċifika l-perjodu ta' implimentazzjoni, jiġifieri tliet snin wara l-konferma tal-Pjan mill-imħallef. Matul dak il-perjodu, l-amministratur speċjali għandu jiżgura l-amministrazzjoni ta' Oltchim, taħt is-superviżjoni tar-riċevent imqabbad mill-Qorti.

(67)

Wara li l-appelli kollha ġew deċiżi, fid-9 ta' Jannar 2015 ir-riċevent imqabbad mill-Qorti lesta u bagħat lill-Qorti l-Lista finali ta' kredituri ta' Oltchim, li turi l-ammont, il-prijorità u l-istatus – garantit jew mhux garantit – ta' kull pretensjoni. Il-Lista kienet tinkludi ħames kategoriji ta' kredituri: (1) kredituri garantiti, (2) pretensjonijiet tas-salarji, (3) kredituri baġitarji, (4) kredituri mhux garantiti skont l-Artikolu 96 tal-liġi dwar l-insolvenza (l-hekk imsejħa “fornituri essenzjali”) u (5) kredituri mhux garantiti oħra, kif ippreżentati fit-Tabella 1 ta' hawn taħt:

Tabella 1

Lista ta' kredituri kif ippreżentata fit-tabella tal-pretensjonijiet

(68)

Id-djun pendenti ta' Oltchim mal-Istat u mal-intrapriżi tal-Istat (“SoEs”) kienu ta' madwar EUR 519-il miljun, li minnhom madwar EUR 264 miljun ma' AAAS, madwar EUR 232 miljun ma' diversi SoEs (li minnhom madwar EUR 145 miljun ma' Electrica), madwar EUR 19-il miljun ma' korpi nazzjonali u reġjonali (pereżempju madwar EUR 13-il miljun mal-Amministrazzjoni tal-Fondi Ambjentali) u madwar EUR 12-il miljun ma' CEC Bank li hu proprjetà tal-Istat.

Tabella 2

Il-kredituri pubbliċi ta' Oltchim

(69)

Il-kredituri li ġejjin kellhom l-akbar pretensjonijiet għal Oltchim: AAAS (madwar 35 % tad-dejn totali), Electrica (19 % tad-dejn totali), Erste Group Bank AG (10 % tad-dejn totali), MFC Commodities Gmbh (4,71 % tad-dejn totali), Banca Transilvania S.A. (4,63 % tad-dejn totali), CET Govora (3,96 % tad-dejn totali), CFR Marfa (3,34 % tad-dejn totali) u CEC Bank (1,63 % tad-dejn totali).

(70)

Ir-riċevent imqabbad mill-Qorti bagħat il-Pjan ta' Riorganizzazzjoni flimkien mal-Lista ta' Kredituri lill-Qorti fl-4 ta' Frar 2015. Fil-laqgħa tad-9 ta' Marzu 2015, il-Kredituri ddiskutew u mbagħad approvaw il-Pjan f'konformità mal-Artikolu 101 tal-liġi dwar l-insolvenza.

(71)

B'mod aktar konkret, skont il-Pjan approvat:

(72)

Skont il-Pjan ta' Ħlas ta' hawn fuq, se tkun tapplika l-kopertura tad-dejn li ġejja:

(73)

Għaldaqstant, il-pjan iwassal għal tħassir sostanzjali tad-dejn, b'mod partikolari fir-rigward tal-kredituri baġitarji kif stipulat hawn taħt fit-Tabelli 4 u 5.

Tabella 4

Djun għat-tħassir

Tabella 5

Djun pubbliċi għat-tħassir

(74)

Il-kredituri vvotaw fuq dan il-Pjan. Skont il-Minuti mil-laqgħa tal-Assemblea tal-Kredituri tad-9 ta' Marzu 2015 (kun af li l-kredituri pubbliċi u privati ewlenin u l-impjegati biss huma ppreżentati hawn taħt):

(75)

Il-Pjan ġie approvat għaliex kien jirrispetta l-kundizzjonijiet tal-liġi dwar l-insolvenza, jiġifieri:

(76)

Matul is-seduta tal-Qorti tal-25 ta' Marzu 2015, il-ġudikant fl-insolvenza talab biex jiġu pprovduti aktar kjarifiki dwar il-Pjan u ppospona s-seduta sat-22 ta' April 2015. Matul is-seduta tat-22 ta' April 2015, il-Qorti approvat il-Pjan billi approvat l-ewwel għażla biss, jiġifieri tħassir parzjali tad-dejn kif miftiehem mill-kredituri u l-ħolqien ta' entità ġdida (Oltchim SPV) u t-trasferiment tal-assi vijabbli kollha minn Oltchim SA għal din tal-aħħar. Fl-24 ta' Settembru 2015, il-Qorti tal-Appell ta' Pitești ċaħdet l-appelli ppreżentati minn ANAF (Agenția Națională de Administrare Fiscală) u minn Electrica Furnizare kontra s-sentenza li approvat il-Pjan ta' Riorganizzazzjoni. Permezz ta' din is-sentenza l-Pjan sar finali.

(77)

Matul il-proċedimenti ta' insolvenza, qabel l-approvazzjoni tal-Pjan ta' Riorganizzazzjoni, Oltchim implimentat sensiela ta' miżuri biex tnaqqas il-kostijiet tagħha, bħall-għoti ta' sensja lil 918-il impjegat f'Ġunju 2013 (kellhom jingħataw is-sensja 225 impjegat ieħor sa Novembru 2015). F'Ġunju 2014, Oltchim biddlet elettrolizzatur fil-faċilitajiet ewlenin tal-produzzjoni (għal valur totali ta' EUR 800 000). Biex tkompli ttejjeb l-EBITDA tagħha, Oltchim reġgħet fetħet l-impjant tal-osso-alkoħols fid-9 ta' Settembru 2014.

(78)

L-awtoritajiet Rumeni informaw (43) li Oltchim tejbet il-prestazzjoni ekonomika u finanzjarja tagħha. Il-fatturat tagħha fl-2015 żdied b'31 % meta mqabbel mal-2014, u b'59 % meta mqabbel mal-2013, bis-saħħa ta' tkabbir fil-bejgħ tal-prodotti ewlenin manifatturati (żieda ta' 33 % għal poljoli tal-polieter, żieda ta' 7 % għal prodotti tal-klor-alkali). L-EBITDA tjieb b'RON 109 miljun meta mqabbel mal-2013.

(79)

Minn Ġunju 2013 saru tentattivi ġodda għall-privatizzazzjoni tal-kumpanija iżda dawn reġgħu fallew aktar tard dik is-sena.

(80)

Skont il-Pjan kif miftiehem mill-kredituri u approvat mill-Qorti (ara Table 5 aktar 'il fuq), il-kredituri baġitarji u l-SoEs iridu jħassru sa total ta' EUR 408,5 miljun f'dejn (għal AAAS madwar EUR 216-il miljun, li jirrappreżenta 81,9 % mill-pretensjoni totali tagħha u EUR 174,3 miljun għall-SoEs).

(81)

L-hekk imsejħa fornituri essenzjali (jiġifieri CET Govora SA u l-Amministrazzjoni Nazzjonali tal-Ilma) kellhom iħassru EUR 21,2 miljun u EUR 2,2 miljun rispettivament, li jirrappreżentaw 70 % sa 71 % mill-pretensjonijiet totali tagħhom. Electrica kellha tħassar EUR 112-il miljun, li jirrappreżentaw 77,6 % mill-pretensjoni totali tagħha.

(82)

Minbarra l-ammonti li jikkorrispondu għat-tħassir tad-dejn għal diversi kredituri pubbliċi li jinsabu fit-Tabella 5, it-Tabella 6 ta' hawn taħt tirrifletti l-ammonti korrispondenti ta' djun li jridu jiġu rkuprati fix-xenarju ta' bejgħ kollox f'daqqa ta' Oltchim SPV previst fil-Pjan ta' riorganizzazzjoni hekk kif jirriżulta mit-tħassir massimu approvat.

Tabella 6

Kredituri pubbliċi (tħassir tad-dejn u rkupru tad-dejn skont il-Pjan)

(83)

Wara l-approvazzjoni tal-Pjan ta' Riorganizzazzjoni, diġà seħħ tħassir ta' djun sinifikanti. Fil-preżentazzjoni tagħha ta' Ottubru 2015, ir-Rumanija informat li fil-perjodu April-Ottubru- 2015 kienu tħassru madwar RON 2,358 biljun (EUR 518-il miljun) fi djun (44).

(84)

L-awtoritajiet Rumeni informaw ukoll li ntbagħtet offerta tal-bejgħ ta' Oltchim SPV lill-Kmamar tal-Kummerċ bilaterali kollha fir-Rumanija (Lulju 2015) u lil 30 Kamra tal-Kummerċ oħra madwar id-dinja (f'Settembru 2015). L-ewwel laqgħat ma' xerrejja potenzjali seħħew f'Settembru/Ottubru 2015.

(85)

Fit-8 ta' April 2016, il-Kummissjoni ddeċidiet li tiftaħ il-proċedura ta' investigazzjoni formali. Il-Kummissjoni qajmet dubji dwar tliet miżuri ta' appoġġ:

(86)

Fid-deċiżjoni tal-ftuħ, il-Kummissjoni kienet tal-fehma preliminari li l-miżuri deskritti hawn fuq kienu jinvolvu riżorsi tal-Istat u kienu imputabbli lill-Istat. Barra minn hekk, fid-dawl tal-improbabbiltà li kwalunkwe operatur privat razzjonali kien jipprovdi lil Oltchim b'dawn il-miżuri, il-Kummissjoni kienet tal-fehma preliminari wkoll li l-miżuri pprovdew lil Oltchim b'vantaġġ mhux xieraq; tali vantaġġ ikun selettiv, peress li Oltchim kienet l-uniku benefiċjarju.

(87)

Il-Kummissjoni nnotat ukoll li l-miżuri probabbilment kienu se jaffettwaw il-kummerċ bejn l-Istati Membri minħabba li Oltchim kienet f'kompetizzjoni ma' produtturi kimiċi oħra minn Stati Membri oħra kif ukoll mill-bqija tad-dinja. Il-miżuri ppermettew lil Oltchim tkompli topera b'tali mod li ma kellhiex taffaċċja, bħal kompetituri oħrajn, il-konsegwenzi li normalment isegwu mir-riżultati finanzjarji ħżiena tagħha.

(88)

Il-Kummissjoni esprimiet ukoll dubji dwar il-kompatibbiltà tal-miżuri, b'mod partikolari peress li l-awtoritajiet Rumeni ma pprovdew ebda raġuni possibbli għall-kompatibbiltà. Il-fehma preliminari tal-Kummissjoni kienet li Oltchim setgħet titqies bħala ditta f'diffikultà skont it-tifsira tal-Linji Gwida tal-2014 dwar l-għajnuna mill-Istat għas-salvataġġ u għar-ristrutturar ta' impriżi mhux finanzjarji f'diffikultà (“Linji Gwida tal-2014 dwar l-R&R”) (48), b'mod partikolari fid-dawl tal-proċedimenti ta' insolvenza mnedija fit-30 ta' Jannar 2013. Madankollu, il-kriterji għal għajnuna ta' salvataġġ jew ta' ristrutturar kompatibbli stabbiliti fil-Linji Gwida dwar l-R&R dehru li ma ġewx irrispettati mill-miżuri. B'mod partikolari, fin-nuqqas ta' pjan ta' ristrutturar notifikat (l-awtoritajiet Rumeni ma ddikjarawx l-eliġibbiltà tal-miżuri bħala għajnuna għar-ristrutturar), il-Kummissjoni ma setgħetx tevalwa l-komponenti tal-Pjan ta' Riorganizzazzjoni, inklużi l-miżuri ta' investiment u ta' modernizzazzjoni, u lanqas ma setgħet tevalwa jekk il-miżuri jirrestawrawx il-vijabbiltà fit-tul u jinżammux għal minimu, b'tali mod li jkunu evitati distorsjonijiet żejda tal-kompetizzjoni.

(89)

Abbażi ta' dak li ntqal hawn fuq, il-fehma preliminari tal-Kummissjoni kienet li l-miżuri dehru li jikkostitwixxu għajnuna mill-Istat skont it-tifsira tal-Artikolu 107(1) TFUE. Barra minn hekk, minħabba li l-miżuri kienu ngħataw bi ksur tal-obbligi ta' notifika u ta' sospensjoni stabbiliti fl-Artikolu 108(3) TFUE, il-Kummissjoni nnotat li huma kienu jidhru li jikkostitwixxu għajnuna illegali mill-Istat. Fin-nuqqas ta' notifika tal-pjan ta' ristrutturar lill-Kummissjoni, tali miżuri ma setgħux jiġu ddikjarati kompatibbli mas-suq intern.

(90)

Fil-kummenti tagħha dwar id-deċiżjoni tal-ftuħ tal-Kummissjoni, ir-Rumanija tgħid numru ta' osservazzjonijiet relatati mat-tliet Miżuri deskritti hawn fuq.

(91)

Ir-Rumanija tiddikjara li fil-perjodu Settembru 2012 – Jannar 2013, AAAS ġabet ruħha bħal kreditur privat u n-nuqqas ta' infurzar minn AAAS tal-pretensjonijiet kien ġustifikat għalkollox f'dan il-perjodu qasir ta' 5 xhur kemm minħabba limitazzjonijiet legali kif ukoll de facto:

(92)

Il-limitazzjonijiet legali huma relatati mal-effetti tal-hekk imsejħa proċedura ta' amministrazzjoni speċjali (Artikolu 16 paragrafu 5(c) tal-liġi tar-Rumanija Nru 137/2002) li skont din il-kredituri tat-taxxa u tal-kontribuzzjonijiet ma jistgħux jeżegwixxi d-djun tagħhom sakemm il-kumpanija tkun imħejjija għall-privatizzazzjoni. Dan allegatament ipprevjena lil AAAS milli titlob l-eżekuzzjoni immedjata tad-dejn tagħha fil-kuntest tal-proċess ta' privatizzazzjoni miżmuma fis-seħħ mill-Ministeru tal-Ekonomija, tal-Kummerċ u tal-Ambjent Kummerċjali, anki wara li l-privatizzazzjoni falliet f'Settembru 2012. Ir-Rumanija targumenta wkoll li n-nuqqas ta' assi li jistgħu jinbiegħu u li ma ntużawx bħala kollateral għall-kredituri garantiti de facto llimita l-ħila ta' AAAS li tinfurza l-pretensjonijiet tagħha u jkun jispjega wkoll għaliex il-kredituri privati lanqas ma eżegwixxew it-talbiet tagħhom. F'dak ir-rigward, ir-Rumanija tressaq l-eżempju tal-bank privat Banca Comercială Română li ma attivatx il-proċess ta' eżekuzzjoni furzata u saħansitra tat finanzjament addizzjonali li b'kollox ammonta għal madwar EUR 1 miljun favur ir-rikummissjonar tat-taqsima tal-poljoli-polieter u ta' studju ta' konsulenza dwar l-opportunità ta' bidu mill-ġdid tal-attivitajiet ta' Oltchim.

(93)

Barra minn hekk, ir-Rumanija tgħid li n-nuqqas minn AAAS li titlob l-eżekuzzjoni immedjata tad-dejn tagħha kien motivat ukoll mill-ftuħ ta' proċess ta' notifika minn qabel lill-Kummissjoni Ewropea mir-Rumanija b'rabta ma' għajnuna għas-salvataġġ (għajnuna li mbagħad irriżulta li ma kinitx kompatibbli mal-“prinċipju ta' darba tal-aħħar” tal-Linji Gwida tal-2014 dwar l-R&R).

(94)

Ir-Rumanija tinnota li, fuq il-bażi tal-istudju ta' Raiffeisen, minkejja t-tnaqqis li kellu jsir b'rabta mal-obbligazzjonijiet ambjentali, AAAS kienet tirkupra 10 % minflok 12 % tad-dejn tagħha fix-xenarju ta' likwidazzjoni għaliex il-pretensjoni ta' AAAS għal Oltchim kienet kważi 1,2 darbiet ogħla dik ikkunsidrata minn Raiffeisen fl-2011 meta din kellha tqabbel il-valuri tas-suq u tal-likwidazzjoni ta' Oltchim. Fil-preżentazzjoni tagħha ta' Mejju 2018, ir-Rumanija tmur saħansitra oltre, billi tiddikjara li f'każ ta' falliment, l-obbligazzjonijiet ambjentali li kellhom jitħallsu bi prijorità fil-każ ta' Oltchim kienu jaqbżu r-rikavati totali mistennija minn bejgħ furzat li jikkorrispondi għal xenarju ta' likwidazzjoni, u tikkonkludi li l-grad ta' rkupru tad-dejn ta' AAAS kien ikun żero.

(95)

Ir-Rumanija tgħid li AAAS ikkonċentrat fuq il-kisba ta' informazzjoni dettaljata dwar is-sitwazzjoni ta' Oltchim dak iż-żmien biex tkun tista' tieħu deċiżjoni dokumentata sew u li l-ftit xhur bejn il-falliment tal-privatizzazzjoni u d-dħul fl-insolvenza kienu aċċettabbli bħala perjodu ta' riflessjoni.

(96)

Finalment, ir-Rumanija tinnota li AAAS kienet qed titlob l-imgħax mingħand Oltchim fil-livell tas-suq sakemm jitlestew il-proċedimenti ta' insolvenza. Skont ir-Rumanija, din hi prova li l-eżekuzzjoni mhux immedjata tal-pretensjonijiet tagħha ma tikkostitwixxix għajnuna mill-Istat, li r-Rumanija tiddikjara li hi allinjata mal-approċċ segwit fid-deċiżjoni tal-2012 tal-Kummissjoni fil-paragrafi 98 u dawk sussegwenti. Ir-Rumanija tgħid ukoll li l-uniku dejn akkumulat ulterjuri jirriżulta mill-imgħax fuq dejn diġà eżistenti, li hu ta' importanza minuri f'każ li l-irkupru tad-dejn ewlieni jkun totalment mhux realistiku qabel kollox.

(97)

Fil-fehma tar-Rumanija, meta ddeċidew li jkomplu l-provvisti u jimmodifikaw b'mod favorevoli l-kundizzjonijiet tan-negozjar, CET Govora u Salrom “ġabu ruħhom bħala kredituri privati dment li dawn kienu jiggarantixxu d-dejn maħluq ġdid” u għaliex id-deċiżjonijiet tagħhom li jfornu l-materja prima meħtieġa għall-bidu mill-ġdid tal-attività ta' Oltchim kienu simili għal dawk meħuda minn ċerti kumpaniji bi sjieda privata. Din id-deċiżjoni allegatament issegwi mill-probabbiltà li jiġi rkuprat ammont akbar tad-dejn f'każ li l-attività terġa' tinbeda. Barra minn hekk, ir-Rumanija tiddikjara li, minħabba l-interdipendenza teknoloġika tagħhom rigward il-provvista ta' ilma industrijali u, rispettivament, demineralizzat lil Oltchim, Salrom (għad li b'mod anqas evidenti) u CET Govora aġixxew bħala fornituri essenzjali razzjonali. Peress li Oltchim kienet tammonta għal 14 % mill-fatturat ta' Salrom fl-2015 u għal 39 % fid-dħul ta' CET Govora, ma kien hemm ebda soluzzjoni prattika biex ix-xirjiet ta' Oltchim ta' fwar industrijali ma' CET Govora.

(98)

Rigward Salrom, ir-Rumanija tiddikjara wkoll li hi rċiviet ħlasijiet totali ta' aktar minn RON 33 miljun wara li Oltchim saret insolventi, filwaqt li rabtet kwalunkwe provvista ulterjuri lil Oltchim wara d-dħul f'solvenza minn Oltchim ma' ħlasijiet bil-quddiem, kundizzjoni li ġiet maqbula u rrispettat minn Oltchim wara n-negozjati.

(99)

Rigward il-provvista minn CET Govora, ir-Rumanija tiddikjara li l-prezz tal-bejgħ tal-elettriku u tal-fwar mitlub mingħand Oltchim hu konformi mas-suq u tħallas bis-sħiħ mill-1 ta' Frar 2013 sal-31 ta' Marzu 2016 (RON 476 miljun).

(100)

Ir-Rumanija tiddikjara li l-vot pożittiv ta' AAAS u tal-SoEs ikkonforma mal-Prinċipju ta' Kreditur f'Ekonomija tas-Suq (MECP) kif miġbur fil-qosor hawn taħt.

(101)

L-ewwel nett, ir-Rumanija ssostni li l-valur tax-xenarju ta' falliment ta' Oltchim hu negattiv. Biex issostni l-fehma tagħha, ir-Rumanija tikkwota l-valuri pprovduti fir-rapporti ta' evalwazzjoni minn Romcontrol ta' Frar 2009 (EUR -281 miljun) u, rispettivament, Diċembru 2010 (EUR -407 miljun). Barra minn hekk, tikkwota l-istima ta' Winterhill tal-irkupru fix-xenarju ta' likwidazzjoni li tammonta għal madwar EUR 108 miljun għal assi garantiti u għal EUR 32 miljun għall-assi ħielsa minn gravami (minn dawn tal-aħħar, EUR 22.2 miljun kienu jitnaqqsu bħala ħlasijiet għas-sensja għall-ħaddiema mogħtija s-sensja).

(102)

B'referenza għall-premessa 120 tad-Deċiżjoni tal-Ftuħ, ir-Rumanija żżid li l-obbligazzjonijiet ambjentali koperti fir-rapport ta' Winterhill huma relatati biss mat-tindif u mat-tħejjija tal-assi għall-bejgħ u ma jinkludux l-għeluq tar-repożitorju tal-iskart mhux perikoluż u l-miżbla tal-iskart perikoluż kif ukoll id-dekummissjonar u d-demolizzjoni tat-tagħmir u tal-bini, u r-restawr tal-art u tal-ambjent għall-istat inizjali. L-obbligazzjonijiet ambjentali stmati minn Oltchim jammontaw għal madwar EUR 464 miljun u, għalhekk, ikunu jisbqu r-rikavati stmati minn Winterhill għall-kredituri mhux garantiti fil-proċedura ta' likwidazzjoni.

(103)

B'hekk, il-probabbiltà li jinkiseb kwalunkwe pagament minn AAAS u mill-SoEs mingħand Oltchim kienet konsiderevolment akbar fil-proċedura ta' riorganizzazzjoni.

(104)

It-tieni, ir-Rumanija tgħid li rkupru tad-dejn bit-tnedija, min-naħa ta' AAAS u ta' Electrica, tal-proċedura ta' falliment ta' Oltchim ma kienx possibbli, għaliex ir-rekwiżiti tal-Artikolu 1(2) tal-liġi dwar l-insolvenza f'dan is-sens ma kinux issodisfati.

(105)

It-tielet, ir-Rumanija tgħid li għad li l-istudju dwar l-MECP ta' AAAS tħejja qabel ma l-pjan ta' riorganizzazzjoni ġie approvat fil-laqgħa tal-kredituri tad-9 ta' Marzu 2015, l-istudju mwettaq minn AAAS hu adegwat u suffiċjenti biex id-deċiżjoni ta' AAAS ta' approvazzjoni tal-pjan ta' riorganizzazzjoni titqies bħala simili għal dik ta' kreditur privat. Iċ-ċaħda tal-pjan kien iwassal għall-falliment, li kien jimplika ebda rkupru ta' djun, fid-dawl tas-sehem baxx ta' dejn ta' AAAS li kien garantit u l-valur għoli tal-obbligazzjonijiet ambjentali fil-każ ta' xogħlijiet ekoloġiċi fuq l-art għall-ekoloġizzazzjoni tal-art. B'hekk, l-istudju mwettaq minn AAAS f'dan ir-rigward wera li AAAS kienet tirkupra aktar fil-każ tal-approvazzjoni tal-pjan ta' riorganizzazzjoni milli fil-likwidazzjoni ta' Oltchim meta l-obbligazzjonijiet ambjentali japplikaw bi prijorità fuq il-bażi tal-Ordinanza Nru 195/2005.

(106)

Ir-Rumanija tqis li l-irkupru ta' 20 % tad-dejn ta' AAAS wara l-implimentazzjoni tal-pjan ta' riorganizzazzjoni kien stima kredibbli fiż-żmien tal-votazzjoni.

(107)

Ir-raba', ir-Rumanija enfasizzat li t-talba għaċ-ċaħda tal-pjan ta' riorganizzazzjoni mit-tliet kredituri ġiet rifjutata mill-qorti nazzjonali permezz tad-Deċiżjoni Nru 892 tat-22 ta' April 2015. Din is-sentenza kkonfermat li l-pjan ta' riorganizzazzjoni kien iservi l-interess tal-kreditur aħjar mix-xenarju ta' falliment, b'mod partikolari fuq il-bażi tal-istima ta' ammont ta' obbligazzjonijiet ambjentali superjuri ta' EUR 464 miljun, li jisbqu b'mod sinifikanti l-istima ta' Winterhill ta' rkupru fix-xenarju ta' likwidazzjoni ta' madwar EUR 108 miljun għal assi garantiti u EUR 32 miljun għall-assi ħielsa minn gravami.

(108)

Ir-Rumanija tgħid li t-taxxa u l-kredituri mhux garantiti u l-intrapriżi l-oħra tal-Istat bħal AAAS u Electrica aġixxew bħala operaturi tas-suq meta għażlu l-pjan ta' riorganizzazzjoni minflok il-likwidazzjoni ta' Oltchim: dawn aġixxew bħall-kumpaniji privati, bħal Erste Group Bank AG u Bulrom Gas Impex SRL, li kellhom kemm dejn garantit kif ukoll mhux garantit, u li wkoll kienu approvaw il-pjan. Ir-Rumanija tgħid wkoll li qabel ma nbdew il-proċedimenti ta' insolvenza, Salrom daħħlet il-kundizzjoni li tiġi stabbilita garanzija fuq il-proprjetà immobiljari biex issir kreditur garantit.

(109)

Il-ħames, fil-preżentazzjoni tagħha, ir-Rumanija indikat li Electrica ħadet kull azzjoni permessa mil-liġi biex tirkupra d-dejn tagħha fil-proċedimenti ta' insolvenza, b'tali mod li tevita dipendenza fuq pjan ta' riorganizzazzjoni. Madankollu, dawn l-azzjonijiet ġew miċħuda mill-qrati Rumeni. Għaldaqstant, il-vot għall-Pjan kien l-aħħar għażla li fadal, u dan juri li Electrica aġixxiet bħal MEO. Il-vot affermattiv espress dwar il-pjan ta' riorganizzazzjoni kien l-unika għażla għall-irkupru tad-djun disponibbli għall-kredituri għal Electrica li kienet reġistrata kemm bħala kreditur garantit kif ukoll mhux garantit.

(110)

Ir-Rumanija tiddikjara li operatur/kreditur f'ekonomija tas-suq kien jirrikorri għall-pjan ta' riorganizzazzjoni peress li dan hu l-modalità li, normalment, toffri l-ogħla possibbiltajiet ta' rkupru tad-djun fl-insolvenzi Rumeni u f'dawk magħrufa minn Electrica. Ir-Rumanija tisħaq li r-riċeventi uffiċjali inkarigati mit-tfassil tal-pjan għandhom obbligu legali li jimmassimizzaw l-assi tad-debitur u jistgħu jinżammu personalment responsabbli f'każ li ma jiksbux l-aqwa riżultat għall-kredituri.

(111)

Ir-Rumanija spjegat ukoll li r-rapport korroborat mal-Pjan kien jindika b'mod plawżibbli li l-unika possibbiltà potenzjali għal Electrica biex tirkupra parti mid-dejn dovut lilha kienet permezz tar-riorganizzazzjoni. Fil-fehma tar-Rumanija, mhuwiex raġonevoli li jiġi ddikjarat li Electrica missha ġarrbet l-ispejjeż għoljin ta' studju separat biex tikkonferma l-aspetti ddikjarati minn professjonisti magħrufa sew, ikkonfermati mill-qrati nazzjonali u indikati mill-esperjenza ekonomika: il-kostijiet relatati mal-issodisfar tal-obbligazzjonijiet ambjentali ta' Oltchim fil-proċedimenti ta' falliment kienu jagħmluha anqas probabbli, jekk mhux saħansitra impossibbli, li Electrica tirkupra kwalunkwe ammont tal-pretensjonijiet tagħha kontra Oltchim.

(112)

Bħala paragun, l-irkupru potenzjali ta' RON 160 miljun għal Electrica offrut mill-Pjan ta' riorganizzazzjoni, anki jekk hu assoċjat ma' perjodu ta' żmien itwal u ma' ċerti riskji, ċertament kien is-soluzzjoni preferibbli, kif muri wkoll mill-azzjonijiet ta' kredituri privati oħra, bħal Erste Group Bank AG.

(113)

Ir-Rumanija tiddikjara li l-vot ta' Salrom u ta' CET Govora kontra l-pjan ta' riorganizzazzjoni kien iwassal għan-nuqqas ta' rkupru min-naħa tagħhom tas-sehem mhux garantit tagħhom tad-dejn; b'hekk, l-aħjar għażla għalihom kienet li japprovaw il-pjan ta' ristrutturar li fih il-kredituri garantiti jaċċettaw tħassir tad-djun bi skambju ma' rkupru parzjali għad-djun mhux garantiti tagħhom.

(114)

Erba' partijiet interessati kkummentaw dwar id-deċiżjoni tal-ftuħ – PCC (azzjonist ta' minoranza f'Oltchim), Electrica, il-konsorzju ta' amministraturi ġudizzjarji Rominsolv u BDO (inkarigati mill-amministrazzjoni ġudizzjarja ta' Oltchim) u parti interessata oħra li xtaqet tibqa' anonima.

(115)

Rominsolv u BDO huma r-riċeventi uffiċjali ta' Oltchim li abbozzaw il-Pjan ta' Riorganizzazzjoni, li aktar tard ġie approvat mill-kredituri ta' Oltchim. Dawn jissottomettu numru ta' argumenti favur il-pjan ta' riorganizzazzjoni.

(116)

Rigward il-Miżura 1, R/BDO jiddikjaraw li:

(117)

Rigward il-Miżura 2, R/BDO jiddikjaraw li:

(118)

Finalment, BDO tiddikjara li l-Kummissjoni injorat l-importanza tal-interdipendenza teknoloġija ta' 4 atturi kbar (Oltchim, CET Govora, Uzinele Sodice Govora u Salrom), li l-attivitajiet tagħhom huma teknoloġikament dipendenti, peress li kull wieħed minnhom hu fornitur u klijent tal-utilitajiet tal-ieħor, fl-istess ħin.

(119)

Rigward il-Miżura 3, R/BDO jiddikjaraw li:

(120)

Electrica tiddikjara n-nuqqas ta' imputabbiltà tad-deċiżjoni tagħha lill-Istat meta vvotat favur il-pjan. Hi tgħid li d-deċiżjoni li tivvota għall-Pjan ġiet delegata mil-Laqgħa tal-Azzjonisti lill-Maniġer Ġenerali ta' Electrica SA li kien l-unika persuna responsabbli għall-vot pożittiv għall-Pjan. Għaldaqstant, skont Electrica, il-Miżura 3 ma tistax tkun imputabbli lill-Istat.

(121)

Barra minn hekk, Electrica tiddikjara li, anki li kieku d-deċiżjoni setgħet titqies li ġejja minn poteri Statali, kienet deċiżjoni kummerċjali soda konformi mal-MECP. Essenzjalment, Electrica temmen li d-deċiżjoni tagħha li ssostni l-Pjan ma tatx xi vantaġġ lil Oltchim; fl-opinjoni tagħha dan hu kkonfermat minn imġiba simili minn kredituri privati oħra f'sitwazzjoni komparabbli għal dik ta' Electrica li wkoll ivvotaw favur il-Pjan.

(122)

Electrica tgħid ukoll li hi ma għamlitx studju ta' kreditur f'ekonomija tas-suq għaliex R/BDO kellhom obbligu legali li jagħtu pariri lill-kredituri dwar kif jimmassimizzaw ir-rikavati tagħhom.

(123)

Il-parti anonima ssostni d-dubji tal-Kummissjoni. Tispjega wkoll l-effetti distorsivi tal-miżuri ta' sostenn, b'mod partikolari fis-suq għall-prodotti tal-klor-alkali (soda kawstika). Il-parti anonima temmen li s-soluzzjoni proposta li tinbiegħ Oltchim ma twassal għal imkien: id-diversi tentattivi li fallew għall-bejgħ ta' Oltchim juru n-nuqqas ta' interess tas-suq f'Oltchim; ir-rapporti finanzjarji kontemporanji ta' Oltchim juru livell ta' profittabilità li hu baxx wisq biex in-negozju jkun sostenibbli fit-tul. F'dan il-kuntest, l-unika soluzzjoni vijabbli għal Oltchim tkun ristrutturar sħiħ tan-negozju fil-forma ta' għeluq tal-impjanti, ta' tnaqqis tal-kapaċità u possibilment ta' ħruġ mis-suq.

(124)

Il-parti anonima tindika wkoll li parti sinifikanti mill-profitti li għamlet Oltchim fl-2015 u dawk antiċipati għall-2016 kienu ġġenerati permezz tal-bejgħ tas-soda kawstika li l-prezz tal-bejgħ tagħha hu ċikliku u fl-2015 laħaq il-livelli tal-“quċċata taċ-ċikli”. Barra minn hekk, ir-rati operazzjonali ta' Oltchim huma eċċezzjonalment baxxi (użu ġenerali tal-kapaċità ta' 30 % imqabbel ma' livelli medji ta' 80 % fl-industrija tal-klor-alkali fl-UE hu baxx ħafna). Għaldaqstant, kwalunkwe xerrej potenzjali jkollu bżonn jagħmel investimenti ulterjuri sinifikanti ħafna, li jidħol f'kunflitt mal-EBITDA baxx ta' Oltchim.

(125)

Skont PCC, li kieku AAAS aġixxiet bħala kreditur privat, hu kien ikun favur l-eżekuzzjoni tat-talba tagħha għal Oltchim wara li falla l-proċess ta' privatizzazzjoni f'Settembru 2012: dan kien iwassal biex AAAS tirkupra 12 % tal-pretensjoni tagħha minflok ma tagħżel li tistenna rkupru inċert matul il-proċedura sħiħa ta' riorganizzazzjoni.

(126)

PCC jiddikjara li wara li l-privatizzazzjoni falliet f'Settembru 2012, kien saħansitra aktar ċar li ma hemm ebda interess tas-suq fix-xiri ta' Oltchim. L-istennija ta' ftit snin oħra għat-tiswir ta' xi pjan ta' ristrutturar u mbagħad ftit snin oħra għall-implimentazzjoni jixħtu f'riskju kbir il-valur tas-suq tal-assi ta'Oltchim. Maż-żmien, l-assi ta' Oltchim kienu qed isiru dejjem aktar skaduti u inutli.

(127)

PCC jissottometti li AAAS missha użat il-leġiżlazzjoni Rumena speċifika dwar l-irkupru tad-djun pubbliċi dovuti għall-Ministeru tal-Finanzi li jirriżultaw mill-garanziji statali (Ordinanza 29/2002) li tipprovdi li l-ftehimiet ta' rkupru li jittrasferixxu l-garanziji tal-gvern mill-Ministeru tal-Finanzi għal AAAS huma rikonoxxuti permezz tal-liġi bħala titoli eżekuttivi. Għaldaqstant, fil-fehma ta' PCC, kwalunkwe eżekuzzjoni ta' dawk it-titoli eżekuttivi setgħet titwettaq minn AAAS mingħajr ebda formalità addizzjonali. AAAS kellha għad-dispożizzjoni tagħha diversi metodi ta' infurzar għal dawk ir-riċevibbli kif previst mill-Ordinanza ta' Emerġenza tal-Gvern Nru 51/1998 dwar ir-realizzazzjoni tal-assi Statali.

(128)

Barra minn hekk, AAAS fil-kredituri Statali garantiti ma deherx li kellha bżonn it-tneħħija tas-sospensjoni tad-drittijiet ta' eżekuzzjoni tagħha fil-proċedura ta' insolvenza, għall-kuntrarju ta' tentattiv fallut minn Electrica biex tagħmel hekk. B'hekk, AAAS ma użatx l-istrumenti legali kollha għad-dispożizzjoni tagħha biex tindirizza n-nuqqas ta' ħlas mill-impriża.

(129)

PCC iqis li CET Govora u Salrom ma aġixxewx bħala operaturi f'ekonomija tas-suq fit-tkomplija tal-provvisti lil Oltchim minkejja n-nuqqas ta' ħlas tad-djun pendenti u li d-deċiżjonijiet tagħhom kienu imputabbli lill-Istat.

(130)

Għall-kuntrarju ta' Electrica u ta' Electrica Furnizare, CET Govora tassew kienet iddeċidiet li tkompli bil-provvista tal-fwar elettriku u industrijali lil Oltchim, għad li Oltchim ma kinitx ħallset id-dejn tagħha li kellha magħha u kontra l-oppożizzjoni tal-banek tagħha stess; deċiżjoni bħal din wasslet għall-insolvenza proprja ta' CET Govora fis-6 ta' Mejju 2016: PCC jindika li skont l-amministratur ġudizzjarju ta' CET Govora, CET Govora kienet qed tissussidja lil Oltchim.

(131)

PCC jargumenta li d-deċiżjoni ta' CET Govora li terġa' tibda l-provvista tagħha lil Oltchim wara l-falliment tal-privatizzazzjoni f'Settembru 2012 hi imputabbli lill-Istat. Fil-fehma ta' PCC, id-deċiżjoni ta' CET Govora li tkompli l-provvista lil Oltchim seħħet wara d-deċiżjonijiet relatati ta' sidha - il-Kunsill tal-Kontea ta' Vâlcea, filwaqt li n-nuqqas ta' ħila ta' Oltchim li tagħmel ħlasijiet kien magħruf sew. PCC jikkwota wkoll lit-trustee ta' CET Govora li sostna li “d-deċiżjoni li titwassal enerġija elettrika lil Oltchim ma kellha ebda motivazzjoni ekonomika valida u kienet politikament motivata u hi eżempju tajjeb ħafna ta' interferenza politika fil-ġestjoni tad-debitur […]”

(132)

Filwaqt li hu rikonoxxut li Oltchim kienet klijent importanti għal Salrom, PCC jargumenta li operatur f'ekonomija tas-suq ma kienx ikompli bil-provvisti lil Oltchim fid-dawl tas-sitwazzjoni finanzjarja ta' Oltchim; il-likwidazzjoni potenzjali ta' Oltchim kienet tħalli impatt fuq fergħa waħda biss ta' Salrom b'60 post tax-xogħol biss li kienu jkunu affettwati. Għaldaqstant, kwalunkwe kreditur privat f'sitwazzjoni simili bħal Salrom ma kienx jaċċetta l-akkumulazzjoni tad-djun, iżda minflok kien jaċċetta t-tnaqqis fil-fatturat tiegħu biex iżomm il-kumpanija fuq saqajha.

(133)

PCC jargumenta li d-deċiżjoni ta' Salrom li terġa' tibda l-provvista tagħha lil Oltchim wara l-falliment tal-privatizzazzjoni f'Settembru 2012 hi imputabbli lill-Istat li jikkontrolla Salrom; il-bord tad-diretturi ta' Salrom jiġi nominat mil-laqgħa ġenerali tal-azzjonisti f'kuntest fejn l-Istat Rumen hu d-detentur ta' maġġoranza (51 %) tal-ishma ta' Salrom u jinnomina r-rappreżentanti tal-Istat fil-bord tad-diretturi.

(134)

PCC jargumenta li, billi aċċettaw it-tħassir tad-dejn minflok ma eżegwixxew il-pretensjonijiet tagħhom, AAAS, CET Govora u Electrica ma ġabux ruħhom bħala kredituri f'ekonomija tas-suq.

(135)

PCC jiddikjara li l-Pjan ta' Riorganizzazzjoni approvat mill-kredituri hu nieqes mill-elementi ta' ristrutturar veru (51) u bażikament hu limitat għal ristrutturar tad-dejn u għal likwidazzjoni biss. PCC jiddikjara li pjan ta' riorganizzazzjoni mħejji mill-azzjonisti jista' jkun għażla aħjar iżda ma ġiex implimentat minkejja l-proposti tiegħu, peress li ma kienx approvat mill-awtoritajiet Rumeni.

(136)

Mingħajr miżuri ta' ristrutturar fit-tul tan-negozju prinċipali ta' Oltchim, ma hemm ebda possibbiltà li Oltchim tibqa' vijabbli u profittabbli.

(137)

Minn naħa, PCC jenfasizza li l-valur tas-suq stabbilit fl-2013 minn Winterhill Romania kien inċert ħafna u li operatur attent f'ekonomija tas-suq ma kienx iqisu korrett meta jiddetermina l-pożizzjoni tiegħu fil-Pjan ta' Riorganizzazzjoni sentejn wara f'April 2015.

(138)

Diversi tentattivi falluti passati għall-privatizzazzjoni ta' Oltchim fl-2001, fl-2003, fl-2006, fl-2007, fl-2008 u fl-2012 kienu indikazzjonijiet ċari, skont PCC, li ebda investitur ma jkun interessat jixtri l-ishma fil-privatizzazzjoni bil-ħolqien ta' SPV propost mill-amministraturi ġudizzjarji. PCC iżid li l-prezz stabbilit għall-privatizzazzjoni mhuwiex sostanzjat u ma jistax jitqies bħala bażi affidabbli għall-approvazzjoni tal-pjan. Fil-fehma ta' PCC, il-pjan hu biss mod kif jinżamm negozju mhux profittabbli ħaj u kif jiġi pospost falliment effettiv ta' Oltchim.

(139)

PCC jargumenta li hu ferm probabbli li l-prezz għal Oltchim kien jonqos bejn l-2013 u l-2015 peress li jkun impossibbli li jerġgħu jibdew jintużaw faċilitajiet li ma jkunux tħaddmu għal sentejn sħaħ. B'hekk, l-uniku valur tas-sit ta' Bradu jista' jkun l-art tiegħu, apparti l-obbligazzjonijiet ambjentali marbuta.

(140)

Fis-sostenn tiegħu, PCC jikkwota l-prezz offrut fil-proċess ta' privatizzazzjoni li ma rnexxiex fl-2012 minn individwu (is-Sur Diaconescu) ta' bejn wieħed u ieħor EUR 45 miljun, jiġifieri sitt darbiet anqas mill-prezz stmat għal Oltchim minn Winterhill. B'mod simili, rappreżentant ta' Chimcomplex li ppreżenta offerta fl-2016 għax-xiri tal-assi funzjonali ta' Oltchim - saħaq fl-2016 li l-valur ta' Oltchim hu ferm anqas mill-prezz mitlub permezz tal-Pjan ta' Riorganizzazzjoni.

(141)

PCC saħaq li d-deċiżjonijiet tal-kredituri pubbliċi seħħew f'kuntest li fih Oltchim baqgħet mhux profittabbli fin-nuqqas ta' pjan ta' ristrutturar reali; barra minn hekk, il-profitti reġistrati minn Oltchim kienu ġġenerati b'mod artifiċjali mit-tħassir tad-dejn u ma kinux jirrappreżentaw titjib fis-sitwazzjoni finanzjarja ta' Oltchim. Ir-riżultati pożittivi fir-rapporti finanzjarji jkunu sempliċiment riżultat ta' diversi metodi kontabilistiċi. Skont rapport indipendenti kkummissjonat mill-kumpanija […] f'isem PCC, Oltchim kien baqgħet tirreġistra telf kontinwament bejn l-1 ta' Jannar 2013 u t-30 ta' Ġunju 2016 wara li jiġu newtralizzati elementi eċċezzjonali (bħat-tħassir tad-dejn fl-2015) minħabba assi improduttivi bħall-unità petrokimika ta' Bradu, VCM u PVC. Dan ir-rapport jikkonkludi wkoll li l-valur tal-assi mhux kurrenti tanġibbli fil-31 ta' Diċembru 2015 li jirrappreżentaw aktar minn 84 % tal-assi ta' Oltchim għandu jkun ta' bejn EUR 14-il miljun u EUR 128 miljun skont il-bejgħ mistenni ta' Oltchim SPV bejn Diċembru 2013 u Diċembru 2014 kif ukoll fix-xenarju (A jew B) previst fil-Pjan ta' Riorganizzazzjoni mħejji mir-riċeventi mqabbda mill-Qorti (52), li hu ferm anqas mill-valur tal-likwidazzjoni stmat minn Winterhill (EUR 141 miljun).

(142)

Skont PCC, it-tqabbil tal-valur tas-suq ta' Oltchim stmat bil-valur tal-likwidazzjoni tagħha kien żbaljat għar-raġunijiet li ġejjin.

(143)

L-ewwel nett, kienu jeżistu alternattivi oħra, bħall-bejgħ kontinwu ta' Oltchim f'raggruppamenti ta' assi.

(144)

It-tieni, l-ammont tal-obbligazzjonijiet ambjentali kkalkolati minn Oltchim (EUR 463,7 miljun) fix-xenarju ta' likwidazzjoni jidher esaġerat biex isostni il-Pjan ta' Riorganizzazzjoni minflok il-likwidazzjoni ta' Oltchim, peress li dan ma jibbażax fuq rapporti esterni u indipendenti. Ma hemm ebda informazzjoni relatata mar-raġuni għaliex l-amministraturi ġudizzjarji ma talbux studju ġdid. Obbligazzjonijiet ambjentali bħal dawn stmati minn Oltchim fix-xenarju ta' likwidazzjoni kienu jittieħdu f'kunsiderazzjoni wkoll mix-xerrej potenzjali ta' Oltchim SPV fl-offerta tiegħu. Finalment, PCC jappoġġa l-fehma tal-Kummissjoni li fix-xenarju ta' likwidazzjoni, parti kbira mill-assi tista' tinxtara minn xerrej li qed iwettaq l-attivitajiet industrijali fis-sit ta' Oltchim, u b'hekk tiġi evitata d-demolizzjoni integrali tas-sit preżunta minn din l-istima. Għall-kuntrarju, PCC jisħaq fuq l-inċertezza marbuta mal-ammont tal-obbligazzjonijiet ambjentali li kien fadal f'Oltchim fil-Pjan ta' Riorganizzazzjoni tal-2015.

(145)

It-tielet, f'kuntest li fih pretensjonijiet ġodda wara d-dħul fil-proċedura ta' insolvenza minn Oltchim jiksbu status superjuri meta mqabbla mad-dejn preeżistenti, ċerti kredituri seta' kellhom l-interess li jitolbu d-dħul fil-fażi ta' likwidazzjoni ta' Oltchim minflok ma jistennew l-akkumulazzjoni ta' tali dejn ġdid li kienet tnaqqas il-possibbiltajiet ta' rkupru tagħhom. PCC jiddikjara wkoll li d-dejn imġarrab minn Oltchim wara li kienet daħlet fil-proċedura ta' insolvenza seta' ġie sottovalutat. Jekk dan hu minnu, dan għalhekk kien iwassal għal perspettivi mnaqqsa ta' rkupru u, għalhekk, kien iżid it-tħassir tad-dejn għall-kredituri fix-xenarju tal-Pjan ta' Riorganizzazzjoni.

(146)

Barra minn hekk, PCC jiddikjara li l-kredituri tal-Istat misshom qiesu wkoll id-durata tal-fażi ta' riorganizzazzjoni meta mqabbla mad-durata tal-proċedimenti ta' falliment. It-tħejjija ta' pjan ta' ristrutturar vijabbli u l-implimentazzjoni ta' dan jieħdu ferm aktar mil-likwidazzjoni ta' Oltchim permezz ta' bejgħ immedjat tal-assi.

(147)

Barra minn hekk, il-kredituri tal-Istat misshom sfruttaw is-sitwazzjoni tagħhom.

(148)

Finalment, PCC indika li għad li kien hemm xi kredituri privati f'sitwazzjoni simili bħall-Istat li vvotaw favur il-Pjan ta' Riorganizzazzjoni, ikun żbaljat li wieħed jifhem li l-kredituri tal-Istat li jinkludu lil AAAS kienu f'sitwazzjoni simili għal operaturi prudenti fis-suq minħabba l-vot pożittiv ta' wħud mill-kredituri privati għall-Pjan: għall-kuntrarju ta' dawn imsemmija l-aħħar li għandhom kemm dejn garantit kif ukoll mhux garantit, tabilħaqq kważi d-dejn kollu ta' AAAS ma kienx garantit; barra minn hekk, dawk il-kredituri privati kienu jafu li l-Istat Rumen kien se jieħu l-miżuri u l-passi neċessarji kollha biex jiżgura s-sopravivenza ta' Oltchim akkost ta' kollox u, għalhekk, iddeċidew li “jissieħbu” mal-Istat f'dawk l-isforzi.

(149)

Hi l-opinjoni ta' PCC li l-Miżura 3 hi imputabbli lill-Istat peress li l-pjan ta' ristrutturar ma setax jiġi approvat mingħajr il-kunsens tal-kredituri tal-Istat li kellhom il-maġġoranza tal-voti (aktar minn 50 %) fil-maġġoranza tal-kategoriji tal-kredituri: tabilħaqq, l-Istat kien jikkontrolla d-deċiżjoni f'kull kategorija tal-kredituri ħlief fil-pretensjonijiet garantiti u fil-kategorija tal-impjegati. Għalhekk, il-kredituri privati li approvaw il-Pjan ta' Riorganizzazzjoni aktar kienu qed jaġixxu bħala segwaċi tad-deċiżjoni tal-Istat milli bħala promoturi ta' Pjan ta' Riorganizzazzjoni bħal dan. PCC jiddikjara wkoll li hu “konxju li hemm kredituri privati li milli jidher adottaw l-istess approċċ bħall-Istat (jiġifieri wkoll ivvotaw favur il-pjan minkejja li milli jidher ma kinux jaqblu miegħu, peress li kellhom tħassir kbir tad-dejn).” Madankollu, PCC hu tal-fehma li “hu l-Istat li ħoloq din il-“prattika tas-suq” u mhux bil-kontra (l-Istat li jsegwi t-tendenza). Dan għaliex hu kien jikkontrolla lil Oltchim qabel l-insolvenza, kien jikkontrolla l-vot dwar il-[P]jan ta' [R]iorganizzazzjoni, u għaliex kien ovvju għall-kredituri l-oħra li l-Istat kien se jieħu l-miżuri kollha biex jiżgura s-sopravivenza ta' Oltchim akkost ta' kollox.”

(150)

Ir-Rumanija tqis li AAAS aġixxiet bħala kreditur privat “legalment limitat”, billi kkalkolat l-interessi sakemm Oltchim tidħol fil-proċedura ta' insolvenza u tiċħad l-allegazzjoni ta' PCC rigward in-nuqqas ta' azzjoni min-naħa ta' AAAS għall-eżekuzzjoni tal-pretensjonijiet tagħha. Tabilħaqq, ir-Rumanija tinsisti li l-Memorandum ġie propost mill-Ministeri tal-Finanzi Pubbliċi u l-Ekonomija, tal-Kummerċ u tal-Ambjent kif ukoll mill-OPSPI. Rigward il-limitazzjonijiet de facto, ir-Rumanija tispjega li AAAS ma setgħetx taqbad kontijiet tal-bank (jiġifieri tissekwestrahom) peress li dawn tal-aħħar diġà kienu maqbuda minn Electrica fil-passat.

(151)

Ir-Rumanija tikkritika il-loġika tal-argument ta' PCC li AAAS missha talbet l-eżekuzzjoni tal-pretensjoni tagħha: f'ċirkustanzi bħal dawn, Oltchim imbagħad kien ikollha tibda proċedura ta' insolvenza. Dik is-sitwazzjoni minnha nfisha kienet tipprekludi lil AAAS minn kwalunkwe rkupru skont proċedura bħal din kif iddikjara PCC.

(152)

Ir-Rumanija tikkwalifika l-opinjoni ta' PCC fejn dan iddikjara li AAAS missha ssekwestrat il-beni u l-assi ta' Oltchim bħala irrealistika minħabba li l-kredituri privati ma applikawx dan.

(153)

F'dak li għandu x'jaqsam ma' CET Govora u ma' Salrom, ir-Rumanija tiddikjara li wara l-insolvenza, l-obbligazzjonijiet kurrenti kienu qed jitħallsu mingħajr ebda dewmien minn Oltchim.

(154)

Fil-fehma tar-Rumanija, il-kumpaniji pubbliċi kienu jaġixxu bħala kumpaniji privati, bħal Bulrom Gas Impex (fornitur lokali ta' Oltchim) u, b'hekk, l-imġiba tagħhom kienet konformi mat-test tal-kreditur privat u tax-xerrej privat.

(155)

L-ewwel nett, ir-Rumanija tiddikjara li s-soluzzjoni msemmija minn PCC fil-preżentazzjoni tiegħu li jitfassal pjan ta' riorganizzazzjoni ġestit mill-azzjonisti ma setgħetx tibqa' tiġi applikata skont il-liġi dwar l-insolvenza, wara t-tnedija tal-proċedura ta' riorganizzazzjoni ġudizzjarja; skont ir-Rumanija, il-proċess ta' riorganizzazzjoni propost minn PCC kien jiffavorixxi lill-azzjonisti għad-detriment tal-kredituri u, b'hekk, ma kienx jiġi approvat minn dawn tal-aħħar.

(156)

Ir-Rumanija tikkontesta l-viżjoni ta' PCC tas-sitwazzjoni finanzjarja ta' Oltchim bħala “anqas mill-istandards aċċettabbli […] peress li kienet għadha qed tiġġenera t-telf” u tisħaq li Oltchim kienet tikklassifika fit-63 post minn 100 fil-klassifikazzjoni tal-aktar kumpaniji profittabbli fix-Xlokk tal-Ewropa mwettqa minn SeeNews (54).

(157)

Rigward il-valwazzjoni tal-assi ta' Oltchim imwettqa minn […] u komunikata minn PCC, ir-Rumanija ma tikkontradixxix l-aġġustament ta' normalizzazzjoni ta' […] b'rabta mat-tħassir tad-dejn, iżda tirrifjuta b'mod partikolari l-użu tal-metodoloġija tal-fluss tal-flus skontat (DCF) għall-fini ta' valwazzjoni tal-assi ta' Oltchim. Ir-Rumanija tirreferi għall-materjali ta' taħriġ mill-universitajiet ta' Harvard u ta' Stern b'sostenn tal-fatt li l-metodoloġija tad-DCF hi mmirata lejn il-valwazzjoni tal-kumpaniji u għalhekk mhijiex adattata għall-valwazzjoni tal-assi.

(158)

Ir-Rumanija tirrifjuta wkoll l-idea sostnuta minn PCC li l-imġiba ta' kredituri privati kienet influwenzata minn AAAS peress li tal-anqas tnejn mill-banek firmatarji (jiġifieri Erste Bank AG u Banca Transilvania) huma istituzzjonijiet ferm stabbiliti, indipendenti u globali.

(159)

Ir-Rumanija tisħaq li l-kredituri privati essenzjalment huma dawk li kellhom id-deċiżjoni ewlenija rigward il-Pjan ta' Riorganizzazzjoni ta' Oltchim, b'mod partikolari, peress li kienu jirrappreżentaw 61,5 % mill-kredituri garantiti li kellhom rwol deċiżiv billi japprovaw tħassir parzjali, indispensabbli għall-approvazzjoni tal-pjan minn kull kategorija.

(160)

Ir-Rumanija tgħid li l-aspettattivi ta' rkupru għall-entitajiet pubbliċi skont il-Pjan ta' Riorganizzazzjoni propost mill-amministratur ġudizzjarju kienu jammontaw għal RON 500 miljun, jiġifieri 7 darbiet ogħla minn irkupru potenzjali ta' RON 72 miljun permezz tal-proċedura ta' falliment.

(161)

Barra minn hekk, skont ir-Rumanija, AAAS kienet b'mod partikolari kapaċi tirkupra aktar minn 18 % mit-total tar-riċevibbli tagħha fil-pjan ta' ristrutturar meta mqabbla ma' 12 % biss fil-likwidazzjoni fuq il-bażi tal-istudju ta' Raiffeisen.

(162)

Ir-Rumanija tiddikjara wkoll li skont l-opinjoni tal-amministraturi ġudizzjarji ta' Oltchim, fil-każ ta' falliment, l-evitar jew is-sottovalutazzjoni tal-kostijiet ambjentali jkunu soġġetti għal piena kriminali skont il-liġi tar-Rumanija.

(163)

Ir-Rumanija targumenta (55), li r-regoli dwar il-votazzjoni jimplikaw li l-Pjan ta' Riorganizzazzjoni ma setax jiġi adottat mingħajr l-approvazzjoni tal-kredituri garantiti bħala kategorija żvantaġġata fuq il-bażi tal-liġi. Għaldaqstant, dawn huma l-kredituri privati, li kellhom maġġoranza fil-kategorija ta' selliefa garantiti, li nedew u awtorizzaw l-adozzjoni tal-pjan; għaldaqstant, dawn ma aġixxewx bħala sempliċi segwaċi tal-kredituri tal-Istat kif iddikjarat minn PCC ir-Rumanija speċifikat (56) li l-kredituri garantiti kienu kategorija żvantaġġata. B'hekk, f'każ li kieku rrifjutaw il-pjan, il-kundizzjoni stabbilita fl-Artikolu 101(2)(c) tal-liġi dwar l-insolvenza ma kinitx tkun issodisfata, u kienet tipprevjeni lill-kategoriji l-oħra milli jadottaw il-Pjan.

(164)

Ir-Rumanija tisħaq ukoll fuq id-differenza bejn it-tentattivi passati ta' privatizzazzjoni li fallew u l-proċess immexxi fl-2012 li kien ibbażat fuq il-bejgħ ta' assi ta' Oltchim trasferit għal SPV, jiġifieri li x-xerrej ma kienx jixtri l-karta bilanċjali sħiħa ta' Oltchim li tinkludi l-obbligazzjonijiet tagħha, iżda l-assi tagħha biss.

(165)

Ir-Rumanija tiddikjara li l-valur tad-djun kurrenti qed jonqos minħabba l-ġenerazzjoni ta' EBITDA pożittiv minn Oltchim.

(166)

Barra dan, ir-Rumanija tikkontesta l-fehma tal-[parti anonima] li tiddikjara li Oltchim tkun “strutturalment improfittabbli”: Id-diffikultajiet ta' Oltchim aktar huma kkawżati primarjament minn deċiżjonijiet maniġerjali ħżiena.

(167)

Fil-preżentazzjoni tagħha datata s-16 ta' Mejju 2018, l-awtoritajiet Rumeni enfasizzaw l-elementi li ġejjin, minbarra dan ta' hawn fuq.

(168)

L-ewwel nett, ma ngħata ebda vantaġġ mill-kredituri tal-Istat lil Oltchim għaliex dawn setgħu jitqiesu li qed jaġixxu pari passu flimkien mal-kredituri privati fil-kategoriji kollha tal-kredituri garantiti, tal-kredituri baġitarji, tal-fornituri essenzjali u tal-kredituri mhux garantiti.

(169)

B'mod partikolari, maġġoranza tal-kredituri garantiti vvotat għall-Pjan għaliex kienet konvinta li ma kinitx se tikseb ammont li jkopri bis-sħiħ il-pretensjonijiet proprji tagħhom fix-xenarju ta' likwidazzjoni. Is-sempliċi fatt li AAAS kellha pretensjonijiet kemm fil-kategoriji garantiti kif ukoll f'dawk baġitarji ma kienx jaffettwa din l-osservazzjoni tal-pari passu peress li AAAS setgħet tistenna biss li tirċievi aktar fil-Pjan milli fix-xenarju ta' likwidazzjoni.

(170)

Il-fatt li l-kredituri garantiti vvotaw favur il-Pjan u aċċettaw tħassir fil-Pjan kien jimplika li l-pretensjonijiet tal-kredituri baġitarji kienu inutli fix-xenarju ta' likwidazzjoni. B'mod partikolari, biex jiġi żgurat vot pożittiv ta' dawn tal-aħħar għall-Pjan, il-kredituri garantiti aċċettaw li jillimitaw is-sehem tar-rikavati tagħhom (billi qablu dwar tħassir de facto tal-pretensjonijiet tagħhom ta' 20 % sa 27 %) favur il-kategoriji inferjuri tagħhom li ma kienu jirċievu xejn fil-każ ta' likwidazzjoni.

(171)

Il-vot pożittiv ta' maġġoranza tal-kredituri mhux garantiti (li 40,5 % tal-pretensjonijiet tagħhom kienu ta' Electrica) hu prova oħra tal-fiduċja tagħhom fil-pjan, għad li l-vot tagħhom kien ta' sinifikat limitat peress li ma setgħux jistennew xi pretensjoni fix-xenarju ta' likwidazzjoni u lanqas f'dak tal-Pjan ta' Riorganizzazzjoni.

(172)

It-tieni, l-awtoritajiet Rumeni li ngħataw l-opportunità mill-Kummissjoni biex jikkummentaw dwar abbozz tat-test tal-MEO mħejji mill-Kummissjoni mill-perspettiva ta' fornituri garantiti, baġitarji u essenzjali u tal-kredituri mhux garantiti fuq il-bażi tal-evidenza kontemporanja disponibbli (li l-verżjoni finali tagħha hi fl-Anness I għal din id-deċiżjoni) issottomettew osservazzjonijiet differenti f'dak ir-rapport. B'mod partikolari, l-awtoritajiet Rumeni rrelativizzaw id-differenza bejn il-bejgħ ta' Oltchim SPV previst fil-Pjan ta' Riorganizzazzjoni u l-bejgħ in situ meqjus mill-Kummissjoni bħala wieħed mit-tliet xenarji possibbli ta' likwidazzjoni. Ir-Rumanija tisħaq li x-xenarju ta' likwidazzjoni ma setax ikun mistenni li jikseb rikavati akbar mill-Pjan ta' Riorganizzazzjoni. Finalment, ir-Rumanija ssottomettiet kummenti tekniċi differenti dwar il-mod li bih kreditur f'ekonomija tas-suq kien jistma r-rikavati u l-kostijiet kemm fil-Pjan ta' Riorganizzazzjoni kif ukoll fix-xenarju ta' likwidazzjoni, ħlief l-obbligazzjonijiet ambjentali li r-Rumanija tikkontesta n-newtralizzazzjoni tagħhom.

(173)

It-tielet, b'mod ġenerali, l-għażla li għamlu l-kredituri, jiġifieri li jivvotaw favur il-Pjan, kienet tibbenefikahom b'mod ovvju peress li r-rikavati miksuba mill-bejgħ permezz ta' raggruppamenti ta' assi operazzjonali – għad li kienu jirrappreżentaw 57 % - kienu jġibu ħafna aktar vantaġġi mix-xenarju medju f'każ ta' falliment. Minbarra dan li ġie ddikjarat hawn fuq, l-ammonti addizzjonali kellhom jinkisbu mill-bejgħ tal-43 % tal-assi li jifdal u, bħala riżultat ta' dan, il-benefiċċju tagħhom ikun superjuri fil-proċedimenti ta' riorganizzazzjoni. Barra minn hekk, hu previst li Oltchim ikollha tħallas madwar tmien miljun euro mid-dejn kurrenti tagħha matul l-ewwel nofs tal-2018, li jkun ifisser anqas dejn kurrenti u distribuzzjoni akbar lill-kredituri bħala parti mill-proċedimenti ta' riorganizzazzjoni.

(174)

Fid-Deċiżjoni tal-Ftuħ tagħha (ara l-premessa (85)), il-Kummissjoni sabet li l-proċess tal-bejgħ kif stipulat fil-Pjan ta' Ristrutturar approvat inizjalment seta' jwassal għal kontinwità ekonomika bejn Oltchim SA u akkwirent possibbli ta' Oltchim SPV. Biex jipprevjenu kwalunkwe trasferiment ta' għajnuna mill-Istat inkompatibbli possibbli lix-xerrejja tal-assi ta' Oltchim, l-awtoritajiet Rumeni ddeċidew li jirristrutturaw il-proċess tal-bejgħ b'tali mod li jiżguraw diskontinwità ekonomika bejn Oltchim u x-xerrejja potenzjali tagħha.

(175)

B'mod speċifiku, f'Lulju u f'Awwissu 2016, bis-sostenn tal-konsulenti, Oltchim għamlet analiżi tal-assi tagħha u identifikat l-għażliet għal offerta granulari tal-assi fid-dawl tal-massimizzazzjoni tal-prezz tal-bejgħ akkumulat potenzjali. Dan wassal għall-identifikazzjoni ta' disa' raggruppamenti ta' assi (57). Wara t-tħabbira pubblika tal-bejgħ ta' Oltchim matul Awwissu 2016, tqassam Memorandum ta' Informazzjoni lil 23 offerent u l-iskadenza għall-preżentazzjoni ta' Offerti Vinkolanti ġiet estiża diversi drabi, b'diliġenza dovuta ulterjuri (inklużi żjarat fuq il-post u diliġenza teknika dovuta).

(176)

Il-Pjan rivedut li jibbaża fuq il-bejgħ permezz ta' raggruppamenti ta' assi (u mhux aktar permezz ta' SPV) ġie aċċettat formalment mil-Laqgħa Ġenerali tal-Kredituri fis-6 ta' Marzu 2017. Il-ġudikant fl-insolvenza ikkonferma l-Pjan ta' Riorganizzazzjoni emendat fit-28 ta' Ġunju 2017 u d-deċiżjoni tiegħu saret finali fis-16 ta' Ottubru 2017 (meta appell ippreżentat minn parti terza ġie miċħud mill-qorti superjuri).

(177)

Wara r-riċevuta tal-offerti vinkolanti, il-Bejjiegħ (AT Kearney f'isem Oltchim) identifika l-kombinazzjonijiet potenzjali li ġejjin ta' offerti vinkolanti bl-ogħla valur aggregat għall-Kredituri:

(178)

Il-Laqgħa tal-Assemblea tal-Kredituri saret fit-18 ta' Diċembru 2017 u approvat il-Ftehim dwar il-Bejgħ tal-Assi ma' Chimcomplex filwaqt li rrifjutat l-offerti l-oħra kollha (58). Peress li d-deċiżjoni tal-Assemblea tal-Kredituri kienet ikkontestata l-qorti, id-data finali l-ġdida stabbilita inizjalment ġiet posposta sas-17 ta' Ottubru 2018.

(179)

Rigward ir-raggruppament 6, il-prezz tal-bejgħ reġa' ġie nnegozjat ma' DSG u żdied minn EUR 1,9 miljun għal EUR 2,6 miljun. Fuq din il-bażi, fl-1 ta' Frar 2018 ġie ffirmat ftehim ta' xiri tal-assi. Il-bejgħ ġie approvat mill-Assemblea tal-Kredituri fis-26 ta' Frar 2018 u twettaq fit-12 ta' Ġunju 2018.

(180)

Fir-rigward tal-assi mhux mibjugħa li kien fadal (raggruppament 7 – il-proċessar tal-PVC, raggruppament 8 – l-impjant petrokimiku ta' Bradu, raggruppament 9 – anidride ftaliku u ċerti assi individwali tar-raggruppament ta' assi 7 – VCM/PVC), l-Assemblea tal-Kredituri ppruvat tikseb offerti aħjar f'termini tal-prezz, iżda n-negozjati fallew.

(181)

F'Mejju 2018 tnediet sejħa għall-offerti ġdida għar-raggruppamenti ta' assi (mhux funzjonali) li fadal, jiġifieri r-raggruppamenti 8, 9 kif ukoll għall-parti mhux mibjugħa tar-raggruppament ta' assi 7 (59). L-iskadenza prevista għal-likwidazzjoni tal-assi li fadal hi April 2019.

(182)

Il-Kummissjoni l-ewwel se teżamina jekk il-Miżuri 1 sa 3 favur Oltchim jinvolvux għajnuna mill-Istat skont it-tifsira tal-Artikolu 107(1) TFUE (ara t-taqsima 6.1 aktar 'il quddiem). Imbagħad il-Kummissjoni se tivvaluta jekk Oltchim kinitx impriża f'diffikultà (ara t-taqsima 6.2 aktar 'il quddiem). Finalment, il-Kummissjoni se teżamina jekk l-għajnuna ġietx implimentata diġà (ara t-taqsima 6.3 aktar 'il quddiem) u, konsegwentement, jekk it-tali għajnuna hix kompatibbli mas-suq intern (ara t-taqsima 6.4 aktar 'il quddiem).

(183)

Skont l-Artikolu 107(1) TFUE, “kull għajnuna, ta' kwalunkwe forma, mogħtija minn Stat Membru jew permezz ta' riżorsi tal-Istat, li twassal għal distorsjoni jew theddida ta' distorsjoni għall-kompetizzjoni billi tiffavorixxi ċerti impriżi jew ċerti produtturi għandha, safejn tolqot il-kummerċ bejn l-Istati Membri, tkun inkompatibbli mas-suq intern”.

(184)

Il-kriterji stabbiliti fl-Artikolu 107(1) TFUE huma kumulattivi. Għalhekk, il-klassifikazzjoni ta' miżura bħala għajnuna skont it-tifsira ta' din id-dispożizzjoni teħtieġ li jiġu ssodisfati l-kundizzjonijiet kumulattivi li ġejjin:

(185)

Kif ġie stipulat mill-Qorti (60), biex miżuri jiġu kkwalifikati bħala għajnuna mill-Istat skont it-tifsira tal-Artikolu 107(1) TFUE, (a) dawn iridu jkunu ġejjin mir-riżorsi tal-Istat, b'mod indirett jew dirett minn kwalunkwe korp intermedjarju li jaġixxi permezz tas-setgħat mogħtija lilu u (b) iridu jkunu imputabbli lill-Istat. Il-kunċett ta' Stat Membru jinkludi l-livelli kollha tal-awtoritajiet pubbliċi, indipendentement minn jekk ikunux awtoritajiet nazzjonali, reġjonali jew lokali (61).

(186)

Kif innotat fil-premessa 14 aktar 'il fuq, AAAS hi parti mill-amministrazzjoni pubblika, subordinata għall-Gvern. Għaldaqstant, in-nuqqas ta' eżekuzzjoni minn dan il-korp tad-dejn (kapital u mgħax) li għaddietlu d-data tal-għeluq, l-akkumulazzjoni ulterjuri tad-dejn kif ukoll it-tħassir tad-djun li normalment għandhom ikunu tħallsu lil AAAS, jixħtu piż fuq il-baġit tal-Istat u jinvolvu riżorsi tal-Istat.

(187)

Fid-dawl ta' dan li ntqal hawn fuq, il-Miżura 1 hi imputabbli lill-Istat u tinvolvi trasferiment tar-riżorsi tal-Istat.

(188)

F'każijiet fejn awtorità pubblika tagħti vantaġġ lil benefiċjarju, il-miżura hi minnha nnifisha imputabbli lill-Istat, anki jekk l-awtorità inkwistjoni jkollha awtonomija legali minn awtoritajiet pubbliċi oħra.

(189)

Madankollu, l-imputabbiltà tkun anqas evidenti jekk il-vantaġġ jingħata permezz ta' impriżi pubbliċi (62). F'każijiet bħal dawn, huwa meħtieġ li jiġi determinat jekk l-awtoritajiet pubbliċi jistgħux jitqiesu li kienu involuti, b'xi mod jew ieħor, fl-adozzjoni tal-miżura (63).

(190)

Għalhekk, l-imputabbiltà lill-Istat ta' miżura li tittieħed minn impriża pubblika tista' tiġi inferita għadd ta' indikaturi li jirriżultaw miċ-ċirkostanzi tal-każ u l-kuntest li fih tkun ittieħdet il-miżura (64). Fost l-oħrajn, indikaturi possibbli biex jiġi stabbilit jekk miżura hijiex imputabbli jinkludu dawn li ġejjin:

(191)

Rigward Salrom, il-Kummissjoni tinnota li l-bord tad-diretturi tal-kumpanija jiġi nominat mil-laqgħa ġenerali tal-azzjonisti, f'kuntest li fih l-Istat Rumen hu d-detentur ta' maġġoranza (51 %) tal-ishma ta' Salrom u jinnomina r-rappreżentanti tal-Istat fil-bord tad-diretturi.

(192)

Barra minn hekk, peress li Salrom hi meqjusa impriża tal-Istat, il-baġit annwali tagħha hu soġġett għall-approvazzjoni mill-Istat. Din l-approvazzjoni ex ante tikkonċerna, fost l-oħrajn, l-ammonti korrispondenti għar-riċevibbli kummerċjali mingħand il-klijenti (bħal Oltchim).

(193)

Fi kwalunkwe każ, m'hemmx bżonn li jiġi konkluż li l-azzjonijiet ta' Salrom huma imputabbli lill-Istat fir-rigward tal-Miżura 2 peress li l-Kummissjoni ssib li l-Miżura 2 ma tikkostitwixxix għajnuna għal Salrom (ara hawn taħt il-premessa 263).

(194)

Rigward CET Govora, il-Kummissjoni tinnota li l-kumpanija hi reġistrata bħala kumpanija kompletament tal-Istat li bħala l-azzjonist uniku tagħha għandha l-Kontea ta' Vâlcea u li, qabel ma daħlet f'insolvenza, din kienet amministrata mill-Kunsill tal-Kontea ta' Vâlcea (66).

(195)

Barra minn hekk, il-Kummissjoni tinnota li d-deċiżjonijiet biex jiġi ffirmat kuntratt tal-elettriku ġdid ma' Oltchim u mbagħad jiżdiedu l-provvisti ttieħdu fl-implimentazzjoni ta' diversi deċiżjonijiet (67) maħruġa mill-Kunsill tal-Kontea ta' Vâlcea, biex tiġi żgurata l-provvista lil Oltchim.

(196)

Barra minn hekk, ikun implawżibbli li CET Govora titqies li kienet ħielsa minn kwalunkwe influwenza mill-istat meta tiġi kkunsidrata l-imġiba tal-kumpanija f'kuntest usa'; pereżempju, eżatt wara li falliet il-privatizzazzjoni, is-CEO ta' CET Govora minnufih inħatar CEO ta' Oltchim f'Ottubru 2012 u mbagħad reġa' lura għal CET Govora fi Frar 2013, eżatt wara d-dħul ta' Oltchim f'insolvenza (68).

(197)

Minkejja d-dikjarazzjoni tar-Rumanija li s-CEO ta' CET Govora rrakkomanda lill-Kunsill ta' Vâlcea biex jieħu deċiżjonijiet fl-aħjar interess tal-kumpanija matul il-perjodu vvalutat, elementi oħra li feġġew wara l-iskandli ta' korruzzjoni f'livelli għoljin li fihom kien involut is-CEO ta' CET Govora (u eventwalment ikkundannat mill-qrati kriminali nazzjonali flimkien ma' membru tal-gvern) jikkontradixxu din id-dikjarazzjoni (69). B'mod aktar speċifiku, f'Ġunju 2018, il-qrati kriminali nazzjonali kkundannaw lill-Ministeru tat-Trasport dak iż-żmien bl-akkużi ta' traffiku ta' influwenza reali li hu kellu fuq is-CEO ta' CET Govora, biex dan tal-aħħar ikun imġiegħel jikkonkludi diversi kuntratti żvantaġġużi u mhux neċessarji f'isem CET Govora, bl-iskop finali li jittieħdu riżorsi tal-kumpanija b'mod diżonest. Għall-attività kriminali konġunta tagħhom ta' użu ħażin tal-kariga u ta' traffiku tal-influwenza f'forma kontinwa mwettqa bejn Ottubru 2011 u Lulju 2014, il-qrati kriminali nazzjonali kkundannaw kemm lill-Ministru kif ukoll lis-CEO ta' CET Govora.

(198)

Konsegwentement, u irrispettivament mill-pożizzjoni soġġettiva ta' CET Govora rigward il-merti tat-tkomplija tal-provvisti lil Oltchim, il-Kummissjoni tinnota li CET Govora ma setgħetx tieħu d-deċiżjoni kkontestata mingħajr ma tqis ir-rekwiżiti tal-awtoritajiet pubbliċi u li d-direttivi maħruġa mill-korpi governattivi (jiġifieri d-deċiżjonijiet tal-Kunsill tal-Kontea ta' Vâlcea) kienu finalment il-bażi li fuqha aġixxiet CET Govora. B'hekk, il-Kummissjoni tikkonkludi li l-miżura hi imputabbli lill-Istat fil-każ ta' CET Govora.

(199)

Peress li CET Govora hi tal-Istat, il-Kummissjoni tikkonkludi li d-deċiżjoni tagħha li tipposponi l-iskadenza għall-ħlasijiet u li tkompli bil-provvisti lil Oltchim, tixħet piż fuq ir-riżorsi tal-Istat.

(200)

Fid-dawl ta' dan li ntqal hawn fuq, il-Miżura 2 hi imputabbli lill-Istat fir-rigward ta' CET Govora u tinvolvi trasferiment tar-riżorsi tal-Istat.

(201)

L-ewwel nett, il-Kummissjoni tinnota li, fuq il-bażi tal-liġi dwar l-insolvenza, il-Pjan ma setax jiġi approvat mingħajr il-kunsens ta' AAAS (li għandha l-maġġoranza tal-valur tal-pretensjonijiet fil-kategorija tal-kredituri baġitarji) jew ta' CET Govora (li għandha l-maġġoranza tal-valur tal-pretensjonijiet fil-kategorija tal-fornituri kaptivi, jiġifieri kredituri mhux garantiti skont l-Artikolu 96 tal-liġi dwar l-insolvenza), li l-azzjonijiet tagħhom kienu imputabbli lill-Istat (ara l-premessi 187 u 200).

(202)

It-tieni, il-Kummissjoni tinnota wkoll li l-Pjan ta' Ristrutturar ġie prodott mir-riċevent imqabbad mill-Qorti, parti mill-Istat. Il-Pjan ta' Ristrutturar imbagħad ġie approvat bis-saħħa tal-approvazzjoni tal-kredituri pubbliċi u privati li qabel kienu ffirmaw f'Novembru 2012 il-Memorandum imniedi mill-Istat.

(203)

Dan il-Memorandum (iffirmat minn 12-il parti li 10 minnhom kienu jappartjenu għall-amministrazzjoni pubblika jew kienu ta' sjieda pubblika (70) u 2 biss kienu istituzzjonijiet ta' finanzjament bi sjieda privata (71) - ara l-premessa 31), tħejja minn tliet ministeri u ġie approvat mill-Prim Ministru. B'hekk, il-Memorandum kien l-istess kanal li jintuża mill-Istat fl-ogħla livell tiegħu biex iżomm lil Oltchim fis-suq.

(204)

It-tielet, il-Kummissjoni tinnota li din l-intenzjoni tal-Istat li jżomm lil Oltchim ħajja ġie ssenjalat u mbagħad ikkonfermat ripetutament qabel u matul il-perjodu ta' insolvenza.

(205)

Barra minn hekk, hekk kif jidher mit-Tabella tal-pretensjonijiet (ara t-Tabella 1), il-firmatarji tal-Memorandum kellhom pretensjonijiet li jammontaw għal ammont aggregat ta' EUR 539 miljun. Il-pretensjonijiet ta' dawn il-firmatarji, flimkien mal-pretensjonijiet ta' CET Govora (li l-azzjonijiet tagħha rigward il-Miżura 3 kienu imputabbli lill-Istat (ara l-premessi 200 u 201), jammontaw għal ammont aggregat ta' EUR 569 miljun minn total ta' EUR 759 miljun fi pretensjonijiet kumplessivi. B'hekk, il-firmatarji għall-Memorandum flimkien ma' CET Govora wkoll kellhom il-maġġoranza neċessarja fl-erba' kategoriji kollha tal-kredituri għajr tal-impjegati – kategorija li naturalment ukoll kienet tippreferi l-Pjan (fatt rikonoxxut mill-awtoritajiet Rumeni (83)) – biex japprovaw il-Pjan (84). Il-livell għoli tal-firmatarji pubbliċi tal-Memorandum jagħmilha ferm improbabbli li anki banek bi sjieda privata u atturi privati oħra jieħdu deċiżjoni li jinjoraw l-objettivi tal-Memorandum fil-mument li vvotaw favur jew kontra l-Pjan: la l-banek privati li kienu parti mill-Memorandum u lanqas Electrica ma setgħu jirrifjutaw b'mod raġonevoli milli jqisu d-dikjarazzjonijiet ripetuti (ara l-premessi 27, 28, 30) tal-azzjonist ta' Oltchim SA li kienu jimplikaw li l-Istat Rumen ma kienx ser iħalli lil Oltchim tfalli, u lanqas ma setgħu jinjoraw il-Memorandum li ffirmaw, li ġie approvat mill-Prim Ministru. Fuq il-bażi tal-ispjegazzjonijiet tar-Rumanija, il-Qorti kienet tqis dak iż-żmien li l-kundizzjoni li ġejja prevista fl-Artikolu 101(2) tal-liġi dwar l-insolvenza kienet tkun issodisfata wkoll, anki jekk kreditur mhux parti mill-Memorandum jopponi għall-Pjan: b'mod partikolari, fuq il-bażi tal-preżentazzjoni tar-Rumanija, il-Qorti kienet tqis li “l-ebda waħda mill-kategoriji li jirrifjutaw il-pjan u l-ebda waħda mill-pretensjonijiet li jirrifjutaw il-pjan ma jirċievu anqas milli jkunu jirċievu f'każ ta' falliment”, irrispettivament mit-tqabbil li MEO kien jagħmel bejn ir-rikavati fil-Pjan ta' riorganizzazzjoni u fix-xenarju ta' likwidazzjoni (ara t-taqsima 6.1.2.3 f'dak ir-rigward). Għaldaqstant, il-Memorandum għamilha possibbli li l-Istat jaċċerta l-adozzjoni tal-Pjan ta' Riorganizzazzjoni mill-kredituri.

(206)

Fid-dawl ta' dan li ntqal hawn fuq, il-Kummissjoni tinnota li l-Memorandum li tnieda mill-Istat u l-objettivi tiegħu – jiġifieri s-salvar ta' Oltchim akkost ta' kollox, kif regolarment u pubblikament imtenni mill-Istat bejn il-falliment tal-privatizzazzjoni f'Settembru 2012 u l-votazzjoni tal-kredituri dwar il-Pjan fl-2015 – żgura l-maġġoranza meħtieġa fl-Assemblea tal-Kredituri biex tiġi żgurata wkoll l-adozzjoni tal-Pjan ta' Riorganizzazzjoni. Kif muri fil-premessi 31, 203 u 235 u dawk sussegwenti, dan il-Memorandum kien imputabbli lill-Istat.

(207)

Speċifikament, bil-Memorandum, il-Gvern stabbilixxa l-qafas għall-firmatarji għalih biex “jaħdmu flimkien bl-għan li jidentifikaw u jimplimentaw soluzzjonijiet li jħarsu d-drittijiet tal-impjegati, tal-azzjonisti u tal-kredituri.”

(208)

Barra minn hekk, “l-abbozz tal-Ftehim jiżgura l-provvista ta' kapital operatorju mill-banek firmatarji [biex Oltchim] tkun tista' tkompli l-produzzjoni bil-kapaċitajiet imnedija mill-ġdid, kif ukoll terġa' tiftaħ b'mod gradwali kapaċitajiet tal-produzzjoni oħra wkoll, bl-għan li tattira aktar applikanti potenzjali interessati fil-privatizzazzjoni tal-kumpanija.” Hu ferm improbabbli li, fil-kuntest tad-dikjarazzjoni pubblika tal-awtoritajiet, kwalunkwe wieħed mill-atturi mistidnin biex jiffirmaw il-Memorandum kien jirrifjuta milli jaderixxi għalih. Barra minn hekk, l-istandard stabbilit bil-Memorandum għall-kollaborazzjoni bejn il-firmatarji – jiġifieri “bl-assistenza tal-Esperti fir-Ristrutturar – għall-iżvilupp ta' strateġija li tiżgura l-vijabbiltà fit-tul bl-għan li Oltchim tinġieb f'livell sostenibbli ta' profittabilità, ta' solvenza, ta' likwidità u ta' flus kontanti (“Strateġija għat-Tnedija mill-Ġdid Sostenibbli”)” kien relattivament baxx u vag, peress li kien imsejjes biss fuq “il-kisba ta' xi riżultati pożittivi skont l-Analiżi tal-Vijabbiltà” (enfasi miżjuda).

(209)

Bil-Memorandum, il-Gvern tenna d-determinazzjoni tiegħu li jagħmel dak kollu neċessarju biex iżomm lil Oltchim miftuħa u jirristrutturaha. Fuq l-istess nota, kemm l-entitajiet privati kif ukoll dawk pubbliċi li ffirmawh ħadu impenn li jagħtu sehemhom fi strateġija fit-tul biex jirristrutturaw lil Oltchim, ferm qabel kwalunkwe vot fuq Pjan ta' Riorganizzazzjoni potenzjali fl-Assemblea tal-Kredituri. Il-firmatarji kollha għall-Memorandum ivvotaw b'mod pożittiv ukoll għall-Pjan ta' Riorganizzazzjoni fl-2015, bl-eċċezzjoni unika ta' CFR Marfa, li kienet relattivament anqas importanti meta mqabbla mas-sħab ta' finanzjament u l-kredituri statali l-oħra rigward is-sopravivenza ta' Oltchim, u peress li Oltchim kienet tuża wkoll lil Ermewa għall-ħtiġijiet tat-trasport tagħha.

(210)

Il-Memorandum fih il-klawżola Nru 8 li tipprevedi “l-protezzjoni u ż-żamma tad-drittijiet” u tal-interessi tal-firmatarji. Madankollu, din il-klawżola u, b'mod partikolari, it-tieni parti tagħha, ma tagħmel xejn aktar ħlief tiddikjara dak li hu ovvju, jiġifieri li l-Memorandum stess, fil-mument tal-iffirmar, ma kienx jirrappreżenta diġà rinunzja bil-quddiem tad-drittijiet tal-banek, ta' Electrica jew ta' AVAS bħala kredituri. B'hekk, fil-fehma tal-Kummissjoni, is-sempliċi parteċipazzjoni f'dak il-mument u l-involviment għall-kooperazzjoni futura kif stabbiliti permezz tal-Memorandum, huma minnhom infushom evidenza tal-kredituri firmatarji (kemm pubbliċi kif ukoll privati) li jadottaw id-direzzjoni ċara ta' ristrutturar ta' Oltchim.

(211)

Din id-direzzjoni lejn iż-żamma ta' Oltchim fil-wiċċ hi saħansitra aktar ovvja meta wieħed iqis iż-żmien u l-isforz finanzjarju addizzjonali mixħut fis-sostenn tat-tnedija mill-ġdid ta' Oltchim mit-tliet banek (li l-pretensjonijiet ta' responsabbiltà tagħhom għal Oltchim żdiedu b'mod konsiderevoli matul dan il-perjodu) u minn AAAS (u partijiet firmatarji oħra) li, fuq l-istess nota, żammet lura milli tieħu passi lejn l-eżekuzzjoni immedjata tal-pretensjonijiet tagħha.

(212)

Fir-rigward tal-Amministrazzjoni Nazzjonali tal-Ilma, fuq il-bażi tad-dispożizzjonijiet tal-istatut disponibbli pubblikament tagħha dwar il-funzjonament tal-organizzazzjoni (85), il-Kummissjoni tinnota dan li ġej:

(213)

L-ewwel nett, rigward l-istatus legali tagħha u l-integrazzjoni tagħha fl-istrutturi tal-amministrazzjoni pubblika, l-Amministrazzjoni Nazzjonali tal-Ilma hi istituzzjoni pubblika ta' interess nazzjonali li għandha kapaċità legali u hi koordinata mill-awtorità pubblika ċentrali tal-ilma (jiġifieri l-Ministeru tal-Ilmijiet u tal-Foresti) (86).

(214)

It-tieni, rigward in-natura tal-attivitajiet tagħha, l-għan tal-impriża hu li tapplika l-istrateġija u l-politika nazzjonali fil-qasam tal-ġestjoni kwantitattiva u kwalitattiva tar-riżorsi tal-ilma u li tiżgura l-osservazzjoni tar-regolamenti fil-qasam; f'dan il-kuntest, hi tamministra u topera l-infrastruttura tas-sistema nazzjonali tal-ġestjoni tal-ilma. Barra minn hekk, il-kumpanija tiżgura t-twettiq ta' numru ta' attivitajiet ta' interess nazzjonali u soċjali, bħal eż. it-twettiq tal-impenji meħuda mill-Istat tar-Rumanija permezz ta' ftehimiet u ta' konvenzjonijiet internazzjonali (87).

(215)

It-tielet, rigward l-intensità tas-superviżjoni eżerċitata mill-awtoritajiet pubbliċi fuq il-maniġment tagħha, l-Amministrazzjoni Nazzjonali tal-Ilma titmexxa minn bord tal-amministrazzjoni msawwar minn 11-il membru, li lkoll jinħatru b'mandat ta' erba' snin b'ordni tal-kap tal-awtorità pubblika ċentrali tal-ilma. Skont l-istess artikolu, hu obbligatorju li rappreżentant tal-Ministeru tal-Finanzi Pubbliċi u wieħed tal-awtorità pubblika ċentrali tal-ilma jkunu membri tal-bord tal-amministrazzjoni. Barra minn hekk, id-direttur ġenerali tal-Amministrazzjoni Nazzjonali tal-Ilma jinħatar, jiġi sospiż u rilaxxat mill-kariga permezz ta' ordni tal-kap tal-istess awtorità pubblika ċentrali tal-ilma (88).

(216)

Ir-raba', rigward il-finanzjament tal-attività tagħha, il-baġit tal-introjtu u tal-ispejjeż tal-kumpanija hu approvat mill-bord tal-amministrazzjoni bil-kunsens tal-kap tal-awtorità pubblika ċentrali tal-ilma (89).

(217)

Konsegwentement, fid-dawl tal-fatturi msemmija fil-premessa 190 aktar 'il fuq, il-Kummissjoni tqis li: (i) l-istatus ġuridiku tagħha, (ii) l-integrazzjoni tagħha fl-amministrazzjoni pubblika, (iii) in-natura tal-attivitajiet u tal-kompiti tagħha -mhux normalment eżerċitati fis-suq fil-kundizzjonijiet ta' kompetizzjoni ma' operaturi privati-, (iv) is-superviżjoni eżerċitata mill-awtoritajiet pubbliċi fuq il-maniġment tagħha u (v) il-proċedura ta' approvazzjoni għall-baġit tal-introjtu u tal-ispejjeż, ilkoll jindikaw li l-azzjonijiet tal-Amministrazzjoni Nazzjonali tal-Ilma huma imputabbli lill-Istat.

(218)

Fid-dawl tal-elementi msemmija hawn fuq (jiġifieri, b'mod partikolari, il-maġġoranza tal-votazzjoni żgurata għall-adozzjoni tal-Pjan ta' Riorganizzazzjoni, iżda anki bl-iżgurar tal-kooperazzjoni fl-isforzi kontemporanji u sussegwenti minn kredituri ewlenin permezz tal-Memorandum), il-Kummissjoni tikkonkludi li l-għoti tal-Miżura 3 minn AAAS, minn Electrica, minn Salrom, minn CET Govora u mill-Amministrazzjoni Nazzjonali tal-Ilma hu imputabbli lill-Istat.

(219)

Il-miżuri vvalutati huma selettivi b'mod ċar peress li huma pprovduti lil Oltchim b'mod esklużiv. Impriżi oħra f'sitwazzjoni legali u fattwali komparabbli, fid-dawl tal-objettiv imfittex mill-miżuri, fis-settur petrokimiku jew f'setturi oħra, ma kinux jirċievu l-istess vantaġġ. Skont il-ġurisprudenza tal-Qorti tal-Ġustizzja, is-sempliċi fatt li l-pożizzjoni kompetittiva ta' impriża tissaħħaħ meta mqabbla ma' impriżi oħra f'kompetizzjoni magħha, billi tingħata benefiċċju ekonomiku li hi, kieku, ma kinitx tirċievi fil-perkors normali tan-negozju tagħha, jindika distorsjoni possibbli tal-kompetizzjoni (90).

(220)

Madankollu, ir-Rumanija tgħid li “l-miżuri ma tawx vantaġġ ekonomiku lil Oltchim għaliex kienu jirrispettaw it-test tal-MEO, peress li l-awtoritajiet pubbliċi u l-kumpaniji pubbliċi aġixxew bl-istess mod kif kienu jaġixxu kredituri, investituri jew fornituri privati, biex jimminimizzaw it-telf tagħhom u jimmassimizzaw il-profitti tagħhom” (91).

(221)

Madankollu, fil-każ inkwistjoni, it-test tal-MEO ma jidhirx li hu applikabbli. L-ewwel nett, il-Kummissjoni tfakkar li l-Qorti preċedentement qieset li l-applikabbiltà tal- “prinċipju tal-investitur f'ekonomija tas-suq” finalment jiddependi mill-Istat li jkun ta, fil-kapaċità tiegħu bħala azzjonist u mhux fil-kapaċità tiegħu bħala awtorità pubblika, vantaġġ ekonomiku lil impriża li tappartjeni għalih (92). Fuq l-istess nota, it-test tal-MEO ma setax ikun applikabbli għall-Istat fil-kapaċità ta' kreditur ta' Oltchim permezz ta' AAAS u ta' kredituri pubbliċi oħra, għaliex it- “test tal-kreditur privat” ma japplikax għall-miżuri li l-Istat ikun wettaq fil-kapaċità tiegħu bħala awtorità pubblika meta ffirma l-Memorandum.

(222)

Kif spjegat fil-premessi 204 u dawk sussegwenti, 274 u 276, l-Istat aġixxa b'mod kostanti u ċar fil-kapaċità tiegħu bħala awtorità pubblika biex isalva lil Oltchim minn falliment, inkluż b'dikjarazzjonijiet pubbliċi u permezz ta' Memorandum mal-kredituri privati u pubbliċi ewlenin involuti, u mhux bħala azzjonist li kien qed jinvesti f'kumpanija jew bħala kreditur. Għaldaqstant, il-Kummissjoni tqis li t-test tal-MEO mhuwiex applikabbli fil-każ inkwistjoni (93).

(223)

Madankollu, għall-fini ta' kompletezza, il-Kummissjoni għamlet ukoll it-test tal-MEO fil-forma ta' prinċipju tal-kreditur f'ekonomija tas-suq għal kull waħda mit-tliet Miżuri inkwistjoni, billi talbet mingħand l-awtoritajiet Rumeni informazzjoni kontemporanja addizzjonali dwar id-diversi atturi involuti u d-deċiżjonijiet tagħhom, billi jiġbru informazzjoni mingħand is-sorsi pubbliċi disponibbli kollha hi stess, u billi tagħmel ix-xenarji ta' stima tagħha stess fuq il-bażi tal-evidenza disponibbli fil-mument tal-miżuri vvalutati.

(224)

It-trattament tad-dejn ta' Oltchim ma' AAAS diġà ġie vvalutat fid-deċiżjoni tal-2012 tal-Kummissjoni fid-dawl tal-privatizzazzjoni mistennija imminenti ta' dak iż-żmien. Għaldaqstant, il-Kummissjoni tqis li hu xieraq li tiġi analizzata l-imġiba ta' AAAS wara din id-deċiżjoni mill-mument li fih falliet il-privatizzazzjoni.

(225)

Kreditur privat normalment ifittex li jikseb il-ħlas massimu tas-somom dovuti lilu minn debitur f'diffikultajiet finanzjarji (94).

(226)

Għall-kuntrarju tad-dikjarazzjoni tar-Rumanija li, skont id-Deċiżjoni tal-2012 tal-Kummissjoni, l-eżekuzzjoni ttardjata tal-pretensjonijiet hi ħielsa minn għajnuna (dment li AAAS titlob imgħax fuq il-bażi tal-Komunikazzjoni tar-Rata ta' Referenza tal-2008 sad-dħul ta' Oltchim fl-insolvenza), il-Kummissjoni tinnota li s-sitwazzjoni f'Marzu 2012 meta l-Kummissjoni ħarġet id-Deċiżjoni tagħha kienet tvarja b'mod fundamentali mill-perjodu investigat peress li, f'dan ix-xenarju msemmi l-aħħar, ma kienx għad hemm proġett ta' privatizzazzjoni imminenti pendenti. F'dan ir-rigward, il-Kummissjoni tinnota li l-konklużjoni fid-deċiżjoni tal-2012 tal-Kummissjoni ttieħdet bil-patt u l-kundizzjoni li Oltchim tiġi privatizzata għalkollox fit-terminu qasir wara l-konverżjoni tad-dejn. Madankollu, l-Istat (permezz tal-Ministeru tal-Ekonomija), bħala l-azzjonist ta' maġġoranza, ma qiesx il-possibbiltà li ċerti azzjonisti ta' minoranza setgħu jimblokkaw il-konverżjoni prevista ta' dejn f'ekwità. Dan l-imblokkar eventwalment seħħ, u l-konverżjoni prevista ta' dejn f'ekwità ma saritx aktar. Għaldaqstant, fi tmiem il-proċedura ta' offerti, b'rebbieħ tal-offerta li ma setax jissodisfa l-obbligi tiegħu bħala xerrej, il-privatizzazzjoni nfisha falliet ukoll.

(227)

Il-Kummissjoni tinnota li s-sitwazzjoni finanzjarja ta' Oltchim li kienet diffiċli u li kienet sejra għall-agħar b'mod kostanti kienet magħrufa mill-kredituri kollha, u b'mod partikolari minn AAAS. Għaldaqstant, AAAS kellha biżżejjed żmien biex tħejji, tivvaluta internament, u timplimenta passi biex tirkupra l-pretensjonijiet tagħha f'każ li tfalli privatizzazzjoni oħra f'Settembru 2012. B'hekk, il-perjodu ta' ħames xhur investigat bejn Settembru 2012 u l-31 ta' Jannar 2013 kien twil biżżejjed biex AAAS tieħu l-passi neċessarji u tipprova tirkupra d-djun (99 % tal-pretensjonijiet ta' AAAS ma kinux garantiti, hekk kif muri fit-Tabella 1). F'dan ir-rigward, il-Kummissjoni tinnota li impriżi bħal Electrica ħadu passi bħal dawn, għad li mingħajr suċċess.

(228)

L-ewwel nett, il-liġijiet speċjali li jirregolaw l-irkupru tad-djun tal-Istat (95) jipprevedu drittijiet speċjali għal AAAS li jinkludu l-eżekuzzjoni diretta tal-pretensjonijiet tagħha mingħajr deċiżjoni tal-Qorti. Speċifikament, l-Artikolu 50(1) u (2) tal-Ordinanza ta' Emerġenza tal-Gvern Nru 51/1998 jistabbilixxi li: “(1) AVAB (issa AAAS) tista' torganizza l-korpi ta' bailiffs tagħha stess jew tista' tuża lil bailiffs oħra biex tinfurza atti ta' eżekuzzjoni”, u “(2) il-proċedimenti ta' infurzar għar-realizzazzjoni tal-assi bankarji minn AVAB għandhom jiġu eżegwiti jew mill-korp ta' bailiffs tagħha stess jew inkella minn bailiffs oħra.”

(229)

Ir-Rumanija naqset milli tipprovdi kwalunkwe evidenza, minkejja talbiet ripetuti mill-Kummissjoni, li turi li AAAS ippruvat kull azzjoni li kreditur f'ekonomija tas-suq kien raġonevolment iwettaq biex jirkupra l-pretensjonijiet tiegħu. Barra minn hekk, ir-Rumanija tiddikjara li AAAS ma kinitx titħalla titlob l-eżekuzzjoni tal-pretensjonijiet tagħha għal Oltchim minħabba l-liġi dwar il-privatizzazzjoni (96) li tipprevedi li, mid-data tal-istabbiliment tal-proċedura ta' amministrazzjoni speċjali, il-kredituri tat-taxxa u l-kontribuzzjonijiet (jiġifieri baġitarji) ma jistgħux jeżegwixxu d-djun tagħhom u ma jieħdu ebda pass favur it-tali miżuri ta' eżekuzzjoni dment li l-kumpanija titħejja għal privatizzazzjoni (97). Minkejja dan, filwaqt li dan isostni l-preżenza ta' vantaġġ selettiv mogħti lil Oltchim imputabbli lill-Istat, in-nuqqas ta' azzjoni minn AAAS iseħħ f'kuntest li fih il-Ministeru tal-Ekonomija, għal raġunijiet mhux spjegati, kien żamm lil Oltchim taħt ir-reġim speċjali għall-proċedura ta' privatizzazzjoni anki wara li falliet il-privatizzazzjoni f'Settembru 2012. AAAS setgħet tipprova tikkontesta d-deċiżjoni tal-Ministeru li jtawwal dan l-istatus speċjali mingħajr spjegazzjoni.

(230)

It-tieni, ir-Rumanija naqset milli tipprovdi kwalunkwe studju, rapport jew dokument intern li juri li AAAS aġixxiet bħala MEO fid-deċiżjoni tagħha li żżomm lura milli tirkupra l-pretensjonijiet tagħha wara li falliet il-privatizzazzjoni f'Settembru 2012. Skont l-aħħar studju disponibbli dak iż-żmien tal-valutazzjoni tal-irkupru tal-pretensjonijiet ta' AAAS (l-istudju tal-2011 ta' Raiffeisen), AAAS kienet tikseb proporzjon ta' rkupru ta' 12 % f'xenarju ta' likwidazzjoni (98).

(231)

Kredituri oħra li jinkludu entitajiet pubbliċi ħadu azzjonijiet immedjati f'dak il-perjodu biex jirkupraw id-djun tagħhom. B'mod partikolari, Electrica – li skont l-istudju tal-2011 ta' Raiffeisen kellha l-istess proporzjon ta' rkupru bħal AAAS – nediet l-eżekuzzjoni tad-djun tagħha fl-1 ta' Novembru 2012 u qabdet b'suċċess il-kontijiet tal-bank ta' Oltchim. Barra minn hekk, żewġ kumpaniji mhux tal-Istat – Polcheme S.A. u Bulrom Gas li kienu jirrappreżentaw it-8 u l-10 l-aktar pretensjonijiet importanti fost il-21 kreditur garantit fl-2013 – ukoll nedew il-miżuri ta' eżekuzzjoni. AAAS tabilħaqq kienet l-aktar kreditur importanti u ta' Oltchim u setgħet tuża l-pożizzjoni tagħha biex tikseb termini ta' negozjar aħjar rigward l-irkupru tad-dejn tagħha iżda naqset milli għamlet hekk. Kieku Oltchim ġiet mhedda b'likwidazzjoni AAAS jaf kienet tieħu termini ta' rkupru tad-dejn aħjar.

(232)

Minkejja d-dikjarazzjoni tar-Rumanija, id-dħul fil-Memorandum mhuwiex ekwivalenti - jew sostitut - għall-aħjar sforzi biex wieħed jinforma ruħu, peress li l-hekk imsejħa Analiżi tal-Vijabbiltà msemmija fil-Memorandum sussegwentement ġiet ikkummissjonata u ntużat minn tliet kredituri finanzjarji u mhux minn AAAS stess. Ir-Rumanija naqset milli tiddokumenta kwalunkwe analiżi interna bħal din minn AAAS.

(233)

Konsegwentement, l-imġiba ġenerali ta' AAAS (minkejja l-għarfien storiku tagħha dwar id-diffikultajiet strutturali ta' Oltchim) kienet passiva rigward l-aħjar sforzi biex tirkupra l-pretensjonijiet tagħha jew tal-anqas tikseb pożizzjoni ta' kreditur aħjar u dehret aktar orjentata lejn is-salvataġġ u ż-żamma ta' Oltchim ħajja.

(234)

Għaldaqstant, il-Kummissjoni tqis li, li kieku ħadet azzjoni, AAAS kien ikollha possibbiltajiet akbar li tirkupra l-pretensjonijiet tagħha, anki fid-dawl tal-fatt li Oltchim kienet issospendiet il-produzzjoni u, b'hekk, ma kellha ebda dħul operatorju prospettiv fil-futur qarib.

(235)

It-tielet, minflok ma ppruvat teżegwixxi d-djun tagħha, AAAS nediet, flimkien mal-Ministri tal-Finanzi, tal-Ekonomija u tat-Trasport, kif ukoll mal-Uffiċċju tas-Sjieda Statali u tal-Privatizzazzjoni fl-Industrija, il-Memorandum (ara in extenso l-premessi 31 u 203 u dawk sussegwenti aktar 'il fuq) li ġie approvat fit-13 ta' Novembru 2012 mill-Prim Ministru tar-Rumanija u ffirmat mill-Istat kif ukoll seba' kredituri li ħamsa minnhom kienu pubbliċi – AAAS, Salrom, CFR Marfa, CEC Bank, Electrica (li kienet għadha kollha kemm hi tal-Istat dak iż-żmien) – u tnejn kienu privati – il-Bank Kummerċjali Rumen (aktar tard imsejjaħ “Erste Bank”) u Transilvania Bank. Għall-kuntrarju tad-dikjarazzjoni tar-Rumanija, il-Memorandum ma jistax jitqies tranżazzjoni pari passu, fid-dawl tal-prevalenza sinifikanti tal-kredituri pubbliċi u tal-awtoritajiet Statali kofermatarji għalih. (99)

(236)

B'mod speċifiku, mit-tnax il-parti firmatarja, għaxra kienu jappartjenu għall-amministrazzjoni pubblika jew huma ta' sjieda pubblika (100) u tnejn biss huma istituzzjonijiet ta' finanzjament bi sjieda privata (101) Il-Memorandum tnieda mill-Istat (il-Ministeru tal-Finanzi, il-Ministeru tal-Affarijiet Ekonomiċi, il-Ministeru tat-Trasport u l-Infrastruttura, AAAS u OPSPI) u ġie approvat mill-Prim Ministru. Barra minn hekk, il-perċentwal ta' pretensjonijiet miżmuma minn kredituri privati kien jirrappreżenta madwar 20 % biss mill-pretensjonijiet totali tal-firmatarji tal-Memorandum. Għaldaqstant, il-firxa tal-involviment pubbliku kien konsiderevoli u l-intervent tal-operaturi privati kien limitat. Finalment, il-patti u l-kundizzjonijiet tat-tranżazzjonijiet mhumiex komparabbli peress li 77 % tal-pretensjonijiet taż-żewġ kredituri privati li ffirmaw il-Memorandum kienu garantiti, meta mqabbla ma' medja ta' 14 % biss mill-pretensjonijiet għaż-żewġ kredituri pubbliċi.

(237)

Il-Memorandum juri li l-kredituri pubbliċi qablu rigward xenarju bla rkupru mingħajr ma vvalutaw alternattivi oħra kif xieraq. B'mod partikolari, il-paragrafu 2.3. tal-Memorandum isemmi li l-partijiet għalih jaqblu ma' lista ta' miżuri, biex “jieħdu impenn li jimplimentaw strateġija ta' tnedija mill-ġdid sostenibbli taħt ir-riżerva ta' riżultat pożittiv tal-Valutazzjoni tal-Vijabbiltà”. Ir-Rumanija qatt ma ppreżentat il-Valutazzjoni tal-Vijabbiltà, iżda semmiet li l-banek wettqu studju bħal dan. Skont R/BDO, Transilvania Bank, Erste Bank (kredituri privati) flimkien ma' CEC Bank (pubbliku) ikkummissjonaw l-istudju Alvarez&Marsal li pprovdew rapport li “kien fih miżuri ta' ristrutturar u kkonferma bħala possibbli r-riorganizzazzjoni tal-attivitajiet ta' Oltchim wara l-implimentazzjoni tal-miżuri proposti”. Skont l-istampa Rumena (102), l-awtoritajiet Rumeni wrew li r-rapport minn Alvarez&Marsal, kif ikkummissjonat mill-banek kredituri biex jevalwaw is-sitwazzjoni ta' Oltchim, ikkonferma “l-ipoteżi tal-awtoritajiet u l-ħtieġa li tingħata għajnuna ta' salvataġġ fl-istruttura proposta”.

(238)

Ir-Rumanija naqset milli tiddokumenta li twettqet tali valutazzjoni għal AAAS jew f'isimha, u wisq inqas li intużat minn AAAS. Ir-Rumanija naqset ukoll milli tagħti provi li r-rapport ta' Alvarez&Marsal fil-fatt intuża minn AAAS u, aktar minn hekk, hekk kif inhu trasparenti mis-sorsi pubbliċi msemmija fil-premessa (237) aktar 'il fuq, ir-rapport ikkonferma biss il-ħtieġa li tingħata għajnuna u mhux neċessarjament konferma tal-vijabbiltà fit-tul tar-riorganizzazzjoni.

(239)

F'dan ir-rigward, il-Kummissjoni ttenni, skont il-premessa (22) aktar 'il fuq, li l-konklużjoni tagħha dwar il-konverżjoni tad-dejn (u, b'hekk, it-tħassir tad-dejn ta' AAAS favur Oltchim) segwita mill-privatizzazzjoni sħiħa nstabet li ma tinvolvi ebda vantaġġ fuq il-bażi li “[…] il-kumpanija tiġi privatizzata għalkollox fit-terminu qasir wara l-konverżjoni tad-dejn”. Il-Memorandum jikkonferma r-rieda ta' AAAS li ttawwal l-istat ta' nuqqas ta' rkupru tal-pretensjonijiet u l-akkumulazzjoni ta' aktar djun.

(240)

Ir-Rumanija tiddikjara wkoll li AAAS kienet analizzat il-possibbiltà li titlob sekwestru tal-kontijiet ta' Oltchim, iżda ma setgħetx tagħmel dan peress li l-kontijiet ta' Oltchim diġà kienu ssekwestrati minn kredituri oħra. Madankollu, ir-Rumanija ma pprovdiet ebda evidenza biex issostni din id-dikjarazzjoni. Fi kwalunkwe każ, AAAS naqset milli taġixxi bħala kreditur privat prudenti, peress li ma ħadet ebda azzjoni biex tipproteġi l-pretensjonijiet tagħha. Li kieku AAAS intervjeniet qabel fil-proċess, ma kinitx titlef l-opportunità li tissekwestra l-kontijiet ta' Oltchim l-ewwel (jiġifieri qabel kredituri oħra, bħal Electrica f'Novembru 2012) jew tikseb rhuna fuq proprjetà immobbli (bħalma għamlet Salrom).

(241)

Ir-Rumanija tgħid li, li kieku AAAS talbet l-eżekuzzjoni tal-pretensjoni tagħha, Oltchim imbagħad kien ikollha tibda proċedura ta' insolvenza. Il-Kummissjoni tqis li s-sempliċi theddida ta' skattar ta' insolvenza kien jagħti lil AAAS aktar setgħa fuq Oltchim biex tirkupra l-pretensjonijiet tagħha. Anki f'xenarju ta' insolvenza skattat minn AAAS, AAAS kienet tiggwadanja s-setgħa proprja biex tipproponi riorganizzazzjoni ta' Oltchim li kapaċi timmassimizza l-irkupru tal-pretensjonijiet tagħha, b'mod partikolari permezz tal-bejgħ f'raggruppamenti (ara l-premessa 265). Li kieku kien hemm possibbiltà bħal din, il-pożizzjoni ta' AAAS kienet tinbidel b'mod konsiderevoli.

(242)

Fil-mument propju tal-votazzjoni tal-Assemblea tal-Kredituri f'Marzu 2015, l-għażla ta' AAAS kienet ristretta bejn il-likwidazzjoni u l-Pjan ta' Riorganizzazzjoni, riżultat tal-inazzjoni preċedenti ta' AAAS. Skont dan, li kieku AAAS ġabet ruħha bħala kreditur prudenti, kienet tisfrutta d-dispożizzjonijiet tal-liġi dwar l-insolvenza li jippermettu lil kwalunkwe kreditur li jirrappreżenta aktar minn 20 % tal-pretensjonijiet biex jipproponi pjan ta' riorganizzazzjoni (103). B'dan il-mod, AAAS kienet tieħu azzjoni li tippermettilha tagħżel tip ieħor ta' pjan ta' riorganizzazzjoni (bejgħ permezz ta' raggruppamenti ta' assi), xenarju ta' massimizzazzjoni tad-dħul (kif spjegat ulterjorment fil-premessa 265) li missha diġà kienet ittieħdet minn Settembru 2012, eżatt wara li falliet il-privatizzazzjoni.

(243)

Fuq il-bażi tal-kunsiderazzjonijiet ta' hawn fuq, il-Kummissjoni tqis li l-Miżura 1 tagħti lil Oltchim vantaġġ selettiv permezz ta' nuqqas ta' eżekuzzjoni u, pretensjonijiet akbar korrispondenti għal Oltchim, fil-perjodu Settembru 2012 – Jannar 2013 li jammontaw għal RON 152 miljun (104) (EUR 33 miljun), il-valur taż-żmien marbut mad-differiment tat-talba għal eżekuzzjoni tal-pretensjonijiet ta' AAAS li jimplikaw esponiment akbar għal Oltchim.

(244)

Kif spjegat aktar 'il fuq (ara l-premessa 29), Oltchim setgħet terġa' tibda l-produzzjoni fl-2012 bis-saħħa tad-deċiżjoni ta' CET Govora u ta' Salrom li jkomplu bil-provvisti lil Oltchim minkejja li hi ma kinitx ħallset id-djun pendenti.

(245)

Il-Kummissjoni esprimiet dubji li operatur f'ekonomija tas-suq kien jieħu l-istess deċiżjonijiet bħal dawn iż-żewġ kumpaniji bi sjieda pubblika fid-dawl tad-diffikultajiet ekonomiċi ta' Oltchim.

(246)

Matul il-fażi tal-investigazzjoni, ir-Rumanija pprovdiet argumenti validi rigward l-interdipendenza teknoloġika eżistenti bejn Salrom u CET Govora minn naħa, u Oltchim, min-naħa l-oħra. Dawn l-argumenti ġew sostnuti wkoll minn partijiet terzi bħat-trustees tal-insolvenza ta' Oltchim u ta' CET Govora, u jistgħu jinġabru fil-qosor kif ġej.

(247)

Rigward Salrom, ir-Rumanija tiddikjara li l-kumpanija sabet ruħha fis-sitwazzjoni li tagħżel bejn iż-żamma tan-negozju tagħha operazzjonali jew l-għeluq minħabba n-nuqqas ta' disponibbiltà tal-utilitajiet forniti lilha minn Oltchim. L-għajbien ta' Oltchim kien ifisser ukoll l-għajbien tal-klijent l-ieħor ta' Salrom, Uzinele Sodice Govora, b'konsegwenzi negattivi għal CET Govora.

(248)

Rigward CET Govora, ir-Rumanija tiddikjara li ma kien hemm ebda soluzzjoni prattika biex ix-xirjiet ta' fwar industrijali ta' Oltchim jiġu sostitwiti. Li kieku CET Govora waqqfet il-provvista tal-fwar liż-żewġ klijenti kaptivi (peress li l-fwar hu prodott sekondarju tal-ġenerazzjoni tal-elettriku), l-unika għażla kienet tkun it-telf assolut ta' dan permezz tar-rilaxx fl-atmosfera. B'hekk, ir-Rumanija targumenta li, minn perspettiva ekonomika, l-għażla li kien jieħu kwalunkwe operatur fis-sitwazzjoni ta' CET Govora kienet li jikkonverti l-fwar f'dejn minflok ma jeħilsu fl-atmosfera, każ li fih hu jkun imċaħħad mill-valur tiegħu għalkollox.

(249)

Minbarra l-interdipendenza teknoloġika, ir-Rumanija argumentat ukoll li d-deċiżjonijiet meħuda minn CET Govora u minn Salrom biex ikomplu l-provvisti lil Oltchim kienu ġġustifikati u konformi mal-MEOP, dment li ż-żewġ kumpaniji jkunu ggarantixxew id-dejn maħluq ġdid (jiġifieri wara Settembru 2012).

(250)

Barra minn hekk, ir-Rumanija timplika li d-deċiżjonijiet ta' CET Govora u ta' Salrom li jfornu l-materja prima meħtieġa għall-bidu mill-ġdid tal-attività ta' Oltchim huma simili għal dawk li ttieħdu minn kumpaniji privati bħal Bulrom Gas Impex, SC Arelco Power, Ciech Chemical Group, Tricon, Alum, MFC Commodities, Chemimplex. Il-bażi ta' tali deċiżjoni kienet tkun il-probabbiltà li jiġi rkuprat ammont akbar mid-dejn f'każ li l-attività terġa' tinbeda, in-negozju jsir vijabbli u l-bejgħ sussegwenti jirnexxi.

(251)

Fil-prinċipju, rigward l-interdipendenza teknoloġika li teżisti bejn Salrom u CET Govora minn naħa, u Oltchim min-naħa l-oħra, il-Kummissjoni ma tikkontestax il-validità tal-argumenti tar-Rumanija.

(252)

Madankollu, il-Kummissjoni ma tistax taċċetta l-pożizzjoni tar-Rumanija rigward il-konformità mal-MEOP tal-imġiba ta' CET Govora. Dan hu spjegat aktar hawn taħt.

(253)

Kif jista' jiġi osservat fit-Tabella 7 ta' hawn taħt, bejn Ottubru 2012 u Jannar 2013, il-pretensjonijiet ta' Salrom kontra Oltchim żdiedu bi RON 15-il miljun (madwar EUR 3 miljun). Fl-istess ħin, hekk kif jista' jiġi osservat ukoll fit-Tabella 8 ta' hawn taħt, il-pretensjonijiet ta' CET Govora kontra Oltchim ukoll żdiedu bi RON 52 miljun (madwar EUR 12-il miljun) li RON 27 miljun (madwar EUR 6 miljun) minnhom kienu penali għall-ħlas tardiv.

(254)

Skont l-aħħar informazzjoni pprovduta mir-Rumanija, matul il-perjodu Settembru 2012 – Jannar 2013, CET Govora forniet lil Oltchim gass u fwar li jammontaw għal bejn wieħed u ieħor RON 50 miljun, filwaqt li l-ħlasijiet riċevuti mingħand Oltchim matul l-istess perjodu kienu jammontaw għal madwar RON 8 miljun biss (106). Filwaqt li, minn naħa, ir-Rumanija tgħid li l-penali ta' RON 27 miljun jikkorrispondu għal dejn akbar, b'mod partikolari akkumulat tul perjodu itwal li jibda minn Frar 2008 u jintemm f'Diċembru 2012, min-naħa l-oħra r-Rumanija naqset milli tipprovdi ċifri affidabbli rigward il-penali eżatti li jikkorrispondu għad-dejn akkumulat matul il-perjodu vvalutat li jibda f'Settembru 2012 u jintemm f'Jannar 2013 (107).

Tabella 7

Evoluzzjoni tal-obbligazzjonijiet ta' Oltchim fir-rigward ta' Salrom

Sors: Kummenti ta' R/BDO dwar id-Deċiżjoni tal-Ftuħ, paġna 34.

Tabella 8

Evoluzzjoni tal-obbligazzjonijiet ta' Oltchim fir-rigward ta' CET Govora

Sors: Kummenti ta' R/BDO dwar id-Deċiżjoni tal-Ftuħ, paġna 33.

(255)

Fi kwalunkwe każ, fuq il-bażi tal-informazzjoni miġbura, il-Kummissjoni ssib li Salrom u CET Govora kellhom approċċ fundamentalment differenti lejn Oltchim.

(256)

Rigward Salrom, il-Kummissjoni tinnota li l-kumpanija ħadet id-deċiżjoni li tkompli bil-provvisti lil Oltchim (għall-bidu mill-ġdid tal-attivitajiet ta' din tal-aħħar f'Ottubru 2012) biss wara li kisbet garanzija għall-konsenji tagħha bi ħlas bil-quddiem. Barra minn hekk, bħala kumpens għat-tkomplija tal-provvista tas-soluzzjoni salina, kif ukoll għad-disaggregazzjoni tal-ħlas tad-djun, Salrom daħħlet il-kundizzjoni ta' garanzija fuq il-proprjetà immobbli, li fil-fatt ġiet approvata mill-Bord tad-Diretturi u sussegwentement anki mill-Assemblea Ġenerali Straordinarja tal-Azzjonisti tas-6 ta' Novembru 2012.

(257)

Rigward CET Govora, il-Kummissjoni tinnota li, għall-kuntrarju tas-sitwazzjoni ta' Salrom, il-kumpanija ma imponietx kundizzjoni simili bħal din ta' ħlasijiet bil-quddiem għat-tkomplija tal-konsenji tagħha, u lanqas ma daħħlet kundizzjoni simili ta' garanzija fuq il-proprjetà immobbli rigward id-djun preċedenti dovut lilha minn Oltchim.

(258)

Skont ir-Rapport ta' Euroinsol (jiġifieri t-trustee tal-insolvenza ta' CET Govora), il-maniġment ta' CET Govora approva l-kontinwazzjoni tar-relazzjonijiet kummerċjali ma' klijenti bħal Oltchim li jagħtu skontijiet jew il-possibbiltà ta' ħlas fi ħlasijiet parzjali: konsegwentement, ir-riċevibbli ta' CET Govora ta' RON 136 miljun fil-ftuħ tal-proċedura ta' insolvenza ta' Oltchim żdiedu ulterjorment b'RON 44 miljun reġistrati bħala riċevibbli matul il-proċedura ta' insolvenza (bejn l-1 ta' Jannar 2013 u t-30 ta' Ġunju 2016).

(259)

Barra minn hekk, ir-rapport tat-trustee tal-insolvenza ta' CET Govora juri li bejn l-1 ta' Jannar 2008 u t-30 ta' Ġunju 2016, il-kumpanija kontinwament ipprovdiet elettriku u fwar industrijali lil Oltchim bi prezzijiet ferm orħos mill-ispejjeż tal-produzzjoni (filwaqt li f'dan il-perjodu ġarrbet telf li jammonta għal RON 103,3 miljun (EUR 23,9 miljun). Fil-fatt, ir-rapport jikkonkludi li kuntratti tal-provvista bħal dawn ma' Oltchim jirrappreżentaw waħda mir-raġunijiet ewlenin għall-insolvenza ta' CET Govora stess. It-telf globali minħabba l-bejgħ tal-utilitajiet bi prezz imqaċċat lil Oltchim kien jammonta għal EUR 91 miljun peress li Oltchim kopriet 60 % biss mill-prezz tal-kostijiet tagħhom.

(260)

Barra minn hekk, il-provvista kontinwa minn CET Govora lil Oltchim mingħajr ebda tentattiv ta' negozjar u miżura biex tipproteġi l-pretensjonijiet tagħha kontra Oltchim (108) ġiet deċiża mill-Kunsill tal-Kontea ta' Vâlcea (109), fuq il-bażi ta' kunsiderazzjonijiet tal-ordni pubbliku li MEO ma kienx isegwi (110). Fi kwalunkwe każ, bħala riżultat ta' dawk id-Deċiżjonijiet tal-Kunsill tal-Kontea, CET Govora spiċċat f'insolvenza kif spjegat mit-trustee tal-insolvenza ta' CET Govora. Dan jindika n-nuqqas ta' konformità mal-MEO ta' tali deċiżjonijiet.

(261)

Kif ikkwotat minn PCC fil-premessa 133, it-trustee tal-insolvenza ta' CET Govora jinnota wkoll li “d-deċiżjoni li titwassal enerġija elettrika minn CET Govora ma kellha ebda motivazzjoni ekonomika valida u kienet politikament motivata u hi eżempju tajjeb ħafna ta' interferenza politika fil-ġestjoni tad-debitur”. L-istess trustee ddikjara wkoll (111) li “Għal aktar minn għaxar snin, CET baqgħet tagħmel tajjeb għal Oltchim. Bergħud ma jistax jitma' iljunfant. Biss biss kienet tilfet [RON] 136 miljun permezz tal-[P]jan ta' [R]iorganizzazzjoni. Dawn ifissru madwar EUR 35 miljun li aħna stajna nużaw biex nirranġaw il-magni, l-installazzjonijiet u t-tagħmir li għandhom aktar minn 30 sena, u li diġà qabżu ċ-ċiklu tal-prestazzjoni ottimali tagħhom.”

(262)

Barra minn hekk, it-trustee ta' CET Govora saħaq ukoll li “CET Govora dejjem sostniet il-proċess tal-produzzjoni ta' Oltchim SA billi forniet utilitajiet (fwar tal-proċessar u enerġija elettrika) bi prezzijiet ferm anqas mill-kost tal-produzzjoni […] CET Govora kienet l-unika kumpanija li kompliet tforni enerġija elettrika u fwar tal-proċessar lil Oltchim, u b'hekk mhux biss ħadet taħtha r-riskju ta' inadempjenza, iżda l-periklu akbar li tispiċċa insolventi hi stess […]. Il-maniġment ta' [CET Govora] naqas milli jieħu kwalunkwe azzjoni soda biex jara li l-pretensjonijiet jiġu rkupratu jew miżuri ta' prevenzjoni, pereżempju […] billi jwissi lid-debituri inadempjenti dwar ir-riskju ta' tqassim skont porzjonijiet jew saħansitra ta' sospensjoni sħiħa tal-konsenji tal-fwar u tal-enerġija elettrika […] jew kwalunkwe azzjoni tal-aħħar mument li tkun xierqa kull meta jkun hemm sinjal li t-tali pretensjonijiet qed jissograw li jintilfu: ir-rinegozjar tat-termini u tal-prezzijiet tal-konsenja u l-irbit ta' tali konsenja mal-kundizzjoni ta' ħlas tad-dejn pendenti. Barra minn hekk, aħna sibna wkoll sitwazzjoni partikolari li fiha l-pretensjoni ta' Alpha Bank kontra Oltchim li kienet tammonta għal RON 2,5 miljun ġiet akkwiżita skont il-valur par, għad li l-[P]jan ta' [R]iorganizzazzjoni kien jipprovdi għall-ħlas ta' 70 % biss tagħha.[…] Konsegwentement, l-insolvenza ta' Oltchim hi kawża oħra tal-insolvenza [ta'] CET Govora[…]. Fid-dawl tal-possibbiltajiet baxxi, u virtwalment ineżistenti, li Oltchim tiġi privatizzata għall-prezz tal-bejgħ ta' EUR 306 miljun stabbilit fil-[P]jan ta' [R]iorganizzazzjoni, [it-]30 % tal-pretensjoni mdaħħla minn CET Govora fir-rendikont ta' Oltchim, anki dan l-ammont kien telf għall-kumpanija”. Minbarra dan, kif enfasizzat mill-istampa Rumena f'dak iż-żmien (112), diversi dikjarazzjonijiet kienu jindikaw li l-motivazzjoni reali wara l-bidu mill-ġdid tal-konsenji lil Oltchim kienet li jiġu evitati l-għoti ta' sensja lil madwar 2 300 impjegat u l-katastrofi soċjali għar-reġjun miġjuba minn dan. L-ebda waħda minn dawn ma hi raġuni konformi mal-MEOP, f'kundizzjonijiet normali tas-suq.

(263)

Konsegwentement, il-Kummissjoni tqis li l-Miżura 2 tagħti lil Oltchim vantaġġ selettiv rigward CET Govora iżda mhux rigward Salrom. Il-vantaġġ rekuperabbli li CET Govora tat lil Oltchim permezz tal-protezzjoni insuffiċjenti tal-pretensjonijiet tagħha (jiġifieri billi m'għamlitx prerekwiżit tal-ħlas lura tal-pretensjonijiet storiċi jew billi ma talbitx garanziji fuq titoli tal-proprjetà immobbli għal djun preċedenti hekk kif għamlet Salrom u billi ma imponietx ħlasijiet bil-quddiem għall-bidu mil-ġdid tal-konsenji) hu rappreżentat mill-ammont ta' penali li jirrappreżentaw il-valur ta' żmien tan-nuqqas ta' rkupru minn CET Govora tal-pretensjonijiet tagħha għal Oltchim, meta ħadet deċiżjoni li tkompli l-provvisti lil Oltchim, tul il-perjodu Settembru 2012 – Jannar 2013. Kif diġà spjegat fil-paragrafi 253 u 254 aktar 'il fuq, skont l-informazzjoni pprovduta minn R/BDO, it-tali penali ammontaw għal bejn wieħed u ieħor RON 27 miljun (madwar EUR 6 miljun). Madankollu, iċ-ċifri ppreżentati sussegwentement mir-Rumanija ma kinux konklużivi dwar l-ammont eżatt li jikkorrispondi għall-perjodu vvalutat.

(264)

Kif spjegat fil-premessi 51 sa 73, il-Pjan imħejji mir-riċeventi mqabbda mill-Qorti – diskuss fid-9 ta' Marzu 2015 u approvat mill-kredituri ta' Oltchim – kien jinvolvi rinunzji totali jew sinifikanti tad-dejn għall-kredituri ta' Oltchim, peress li l-prezz mistenni tal-bejgħ ta' Oltchim SPV ma kienx suffiċjenti biex ikopri d-dejn sħiħ ta' Oltchim SA.

(265)

L-ewwel u qabel kollox, billi ffavoriet de facto  (113) bejgħ en bloc , u llimitat it-tqabbil ta' dak ix-xenarju ma' likwidazzjoni sħiħa ta' Oltchim, AAAS ma aġixxietx bħala MEO. Skont il-liġi Rumena (114), AAAS kellha l-mezzi legali biex tipproponi l-pjan ta' riorganizzazzjoni tagħha stess għaliex AAAS kellha (b'mod individwali, u flimkien ma' SoEs oħra) aktar minn 20 % mill-pretensjonijiet ma' Oltchim; MEO kien jagħmel dan biex jirkupra dak kollu li jista' mill-pretensjonijiet tiegħu. F'dik is-sitwazzjoni, MEO kien jivvaluta u jsegwi l-alternattiva ta' proċess tal-bejgħ permezz ta' raggruppamenti ta' assi funzjonali. It-tielet għażla bħal din kienet toffri possibbiltajiet akbar ta' suċċess mill-Pjan, b'mod partikolari fid-dawl tas-sitt tentattivi li fallew fl-2001, fl-2003, fl-2006, fl-2007, fl-2008 u fl-2012 biex Oltchim tiġi privatizzata b'mod simili għat-tentattiv fi blokka waħda previst fil-Pjan ta' Riorganizzazzjoni permezz tal-bejgħ ta' Oltchim SPV: il-Pjan ta' Riorganizzazzjoni propost kien jimplika trasferiment tal-assi, tal-impjegati u tal-kuntratti lill-SPV u, b'hekk, kien ta' natura simili għal dik tat-tentattivi preċedenti.

(266)

Alternattiva bħal din kienet iżżid l-irkupru mistenni għall-kredituri billi tippermetti aktar taħlitiet ta' offerti, mingħajr ma jiġi injorat xerrej individwali wieħed u mingħajr ma tiġi prekluża l-possibbiltà li parti minn Oltchim tinbiegħ biċċa, biċċa fl-istess ħin bħala parti minn dan il-proċess, fuq il-bażi tal-interess espress mill-offerenti fi stadju bikri tal-proċedura għar-raggruppamenti proposti għall-bejgħ. B'hekk, il-prezz mistenni minn proċess tal-bejgħ miftuħ u trasparenti permezz tar-raggruppamenti ta' assi seta' jkun biss ogħla, minn naħa, mid-dħul ferm inċert mill-privatizzazzjoni en bloc prevista fil-Pjan ta' Riorganizzazzjoni u, min-naħa l-oħra, mid-dħul mil-likwidazzjoni.

(267)

It-tieni, anki jekk wieħed jiffoka fuq it-tqabbil ristrett b'mod żbaljat li għamlu R/BDO bejn ix-xenarju ta' likwidazzjoni u l-Pjan ta' Riorganizzazzjoni propost (li jeskludi proċess tal-bejgħ miftuħ u trasparenti permezz ta' raggruppamenti ta' assi), li fuqu bbażaw il-kredituri pubbliċi, dan it-tqabbil kien żbaljat ukoll għaliex:

(268)

Rigward il-merti tal-Pjan ta' Riorganizzazzjoni, dawn ġew sopravvalutati mill-kredituri li approvaw il-Pjan ta' Riorganizzazzjoni, minħabba dan li ġej:

(269)

Għall-kuntrarju, rigward ir-rikavati potenzjali tal-likwidazzjoni (120), dawn kienu ssottovalutati mill-kredituri tal-Istat meta approvaw il-Pjan ta' riorganizzazzjoni billi bbażaw fuq ir-rapporti ta' R/BDO, minħabba dawn li ġejjin:

(270)

Il-Kummissjoni tqis li l-argumenti mqajma mir-Rumanija rigward il-vot pari passu allegat tal-kredituri tal-Istat (miġbura fil-qosor fil-premessi 168 sa 170) huma infondati: b'mod partikolari, la AAAS u lanqas Electrica ma setgħu jitqiesu bħala pari passu mal-kredituri garantiti peress li ħafna mill-pretensjonijiet tagħhom kienu jappartjenu għall-kategorija tal-kredituri baġitarji (rispettivament il-kategorija tal-kredituri mhux garantiti).

(271)

Il-Kummissjoni lanqas ma tista' tqis li l-kredituri tal-Istat fil-kategoriji tal-kredituri baġitarji (AAAS, l-Amministrazzjoni tal-Ilma tar-Rumanija) u l-fornituri essenzjali (CET Govora, l-Amministrazzjoni Rumena tal-Ilma) jissodisfaw il-kundizzjonijiet ta' “pari passu” fid-dawl tan-nuqqas ta' kredituri privati f'dawk il-kategoriji. Rigward il-kredituri mhux garantiti, il-Kummissjoni tinnota wkoll li l-awtoritajiet Rumeni jagħrfu l-irrilevanza tat-test ta' pari passu għal dawk li jqisu n-nuqqas tal-irkupru għal dawk il-kredituri fil-Pjan ta' Riorganizzazzjoni; il-Kummissjoni tosserva wkoll li Electrica u Salrom ma kinux f'sitwazzjoni komparabbli għal kredituri mhux garantiti oħra peress li għandhom pretensjonijiet kemm bħala kredituri garantiti kif ukoll bħala kredituri mhux garantiti.

(272)

Barra minn hekk, l-awtoritajiet Rumeni ddikjaraw li s-sempliċi approvazzjoni tal-Pjan mill-kredituri garantiti (li jaqblu dwar tħassir ta' bejn madwar 20 % u 27 %) kienet prova li l-pretensjonijiet tal-kredituri baġitarji kienu inutli; il-kredituri garantiti setgħu jiksbu tħassir inferjuri skont ir-Rumanija, li kieku ma aċċettawx li l-Pjan jiżgura rkupru minimu ta' 20 % għall-kredituri baġitarji u 30 % għall-fornituri essenzjali biex jiżguraw li dawn iż-żewġ kategoriji msemmija l-aħħar kienu jivvotaw b'mod pożittiv għall-Pjan. Madankollu, dawn l-argumenti huma żbaljati: li kieku ma kien possibbli ebda rkupru affattu għall-kredituri baġitarji u għall-fornituri essenzjali f'xenarju ta' likwidazzjoni, il-fornituri essenzjali kien ikollhom probabbiltà kbira ħafna li jaċċettaw rati ta' rkupru ferm iżgħar bħal 5 % (jew anki 10 %) mill-pretensjonijiet tagħhom meta mqabbla mar-rata ta' rkupru ta' 20-30 % li kisbu fil-Pjan ta' Riorganizzazzjoni.

(273)

L-awtoritajiet Rumeni enfasizzaw ukoll li ħafna kredituri privati vvotaw favur il-Pjan b'sostenn tal-konformità mal-MEO tal-votazzjoni tal-kredituri tal-Istat. Fil-fatt, filwaqt li l-kredituri privati li għandhom dejn garantit b'mod esklussiv jew maġġoranza tad-dejn garantit fil-parti l-kbira vvotaw favur il-Pjan, b'dawk li kellhom dejn mhux garantit b'mod esklussiv li opponewh (126). Dan hu prova ulterjuri li l-vot minn AAAS u Electrica favur il-Pjan ma kienx konformi mal-MEO, peress li, fid-dawl tat-tħassir sinifikanti tad-dejn u tas-sehem ta' dejn mhux garantit tagħhom, il-pożizzjoni tagħhom kienet eqreb għal dik tal-kredituri privati msemmija l-aħħar, li vvotaw kontrih.

(274)

Barra minn hekk, fid-dawl tal-iżbalji fit-tqabbil ta' R/BDO bejn il-Pjan ta' Riorganizzazzjoni u l-likwidazzjoni, MEO diliġenti kien jieħu b'attenzjoni kbira r-riżultati ta' dan l-istudju f'kunsiderazzjoni fiż-żmien tal-votazzjoni. Iżda l-kredituri privati ma setgħux jieħdu f'kunsiderazzjoni b'mod raġonevoli d-dikjarazzjonijiet ripetuti (ara l-premessi 27, 28, 30) tal-azzjonist ta' Oltchim SA li jimplikaw li l-Istat Rumen ma kienx ser iħalli lil Oltchim tfalli; dawn ma setgħux jinjoraw b'mod raġonevoli l-Memorandum approvat mill-Prim Ministru, u l-possibbiltà li, f'kuntest bħal dan, l-Istat Rumen kien se jipprova jagħti aktar għajnuna lil Oltchim, biex f'dawn iċ-ċirkustanzi l-Pjan ta' Riorganizzazzjoni jkun aktar favorevoli mil-likwidazzjoni għalihom, preċiżament minħabba l-possibbiltà ta' għajnuna ulterjuri lil Oltchim. Dan jispjega l-voti pożittivi jew l-astensjonijiet min-naħa tal-kredituri privati, filwaqt li oħrajn, bħal Electrica Furnizare vvotaw kontra l-Pjan. Kif sostnut minn PCC, il-kredituri privati li approvaw il-Pjan ta' Riorganizzazzjoni aktar kienu qed jaġixxu bħala segwaċi tad-deċiżjoni tal-Istat milli bħala promoturi tal-Pjan ta' Riorganizzazzjoni.

(275)

Fuq il-bażi tal-premessi 270 sa 274, il-Kummissjoni tikkonkludi li l-vot tal-kredituri pubbliċi ma kienx pari passu.

(276)

Fuq il-bażi tal-kunsiderazzjonijiet imsemmija aktar 'il fuq, fid-dawl tad-diversi dgħufijiet tal-pjanijiet ta' likwidazzjoni u ta' Riorganizzazzjoni ppreżentati lill-kredituri fir-rapport dwar ir-Riorganizzazzjoni minn R/BDO u fin-nuqqas ta' mġiba pari passu tal-kredituri pubbliċi ma' dik tal-kredituri privati fi kwalunkwe waħda mill-kategoriji, il-Kummissjoni tqis li kreditur diliġenti u prudenti f'ekonomija tas-suq kien jipproċessa bit-test tiegħu stess biex iqabbel il-pjan ta' likwidazzjoni u ta' Riorganizzazzjoni fiż-żmien tal-votazzjoni.

(277)

L-istudju ta' AAAS kien konċiż ħafna u, filwaqt li kkritika l-ammont tal-obbligazzjonijiet ambjentali, b'mod partikolari dan ma qiesx l-iżbalji fil-valur tal-pjan ta' Riorganizzazzjoni u, b'hekk, ikkonkluda b'mod imqarraq li l-Pjan kien qed jimmassimizza l-irkupru tiegħu. Fil-preżentazzjoni tagħha, Electrica ma qisitx li kien siewi li twettaq it-test tal-ekonomija tas-suq ex ante tagħha stess, u bbażat fuq l-istudju ta' R/BDO minkejja d-difetti tiegħu. L-awtoritajiet Rumeni ma pprovdewx xi evidenza li Salrom, l-Amministrazzjoni Nazzjonali tal-Ilma jew CET Govora wettqu xi studju intern ta' kreditur f'ekonomija tas-suq fiż-żmien tal-votazzjoni.

(278)

Il-Kummissjoni wettqet test tal-MEO, spjegat f'dettall fl-Anness Tekniku, fuq il-bażi tad-data disponibbli għall-kredituri fiż-żmien tal-votazzjoni. F'din il-verżjoni finali tat-test tal-MEO, il-Kummissjoni qieset, meta ġġustifikati u xierqa, il-kummenti li l-awtoritajiet Rumeni ġew mistiedna jipprovdu fuq verżjoni abbozz ta' dan it-test mill-Kummissjoni matul il-proċedimenti formali (ara l-premessa (172)).

(279)

Ir-riżultati ta' din il-valutazzjoni juru li r-rikavati mil-likwidazzjoni huma ogħla jew daqs dawk tal-Pjan ta' Riorganizzazzjoni fit-tliet xenarji kollha meqjusa għal AAAS, għall-Amministrazzjoni Nazzjonali tal-Ilma, għal Salrom, għal Electrica u għal CET Govora.

(280)

Fid-dawl tad-diversi tentattivi li fallew fl-imgħoddi, MEO kien iqis ukoll il-fatt li kien hemm probabbiltà għolja ta' falliment jew ta' dewmien serju marbut mal-Pjan ta' Riorganizzazzjoni: l-involviment b'dak il-mod kien ifisser li Oltchim SA kienet titħalla tidħol f'dejn kurrenti addizzjonali sinifikanti, li jkollu jitnaqqas minn qabel mir-rikavati ta' likwidazzjoni, f'każ li l-bejgħ ta' Oltchim SPV previst fil-Pjan ta' Riorganizzazzjoni jfalli (jew jieħu aktar żmien milli mistenni). Konsegwentement, ir-rikavati tal-pjan ta' Riorganizzazzjoni saħansitra tqiesu bħala iktar baxxi għall-kredituri, minkejja l-kostijiet amministrattivi u legali inevitabbli li jkunu jġarrbu biex jissorveljaw internament l-iskopertura tagħhom għal Oltchim matul il-Pjan.

(281)

Konsegwentement, kif muri permezz tat-test deskritt fl-Anness Tekniku, AAAS, Electrica, Salrom u l-Amministrazzjoni Nazzjonali tal-Ilma ma aġixxewx bħala MEO meta ffavorixxew il-pjan ta' Riorganizzazzjoni fuq il-proċedura ta' likwidazzjoni, peress li r-rikavati mistennija tal-Pjan kienu iżgħar u ferm aktar inċerti. Il-vot tagħhom ta vantaġġ lil Oltchim li kien jammonta għat-tħassir li huma aċċettaw. Iċ-ċirkustanzi speċifiċi inkwistjoni b'rabta ma' CET Govora spjegati f'dettall fil-premessi 246 u 248 ma ppermettewx lill-Kummissjoni biex toħroġ konklużjoni dwar il-preżenza ta' vantaġġ ekonomiku għal dan il-kreditur b'rabta mal-Miżura 3.

(282)

Il-Kummissjoni tinnota wkoll li dan it-tħassir li fil-fatt ġie implimentat, kif muri mir-riżultat eċċezzjonali, irreġistrat minn Oltchim fl-2015, b'rabta mat-tħassir aggregat mill-kredituri pubbliċi u privati kien jammonta għal EUR 518-il miljun (ara l-premessi 91 u 268(b)) u jirrappreżenta aktar minn 95 % tal-anqas limitu tat-tħassir approvat mill-kredituri (ara t-Tabella 4) fil-Pjan, approvat mill-Qorti.

(283)

Konsegwentement, il-Kummissjoni tqis li, bħala parti mill-Miżura 3, filwaqt li l-vot ta' CET Govora ma kienx jinvolvi vantaġġ għal Oltchim, il-voti ta' AAAS, ta' Electrica, ta' Salrom u tal-Amministrazzjoni Nazzjonali tal-Ilma pprovdew vantaġġ ekonomiku selettiv lil Oltchim li jlaħħaq mal-RON 1 486 miljun (EUR 327 miljun (127) ), li jikkorrispondi għal-limitu inferjuri tal-medda ta' tħassir li tvarja bejn RON 1,486 miljun (EUR 327 miljun (128) ) u RON 1 525 miljun (EUR 335 miljun) maqbul minn dawk il-kredituri fil-pjan ta' Riorganizzazzjoni, kif spjegat f'dettall fit-tabella li ġejja:

(284)

Wara l-valutazzjoni ta' kull miżura b'mod separat, il-Kummissjoni tqis li hemm bżonn li ssir valutazzjoni aktar ġenerali tal-istrateġija tal-Istat rigward Oltchim fil-perjodu bejn Settembru 2012 u April 2015.

(285)

Il-Miżuri Nri 1, 2 u 3 aktar 'il fuq fil-fatt huma marbutin ma' xulxin b'mod intrinsiku u huma parti mill-istess objettiv ewlieni, jiġifieri s-sostenn u ż-żamma ta' Oltchim fis-suq, u s-salvagwardja tal-impjiegi tal-impjegati tagħha, permezz tan-nuqqas ta' eżekuzzjoni tad-djun/tat-tħassir tad-djun/tal-provvista ssoktata. Dawn il-miżuri kollha ġew allokati u garantiti bl-iffirmar tal-Memorandum imniedi mill-Istat u approvat mill-Prim Ministru (ara l-premessi 1, 31, 150, 203, 205 aktar 'il fuq). Barra minn hekk, dawn il-miżuri kienu sostnuti minn dikjarazzjonijiet ripetuti fl-istampa minn rappreżentanti ta' livell għoli tal-Istat, li għamluha ċara li l-Gvern kellu interess strateġiku li jżomm lil Oltchim miftuħa u li kien biħsiebu jevita l-likwidazzjoni tagħha akkost ta' kollox (ara l-premessi 28, 30, 31, 204(d), 204(e), 204(f), 204(g), 204(h), u 204(i).

(286)

Din l-istrateġija tidher saħansitra aktar ċara meta jitqiesu (i) l-istess identità ta' dawk li ħadu l-miżuri u l-votazzjoni tagħhom rigward ir-riorganizzazzjoni ta' Oltchim, (ii) il-kronoloġija tal-miżuri inkwistjoni, (iii) l-iskop tagħhom, jiġifieri ż-żamma ta' Oltchim miftuħa akkost ta' kollox u l-evitar tal-likwidazzjoni; u (iv) is-sitwazzjoni (finanzjarja u r-riskju) tal-impriża fiż-żmien li ttieħdet id-deċiżjoni biex tittieħed kull waħda mill-miżuri, jiġifieri li Oltchim kienet viċin l-insolvenza (129).

(287)

Il-Miżura 3 twassal għal vantaġġ favur Oltchim li ma kienx separabbli mill-Miżuri 1 u 2. Il-Miżura 3 ma kinitx teżisti mingħajr il-miżuri numru 1 u 2. Id-djun akkumulati ma' AAAS taħt il-Miżura 1 u ma' CET Govora minħabba l-provvisti ssoktati mhux imħallsa taħt il-Miżura 2 aktar tard tħassru taħt il-Miżura 3.

(288)

Skont il-Memorandum, l-atturi pubbliċi u privati li kienu firmatarji għalih qablu li jikkooperaw biex jiżviluppaw “Strateġija Sostenibbli għat-tnedija mill-ġdid” ta' Oltchim bl-objettiv ewlieni: (i) “li jitħeġġu u jiġu protetti l-kredituri, b'mod partikolari l-impjegati” għall-bidu mill-ġdid bis-sħiħ tal-attivitajiet profittabbli u għall-operar ta' dawn fit-tul, filwaqt li jiġi żgurat livell adegwat ta' fiduċja biex huma jkunu jappoġġjaw l-istrateġija, (ii) li l-Partijiet jitħallew jikkomunikaw mas-swieq, mal-komunità internazzjonali u mal-pubbliku ġenerali li huma qed jivvalutaw soluzzjoni sostenibbli fit-tul għal Oltchim, u (iii) li tiġi żgurata r-riorganizzazzjoni kkontrollata ta' Oltchim.

(289)

B'mod ġenerali, MEO f'sitwazzjoni li hi l-aktar qrib dik ta' AAAS - wara li jqis id-diversi tentattivi li fallew ta' privatizzazzjoni fi blokka waħda - l-ewwel kien jipprova jimponi l-fehma tiegħu ta' pjan ta' riorganizzazzjoni, b'mod partikolari fuq il-bażi ta' bejgħ permezz ta' raggruppamenti ta' assi. AAAS kellha l-mezzi (ara l-premessa 265) biex timmassimizza l-irkupru tad-dejn tagħha mingħand Oltchim billi l-ewwel titlob mingħand il-Qorti eżekuzzjoni tal-pretensjonijiet tagħha, u, b'hekk, tniedi l-insolvenza ta' din tal-aħħar, u mbagħad tressaq kif previst mil-liġi dwar l-insolvenza, il-proposta tagħha stess għal pjan ta' riorganizzazzjoni (Artikolu 94(1) tal-liġi dwar l-insolvenza).

(290)

Bħala konklużjoni, peress li l-Miżura 3 ma tistax tiġi separata b'mod raġonevoli mill-Miżuri 1 u 2, dawn il-miżuri kollha jikkostitwixxu sensiela ta' interventi marbuta ma' xulxin imputabbli lill-Istat li jagħtu lil Oltchim vantaġġ, kif propost fil-Memorandum.

(291)

Konsegwentement, b'mod ġenerali, il-Kummissjoni tqis li ngħata vantaġġ selettiv, ekonomiku totali minn AAAS lil Oltchim fl-ammont ta' EUR 217 827 557  (130) (RON 990 125 260), u l-vantaġġ ekonomiku selettiv aggregat mogħti lil Oltchim mill-kredituri AAAS, Salrom, CET Govora, l-Amministrazzjoni Nazzjonali tal-Ilma u Electrica jilħaq il-RON 1 516 598 405 (EUR 333 651 649) għall-Miżuri 1 u 3 flimkien (131) li għandu jkun miżjud bil-vantaġġ relatat mal-Miżura 2.

(292)

L-appoġġ pubbliku jista' jfixkel il-kompetizzjoni anki jekk dan ma jgħinx lill-impriża riċeventi biex tespandi u tikseb sehem fis-suq. Hu suffiċjenti li l-għajnuna tippermettilha li żżomm pożizzjoni kompetittiva aktar b'saħħitha milli kieku ma ġietx ipprovduta l-għajnuna. F'dan il-kuntest, biex jitqies li l-għajnuna qed tiddistorti l-kompetizzjoni, normalment hu biżżejjed li l-għajnuna tagħti vantaġġ lill-benefiċjarju billi teżentah mill-ispejjeż li kieku kien ikollu jħallas matul l-operat tan-negozju tiegħu ta' kuljum (132).

(293)

L-appoġġ pubbliku għall-impriżi jikkostitwixxi biss għajnuna mill-Istat skont l-Artikolu 107(1) TFUE sa fejn “jaffettwa l-kummerċ bejn l-Istati Membri”. F'dak ir-rigward, mhuwiex meħtieġ li jiġi stabbilit li l-għajnuna għandha effett reali fuq il-kummerċ bejn l-Istati Membri iżda sempliċiment jekk l-għajnuna jistax ikollha impatt fuq dan il-kummerċ (133). B'mod partikolari, il-Qrati tal-Unjoni stabbilixxew li “fejn l-għajnuna finanzjarja mill-Istat issaħħaħ il-pożizzjoni ta' impriża meta mqabbla ma' impriżi oħrajn li qed jikkompetu fil-kummerċ intra-[Unjoni], dawn tal-aħħar għandhom jitqiesu li ġew affettwati mill-għajnuna.” (134)

(294)

Is-sostenn pubbliku jista' jitqies bħala li huwa kapaċi jaffettwa l-kummerċ bejn l-Istati Membri anki jekk ir-riċevitur ma jkunx direttament involut f'kummerċ transfruntier. Pereżempju, is-sussidju jista' jagħmilha aktar diffiċli għall-operaturi fi Stati Membri oħra biex jidħlu fis-suq billi tinżamm jew tiżdied il-provvista lokali (135).

(295)

Il-Kummissjoni tqis li, billi taw lil Oltchim il-possibbiltà li tkompli bl-attivitajiet tagħha, terġa' torganizza l-attivitajiet tagħha u tħassar djun pubbliċi, il-miżuri jistgħu jtejbu l-pożizzjoni kompetittiva ta' Oltchim meta mqabbla mal-kompetituri tagħha fis-suq intern.

(296)

Oltchim hi attiva fil-produzzjoni ta' sustanzi kimiċi bażiċi, jiġifieri fi swieq kompetittivi fl-Ewropa u madwar id-dinja.

(297)

Għalhekk, il-Kummissjoni tikkonkludi li l-miżuri għandhom il-potenzjal li jfixklu jew jheddu li jfixklu l-kompetizzjoni u jaffettwaw il-kummerċ bejn l-Istati Membri.

(298)

Peress li l-kundizzjonijiet kollha għall-eżistenza tal-għajnuna mill-Istat skont it-tifsira tal-Artikolu 107(1) TFUE (ara s-subtaqsimiet 6.1.1. sa 6.1.3 aktar 'il fuq) huma ssodisfati għat-tliet miżuri kollha kemm huma, il-Kummissjoni tikkonkludi li:

(299)

Il-Miżuri 1, 2 u 3 meħuda flimkien jikkostitwixxu għajnuna għal AAAS, għall-Amministrazzjoni Nazzjonali tal-Ilma, għal Salrom, għal CET Govora u għal Electrica. Fuq il-bażi tal-premessa 291 aktar 'il fuq, il-Kummissjoni tikkonkludi li l-Istat Rumen ta lil Oltchim għajnuna ekwivalenti għal RON 1 516 598 405 (EUR 333 651 649) li għandha tiżdied bil-vantaġġ relatat mal-Miżura 2.

(300)

Il-Kummissjoni tinnota li l-Miżuri 1, 2 (rigward CET Govora) u 3 (rigward AAAS, l-Amministrazzjoni Nazzjonali tal-Ilma, Salrom, Electrica) ingħataw fis-snin 2012-2015 bi ksur tal-obbligi tal-waqfien totali stabbiliti fl-Artikolu 108(3) TFUE.

(301)

Għaldaqstant, peress li l-miżuri nstabu li jikkostitwixxu għajnuna mill-Istat skont it-tifsira tal-Artikolu 107(1) TFUE, il-Kummissjoni tikkonkludi li dawn jikkostitwixxu għajnuna illegali mill-Istat.

(302)

Hi ġurisprudenza stabbilita li Stat Membru li jfittex li jitħalla jagħti għajnuna permezz ta' deroga mir-regoli tat-Trattati għandu dmir li jikkollabora mal-Kummissjoni.

(303)

Fit-twettiq ta' dak id-dmir, dan irid b'mod partikolari jipprovdi l-informazzjoni kollha biex jippermetti lill-Kummissjoni biex tivverifika li l-kundizzjonijiet għad-deroga mfittxija huma ssodisfati (136). F'dan il-każ, l-awtoritajiet Rumeni ma talbux xi bażi ġuridika għall-valutazzjoni tal-kompatibbiltà.

(304)

Peress li Oltchim tikkwalifika bħala impriża f'diffikultà (ara l-premessa 88), l-unika bażi għall-kompatibbiltà identifikata mill-Kummissjoni fid-deċiżjoni tal-ftuħ (137) kienet għajnuna għas-salvataġġ u għar-ristrutturar imsejsa fuq il-Linji Gwida tal-2014 dwar l-R&R.

(305)

Tabilħaqq, l-awtoritajiet Rumeni (fi stadju pjuttost tard fil-proċedimenti (138)) iddikjaraw l-eliġibbiltà possibbli tal-miżuri bħala għajnuna għar-ristrutturar u qajmu l-possibbiltà li jikkwalifikaw il-Pjan ta' Riorganizzazzjoni bħala pjan għar-ristrutturar għal dan l-għan. Għal dan l-għan, ir-Rumanija tenfasizza l-progress konsiderevoli ħafna li għamlet il-kumpanija matul il-perjodu ta' riorganizzazzjoni.

(306)

Madankollu, wara l-fażi ta' investigazzjoni, il-Kummissjoni tikkonkludi li l-kriterji għall-għajnuna kompatibbli għas-salvataġġ jew għar-ristrutturar stabbiliti fil-Linji Gwida dwar l-R&R mhumiex kompatibbli ma' kwalunkwe waħda mill-miżuri, anki skont il-Pjan ta' Riorganizzazzjoni hekk kif ġie approvat u implimentat mir-Rumanija.

(307)

Speċifikament, bħala l-minimu assolut, il-Kummissjoni ma setgħetx tidentifika kwalunkwe kontribuzzjoni sinifikanti reali, attwali u suffiċjenti għall-kostijiet ta' ristrutturar li jistgħu jkunu sostnuti mir-riżorsi proprji ta' Oltchim, skont it-tifsira tal-punt 35 tal-Linji Gwida tal-2014 dwar l-R&R. L-ammont ta' għajnuna sostanzjalment jaqbeż il-prezz tal-bejgħ miksub b'mod ieħor wara s-sejħa għal offerti. B'mod konkret, l-ammont kumplessiv tal-għajnuna jisboq it-EUR 333 miljun (ċifra li tikkorrispondi biss għall-Miżuri 1 u 3 flimkien u li għandha tkun ikkomplementata bl-ammont ta' għajnuna li jikkorrispondi għall-Miżura 2), filwaqt li l-ammont miksub mill-bejgħ ta' ħafna mill-assi ta' Oltchim ma jaqbiżx il-EUR 143 miljun, li hu sostanzjalment anqas mil-limitu minimu ta' kontribuzzjoni proprja ta' 50 % meħtieġ mil-Linji Gwida tal-2014 dwar l-R&R (139). Il-Pjan ta' Riorganizzazzjoni ta' Oltchim għadu ma twettaqx sa din id-data, minħabba li s-sejħa għal offerti l-ġdida għall-bejgħ tal-assi li jifdal ta' Oltchim għadha għaddejja u mhix mistennija titlesta qabel April 2019. Għaldaqstant, il-Kummissjoni tqis li ma jista' jittieħed f'kunsiderazzjoni ebda sors potenzjali addizzjonali ta' finanzjament mill-bejgħ ta' assi għall-finijiet ta' determinazzjoni tal-kontribuzzjoni proprja għajr dawk diġà reġistrati bħala parti mid-dħul mill-bejgħ li jikkorrispondi għall-ewwel sejħa għal offerti li tlestiet.

(308)

Barra minn hekk, skont il-punt 65 tal-Linji Gwida tal-2014 dwar l-R&R, “meta s-sostenn mill-Istat jingħata f'forma li ssaħħaħ il-pożizzjoni tal-ekwità tal-benefiċjarju, pereżempju meta l-Istat jipprovdi […] jew iħassar id-dejn […] l-għajnuna biex ikun kopert it-telf għandha tingħata biss b'termini li jinvolvu qsim adegwat tal-piż mill-investituri eżistenti”. Ir-Rumanija ma pprovdietx informazzjoni li turi qsim adegwat tal-piż skont il-Pjan ta' Riorganizzazzjoni. Il-punt 67 tal-Linji Gwida dwar l-R&R jeħtieġ ukoll li “kwalunkwe għajnuna mill-Istat li ssaħħaħ il-pożizzjoni tal-ekwità tal-benefiċjarju għandha tingħata b'termini li jagħtu lill-Istat sehem raġonevoli ta' gwadann fil-futur fil-valur tal-benefiċjarju, fid-dawl tal-ammont ta' ekwità tal-Istat injettat meta mqabbel mal-ekwità li jifdal tal-kumpanija wara li jingħadd it-telf”. Fil-każ ta' Oltchim, ma ntweriex qsim adegwat tal-piż bħal dan.

(309)

Finalment, fid-dawl tal-pożizzjoni importanti ta' Oltchim fis-settur kimiku fir-Rumanija, u tal-ishma mis-suq sinifikanti tagħha fid-diversi swieq tal-prodotti u ġeografiċi fejn hi attiva, u f'konformità mat-taqsima 3.6.2 tal-Linji Gwida dwar l-R&R, Oltchim missha implimentat miżuri biex tillimita d-distorsjonijiet tal-kompetizzjoni maħluqa mill-għajnuna. F'dan il-kuntest, il-Kummissjoni tinnota li r-Rumanija naqset milli tipproponi kwalunkwe miżura kompensatorja strutturali jew relatata mal-imġiba.

(310)

Konsegwentement, il-Kummissjoni tikkonkludi li l-Pjan ta' Riorganizzazzjoni ma jistax jissodisfa diversi minn fost il-kundizzjonijiet kumulattivi meħtieġa mil-Linji Gwida tal-2014 dwar l-R&R u, għaldaqstant, ma tistax tkompli timxi fuq din il-linja minkejja d-disponibbiltà ddikjarata tar-Rumanija li tagħmel aktar sottomissjonijiet għal dan l-għan.

(311)

Skont it-TFUE u l-ġurisprudenza stabbilita tal-Qrati tal-Unjoni, il-Kummissjoni hi kompetenti li tiddeċiedi li l-Istat Membru kkonċernat irid jabolixxi jew jibdel l-għajnuna meta ssib li din tkun inkompatibbli mas-suq intern (140). Il-Qrati tal-Unjoni sostnew ukoll b'mod konsistenti li l-obbligu fuq Stat Membru li jabolixxi l-għajnuna li l-Kummissjoni tqisha inkompatibbli mas-suq intern hu mfassal biex jistabbilixxi mill-ġdid is-sitwazzjoni kif kienet qabel (141).

(312)

F'dan il-kuntest, il-Qrati tal-Unjoni stabbilixxew li dan l-objettiv jintlaħaq ġaladarba r-riċevitur ikun ħallas lura l-ammonti mogħtija bħala għajnuna illegali, b'hekk jitlef il-vantaġġ li jkun ibbenefika minnu fuq il-kompetituri tiegħu fis-suq, u tkun ġiet restawrata s-sitwazzjoni ta' qabel il-ħlas tal-għajnuna (142).

(313)

B'konformità mal-ġurisprudenza, l-Artikolu 16(1) tar-Regolament tal-Kunsill (UE) 2015/1589 (143) ddikjara li “[f]ejn jittieħdu deċiżjonijiet negattivi f'każijiet ta' għajnuna kontra l-liġi, il-Kummissjoni għandha tiddeċiedi li l-Istat Membru kkonċernat għandu jieħu l-miżuri kollha meħtieġa biex jirkupra l-għajnuna mill-benefiċjarju […]”.

(314)

Kif muri fil-premessa 291 u 299, l-għajnuna mogħtija lil Oltchim permezz tat-tliet miżuri flimkien – li tammonta għal RON 1 516 598 405 (EUR 333 651 649) miljun (għall-Miżuri 1 u 3 flimkien), li għandhom jiżdiedu bl-ammont tal-għajnuna relatat mal-Miżura 2 – ġiet implimentata bi ksur tal-Artikolu 108 TFUE, u għandha titqies bħala għajnuna illegali u inkompatibbli. Għaldaqstant, din l-għajnuna trid tiġi rkuprata sabiex terġa' tiġi stabbilita s-sitwazzjoni li kienet teżisti fis-suq qabel ma ngħataw.

(315)

L-irkupru għandu għalhekk ikopri ż-żmien minn meta seħħ il-vantaġġ għall-benefiċjarju (144), jiġifieri meta l-għajnuna tpoġġiet għad-dispożizzjoni tal-benefiċjarju, sal-irkupru effettiv tagħha u l-ammont li għandu jiġi rkuprat għandu jġarrab l-imgħax sal-irkupru effettiv.

(316)

Fil-każ ta' deċiżjoni negattiva tal-Kummissjoni rigward l-irkupru ta' għajnuna inkompatibbli lil impriża fil-kuntest tal-Artikoli 107 u 108 TFUE, l-Istat Membru inkwistjoni jintalab jirkupra l-għajnuna inkompatibbli. L-obbligu ta' rkupru jista' jiġi estiż għal kumpanija ġdida, li l-kumpanija inkwistjoni tkun trasferixxiet jew biegħet parti mill-assi tagħha lilha, meta dik l-istruttura ta' trasferiment jew ta' bejgħ tirriżulta fill-konklużjoni li hemm kontinwità ekonomika bejn iż-żewġ kumpaniji (146).

(317)

Skont id-deċiżjoni tal-Qorti f'L-Italja u SIM 2 vs Il-Kummissjoni, (147) li fuqha l-Kummissjoni bbażat id-deċiżjonijiet tagħha dwar Olympic Airlines, Alitalia u SERNAM, (148) il-valutazzjoni tal-kontinwità ekonomika bejn l-entità “l-antika” u l-istrutturi l-ġodda hi stabbilita fuq il-bażi ta' sett ta' indikaturi. Jistgħu jiġu kkunsidrati l-fatturi li ġejjin: l-iskop tal-assi mibjugħin (assi u obbligazzjonijiet, manutenzjoni tal-forza tax-xogħol, grupp ta' assi), il-prezz tal-bejgħ, l-identità tax-xerrej(ja), il-mument tal-bejgħ (wara l-inizjazzjoni tal-valutazzjoni preliminari, il-proċedura ta' investigazzjoni formali jew id-deċiżjoni finali) u l-loġika ekonomika tal-operazzjoni. Dan is-sett ta' indikaturi kien ikkonfermat mill-Qorti fid-deċiżjoni tagħha tat-28 ta' Marzu 2012Ryanair vs il-Kummissjoni, (149) li kkonfermat id-deċiżjoni Alitalia.

(318)

Kif intqal fil-premessa 5 aktar 'il fuq, wara diversi skambji dwar il-kwistjoni tal-kontinwità ekonomika mal-awtoritajiet Rumeni, fit-23 ta' Diċembru 2016, id-DĠ COMP bagħat ittra ta' valutazzjoni preliminari dwar il-kontinwità ekonomika lill-awtoritajiet Rumeni. F'din l-ittra, ibbażata fuq l-informazzjoni pprovduta mill-awtoritajiet Rumeni dwar il-kamp ta' applikazzjoni tal-bejgħ li jikkonċerna 9 raggruppamenti ta' assi u dwar il-proċess tal-bejgħ (fil-forma ta' proċess tal-offerti xprunat mis-suq), id-DĠ Kompetizzjoni kien tal-fehma preliminari li l-proċess tal-bejgħ ta' Oltchim kif imfassal dak iż-żmien mill-awtoritajiet Rumeni mhux bilfors li kien iwassal għal kontinwità ekonomika bejn Oltchim u l-impriża/i li tista'/jistgħu tirriżulta/jirriżultaw mill-proċess tal-bejgħ, mingħajr ħsara għall-valutazzjoni tal-elementi kruċjali li kienu għadhom mhumiex magħrufa f'dak iż-żmien bħat-tlestija proprja u l-eżitu osservat tal-bejgħ, l-ambitu attwali tat-trasferiment, il-prezz u l-loġika ekonomika tiegħu.

(319)

F'dan l-istadju tal-proċess tal-bejgħ, wara l-vot tal-approvazzjoni mill-Assemblea tal-Kredituri għal tnejn mix-xerrejja għall-maġġoranza tal-assi ta' Oltchim, ħafna minn dawn l-elementi huma magħrufa. Biex tiddeċiedi dwar jekk hemmx għajnuna mill-Istat li tibbenefika lix-xerrej(ja) ta' Oltchim, il-Kummissjoni se tivvaluta kull wieħed mill-ħames kriterji elenkati hawn fuq kif ġej.

(320)

Il-Kummissjoni tosserva li l-assi akkwiżiti mix-xerrej ewlieni - Chimcomplex permezz tar-raggruppamenti ta' assi 1-5 u parzjalment 7 - jirrappreżentaw biss 58 % mill-assi u mill-faċilitajiet tal-produzzjoni ta' Oltchim (fuq il-bażi tal-valwazzjoni ta' Winterhill). Rigward DSG, din tkun qed takkwiżixxi sehem limitat ħafna mill-assi ta' Oltchim, jiġifieri r-raggruppament ta' assi 6 (l-impjant tal-proċessar tal-PVC li storikament kienet qed tieħu b'lokazzjoni mingħand Oltchim). L-assi fil-mira ta' DSG jirrappreżentaw sehem żgħir ħafna mill-assi u mill-faċilitajiet tal-produzzjoni ta' Oltchim (1.94 % fuq il-bażi tal-valwazzjoni ta' Winterhill).

(321)

Rigward Chimcomplex, din mhix se takkwiżixxi jew tieħu taħt ir-responsabbiltà tagħha kwalunkwe obbligazzjoni ta' Oltchim, kuntratti kummerċjali jew kwalunkwe materja prima eżistenti, prodotti (mhux) lesti jew parts tal-bdil. Il-kostijiet potenzjali relatati mat-tniġġis storiku tal-art jibqgħu mal-Bejjiegħ f'konformità mal-prinċipju ta' “min iniġġes iħallas”. Dan jaqbel mal-fehma tal-Kummissjoni espressa fl-ittra tagħha tat-23 ta' Diċembru 2016 li skont din “l-obbligazzjonijiet ta' Oltchim […] li jinkludu djun ambjentali tal-imgħoddi, għandhom jibqgħu ma' Oltchim”. L-istess hu validu għal DSG.

(322)

Rigward l-impjegati, l-ispeċifikazzjonijiet tal-offerti jew il-kuntratt tal-bejgħ ma kinux jeħtieġu li x-xerrejja jerġgħu jaħtru lil kwalunkwe persuna mill-forza tax-xogħol. Madankollu, ix-xerrejja potenzjali ġew offruti l-possibbiltà li jerġgħu jaħtru lill-impjegati ta' Oltchim u ntalbu jindikaw jekk jagħżlux li jagħmlu dan fl-Offerti Indikattivi tagħhom, filwaqt li jindikaw in-numru ta' impjegati maħtura skont il-pjanijiet ta' direzzjoni tan-negozju rispettivi tagħhom. Finalment, jidher li Chimcomplex kellha l-għan li terġa' taħtar 1 215-il impjegat, jiġifieri madwar 62 % tal-impjegati ta' Oltchim fil-mument tal-offerta vinkolanti tagħha (150). Iċ-ċifra li l-Bejjiegħ qies rilevanti għall-evalwazzjoni tal-offerti vinkolanti (ara wkoll il-premessa (335)) kienet massimu ta' 984 impjegat biss - in-numru ta' impjegati li fil-fatt qablu mal-pakkett ta' reklutaġġ mill-ġdid, jiġifieri madwar 50 % tan-numru kumplessiv tal-forza tax-xogħol kurrenti ta' Oltchim. Fi kwalunkwe każ, is-sehem ta' impjegati li eventwalment jiġi ttrasferit f'Chimcomplex għadu anqas miċ-ċifri ta' impjegati maħtura mill-ġdid fid-deċiżjonijiet preċedenti tal-Kummissjoni fejn ma setgħet tiġi stabbilita ebda kontinwità ekonomika (151).

(323)

Barra minn hekk, il-Kummissjoni tinnota li l-kuntratti tal-provvista u tal-bejgħ li huma sinifikanti għan-negozju operazzjonali se jiġu terminati. B'mod partikolari, Chimcomplex tgħid li hi għandha n-netwerk tagħha stess ta' klijenti, b'tali mod li l-klijentela se tinbidel b'mod konsiderevoli wara l-akkwiżizzjoni tal-assi fil-mira. Chimcomplex ikkonfermat b'mod espliċitu wkoll li hi ma kinitx se tuża t-trademark ta' Oltchim.

(324)

Finalment, il-Kummissjoni tinnota li l-ambitu tal-attivitajiet li għandhom jitwettqu minn Chimcomplex u minn DSG fuq ir-raggruppamenti mixtrija mingħand Oltchim ser ikun sa ċertu punt differenti meta mqabbel mal-attivitajiet ta' Oltchim fil-mument tal-firma tal-SPA kif muri hawn taħt (ara b'mod partikolari s-subtaqsima 6.4.5.).

(325)

Rigward ir-raggruppamenti ta' assi mhux mibjugħa li jifdal 8, 9 u parti mir-raggruppament 7, dawn jirrappreżentaw biss minorità tan-negozju ta' Oltchim u huma magħmula minn assi mhux operazzjonali. B'hekk, hu ċar li l-ambitu tal-attivitajiet li se jitwettqu mix-xerrej(ja) potenzjali ma jkunx jidħol fin-negozju ta' Oltchim u jkun ferm probabbli li l-ambitu tal-attivitajiet li jitwettqu bl-użu ta' dawn l-assi jkun differenti minn dak ta' Oltchim.

(326)

Biex tiġi evitata l-kontinwità ekonomika, l-assi fil-proċess ta' sejħa għal offerti jridu jinbiegħu bil-prezz tas-suq tagħhom. Tali prezz tas-suq hu definit bħala l-prezz li jista' jkun stabbilit minn investitur privat li jaġixxi skont il-kundizzjonijiet tas-suq (152).

(327)

Wara t-tlestija tas-sejħa għal offerti, ir-Rumanija biegħet il-maġġoranza tal-assi li jinsabu fid-diversi raggruppamenti mibjugħa (1 sa 6 u parzjalment 7) permezz ta' proċess ta' sejħa għal offerti miftuħ, trasparenti, nondiskriminatorju u mhux kundizzjonali għall-offerenti li jissottomettu l-ogħla offerti b'finanzjament garantit kif spjegat hawn taħt.

(328)

L-ewwel nett, l-istedina għall-preżentazzjoni ta' espressjoni ta' interess għad-diversi raggruppamenti ta' assi ta' Oltchim ma kinitx tippreżenta xi limitazzjoni rigward il-partijiet li setgħu jissottomettu offerti; għaldaqstant, kwalunkwe entità kienet ħielsa li tgħid offerta fil-proċess ta' sejħa għal offerti.

(329)

Hekk kif jidher ċar mid-diversi Rapporti dwar il-bejgħ tal-assi ta' Oltchim (ara l-premessa 8), Chimcomplex kienet l-unika wieħed minn diversi parteċipanti oħra (fl-istadju finali waslu b'kollox 9 atturi) għas-sejħa għal offerti għal diversi taħlitiet tal-assi ta' Oltchim, kif immexxija mill-amministraturi ġudizzjarji ta' Oltchim, flimkien ma' AT Kearney (“il-Bejjiegħ”).

(330)

It-tieni, rigward il-prinċipju ta' trasparenza, il-Bejjiegħ ipprovda lill-offerenti kollha b'biżżejjed żmien u bl-informazzjoni neċessarja u dettaljata, biex jitħallew iwettqu valwazzjoni xierqa tal-assi bħala parti mill-proċess ta' diliġenza dovuta. Skont it-2ni u t-3et Rapporti dwar il-bejgħ ta' Oltchim imsemmija fil-premessa 8 aktar 'il fuq, l-offerenti li jipprovdu prova ta' finanzjament garantit għall-prezz inkluż fl-offerti indikattivi tagħhom ingħataw aċċess sħiħ għal kamra tad-data elettronika, setgħu jieħdu sehem fil-laqgħat mal-maniġment ta' Oltchim, setgħu jżuru d-diversi binjiet fis-sit u jieħdu sehem fi proċess strutturat ta' mistoqsijiet u tweġibiet.

(331)

Barra minn hekk, kien hemm komunikazzjoni kostanti matul il-proċess ta' sejħa għal offerti bejn il-Bejjiegħ (AT Kearney) u l-offerenti kollha li kkwalifikaw għall-istadji rispettivi tal-proċess ta' sejħa għal offerti fil-perjodu ta' wara t-tħabbir pubbliku tal-bejgħ u tad-distribuzzjoni ta' prova lill-offerenti potenzjali (mit-23 ta' Awwissu 2016), ir-riċevuta tal-espressjoni ta' interess u l-iffirmar ta' ftehimiet ta' nuqqas ta' divulgazzjoni mill-offerenti interessati (minn Settembru sa Diċembru 2016), kif ukoll bejn it-23 ta' Jannar 2017 (l-iskadenza għall-preżentazzjoni tal-offerti indikattivi) u s-26 ta' Ġunju 2017 (l-iskadenza għall-preżentazzjoni tal-offerti finali).

(332)

It-tielet, l-evidenza sottomessa mir-Rumanija turi li ma hemm ebda diskriminazzjoni bejn l-offerenti fi kwalunkwe stadju tal-proċess tal-offerti. Tabilħaqq, hekk kif inhu ovvju minn dak stipulat aktar 'il fuq fil-premessi 328 u dawk sussegwenti, l-offerenti kollha rċevew informazzjoni u kjarifiki dwar il-kriterji tal-għażla tas-sejħa għal offerti, dwar ir-regoli u l-proċeduri, dwar l-iskadenzi għall-preżentazzjoni tal-offerti indikattivi u finali, dwar l-estensjoni ta' tali skadenzi, dwar is-sitwazzjoni finanzjarja u ekonomika ta' Oltchim, dwar elementi neqsin mill-offerti indikattivi jew finali tal-offerenti, u dwar kwalunkwe mistoqsija possibbli tal-offerenti. Matul il-proċess, wara li kienu tneħħew ċerti nuqqas ta' trasparenzi inizjali fir-rigward tal-aċċess indaqs għall-informazzjoni, l-offerenti kollha ġew ipprovduti bl-informazzjoni neċessarja biex iwettqu evalwazzjoni xierqa tal-assi mibjugħa permezz tad-9 raggruppamenti.

(333)

Ir-raba', minbarra l-limitazzjonijiet li jirriżultaw mill-qafas legali, ma ġiet stabbilita ebda kundizzjoni fuq l-offerenti, kif muri biċ-ċar fl-istedina għas-sejħa għal offerti għall-preżentazzjoni ta' espressjoni ta' interess u fid-diversi ittri mibgħuta lill-offerenti mill-Bejjiegħ (AT Kearney).

(334)

Il-ħames, it-taħlita ta' offerenti magħżula kienet dik li mmassimizzati l-prezz għall-Bejjiegħ, fid-dawl tal-irtirar ta' White Tiger Management li ma kinitx kapaċi tirrispetta l-kriterji oġġettivi ta' ċertezza tat-tranżazzjoni bl-għan li tiżgura permezz tal-garanziji l-ħlas tal-prezz għall-offerti tagħha (ara l-premessa (181)). Din il-konklużjoni dwar il-prezz massimu miksub mhix f'kontradizzjoni mar-rifjut tal-offerta ogħla ta' White Tiger meta mqabbla ma' Chimcomplex fuq il-bażi tal-fatt li l-finanzjament tal-offerta kien inċert u mhux garantit sal-istandard meħtieġ, u b'hekk kien joffri ċertezza batuta għat-tranżazzjoni.

(335)

Il-prinċipju tal-prezz massimu lanqas ma nxteħet f'kontradizzjoni mill-bonus marbut mat-trasferiment tal-impjegati li żdied mill-Bejjiegħ, fl-evalwazzjoni tiegħu tal-offerti, b'mod supplimentari għall-offerti tal-prezz. Dan il-bonus li jikkorrispondi għal 40 % tal-kostijiet medji tal-għoti tas-sensji (bħall-valur addizzjonali li jammonta għal EUR 5 000 għal kull impjegat) ġie limitat għal numru massimu ta' 50 % mill-impjegati ta' Oltchim. Skont il-liġi Rumena dwar l-insolvenza, il-ħlasijiet għall-għoti ta' sensja tabilħaqq ħadu prijorità fuq kwalunkwe pretensjoni oħra ta' kredituri privati jew pubbliċi. B'hekk, mill-perspettiva tal-kredituri, il-ħlasijiet għall-għoti ta' sensja għandhom l-istess effett daqslikieku l-prezz imħallas kien anqas skont dawn. Barra minn hekk, fil-każ inkwistjoni, dan il-bonus ma għamel ebda differenza fil-klassifikazzjoni tal-offerti differenti. (153)

(336)

Rigward ir-raggruppamenti mhux mibjugħa li jifdal (8, 9 u parti mir-raggruppament 7 tal-assi), li jirrappreżentaw il-minoranza tal-assi ta' Oltchim, fuq il-bażi tal-informazzjoni pprovduta mir-Rumanija fil-preżentazzjoni tagħha tal-20 ta' April 2018, kif ukoll l-aħħar 7 Rapport sottomess mill-Bejjiegħ fis-16 ta' Lulju 2018, dawn ukoll huma ppjanati li jinbiegħu bi prezzijiet tas-suq, kif stabbilit permezz ta' proċessi ppjanati ta' sejħa għal offerti mfassla b'mod simili għas-sejħa għal offerti diġà mwettqa, jiġifieri b'mod miftuħ, trasparenti u mhux diskriminatorju, lill-offerti li jissottomettu l-ogħla offerti validi u affidabbli għar-raggruppament(i), u għalhekk bi prezz tas-suq.

(337)

Fuq il-bażi ta' dan li ntqal hawn fuq, il-Kummissjoni hi tal-fehma li l-proċess tal-għażla minnu nnifsu kien suffiċjenti għas-salvagwardja li l-prezz tal-assi mibjugħa lix-xerrejja magħżula u approvati jikkorrispondi għall-prezz tas-suq li kien l-uniku kriterju tal-għażla (soġġett għall-prova miġjuba mill-offerent li l-finanzjament tal-offerta tiegħu kien garantit). B'hekk, il-Kummissjoni tikkonkludi li l-bejgħ tar-raggruppamenti ta' assi ta' Oltchim sar jew hu ppjanat li jsir permezz ta' proċess tal-offerti miftuħ, trasparenti, mhux diskriminatorju u mhux kundizzjonali u, b'hekk, il-proċess ta' sejħa għal offerti jiggarantixxi li l-bejgħ sar jew ser isir skont il-prezz tas-suq għar-raggruppamenti ta' assi mibjugħa.

(338)

L-identità tas-sidien tal-bejjiegħ u tax-xerrej tipprovdi indikazzjoni b'saħħitha dwar jekk it-trasferiment tal-assi hux ser iwassal għal kontinwità ekonomika attwali (154). Ix-xerrej ewlieni Chimcomplex, hu kkontrollat minn SCR, li hi nfisha hi finalment ikkontrollata mill-azzjonist individwali ewlieni tagħha b'97,25 %. Fuq il-bażi tal-informazzjoni disponibbli għaliha, il-Kummissjoni ssib li la l-individwu kontrollur finali ta' SCR u lanqas kwalunkwe entità direttament jew indirettament ikkontrollata minnu jew minn SCR ma għandhom interess ta' ekwità f'Oltchim jew fi kwalunkwe wieħed mill-azzjonisti ta' Oltchim.

(339)

Rigward DSG, ta' min jinnota li din kellha relazzjoni kummerċjali dejjiema ma' Oltchim. DSG kienet ilha tikri l-faċilità tal-proċessar tal-PVC, inklużi l-impjegati, mingħand Oltchim minn Jannar 2014. Qabel ma bdiet tikri l-faċilitajiet ta' Ramplast (ir-raggruppament ta' assi 6 fil-proċedura tal-bejgħ), DSG kienet wieħed mid-distributuri ewlenin ta' Oltchim tal-profili tal-PVC. Fuq il-bażi tal-informazzjoni disponibbli għall-Kummissjoni, ma hemm ebda relazzjoni korporattiva bejn DSG u Oltchim.

(340)

Il-Kummissjoni għandha bżonn tivvaluta jekk il-mument tal-proċess ta' sejħa għal offerti jistax iwassal għal ċirkomvenzjoni ta' deċiżjoni mill-Kummissjoni biex tirkupra għajnuna inkompatibbli mill-Istat.

(341)

F'dan il-każ, il-Kummissjoni tinnota li l-proċedura ta' insolvenza tnediet u l-amministraturi ġudizzjarji nħatru mill-qorti nazzjonali kompetenti fl-2013. Il-bejgħ tal-assi tnieda mill-amministraturi ġudizzjarji fl-2016, qabel kwalunkwe deċiżjoni tal-Kummissjoni rigward il-konklużjoni tal-proċedura ta' investigazzjoni formali. Barra minn hekk, anki għall-bejjiegħ ewlieni – Chimcomplex, l-ittri tal-bank li ggarantixxew il-bejgħ diġà kienu preżenti f'Diċembru 2017 u fil-bidu tal-2018, jiġifieri qabel l-adozzjoni ta' din id-deċiżjoni.

(342)

Fil-każ inkwistjoni, il-Kummissjoni tqis li l-fatt li l-bejgħ tnieda mill-amministraturi ġudizzjarji mqabbda mill-qorti nazzjonali kompetenti u li d-deċiżjoni dwar it-trasferiment tal-maġġoranza tal-assi ta' Oltchim ittieħdet qabel l-adozzjoni ta' din id-deċiżjoni hu anqas konklużiv f'termini tal-kontinwità ekonomika milli sitwazzjoni li fiha d-deċiżjoni ta' bejgħ tittieħed mill-benefiċjarji tal-għajnuna stess jew li fiha l-proċess tal-bejgħ jitnieda biss wara l-adozzjoni ta' deċiżjoni negattiva bl-irkupru bħal dik preżenti.

(343)

Il-kriterju tal-loġika ekonomika għandu l-għan ta' valutazzjoni ta' jekk ix-xerrej tal-assi hux se jimpjegahom bl-istess mod bħas-sid preċedenti. Il-kontinwità ekonomika hi nieqsa jekk ix-xerrej jintegra l-assi fl-attivitajiet ekonomiċi tiegħu stess u, b'hekk, joħloq sinerġiji addizzjonali minflok ma sempliċiment jużahom bl-istess mod bħall-bejjiegħ (155).

(344)

Il-Kummissjoni tinnota, fuq il-bażi tal-informazzjoni disponibbli għaliha, li Chimcomplex biħsiebha tintegra b'mod vertikali r-raggruppamenti ta' assi magħżula (1-5 u parzjalment 7) fil-mudell tan-negozju tagħha stess flimkien mal-faċilitajiet tal-produzzjoni kurrenti tagħha f'Onești, ir-Rumanija, biex toħloq fornitur tas-sustanzi kimiċi u tal-petrokimiċi b'portafoll ta' prodotti ta' […].[…]

(345)

Barra minn hekk, skont il-pjanijiet tal-akkwirent (156), se jitwettqu investimenti ulterjuri fl-assi l-ġodda biex dawn jiġu integrati fil-katina tal-produzzjoni tagħha stess u jkomplu jiġu żviluppati aktar, biex b'hekk Chmcomplex tkun tista' żżid ċerti tagħbijiet tal-kapaċità, filwaqt li tiggwadanja fl-effiċjenza u fil-produttività.

(346)

B'mod partikolari, għalhekk, Chimcomplex mhix se tuża l-assi li tixtri bl-istess mod bħall-kumpanija insolventi Oltchim. Għall-kuntrarju, Chimcomplex se tintegra l-assi mixtrija fl-istrateġija kummerċjali tagħha stess, filwaqt li tikseb sinerġiji, li jiġġustifikaw l-interess tagħha fix-xiri tal-assi raggruppati li offriet għalihom. Barra minn hekk, it-tħaddim ta' uħud mill-assi kien qed jagħmel telf strutturali u, għalhekk, dawn jistgħu jkunu jeħtieġu ristrutturar, investimenti u xogħlijiet ta' ottimizzazzjoni ulterjuri.

(347)

L-elementi msemmija hawn fuq juru li l-loġika ekonomika tal-offerta ta' Chimcomplex ma tikkonsistix f'kontinwazzjoni tal-attività ekonomika ta' Oltchim, iżda fl-integrazzjoni ta' parti mill-assi tagħha u ta' parti mill-forza tax-xogħol tar-raggruppamenti mixtrija ta' Oltchim fi grupp separat li timmira lejn il-loġika ekonomika, l-istrateġija industrijali u l-objettivi tagħha stess.

(348)

Fuq il-bażi tal-kunsiderazzjonijiet ta' hawn fuq, il-Kummissjoni tikkonkludi li l-loġika ekonomika tal-operazzjoni hi li ġġiegħel lil Chimcomplex tuża l-assi li jinsabu fir-raggruppamenti 1-5 ta' Oltchim u parzjalment 7 b'kundizzjonijiet differenti u mhux biex tkompli l-istrateġija ta' Oltchim.

(349)

Finalment, rigward ir-raggruppamenti mhux mibjugħa li jifdal 8, 9 u parti mir-raggruppament 7, dawn jirrappreżentaw minorità tal-assi ta' Oltchim u fihom assi mhux operazzjonali biss. Għaldaqstant, anki fil-każ ipotetiku estrem li fih ir-raggruppamenti kollha li jifdal jinxtraw minn xerrej potenzjali wieħed (għajr Chimcomplex, li diġà kkonfermat li mhix interessata li tixtri xi wieħed mill-assi li jifdal), dawn ma jkunux jikkostitwixxu l-istess negozju li kienet qed tmexxi Oltchim qabel ma tlesta l-ewwel proċess ta' bejgħ u jkun improbabbli li x-xerrej tagħhom ikun jista' jikkwalifika bħala li qiegħed ikompli n-negozju ta' Oltchim.

(350)

L-assi ta' Oltchim inbiegħu jew huma ppjanati li jinbiegħu bil-prezz tas-suq tagħhom, kif stabbilit permezz ta' proċess ta' sejħa għal offerti miftuħ, trasparenti, mhux diskriminatorju u mhux kundizzjonali lill-offerenti li ssottomettew jew se jissottomettu l-akbar offerta għat-taħlita ta' raggruppamenti li jimmassimizzaw id-dħul mill-bejgħ. Ir-Rumanija informat lill-Kummissjoni li x-xerrej ewlieni approvat – Chimcomplex għar-raggruppamenti ta' assi 1-5 u parzjalment 7 – m'għandux rabta ekonomika jew korporattiva ma' Oltchim.. Bl-istess mod, bħalissa DSG topera r-raggruppament ta' assi 6 (impjant tal-proċessar tal-PVC meħud b'lokazzjoni) iżda m'għandha ebda rabta ta' sjieda jew korporattiva ma' Oltchim. Fi kwalunkwe każ, id-deċiżjoni dwar il-bejgħ ittieħdet qabel id-deċiżjoni negattiva preżenti tal-Kummissjoni rigward il-proċedura ta' investigazzjoni formali. Finalment, kull wieħed mis-sidien il-ġodda u mix-xerrejja potenzjali se juża l-assi f'kundizzjonijiet differenti u skont mudelli kummerċjali differenti minn dawk ta' Oltchim. L-ambitu tal-attivitajiet tax-xerrejja ser ikun sa ċertu punt konsiderevoli differenti mill-attivitajiet ta' Oltchim.

(351)

Fid-dawl ta' dan ta' hawn fuq, il-Kummissjoni hi tal-fehma li ma hemm ebda kontinwità ekonomika bejn Oltchim u Chimcomplex jew DSG, u x-xerrejja ta' ħafna mir-raggruppamenti ta' assi ta' Oltchim, li, għalhekk, mhumiex responsabbli għal kwalunkwe għajnuna mill-Istat li għandha tiġi rkuprata mingħand il-benefiċjarji. Bl-istess mod, il-Kummissjoni tqis li hu ferm improbabbli li ser ikun hemm kontinwità ekonomika bejn Oltchim u kwalunkwe xerrej potenzjali tal-assi li jifdal li huma ppjanati li jinbiegħu permezz ta' sejħa għal offerti ġdida kif deskritta fil-preżentazzjoni tar-Rumanija tal-20 ta' April 2018.

(352)

Il-Kummissjoni ssib li l-miżuri numru 1, 2 (rigward CET Govora) u 3 (rigward AAAS, l-Amministrazzjoni Nazzjonali tal-Ilma, Salrom, Electrica) ittieħdu flimkien jew jikkostitwixxu b'mod separat għajnuna mill-Istat lil Oltchim SA fi ħdan it-tifsira tal-Artikolu 107(1) TFUE.

(353)

Il-Kummissjoni ssib li l-miżuri numru 2 (rigward Salrom) u 3 (rigward CET Govora) ma jikkostitwixxux għajnuna mill-Istat lil Oltchim SA fi ħdan it-tifsira tal-Artikolu 107(1) TFUE.

(354)

Il-Kummissjoni ssib ukoll li r-Rumanija implimentat b'mod illegali l-miżuri numru 1, 2 (rigward CET Govora) u 3 (rigward AAAS, l-Amministrazzjoni Nazzjonali tal-Ilma, Salrom, Electrica) bi ksur tal-Artikolu 108(3) TFUE.

(355)

Il-Kummissjoni tikkonkludi li l-elementi tal-għajnuna permezz tal-miżuri numru 1, 2 (rigward CET Govora) u 3 (rigward AAAS, l-Amministrazzjoni Nazzjonali tal-Ilma, Salrom, Electrica) huma inkompatibbli mas-suq intern, minħabba li l-kundizzjonijiet rilevanti tal-Linji Gwida tal-2014 dwar l-R&R ma ġewx issodisfati u ma ġiet identifikata ebda bażi oħra tal-kompatibbiltà u dawn iridu jiġu rkuprati mingħand il-benefiċjarju, flimkien mal-imgħax tal-irkupru.

(356)

It-tali rkupru mhux se jikkonċerna lil Chimcomplex u lil DSG, minħabba n-nuqqas ta' kontinwità ekonomika bejn Oltchim u ż-żewġ xerrejja msemmija aktar 'il fuq Chimcomplex u DSG,