(1)

Id-Direttiva 2014/40/UE u r-Regolament ta' Implimentazzjoni tal-Kummissjoni (UE) 2018/574 (2) jistabbilixxu l-qafas ġuridiku għall-istabbiliment ta' sistema ta' traċċabbiltà għall-Unjoni kollha għall-prodotti tat-tabakk. Fil-livell tal-Unjoni, dawk l-atti jimplimentaw ukoll l-Artikolu 8 tal-Protokoll biex jiġi Eliminat il-Kummerċ Illeċitu tal-Prodotti tat-Tabakk fil-Konvenzjoni ta' Qafas tal-Organizzazzjoni Dinjija tas-Saħħa dwar il-Kontroll fuq it-Tabakk (3), li ġie ratifikat mill-Unjoni Ewropea (4) u jipprevedi l-istabbiliment ta' reġim globali ta' traċċar u lokalizzazzjoni tal-prodotti tat-tabakk.

(2)

Sabiex il-prodotti tat-tabakk kollha jkunu jistgħu jiġu traċċati u rintraċċati fl-Unjoni kollha, l-Artikolu 15(1) tad-Direttiva 2014/40/UE jirrikjedi li l-Istati Membri jiżguraw li l-pakketti individwali kollha ta' dawk il-prodotti jkunu mmarkati b'identifikatur uniku. Skont l-Artikolu 15(13), dak ir-rekwiżit se japplika għas-sigaretti u t-tabakk tal-brim mill-20 ta' Mejju 2019.

(3)

L-Artikolu 3(1) tar-Regolament ta' Implimentazzjoni (UE) 2018/574 jobbliga lil kull Stat Membru jaħtar entità (l-“emittent tal-identifikazzjoni”) responsabbli mill-ġenerazzjoni u l-ħruġ tal-identifikaturi uniċi. L-Artikolu 3(6) jeħtieġ li l-Istati Membri jinnotifikaw lill-Kummissjoni bil-ħatra tal-emittent tal-identifikazzjoni u bil-kodiċi ta' identifikazzjoni tiegħu fi żmien xahar mindu jinħatar.

(4)

L-Artikolu 4 tar-Regolament ta' Implimentazzjoni (UE) 2018/574 jistabbilixxi regoli għall-emittenti tal-identifikazzjoni kompetenti biex jiġġeneraw u joħorġu identifikaturi uniċi skont fejn il-prodotti jiġu mmanifatturati, importati jew aggregati. Barra minn hekk, skont it-tieni subparagrafu tal-Artikolu 4(1), Stat Membru jista' jeżiġi li l-emittent tal-identifikazzjoni maħtur tiegħu jkun kompetenti biex jiġġenera u joħroġ identifikaturi uniċi għall-prodotti kollha tat-tabakk imqiegħda fis-suq tiegħu.

(5)

L-Artikolu 4(5) tar-Regolament ta' Implimentazzjoni (UE) 2018/574 jipprevedi li, f'każ ta' assenza temporanja tal-emittent tal-identifikazzjoni kompetenti, il-Kummissjoni tista' tawtorizza lill-operaturi ekonomiċi jużaw is-servizzi ta' emittent tal-identifikazzjoni ieħor li jkun diġà nħatar skont l-Artikolu 3 ta' dak ir-Regolament.

(6)

L-Artikoli 9(2) u 13(2) tar-Regolament ta' Implimentazzjoni (UE) 2018/574 jeżiġu li l-operaturi ekonomiċi, li jintroduċu talbiet għal identifikaturi uniċi fil-livell ta' unità u fil-livell aggregat, jipprovdu l-informazzjoni elenkata fil-Punti 2.1 u 2.2 tat-Taqsima 2 tal-Kapitolu II tal-Anness II ta' dak ir-Regolament. Dik l-informazzjoni hija meħtieġa għall-ġenerazzjoni tal-identifikaturi uniċi u tinkludi l-kodiċijiet ta' identifikazzjoni, li jippermettu r-reġistrazzjoni ta' operaturi ekonomiċi, il-faċilitajiet u l-magni fis-sistema ta' traċċabbiltà. Għalhekk, il-kodiċijiet ta' identifikazzjoni huma essenzjali biex l-operaturi ekonomiċi jkunu jistgħu jitolbu identifikaturi uniċi mingħand l-emittent tal-identifikazzjoni kompetenti. Barra minn hekk, l-identifikaturi uniċi u l-kodiċijiet ta' identifikazzjoni huma meħtieġa b'mod konġunt għar-reġistrazzjoni u t-trażmissjoni tal-informazzjoni dwar il-movimenti tal-prodotti u l-avvenimenti tranżnazzjonali. Ir-regoli dwar it-talba tal-kodiċijiet ta' identifikazzjoni għall-operaturi ekonomiċi, il-faċilitajiet u l-magni huma stabbiliti fl-Artikoli 14, 16 u 18 tar-Regolament ta' Implimentazzjoni (UE) 2018/574. Il-kompetenza tal-emittenti tal-identifikazzjoni għall-kodiċijiet ta' identifikazzjoni emittenti hija bbażata fuq il-post operattiv tal-operaturi ekonomiċi.

(7)

Fiż-żmien tal-adozzjoni ta' din id-Deċiżjoni, diversi Stati Membri ma nnotifikawx lill-Kummissjoni dwar il-ħatra tal-emittenti tal-identifikazzjoni rispettivi tagħhom skont l-Artikolu 3(6) tar-Regolament ta' Implimentazzjoni (UE) 2018/574. Fl-assenza ta' emittent tal-identifikazzjoni kompetenti, l-operaturi ekonomiċi ma jkunux jistgħu jitolbu l-kodiċijiet ta' identifikazzjoni u l-identifikaturi uniċi. Minħabba f'hekk, dawk l-operaturi ekonomiċi ma jitħallewx iqiegħdu l-prodotti tagħhom fis-suq. Dan jista' jaffettwa l-funzjonament bla xkiel tas-suq intern, b'mod partikolari l-kummerċ intrakomunitarju tal-prodotti tat-tabakk, u jaf jikkomprometti l-iskop proprju tas-sistema ta' traċċabbiltà u l-eliminazzjoni tal-kummerċ illeċitu tal-prodotti tat-tabakk.

(8)

Sabiex tillimita sa ċertu punt id-distorsjoni potenzjali tal-funzjonament bla xkiel tas-suq intern u sabiex tgħin fl-iżgurar li s-sistema ta' traċċabbiltà tibda tiffunzjona f'waqtha, il-Kummissjoni għal perjodu ta' żmien limitat għandha tawtorizza, f'konformità mal-Artikolu 4(5) tar-Regolament ta' Implimentazzjoni (UE) 2018/574, lill-operaturi ekonomiċi jużaw is-servizzi ta' emittent ta' identifikazzjoni li diġà jkun inħatar.

(9)

Sta għall-emittenti tal-identifikazzjoni li diġà nħatru skont l-Artikolu 3(1) tar-Regolament ta' Implimentazzjoni (UE) 2018/574 li jiddeċiedu jekk jaċċettawx talbiet minn operaturi ekonomiċi biex jiġġeneraw u joħorġu identifikaturi uniċi. Fl-assenza temporanja tal-emittent tal-identifikazzjoni kompetenti, emittenti tal-identifikazzjoni oħrajn maħtura jistgħu jipprovdu wkoll lill-operaturi ekonomiċi bil-kodiċijiet ta' identifikazzjoni meħtieġa biex jiġġeneraw u joħorġu l-identifikaturi uniċi u sabiex jissodisfaw l-obbligi stabbiliti fl-Artikolu 15(5) tad-Direttiva 2014/40/UE u l-Kapitolu VI tar-Regolament ta' Implimentazzjoni (UE) 2018/574. Il-forniment ta' servizzi addizzjonali ma għandu fl-ebda ċirkostanza jpoġġi f'riskju l-operazzjonijiet l-oħra tal-emittent tal-identifikazzjoni.

(10)

Il-kodiċijiet ta' identifikazzjoni ġġenerati minn emittenti tal-identifikazzjoni fl-assenza temporanja tal-emittent tal-identifikazzjoni kompetenti għandhom jiġu ttrasferiti lill-emittent tal-identifikazzjoni kompetenti, ladarba jinħatar, flimkien mal-informazzjoni rilevanti l-oħra msemmija fl-Artikoli 14(2), 16(2) u 18(2) tar-Regolament ta' Implimentazzjoni (UE) 2018/574. It-trasferiment għandu jsir b'mod elettroniku, mingħajr dewmien żejjed, abbażi ta' talba mill-emittent tal-identifikazzjoni kompetenti indirizzata lill-emittenti tal-identifikazzjoni li ddeċidew li jiġġeneraw il-kodiċijiet ta' identifikazzjoni fl-assenza temporanja tal-emittent tal-identifikazzjoni kompetenti.

(11)

Jenħtieġ li l-awtorizzazzjoni biex jintużaw is-servizzi ta' emittent tal-identifikazzjoni ieħor skont l-Artikolu 4(5) tar-Regolament ta' Implimentazzjoni (UE) 2018/574 tapplika biss fl-assenza temporanja tal-emittent tal-identifikazzjoni kompetenti.

(12)

Din id-Deċiżjoni ma għandhiex taffettwa r-regoli ta' kompetenza stabbiliti fir-Regolament ta' Implimentazzjoni (UE) 2018/574 fir-rigward tal-ħruġ u r-reġistrazzjoni ta' kodiċijiet ta' operaturi ekonomiċi u ta' faċilitajiet għall-operaturi tal-ewwel stabbilimenti tal-bejgħ bl-imnut.

(13)

Filwaqt li titqies is-sistema ta' traċċabbiltà kif stabbilita fl-Artikolu 15 tad-Direttiva 2014/40/UE tapplika għas-sigaretti u t-tabakk tal-brim mill-20 ta' Mejju 2019, jenħtieġ li din id-Deċiżjoni tidħol fis-seħħ fil-jum tal-pubblikazzjoni tagħha f'Il-Ġurnal Uffiċjali tal-Unjoni Ewropea.

(14)

Minħabba n-natura temporanja tal-awtorizzazzjoni skont l-Artikolu 4(5) tar-Regolament ta' Implimentazzjoni (UE) 2018/574, il-Kummissjoni tqis li din id-Deċiżjoni hija meħtieġa biex tillimita din id-Deċiżjoni fiż-żmien,