15.2.2019 |
MT |
Il-Ġurnal Uffiċjali tal-Unjoni Ewropea |
L 44/31 |
DEĊIŻJONI TA' IMPLIMENTAZZJONI TAL-KUMMISSJONI (UE) 2019/266
tal-14 ta' Frar 2019
li ttemm il-proċediment antidumping fir-rigward tal-importazzjonijiet ta' ħġieġ solari li joriġina mill-Malasja
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2016/1036 tal-Parlament Ewropew u tal-Kunsill tat-8 ta' Ġunju 2016 dwar il-protezzjoni kontra l-importazzjonijiet li huma l-oġġett ta' dumping minn pajjiżi mhux membri tal-Unjoni Ewropea (1), u b'mod partikolari l-Artikolu 9(1) tiegħu,
Billi:
1. PROĊEDURA
(1) |
Fit-23 ta' Mejju 2018, il-Kummissjoni Ewropea (“il-Kummissjoni”) bdiet proċediment anti-dumping fir-rigward tal-importazzjonijiet ta' ħġieġ solari li joriġina mill-Malasja billi ppubblikat notifika ta' bidu f'Il-Ġurnal Uffiċjali tal-Unjoni Ewropea (2). |
(2) |
L-investigazzjoni nfetħet wara lment imressaq minn EU ProSun Glass (“l-ilmentatur”) f'isem iż-żewġ produtturi tal-Unjoni li jirrappreżentaw iktar minn 25 % tal-produzzjoni totali tal-ħġieġ solari fl-Unjoni. L-ilment kien fih evidenza ta' dumping u ta' dannu materjali riżultanti, u dan tqies biżżejjed biex il-bidu tal-investigazzjoni jkun iġġustifikat. |
(3) |
Fin-notifika ta' bidu, il-Kummissjoni stiednet lill-partijiet interessati jikkuntattjawha sabiex jipparteċipaw fl-investigazzjoni. Barra minn hekk, il-Kummissjoni speċifikament infurmat lill-ilmentatur, lil produtturi magħrufa oħrajn tal-Unjoni, lill-produttur esportatur magħruf u lill-awtoritajiet Malasjani, lil importaturi, fornituri u utenti magħrufin, negozjanti, kif ukoll assoċjazzjonijiet li kien magħruf li kienu kkonċernati dwar il-bidu tal-investigazzjoni, u stednithom jieħdu sehem. |
(4) |
Il-partijiet interessati kollha kellhom l-opportunità li jikkummentaw dwar il-bidu tal-investigazzjoni u li jitolbu smigħ mal-Kummissjoni u/jew mal-Uffiċjal tas-Seduta fi proċedimenti kummerċjali sal-limitu ta' żmien stipulat fin-notifika ta' bidu. |
2. RTIRAR TAL-ILMENT U TERMINAZZJONI TAL-PROĊEDIMENT
(5) |
Permezz ta' ittra tal-14 ta' Diċembru 2018, l-ilmentatur informa lill-Kummissjoni li huwa xtaq jirtira l-ilment tiegħu. |
(6) |
Skont l-Artikolu 9(1) tar-Regolament (UE) 2016/1036, il-proċedimenti jistgħu jintemmu meta jiġi rtirat l-ilment, sakemm dan it-tmiem ma jkunx imur kontra l-interess tal-Unjoni. |
(7) |
L-investigazzjoni ma żvelat ebda konsiderazzjoni li turi li huwa fl-interessi tal-Unjoni li jitkompla l-każ. Għaldaqstant, il-Kummissjoni qieset li jenħtieġ li l-investigazzjoni dwar l-importazzjonijiet fl-Unjoni ta' ħġieġ solari li joriġina mill-Malasja tintemm. Il-partijiet interessati ġew mgħarrfa b'dan u ngħataw opportunità li jikkummentaw. Għaxar utenti tal-ħġieġ solari ddikkjaraw li jappoġġjaw it-terminazzjoni. Ma wasal ebda kumment ieħor. |
(8) |
Għaldaqstant, il-Kummissjoni kkonkludiet li jenħtieġ li l-proċediment anti-dumping fir-rigward tal-importazzjonijiet fl-Unjoni ta' ħġieġ solari li joriġina mill-Malasja jintemm mingħajr l-impożizzjoni ta' miżuri. |
(9) |
Din id-Deċiżjoni hija konformi mal-opinjoni tal-Kumitat stabbilit permezz tal-Artikolu 15(1) tar-Regolament (UE) 2016/1036. |
ADOTTAT DIN ID-DEĊIŻJONI:
Artikolu 1
Il-proċediment anti-dumping fir-rigward tal-importazzjonijiet ta' ħġieġ solari li jaqa' taħt il-kodiċijiet TARIC 7007198012, 7007198018, li joriġinaw mill-Malasja, huwa b'dan mitmum.
Artikolu 2
Din id-Deċiżjoni tidħol fis-seħħ l-għada tal-jum tal-pubblikazzjoni tagħha f'Il-Ġurnal Uffiċjali tal-Unjoni Ewropea.
Magħmul fi Brussell, l-14 ta' Frar 2019.
Għall-Kummissjoni
Il-President
Jean-Claude JUNCKER
(1) ĠU L 176, 30.6.2016, p. 21.
(2) In-Notifika ta' bidu ta' proċediment anti-dumping fir-rigward tal-importazzjonijiet ta' ħġieġ solari li joriġina mill-Malasja (ĠU C 174, 23.5.2018, p. 8).