(1)

L-Artikolu 43(3) tat-Trattat jistipula li l-Kunsill, fuq proposta mill-Kummissjoni, irid jadotta miżuri dwar l-iffissar u l-allokazzjoni tal-opportunitajiet tas-sajd.

(2)

Ir-Regolament (UE) Nru 1380/2013 tal-Parlament Ewropew u tal-Kunsill (1) jeżiġi li jiġu adottati miżuri ta' konservazzjoni filwaqt li jitqies il-parir xjentifiku, tekniku u ekonomiku disponibbli, inkluż, fejn rilevanti, ir-rapporti mfasslin mill-Kumitat Xjentifiku, Tekniku u Ekonomiku għas-Sajd (STECF).

(3)

Hija r-responsabbiltà tal-Kunsill li jadotta miżuri dwar l-iffissar u l-allokazzjoni tal-opportunitajiet tas-sajd, fosthom ċerti kundizzjonijiet li huma marbutin magħhom mil-lat funzjonali, kif xieraq. Jenħtieġ li l-opportunitajiet tas-sajd jitqassmu fost l-Istati Membri b'mod li tkun żgurata l-istabbiltà relattiva għal kull Stat Membru fl-attivitajiet tas-sajd għal kull stokk jew għal kull tip ta' sajd u billi jitqiesu kif imiss l-għanijiet tal-politika komuni tas-sajd (il-PKS) stabbiliti mir-Regolament (UE) Nru 1380/2013.

(4)

Jenħtieġ li l-qabdiet totali permissibbli (“TACs”) jiġu stabbiliti abbażi tal-parir xjentifiku disponibbli, filwaqt li jitqiesu l-aspetti bijoloġiċi u soċjoekonomiċi, u filwaqt li jiġi żgurat trattament ġust bejn is-setturi tas-sajd, kif ukoll fid-dawl tal-opinjonijiet li jkunu ngħadu waqt il-konsultazzjoni mal-partijiet ikkonċernati, b'mod partikolari mal-kunsilli konsultattivi kkonċernati.

(5)

Meta TAC marbuta ma' stokk partikolari tiġi allokata lil Stat Membru wieħed biss, ikun xieraq li dak l-Istat Membru jingħata s-setgħa jiddeċiedi l-livell tat-tali TAC skont l-Artikolu 2(1) tat-Trattat. Jenħtieġ li jsiru dispożizzjonijiet biex ikun żgurat li, meta jkun qed jistabbilixxi dak il-livell tat-TAC, l-Istat Membru kkonċernat jaġixxi b'mod li jkun konsistenti għalkollox mal-prinċipji u mar-regoli tal-PKS.

(6)

Ir-Regolament tal-Kunsill (KE) Nru 847/96 (2) daħħal kundizzjonijiet addizzjonali għall-ġestjoni tat-TACs minn sena għall-oħra li jinkludu dispożizzjonijiet dwar il-flessibbiltà għat-TACs prekawzjonarji u analitiċi skont l-Artikolu 3 u 4 ta' dak ir-Regolament. Skont l-Artikolu 2 ta' dak ir-Regolament, meta jiġu stabbiliti t-TACs, il-Kunsill irid jiddeċiedi liema huma l-istokkijiet li għalihom ma għandhomx japplikaw l-Artikoli 3 u 4 ta' dak ir-Regolament, b'mod partikolari abbażi tal-istat bijoloġiku tal-istokkijiet. Iktar reċentement, l-Artikolu 15(9) tar-Regolament (UE) Nru 1380/2013 daħħal mekkaniżmu ta' flessibbiltà ieħor minn sena għall-oħra għall-istokkijiet kollha li għalihom japplika l-obbligu ta' ħatt l-art. Għalhekk, sabiex tiġi evitata flessibbiltà eċċessiva li ddgħajjef il-prinċipju ta' sfruttament razzjonali u responsabbli tar-riżorsi bijoloġiċi tal-baħar, li xxekkel il-kisba tal-għanijiet tal-PKS u li twassal għad-deterjorament tal-qagħda bijoloġika tal-istokkijiet, jenħtieġ li jiġi stabbilit li l-Artikoli 3 u 4 tar-Regolament (KE) Nru 847/96 japplikaw għat-TACs analitiċi biss meta ma tintużax il-flessibbiltà minn sena għall-oħra prevista fl-Artikolu 15(9) tar-Regolament (UE) Nru 1380/2013.

(7)

L-obbligu tal-ħatt l-art imsemmi fl-Artikolu 15 tar-Regolament (UE) Nru 1380/2013 qed jiddaħħal bil-mod il-mod għat-tipi ta' sajd differenti. Fir-reġjuni koperti minn dan ir-Regolament, jenħtieġ li mill-1 ta' Jannar 2019 'il quddiem jinħattu l-art il-qabdiet kollha tal-ispeċijiet li għalihom hemm limiti tal-qbid. L-Artikolu 16(2) tar-Regolament (UE) Nru 1380/2013 jipprevedi li, meta jiddaħħal l-obbligu ta' ħatt l-art għal stokk ta' ħut partikolari, l-opportunitajiet tas-sajd iridu jiġu stabbiliti billi titqies il-bidla mill-istabbiliment ta' opportunitajiet tas-sajd li jirriflettu l-ħatt l-art għall-istabbiliment ta' opportunitajiet tas-sajd li jirriflettu l-qabdiet. Madankollu, jingħataw eżenzjonijiet speċifiċi mill-obbligu ta' ħatt l-art skont l-Artikolu 15(4) sa (7) ta' dak ir-Regolament. Abbażi tar-rakkomandazzjonijiet konġunti li ppreżentaw l-Istati Membri u skont l-Artikolu 15 ta' dak ir-Regolament, il-Kummissjoni adottat għadd ta' regolamenti delegati li jistabbilixxu pjanijiet speċifiċi għall-iskartar tal-ħut applikabbli għal perijodu inizjali ta' mhux aktar minn tliet snin, li jista' jiġġedded bi tliet snin oħra, u li jimplimentaw l-obbligu tal-ħatt l-art.

(8)

Jenħtieġ li l-opportunitajiet tas-sajd ikunu f'konformità mal-ftehimiet u l-prinċipji internazzjonali, bħall-ftehim tan-Nazzjonijiet Uniti tal-1995 dwar il-konservazzjoni u l-ġestjoni ta' stokkijiet ta' ħut transżonali u stokkijiet ta' ħut li jpassi ħafna (3), u skont il-prinċipji dettaljati ta' ġestjoni stabbiliti fil-Linji Gwida Internazzjonali għall-Ġestjoni tas-Sajd fil-Fond fl-Ibħra Internazzjonali maħruġa mill-Organizzazzjoni tal-Ikel u l-Agrikoltura tan-Nazzjonijiet Uniti fl-2008, li skonthom, b'mod partikolari, jenħtieġ li regolatur ikun iktar kawt meta ma jkunx ċert mill-informazzjoni jew meta l-informazzjoni ma tkunx affidabbli jew ma tkunx biżżejjed. Jenħtieġ li n-nuqqas ta' biżżejjed informazzjoni xjentifika ma jservix ta' raġuni biex jiġu posposti l-miżuri ta' konservazzjoni u ta' ġestjoni jew biex dawn ma jittiħdux.

(9)

Il-kwota tat-TAC u tal-Unjoni għaċ-ċinturin iswed f'ilmijiet tal-Unjoni u dawk internazzjonali taż-żoni 5, 6, 7 u 12 jenħtieġ li tiġi stabbilita filwaqt li jittieħed kont li hemm qabdiet ta' pajjiżi terzi minn dak l-istokk u li l-Unjoni jenħtieġ li jkollha opportunitajiet għas-sajd li jikkorrispondu għas-sehem ta' qabdiet storiċi minn dak l-istokk.

(10)

Fid-dawl tal-parir tal-Kunsill Internazzjonali għall-Esplorazzjoni tal-Baħar (ICES) dwar tnaqqis tal-opportunitajiet tas-sajd, minħabba livell għoli ta' adozzjoni tal-kwota u fid-dawl tal-introduzzjoni tal-obbligu ta' ħatt l-art sħiħ fl-2019, is-sajd dirett ma għandux ikun permess għall-fonsa l-ħamra fis-subżoni 3 sa 10, 12 u 14 (fil-Baħar tat-Tramuntana u fl-ilmijiet tal-Majjistral u tal-Lbiċ) u t-TAC jenħtieġ li jiġi stabbilit għall-qabdiet aċċessorji biss.

(11)

Skont il-parir tal-ICES, l-osservazzjonijiet limitati abbord juru li l-grenadier rasu raffa kien jammonta għal inqas minn 1 % mill-qabdiet irrappurtati tal-grenadier imnieħru tond. Abbażi ta' dawk il-kunsiderazzjonijiet, l-ICES huwa tal-parir li ma għandu jkun hemm l-ebda sajd dirett għall-grenadier rasu raffa u li l-qabdiet aċċessorji tiegħu għandhom jingħaddu mat-TAC għall-grenadier imnieħru tond sabiex jitnaqqas kemm jista' jkun il-potenzjal li jkun hemm irrappurtar żbaljat tal-ispeċijiet. L-ICES jindika li hemm differenzi konsiderevoli, li jmorru lil hinn minn ordni wieħed ta' kobor (jiġifieri ta' iktar minn għaxar darbiet), bejn il-proporzjonijiet relattivi tal-grenadier imnieħru tond u tal-grenadier rasu raffa rrappurtati fil-ħatt l-art uffiċjali u fil-qabdiet osservati u fl-istħarriġ xjentifiku fiż-żoni fejn bħalissa jsir is-sajd għall-grenadier rasu raffa. Id-data disponibbli għal din l-ispeċi hija limitata ħafna, u l-ICES iqis li xi data tal-ħatt l-art irrappurtata kienet każ ta' rrappurtar żbaljat tal-ispeċijiet. Minħabba f'hekk, ma jistax jiġi stabbilit rekord storiku preċiż tal-qabdiet tal-grenadier rasu raffa. Għalhekk, skont il-parir xjentifiku, jenħtieġ li l-qabdiet aċċessorji tal-grenadier rasu raffa jkunu limitati għal 1 % mill-kwota ta' kull Stat Membru għall-grenadier imnieħru tond u li dawn il-qabdiet jingħaddu ma' dik il-kwota. Jekk il-grenadier rasu raffa jitqies biss bħala qabda aċċessorja tal-qabdiet tal-grenadier imnieħru tond u jitqies li jifforma parti mill-istess TAC, ma jkunx hemm iktar żbalji fir-rappurtar tiegħu.

(12)

Fid-dawl tal-parir tal-ICES, huwa xieraq li t-TAC għall-paġella ħamra fis-subżoni 6, 7 u 8 tal-ICES (fl-ilmijiet tal-Majjistral) tinżamm bħala TAC għall-qabdiet aċċessorji biss.

(13)

Il-paġella ħamra tinqabad fiż-żoni rilevanti tal-Kumitat tas-Sajd għall-Atlantiku Ċentrali tal-Lvant (is-CECAF) u tal-Kummissjoni Ġenerali għas-Sajd fil-Mediterran (il-GFCM), li l-konfini tagħhom imissu mas-subżona 9 tal-ICES. Minħabba li d-data tal-ICES għal dawk iż-żoni li jmissu ma' dik is-subżona mhix kompluta, jenħtieġ li l-ambitu tat-TAC jibqa' limitat għas-subżona 9 tal-ICES. Madankollu, sabiex jiġi żgurat li d-deċiżjonijiet ta' ġestjoni jseħħu fuq l-aqwa bażi disponibbli, saru dispożizzjonijiet għar-rappurtar tad-data b'rabta ma' dawk iż-żoni li jmissu ma' dik is-subżona.

(14)

Fil-każ tal-paġella ħamra fis-subżona 10 tal-ICES, l-ICES ma ta l-ebda parir għall-2020. Madankollu, jenħtieġ li jiġu stabbiliti l-opportunitajiet tas-sajd kemm għall-2019 u kemm għall-2020. Huwa possibbli li meta jinħareġ il-parir xjentifiku għall-2020, ikun hemm bżonn jiġu emendati kif opportun l-opportunitajiet tas-sajd stabbiliti minn dan ir-Regolament.

(15)

Fid-dawl tal-livell baxx ta' adozzjoni tal-kwota u minħabba l-fatt li mhu qed isir l-ebda sajd immirat lejn dan l-istokk, jenħtieġ li ma tkomplix tiġi stabbilita t-TAC għaċ-ċinturin l-iswed fis-subżoni 1 sa 4 tal-ICES (fil-Baħar tat-Tramuntana u fi Skagerrak).

(16)

Jenħtieġ li ma jkomplux jiġu stabbiliti t-TACs għall-grenadier imnieħru tond fis-subżoni 1, 2 u 4 tal-ICES (fil-Baħar tat-Tramuntana) u għal-lipp abjad fis-subżoni 1 sa 10, 12 u 14 tal-ICES. Il-parir tal-ICES jistabbilixxi li n-nuqqas ta' TACs mhu se jwassal għall-ebda riskju ta' sfruttament mhux sostenibbli jew se jwassal għal riskju baxx ħafna ta' dan.

(17)

L-ICES jagħti parir li l-mera tal-Atlantiku ma tinqabadx qabel l-2020. Huwa xieraq li jkunu pprojbiti s-sajd, iż-żamma abbord, it-trażbord u l-ħatt l-art ta' dik l-ispeċi minħabba li l-istokk tagħha naqas ferm u mhux qed jirkupra. Skont l-ICES, mill-2010 'l hawn ma sar l-ebda sajd dirett għall-mera tal-Atlantiku fil-Grigal tal-Atlantiku min-naħa tal-Unjoni.

(18)

L-ICES jagħti parir li l-mortalità mis-sajd ta' klieb il-baħar tal-fond jenħtieġ li titnaqqas u ma jiġi permess l-ebda sajd immirat. Il-klieb il-baħar tal-fond huma speċijiet li jgħixu fit-tul b'rati baxxi ta' riproduzzjoni u malajr ġew sfruttati żżejjed. Għalhekk, l-opportunitajiet tas-sajd għal speċijiet bħal dawn jenħtieġ li jkunu ristretti bis-sħiħ permezz ta' projbizzjoni ġenerali tas-sajd għal dawk l-ispeċijiet. Madankollu, sajd artiġjanali dirett fil-baħar fond għaċ-ċinturin iswed li juża konzijiet ikollu qabdiet inċidentali inevitabbli ta' klieb il-baħar tal-baħar fond li bħalissa qed jiġu mormija mejtin. Il-konzijiet huma rikonoxxuti bħala rkaptu tas-sajd selettiv f'dan is-sajd. Madankollu anki b'dan l-irkaptu kien inevitabbli li l-klieb il-baħar tal-baħar fond jinqabdu b'mod aċċidentali. Għalhekk, jenħtieġ li tinżamm TAC restrittiva għall-qabdiet inċidentali inevitabbli ta' dawk l-ispeċijiet f'sajd diretti għaċ-ċinturin l-iswed li juża l-konzijiet. L-Istati Membri kkonċernati jenħtieġ li jiżviluppaw aktar miżuri reġjonali ta' ġestjoni għas-sajd taċ-ċinturin l-iswed bil-ħsieb li jitnaqqsu l-qabdiet inċidentali ta' klieb il-baħar tal-fond. Barra minn hekk, jenħtieġ li jistabbilixxu miżuri speċifiċi ta' ġbir tad-data għall-klieb il-baħar tal-fond sabiex jiġi żgurat li dawk l-istokkijiet jiġu mmonitorjati aktar mill-qrib. L-iffissar ta' allowance għall-qabdiet inċidentali fl-ilmijiet tal-Unjoni u dawk internazzjonali tas-subżoni 5 sa 9 tal-ICES, fl-ilmijiet tal-Unjoni u dawk internazzjonali tas-subżona 10 tal-ICES u fl-ilmijiet tal-Unjoni tas-CECAF 34.1.1, 34.1.2 u 34.2 huwa mingħajr preġudizzju għall-prinċipju tal-istabbiltà relattiva fir-rigward ta' klieb il-baħar tal-fond f'dawk iż-żoni.

(19)

Biex jiġi evitat li jiġu interrotti l-attivitajiet tas-sajd u biex jiġi żgurat l-għajxien tas-sajjieda tal-Unjoni, jenħtieġ li dan ir-Regolament jibda japplika mill-1 ta' Jannar 2019. Sabiex l-Istati Membri jkunu jistgħu jiżguraw l-applikazzjoni fil-ħin ta' dan ir-Regolament, jenħtieġ li jidħol fis-seħħ mill-ewwel malli jiġi ppubblikat,