(1)

Ir-Regolament tal-Kummissjoni (KE) Nru 474/2006 (2) stabbilixxa l-lista ta' kumpaniji tal-ajru li huma soġġetti għal projbizzjoni fuq l-operat fl-Unjoni.

(2)

Skont l-Artikolu 4(3) tar-Regolament (KE) Nru 2111/2005 (3), ċerti Stati Membri u l-Aġenzija tal-Unjoni Ewropea tas-Sikurezza tal-Avjazzjoni (“EASA”) għaddew lill-Kummissjoni informazzjoni li hija rilevanti għall-aġġornament ta' dik il-lista. Waslet informazzjoni rilevanti wkoll mingħand pajjiżi terzi u organizzazzjonijiet internazzjonali. Jenħtieġ li l-lista tiġi aġġornata abbażi ta' dik l-informazzjoni.

(3)

Il-Kummissjoni infurmat lill-kumpaniji tal-ajru kollha kkonċernati, direttament jew permezz tal-awtoritajiet responsabbli għas-sorveljanza regolatorja tagħhom, dwar il-fatti u l-kunsiderazzjonijiet essenzjali li jiffurmaw il-bażi ta' deċiżjoni li timponilhom projbizzjoni fuq l-operat fl-Unjoni jew li temenda l-kundizzjonijiet ta' projbizzjoni fuq l-operat imposta fuq kumpanija tal-ajru li tkun inkluża fil-listi fl-Annessi A u B tar-Regolament (KE) Nru 474/2006.

(4)

Il-Kummissjoni tat l-opportunità lill-kumpaniji tal-ajru kkonċernati biex jikkonsultaw id-dokumenti fornuti mill-Istati Membri, biex jissottomettu kummenti bil-miktub u biex jagħmlu preżentazzjoni orali lill-Kummissjoni u lill-Kumitat stabbilit bir-Regolament (KE) Nru 2111/2005 (il-“Kumitat għas-Sikurezza tal-Ajru”).

(5)

Il-Kummissjoni infurmat lill-Kumitat għas-Sikurezza tal-Ajru dwar il-konsultazzjonijiet konġunti li għaddejjin, fil-qafas tar-Regolament (KE) Nru 2111/2005 u r-Regolament tal-Kummissjoni (KE) Nru 473/2006 (4), mal-awtoritajiet kompetenti u mal-kumpaniji tal-ajru tal-Angola, tal-Belarussja, tal-Benin, tal-Gambja, tal-Indoneżja, tal-Mauritania, tal-Messiku, tal-Moldova, tan-Nepal, tar-Russja, tat-Tajlandja, tal-Venezwela u taż-Żambja. Il-Kummissjoni infurmat ukoll lill-Kumitat għas-Sikurezza tal-Ajru dwar il-qagħda tas-sikurezza tal-avjazzjoni fl-Afganistan, fil-Gabon, fil-Każakistan, fil-Libja u fil-Mozambique.

(6)

L-EASA infurmat ukoll lill-Kummissjoni u lill-Kumitat għas-Sikurezza tal-Ajru dwar ir-riżultati tal-analiżi tal-ispezzjonijiet fir-rampa li saru skont ir-Regolament tal-Kummissjoni (UE) Nru 965/2012 (5), fil-qafas tal-programm tal-Valutazzjoni tas-Sikurezza tal-Inġenji tal-Ajru Barranin (“SAFA”).

(7)

Barra minn hekk, l-EASA infurmat lill-Kummissjoni u lill-Kumitat għas-Sikurezza tal-Ajru dwar il-proġetti ta' assistenza teknika li saru fil-pajjiżi terzi milqutin minn projbizzjoni fuq l-operat skont ir-Regolament tal-Kummissjoni (KE) Nru 474/2006. L-EASA pprovdiet informazzjoni dwar il-pjanijiet u t-talbiet għal aktar assistenza teknika u kooperazzjoni biex tittejjeb il-kapaċità amministrattiva u teknika tal-awtoritajiet tal-avjazzjoni ċivili f'pajjiżi terzi, bil-għan li dawn ikunu megħjuna jsolvu n-nuqqasijiet ta' konformità ma' standards internazzjonali tas-sikurezza tal-avjazzjoni ċivili applikabbli. L-Istati Membri ġew mistiedna jwieġbu dawk it-talbiet fuq bażi bilaterali, b'koordinazzjoni mal-Kummissjoni u mal-EASA. F'dan ir-rigward, il-Kummissjoni saħqet fuq is-siwi tal-għoti ta' informazzjoni lill-komunità internazzjonali tal-avjazzjoni, b'mod partikulari permezz tal-bażi tad-data tan-Netwerk tal-Assistenza Kollaborattiva fis-Sikurezza tal-Organizzazzjoni tal-Avjazzjoni Ċivili Internazzjonali (ICAO), dwar l-assistenza teknika lil pajjiżi terzi pprovduta mill-Unjoni u mill-Istati Membri sabiex tittejjeb is-sikurezza tal-avjazzjoni mad-dinja kollha.

(8)

Il-Eurocontrol ipprovdiet lill-Kummissjoni u lill-Kumitat għas-Sikurezza tal-Ajru b'aġġornament dwar il-qagħda tal-funzjoni ta' allarm tas-SAFA u tal-Operaturi ta' Pajjiżi Terzi (“TCO”), flimkien ma' statistika attwali għall-messaġġi ta' allert għall-kumpaniji tal-ajru pprojbiti.

(9)

Wara l-analiżi mill-EASA tal-informazzjoni li ħarġet mill-ispezzjonijiet fir-rampa li twettqu fuq l-inġenji tal-ajru tal-kumpaniji tal-ajru tal-Unjoni u minn spezzjonijiet ta' standardizzazzjoni li twettqu mill-EASA, kif ukoll minn spezzjonijiet u awditjar speċifiċi li twettqu mill-awtoritajiet nazzjonali tal-avjazzjoni, diversi Stati Membri ħadu ċerti miżuri ta' infurzar u infurmaw lill-Kummissjoni u lill-Kumitat għas-Sikurezza tal-Ajru dwar dawk il-miżuri. Il-Bulgarija u Malta infurmaw lill-Kummissjoni u lill-Kumitat għas-Sikurezza tal-Ajru dwar l-azzjonijiet li kienu ħadu fir-rigward tal-kumpaniji tal-ajru ċċertifikati fil-Bulgarija u f'Malta rispettivament.

(10)

L-Istati Membri tennew li huma lesti jaġixxu kif meħtieġ f'każ li xi informazzjoni rilevanti dwar is-sikurezza tkun tindika li jkun hemm riskji imminenti għas-sikurezza minħabba nuqqas ta' konformità min-naħa tal-kumpaniji tal-ajru tal-Unjoni mal-istandards internazzjonali tas-sikurezza rilevanti.

(11)

B'ittra tat-30 ta' April 2018, il-Kummissjoni talbet lill-awtorità kompetenti tal-Angola, Instituto Nacional da Aviação Civil (“INAVIC”), lista ta' dokumenti u ta' azzjonijiet li kellha twettaq.

(12)

L-INAVIC ipprovdiet id-dokumentazzjoni kollha mitluba fil-ħin. L-EASA analizzat id-dokumentazzjoni pprovduta mill-INAVIC, u kkonkludiet li ġiet ippreżentata b'mod ċar u strutturata sew. Barra minn hekk, il-kopji taċ-Ċertifikati tal-Operatur tal-Ajru (“AOC”) u tal-Ispeċifikazzjonijiet Operattivi pprovduti mill-INAVIC kienu konformi mal-format tal-ICAO. L-INAVIC ipprovdiet ħarsa ġenerali tajba lejn l-azzjonijiet ta' segwitu għas-sejbiet li saru waqt is-sorveljanza tas-sikurezza tal-kumpaniji tal-ajru tal-Angola fl-oqsma tal-operazzjonijiet tat-titjir (“OPS”) u tal-ajrunavigabbiltà (“AIR”).

(13)

Il-proċeduri u r-regolamenti tal-INAVIC ġew aġġornati mill-2015 'l hawn, l-iktar fl-oqsma tal-AIR, tal-OPS u fil-qasam ajrumediku. Barra minn hekk, skont l-istandards internazzjonali tas-sikurezza rilevanti, l-INAVIC qed tipprovdi aġġornamenti lill-ICAO għall-Pjan ta' Azzjoni Korrettiva (“CAP”) tagħha.

(14)

Biex tifhem l-attivitajiet tas-sorveljanza fl-Angola f'aktar dettall u abbażi tal-evidenza, il-Kummissjoni talbet lill-INAVIC tipprovdi r-rapporti tal-ispezzjonijiet jew l-awditi għall-validazzjoni mill-ġdid tal-AOCs, inkluż deskrizzjoni ddettaljata tas-sejbiet u l-azzjonijiet ta' segwitu applikati għall-kumpaniji tal-ajru Sonair, Air Jet u Heli-Malongo.

(15)

Dawk ir-rapporti ntbagħtu lill-EASA, li kkonkludiet li d-data inkluża fihom kienet rilevanti u ta' kwalità sostanzjali tajba. Dawk ir-rapporti wrew ukoll li kienu ġew implimentati l-azzjonijiet korrettivi xierqa mill-kumpaniji tal-ajru kkonċernati, abbażi tas-sejbiet tal-INAVIC.

(16)

L-INAVIC infurmat lill-Kummissjoni li kienet iċċertifikat lil żewġ kumpaniji tal-ajru ġodda, speċifikament Bestflya Aircraft Management u SJL. L-INAVIC infurmat lill-Kummissjoni wkoll li seba' kumpaniji tal-ajru ma għadhomx detenturi ta' AOC valida: Air Nave, Air26, Angola Air Services, Diexim, Fly540, Gira Globo u Mavewa.

(17)

Abbażi tal-informazzjoni disponibbli bħalissa, il-Kummissjoni tikkonkludi li l-INAVIC għamlet progress fir-rigward tal-implimentazzjoni tal-istandards internazzjonali tas-sikurezza. Madankollu, qabel ma tkun tista' tittieħed deċiżjoni dwar it-tneħħija tal-projbizzjoni minn fuq kumpaniji tal-ajru fl-Angola, jenħtieġ li jiġi vverifikat il-progress permezz ta' żjara ta' valutazzjoni fuq il-post min-naħa tal-Unjoni, lill-INAVIC u lil għażla ta' kumpaniji tal-ajru tal-Angola.

(18)

Għaldaqstant, skont il-kriterji komuni stipulati fl-Anness tar-Regolament (KE) Nru 2111/2005, il-Kummissjoni tqis li f'dan l-istadju, il-lista tal-kumpaniji tal-ajru li huma soġġetti għal projbizzjoni fuq l-operat fi ħdan l-Unjoni jenħtieġ li tiġi emendata, u jenħtieġ li tkun tinkludi l-kumpaniji tal-ajru l-ġodda Bestflya Aircraft Management u SJL. Il-kumpaniji tal-ajru Air Nave, Air26, Angola Air Services, Diexim, Fly540, Gira Globo u Mavewa jenħtieġ jitneħħew mill-Anness A tar-Regolament (KE) Nru 474/2006 għax ma għadhomx detenturi ta' AOC validu.

(19)

Fis-17 ta' Settembru 2018, b'segwitu għal nuqqasijiet ta' sikurezza identifikati mill-EASA fil-qafas tal-proċess ta' awtorizzazzjoni tat-TCO, il-Kummissjoni bdiet konsultazzjonijiet mad-Dipartiment tal-Avjazzjoni tal-Belarussja (“AD-BLR”), skont l-Artikolu 3(2) tar-Regolament Nru 473/2006.

(20)

Fit-8 ta' Novembru 2018, il-Kummissjoni, l-EASA u rappreżentanti tal-AD-BLR kellhom laqgħa teknika. Matul dik il-laqgħa, il-Kummissjoni saħqet fuq kemm huwa importanti li tinżamm infurmata sew u regolari dwar l-attivitajiet ta' sorveljanza tas-sikurezza min-naħa tal-AD-BLR. L-AD-BLR iddeskriva l-miżuri korrettivi li ttieħdu biex jindirizzaw in-nuqqasijiet ta' sikurezza identifikati mill-EASA fil-qafas tal-proċedura ta' awtorizzazzjoni u tal-attivitajiet ta' monitoraġġ tat-TCO. Għalkemm dik l-informazzjoni kienet diġà ntalbet fil-bidu tal-konsultazzjonijiet, l-AD-BLR ma pprovdiex informazzjoni biżżejjed dwar l-ippjanar u r-riżultati tal-attivitajiet ta' sorveljanza. Fid-dawl tad-diffikultajiet misjuba minn ċerti applikanti ċċertifikati fil-Belarussja huma u jgħaddu mill-proċedura ta' awtorizzazzjoni tat-TCO, l-iktar minħabba nuqqas ta' sikurezza, il-Kummissjoni tenniet l-importanza tal-konformità, min-naħa tal-AD-BLR, mal-istandards internazzjonali tas-sikurezza rilevanti fil-qadi tar-responsabbiltajiet tiegħu rigward is-sikurezza.

(21)

Fid-dawl tan-nuqqas ta' sikurezza, il-Kummissjoni stiednet lill-AD-BLR għal seduta skont l-Artikolu 7 tar-Regolament (KE) Nru 2111/2005, li saret fit-13 ta' Novembru 2018. Matul is-seduta, l-AD-BLR ipprovda lill-Kummissjoni u lill-Kumitat għas-Sikurezza tal-Ajru b'informazzjoni ġenerali dwar is-settur tal-avjazzjoni fil-Belarussja, il-persunal disponibbli għall-attivitajiet ta' sorveljanza, u l-mod kif il-Belarussja twettaq investigazzjonijiet tal-aċċidenti. L-AD-BLR informahom ukoll dwar il-qagħda tas-sorveljanza tas-sikurezza fil-Belarussja billi rrefera għall-elementi kritiċi rilevanti tal-ICAO. L-AD-BLR tenna s-sejħa tiegħu għal kooperazzjoni mill-qrib mal-UE, u informa li nbdiet l-implimentazzjoni ta' ċerti Regolamenti tal-UE, b'mod partikulari dawk marbutin mal-ajrunavigabbiltà u mal-operati. Fiduċjuż li l-attivitajiet tiegħu jitwettqu b'konformità sħiħa mal-istandards internazzjonali tas-sikurezza, l-AD-BLR stieden lill-UE tagħmel żjara ta' valutazzjoni biex issir taf aħjar is-sistema tas-sorveljanza tas-sikurezza tal-Belarussja.

(22)

Il-Kummissjoni tqis li n-nuqqas ta' informazzjoni ddokumentata, u l-iskambju diffiċli tal-informazzjoni minn mindu bdew il-konsultazzjonijiet uffiċjali, jagħmluha diffiċli li ssir valutazzjoni ta' kif l-AD-BLR jaqdi l-obbligi tiegħu. Għaldaqstant, il-Kummissjoni jidhrilha li hemm bżonn li l-Unjoni tagħmel żjara ta' valutazzjoni fuq il-post, qabel il-laqgħa li jmiss tal-Kumitat għas-Sikurezza tal-Ajru.

(23)

Barra minn hekk, il-Kummissjoni jidhrilha li r-riżultati tal-ispezzjonijiet fir-rampa tas-SAFA ta' BELAVIA, l-uniku operatur skedat tal-passiġġieri ċċertifikat fil-Belarussja, ma jqajmux tħassib speċifiku rigward is-sikurezza f'dan l-istadju, b'rabta ma' din il-kumpanija tal-ajru. Fir-rigward tal-kumpaniji tal-ajru li jwettqu operazzjonijiet tal-merkanzija, l-EASA diġà ħadet miżuri ta' infurzar kontra JSC Aircompany Grodno u Transaviaexport Airlines.

(24)

Għalkemm huwa ċar li n-nuqqasijiet varji identifikati se jkollhom jissolvew, s'issa mhumiex ta' natura li titlob l-inklużjoni ta' kumpaniji tal-ajru mill-Belarussja fl-Anness A tar-Regolament (KE) Nru 474/2006.

(25)

Għaldaqstant, abbażi tal-informazzjoni disponibbli bħalissa, u skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f'dan l-istadju, fir-rigward tal-kumpaniji tal-ajru mill-Belarussja, ma hemm ebda raġuni biex tiġi emendata l-lista tal-kumpaniji tal-ajru li huma soġġetti għal projbizzjoni fuq l-operat fi ħdan l-Unjoni.

(26)

Jenħtieġ li l-Istati Membri jkomplu jivverifikaw il-konformità effettiva tal-Belarussja mal-istandards internazzjonali tas-sikurezza rilevanti permezz tal-prijoritizzazzjoni tal-ispezzjonijiet fir-rampa li għandhom isiru fuq il-kumpaniji tal-ajru ċċertifikati fil-Belarussja, skont ir-Regolament (UE) Nru 965/2012.

(27)

Jekk ikun hemm informazzjoni rilevanti dwar is-sikurezza li turi li hemm riskji imminenti ta' sikurezza minħabba nuqqas ta' konformità mal-istandards internazzjonali tas-sikurezza, il-Kummissjoni jaf tkun obbligata tieħu azzjoni ulterjuri, skont ir-Regolament (KE) Nru 2111/2005.

(28)

F'Mejju 2017, il-Kummissjoni neħħiet il-kumpaniji tal-ajru kollha taħt l-awtorità tal-Benin mill-Anness A tar-Regolament (KE) Nru 474/2006 (6).

(29)

B'ittra tal-14 ta' Settembru 2018, il-Kummissjoni talbet lill-Agence Nationale de l'Aviation Civile du Bénin (“ANAC Bénin”) lista ta' dokumenti marbutin mal-istruttura tal-awtorità, mas-sistema u l-attivitajiet ta' sorveljanza tagħha, inkluż il-lista tad-detenturi ta' AOC u tal-inġenji tal-ajru rreġistrati, kif ukoll il-miżuri ta' infurzar li ttieħdu.

(30)

Fil-15 ta' Ottubru 2018, l-ANAC Bénin ipprovda l-informazzjoni mitluba, inkluż dettalji dwar l-organizzazzjoni interna tal-ANAC Bénin, kif ukoll il-kwalifiki tal-persunal, il-politika tat-taħriġ, il-proċedura ta' sorveljanza, is-sistema ta' rappurtar tal-inċidenti, u l-proċedura għall-ħruġ u l-validazzjoni tal-liċenzji.

(31)

Skont id-dokumenti mressqa, kien hemm żewġ kumpaniji tal-ajru ċċertifikati mill-ANAC Bénin, speċifikament Air Taxi Bénin u ASAB.

(32)

Il-Kummissjoni tħeġġeġ lill-ANAC Bénin tirrapporta b'mod regolari dwar it-titjib kontinwu fl-implimentazzjoni tal-istandards internazzjonali tas-sikurezza, kif ukoll dwar kull informazzjoni ġdida rrelatata, b'mod partikulari dwar iċ-ċertifikazzjoni ta' kumpaniji tal-ajru ġodda.

(33)

Għaldaqstant, skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f'dan l-istadju, fir-rigward tal-kumpaniji tal-ajru mill-Benin, ma hemm ebda raġuni biex tiġi emendata l-lista tal-kumpaniji tal-ajru li huma soġġetti għal projbizzjoni fuq l-operat fi ħdan l-Unjoni.

(34)

Qatt ma ġew inklużi kumpaniji tal-ajru mill-Gambja fl-Anness A tar-Regolament (KE) Nru 474/2006. B'ittra tal-24 ta' Awwissu 2018, il-Kummissjoni talbet lill-Awtorità tal-Avjazzjoni Ċivili tal-Gambja (“CAAG”) tipprovdi dokumentazzjoni dwar l-istruttura tal-awtorità, is-sistema u l-attivitajiet ta' sorveljanza tagħha, inkluż il-lista tad-detenturi ta' AOC u tal-inġenji tal-ajru rreġistrati, kif ukoll l-azzjonijiet ta' infurzar li ttieħdu. Il-CAAG ipprovdiet l-informazzjoni mitluba fit-28 ta' Settembru 2018.

(35)

Il-CAAG infurmat lill-Kummissjoni li, dak iż-żmien, ma kien hemm ebda detentur ta' AOC fil-pajjiż, u li r-reġistru tal-inġenji tal-ajru kien jinkludi 18-il inġenju tal-ajru. Uħud minn dawk l-inġenji tal-ajru jinsabu maħżunin, filwaqt li oħrajn ma għadhomx operattivi.

(36)

Fir-rigward tal-kumpanija tal-ajru Sonnig International Private Jets Gambia – SIPJ(G), il-CAAG ikkonfermat li ilha minn Awwissu 2017 ma jkollha AOC valida tal-Gambja.

(37)

Fl-istess ittra, il-CAAG infurmat ukoll li l-ICAO kienet wettqet awditu ta' sorveljanza tas-sikurezza fuq il-post mis-16 sas-26 ta' Lulju 2018, fil-qafas tal-Programm USAOP-CMA tal-ICAO. Il-CAAG intrabtet li tibgħat ir-rapport tal-awditu lill-Kummissjoni malli jkun disponibbli. Ir-riżultati ta' awditu tal-2005 jindikaw implimentazzjoni effettiva ġenerali ta' 78.46 %.

(38)

Abbażi ta' dik l-informazzjoni, il-Kummissjoni tqis li bħalissa ma hemm ebda indikazzjoni li l-CAAG ma tkunx kapaċi taqdi l-obbligi internazzjonali tagħha fir-rigward tas-sorveljanza tas-sikurezza.

(39)

Għaldaqstant, skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f'dan l-istadju, fir-rigward tal-kumpaniji tal-ajru mill-Gambja, ma hemm ebda raġuni biex tiġi emendata l-lista tal-kumpaniji tal-ajru li huma soġġetti għal projbizzjoni fuq l-operat fi ħdan l-Unjoni.

(40)

Il-kumpaniji tal-ajru kollha tal-Indoneżja tneħħew mill-Anness A tar-Regolament (KE) Nru 474/2006 f'Ġunju 2018 (7). Bil-għan li jsir aktar monitoraġġ tas-sorveljanza tas-sikurezza fl-Indoneżja, il-Kummissjoni u d-Direttorat Ġenerali tal-Avjazzjoni Ċivili tal-Indoneżja (“DGCA Indonesia”) baqgħu għaddejjin bil-konsultazzjonijiet skont l-Artikolu 3(2) tar-Regolament (KE) Nru 473/2006. Il-Kummissjoni timmonitorja l-progress tad-DGCA Indonesia huwa u jġib is-sistema tas-sorveljanza tas-sikurezza tal-avjazzjoni fl-Indoneżja konformi mal-istandards internazzjonali tas-sikurezza. F'dak il-kuntest, b'ittra tas-26 ta' Settembru 2018, id-DGCA Indonesia pprovda lill-Kummissjoni b'informazzjoni addizzjonali u b'aġġornament dwar l-attivitajiet ta' sorveljanza tas-sikurezza tal-avjazzjoni għall-perjodu minn Mejju 2018 sa Awwissu 2018, kif ukoll dwar il-CAP miftiehem.

(41)

Dik l-informazzjoni kienet tinkludi lista tal-kumpaniji tal-ajru ċċertifikati fl-Indoneżja, tal-inġenji tal-ajru rreġistrati u tal-attivitajiet ta' sorveljanza tas-sikurezza, lista tal-miżuri ta' infurzar meħudin mid-DGCA Indonesia, aġġornament dwar il-qagħda tal-CAPs b'riżultat taż-żjara ta' valutazzjoni fuq il-post mill-Unjoni f'Marzu 2018, kif ukoll l-aġġornamenti dwar l-implimentazzjoni tal-pjan ta' azzjoni għan-navigazzjoni bbażata fuq il-prestazzjoni (“PBN”), u dwar l-assistenza teknika pprovduta lid-DGCA Indonesia.

(42)

Fir-rigward tal-lista tal-kumpaniji tal-ajru, tal-inġenji tal-ajru u tal-attivitajiet ta' sorveljanza, f'dak il-perjodu, id-DGCA Indonesia ħareġ AOC Part-121 ġdid u żewġ AOCs Part-135 ġodda.

(43)

Fir-rigward tal-miżuri ta' infurzar li ttieħdu, id-DGCA Indonesia ssospenda żewġ AOCs (wieħed Part-121 u l-ieħor Part-135), irrevoka ċertifikat ta' validazzjoni wieħed, u ħa sanzjoni amministrattiva waħda rigward detentur ta' AOC Part-135. Barra minn hekk, id-DGCA Indonesia medd l-ewwel passi biex isaħħaħ is-sorveljanza fil-qasam mediku tal-liċenzjar, bi tweġiba għall-punti ta' tħassib li ġew identifikati matul il-żjara ta' valutazzjoni tal-UE f'Marzu 2018, billi ssospenda lil żewġ detenturi ta' liċenzja ta' eżaminatur mediku akkreditat.

(44)

Tqieset ukoll ir-rakkomandazzjoni dwar l-implimentazzjoni tal-PBN. Sa tmiem l-2018, l-Indoneżja mistennija timplimenta proċeduri tal-PBN fi 23 mill-25 ajruport internazzjonali tagħha bħala kwistjoni ta' prijorità. L-implimentazzjoni tal-PBN f'ajruporti nazzjonali u mbiegħda qiegħed tagħmel progress, iżda mhux bl-istess ritmu.

(45)

Id-DGCA Indonesia informa lill-Kummissjoni dwar il-qagħda tal-azzjonijiet korrettivi wara l-Missjoni ta' Valutazzjoni Koordinata tal-ICAO, li saret fl-2017. Fil-25 ta' Lulju 2018, l-ICAO irrevediet il-CAP fil-qasam tal-ajrunavigabbiltà. L-azzjonijiet korrettivi kollha ġew aċċettati għalkollox jew parzjalment mill-ICAO.

(46)

Wara l-aċċidenti fatali tat-titjira JT610 ta' Lion Air fid-29 ta' Ottubru 2018, id-DGCA Indonesia kkuntattja lill-Kummissjoni fi żmien 24 siegħa, u għadu jipprovdi informazzjoni, inkluż dwar l-azzjonijiet preventivi meħudin wara l-aċċident għal operaturi li għandhom inġenji tal-ajru tal-istess tip fil-flotta tagħhom (inġenju tal-ajru wieħed (1) operat minn Garuda, u 10 operati minn Lion Air).

(47)

Għaldaqstant, skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f'dan l-istadju, fir-rigward tal-kumpaniji tal-ajru mill-Indoneżja, ma hemm ebda raġuni biex tiġi emendata l-lista tal-kumpaniji tal-ajru li huma soġġetti għal projbizzjoni fuq l-operat fi ħdan l-Unjoni.

(48)

Jenħtieġ li l-Istati Membri jkomplu jivverifikaw il-konformità effettiva tal-Indoneżja mal-istandards internazzjonali tas-sikurezza rilevanti permezz tal-prijoritizzazzjoni tal-ispezzjonijiet fir-rampa li għandhom isiru fuq il-kumpaniji tal-ajru ċċertifikati fl-Indoneżja, skont ir-Regolament (UE) Nru 965/2012.

(49)

Jekk ikun hemm informazzjoni rilevanti dwar is-sikurezza li turi li hemm riskji imminenti ta' sikurezza minħabba nuqqas ta' konformità mal-istandards internazzjonali tas-sikurezza, il-Kummissjoni jaf tkun obbligata tieħu azzjoni ulterjuri, skont ir-Regolament (KE) Nru 2111/2005.

(50)

F'Diċembru 2012, il-Kummissjoni ddeċidiet li tneħħi l-kumpaniji tal-ajru kollha taħt l-awtorità tal-Mauritania mill-Anness A tar-Regolament (KE) Nru 474/2006 (8).

(51)

B'ittra tat-30 ta' Awwissu 2018, il-Kummissjoni talbet lill-awtorità kompetenti tal-Mauritania, Agence Nationale de l'Aviation Civile (“ANAC Mauritania”) li tipprovdi dokumentazzjoni dwar l-istruttura tal-awtorità, is-sistema u l-attivitajiet ta' sorveljanza tagħha, inkluż il-lista tad-detenturi ta' AOC u tal-inġenji tal-ajru rreġistrati, kif ukoll il-miżuri ta' infurzar li ttieħdu.

(52)

Fl-10 ta' Ottubru 2018, l-ANAC Mauritania pprovdiet l-informazzjoni mitluba, inkluż informazzjoni dwar l-istruttura organizzattiva u l-persunal, dwar id-detenturi ta' AOCs flimkien mal-ispeċifikazzjonijiet operattivi, dwar l-inġenji tal-ajru rreġistrati fil-Mauritania, kif ukoll ir-riżultati tal-attivitajiet ta' sorveljanza tas-sikurezza, l-azzjonijiet ta' infurzar, u l-lista ta' inċidenti u aċċidenti mill-2016 sal-lum.

(53)

L-ANAC Mauritania infurmat lill-Kummissjoni li, dak iż-żmien, kien hemm żewġ kumpaniji tal-ajru ċċertifikati fil-Mauritania, speċifikament Mauritania Airlines, ibbażata f'Nouakchott, li sservi ta' linja tal-ajru nazzjonali, u Class Aviation, kumpanija tat-taxi tal-ajru.

(54)

Il-Kummissjoni tħeġġeġ lill-ANAC Mauritania tirrapporta b'mod regolari dwar it-titjib kontinwu fl-implimentazzjoni tal-istandards internazzjonali tas-sikurezza.

(55)

Għaldaqstant, skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f'dan l-istadju, fir-rigward tal-kumpaniji tal-ajru mill-Mauritania, ma hemm ebda raġuni biex tiġi emendata l-lista tal-kumpaniji tal-ajru li huma soġġetti għal projbizzjoni fuq l-operat fi ħdan l-Unjoni.

(56)

Qatt ma ġew inklużi kumpaniji tal-ajru mill-Messiku fl-Anness A tar-Regolament (KE) Nru 474/2006. Wara aċċident fatali tal-kumpanija tal-ajru Messikana Global Air (Aerolíneas Damojh, S.A. de C.V.) f'Kuba fit-18 ta' Mejju 2018, il-Kummissjoni kkuntattjat lid-Dirección General de Aeronáutica Civil tal-Messiku (“DGAC Mexico”) u talbet informazzjoni ddettaljata.Skont id-DGAC Mexico, ġie sospiż l-AOC ta' Global Air (Aerolíneas Damojh, S.A. de C.V.) iżda mbagħad wara spezzjoni mid-DGAC Mexico tneħħiet is-sospensjoni mid-29 ta' Awwissu 2018 'il quddiem. L-aċċident innifsu, u l-perjodu qasir bejn is-sospensjoni tal-AOC u t-tneħħija tagħha, qajmu tħassib dwar kif id-DGAC Mexico kien qiegħed iwettaq il-kompiti tiegħu ta' sorveljanza tas-sikurezza. Minbarra dak l-aċċident, kien hemm diversi sinjali li wrew li aktarx niżel il-livell tas-sikurezza tal-avjazzjoni fil-Messiku, għax matul l-2018 żdied l-għadd ta' aċċidenti u inċidenti serji.

(57)

Fis-16 ta' Ottubru 2018, il-Kummissjoni, l-EASA u d-DGAC Mexico kellhom laqgħa teknika. Matul dik il-laqgħa, id-DGAC Mexico pprovda informazzjoni rilvanti dwar l-istruttura tiegħu, dwar l-attivitajiet ta' liċenzjar, ċertifikazzjoni u sorveljanza, dwar il-persunal responsabbli għas-sorveljanza tas-sikurezza, u dwar il-proċeduri ta' sorveljanza u l-qafas ġuridiku. Id-DGAC Mexico fisser ukoll ir-raġunijiet għat-tneħħija rapida tas-sospensjoni tal-AOC ta' Global Air (Aerolíneas Damojh, S.A. de C.V.).

(58)

Il-Kummissjoni ħadet nota tat-tkabbir mgħaġġel tas-settur tal-avjazzjoni fil-Messiku fl-2017, speċifikament fir-rigward tal-għadd ta' inġenji tal-ajru rreġistrati, il-kumpaniji tal-ajru u r-rotot, u esprimiet ċertu tħassib dwar il-kapaċità tad-DGAC Mexico biex iwettaq sorveljanza xierqa tas-sikurezza. Id-DGAC Mexico wieġeb li jqis li għandu l-kapaċità meħtieġa, u saħaq fuq il-fatt li kumpanija tal-ajru kbira (Mexicana de Aviación) kienet iddikjarat il-falliment tagħha, u li kumpaniji tal-ajru ġodda (fosthom Volaris, Aerojet) kienu jużaw l-istess mudelli ta' inġenji tal-ajru. B'hekk, skont id-DGAC Mexico, iż-żieda fl-inġenji tal-ajru rreġistrati ma għandha ebda impatt sinifikanti fuq il-kapaċità ta' sorveljanza tad-DGAC.

(59)

Fir-rigward ta' Global Air (Aerolíneas Damojh, S.A. de C.V.), id-DGAC Mexico spjega li Global Air kienet appellat kontra d-deċiżjoni tas-sospensjoni tal-AOC tagħha, kif ukoll kontra r-reġim speċjali ta' spezzjonijiet min-naħa tad-DGAC Mexico. Fi tmiem il-proċess ġudizzjarju, Global Air (Aerolíneas Damojh, S.A. de C.V.) talbet it-tħassir tar-reġistrazzjoni tal-inġenji tal-ajru tagħha u tal-AOC tagħha. Minħabba dik it-talba, l-inġenji tal-ajru ta' Global Air (Aerolíneas Damojh, S.A. de C.V.) mhumiex awtorizzati biex joperaw fil-Messiku.

(60)

B'segwitu għal din il-laqgħa u fuq talba tal-Kummissjoni, id-DGAC Mexico pprovda wkoll informazzjoni dwar l-aċċidenti u l-inċidenti serji li saru fl-aħħar 5 snin, kif ukoll dwar l-għadd ta' sospensjonijiet, revoki u miżuri ta' infurzar oħra li ttieħdu fl-2017 u fl-2018. Id-DGAC Mexico bagħat ukoll lill-Kummissjoni s-sejbiet u l-CAPs li rriżultaw mill-ispezzjonijiet addizzjonali mwettqa fuq Global Air (Aerolíneas Damojh, S.A. de C.V.) wara l-aċċident f'Kuba, kif ukoll is-sejbiet u l-CAPs ta' tliet kumpaniji tal-ajru Messikani oħra.

(61)

Abbażi tal-konsultazzjonijiet li saru u tal-informazzjoni skambjata, il-Kummissjoni tqis li d-DGAC Mexico bħalissa qiegħed iwettaq is-sorveljanza tas-sikurezza b'mod kontinwu biżżejjed (eż. it-tiġdid taċ-ċertifikati jsir darbtejn fis-sena). Il-qafas ġuridiku tal-avjazzjoni tal-Messiku jidher li huwa komprensiv u konformi mal-aktar standards internazzjonali riċenti tas-sikurezza tal-avjazzjoni. F'dan l-istadju, ir-riżultati tal-ispezzjonijiet fir-rampa tas-SAFA li twettqu fuq kumpaniji tal-ajru mill-Messiku ma jqajmu ebda tħassib speċifiku rigward is-sikurezza.

(62)

Abbażi tal-informazzjoni disponibbli bħalissa, inkluż informazzjoni pprovduta matul u wara l-laqgħa ta' konsultazzjoni teknika tas-16 ta' Ottubru 2018, il-Kummissjoni tqis li f'dan l-istadju, id-DGAC Mexicogħandu l-kapaċità u r-rieda meħtieġa biex jindirizza n-nuqqasijiet ta' sikurezza.

(63)

Għaldaqstant, skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f'dan l-istadju ma hemm ebda raġuni biex tiġi emendata l-lista tal-kumpaniji tal-ajru li huma soġġetti għall-projbizzjoni fuq l-operat fl-Unjoni biex jiġu inklużi kumpaniji tal-ajru mill-Messiku.

(64)

Jekk ikun hemm informazzjoni rilevanti dwar is-sikurezza li turi li hemm riskji imminenti ta' sikurezza minħabba nuqqas ta' konformità mal-istandards internazzjonali tas-sikurezza, il-Kummissjoni jaf tkun obbligata tieħu azzjoni ulterjuri, skont ir-Regolament (KE) Nru 2111/2005.

(65)

B'ittra tas-27 ta' Settembru 2018, il-Kummissjoni infurmat lill-Awtorità tal-Avjazzjoni Ċivili tal-Moldova (“CAAM”) dwar ċertu tħassib tas-sikurezza fir-rigward tal-kumpaniji tal-ajru ċċertifikati mill-CAAM. Fl-istess ħin, il-Kummissjoni għarrfet lill-CAAM dwar il-bidu ta' konsultazzjonijiet skont l-Artikolu 3(2) tar-Regolament (KE) Nru 473/2006.

(66)

Fit-12 ta' Ottubru 2018, il-CAAM infurmat lill-Kummissjoni dwar l-attivitajiet ta' sorveljanza mwettqa fir-rigward tal-kumpaniji tal-ajru ċċertifikati fil-Moldova matul l-aħħar tliet snin, kif ukoll dwar is-sorveljanza mwettqa fir-rigward tal-kumpanija tal-ajru Air Moldova.

(67)

Abbażi tal-informazzjoni disponibbli bħalissa, inkluż il-valutazzjoni tal-awtorizzazzjoni tat-TCO mill-EASA, l-ispezzjonijiet fir-rampa mwettqa mill-Istati Membri fil-qafas tal-programm tas-SAFA u l-informazzjoni pprovduta mill-CAAM, il-Kummissjoni tqis li l-CAAM jenħtieġ tkompli tiżviluppa l-kapaċità ta' spezzjoni tagħha tal-kumpaniji tal-ajru li għandha responsabbiltajiet ta' ċertifikazzjoni u sorveljanza lejhom.

(68)

Fid-29 ta' Ottubru 2018, il-Kummissjoni, l-EASA, il-CAAM u rappreżentanti tal-Air Moldova kellhom laqgħa teknika. Matul dik il-laqgħa, il-CAAM ipprovdiet informazzjoni dwar l-attivitajiet ta' sorveljanza tagħha, inkluż il-pjanijiet tagħha fir-rigward tal-ingaġġ u t-taħriġ ta' persunal tekniku, u l-approċċ strateġiku tagħha biex ittejjeb il-kapaċità tagħha ta' sorveljanza. L-Air Moldova pprovdiet informazzjoni dwar kif kienet qiegħda tindirizza t-tħassib li kien jissuġġerixxi nuqqas ta' kultura xierqa tas-sikurezza fil-kumpanija, kif kien tqajjem fid-dawl ta' ċerti sejbiet mis-SAFA.

(69)

Fid-dawl tan-nuqqasijiet ta' sikurezza identifikati, il-Kummissjoni stiednet lill-CAAM u lill-kumpaniji tal-ajru Air Moldova u Aerotranscargo għal seduta quddiem il-Kumitat għas-Sikurezza tal-Ajru, skont l-Artikolu 7 tar-Regolament (KE) Nru 2111/2005. Dik is-seduta saret fit-13 ta' Novembru 2018. Il-CAAM ippreżentat l-istruttura organizzattiva tagħha, inkluż dettalji dwar il-persunal tagħha, u pprovdiet informazzjoni dwar il-qafas legali tal-avjazzjoni ċivili fil-Moldova kif ukoll dwar l-iżviluppi futuri tagħha, inkluż l-implimentazzjoni tal-“Ftehim dwar Spazju Komuni tal-Avjazzjoni bejn l-Unjoni Ewropea u l-Istati Membri tagħha u r-Repubblika tal-Moldova” (9). Skont informazzjoni pprovduta mill-CAAM, fl-2018 erbatax-il att leġiżlattiv tal-UE ġew trasposti fil-leġiżlazzjoni nazzjonali tal-Moldova, filwaqt li huwa ppjanat li jiġu trasporti sbatax oħra matul l-2019.

(70)

Matul is-seduta, il-CAAM intrabtet li żżomm il-Kummissjoni infurmata b'mod kontinwu dwar l-attivitajiet ta' sorveljanza tagħha u dwar l-azzjonijiet meħudin biex tittejjeb is-sikurezza tal-avjazzjoni ċivili fil-Moldova. Il-CAAM ikkonfermat li tkun tilqa' u tappoġġa żjara ta' valutazzjoni tal-Unjoni fuq il-post fil-Moldova.

(71)

Matul is-seduta, Air Moldova ppreżentat l-istruttura u l-funzjonament tas-sistema tagħha ta' ġestjoni tal-kwalità, kif ukoll tas-sistema tagħha ta' ġestjoni tas-sikurezza. Infurmat ukoll lill-Kummissjoni u lill-Kumitat għas-Sikurezza tal-Ajru dwar il-proċessi li kienet implimentat biex tiżgura s-sikurezza tal-operazzjonijiet tagħha, inkluż l-identifikazzjoni ta' perikli, il-monitoraġġ tad-data tat-titjir, u l-valutazzjoni u t-taffija tar-riskji. Air Moldova spjegat l-investigazzjoni tagħha tal-inċident serju li involva inġenju tal-ajru tagħha waqt il-proċess ta' nżul l-art fl-Ajruport ta' Roma Fiumicino fl-2017, kif ukoll l-azzjonijiet ta' sikurezza li kienet ħadet minnufih wara dak l-inċident.

(72)

Matul is-seduta, Aerotranscargo pprovdiet informazzjoni dwar is-sistema tagħha ta' ġestjoni tas-sikurezza, il-proċess tal-analiżi tad-data tat-titjir, u indikaturi tal-prestazzjoni tas-sikurezza. B'mod partikulari, ikkomunikat dettalji speċifiċi fir-rigward tal-prestazzjoni tas-sikurezza u tal-assigurazzjoni tas-sikurezza tagħha.

(73)

Il-Kummissjoni beħsiebha twettaq żjara ta' valutazzjoni tal-Unjoni fuq il-post fil-Moldova, bl-għajnuna tal-EASA u bl-appoġġ tal-Istati Membri, biex tivverifika jekk iċ-ċertifikazzjoni u s-sorveljanza tal-kumpaniji tal-ajru min-naħa tal-CAAM humiex qed isiru b'konformità mal-istandards internazzjonali tas-sikurezza rilevanti. Din iż-żjara ta' valutazzjoni fuq il-post se tiffoka fuq il-CAAM, u fuq għażla ta' kumpaniji tal-ajru tal-Moldova.

(74)

Għalkemm huwa ċar li n-nuqqasijiet varji identifikati se jkollhom jissolvew, s'issa mhumiex ta' natura li titlob l-inklużjoni ta' kumpaniji tal-ajru mill-Moldova fl-Anness A tar-Regolament (KE) Nru 474/2006.

(75)

Għaldaqstant, skont l-informazzjoni disponibbli bħalissa, u skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f'dan l-istadju ma hemm ebda raġuni biex tiġi emendata l-lista tal-kumpaniji tal-ajru li huma soġġetti għall-projbizzjoni fuq l-operat fl-Unjoni biex jiġu inklużi kumpaniji tal-ajru mill-Moldova.

(76)

Jenħtieġ li l-Istati Membri jkomplu jivverifikaw il-konformità effettiva tal-Moldova mal-istandards internazzjonali tas-sikurezza rilevanti, permezz tal-prijoritizzazzjoni tal-ispezzjonijiet fir-rampa li għandhom isiru fuq il-kumpaniji tal-ajru ċċertifikati fil-Moldova, skont ir-Regolament (UE) Nru 965/2012.

(77)

Jekk ikun hemm informazzjoni rilevanti dwar is-sikurezza li turi li hemm riskji imminenti ta' sikurezza minħabba nuqqas ta' konformità mal-istandards internazzjonali tas-sikurezza, il-Kummissjoni jaf tkun obbligata tieħu azzjoni ulterjuri, skont ir-Regolament (KE) Nru 2111/2005.

(78)

B'ittra tas-26 ta' Awwissu 2018, l-Awtorità tal-Avjazzjoni Ċivili tan-Nepal (“CAAN”) infurmat lill-Kummissjoni dwar il-progress imwettaq mill-CAAN fl-implimentazzjoni tal-istandards internazzjonali tas-sikurezza. Skont l-informazzjoni pprovduta, il-CAAN għamlet progress limitat fir-rigward tal-implimentazzjoni ta' standards internazzjonali tas-sikurezza. Madankollu, l-informazzjoni pprovduta mhijiex biżżejjed biex tinġibed konklużjoni dwar is-sitwazzjoni reali tas-sikurezza fin-Nepal.

(79)

L-evidenza disponibbli tindika li, mill-bidu tal-2018, fin-Nepal seħħew tal-anqas erba' aċċidenti tal-avjazzjoni ċivili. L-iktar aċċident riċenti sar fl-1 ta' Settembru 2018 fl-Ajruport Internazzjonali ta' Tribhuvan, Kathmandu, in-Nepal, fejn kien involut inġenju tal-ajru ta' Yeti Airlines. Il-Kummissjoni tistieden lill-CAAN issegwi r-rakkomandazzjonijiet mir-rapporti uffiċjali tal-investigazzjonijiet tal-aċċidenti, u li twettaq analiżi tal-kawżi ewlenin u taħdem biex tindirizzahom.

(80)

Fir-rigward tal-talba mill-CAAN għal missjoni ta' valutazzjoni fuq il-post mill-Unjoni, il-Kummissjoni u l-Kumitat għas-Sikurezza tal-Ajru jqisu li tali missjoni tkun prematura, għax il-proporzjon tal-aċċidenti fin-Nepal għadu għoli b'mod inaċċettabbli. B'hekk, jenħtieġ l-ewwel nett li n-Nepal jimmira li jnaqqas l-għadd ta' aċċidenti, u li jipprovdi evidenza sodisfaċenti f'dan ir-rigward tul perjodu minimu ta' sentejn (2).

(81)

Għaldaqstant, skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f'dan l-istadju, fir-rigward tal-kumpaniji tal-ajru min-Nepal, ma hemm ebda raġuni biex tiġi emendata l-lista tal-kumpaniji tal-ajru li huma soġġetti għal projbizzjoni fuq l-operat fi ħdan l-Unjoni.

(82)

Matul dan l-aħħar perjodu, il-Kummissjoni, l-EASA u l-awtoritajiet kompetenti tal-Istati Membri komplew jimmonitorjaw mill-qrib il-prestazzjoni tas-sikurezza tal-kumpaniji tal-ajru li huma ċċertifikati fir-Russja u li joperaw fl-Unjoni, inkluż permezz tal-prijoritizzazzjoni tal-ispezzjonijiet fir-rampa mwettqa fuq ċerti kumpaniji tal-ajru Russi skont ir-Regolament (UE) Nru 965/2012.

(83)

Fil-5 ta' Ottubru 2018, rappreżentanti tal-Kummissjoni, tal-EASA u ta' Stat Membru ltaqgħu ma' rappreżentanti tal-Aġenzija Federali Russa tat-Trasport bl-Ajru (“FATA”), sabiex jeżaminaw il-prestazzjoni tas-sikurezza tal-kumpaniji tal-ajru ċċertifikati fir-Russja abbażi tar-rapporti tal-ispezzjonijiet fir-rampa (imwettqa bejn id-19 ta' Settembru 2017 u t-18 ta' Settembru 2018), u sabiex jidentifikaw il-każijiet fejn jenħtieġ jissaħħu l-attivitajiet ta' sorveljanza tal-FATA.

(84)

Matul dik il-laqgħa, il-Kummissjoni rrevediet b'aktar dettall ir-riżultati tal-ispezzjonijiet fir-rampa tas-SAFA fuq erba' kumpaniji tal-ajru ċċertifikati fir-Russja. Filwaqt ma ġie identifikat ebda tħassib ta' sikurezza, il-FATA infurmat lill-Kummissjoni li, minħabba l-għadd limitat ta' spezzjonijiet li twettqu fuq ċerti kumpaniji tal-ajru, matul it-tliet xhur li ġejjin se jsiru spezzjonijiet addizzjonali fuq żewġ kumpaniji tal-ajru minnhom.

(85)

Abbażi tal-informazzjoni disponibbli bħalissa, inkluż informazzjoni pprovduta mill-FATA fil-laqgħa tal-5 ta' Ottubru 2018, il-Kummissjoni tqis li f'dan l-istadju, il-FATA għandha l-kapaċità u r-rieda meħtieġa biex tindirizza n-nuqqasijiet ta' sikurezza. Għal dawn ir-raġunijiet, il-Kummissjoni kkonkludiet li ma kienx hemm bżonn issir seduta tal-awtoritajiet tal-avjazzjoni Russi u ta' xi kumpaniji tal-ajru ċċertifikati fir-Russja quddiem il-Kumitat għas-Sikurezza tal-Ajru.

(86)

Għaldaqstant, skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f'dan l-istadju ma hemm ebda raġuni biex tiġi emendata l-lista tal-kumpaniji tal-ajru li huma soġġetti għall-projbizzjoni fuq l-operat fl-Unjoni biex jiġu inklużi kumpaniji tal-ajru mir-Russja.

(87)

Jenħtieġ li l-Istati Membri jkomplu jivverifikaw il-konformità effettiva tal-kumpaniji tal-ajru mir-Russja mal-istandards internazzjonali tas-sikurezza rilevanti, permezz tal-prijoritizzazzjoni tal-ispezzjonijiet fir-rampa skont ir-Regolament (UE) Nru 965/2012.

(88)

Jekk dawk l-ispezzjonijiet juru riskju imminenti għas-sikurezza minħabba nuqqas ta' konformità mal-istandards internazzjonali tas-sikurezza, il-Kummissjoni tista' tkun obbligata timponi projbizzjoni fuq l-operat ta' ċerti kumpaniji tal-ajru mir-Russja, u tinkludihom fl-Anness A jew fl-Anness B skont ir-Regolament (KE) Nru 474/2006.

(89)

B'ittra tas-17 ta' Settembru 2018, il-Kummissjoni talbet lill-Awtorità tal-Avjazzjoni Ċivili tat-Tajlandja (“CAAT”) biex tipprovdilha rapport ta' progress dwar l-attivitajiet ta' ċertifikazzjoni u sorveljanza min-naħa tal-CAAT.

(90)

Fl-24 ta' Ottubru 2018, il-CAAT ipprovdiet rapport ta' progress dwar il-qagħda tal-avjazzjoni ċivili fit-Tajlandja, dwar l-organizzazzjoni tal-CAAT, is-sistema ta' sorveljanza tagħha, u l-miżuri ta' infurzar li ħadet.

(91)

Dak ir-rapport ta' progress ipprovda informazzjoni ddettaljata dwar l-implimentazzjoni ta' pjan ta' sostenibbiltà tal-CAAT, li kien jinkludi rieżami organizzattiv, l-identifikazzjoni ta' titjib immirat, reviżjonijiet ippjanati ta' leġiżlazzjoni u ta' regolamenti, u ħtiġijiet ta' sostenibbiltà ekonomika u baġitarji.

(92)

Il-CAAT għadha għaddejja bil-proċess ta' ċertifikazzjoni mill-ġdid tad-detenturi ta' AOC. Minn Settembru 2018, ġew iċċertifikati mill-ġdid 22 kumpanija tal-ajru, filwaqt li żewġ kumpaniji tal-ajru jinsabu fil-fażi ta' dimostrazzjoni u spezzjoni, u żewġ kumpaniji tal-ajru jinsabu fil-fażi tal-valutazzjoni tad-dokumenti. Il-kumpaniji tal-ajru kollha awtorizzati biex iwettqu operazzjonijiet internazzjonali ġew iċċertifikati mill-ġdid.

(93)

Għaldaqstant, skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f'dan l-istadju, fir-rigward tal-kumpaniji tal-ajru mit-Tajlandja, ma hemm ebda raġuni biex tiġi emendata l-lista tal-kumpaniji tal-ajru li huma soġġetti għal projbizzjoni fuq l-operat fi ħdan l-Unjoni.

(94)

Jenħtieġ li l-Istati Membri jkomplu jivverifikaw il-konformità effettiva tat-Tajlandja mal-istandards internazzjonali tas-sikurezza rilevanti, permezz tal-prijoritizzazzjoni tal-ispezzjonijiet fir-rampa li għandhom isiru fuq il-kumpaniji tal-ajru ċċertifikati fit-Tajlandja, skont ir-Regolament (UE) Nru 965/2012.

(95)

Jekk ikun hemm informazzjoni rilevanti dwar is-sikurezza li turi li hemm riskji imminenti ta' sikurezza minħabba nuqqas ta' konformità mal-istandards internazzjonali tas-sikurezza, il-Kummissjoni jaf tkun obbligata tieħu azzjoni ulterjuri, skont ir-Regolament (KE) Nru 2111/2005.

(96)

Fis-6 ta' Marzu 2017, il-kumpanija tal-ajru Avior Airlines, iċċertifikata fil-Venezwela, applikat għall-awtorizzazzjoni tat-TCO mill-EASA. L-EASA vvalutat dik l-applikazzjoni, u fl-4 ta' Ottubru 2017 irrifjutat il-ħruġ ta' awtorizzazzjoni tat-TCO għal raġunijiet ta' sikurezza, billi Avior Airlines ma ssodisfatx ir-rekwiżiti applikabbli tar-Regolament (UE) Nru 452/2014.

(97)

Fl-14 ta' Novembru 2017, l-Instituto Nacional de Aeronáutica Civil (“INAC”) u Avior Airlines kellhom seduta quddiem il-Kummissjoni u l-Kumitat għas-Sikurezza tal-Ajru, skont ir-Regolament (KE) Nru 2111/2005. Wara dik is-seduta, f'Novembru 2017 il-Kummissjoni emendat il-lista tal-kumpaniji tal-ajru li huma soġġetti għal projbizzjoni fuq l-operat fl-Unjoni, u l-kumpanija tal-ajru Avior Airlines ġiet inkluża fl-Anness A tar-Regolament (KE) Nru 474/2006 (10).

(98)

Il-Kummissjoni baqgħet għaddejja bil-konsultazzjonijiet mal-INAC skont l-Artikolu 3(2) tar-Regolament (KE) Nru 473/2006. Fid-29 ta' Awwissu 2018, il-Kummissjoni, l-EASA u l-INAC kellhom laqgħa teknika, li matulha l-Kummissjoni spjegat it-tħassib tagħha rigward il-kapaċità tal-INAC biex taqdi l-obbligi internazzjonali tagħha b'rabta mas-sorveljanza tas-sikurezza tal-kumpaniji tal-ajru tagħha.

(99)

Matul dik il-laqgħa teknika, l-INAC ipprovdiet ħarsa ġenerali lejn il-proċedura ta' sorveljanza tal-avjazzjoni tagħha, kif ukoll lejn il-programm statali ta' sikurezza tagħha, b'xi eżempji tal-miżuri tal-infurzar li ħadet, flimkien ma' informazzjoni marbuta mal-avjazzjoni fil-Venezwela. B'segwitu għal dik il-laqgħa, l-INAC ipprovdiet aktar dokumentazzjoni teknika. Spjegat ukoll li, wara l-laqgħa tal-Kumitat għas-Sikurezza tal-Ajru ta' Novembru 2017, l-INAC ikkuntattjat lill-kumpaniji tal-ajru li fir-rigward tagħhom kien hemm sejbiet pendenti mill-ispezzjonijiet fir-rampa tas-SAFA, u talbithom iwieġbu għal dawk is-sejbiet. Skont informazzjoni pprovduta mill-Istati Membri li wettqu l-ispezzjonijiet, ċerti kumpaniji tal-ajru tal-Venezwela effettivament bdew iwieġbu għas-sejbiet, iżda kultant b'mod inkonsistenti. Pereżempju, ġew proposti azzjonijiet korrettivi differenti għal sejbiet identiċi jew simili, u għadd ta' azzjonijiet korrettivi kienu jidhru li jindirizzaw biss parzjalment is-sejbiet imsemmija.

(100)

L-EASA, l-Istati Membri u l-Kummissjoni analizzaw id-dokumentazzjoni pprovduta, il-valutazzjonijiet tat-TCO li saru mill-EASA, kif ukoll is-sejbiet tas-SAFA u t-tweġibiet għalihom. F'dan ir-rigward, minkejja li ġew implimentati ċerti elementi ta' sistema ta' sorveljanza u dawn kienu jidhru xierqa f'termini ta' struttura, tal-għadd ta' persunal ta' sorveljanza, tal-proċeduri ddokumentati u tal-ippjanar ta' spezzjonijiet, l-analiżi tal-informazzjoni disponibbli wriet għadd ta' inkonsistenzi possibbli. Fil-fatt, ċerti rapporti ta' spezzjoni jiddeskrivu sejbiet serji li f'ċirkustanzi normali mhux suppost jidhru jekk il-kumpaniji tal-ajru jkunu tassew soġġetti għal sorveljanza kontinwa u xierqa mill-INAC. Il-miżuri meħudin mill-kumpaniji tal-ajru bi tweġiba għas-sejbiet imsemmija fir-rapport ta' spezzjoni tal-INAC jidher li juru nuqqas ta' analiżi tajba tal-kawżi ewlenin, u nuqqas ta' CAPs xierqa li kapaċi jipprevjenu r-ripetizzjoni ta' nuqqasijiet ta' konformità identiċi jew simili. Din il-problema ma jidhirx li ġiet identifikata u lanqas indirizzata f'ebda azzjoni ta' segwitu għall-ispezzjonijiet proprji tal-INAC.

(101)

Fid-dawl ta' dan, il-Kummissjoni stiednet lill-INAC, skont l-Artikolu 7 tar-Regolament (KE) Nru 2111/2005, għal seduta quddiem il-Kumitat għas-Sikurezza tal-Ajru. Matul is-seduta tal-14 ta' Novembru 2018, l-INAC ipprovdiet lill-Kummissjoni u lill-Kumitat għas-Sikurezza tal-Ajru b'ħarsa ġenerali lejn il-qafas legali tal-avjazzjoni Venezwelana, lejn l-istruttura tal-INAC, lejn iċ-ċifri tal-persunal u tal-industrija tal-avjazzjoni, flimkien ma' informazzjoni aktar iddettaljata dwar l-attivitajiet ta' sorveljanza fl-2017 u l-2018, dwar l-ispezzjonijiet imwettqa u ppjanati, dwar il-miżuri ta' infurzar, dwar il-qagħda tal-implimentazzjoni tal-programm statali ta' sikurezza, u dwar l-approċċ tas-sorveljanza bbażati fuq ir-riskji, flimkien ma' informazzjoni teknika rilevanti oħra. L-INAC tenniet l-impenn tagħha li tissodisfa l-obbligi internazzjonali tagħha b'rabta mas-sikurezza tal-avjazzjoni, kif ukoll ir-rieda tagħha li tistabbilixxi qafas ta' kooperazzjoni mal-EASA.

(102)

Matul is-seduta, l-Istati Membri saqsew mistoqsijiet bil-għan li jifhmu jekk is-sistema tas-sorveljanza hijiex fil-fatt implimentata b'mod effettiv fil-Venezwela. Uħud mit-tweġibiet mogħtija mill-INAC ma kellhomx il-livell ta' dettall meħtieġ.

(103)

Il-Kummissjoni tinnota li l-implimentazzjoni effettiva fil-qafas tal-programm USOAP tal-ICAO għall-Venezwela hija 93,51 %. Fl-2009 sar awditu USOAP-CMA tal-ICAO, u l-aħħar missjoni ta' validazzjoni koordinata tal-ICAO saret fl-2013.

(104)

Il-Kummissjoni tinnota wkoll li tmien kumpaniji tal-ajru mill-Venezwela applikaw formalment għal awtorizzazzjonijiet tat-TCO mill-EASA. Sal-lum, ebda kumpanija tal-ajru Venezwelana ma rċeviet awtorizzazzjoni ta' TCO. L-EASA rrifjutat l-applikazzjoni mingħand Avior Airlines għal raġunijiet ta' sikurezza, filwaqt li s-seba' applikazzjonijiet l-oħra ġew irrifjutati mill-EASA għal raġunijiet amministrattivi jew ġew irtirati mill-kumpaniji tal-ajru.

(105)

Il-Kummissjoni tagħraf il-fatt li l-Venezwela hija impenjata li tikkoopera mal-Kummissjoni, u li tipprovdi aġġornamenti kontinwi dwar il-qagħda tal-obbligi ta' sorveljanza tagħha. Il-Kummissjoni tinnota wkoll li l-INAC hija lesta tiltaqa' mal-Kummissjoni, mal-EASA u mal-Istati Membri kull meta jkun meħtieġ.

(106)

Għalkemm huwa ċar li n-nuqqasijiet varji identifikati se jkollhom jissolvew, s'issa mhumiex ta' natura li titlob l-inklużjoni ta' kumpaniji tal-ajru mill-Venezwela fl-Anness A jew fl-Anness B tar-Regolament (KE) Nru 474/2006.

(107)

Għaldaqstant, skont l-informazzjoni disponibbli bħalissa, u skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f'dan l-istadju ma hemm ebda raġuni biex tiġi emendata l-lista tal-kumpaniji tal-ajru li huma soġġetti għall-projbizzjoni fuq l-operat fl-Unjoni biex jiġu inklużi kumpaniji tal-ajru mill-Venezwela.

(108)

Jenħtieġ li l-Istati Membri jkomplu jivverifikaw il-konformità effettiva tal-Venezwela mal-istandards internazzjonali tas-sikurezza rilevanti permezz tal-prijoritizzazzjoni tal-ispezzjonijiet fir-rampa li għandhom isiru fuq il-kumpaniji tal-ajru ċċertifikati fil-Venezwela, skont ir-Regolament (UE) Nru 965/2012.

(109)

Jekk ikun hemm informazzjoni rilevanti dwar is-sikurezza li tindika li hemm riskji imminenti ta' sikurezza minħabba nuqqas ta' konformità mal-istandards internazzjonali tas-sikurezza, il-Kummissjoni jaf tkun obbligata tieħu azzjoni ulterjuri, skont ir-Regolament (KE) Nru 2111/2005.

(110)

F'Ġunju 2016, il-Kummissjoni ddeċidiet li tneħħi l-kumpaniji tal-ajru kollha taħt l-awtorità taż-Żambja mill-Anness A tar-Regolament (KE) Nru 474/2006 (11).

(111)

B'ittra tat-3 ta' Mejju 2018, il-Kummissjoni talbet lill-Awtorità tal-Avjazzjoni Ċivili taż-Żambja (“ZCAA”) biex tipprovdi dokumentazzjoni marbuta mal-istruttura tal-awtorità, mas-sistema u l-attivitajiet ta' sorveljanza tagħha, inkluż il-lista tad-detenturi ta' AOC u tal-inġenji tal-ajru rreġistrati, kif ukoll il-miżuri ta' infurzar.

(112)

Fl-1 ta' Ġunju 2018, iż-ZCAA pprovdiet l-informazzjoni mitluba, inkluż informazzjoni dwar l-istruttura organizzattiva u l-persunal, dwar id-detenturi ta' AOC flimkien mal-ispeċifikazzjonijiet operattivi, l-inġenji tal-ajru rreġistrati fiż-Żambja, kif ukoll ir-riżultati tal-attivitajiet ta' sorveljanza tas-sikurezza, l-azzjonijiet ta' infurzar, u l-lista ta' inċidenti u aċċidenti mill-2016 sal-lum. Barra minn hekk, iż-ZCAA pprovdiet informazzjoni dwar il-progress miksub wara r-rakkomandazzjonijiet maħruġin fir-rapport finali tal-missjoni ta' validazzjoni koordinata tal-ICAO li saret f'Marzu 2016.

(113)

Il-Kummissjoni tħeġġeġ liż-ZCAA tirrapporta b'mod regolari dwar it-titjib kontinwu fl-implimentazzjoni tal-istandards internazzjonali tas-sikurezza.

(114)

Għaldaqstant, skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f'dan l-istadju, fir-rigward tal-kumpaniji tal-ajru miż-Żambja, ma hemm ebda raġuni biex tiġi emendata l-lista tal-kumpaniji tal-ajru li huma soġġetti għal projbizzjoni fuq l-operat fi ħdan l-Unjoni.

(115)

Il-miżuri previsti f'dan ir-Regolament huma konformi mal-opinjoni tal-Kumitat għas-Sikurezza tal-Ajru.

(116)

Għaldaqstant, jenħtieġ li r-Regolament (KE) Nru 474/2006 jiġi emendat skont dan,