(1)

Permezz tar-Regolament ta' Implimentazzjoni (UE) Nru 1238/2013, il-Kunsill impona dazju anti-dumping definittiv fuq l-importazzjonijiet ta' moduli u ta' ċelloli fl-Unjoni li joriġinaw jew li jintbagħtu mir-Repubblika Popolari taċ-Ċina (ir-“RPĊ”) (“il-prodott ikkonċernat”). Permezz tar-Regolament ta' Implimentazzjoni (UE) Nru 1239/2013, il-Kunsill impona wkoll dazju kumpensatorju definittiv fuq l-importazzjonijiet tal-prodott ikkonċernat fl-Unjoni.

(2)

Il-Kamra tal-Kummerċ taċ-Ċina għall-Importazzjoni u l-Esportazzjoni ta' Makkinarju u Prodotti Elettroniċi (is-“CCCME”) ssottomettiet, f'isem grupp ta' produtturi esportaturi, impenn fuq il-prezz lill-Kummissjoni. Permezz tad-Deċiżjoni 2013/423/UE (9), il-Kummissjoni aċċettat dan l-impenn fuq il-prezz fir-rigward tad-dazju anti-dumping proviżorju. Wara n-notifika ta' verżjoni emendata tal-impenn fuq il-prezz minn grupp ta' produtturi esportaturi flimkien mas-CCCME, il-Kummissjoni kkonfermat permezz tad-Deċiżjoni ta' Implimentazzjoni 2013/707/UE (10) li aċċettat l-impenn tal-prezz kif emendat għall-perjodu ta' applikazzjoni tal-miżuri anti-dumping u kumpensatorji definittivi (“l-impenn”). Ġie aċċettat l-impenn tal-produtturi esportaturi li ġejjin, fost l-oħrajn:

(3)

Il-Kummissjoni adottat ukoll Deċiżjoni li tiċċara l-implimentazzjoni tal-impenn (11) u 15-il regolament li jirtiraw l-aċċettazzjoni tal-impenn għal bosta produtturi esportaturi (12).

(4)

Bir-Regolamenti ta' Implimentazzjoni (UE) 2016/185 (13) u 2016/184 (14), il-Kummissjoni estendiet id-dazji anti-dumping u kumpensatorji definittivi fuq l-importazzjonijiet ta' moduli fotovoltajċi tas-siliċju kristallin u komponenti ewlenin (jiġifieri ċelloli) li joriġinaw fir-RPĊ jew li huma kkunsinjati minnha għall-importazzjoni ta' moduli fotovoltajċi tas-siliċju kristallin u komponenti ewlenin (jiġifieri ċelloli) kkunsinjati mill-Malasja u t-Tajwan bl-eċċezzjoni ta' numru ta' produtturi ġenwini.

(5)

Bir-Regolament tal-anti-dumping tar-rieżami tal-iskadenza, il-Kummissjoni estendiet id-dazju anti-dumping definittiv fuq l-importazzjonijiet ta' moduli fotovoltajċi tas-siliċju kristallin u komponenti ewlenin (jiġifieri ċelloli) li joriġinaw fi jew li huma kkonsinjati mir-RPĊ wara rieżami ta' skadenza u li jtemm l-investigazzjoni dwar ir-rieżami interim parzjali skont, rispettivament, l-Artikolu 11(2) u l-Artikolu 11(3) tar-Regolament bażiku dwar l-anti-dumping.

(6)

Permezz tar-Regolament antisussidji tar-rieżami tal-iskadenza, il-Kummissjoni estendiet dazju kompensatorju definittiv fuq l-importazzjonijiet ta' moduli fotovoltajċi tas-siliċju kristallin u komponenti ewlenin (jiġifieri ċelloli) li joriġinaw minn jew li huma kkonsinjati mir-RPĊ wara rieżami ta' skadenza u li jtemm l-investigazzjoni dwar ir-rieżami interim parzjali skont, rispettivament, l-Artikolu 18(2) u l-Artikolu 19(3) tar-Regolament antisussidji bażiku (ir-Regolament anti-dumping tar-rieżami tal-iskadenza u r-Regolament antisussidji tar-rieżami tal-iskadenza huma minn hawn 'il quddiem imsejħa kollettivament bħala “ir-Regolamenti tar-rieżami tal-iskadenza”).

(7)

B'riżultat tar-Regolament tar-revoka il-Kummissjoni ħassret l-impenn.

(8)

Permezz tal-avviżi ta' skadenza, il-Kummissjoni avżat li d-dazju anti-dumping u d-dazju antisussidji fuq l-importazzjonijiet ta' moduli fotovoltajċi tas-siliċju kristallin u komponenti u komponenti ewlenin (jiġifieri ċelloli) li joriġinaw jew li huma kkunsinnati mir-RPĊ skadew fit-3 ta' Settembru 2018.

(9)

Skont it-termini tal-impenn, il-produtturi esportaturi qablu, fost l-oħrajn, li ma jbigħux il-prodott ikkonċernat lill-ewwel klijent indipendenti fl-Unjoni taħt ċertu prezz minimu ta' importazzjoni (“PMI”). Il-PMI kien suġġett għal mekkaniżmu ta' aġġustament trimestrali b'referenza għall-prezzijiet spot internazzjonali tal-moduli inklużi l-prezzijiet Ċiniżi kif irrapportati mill-bażi ta' data ta' Bloomberg.

(10)

Il-produtturi esportaturi qablu wkoll li jbigħu l-prodott ikkonċernat biss permezz ta' bejgħ dirett. Għall-fini tal-impenn, bejgħ dirett kien iddefinit bħala bejgħ jew lill-ewwel klijent indipendenti fl-Unjoni jew permezz ta' parti relatata fl-Unjoni elenkata fl-impenn. Bejgħ indirett lejn l-Unjoni minn kumpaniji oħra għajr dawk elenkati f'dan l-impenn kien jikkostitwixxi ksur tal-impenn.

(11)

L-impenn ikkjarifika wkoll, f'lista mhux eżawrjenti, dak li kien jikkostitwixxi ksur tal-impenn. Dik il-lista kienet tinkludi, b'mod partikolari, il-ħruġ ta' fatturi ta' impenji għal pannelli solari prodotti minn kumpanija li mhux fl-impenn sabiex tibbenefika mill-eżenzjoni mid-dazji anti-dumping u kumpensatorji (iktar 'il quddiem ir-“riorjentament lejn kumpaniji oħrajn” ).

(12)

L-impenn obbliga wkoll lill-produtturi esportaturi sabiex jipprovdu lill-Kummissjoni b'informazzjoni dettaljata dwar il-bejgħ kollu tal-esportazzjoni tagħhom lejn l-Unjoni, u l-bejgħ mill-ġdid fl-Unjoni, fuq bażi trimestrali (“ir-rapporti trimestrali”). Dan fisser li d-data ppreżentata f'dawn ir-rapporti trimestrali trid tkun kompluta u korretta u li t-tranżazzjonijiet irrappurtati kienu totalment konformi mat-termini tal-impenn. Ir-rappurtar ta' bejgħ mill-ġdid fl-Unjoni kien obbligu partikolari meta l-prodott ikkonċernat inbiegħ lill-ewwel klijent indipendenti permezz ta' importatur relatat. Huma biss dawn ir-rapporti li ppermettew lill-Kummissjoni tissorvelja jekk il-prezz tal-bejgħ mill-ġdid tal-importatur relatat lill-ewwel klijent indipendenti kienx skont il-PMI.

(13)

Il-produtturi esportaturi kienu responsabbli għall-ksur ta' kwalunkwe parti relatata tagħhom, kinitx elenkata fl-impenn kif ukoll jekk le.

(14)

Il-produtturi esportaturi impenjaw ruħhom ukoll li jikkonsultaw mal-Kummissjoni rigward kull diffikultà jew kwistjoni, teknika jew ta' xort'oħra, li tista' tinqala' matul l-implimentazzjoni tal-impenn.

(15)

L-impenn kien inizjalment aċċettat minn aktar minn 120 kumpanija/grupp ta' kumpaniji. Sadanittant, il-Kummissjoni rtirat l-aċċettazzjoni tagħha tal-impenn għal 19-il kumpanija. Sbatax minnhom instabu li kisru l-impenn filwaqt li ż-żewġ kumpaniji l-oħra kellhom mudelli ta' negozju li għamluha imprattikabbli li tiġi ssorveljata l-konformità tagħhom mal-impenn. Barra minn hekk, 16-il kumpanija Ċiniża oħra rtiraw volontarjament mill-impenn.

(16)

B'riżultat tar-Regolament ta' revoka, il-Kummissjoni ħassret l-impenn u introduċiet dazju varjabbli fil-forma ta' prezz minimu ta' importazzjoni (“il-PMI ta' dazju varjabbli”) li ħa post l-impenn. Il-PMI b'dazju varjabbli jfisser li l-importazzjonijiet eliġibbli b'valur iddikjarat bħall-PMI jew ogħla minnu ma jkunux soġġetti għad-dazji u l-awtoritajiet doganali jimponu d-dazji immedjatament jekk il-prodott jiġi impurtat bi prezz inqas mill-PMI.

(17)

Minħabba li l-PMI ta' dazju varjabbli ħa post l-impenn, il-Kummissjoni qieset xieraq, skont il-konstatazzjonijiet elenkati fil-premessi minn (50) sa (53) tar-Regolament ta' revoka, li l-PMI ta' dazju varjabbli jkun japplika biss għal dawk il-kumpaniji li ma kisrux l-impenn fil-passat, irrispettivament minn jekk tali ksur diġà kienx ġie ikkonstatat, jew jekk tali ksur jista' jkun ikkonstatat f'investigazzjonijiet futuri mill-Kummissjoni. Għaldaqstant, għall-produtturi esportaturi kollha li kisru l-impenn waqt li kien għadu fis-seħħ id-dazji ad valorem bla limitu għandhom japplikaw.

(18)

Fi żmien id-dħul fis-seħħ tar-Regolament ta' revoka fl-1 ta' Ottubru 2017, il-Kummissjoni kompliet twettaq investigazzjonijiet dwar il-konformità mal-impenn, u qieset li huwa xieraq li jinfetħu investigazzjonijiet ġodda għal oġġetti li ġew rilaxxati għaċ-ċirkolazzjoni libera filwaqt li l-impenn kien għadu fis-seħħ. Għal dawk l-investigazzjonijiet, dejn doganali jinħoloq hekk kif id-dikjarazzjoni tkun aċċettata għal rilaxx għaċ-ċirkolazzjoni libera: (a) kull meta jiġi stabbilit, fir-rigward tal-importazzjonijiet fatturati mill-kumpaniji soġġetti għall-impenn, li waħda jew aktar mill-kundizzjonijiet tal-impenn ma tkunx ġiet issodisfata; jew (b) meta l-Kummissjoni tikkonstata li l-impenn ikun inkiser f'regolament jew deċiżjoni li jirreferu għal tranżazzjonijiet partikolari u tiddikjara bħala invalidi l-fatturi rilevanti tal-impenn.

(19)

Il-Kummissjoni rċeviet evidenza mill-awtoritajiet doganali ta' żewġ Stati Membri fuq il-bażi tal-Artikoli 8(9) u 14(7) tar-Regolament anti-dumping bażiku u l-Artikoli 13(9) u 24(7) tar-Regolament antisussidji bażiku rigward il-konformità ta' Sinski PV u Koly Energy mal-impenn. Il-Kummissjoni vvalutat ukoll l-informazzjoni disponibbli pubblikament dwar l-istruttura korporattiva ta' Koly Energy.

(20)

Il-konstatazzjonijiet elenkati fil-premessi minn (21) sa (24) iktar 'l isfel jindirizzaw l-allegazzjonijiet irċevuti mill-awtoritajiet doganali rigward Sinski PV u Koly Energy rigward ksur allegat tal-impenn meta kien għadu fis-seħħ.

(21)

L-evidenza riċevuta mingħand l-awtoritajiet doganali tissuġġerixxi li Sinski PV biegħet pannelli solari lil mill-inqas klijent wieħed fl-Unjoni sistematikament taħt il-PMI, u b'hekk kisret id-dispożizzjonijiet tal-impenn kif deskritt fil-premessa (9) hawn fuq.

(22)

Evidenza ulterjuri turi wkoll li Sinski PV impenjat ruħha ma' tliet kumpaniji oħra li toħroġ fatturi tal-impenn għal prodotti solari manifatturati minn kumpaniji li mhumiex parti fl-impenn kif jidher f'ordnijiet ta' bejgħ minn klijent ta' Sinski PV fl-Unjoni. Din il-prattika (riorjentament lejn kumpaniji oħrajn) tikkostitwixxi ksur speċifikament imniżżel fl-impenn, kif deskritt fil-premessa (11) aktar 'il fuq.

(23)

Abbażi tal-evidenza riċevuta mingħand l-awtoritajiet doganali u kkorroborata minn sorsi disponibbli pubblikament, Koly Energy biegħet pannelli solari lil importatur allegatament mhux relatat fl-Unjoni li għalih ħarġet fatturi ta' impenn. It-tranżazzjonijiet lil dan l-importatur ammontaw għal valur ta' aktar minn 50 % tal-bejgħ totali ta' Koly Energy lejn l-Unjoni. Abbażi tal-informazzjoni disponibbli għall-Kummissjoni, l-importatur involut f'dawn it-tranżazzjonijiet kien relatat ma' Koly Energy fis-sens tal-Artikolu 127(1) tar-Regolament ta' Implimentazzjoni tal-Kummissjoni (UE) 2015/2447 (15) (“l-Att ta' Implimentazzjoni tal-Kodiċi Doganali tal-Unjoni”). Koly Energy qatt ma rrappurtat importatur relatat fl-Unjoni. Billi dan l-importatur mhuwiex elenkat bħala parti relatata fl-impenn, Koly Energy kisret it-termini tal-impenn kif deskritt fil-premessa (10) hawn fuq.

(24)

L-importaturi relatati għandhom obbligi ta' rappurtar simili għall-kumpaniji ewlenin Ċiniżi tagħhom biex il-Kummissjoni tkun tista' tivvaluta jekk il-prezz nett tal-bejgħ lill-ewwel klijent mhux relatat fl-Unjoni huwiex fi, jew fuq, il-PMI. L-ebda mill-bejgħ mill-ġdid mill-importatur relatat ma kien rappurtat lill-Kummissjoni. Konsegwentement, Koly Energy kisret ukoll it-termini tal-impenn kif deskritt fil-premessi (12) u (13) iktar 'il fuq.

(25)

It-tranżazzjonijiet tal-bejgħ magħmula minn Sinski PV taħt il-PMI lill-klijent identifikat u/jew li jinvolvu r-riorjentament lejn kumpaniji oħrajn kienu marbutin mal-fatturi ta' impenn li ġejjin:

(26)

It-tranżazzjonijiet ta' bejgħ indirett magħmula minn Koly Energy kienu marbutin mal-fatturi ta' impenn li ġejjin:

(27)

Il-partijiet interessati ġew infurmati dwar il-konstatazzjonijiet, b'mod partikolari dwar l-intenzjoni li l-fatturi ta' impenn jiġu invalidati. Il-partijiet interessati ngħataw l-opportunità li jinstemgħu u li jippreżentaw kummenti skont l-Artikolu 8(9) tar-Regolament anti-dumping bażiku u l-Artikolu 13(9) tar-Regolament antisussidji bażiku.

(28)

Importatur wieħed u produttur esportatur Ċiniż wieħed għamlu sottomissjonijiet bil-miktub.

(29)

Il-Kummissjoni kkunsidrat il-kummenti ppreżentati mill-partijiet interessati u indirizzathom hawn taħt.

(30)

Koly Energy u l-allegat importatur tagħha fl-Unjoni kkontestaw ir-relazzjoni ta' affiljazzjoni bejniethom u ċaħdu li huma parti minn grupp azzjonarju komuni.

(31)

Koly Energy qalet li hija kienet 100 % fis-sjieda ta' żewġ persuni Ċiniżi li la kellhom interess la fl-importatur fl-Unjoni u lanqas f'xi grupp azzjonarju. Qalet ukoll li żammet relazzjoni kummerċjali mill-qrib mal-grupp azzjonarju minħabba li kien l-akbar klijent ta' Koly Energy. Madankollu, ċaħdet l-eżistenza ta' xi rabtiet bejnha u l-importatur u ċaħdet li kienet ikkontrollata mill-istess parti azzjonarja.

(32)

Il-Kummissjoni qieset li, fin-nuqqas ta' prova kuntrarja, ir-rappreżentazzjoni ta' Koly Energy bħala bejjiegħ f'kuntratt ta' xiri u forniment ta' moduli solari minn maniġer tal-operazzjonijiet kummerċjali tal-grupp azzjonarju li għalih jappartjeni l-importatur tikkostitwixxi rikonoxximent, għal partijiet terzi, ta' relazzjoni ta' ffiljazzjoni bejn Koly Energy, l-importatur u dak il-grupp azzjonarju fis-sens tal-Artikolu 127(1) tar-Regolament ta' Implimentazzjoni (UE) 2015/2447 (“l-Att ta' Implimentazzjoni tal-Kodiċi Doganali tal-Unjoni”). Din il-konklużjoni kompliet tissaħħaħ minħabba li l-istess kuntratt wera l-firem ta' Koly Energy u tal-importatur f'isem il-bejjiegħ (Koly Energy). L-identifikazzjoni ta' indirizz tal-posta elettronika tal-grupp azzjonarju bħala dettallji tal-kuntatt ta' Koly Energy (il-bejjiegħ) għall-finijiet ta' komunikazzjoni rigward dak il-kuntratt komplew jikkonfermaw din il-fehma. Barra minn hekk, il-kuntratt inkluda klawżola li fiha l-isem u l-indirizz postali tal-importatur ġew imsemmija bħala l-persuna ta' kuntatt tal-bejjiegħ (Koly Energy). Minkejja li Koly Energy allegat li l-kuntratt kien iffirmat mingħajr l-awtorizzazzjoni tagħha u għalhekk kienet iżżomm il-jedd li żżomm lill-importatur responsabbli, ma ġiet ippreżentata l-ebda prova ta' dan lill-Kummissjoni. Kontroreferenzi oħrajn bejn Koly Energy, l-importatur u l-grupp azzjonarju f'dokumenti pubbliċi u sorsi oħrajn bħal siti web u kuntratti ta ħruġ ta' bonds ta' terminu qasir wasslu lil-Kummissjoni għall-konklużjoni li Koly Energy u l-importatur fl-Unjoni kienu partijiet relatati. Is-sottomissjoni għalhekk ġiet rifjutata.

(33)

Koly Energy allegat ukoll l-importatur fl-Unjoni uża l-logo, il-marka kummerċjali u l-isem tad-dominju ta' Koly Name unilateralment u mingħajr kunsens. Il-Kummissjoni qieset li, fin-nuqqas ta' prova kuntrarja, l-użu pubbliku u mifrux tas-sinjali kummerċjali ta' Koly Energy (il-marka kummerċjali, il-logo, l-indirizz tal-posta elettronika) mill-importatur fl-attivitajiet kummerċjali normali tiegħu kien xhieda ta' relazzjoni ta' affiljazzjoni bejn iż-żewġ kumpaniji permezz tal-arma ta' grupp azzjonarju komuni. Din il-konklużjoni kompliet tissaħħaħ bl-użu tal-logo tal-grupp azzjonarju fis-sit web ta' Koly Energy stess, u meta l-logos ta' Koly Energy u tal-grupp azzjonarju ntwerew flimkien f'fiera tal-komoditajiet internazzjonali fl-2016. Din l-allegazzjoni, għalhekk, ma ntlaqgħetx.

(34)

L-importatur ta' Koly Energy fl-Unjoni ppreżenta kummenti mhux sostanzjati barra mill-estensjonijiet mogħtija għall-kummenti, u ma ppreżenta l-ebda evidenza rigward is-sjieda tiegħu.

(35)

Skont l-Artikolu 8(9) tar-Regolament anti-dumping bażiku u l-Artikolu 13(9) tar-Regolament antisussidji bażiku, u skont it-termini tal-impenn, il-Kummissjoni kkonkludiet li Sinski PV, u Koly Energy kisru l-impenn waqt li kien għadu fis-seħħ.

(36)

Għaldaqstant, f'konformità mal-Artikolu 3(2)(b) tar-Regolament ta' Implimentazzjoni (UE) Nru 1238/2013, l-Artikolu 2(2)(b) tar-Regolament ta' Implimentazzjoni (UE) 2017/367, l-Artikolu 2(2)(b) tar-Regolament ta' Implimentazzjoni (UE) Nru 1239/2013 u l-Artikolu 2(2)(b) tar-Regolament ta' Implimentazzjoni (UE) 2017/366 fis-seħħ fil-waqt tal-aċċettazzjoni tad-dikjarazzjoni doganali għar-rilaxx għaċ-ċirkolazzjoni libera, il-fatturi ta' Sinski PV u Koly Energy elenkati fil-premessi (25) u (26) huma ddikjarati invalidi. Id-dejn doganali mġarrab fiż-żmien tal-aċċettazzjoni tad-dikjarazzjoni għar-rilaxx f'ċirkolazzjoni libera għandu jiġi rkuprat mill-awtoritajiet doganali nazzjonali f'konformità mal-Artikolu 105(3) sal-Artikolu 105(6) tar-Regolament (UE) Nru 952/2013 tal-Parlament Ewropew u tal-Kunsill (16) meta jidħol fis-seħħ dan ir-Regolament. L-awtoritajiet doganali nazzjonali responsabbli għall-ġbir tad-dazji se jiġu infurmati kif xieraq.

(37)

Il-Kummissjoni tfakkar ukoll li meta l-awtoritajiet doganali tal-Istati Membri jkollhom indikazzjonijiet li l-prezz ippreżentat f'fattura tal-impenn ma jkunx jikkorrispondi mal-prezz li fil-fatt tħallas, jenħtieġ li huma jinvestigaw jekk kienx hemm ksur tar-rekwiżit li jiġi inkluż kwalunkwe tnaqqis fil-fatturi tal-impenn jew jekk il-PMI ma jkunx ġie rispettat. Jekk l-awtoritajiet doganali tal-Istati Membri jikkonkludu li kien hemm ksur bħal dan jew jekk l-MIP ma ġiex rispettat, jenħtieġ li jiġbru d-dazji bħala konsegwenza ta' dan. Sabiex tiffaċilita l-ħidma tal-awtoritajiet doganali tal-Istati Membri, fuq il-bażi tal-Artikolu 4(3) tat-Trattat, jenħtieġ li l-Kummissjoni taqsam it-test kunfidenzjali u informazzjoni oħra dwar l-impenn għall-iskop uniku ta' proċedimenti nazzjonali,