(1)

L-emittenti tal-flus elettroniċi u l-fornituri tas-servizzi ta' pagament jistgħu jaħtru punti ta' kuntatt ċentrali biex jiżguraw, f'isem istituzzjonijiet tal-ħatra, il-konformità mar-regoli dwar il-ġlieda kontra l-ħasil tal-flus u l-finanzjament tat-terroriżmu u biex jiffaċilitaw is-superviżjoni mill-awtoritajiet kompetenti. L-Istati Membri jistgħu jobbligaw il-ħatra ta' punt ta' kuntatt ċentrali meta l-fornituri tas-servizz ta' pagament u l-emittenti tal-flus elettroniċi jipprovdu servizzi fit-territorju tagħhom permezz ta' stabbilimenti f'forom oħra li mhumiex fergħa, iżda mhux meta jipprovdu servizzi mingħajr stabbiliment fit-territorju tagħhom.

(2)

Il-ħatra ta' punt ta' kuntatt ċentrali biex jiżgura konformità mar-regoli dwar il-ġlieda kontra l-ħasil tal-flus u l-finanzjament tat-terroriżmu tidher ġustifikata meta d-daqs u l-iskala tal-attivitajiet imwettqa minn fornituri ta' servizzi ta' pagament u emittenti tal-flus elettroniċi permezz ta' stabbilimenti f'forom oħra li mhumiex fergħa tkun tissodisfa jew taqbeż ċerti limiti. Jenħtieġ li dawn il-limiti jiġu stabbiliti f'livell li jkun proporzjonat mal-għan tad-Direttiva (UE) 2015/849 biex tiġi ffaċilitata s-superviżjoni minn awtoritajiet kompetenti tal-konformità ta' stabbiliment bħal dawn, f'isem l-istituzzjoni tal-ħatra, mal-obbligi lokali kontra l-ħasil tal-flus u l-finanzjament tat-terroriżmu (AML/CFT), filwaqt li fl-istess ħin ma jinħoloqx piż regolatorju bla bżonn fuq il-fornituri tas-servizzi ta' pagamenti u l-emittenti tal-flus elettroniċi.

(3)

Jidher li r-rekwiżit li jinħatar punt ta' kuntatt ċentrali ikun iġġustifikat ukoll meta Stat Membru jqis li r-riskju tal-ħasil tal-flus u l-finanzjament tat-terroriżmu assoċjat mal-operat ta' stabbilimenti bħal dawn jiżdied, kif muri, pereżempju, fuq il-bażi ta' valutazzjoni tar-riskju tal-ħasil tal-flus u l-finanzjament tat-terroriżmu assoċjat ma' ċerti kategoriji ta' fornituri ta' servizzi ta' pagament jew emittenti tal-flus elettroniċi. Ma jenħtieġx li l-Istati Membri jiġu obbligati jwettqu valutazzjoni tar-riskju ta' istituzzjonijiet individwali għal dak il-għan.

(4)

Madankollu, f'każijiet eċċezzjonali, meta l-Istati Membri jkollhom raġunijiet raġonevoli biex jemmnu li r-riskju tal-ħasil tal-flus u l-finanzjament tat-terroriżmu assoċjat ma' fornitur ta' servizzi ta' pagament jew emittent tal-flus elettroniċi li jopera stabbilimenti fit-territorji tagħhom huwa għoli, jenħtieġ li huma jkunu jistgħu jobbligaw lill-emittent jew il-fornitur tas-servizzi inkwistjoni sabiex jaħtar punt ta' kuntatt ċentrali, anki jekk dan ma jkunx jissodisfa l-limiti stabbiliti f'dan ir-Regolament jew ma jappartjenix għall-kategorija ta' istituzzjonijiet li huma obbligati jaħtru punt ta' kuntatt ċentrali fuq il-bażi tal-valutazzjoni tar-riskju tal-ħasil tal-flus u l-finanzjament tat-terroriżmu tal-Istat Membru.

(5)

Meta jinħatar punt ta' kuntatt ċentrali, jenħtieġ li huwa jiżgura, f'isem l-emittent tal-flus elettroniċi jew il-fornitur tas-servizzi ta' pagament li jaħtar, il-konformità tal-istabbilimenti tiegħu mar-regoli AML/CFT applikabbli. Għal dan il-għan, jenħtieġ li l-punt ta' kuntatt ċentrali jkollu fehim sod tar-rekwiżiti AML/CFT applikabbli u li jiffaċilita l-iżvilupp u l-implimentazzjoni tal-politiki u l-proċeduri AML/CFT.

(6)

Jenħtieġ li l-punt ta' kuntatt ċentrali, fost l-oħrajn, ikollu rwol ċentrali ta' koordinazzjoni bejn l-emittent tal-flus elettroniċi jew il-fornitur tas-servizzi ta' pagament u l-istabbilimenti tal-ħatra tiegħu, u bejn l-emittent tal-flus elettroniċi jew il-fornitur tas-servizzi ta' pagament u l-awtoritajiet kompetenti tal-Istat Membru fejn joperaw l-istabbilimenti, biex tiġi ffaċilitata s-superviżjoni tagħhom.

(7)

L-Istati Membri jenħtieġ li jkunu intitolati jiddeterminaw, fuq il-bażi tal-valutazzjoni kumplessiva tagħhom tar-riskji tal-ħasil tal-flus u l-finanzjament tat-terroriżmu assoċjati mal-attività tal-fornituri tas-servizzi ta' pagament u l-emittenti tal-flus elettroniċi li huma stabbiliti fit-territorju tagħhom f'forom oħra li mhumiex fergħa, li l-punti ta' kuntatt ċentrali huma obbligati jwettqu ċerti funzjonijiet addizzjonali bħala parti mill-obbligu tagħhom li jiżguraw konformità mal-obbligi AML/CFT lokali. B'mod partikolari, jista' jkun xieraq li l-Istati Membri jesiġu lill-punti ta' kuntatt ċentrali li jippreżentaw, f'isem l-emittent tal-flus elettroniċi jew il-fornitur tas-servizzi ta' pagament li jaħtar, rapport dwar tranżazzjonijiet suspettużi tal-Unità tal-Intelligence Finanzjarja (UIF) tal-Istat Membru ospitanti li l-entità obbliga hija stabbilita fit-territorju tiegħu.

(8)

Huwa f'idejn kull Stat Membru li jiddetermina jekk jenħtieġx li l-punti ta' kuntatt ċentrali jieħdu forma partikolari. Meta l-forma tkun preskritta, jenħtieġ li l-Istati Membri jiżguraw li r-rekwiżiti jkunu proporzjonati u ma jmorrux lil hinn minn dak li huwa neċessarju biex jintlaħaq l-għan tal-konformità mar-regoli AML/CFT u tiġi ffaċilitata s-superviżjoni.

(9)

Dan ir-Regolament huwa bbażat fuq l-abbozz tal-istandards tekniċi regolatorji ppreżentati mill-Awtoritajiet Superviżorji Ewropej (l-Awtorità Bankarja Ewropea, l-Awtorità Ewropea tal-Assigurazzjoni u l-Pensjonijiet tax-Xogħol u l-Awtorità Ewropea tat-Titoli u s-Swieq) lill-Kummissjoni.

(10)

L-Awtoritajiet Superviżorji Ewropej wettqu konsultazzjonijiet pubbliċi miftuħin dwar l-abbozz ta' standards tekniċi regolatorji li fuqu huwa bbażat dan ir-Regolament, analizzaw il-kostijiet u l-benefiċċji potenzjali relatati u talbu l-opinjoni tal-Grupp tal-Partijiet Konċernati Bankarji stabbilit skont l-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (2), ir-Regolament (UE) Nru 1094/2010 tal-Parlament Ewropew u tal-Kunsill (3) u r-Regolament (UE) Nru 1095/2010 tal-Parlament Ewropew u tal-Kunsill (4) rispettivament,

(a)

il-kriterji għad-determinazzjoni taċ-ċirkustanzi meta l-ħatra ta' punt ta' kuntatt ċentrali skont l-Artikolu 45(9) tad-direttiva (UE) 2015/849 tkun xierqa;

(b)

regoli li jikkonċernaw il-funzjonijiet tal-punti ta' kuntatt ċentrali.

(1)

“awtorità kompetenti” tfisser l-awtorità ta' Stat Membru kompetenti biex tiżgura l-konformità tal-emittenti tal-flus elettroniċi u l-fornituri tas-servizzi ta' pagamenti li huma stabbiliti fit-territorju tagħhom f'forom oħra li mhumiex fergħa u li l-uffiċċju prinċipali tagħhom jinsab fi Stat Membru ieħor, mar-rekwiżiti tad-Direttiva (UE) 2015/849 kif trasposta mil-leġiżlazzjoni nazzjonali;

(2)

“Stat Membru ospitanti” tfisser l-Istat Membru li fit-territorju tiegħu l-emittenti tal-flus elettroniċi u l-fornituri tas-servizzi ta' pagament li l-uffiċċju ewlieni tagħhom jinstab fi Stat Membru ieħor huma stabbiliti f'forom oħra li mhumiex fergħa;

(3)

“emittenti tal-flus elettroniċi u fornituri tas-servizzi ta' pagament” tfisser l-emittenti tal-flus elettroniċi kif definiti fil-punt (3) tal-Artikolu 2 tad-Direttiva 2009/110/KE tal-Parlament Ewropew u tal-Kunsill (5) u l-fornituri tas-servizzi ta' pagament kif definiti fil-punt (9) tal-Artikolu 4 tad-Direttiva 2007/64/KE tal-Parlament Ewropew u tal-Kunsill (6).

(a)

jiffaċilita l-iżvilupp u l-implimentazzjoni ta' politiki u proċeduri AML/CFT skont l-Artikolu 8(3) u (4) tad-Direttiva (UE) 2015/849 billi jinforma lill-emittent tal-flus elettroniċi jew lill-fornitur tas-servizzi tal pagament li jaħtar dwar ir-rekwiżiti AML/CFT applikabbli fl-Istat Membru ospitanti;

(b)

jissorvelja, f'isem l-emittent tal-flus elettroniċi jew il-fornitur tas-servizzi ta' pagament tal-ħatra, il-konformità effettiva tal-istabbilimenti mar-rekwiżiti AML/CFT applikabbli fl-Istat Membru ospitanti u l-politiki, il-kontrolli u l-proċeduri tal-emittent tal-flus elettroniċi jew tal-fornitur tas-servizzi ta' pagament li jaħtar, adottati skont l-Artikolu 8(3) u (4) tad-Direttiva (UE) 2015/849.

(c)

informa lill-uffiċċju prinċipali tal-emittent tal-flus elettroniċi jew tal-fornitur tas-servizzi ta' pagament li jaħtar dwar kwalunkwe ksur jew kwistjoni ta' konformità misjuba f'dawk l-istabbilimenti, inkluża kull informazzjoni li tista' taffettwa l-abbiltà tal-istabbiliment li jikkonforma b'mod effettiv mal-politiki u l-proċeduri AML/CFT tal-emittent tal-flus elettroniċi jew tal-fornitur tas-servizzi ta' pagament li jaħtar, jew li tista' taffettwa b'mod ieħor il-valutazzjoni tar-riskju tal-emittent tal-flus elettroniċi jew tal-fornitur tas-servizzi ta' pagament;

(d)

Jiżgura, f'isem l-emittent tal-flus elettroniċi jew il-fornitur tas-servizzi ta' pagament li jaħtru, li tittieħed azzjoni korrettiva f'każijiet meta dawk l-istabbilimenti ma jikkonformawx, jew jinsabu f'riskju li ma jikkonformawx, mar-regoli AML/CFT applikabbli.

(e)

jiżgura, f'isem l-emittent tal-flus elettroniċi jew il-fornitur tas-servizzi ta' pagament, li dawk l-istabbilimenti u l-persunal tagħhom jipparteċipaw fi programmi ta' taħriġ imsemmija fl-Artikolu 46(1) tad-Direttiva (UE) 2015/849;

(f)

jirrappreżenta lill-emittent tal-flus elettroniċi jew lill-fornitur tas-servizzi ta' pagament li jaħtru, fil-komunikazzjonijiet tiegħu mal-awtoritajiet kompetenti u l-UIF tal-Istat Membru ospitanti.

(a)

jirrappreżenta lill-emittent tal-flus elettroniċi jew lill-fornitur ta' servizzi ta' pagament li jaħtar fil-komunikazzjonijiet tiegħu mal-awtoritajiet kompetenti;

(b)

jaċċessa informazzjoni miżmuma minn dawk l-istabbilimenti;

(c)

iwieġeb għal kull talba magħmula mill-awtoritajiet kompetenti relatata mal-attività ta' dawk l-istabbilimenti, jipprovdi informazzjoni rilevanti miżmuma mill-emittent tal-flus elettroniċi jew fornitur ta' servizzi ta' pagament u minn dawk l-istabbilimenti li jaħtru lill-awtoritajiet kompetenti u jirrapporta fuq bażi regolari meta jkun xieraq;

(d)

jiffaċilita spezzjonijiet fuq il-post ta' dawk l-istabbilimenti meta jkun meħtieġ mill-awtoritajiet kompetenti.