(1)

It-tkabbir kontinwu tal-avjazzjoni qed ipoġġi aktar pressjoni fuq l-użu tal-ispazju tal-ajru disponibbli, u b'hekk il-ħtieġa li jintuża bl-aktar mod effettiv u effiċjenti possibbli. Il-forniment tal-ġestjoni tat-traffiku tal-ajru jew tas-servizzi tan-navigazzjoni bl-ajru (ATM/ANS) bl-użu tan-navigazzjoni bbażata fuq il-prestazzjoni (PBN) jista' jġib miegħu benefiċċji ta' sikurezza, ta' kapaċità u ta' effiċjenza bis-saħħa tal-ottimizzazzjoni tar-rotot tas-servizz tat-traffiku tal-ajru u tal-proċeduri ta' avviċinament strumentali. Sabiex jinkisbu dawk il-benefiċċji u sabiex titjieb il-prestazzjoni tan-netwerk Ewropew għall-ġestjoni tat-traffiku tal-ajru, jenħtieġ li jiġu previsti rekwiżiti armonizzati dwar l-użu tal-ispazju tal-ajru u proċeduri operattivi dwar il-PBN.

(2)

Dawk ir-rekwiżiti u l-proċeduri li jikkonċernaw il-PBN jenħtieġ li jkunu bbażati fuq ir-regoli żviluppati mill-Organizzazzjoni għall-Avjazzjoni Ċivili Internazzjonali (ICAO) u l-implimentazzjoni tagħhom jenħtieġ li tkun b'konformità mal-Pjan Globali tan-Navigazzjoni tal-Ajru tal-ICAO (2) u l-Pjan Regolatorju Ewropew għall-ATM (3).

(3)

L-Anness tar-Regolament ta' Implimentazzjoni tal-Kummissjoni (UE) Nru 923/2012 (4) u b'mod partikolari mal-punt SERA.5015(a) tiegħu, l-Anness III tar-Regolament tal-Kummissjoni (UE) Nru 965/2012 (5) u b'mod partikolari il-punt ORO.GEN.110 (d) tiegħu, l-Artikolu 9(1) tar-Regolament (KE) Nru 216/2008 kif implimentat bl-Anness I tar-Regolament tal-Kummissjoni (UE) Nru 452/2014 (6), u b'mod partikolari l-punt TCO.205 tiegħu, jeħtieġu li l-inġenju tal-ajru jkun mgħammar u li l-ekwipaġġ tat-titjira jkun kwalifikat biex jopera fuq ir-rotta jew proċedura ppjanata. Dawk ir-rekwiżiti jenħtieġ li jiġu kkomplementati minn rekwiżiti komuni dwar l-użu tal-ispazju tal-ajru u li jispeċifikaw il-proċeduri u r-rotot korrispondenti tat-titjira.

(4)

L-implimentazzjoni ta' PBN f'żoni ta' mmanuvrar f'terminal ta' densità għolja, kif meħtieġ skont ir-Regolament ta' Implimentazzjoni tal-Kummissjoni (UE) Nru 716/2014 (7), hija mistennija li ttejjeb il-preċiżjoni tal-avviċinament tat-trajettorja kif ukoll tiffaċilita s-sekwenzjar tat-traffiku fi stadju aktar bikri, biex b'hekk tkun tista' titnaqqas il-konsum tal-fjuwil u l-impatt ambjentali fil-fażijiet tal-inżul u tal-wasla. Sabiex tiġi ffaċilitata l-implimentazzjoni, jenħtieġ li r-rekwiżiti ta' dan ir-Regolament ikunu konsistenti ma' dawk tar-Regolament (UE) Nru 716/2014.

(5)

L-użu ta' sistemi ta' awmentazzjoni bbażati fuq is-satelliti (SBASs), b'mod partikolari fil-forma tas-Sistema Ewropea ta' Navigazzjoni b'Kopertura Ġeostazzjonarja (EGNOS), jenħtieġ li tiġi promossa, billi konsiderazzjonijeit ta' sigurtà u ta' kosteffiċjenza jappoġġaw l-istabbiliment tal-prestazzjoni tal-Lokalizzatur ta' avviċinamenti minima bi gwida vertikali (LPV). Madankollu, jenħtieġ li jiġu ffaċilitati operazzjonijiet oħra b'kapaċitajiet PBN billi jiġu previsti valuri minimi oħra minbarra LPV.

(6)

Fl-iżvilupp tal-Pjan ta' Titjib tan-Netwerk Ewropew tar-Rotot, il-Maniġer tan-Netwerk imsemmi fir-Regolament tal-Kummissjoni (UE) Nru 677/2011 (8) irid, skont dak ir-Regolament, jiddependi fuq proċess ta' teħid ta' deċiżjonijiet b'mod kooperattiv. Skont dan, b'rabta mal-forniment ta' ATM/ANS b'konformità ma' dan ir-Regolament, jenħtieġ li l-Maniġer tan-Netwerk jikkoordina mal-fornituri ta' ATM/ANS, b'mod partikolari sabiex jiġi żgurat li r-rotot ATS użati għall-fini tat-tranżizzjonar lejn jew minn netwerk en route jkunu konsistenti mal-ispeċifikazzjoni tar-rotot tat-tluq standard strumentali (SID) u tar-rotot tal-wasla standard strumentali (STAR) servuti.

(7)

Jenħtieġ li r-rekwiżiti għall-fornituri ta' ATM/ANS li jikkonċernaw l-implimentazzjoni ta' PBN stipulata f'dan ir-Regolament jinkludu, b'mod partikolari, rekwiżiti xierqa għall-implimentazzjoni f'kull tarf tar-runway ta' strument tal-proċeduri tal-avviċinament 3D u, fejn dawn il-fornituri ma jkunux stabbilixxew rotot SID jew rotot STAR, l-implimentazzjoni ta' dawk ir-rotot. Madankollu, dawk ir-rekwiżiti jistgħu f'ċerti sitwazzjonijiet ikollhom konsegwenzi negattivi li jegħlbu l-benefiċċji potenzjali tas-sikurezza, tal-kapaċità u ta' effiċjenza. Għalhekk, il-fornituri ta' ATM/ANS għandhom f'dawk is-sitwazzjonijiet ikunu intitolati li jiddevjaw minn dawk ir-rekwiżiti u minflok ikunu soġġetti għal ċerti rekwiżiti alternattivi li jkunu adattati aħjar għal dawk is-sitwazzjonijiet speċifiċi, filwaqt li xorta waħda jintlaħqu dawk il-benefiċċji kemm jista' jkun.

(8)

Barra minn hekk, fl-interess ta' ambjent bla periklu u bla xkiel, il-fornituri ta' ATM/ANS għandhom jitħallew jipprovdu s-servizzi tagħhom kif ukoll permezz ta' mezzi oħra għajr bl-użu tal-PBN b'konformità mar-rekwiżiti ta' dan ir-Regolament, għal perjodu ta' żmien raġonevoli. Madankollu, jenħtieġ li ma jibqgħux jitħallew jagħmlu dan, ħlief permezz ta' miżuri ta' kontinġenza, mill-1 ta' Ġunju 2030, fid-dawl tal-ħtieġa li jiġi razzjonalizzat il-forniment ta' ATM/ANS u jiġu evitati spejjeż bla bżonn, b'mod partikolari għall-utenti tal-ispazju tal-ajru, li jirriżultaw mill-eżistenza ta' saffi multipli ta' infrastruttura tan-navigazzjoni.

(9)

Fl-interess tas-sikurezza, jenħtieġ li tkun żgurata t-tranżizzjoni bla xkiel u kkoordinata sabiex il-forniment ta' ATM/ANS bl-użu tan-navigazzjoni bbażata fuq il-prestazzjoni f'konformità mar-rekwiżiti ta' dan ir-Regolament. Għalhekk, jenħtieġ li b'mod effettiv u f'waqtu, il-fornituri ta' ATM/ANS jieħdu l-miżuri kollha meħtieġa għal dak il-għan. Jenħtieġ li dawk il-miżuri jinkludu l-istabbiliment ta' pjan ta' tranżizzjoni, li kull fornitur għandu jżomm aġġornat sabiex jitqiesu l-iżviluppi rilevanti kollha relatati mat-tranżizzjoni. Dawk il-pjanijiet ta' tranżizzjoni, u kwalunkwe aġġornament tagħhom li huma sinifikanti għax jimplikaw tibdiliet sostanzjali fil-pjanijiet u għax huma kapaċi materjalment li jaffettwaw l-interessi tal-partijiet interessati, jenħtieġ li jiġu stabbiliti wara proċess ta' konsultazzjoni mal-partijiet interessati, sabiex jiġi żgurat li l-fehmiet tagħhom jiġu kkunsidrati fejn xieraq, u wara l-approvazzjoni mill-awtorità kompetenti, sabiex tkun żgurata l-konformità mar-rekwiżiti stabbiliti f'dan ir-Regolament u b'mod partikolari l-Artikolu 4(1).

(10)

Eċċezzjonalment, jista' jkun hemm sitwazzjonijiet fejn, wara l-implimentazzjoni tar-rekwiżiti PBN stipulati f'dan ir-Regolament, jirriżulta impossibbli għall-fornituri ta' ATM/ANS, minħabba raġunijiet lil hinn mill-kontroll tagħhom, biex jipprovdu s-servizzi tagħhom b'konformità ma' dawk ir-rekwiżiti. Mingħajr preġudizzju għall-obbligu fuq dawk il-fornituri biex jieħdu l-miżuri raġonevoli kollha taħt il-kontroll tagħhom sabiex jiġi evitat li jinħolqu sitwazzjonijiet bħal dawn u biex mill-aktar fis possibbli meta madankollu jitqajmu dawn is-sitwazzjonijiet, jerġa' jkun hemm konformità ma' dawk ir-rekwiżiti, għalhekk jenħtieġ li jiġu miltuba jieħdu l-miżuri ta' kontinġenza neċessarji biex jitkompla l-forniment sikur tas-servizzi tagħhom permezz ta' mezzi oħra, b'mod partikolari billi jużaw il-proċeduri ta' navigazzjoni konvenzjonali.

(11)

Huwa neċessarju li jitħalla żmien biżżejjed għall-partijiet ikkonċernati biex jikkonformaw ma' dan ir-Regolament. Għaldaqstant, ir-rekwiżit rigward l-użu esklużiv ta' PBN għandu japplika minn data xierqa aktar 'il quddiem, sabiex jippermetti żmien biżżejjed għal tranżizzjoni bla xkiel u bla periklu. Barra minn hekk, jenħtieġ li ċerti dispożizzjonijiet tal-Anness japplikaw minn data xierqa aktar 'il quddiem, fid-dawl taż-żmien addizzjonali meħtieġ għall-partijiet ikkonċernati biex jadattaw għar-rekwiżiti inkwistjoni.

(12)

Il-miżuri previsti f'dan ir-Regolament huma bbażati fuq l-opinjoni maħruġa mill-Aġenzija Ewropea tas-Sikurezza tal-Avjazzjoni skont l-Artikolu 17(2)(b) u l-Artikolu 19(1) tar-Regolament (KE) Nru 216/2008.

(13)

Il-miżuri previsti f'dan ir-Regolament huma skont l-opinjoni tal-Kumitat stabbilit bl-Artikolu 5 tar-Regolament (KE) Nru 549/2004 tal-Parlament Ewropew u tal-Kunsill (9),

(1)

“navigazzjoni bbażata fuq il-prestazzjoni (PBN)” tfisser navigazzjoni bbażata fuq il-prestazzjoni kif definit fl-Artikolu 2(5) tar-Regolament (UE) Nru 965/2012;

(2)

“rotta ATS” tfisser rotta ATS kif definit fl-Artikolu 2(46) tar-Regolament (UE) Nru 923/2012;

(3)

“proċedura ta' avviċinament strumentali” tfisser proċedura ta' avviċinament strumentali kif definit fl-Artikolu 2(90) tar-Regolament (UE) Nru 923/2012;

(4)

“proċeduri ta' navigazzjoni konvenzjonali” tfisser rotot ATS u proċeduri ta' avviċinament strumentali bbażati fuq l-użu ta' għajnuniet ta' navigazzjoni bbażati fuq l-art li ma jippermettux il-konformità mar-rekwiżiti PBN stabbiliti f'dan ir-Regolament;

(5)

“runway ta' strument” tfisser runway ta' strument kif definit fl-Anness I, punt 22 tar-Regolament tal-Kummissjoni (UE) Nru 139/2014 (11);

(6)

“speċifikazzjoni ta' navigazzjoni” tfisser sett ta' rekwiżiti għal inġenji tal-ajru u għal ekwipaġġ tal-ajru meħtieġa biex jappoġġaw l-operazzjonijiet ta' navigazzjoni bbażata fuq il-prestazzjoni fi ħdan spazju tal-ajru definit;

(7)

“speċifikazzjoni tal-prestazzjoni ta' navigazzjoni meħtieġa (RNP) X” tfisser speċifikazzjoni tan-navigazzjoni bbażata fuq navigazzjoni taż-żona li tinkludi r-rekwiżit tas-sistema abbord għall-monitoraġġ tal-prestazzjoni u t-twissija, fejn “X” tindika l-preċiżjoni tan-navigazzjoni laterali f'mili nawtiċi jew it-tip ta' operazzjoni u l-funzjonalitajiet meħtieġa;

(8)

“navigazzjoni laterali (LNAV)”, “navigazzjoni laterali/navigazzjoni vertikali (LNAV/VNAV)” u “prestazzjoni ta' lokalizzatur bi gwida vertikali (LPV)” tfisser tikketti li jidentifikaw it-tipi differenti ta' minima operazzjonali fuq il-mapep tal-avviċinament li juru l-proċeduri ta' avviċinament ibbażati fuq Sistemi Globali ta' Navigazzjoni bis-Satellita (GNSS) li huma kklassifikati bħala approċċi RNP (RNP APCH);

(9)

“raġġ sa punt ta' tmiem fiss (radius to fix, RF)” tfisser trajettorja ċirkolari ta' raġġ kostanti li jdur madwar ċentru definit u li jittermina f'punt fiss;

(10)

“avviċinament 2D” tfisser proċedura ta' avviċinament strumentali, ikklassifikati bħala proċedura ta' avviċinament mhux ta' preċiżjoni, kif definit fl-Artikolu 2(90) tar-Regolament (UE) Nru 923/2012;

(11)

“avviċinament 3D” tfisser proċedura ta' avviċinament strumentali, ikklassifikata bħala avviċinament bi gwida vertikali jew avviċinament ta' preċiżjoni, kif definit fl-Artikolu 2(90) tar-Regolament (UE) Nru 923/2012;

(12)

“sistema ta' awmentazzjoni bbażata fuq is-satelliti (SBAS)” tfisser sistema ta' awmentazzjoni b'kopertura wiesgħa li biha l-utent ta' GNSS jirċievi informazzjoni ta' awmentazzjoni minn transmitter ibbażata fuq is-satellita;

(13)

“speċifikazzjoni tan-navigazzjoni taż-żona (RNAV) X” tfisser speċifikazzjoni tan-navigazzjoni bbażata fuq navigazzjoni taż-żona li ma tinkludix ir-rekwiżit tas-sistema abbord għall-monitoraġġ tal-prestazzjoni u t-twissija, fejn “X” tindika l-preċiżjoni tan-navigazzjoni laterali f'mili nawtiċi;

(14)

“rotta tal-wasla strumentali standard (STAR)” tfisser rotta tal-wasla deżinjata ta' regola ta' titjira strumentali li tgħaqqad punt sinifikanti, normalment fuq rotta ta' servizz tat-traffiku tal-ajru (ATS), b'punt mnejn tista' tinbeda proċedura ppubblikata ta' avviċinament strumentali;

(15)

“rotta tat-tluq strumentali standard (SID)” tfisser rotta tat-tluq deżinjata ta' regola ta' titjira strumentali li tgħaqqad l-ajrudrom ma' punt sinifikanti speċifikat, normalment fuq rotta ATS deżinjata, mnejn tinbeda il-fażi en route ta' titjira;

(16)

“funzjonalità ta' navigazzjoni” tfisser il-kapaċità dettaljata tas-sistema ta' navigazzjoni meħtieġa biex jiġu ssodisfati l-ħtiġijiet tal-operazzjonijiet proposti fl-ispazju tal-ajru;