23.7.2018 |
MT |
Il-Ġurnal Uffiċjali tal-Unjoni Ewropea |
L 185/9 |
REGOLAMENT TA' IMPLIMENTAZZJONI TAL-KUMMISSJONI (UE) 2018/1032
tal-20 ta' Lulju 2018
li jawtorizza l-estensjoni tal-użu tal-mikroalga Schizochytrium sp. bħala ikel ġdid skont ir-Regolament (UE) 2015/2283 tal-Parlament Ewropew u tal-Kunsill, u li jemenda r-Regolament ta' Implimentazzjoni tal-Kummissjoni (UE) 2017/2470
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2015/2283 tal-Parlament Ewropew u tal-Kunsill tal-25 ta' Novembru 2015 dwar ikel ġdid, li jemenda r-Regolament (UE) Nru 1169/2011 tal-Parlament Ewropew u tal-Kunsill u li jħassar ir-Regolament (KE) Nru 258/97 tal-Parlament Ewropew u tal-Kunsill u r-Regolament tal-Kummissjoni (KE) Nru 1852/2001 (1), u b'mod partikolari l-Artikolu 12 tiegħu,
Billi:
(1) |
Ir-Regolament (UE) 2015/2283 jipprevedi li huwa biss l-ikel ġdid awtorizzat u inkluż fil-lista tal-Unjoni li jista' jitqiegħed fis-suq fl-Unjoni. |
(2) |
Skont l-Artikolu 8 tar-Regolament (UE) 2015/2283, ġie adottat ir-Regolament ta' Implimentazzjoni tal-Kummissjoni (UE) 2017/2470 (2), li jistabbilixxi lista tal-Unjoni ta' ikel ġdid awtorizzat. |
(3) |
Skont l-Artikolu 12 tar-Regolament (UE) 2015/2283, il-Kummissjoni trid tiddeċiedi dwar l-awtorizzazzjoni u dwar it-tqegħid fis-suq tal-Unjoni ta' ikel ġdid u dwar l-aġġornament tal-lista tal-Unjoni. |
(4) |
Id-Deċiżjoni ta' Implimentazzjoni tal-Kummissjoni (UE) Nru 463/2014 (3) awtorizzat, b'konformità mar-Regolament (KE) Nru 258/97 tal-Parlament Ewropew u tal-Kunsill (4) dwar l-ikel il-ġdid u l-ingredjenti ġodda tal-ikel, it-tqegħid fis-suq ta' żejt li jkun fih l-aċidu dokosaeżaenojku (“DHA”) idderivat mill-mikroalga Schizochytrium sp. bħala ingredjent tal-ikel ġdid biex jintuża f'ċertu ikel, f'ikel maħsub għall-użu f'dieti ta' enerġija ristretta għat-tnaqqis fil-piż, f'ikel djetetiku għal skopijiet mediċi speċjali, f'ikel ieħor għal użi nutrizzjonali partikolari kif iddefinit fid-Direttiva 2009/39/KE tal-Parlament Ewropew u tal-Kunsill (5) (ħlief il-formuli tal-ikel tat-trabi u ta' prosegwiment) u fis-supplimenti tal-ikel. |
(5) |
B'konformità mar-Regolament (KE) Nru 258/97, id-Deċiżjoni ta' Implimentazzjoni tal-Kummissjoni (UE) 2015/545 (6) awtorizzat it-tqegħid fis-suq ta' żejt li jkun fih l-aċidu dokosaeżaenojku (“DHA”) minn razza oħra tal-mikroalga Schizochytrium sp. (ATCC PTA 9695) bħala ingredjent ġdid tal-ikel biex jintuża f'ċertu ikel, inkluż fil-formuli tal-ikel tat-trabi u ta' prosegwiment u f'ikel ipproċessat ibbażat fuq iċ-ċereali u ikel tat-trabi għat-trabi u għat-tfal iż-żgħar. |
(6) |
Fil-21 ta' Novembru 2016, il-kumpanija Mara Renewables Corporation għamlet talba lill-awtorità kompetenti tar-Renju Unit għal estensjoni tal-użu taż-żejt prodott minn razza differenti tal-mikroalga Schizochytrium sp. (ir-razza T18) fit-tifsira tal-punt (d) tal-Artikolu 1(2) tar-Regolament (KE) Nru 258/97. Fl-applikazzjoni talbet li jintuża ż-żejt mill-mikroalga Schizochytrium sp. tar-razza T18 għall-ikel kollu awtorizzat mid-Deċiżjonijiet ta' Implimentazzjoni (UE) Nru 463/2014 u (UE) 2015/545, u li jiġi estiż l-użu tiegħu għal purees tal-frott u tal-ħxejjex. |
(7) |
Fl-10 ta' Jannar 2017, il-kumpanija Mara Renewables Corporation innotifikat lill-Kummissjoni li kienet qiegħdet fis-suq tal-Unjoni l-ingredjent tal-ikel ġdid “iż-żejt minn Schizochytrium sp.” prodott mir-razza T18 skont l-Artikolu 5 tar-Regolament (KE) Nru 258/97. Il-kumpanija kien beħsiebha tuża dan l-ingredjent tal-ikel ġdid fl-ikel kollu li qabel kien awtorizzat skont id-Deċiżjoni ta' Implimentazzjoni (UE) Nru 463/2014. |
(8) |
Fit-22 ta' Settembru 2017, il-kumpanija Nutraveris innotifikat lill-Kummissjoni li kienet qiegħdet fis-suq tal-Unjoni l-ingredjent tal-ikel ġdid “iż-żejt minn Schizochytrium sp.” prodott mir-razza T18 skont l-Artikolu 5 tar-Regolament (KE) Nru 258/97. Il-kumpanija kellha l-ħsieb li tuża dan l-ingredjent tal-ikel ġdid fl-ikel kollu diġà awtorizzat permezz tad-Deċiżjonijiet ta' Implimentazzjoni (UE) Nru 463/2014 u (UE) 2015/545. |
(9) |
Fit-23 ta' Ottubru 2017, il-kumpanija BASF innotifikat lill-Kummissjoni li kienet qiegħdet fis-suq tal-Unjoni l-ingredjent tal-ikel ġdid “iż-żejt minn Schizochytrium sp.” prodott mir-razza T18 skont l-Artikolu 5 tar-Regolament (KE) Nru 258/97. Il-kumpanija kellha l-ħsieb li tuża dan l-ingredjent tal-ikel ġdid fl-ikel kollu diġà awtorizzat permezz tad-Deċiżjonijiet ta' Implimentazzjoni (UE) Nru 463/2014 u (UE) 2015/545. |
(10) |
Skont l-Artikolu 35(1) tar-Regolament (UE) 2015/2283, kull talba biex ikel ġdid jitqiegħed fis-suq tal-Unjoni, imressqa lil Stat Membru skont l-Artikolu 4 tar-Regolament (KE) Nru 258/97, u li dwarha ma tkunx ittieħdet deċiżjoni aħħarija qabel l-1 ta' Jannar 2018, għandha tiġi ttrattata bħala applikazzjoni mressqa skont ir-Regolament (UE) 2015/2283. |
(11) |
Filwaqt li t-talba għal estensjoni tal-użu taż-żejt mill-ispeċi tal-mikroalga Schizochytrium sp. tar-razza T18 ġiet ippreżentata lil Stat Membru skont l-Artikolu 4 tar-Regolament (KE) Nru 258/97, l-applikazzjoni tissodisfa wkoll ir-rekwiżiti stabbiliti fir-Regolament (UE) 2015/2283. |
(12) |
Fis-6 ta' Ottubru 2017, l-awtorità kompetenti tar-Renju Unit ħarġet ir-rapport ta' valutazzjoni inizjali tagħha. F'dak ir-rapport waslet għall-konklużjoni li l-estensjoni tal-użu taż-żejt mir-razza T18 tal-mikroalga Schizochytrium sp. tissodisfa l-kriterji għall-ikel ġdid kif stabbilit fl-Artikolu 3(1) tar-Regolament (KE) Nru 258/97. |
(13) |
Fis-7 ta' Ottubru 2017, il-Kummissjoni għaddiet ir-rapport ta' valutazzjoni inizjali lill-Istati Membri l-oħra. L-Istati Membri l-oħra għamlu l-osservazzjonijiet tagħhom fil-perjodu ta' 60 jum stipulat fl-ewwel subparagrafu tal-Artikolu 6(4) tar-Regolament (KE) Nru 258/97, u dawn ikkonfermaw il-konklużjonijiet tal-valutazzjoni inizjali. |
(14) |
Il-konklużjonijiet tar-rapport inizjali jagħtu biżżejjed raġunijiet biex jiġi stabbilit li l-estensjoni tal-użu taż-żejt mir-razza T18 tal-mikroalga Schizochytrium sp. tikkonforma mal-Artikolu 12(1) tar-Regolament (UE) 2015/2283. |
(15) |
Ir-Regolament (UE) Nru 1308/2013 tal-Parlament Ewropew u tal-Kunsill (7) li jistabbilixxi organizzazzjoni komuni tas-swieq fi prodotti agrikoli jistipula rekwiżiti għall-prodotti agrikoli, b'mod partikolari għall-ħalib u għall-prodotti tal-ħalib. L-estensjoni tal-użu taż-żejt li fih ħafna DHA mill-mikroalga ta' Schizochytrium sp. tar-razza T18 jenħtieġ li tkun awtorizzata mingħajr preġudizzju għal dak ir-Regolament. |
(16) |
Id-Direttiva 2002/46/KE tal-Parlament Ewropew u tal-Kunsill (8) tistabbilixxi rekwiżiti dwar is-supplimenti tal-ikel. L-estensjoni tal-użu taż-żejt mill-ispeċi tal-mikroalga Schizochytrium sp. tar-razza T18 jenħtieġ li tkun awtorizzata mingħajr preġudizzju għal dik id-Direttiva. |
(17) |
Ir-Regolament (UE) Nru 609/2013 tal-Parlament Ewropew u tal-Kunsill (9) jistabbilixxi rekwiżiti dwar ikel maħsub għat-trabi u għat-tfal żgħar, ikel għal skopijiet mediċi speċjali, u bħala sostitut tad-dieta kollha għall-kontroll tal-piż. L-estensjoni tal-użu taż-żejt mill-ispeċi tal-mikroalga Schizochytrium sp. tar-razza T18 jenħtieġ li tkun awtorizzata mingħajr preġudizzju għal dak ir-Regolament. |
(18) |
Il-miżuri previsti f'dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf, |
ADOTTAT DAN IR-REGOLAMENT:
Artikolu 1
L-entrata fil-lista tal-Unjoni ta' ikel ġdid awtorizzat kif previst fl-Artikolu 8 tar-Regolament (UE) 2015/2283, li tirreferi għaż-żejt mill-ispeċi tal-mikroalga Schizochytrium sp tar-razza (T18), għandha tiġi emendata kif speċifikat fl-Anness ta' dan ir-Regolament.
L-entrata fil-lista tal-Unjoni msemmija fl-ewwel paragrafu għandha tinkludi l-kundizzjonijiet għall-użu u r-rekwiżiti tat-tikkettar stipulati fl-Anness ta' dan ir-Regolament.
L-awtorizzazzjoni prevista f'dan l-Artikolu għandha tkun mingħajr preġudizzju għad-dispożizzjonijiet tar-Regolament (UE) Nru 1308/2013, tad-Direttiva 2002/46/KE u tar-Regolament (UE) Nru 609/2013.
Artikolu 2
L-Anness tar-Regolament ta' Implimentazzjoni tal-Kummissjoni (UE) 2017/2470 huwa emendat skont l-Anness ta' dan ir-Regolament.
Artikolu 3
Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, l-20 ta' Lulju 2018.
Għall-Kummissjoni
Il-President
Jean-Claude JUNCKER
(1) ĠU L 327, 11.12.2015, p. 1.
(2) ĠU L 351, 30.12.2017, p. 72.
(3) ĠU L 209, 16.7.2014, p. 55.
(5) ĠU L 124, 20.5.2009, p. 56.
(7) ĠU L 347, 20.12.2013, p. 671.
(8) ĠU L 183, 12.7.2002, p. 51.
(9) ĠU L 181, 29.6.2013, p. 181.
ANNESS
Fl-Anness tar-Regolament ta' Implimentazzjoni (UE) 2017/2470 l-entrata għaż-“żejt tas-Schizochytrium sp. (T18)” fit-Tabella 1 (L-ikel il-ġdid awtorizzat) tiġi sostitwita b'li ġej:
L-ikel il-ġdid awtorizzat |
Il-kundizzjonijiet li fihom jista' jintuża l-ikel il-ġdid |
Rekwiżiti tat-tikkettar speċifiċi oħrajn |
Rekwiżiti oħrajn |
|
“Żejt tas-Schizochytrium sp. (T18) |
Il-kategorija tal-ikel speċifikat |
Livelli massimi |
Id-denominazzjoni tal-ikel il-ġdid fuq it-tikketti tal-oġġetti tal-ikel li fihom dan l-ikel għandha tkun ‘Żejt mill-mikroalga Schizochytrium sp.’” |
|
Prodotti tal-ħalib ħlief xarbiet magħmula bil-ħalib |
200 mg/100 g jew għall-prodotti tal-ġobon 600 mg/100 g |
|||
Analogi ta' prodotti tal-ħalib ħlief xarbiet |
200 mg/100 g jew għall-analogi tal-prodotti tal-ġobon 600 mg/100 g |
|||
Xaħmiet li jiddelku u ħwawar |
600 mg/100 g |
|||
Ċereali għall-kolazzjon |
500 mg/100 g |
|||
Supplimenti tal-ikel kif iddefiniti fid-Direttiva 2002/46/KE |
250 mg DHA kuljum għall-popolazzjoni ġenerali |
|||
450 mg DHA kuljum għan-nisa tqal u li jkunu qegħdin ireddgħu |
||||
Sostituzzjoni tad-dieta kollha għall-kontroll tal-piż kif iddefinit fir-Regolament (UE) Nru 609/2013 u sostituti ta' ikliet għall-kontroll tal-piż |
250 mg/ikla |
|||
Xarbiet magħmulin bil-ħalib u prodotti simili maħsuba għat-tfal żgħar |
200 mg/100 g |
|||
Ikel maħsub biex jagħmel tajjeb għall-użu ta' sforz muskolari qawwi, speċjalment għall-isportivi |
||||
Ikel li fuqu jkollu dikjarazzjonijet tan-nuqqas jew tal-preżenza mnaqqsa tal-glutina skont ir-rekwiżiti tar-Regolament ta' Implimentazzjoni tal-Kummissjoni (UE) Nru 828/2014 |
||||
Ikel għal skopijiet mediċi speċjali kif iddefinit fir-Regolament (UE) Nru 609/2013 |
Skont ir-rekwiżiti nutrittivi partikolari tal-persuni li għalihom huma maħsuba l-prodotti |
|||
Prodotti tal-furnara, (ħobżiet, bziezen, u gallettini ħelwin) |
200 mg/100 g |
|||
Bars taċ-ċereali |
500 mg/100 g |
|||
Xaħam għat-tisjir |
360 mg/100 g |
|||
Xarbiet mhux alkoħoliċi (inklużi analogi ta' prodotti tal-ħalib u xarbiet magħmulin bil-ħalib) |
80 mg/100 ml |
|||
Formula tat-trabi u formula tal-prosegwiment kif iddefinit fir-Regolament (UE) Nru 609/2013 |
Skont ir-Regolament ta' Implimentazzjoni tal-Kummissjoni (UE) Nru 609/2013 |
|||
Ikel biċ-ċereali u ikel tat-trabi pproċessat maħsub għat-trabi u għat-tfal żgħar kif iddefinit fir-Regolament (UE) Nru 609/2013 |
200 mg/100 g |
|||
Puree tal-frott/ħxejjex |
100 mg/100 g |