(1)

Ir-Regolament (UE) 2015/2283 jipprevedi li huwa biss l-ikel ġdid awtorizzat u inkluż fil-lista tal-Unjoni li jista' jitqiegħed fis-suq fl-Unjoni.

(2)

Skont l-Artikolu 8 tar-Regolament (UE) 2015/2283, ġie adottat ir-Regolament ta' Implimentazzjoni tal-Kummissjoni (UE) 2017/2470 (2), li jistabbilixxi lista tal-Unjoni ta' ikel ġdid awtorizzat.

(3)

Skont l-Artikolu 12 tar-Regolament (UE) 2015/2283, il-Kummissjoni trid tissottometti abbozz ta' att ta' implimentazzjoni li jawtorizza t-tqegħid fis-suq tal-Unjoni ta' ikel ġdid u li jaġġorna l-lista tal-Unjoni.

(4)

Id-Deċiżjoni ta' Implimentazzjoni tal-Kummissjoni 2014/396/UE (3), b'konformità mar-Regolament (KE) Nru 258/97 tal-Parlament Ewropew u tal-Kunsill (4) u wara li ngħatat l-Opinjoni tal-Awtorità Ewropea għas-Sigurtà fl-Ikel (5), awtorizzat it-tqegħid fis-suq tal-ħmira tal-furnara ttrattata bil-UV (Saccharomyces cerevisiae) bħala ingredjent alimentari ġdid biex jintuża f'ċertu ikel, inkluż ħobż u bziezen yeast-leavened u prodotti fini tal-forn li jkunu yeast-leavened, kif ukoll fis-supplimenti tal-ikel.

(5)

Fis-6 ta' Diċembru 2016, il-kumpanija Lallemand Bio-Ingredients għamlet talba lill-awtorità kompetenti tad-Danimarka għal estensjoni tal-użu u tal-livelli tal-użu tal-ħmira tal-furnara ttrattata bil-UV (Saccharomyces cerevisiae). L-applikazzjoni talbet li jiġi estiż l-użu tal-ħmira tal-furnara ttrattata bil-UV (Saccharomyces cerevisiae) għall-kategoriji ta' ikel oħra, jiġifieri, ħmira friska u niexfa ppakkjata minn qabel, biex imbagħad tinħema fid-dar, u fis-supplimenti tal-ikel, mingħajr indikazzjoni tal-livelli massimi permissibbli. Barra minn hekk, l-applikant talab li tiġi emendata l-ispeċifikazzjoni l-aktar baxxa tal-kontenut ta' vitamina D2 fil-konċentrat tal-ħmira minn 1 800 000 IU (450 μg/g) għal 800 000 IU (200 μg/g).

(6)

Skont l-Artikolu 35(1) tar-Regolament (UE) 2015/2283, kull talba għat-tqegħid fis-suq ta' ikel ġdid fl-Unjoni ppreżentata lil Stat Membru skont l-Artikolu 4 tar-Regolament (KE) Nru 258/97 u li dwarha ma tteħditx deċiżjoni finali qabel l-1 ta' Jannar 2018 għandha tiġi ttrattata bħala applikazzjoni sottomessa skont ir-Regolament (UE) 2015/2283.

(7)

Filwaqt li t-talba għall-estensjoni tal-użi u tal-livelli ta' użu tal-ħmira tal-furnara ttrattata bil-UV (Saccharomyces cerevisiae) ġiet ippreżentata lil Stat Membru skont l-Artikolu 4 tar-Regolament (KE) Nru 258/97, l-applikazzjoni tissodisfa wkoll ir-rekwiżiti stabbiliti fir-Regolament (UE) 2015/2283.

(8)

Fit-30 ta' Ġunju 2017, l-awtorità kompetenti tad-Danimarka ħarġet ir-rapport ta' valutazzjoni inizjali tagħha. F'dak ir-rapport din waslet għall-konklużjoni li l-estensjoni tal-użi u tal-livelli ta' użu massimu proposti tal-ħmira tal-furnara ttrattata bil-UV (Saccharomyces cerevisiae) tissodisfa l-kriterji għall-ikel ġdid stabbiliti fl-Artikolu 3(1) tar-Regolament (KE) Nru 258/97.

(9)

Fis-7 ta' Lulju 2017, il-Kummissjoni għaddiet ir-rapport ta' valutazzjoni inizjali lill-Istati Membri l-oħra. L-Istati Membri l-oħra għamlu l-kummenti tagħhom fi żmien il-perjodu ta' 60 jum stipulat fl-ewwel subparagrafu tal-Artikolu 6(4) tar-Regolament (KE) Nru 258/97 fir-rigward ta' metodi użati biex jidentifikaw b'mod adegwat il-mutanti potenzjali, in-nuqqas ta' ġustifikazzjoni li tiġi sostnuta t-tneħħija tal-livell massimu għas-supplimenti tal-ikel minħabba raġunijiet ta' sikurezza, in-nuqqas ta' informazzjoni dwar l-istabbiltà fil-ħżin tal-forma l-ġdida tal-ikel il-ġdid, in-nuqqas ta' informazzjoni dwar l-akkreditazzjoni tal-laboratorji, u fir-rigward ta' jekk il-konsum tal-ikel il-ġdid jaqbiżx l-ogħla livelli tollerabbli tal-konsum tal-vitamina D stabbiliti mill-EFSA (6).

(10)

Fid-dawl tal-kummenti li saru mill-Istati Membri l-oħra, l-applikant ippreżenta spjegazzjonijiet addizzjonali li taffew it-tħassib tal-Istati Membri u tal-Kummissjoni b'mod sodisfaċenti. Dawn l-ispjegazzjonijiet taw biżżejjed raġunijiet biex jiġi stabbilit li l-estensjoni tal-użu u tal-livelli tal-użu tal-ħmira tal-furnara ttrattata bil-UV (Saccharomyces cerevisiae) hija konformi mal-Artikolu 12(1) tar-Regolament (UE) 2015/2283.

(11)

Id-Direttiva 2002/46/KE tal-Parlament Ewropew u tal-Kunsill (7) u r-Regolament (KE) Nru 1925/2006 tal-Parlament Ewropew u tal-Kunsill (8) jistabbilixxu dispożizzjonijiet speċifiċi għall-użu tal-vitamini u tal-minerali meta jinżiedu mal-ikel u fis-supplimenti tal-ikel. L-estensjoni tal-użu tal-ħmira tal-furnara ttrattata bil-UV għandha tkun awtorizzata mingħajr preġudizzju għal dawk id-dispożizzjonijiet speċifiċi.

(12)

Il-miżuri previsti f'dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,