Deskrizzjoni tal-prodotti

Klassifikazzjoni

(Kodiċi tan-NM)

Raġunijiet

(1)

(2)

(3)

Kuxxin tal-plastik li jintefaħ (magħruf bħala “kuxxin għas-siġġijiet bir-roti”), b'qisien ta' madwar 40 × 40 cm, magħmul minn żewġ kompartimenti rettangolari konnessi flimkien internament, mimlijin bl-arja. Kull kompartiment fih borża tal-plastik mimlija bl-arja, miksija b'saff irqiq ta' silikonu.

Il-kuxxin jista' jiġi aġġustat skont kemm jintefħu bl-arja ż-żewġ kompartimenti, b'mod li meta l-utent ipoġġi fuq il-kuxxin, il-pożizzjoni tal-boroż tal-plastik f'kull kompartiment tersaq skont kemm ikun hemm arja.

Il-kuxxin ikollu għata ta' materjal tessili li ma jiżloqx li jkollha żewġ strixxi tat-tip tal-“velkro” mal-qiegħ.

Dan l-oġġett huwa maħsub biex lill-utent ma jiżviluppawlux feriti minħabba l-pressjoni fuq il-ġilda. Itaffi l-effett fuq l-għadam tal-warrani tal-utent u b'hekk dan iħossu aktar komdu.

Ara l-istampi (*1)

3926 90 97

Il-klassifikazzjoni hija ddeterminata mir-Regoli Ġenerali 1, 3(b) u 6 għall-interpretazzjoni tan-Nomenklatura Magħquda u mill-kliem tal-kodiċijiet NM 3926 , 3926 90 u 3926 90 97 .

Il-klassifikazzjoni tal-oġġett taħt it-titlu 9404 (oġġetti ta' friex u tagħmir (furnishing) simili) hija eskluża għaliex il-kuxxini pnewmatiċi huma esklużi minn dan it-titlu skont it-tifsira tan-nota 1(a) tal-Kapitolu 94, u b'hekk, il-kuxxini tal-plastik pnewmatiċi huma kklassifikati taħt it-titlu 3926 (ara wkoll in-Noti ta' Spjegazzjoni tas-Sistema Armonizzata (NSSA) l-aħħar paragrafu (b) għat-titlu 9404 ).

Il-klassifikazzjoni fil-kodiċi tan-Nomenklatura Magħquda 8714 20 00 taħt partijiet u aċċessorji għal vetturi għall-ġarr ta' persuni b'diżabbiltà, hija eskluża wkoll għaliex l-oġġett mhuwiex identifikabbli bħala addattat biss jew b'mod prinċipali għall-użu fil-vetturi għall-ġarr ta' persuni b'diżabbiltà fit-tifsira tan-nota 3 tat-Taqsima XVII. Meta jitqiesu l-karatteristiki oġġettivi tiegħu, l-oġġett jista' jintuża fuq għadd kbir ta' sits u siġġijiet, kif ukoll fuq is-sits tas-siġġijiet bir-roti. Pereżempju, l-oġġett mhuwiex magħmul biex jintuża biss fuq sit speċifiku, għaliex ma għandu l-ebda mezz speċifiku li jitwaħħal bih li jidentifikah li jintuża fuq sit speċifiku. L-għata li ma tiżloqx u l-istrixxi tat-tip tal-“velkro” jistgħu jitwaħħlu ma' ħafna tipi ta' sits differenti. Għalhekk ma hemm xejn li jidentifika l-oġġett bħala li hu magħmul biex jintuża ma' xi tip speċifiku ta' sit (ara wkoll l-NSSA, l-ewwel paragrafu (i) għat-titlu 8714 ).

Barra minn hekk, il-klassifikazzjoni taħt il-kodiċi tan-NM 8714 20 00 bħala partijiet u aċċessorji għal vetturi għall-ġarr ta' persuni b'diżabbiltà hija eskluża għaliex l-oġġett mhuwiex indispensabbli għat-tħaddim tas-siġġu bir-roti u lanqas ma jaddatta s-siġġu bir-roti għal xi funzjoni partikolari, jew iżid il-funzjonijiet tiegħu jew jippermetti li s-siġġu bir-roti jkollu xi funzjoni oħra b'rabta mal-funzjoni ewlenija tiegħu, li hi li jippermetti lil persuna b'diżabbiltà tmur minn banda għall-oħra (ara s-sentenza tal-Qorti tas-16 ta' Ġunju 2011, Unomedical, C-152/10, ECLI:EU:C:2011:402, il-paragrafi 29, 30 u 36). Siġġu tar-roti jaħdem bl-istess mod bil-kuxxin u mingħajru. Il-funzjoni tal-kuxxin hija biss biex l-utent iħossu iżjed komdu u jkun jista' joqgħod fit-tul fuq is-siġġu bir-roti.

Minkejja li l-oġġett huwa magħmul minn komponenti diversi (il-kuxxin huwa tal-plastik u l-għata tiegħu hija ta' materjal tessili), l-oġġett irid jiġi kklassifikat daqslikieku kien kuxxin tal-plastik, għaliex huwa l-kuxxin li jagħti l-karattru essenzjali lill-oġġett fit-tifsira tar-regola ġenerali 3(b). Il-komponent tessili huwa biss għata li tipproteġi l-komponent essenzjali u jżommu f'postu. Għalhekk, l-oġġett irid jiġi kklassifikat skont il-materjal li hu magħmul minnu taħt il-kodiċi NM 3926 90 97 bħala “oġġetti oħrajn tal-plastik”.