(1)

L-Artikolu 15 tad-Direttiva 92/35/KEE jipprevedi n-nomina ta' laboratorju ta' referenza tal-Unjoni Ewropea għall-marda Afrikana taż-żwiemel fl-Anness II tagħha, u l-elenkar tal-funzjonijiet u d-doveri tiegħu fl-Anness III tagħha.

(2)

L-Artikolu 16 tad-Direttiva 2000/75/KE jipprevedi n-nomina tal-laboratorju ta' referenza tal-Unjoni Ewropea għall-marda Afrikana taż-żwiemel fl-Anness II(A) tagħha, u l-elenkar tax-xogħlijiet tiegħu fl-Anness II(B) tagħha.

(3)

L-Artikolu 32(2) tar-Regolament (KE) Nru 882/2004 jistabbilixxi r-responsabbiltajiet tal-laboratorji ta' referenza tal-Unjoni Ewropea fis-settur tas-saħħa tal-annimali. Il-laboratorji ta' referenza tal-Unjoni Ewropea għas-saħħa tal-annimali u għall-annimali ħajjin huma mniżżla fil-Parti II tal-Anness VII ta' dak ir-Regolament, inklużi l-laboratorji ta' referenza tal-Unjoni Ewropea għall-marda Afrikana taż-żwiemel u għall-bluetongue.

(4)

B'konsegwenza tan-notifika tar-Renju Unit skont l-Artikolu 50 tat-Trattat dwar l-Unjoni Ewropea, il-laboratorju msemmi fl-Anness II(A) tad-Direttiva 2000/75/KE se jkollu jtemm il-funzjoni tiegħu bħala l-laboratorju ta' referenza tal-Unjoni Ewropea għall-bluetongue.

(5)

Fid-dawl tas-sinerġiji fil-kompetenza teknika, fil-kapaċità tal-laboratorji u fin-netwerking ma' laboratorji ta' referenza nazzjonali li jirriżultaw mir-rabta ġenetika u epidemjoloġika tal-marda Afrikana taż-żwiemel u tal-bluetongue, il-laboratorju ta' referenza tal-Unjoni Ewropea għall-marda Afrikan taż-żwiemel, imsemmi fl-Anness II tad-Direttiva 92/35/KEE, jenħtieġ li jassumi wkoll ir-responsabbiltajiet tal-laboratorju ta' referenza tal-Unjoni Ewropea għall-bluetongue.

(6)

Il-Laboratorio Central de Veterinaria — Área de Sanidad Animal, f'Madrid fi Spanja, tal-Ministeru tal-Agrikoltura, tas-Sajd u tal-Ikel ta' Spanja, li jaġixxi bħala l-laboratorju ta' referenza tal-Unjoni Ewropea għall-marda Afrikana taż-żwiemel, jenħtieġ li jkompli jwettaq il-funzjonijiet u d-dmirijiet tiegħu skont id-Direttiva 92/35/KEE u barra minn hekk, jenħtieġ li jieħu f'idejh ix-xogħlijiet tal-laboratorju ta' referenza tal-Unjoni Ewropea għall-bluetongue kif previst fid-Direttiva 2000/75/KE.

(7)

Barra minn hekk, wara l-bdil ta' ċerti dettalji ta' kuntatt tal-laboratorju ta' referenza tal-Unjoni Ewropea għall-marda Afrikana taż-żwiemel għal dawk tal-Laboratorio Central de Veterinaria — Área de Sanidad Animal, f'Madrid fi Spanja, hemm bżonn li l-Anness II tad-Direttiva 92/35/KEE jiġi emendat skont dan.

(8)

L-isem tal-laboratorju li jassumi r-responsabbilitajiet tal-laboratorju ta' referenza tal-Unjoni Ewropea għall-marda Afrikana taż-żwiemel u għall-bluetongue jenħtieġ li jiġi indikat ukoll bħala l-laboratorju ta' referenza tal-Unjoni Ewropea għall-bluetongue. Għalhekk, jenħtieġ li l-Anness II(A) tad-Direttiva 2000/75/KE jiġi emendat skont dan.

(9)

L-Anness VII tar-Regolament (KE) Nru 882/2004 jenħtieġ li jiġi emendat biex jirreferi għal-laboratorju ta' referenza tal-Unjoni Ewropea għall-marda Afrikana taż-żwiemel u għall-bluetongue.

(10)

Sabiex ma jkunx hemm tfixkil tal-attivitajiet tal-laboratorju ta' referenza tal-Unjoni Ewropea għall-bluetongue u sabiex il-laboratorju ta' referenza tal-Unjoni Ewropea l-ġdid ikollu biżżejjed żmien biex isir operattiv bis-sħiħ, jixraq li l-miżuri stipulati f'dan ir-Regolament jibdew japplikaw mill-1 ta' Jannar 2019.

(11)

Il-miżuri previsti f'dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,