(1)

F'Lulju 2005, permezz tar-Regolament (KE) Nru 1174/2005 (2), il-Kunsill impona dazju anti-dumping definittiv fuq importazzjonijiet ta' pallet trucks tal-idejn u l-partijiet essenzjali tagħhom (“pallet trucks tal-idejn”) li joriġinaw fir-Repubblika Popolari taċ-Ċina (“ir-RPĊ” jew “iċ-Ċina”). Il-miżuri kienu jikkonsistu f'dazju anti-dumping ad valorem li jvarja bejn 7,6 % u 46,7 % (“il-miżuri oriġinali”).

(2)

F'Lulju 2008, permezz tar-Regolament (KE) Nru 684/2008 (3), il-Kunsill, wara rieżami interim parzjali ex officio skont l-Artikolu 11(3) tar-Regolament bażiku, iċċara l-ambitu tal-miżuri u eskluda mill-miżuri anti-dumping oriġinali ċerti prodotti, high lifters, stackers, scissor lifts u weighing trucks, li nstab li kienu distinti minn pallet trucks tal-idejn minħabba l-karatteristiċi u l-funzjonijiet tagħhom u l-użi finali speċifiċi tagħhom.

(3)

F'Ġunju 2009, permezz tar-Regolament (KE) Nru 499/2009 (4), il-Kunsill, wara investigazzjoni kontra ċ-ċirkomvenzjoni skont l-Artikolu 13 tar-Regolament bażiku, estenda d-dazju anti-dumping definittiv applikabbli “għall-kumpaniji l-oħra kollha” impost mir-Regolament (KE) Nru 1174/2005 għal pallet trucks tal-idejn ikkonsenjati mit-Tajlandja, kemm jekk ġew iddikjarati li joriġinaw fit-Tajlandja, kif ukoll jekk le.

(4)

F'Ottubru 2011, permezz tar-Regolament ta' Implimentazzjoni (UE) Nru 1008/2011 (5), il-Kunsill, wara rieżami ta' skadenza skont l-Artikolu 11(2) tar-Regolament bażiku, impona dazju anti-dumping definittiv fuq importazzjonijiet ta' pallet trucks tal-idejn li joriġinaw fir-RPĊ.

(5)

F'April 2013, permezz tar-Regolament ta' Implimentazzjoni tal-Kunsill (UE) Nru 372/2013 (6), il-Kunsill, wara rieżami interim skont l-Artikolu 11(3) tar-Regolament bażiku, emenda r-Regolament (UE) Nru 1008/2011, u impona rata ta' dazju ta' 70,8 % applikabbli għall-importazzjonijiet kollha fl-Unjoni ta' pallet trucks tal-idejn li joriġinaw fir-RPĊ.

(6)

F'Settembru 2014, permezz tar-Regolament ta' Implimentazzjoni (UE) Nru 946/2014 (7), il-Kummissjoni Ewropea (“Il-Kummissjoni”), wara rieżami ta' esportatur ġdid skont l-Artikolu 11(4) tar-Regolament bażiku, emendat ir-Regolament (UE) Nru 1008/2011, u imponiet rata' ta' dazju individwali ta' 54,1 % fuq importazzjonijiet ta' pallet trucks tal-idejn minn Ningbo Logitrans Handling Equipment Co.

(7)

F'Awwissu 2016. permezz tar-Regolament ta' Implimentazzjoni (UE) 2016/1346 (8), il-Kummissjoni, wara investigazzjoni kontra ċ-ċirkomvenzjoni skont l-Artikolu 13 tar-Regolament bażiku, estendiet id-dazji anti-dumping definittivi fis-seħħ għal importazzjonijiet ta' pallet trucks tal-idejn kemm kemm immodifikati li jinkorporaw sistema ta' indikazzjoni tal-piż mhux integrata fix-xażi (il-frieket) li joriġinaw fir-RPĊ.

(8)

F'Novembru 2017, permezz tar-Regolament ta' Implimentazzjoni (UE) 2017/2206 (9), il-Kummissjoni, wara rieżami ta' skadenza skont l-Artikolu 11(2) tar-Regolament bażiku, imponiet dazju anti-dumping definittiv fuq importazzjonijiet ta' pallet trucks tal-idejn li joriġinaw fir-RPĊ.

(9)

Il-miżuri li bħalissa qegħdin fis-seħħ huma dazju anti-dumping definittiv fuq l-importazzjoni ta' pallet trucks tal-idejn u l-partijiet essenzjali tagħhom li joriġinaw fir-RPĊ li jikkonsistu f'dazju ad valorem stabbilit għal 70,8 %.

(10)

Il-Kummissjoni rċeviet talba skont l-Artikoli 13(3) u 14(5) tar-Regolament bażiku biex tinvestiga l-possibbiltà ta' ċirkomvenzjoni tal-miżuri anti-dumping imposti fuq pallet trucks tal-idejn u l-partijiet essenzjali tagħhom li joriġinaw mir-RPĊ minn importazzjonijiet konsenjati mill-Vjetnam, kemm jekk iddikjarati li joriġinaw mill-Vjetnam u kemm jekk le, u li tagħmel tali importazzjonijiet suġġetti għar-reġistrazzjoni.

(11)

It-talba saret fis-6 ta' Ġunju 2017 minn żewġ produtturi tal-Unjoni ta' pallet trucks tal-idejn u l-partijiet essenzjali tagħhom, Toyota Material Handling Manufacturing Sweden AB u PR Industrial S.r.l. (“l-applikanti”).

(12)

It-talba kien fiha biżżejjed evidenza prima facie dwar bidla fix-xejra tal-kummerċ bejn l-Unjoni, ir-RPĊ u l-Vjetnam li dehret li tinbet minn prassi, proċess jew xogħol li għalih ma kienx hemm kawża dovuta jew ġustifikazzjoni ekonomika suffiċjenti għajr l-impożizzjoni tad-dazju, jiġifieri l-konsenja tal-prodott ikkonċernat permezz tal-Vjetnam fl-Unjoni, wara li jkun għadda mill-operazzjoni ta' assemblaġġ fil-Vjetnam. It-talba kien fiha biżżejjed evidenza prima facie li turi li tali operazzjonijiet tal-assemblaġġ jikkostitwixxu ċirkomvenzjoni billi l-partijiet Ċiniżi kienu jikkostitwixxu iktar minn 60 % tal-valur totali tal-prodott magħqud u l-valur miżjud matul l-operazzjoni tal-assemblaġġ kien inqas minn 25 % tal-ispiża tal-manifattura.

(13)

Barra minn hekk, it-talba kien fiha biżżejjed evidenza prima facie li l-prassi msemmija iktar 'il fuq kienet qed timmina l-effetti rimedjali tal-miżuri anti-dumping eżistenti, kemm f'termini tal-kwantitajiet, kif ukoll tal-prezzijiet, u li l-prezzijiet tal-prodott taħt investigazzjoni kienu l-oġġett ta' dumping f'relazzjoni mal-valur normali stabbilit preċedentement għall-prodott ikkonċernat.

(14)

Il-prodott soġġett għal din l-investigazzjoni huwa pallet trucks tal-idejn u l-partijiet essenzjali tagħhom, jiġifieri x-xażi u l-idrawlika, li bħalissa jaqgħu taħt il-kodiċijiet NM ex 8427 90 00 u ex 8431 20 00, li joriġinaw fir-Repubblika tal-Poplu taċ-Ċina. Għall-għan ta' dan ir-Regolament, il-pallet trucks tal-idejn għandhom ikunu trakkijiet b'roti li jirfdu l-frieket tal-irfigħ għat-tqandil tal-pallets, iddisinjati biex jiġu mbuttati, jinġibdu u jinstaqu bl-idejn, fuq uċuh lixxi, invellati u ibsin, minn operatur pedonali bl-użu ta' laċċ artikulat. Il-pallet trucks tal-idejn huma ddisinjati biss biex jgħollu tagħbija, billi wieħed jippompja l-laċċ, sa għoli biżżejjed għall-ġarr u ma għandhom l-ebda funzjoni jew użu addizzjonali ieħor bħal, pereżempju, (i) biex iġorru u jerfgħu t-tagħbija biex ipoġġuha aktar fl-għoli jew biex jgħinu fil-ħżin tat-tagħbija (highlifters); (ii) biex jistivaw pallet wieħed fuq l-ieħor (stackers); (iii) biex jerfgħu t-tagħbija għal livell fejn isir ix-xogħol (scissorlifts); jew (iv) biex jerfgħu u biex jiżnu t-tagħbijiet (trakkijiet tal-użin) (“il-prodott ikkonċernat”).

(15)

Il-prodott investigat huwa l-istess bħal dak iddefinit hawn fuq, iżda konsenjat mill-Vjetnam, kemm jekk dikjarat li joriġina fil-Vjetnam kif ukoll jekk le, u li bħalissa jaqa' taħt l-istess kodiċi NM bħall-prodott ikkonċernat (“prodott investigat”).

(16)

L-investigazzjoni wriet li l-pallet trucks tal-idejn u l-partijiet essenzjali tagħhom, kif iddefiniti iktar 'il fuq, esportati mir-RPĊ għall-Unjoni u dawk ikkonsenjati mill-Vjetnam għandhom l-istess karatteristiċi tekniċi u għandhom l-istess użi, u għaldaqstant għandhom jitqiesu li huma prodotti simili skont it-tifsira tal-Artikolu 1(4) tar-Regolament bażiku.

(17)

Wara li ddeterminat, wara li infurmat lill-Istati Membri, li kien hemm biżżejjed evidenza prima facie biex tinbeda investigazzjoni bis-saħħa tal-Artikoli 13(3) u 14(5) tar-Regolament bażiku, il-Kummissjoni ddeċidiet li tinvestiga ċ-ċirkomvenzjoni possibbli tal-miżuri anti-dumping imposti fuq l-importazzjonijiet ta' pallet trucks tal-idejn u l-partijiet essenzjali tagħhom li joriġinaw miċ-Ċina u li tagħmel l-importazzjonijiet ta' pallet trucks tal-idejn u l-partijiet essenzjali tagħhom ikkonsenjati mill-Vjetnam, kemm jekk huma ddikjarati li joriġinaw mill-Vjetnam, kemm jekk le, soġġetti għar-reġistrazzjoni.

(18)

L-investigazzjoni nbdiet permezz tar-Regolament tal-Kummissjoni (UE) 2017/1348 (10) (“ir-Regolament tal-bidu”).

(19)

Il-perjodu ta' investigazzjoni kopra l-perjodu mill-1 ta' Jannar 2011 sat-30 ta' Ġunju 2017 (“il-perjodu ta' investigazzjoni”). Ġiet miġbura informazzjoni għall-perjodu ta' investigazzjoni biex tiġi investigata, fost l-oħrajn, il-bidla allegata fix-xejra tal-kummerċ wara l-impożizzjoni tal-miżuri kif ukoll wara ż-żieda tad-dazju anti-dumping definittiv permezz tar-Regolament ta' Implimentazzjoni (UE) Nru 372/2013 u l-eżistenza ta' prassi, proċess jew xogħol li għalih ma kienx hemm kawża dovuta jew ġustifikazzjoni ekonomika għajr l-impożizzjoni tad-dazju. Inġabret dejta aktar iddettaljata għall-perjodu ta' rapportar mill-1 ta' Lulju 2016 sat-30 ta' Ġunju 2017 (“il-perjodu ta' rapportar”) sabiex jiġi eżaminat jekk l-importazzjonijiet kinux qed jimminaw l-effett ta' rimedju tal-miżuri fis-seħħ f'dak li għandu x'jaqsam ma' prezzijiet u/jew kwantitajiet u l-eżistenza ta' dumping.

(20)

Il-Kummissjoni uffiċjalment infurmat lill-awtoritajiet tar-RPĊ u tal-Vjetnam, lill-produtturi esportaturi u l-kummerċjanti f'dawk il-pajjiżi, lill-importaturi fl-Unjoni li kien magħruf li kienu kkonċernati, u lill-industrija tal-Unjoni dwar il-bidu tal-investigazzjoni. Intbagħtu kwestjonarji lill-produtturi/esportaturi fir-RPĊ u fil-Vjetnam magħrufa lill-Kummissjoni jew li kienu ppreżentaw ruħhom qabel l-iskadenzi stabbiliti fil-premessa 15 tar-Regolament tal-bidu. Intbagħtu kwestjonarji wkoll lill-importaturi fl-Unjoni.

(21)

Il-partijiet interessati ngħataw l-opportunità li jressqu l-opinjonijiet tagħhom bil-miktub u li jitolbu smigħ skont iż-żmien stipulat tar-Regolament tal-bidu.

(22)

Tliet kumpaniji fil-Vjetnam, li waħda minnhom kienet għadha ma bdietx tipproduċi l-pallet trucks tal-idejn fil-perjodu ta' investigazzjoni, u erba' importaturi mhux relatati ppreżentaw lilhom infushom.

(23)

Żewġ kumpaniji Vjetnamiżi ppreżentaw tweġiba għall-kwestjonarju u talbu eżenzjoni mill-estensjoni possibbli tal-miżuri, f'konformita mal-Artikolu 13(4) tar-Regolament bażiku.

(24)

Erba' importaturi mhux relatati fl-Unjoni pprovdew tweġibiet għall-kwestjonarju.

(25)

Iż-żjarat ta' verifika saru fil-bini tal-kumpaniji li ġejjin fil-Vjetnam:

(26)

F'konformità mal-Artikolu 13(1) tar-Regolament bażiku, jinħtieġ li l-elementi li ġejjin jiġu analizzati suċċessivament sabiex tiġi vvalutata ċ-ċirkomvenzjoni possibbli:

(27)

Fl-investigazzjoni preżenti, minħabba li l-evidenza prima facie mogħtija mill-applikanti fit-talba wriet li hemm operazzjoni ta' assemblaġġ fil-Vjetnam, il-Kummissjoni analizzat b'mod iktar speċifiku jekk il-kriterji stabbiliti fl-Artikolu 13(2) tar-Regolament bażiku ġewx issodisfati, b'mod partikolari:

(28)

L-informazzjoni dwar il-bejgħ ta' esportazzjoni ppreżentata miż-żewġ kumpaniji Vjetnamiżi tista' tiġi rikonċiljata mad-dejta disponibbli fil-bażi ta' dejta Comext (11) dwar l-importazzjonijiet tal-prodott investigat mill-Vjetnam. Għalhekk tqies li dawn il-kumpaniji kienu l-uniċi esportaturi tal-prodott investigat mill-Vjetnam lejn l-Unjoni matul il-perjodu ta' rapportar.

(29)

Għaż-żewġ kumpaniji, il-volum ta' bejgħ lejn is-suq tal-Unjoni żdied b'mod kostanti mill-2013, meta d-dazju anti-dumping definittiv ġie miżjud għal 70,8 % permezz tar-Regolament (UE) Nru 372/2013, sal-perjodu ta' rapportar. Il-volum ta' bejgħ fis-suq tal-Unjoni taż-żewġ kumpaniji żdied b'aktar minn tliet darbiet tul dan il-perjodu. Qabel l-2013, il-volum esportat minn dawn il-kumpaniji lejn is-suq tal-Unjoni kien negliġibbli jew ineżistenti. B'mod parallel, l-esportazzjonijiet Ċiniżi għas-suq tal-Unjoni tal-prodott investigat waqgħu sinifikantement b'65 %. Għalhekk ġie konkluż li kien hemm bidla fix-xejra tal-kummerċ bejn l-Unjoni u r-RPĊ minn naħa, u bejn l-Unjoni u l-Vjetnam min-naħa l-oħra, u li għalhekk il-kundizzjoni stipulata fl-Artikolu 13(2)(a) tar-Regolament bażiku kienet issodisfata.

(30)

F'konformità mal-Artikolu 13(2)(b) tar-Regolament bażiku, biex tiġi stabbilita l-eżistenza taċ-ċirkomvenzjoni, il-Kummissjoni kellha tivverifika li l-partijiet użati fl-operazzjoni ta' assemblaġġ mill-pajjiżi soġġetti għall-miżuri kienu jikkostitwixxu 60 % jew aktar tal-valur totali tal-partijiet tal-prodott assemblat u li l-valur miżjud għall-partijiet li ddaħħlu ma kienx akbar minn 25 % tal-kost tal-manifattura.

(31)

Għaż-żewġ kumpaniji li kkooperaw instab li l-partijiet mill-pajjiż soġġett għall-miżuri ma kinux jikkostitwixxu 60 % jew aktar tal-valur totali tal-partijiet tal-prodotti assemblati.

(32)

Għaldaqstant, l-operazzjonijiet ta' assemblaġġ li saru mill-kumpaniji Vjetnamiżi li kkooperaw ma jistgħux jitqiesu bħala ċirkomvenzjoni skont it-tifsira tal-Artikolu 13(2) tar-Regolament bażiku.

(33)

Minħabba li l-investigazzjoni wriet li l-kriterju ta' 60 % ma ntlaħaqx u li l-operazzjoni ta' assemblaġġ ma tistax titqies bħala ċirkomvenzjoni skont it-tifsira tal-artikolu 13(2) tar-Regolament bażiku, ma tqiesx meħtieġ li dan il-kriterju jiġi eżaminat.

(34)

Minħabba li l-investigazzjoni wriet li l-kriterju ta' 60 % ma ntlaħaqx u li l-operazzjoni ta' assemblaġġ ma tistax titqies bħala ċirkomvenzjoni skont it-tifsira tal-artikolu 13(2) tar-Regolament bażiku, ma tqiesx meħtieġ li dawn l-aspetti jiġu eżaminati.

(35)

Minħabba li ż-żewġ kumpaniji investigati jirrappreżentaw 100 % tal-importazzjonijiet Vjetnamiżi matul il-perjodu ta' rapportar, ma setax jiġi stabbilit li l-miżuri fis-seħħ fir-rigward taċ-Ċina kienu qed jiġu ċirkomvenuti mill-importazzjonijiet ikkunsinjati mill-Vjetnam.

(36)

Fid-dawl tas-sejbiet imsemmija fil-premessi minn (30) sa (32), jenħtieġ li l-investigazzjoni preżenti kontra ċ-ċirkomvenzjoni tintemm. Jinħtieġ li r-reġistrazzjoni tal-importazzjonijiet ta' pallet trucks tal-idejn u l-partijiet essenzjali tagħhom ikkonsenjati mill-Vjetnam, kemm jekk huma ddikjarati li joriġinaw mill-Vjetnam, kemm jekk le, introdotti permezz tar-Regolament tal-bidu, jiġu skontinwati, u r-Regolament jitħassar.

(37)

Il-partijiet interessati kienu informati bil-fatti essenzjali u l-kunsiderazzjonijiet li fuq il-bażi tagħhom il-Kummissjoni kellha l-intenzjoni li ttemm l-investigazzjoni u ngħataw l-opportunità li jikkummentaw. Il-kummenti li waslu ma kinux ta' natura li jibdlu l-konklużjonijiet ta' hawn fuq,

(38)

Il-miżuri previsti f'dan ir-Regolament huma skont l-opinjoni tal-Kumitat stabbilit fl-Artikolu 15(1) tar-Regolament (UE) 2016/1036,