(1)

B'konformità mar-Regolament (UE) Nru 517/2014, it-tqegħid fis-suq tal-Unjoni ta' minn tal-inqas 100 tunnellata ta' ekwivalenti ta' CO2 ta' idrofluworokarburi (“HFCs”) fis-sena mill-produtturi jew mill-importaturi huwa soġġett għal limiti kwantitattivi sabiex jiġi żgurat it-tnaqqis gradwali tagħhom.

(2)

Skont l-Artikolu 16 tar-Regolament (UE) Nru 517/2014, il-limiti kwantitattivi – il-kwoti – jiġu kkalkulati abbażi ta' valuri ta' referenza ddeterminati mill-Kummissjoni abbażi tal-medja annwali tal-kwantitajiet ta' HFCs li l-produtturi jew l-importaturi rrappurtaw skont l-Artikolu 19 tar-Regolament (UE) Nru 517/2014 li qiegħdu legalment fis-suq mill-1 ta' Jannar 2015 'il quddiem, filwaqt li jiġu esklużi l-kwantitajiet ta' HFCs għall-użi msemmija fl-Artikolu 15(2) tar-Regolament (UE) Nru 517/2014 matul l-istess perjodu, abbażi tad-data disponibbli, b'konformità mal-Anness V ta' dak ir-Regolament.

(3)

B'konformità mal-Artikolu 16(5) tar-Regolament (UE) Nru 517/2014, jiġu allokati kwoti ta' HFCs lill-produtturi jew lill-importaturi kif elenkat fl-Anness tad-Deċiżjoni ta' Implimentazzjoni tal-Kummissjoni (UE) 2017/1984 (2) li huma stabbiliti fl-Unjoni jew lill-importaturi minn pajjiżi terzi li jaħtru rappreżentant uniku stabbilit fl-Unjoni kif elenkat fl-Anness tad-Deċiżjoni ta' Implimentazzjoni (UE) 2017/1984.

(4)

Fid-dawl tan-notifika skont l-Artikolu 50 tat-Trattat tal-Unjoni Ewropea mir-Renju Unit u sabiex jiġi żgurat li l-valuri ta' referenza u l-kwoti mill-produtturi u mill-importaturi stabbiliti fir-Renju Unit jirriflettu t-tqegħid tal-HFCs legalment fis-suq fl-Unjoni ta' 27 Stat Membru wara l-ħruġ tar-Renju Unit, jenħtieġ li l-valuri ta' referenza għal dawn il-kumpaniji jiġu kkalkulati mill-ġdid għall-2019 għall-perjodu wara l-ħruġ tar-Renju Unit fit-30 ta' Marzu 2019.

(5)

Għall-perjodu mill-1 ta' Jannar sad-29 ta' Marzu 2019, jenħtieġ li l-valuri ta' referenza ddeterminati fid-Deċiżjoni ta' Implimentazzjoni (UE) 2017/1984 jibqgħu validi u applikabbli. Għad-determinazzjoni tal-kwoti għall-produtturi u għall-importaturi stabbiliti fir-Renju Unit, il-valuri ta' referenza għall-perjodu sad-29 ta' Marzu, inkluż dakinhar, u għall-perjodu wara dakinhar, se jiġu pponderati bin-numru ta' jiem li r-Renju Unit ikun Stat Membru tal-Unjoni fl-2019.

(6)

Għall-kumpaniji stabbiliti fir-Renju Unit, il-valuri ta' referenza li jiġu kkalkulati mill-ġdid kif iddeterminat f'din id-Deċiżjoni huma bbażati fuq data vverifikata addizzjonali ppreżentata minn dawn il-kumpaniji lill-Kummissjoni u li tikkumplementa r-rapportar li diġà sar skont l-Artikolu 19 tar-Regolament (UE) Nru 517/2014 billi ssir distinzjoni bejn l-HFCs li tqiegħdu fis-suq fir-Renju Unit u fl-Unjoni ta' 27 Stat Membru. Għall-kumpaniji li ma ppreżentawx data addizzjonali, jenħtieġ li wieħed jassumi li l-HFCs kollha tqiegħdu fis-suq fir-Renju Unit u jenħtieġ li ma jiġi ddeterminat l-ebda valur ta' referenza.

(7)

Il-valuri ta' referenza kkalkulati mill-ġdid jiġu stabbiliti fil-każ li fit-30 ta' Marzu 2019 id-dritt tal-Unjoni ma jibqax japplika għar-Renju Unit u fih.

(8)

Il-miżuri previsti f'din id-Deċiżjoni huma skont l-opinjoni tal-Kumitat stabbilit permezz tal-Artikolu 24 tar-Regolament (UE) Nru 517/2014,