ANNESS

QAFAS

IL-KRITERJI TAL-EKOTIKKETTA TAL-UE

Il-kriterji biex tingħata l-Ekotikketta tal-UE għal-lubrikanti

KRITERJI

1.	Sustanzi esklużi jew limitati

2.	Rekwiżiti addizzjonali tat-tossiċità akkwatika

3.	Bijodegradibbiltà u potenzjal bijoakkumulattiv

4.	Rekwiżiti tal-ingredjenti rinnovabbli

5.	Rekwiżiti tal-ippakkjar/kontenitur

6.	Prestazzjoni teknika minima

7.	Informazzjoni għall-konsumatur dwar l-użu u r-rimi

8.	Informazzjoni li tidher fuq l-Ekotikketta tal-UE

VALUTAZZJONI U VERIFIKA

(a)   Ir-rekwiżiti

Ir-rekwiżiti speċifiċi ta' valutazzjoni u ta' verifika huma indikati f'kull kriterju.

Meta l-applikant ikun jeħtieġlu jagħti dikjarazzjonijiet, dokumentazzjoni, analiżi, rapporti tat-testijiet jew evidenza oħra lill-korpi kompetenti biex juri konformità mal-kriterji, dawn jistgħu jiġu mingħand l-applikant u/jew mingħand il-fornitur(i) tiegħu, kif ikun xieraq.

Il-korpi kompetenti għandhom jirrikonoxxu preferenzjalment l-attestazzjonijiet li jinħarġu mill-korpi akkreditati skont l-istandard armonizzat rilevanti għal-laboratorji tal-ittestjar u tal-kalibrazzjoni (Rekwiżiti ġenerali għall-kompetenza tal-laboratorji tal-ittestjar u l-kalibrazzjoni (ISO/IEC 17025:2005)) jew mal-prinċipji tal-Prattika Tajba tal-Laboratorju (GLP); u l-verifiki li jagħmlu l-korpi akkreditati skont l-istandard armonizzat rilevanti għall-korpi li jiċċertifikaw il-prodotti, il-proċessi u s-servizzi. L-akkreditazzjoni għandha ssir skont ir-Regolament (KE) Nru 765/2008 tal-Parlament Ewropew u tal-Kunsill (1).

Meta xieraq jistgħu jintużaw metodi tal-ittestjar oħra li mhumiex indikati għal kull kriterju, diment li l-korp kompetenti li jkun qed jivvaluta l-applikazzjoni jaċċetta l-ekwivalenza tagħhom.

Meta xieraq, il-korpi kompetenti jistgħu jeżiġu dokumentazzjoni ġustifikattiva u jistgħu jagħmlu verifiki indipendenti jew żjarat fuq il-post.

Bħala prerekwiżit, il-prodott għandu jissodisfa r-rekwiżiti legali applikabbli kollha tal-pajjiż(i) fejn il-prodott ikun maħsub li jitqiegħed fis-suq. L-applikant għandu jiddikjara l-konformità tal-prodott ma' dan ir-rekwiżit.

Il-lista tal-Klassifikazzjoni tas-Sustanzi tal-Lubrikanti (il-lista LuSC), disponibbli fuq is-sit web tal-Ekotikketta tal-UE (2), tiġbor sustanzi u ditti li ġew ivvalutati minn korp kompetenti fir-rigward tar-rekwiżiti rilevanti inklużi f'din id-Deċiżjoni u d-data tista' tintuża direttament fil-proċess tal-applikazzjoni.

Ittra ta' Konformità maħruġa minn wieħed mill-korpi kompetenti tal-Ekotikketta tal-UE tista' tintuża direttament fil-proċess tal-applikazzjoni.

Lista tas-sustanzi kollha miżjuda intenzjonalment u/jew iffurmati intenzjonalment wara xi reazzjoni kimika fil-lubrikant applikat, f'konċentrazzjoni ta' 0,010 % jew aktar tal-piż skont il-piż fil-prodott finali għandha tiġi ppreżentata lill-korp kompetenti, u tindika l-isem kummerċjali (jekk ikun jeżisti), l-isem kimiku, in-numru tal-CAS, il-kwantità mdaħħla, il-funzjoni u l-forma preżenti fil-formulazzjoni tal-prodott finali. Is-sustanzi kollha mdaħħla li jkunu preżenti fil-forma ta' nanomaterjali għandhom jiġu indikati b'mod ċar fil-lista, bil-kelma “nano” fil-parenteżi.

Għal kull sustanza elenkata, għandhom jiġu pprovduti l-Iskedi tad-Data dwar is-Sikurezza (SDS) skont ir-Regolament (KE) Nru 1907/2006 tal-Parlament Ewropew u tal-Kunsill (3). Meta l-SDS ma tkunx disponibbli għal xi sustanza partikolari għax tkun parti minn taħlita, l-applikant għandu jipprovdi l-SDS tat-taħlita.

(b)   Il-livelli limitu tal-kejl

Il-konformità mal-kriterji ekoloġiċi hi meħtieġa għall-prodott finali u għas-sustanzi kostitwenti tiegħu li huma miżjuda intenzjonalment u/jew iffurmati intenzjonalment wara xi reazzjoni kimika fil-lubrikant applikat, kif indikat f'kull kriterju.

Barra minn hekk, il-frazzjoni totali tas-sustanzi elenkati, meta l-kriterji 2 u 3 fformulati ma jkunux japplikaw, għandha tibqa' anqas minn 0,5 % (w/w).

Nota: Meta l-griż ikun jista' jintuża kemm għat-TLL kif ukoll għall-PLL (bħal fil-każ tal-griż multifunzjonali), għandhom japplikaw il-kriterji applikabbli għas-sottogrupp TLL. Iżda jekk il-griż ikun jista' jintuża bħala PLL u ALL, iżda mhux bħala TLL, għandhom japplikaw il-kriterji applikabbli għas-sottogrupp PLL.

Għaż-żjut tal-gerijiet użati f'gerijiet miftuħa, għandhom japplikaw il-kriterji applikabbli għas-sottogrupp PLL, filwaqt li għaż-żjut tal-gerijiet użati f'tagħmir magħluq għandhom japplikaw il-kriterji applikabbli għas-sottogrupp ALL. Meta ż-żejt tal-gerijiet ikunu jistgħu jintużaw fiż-żewġ tipi ta' gerijiet, għandhom japplikaw il-kriterji applikabbli għas-sottogrupp PLL.

KRITERJU 1 – IS-SUSTANZI ESKLUŻI U LIMITATI

Għall-finijiet tal-Kriterju 1, l-impuritajiet iddikjarati fl-SDS, li l-preżenza tagħhom fil-prodott finali hi 0,010 % jew aktar, għandhom jikkonformaw mal-istess rekwiżiti bħas-sustanzi miżjuda intenzjonalment.

1(a)   Sustanzi perikolużi

(i)   Il-prodott finali

Il-prodott finali ma għandux jiġi klassifikat skont xi waħda mid-dikjarazzjonijiet ta' periklu elenkati fit-Tabella 1.

(ii)   Is-sustanzi

Is-sustanzi li jissodisfaw il-kriterji għall-klassifikazzjoni bid-dikjarazzjonijiet ta' periklu elenkati fit-Tabella 1 ma għandhomx jiġu miżjuda jew ffurmati intenzjonalment fil-prodott finali kif speċifikat bil-valuri limitu rispettivi.

Meta jkunu aktar stretti, il-limiti ġeneriċi jew speċifiċi tal-konċentrazzjoni ddeterminati skont l-Artikolu 10 tar-Regolament (KE) Nru 1272/2008 tal-Parlament Ewropew u tal-Kunsill (4) għandhom jieħdu preċedenza.

Tabella 1

Dikjarazzjonijiet ta' periklu ristretti

Dikjarazzjoni ta' periklu	Valur limitu
H340 Jista' jikkawża difetti ġenetiċi	≤ 0,010 % tal-piż skont il-piż għal kull sustanza fil-prodott finali
H350 Jista' jikkawża l-kanċer
H350i Jista' jikkawża l-kanċer jekk jinġibed man-nifs
H360F Jista' jagħmel ħsara lill-fertilità
H360D Jista' jagħmel ħsara lit-tarbija fil-ġuf.
H360FD Jista' jagħmel ħsara lill-fertilità. Jista' jagħmel ħsara lit-tarbija fil-ġuf
H360Fd Jista' jagħmel ħsara lill-fertilità. Suspettat li jagħmel ħsara lit-tarbija fil-ġuf
H360Df Jista' jagħmel ħsara lit-tarbija fil-ġuf. Suspettat li jagħmel ħsara lill-fertilità
H341 Suspettat li jikkawża difetti ġenetiċi
H351 Suspettat li jikkawża l-kanċer
H361f Suspettat li jagħmel ħsara lill-fertilità
H361d Suspettat li jagħmel ħsara lit-tarbija fil-ġuf
H361fd Suspettat li jagħmel ħsara lill-fertilità. Suspettat li jagħmel ħsara lit-tarbija fil-ġuf
H362 Jista' jagħmel ħsara lit-tfal imreddgħa
H300 Fatali jekk jinbela' (orali)
H310 Fatali jekk imiss mal-ġilda (dermali)
H330 Fatali jekk jinġbed man-nifs (nifs)
H304 Jista' jkun fatali jekk jinbela' u jidħol fil-pajp tan-nifs	≤ 0,5 × Limitu ta' klassifikazzjoni tal-prodott finali għal H304
H301 Tossiku jekk jinbela'	< Limitu ta' klassifikazzjoni tal-prodott finali għal H301
H311 Tossiku jekk imiss mal-ġilda	< Limitu ta' klassifikazzjoni tal-prodott finali għal H311
H331 Tossiku jekk jinġibed man-nifs	< Limitu ta' klassifikazzjoni tal-prodott finali għal H331
EUH070 Tossiku jekk imiss mal-għajnejn	≤ 0,010 % tal-piż skont il-piż għal kull sustanza fil-prodott finali
H370 Jagħmel ħsara lill-organi
H372 Jagħmel ħsara lill-organi minħabba espożizzjoni fit-tul jew ripetuta
H371 Jista' jagħmel ħsara lill-organi
H373 Jista' jagħmel ħsara lill-organi minħabba espożizzjoni fit-tul jew ripetuta	< Limitu ta' klassifikazzjoni tal-prodott finali għal H373
H335 Jista' jikkawża irritazzjoni respiratorja	≤ 0,010 % tal-piż skont il-piż għal kull sustanza fil-prodott finali
H336 Jista' jikkawża ħedla jew sturdament	< Limitu ta' klassifikazzjoni tal-prodott finali għal H336
H317: Jista' jikkawża reazzjoni allerġika tal-ġilda	< Limitu ta' klassifikazzjoni tal-prodott finali għal H317
H334: Jista' jikkawża sintomi ta' allerġija jew ta' ażma jew diffikultajiet tan-nifs biex jinġibed man-nifs	≤ 0,010 % tal-piż skont il-piż għal kull sustanza fil-prodott finali
H314 Jikkawża ħruq kbir fil-ġilda u ħsara fl-għajnejn	< Limitu ta' klassifikazzjoni tal-prodott finali għal H314
H315 Jikkawża irritazzjoni fil-ġilda	< Limitu ta' klassifikazzjoni tal-prodott finali għal H315
H318: Jikkawża ħsara serja fl-għajnejn	< Limitu ta' klassifikazzjoni tal-prodott finali għal H318
H319 Jikkawża irritazzjoni serja fl-għajnejn	< Limitu ta' klassifikazzjoni tal-prodott finali għal H319
H400 Tossiku ħafna għall-organiżmi akkwatiċi	≤ 0,5 × Limitu ta' klassifikazzjoni tal-prodott finali għal H400
H410 Tossiku ħafna għall-organiżmi akkwatiċi u jħalli effetti fit-tul	≤ 0,5 × Limitu ta' klassifikazzjoni tal-prodott finali għal H410
H411 Tossiku għall-organiżmi akkwatiċi u jħalli effetti fit-tul	< Limitu ta' klassifikazzjoni tal-prodott finali għal H412 u H413
H412 Jagħmel ħsara lill-organiżmi akkwatiċi u jħalli effetti fit-tul
H413 Jista' jħalli effetti fit-tul lill-organiżmi akkwatiċi
H420 Jagħmel ħsara lis-saħħa pubblika u lill-ambjent għax jeqred l-ożonu fl-atmosfera ta' fuq	≤ 0,010 % tal-piż skont il-piż għal kull sustanza fil-prodott finali
EUH029 Meta jmiss mal-ilma jerħi gass tossiku
EUH031 Meta jmiss mal-aċidi jerħi gass tossiku
EUH032 Meta jmiss mal-aċidi jerħi gass tossiku ħafna
EUH066 Espożizzjoni ripetuta tista' tikkawża tnixxif jew qsim fil-ġilda	< Limitu ta' klassifikazzjoni tal-prodott finali għal EUH066

Nota: meta l-limitu ta' klassifikazzjoni tal-prodott finali (jew 0,5 × Limitu ta' klassifikazzjoni tal-prodott finali) hu indikat, għandha titqies il-konċentrazzjoni massimu totali tas-sustanzi klassifikati kollha bid-dikjarazzjoni(jiet) ta' periklu speċifiċi.

Dan il-kriterju ma japplikax għas-sustanzi koperti mill-Artikolu 2(7)(a) u (b) tar-Regolament (KE) Nru 1907/2006 li jistabbilixxi l-kriterji għall-eżenzjoni ta' sustanzi li hemm fl-Annessi IV u V ta' dan ir-Regolament mir-rekwiżitu tar-reġistrazzjoni, l-utent downstream u tal-evalwazzjoni. Biex jiġi ddeterminat jekk dik l-esklużjoni tapplikax, l-applikant għandu jgħarbel kull sustanza miżjuda/ffurmata intenzjonalment f'konċentrazzjoni ta' 0,010 % jew aktar tal-piż skont il-piż fil-prodott finali.

1(b)   Sustanzi ristretti speċifikati

Is-sustanzi indikati hawn taħt ma għandhomx jiġu miżjuda jew ffurmati intenzjonalment b'konċentrazzjoni ta' 0,010 % jew aktar tal-piż skont il-piż fil-prodott finali:

—

Is-sustanzi li jidhru fil-Lista tal-Unjoni tas-sustanzi ta' prijorità fil-qasam tal-politika dwar l-ilma fl-Anness X tad-Direttiva 2000/60/KE tal-Parlament Ewropew u tal-Kunsill (5) kif emendata bid-Deċiżjoni 2455/2001/KE (6) u l-Lista OSPAR tas-Sustanzi Kimiċi għal Azzjoni ta' Prijorità (http://www.ospar.org/work-areas/hasec/chemicals/priority-action);

—	Komposti tal-aloġenu organiku u komposti tan-nitrit;

—	Metalli jew komposti metalliċi għajr is-sodju, il-potassju, il-manjeżju u l-kalċju. Fil-każ tas-sustanzi li jħaxxnu, jistgħu jintużaw ukoll komposti tal-litju u/jew tal-aluminju sa livelli ta' konċentrazzjoni limitati mill-kriterji l-oħra inklużi fl-Anness ta' din id-Deċiżjoni.

1(c)   Sustanzi ta' tħassib serju ħafna (SVHCs)

Il-prodott finali ma għandux ikun fih sustanzi miżjuda/ffurmati intenzjonalment li jkunu ġew identifikati bil-proċedura deskritta fl-Artikolu 59(1) tar-Regolament (KE) Nru 1907/2006, li jistabbilixxi l-lista tal-kandidati għal sustanzi ta' tħassib serju ħafna b'konċentrazzjoni ta' 0,010 % jew aktar tal-piż skont il-piż tal-prodott finali.

Valutazzjoni u verifika

L-applikant għandu jipprovdi dikjarazzjoni ffirmata ta' konformità mas-subrekwiżiti msemmija hawn fuq, sostnuta b'dikjarazzjonijiet mingħand il-fornituri, jekk ikun xieraq; u din l-evidenza ġustifikattiva li ġejja:

Biex juri l-konformità mar-rekwiżit 1(a)(i), l-applikant għandu jipprovdi l-SDS tal-prodott finali.

Biex juri l-konformità mar-rekwiżiti 1(a)(ii), 1(b) u 1(c), l-applikant għandu jipprovdi:

—	l-SDS tat-taħlitiet miżjuda intenzjonalment u l-konċentrazzjoni tagħhom fil-prodott finali;

—	l-SDS tas-sustanzi miżjuda intenzjonalment u l-konċentrazzjoni tagħhom fil-prodott finali.

Għas-sustanzi eżentati mir-rekwiżit 1(a)(ii) (ara l-Annessi IV u V tar-Regolament (KE) Nru 1907/2006), id-dikjarazzjoni mingħand l-applikant għandha tkun biżżejjed għall-konformità.

Għar-rekwiżit 1(c), fid-data tal-applikazzjoni għandha ssir referenza għall-aħħar lista tas-sustanzi ta' tħassib serju ħafna.

L-evidenza ta' hawn fuq tista' tingħata direttament lil Korpi Kompetenti minn kwalunkwe fornitur fil-katina tal-provvista tal-applikant.

KRITERJU 2 – REKWIŻITI ADDIZZJONALI TAT-TOSSIĊITÀ AKKWATIKA

L-applikant għandu juri l-konformità billi jissodisfa r-rekwiżiti tal-kriterju 2.1 jew tal-kriterju 2.2.

2.1.   Rekwiżiti għal-lubrikant u l-komponenti ewlenin tiegħu

Il-konċentrazzjoni kritika għat-tossiċità akkwatika għal-lubrikant preparat frisk kif ukoll għal kull komponent ewlieni ma għandhiex tkun inqas mill-valuri mogħtija fit-Tabella 2.

Komponent ewlieni tfisser kwalunkwe sustanza li tammonta għal aktar minn 5 % skont il-piż tal-lubrikant.

Tabella 2

Valuri tat-tossiċità akkwatika għal-lubrikant preparat frisk kif ukoll għal kull komponent ewlieni

		ALL	PLL	TLL
Tossiċità akkwatika għal-lubrikant preparat frisk	Konċentrazzjoni kritika għat-tossiċità akkwatika akuta JEW	> 100 mg/L	> 1 000 mg/L	> 1 000 mg/L
	Tossiċità akkwatika kronika	> 10 mg/L	> 100 mg/L	> 100 mg/L
Tossiċità akkwatika għal kull komponent ewlieni	Konċentrazzjoni kritika għat-tossiċità akkwatika akuta JEW	> 100 mg/L
	Tossiċità akkwatika kronika	> 10 mg/L

Għandha tingħata d-data disponibbli tat-testijiet dwar it-tossiċità akkwatika akuta għal kull komponent ewlieni għal kull wieħed miż-żewġ livelli trofiċi li ġejjin:

—	krustaċji (id-dafnja hi ppreferuta),

—	pjanti akkwatiċi (l-alga hi ppreferuta).

Jekk id-data tat-testijiet dwar it-tossiċità akkwatika akuta tkun nieqsa f'wieħed jew fiż-żewġ livelli trofiċi, għandha tiġi aċċettata d-data disponibbli tat-testijiet dwar it-tossiċità akkwatika kronika għall-krustaċji (id-dafnja hi ppreferuta) flimkien mal-livell trofiku tal-ħut.

Il-QSARs jistgħu jintużaw biex jimtlew id-distakki fid-data dwar it-tossiċità kronika jew dwar it-tossiċità akuta f'waħda biss mil-livelli trofiċi rilevanti.

Jekk id-data tat-testijiet imsemmija hawn fuq ma tkunx disponibbli għal kull komponent ewlieni, għandu jsir test biex tiġi ġġenerata d-data dwar it-tossiċità akuta għal-livelli trofiċi neqsin (jiġifieri tal-krustaċji u/jew tal-pjanti akkwatiċi).

Għandha tingħata d-data disponibbli dwar it-tossiċità akkwatika akuta għal kull wieħed mit-tliet livelli trofiċi li ġejjin:

—	krustaċji (id-dafnja hi ppreferuta),

—	pjanti akkwatiċi (l-alga hi ppreferuta),

—

ħut.

Jekk id-data tat-testijiet dwar it-tossiċità akkwatika akuta għal-lubrikant applikat ma tkunx disponibbli għal xi wieħed mil-livelli trofiċi msemmija, għandha tiġi aċċettata d-data disponibbli tat-testijiet dwar it-tossiċità akkwatika kronika għal-livelli trofiċi neqsin.

Jekk id-data msemmija hawn fuq ma tkunx disponibbli għal-lubrikant applikat, għandu jsir test biex tiġi ġġenerata data dwar it-tossiċità akkwatika akuta għal-livelli trofiċi neqsin.

2.2.   Ir-rekwiżit għal kull sustanza miżjuda jew iffurmata intenzjonalment b'konċentrazzjoni ta' 0,10 % jew aktar tal-piż skont il-piż fil-prodott finali

Is-sustanzi li juru ċertu grad ta' tossiċità akkwatika huma permessi sa konċentrazzjoni kumulattiva tal-massa kif indikat fit-Tabella 3.

Tabella 3

Limiti perċentwali kumulattivi tal-massa (% w/w) għas-sustanzi preżenti fil-prodott b'rabta mat-tossiċità akkwatika

	Persentaġġi kumulattivi tal-massa (% tal-piż skont il-piż fil-prodott finali)
	ALL	PLL	TLL
Tossiċità akkwatika akuta > 100 mg/L jew Tossiċità akwatika kronika > 10 mg/L	Mhux limitat
Tossiċità akkwatika akuta > 10 sa ≤ 100 mg/L jew 1 mg/L< Tossiċità akwatika kronika≤ 10 mg/L	≤ 10 (≤ 20 għall-griżijiet ALL)	≤ 10 (≤ 15 għall-griżijiet PLL)	≤ 2 (≤ 10 għall-griżijiet TLL)
Tossiċità akkwatika akuta > 1 għal ≤ 10 mg/L jew 0,1 mg/L< Tossiċità akkwatika kronika ≤ 1 mg/L	≤ 2,5 (≤ 1 għall-griżijiet ALL)	≤ 0,6	≤ 0,4
Tossiċità akwatika akuta ≤ 1 mg/L jew Tossiċità akkwatika akuta ≤ 0,1 mg/L	≤ 0,1/M (*1)	≤ 0,1/M (*1)	≤ 0,1/M (*1)

Id-data disponibbli tat-testijiet dwar it-tossiċità akkwatika kronika għal kull sustanza (sustanzi miżjuda jew iffurmati intenzjonalment b'konċentrazzjoni ta' 0,10 % jew aktar tal-piż skont il-piż fil-prodott finali) għandha tingħata għal kull wieħed miż-żewġ livelli trofiċi li ġejjin:

—	krustaċji (id-dafnja hi ppreferuta),

—

ħut.

Jekk id-data disponibbli tat-testijiet dwar it-tossiċità akkwatika kronika tkun nieqsa f'wieħed mil-livelli trofiċi jew fit-tnejn, għandha tiġi aċċettata d-data disponibbli dwar it-tossiċità akkwatika akuta għaż-żewġ livelli trofiċi tal-krustaċji (id-dafnja hi ppreferuta) u tal-pjanti akkwatiċi (l-alga hi ppreferuta).

Il-QSARs jistgħu jintużaw biex jimtlew id-distakki fid-data dwar it-tossiċità kronika jew dwar it-tossiċità akuta f'waħda biss mil-livelli trofiċi rilevanti.

Jekk id-data msemmija hawn fuq ma tkunx disponibbli għal kull sustanza, għandu jsir test biex tiġi ġġenerata data dwar it-tossiċità akuta fil-livelli trofiċi neqsin (jiġifieri tal-krustaċji u/jew tal-pjanti akkwatiċi).

Valutazzjoni u verifika tal-kriterju 2.1 u tal-kriterju 2.2

Fil-każ ta' awtovalutazzjoni mill-applikant, għal kull sustanza, il-komponent ewlieni jew għal-lubrikant, l-applikant għandu jipprovdi rapporti tat-testijiet jew data mil-letteratura, inkluż ir-referenzi li juru l-konformità mar-rekwiżiti stabbiliti fis-sottokriterju 2.1 jew fis-sottokriterju 2.2.

Għal kull sustanza jew il-komponent ewlieni, meta l-valutazzjoni tkun ibbażata fuq ittra ta' konformità (LoC) valida, għandha tingħata kopja tal-ittra. Għal kull sustanza jew il-komponent ewlieni magħżula mil-lista tal-Klassifikazzjoni tas-Sustanzi tal-Lubrikanti (il-lista LuSC), il-valutazzjoni tista' tkun ibbażata fuq l-informazzjoni rrapportata f'din il-lista u ma hemm bżonn jitressaq l-ebda dokument.

Tiġi aċċettata d-data dwar it-tossiċità tal-baħar jew dwar it-tossiċità tal-ilma ħelu.

Id-data dwar it-tossiċità akkwatika akuta (disponibbli jew iġġenerata għall-applikazzjoni) għandha toriġina minn testijiet li jsiru skont:

—	ISO 10253 jew ISO 8692 jew il-Linja Gwida 201 tal-OECD għat-Testijiet jew il-Parti C.3 tal-Anness tar-Regolament tal-Kummissjoni (KE) Nru 440/2008 (7) għall-alga,

—	ISO 6341 jew OECD jew il-Linja Gwida 202 tal-OECD għat-Testijiet jew il-Parti C.2 tal-Anness tar-Regolament (KE) Nru 440/2008 għad-dafnja.

—	ISO 7346 jew il-Linja Gwida 203 tal-OECD għat-Testijiet jew il-Parti C.1 tal-Anness tar-Regolament (KE) Nru 440/2008 għall-ħut (din tapplika biss għad-data eżistenti disponibbli).

—	it-test dwar it-tossiċità fuq l-embrijuni tal-ħut (FET) (alternattiva li ma tinvolvix l-użu tal-annimali) skont il-Linja Gwida 236 tal-OECD għat-Testijiet jew il-Parti C.49 tal-Anness tar-Regolament (KE) Nru 440/2008 għall-ħut (din tapplika biss meta jkun hemm bżonn isir test għall-applikazzjoni).

Tiġi aċċettata biss tossiċità akkwatika akuta ta' (72 jew 96 hr) ErC50 għall-alga, (48hr) EC50 għad-dafnja u (96hr) LC50 għall-ħut.

Id-data (disponibbli) dwar it-tossiċità akkwatika kronika għandha toriġina minn testijiet li jsiru skont:

—	ISO 10253 jew ISO 8692 jew il-Linja Gwida 201 tal-OECD għat-Testijiet jew il-Parti C.3 tal-Anness tar-Regolament (KE) Nru 440/2008 għall-alga.

—	Il-Parti C.20 tal-Anness tar-Regolament (KE) Nru 440/2008 jew il-Linja Gwida 211 tal-OECD għat-Testijiet għad-dafnja,

—	Il-Linja Gwida 215 tal-OECD għat-Testijiet jew il-Parti C.14 tal-Anness tar-Regolament (KE) Nru 440/2008 jew ISO 12890 jew il-Linja Gwida 212 tal-OECD għat-Testijiet jew il-Parti C.15 tal-Anness tar-Regolament (KE) Nru 440/2008 jew il-Linja Gwida 210 tal-OECD għat-Testijiet għall-ħut.

Għandha tiġi aċċettata biss id-data dwar it-tossiċità kronika fil-forma ta' Konċentrazzjoni Bla Effett Osservat (NOEC).

Meta l-QSARs jintużaw biex jimtlew id-distakki fid-data, l-applikant għandu jipprovdi t-tbassir iġġenerat għall-kimika mmirata. Ir-riżultati tal-(Q)SARs għandhom jiġu aċċettati biss jekk l-applikant jipprovdi dokumentazzjoni dwar il-validità u d-dominju tal-applikabbiltà tal-mudell applikat.

Fil-każ ta' sustanzi jew taħlitiet li ftit jinħallu (< 10 mg/L), għad-determinazzjoni tat-tossiċità akkwatika jista' jintuża l-metodu tal-Frazzjoni Akkomodata mill-Ilma (WAF). Il-livell tat-tagħbija stabbilit li jissejjaħ LL50 relatat mat-tagħbija letali jew EL50 relatat mat-tagħbija effettiva għat-tossiċità akkwatika akuta u NOELR relatat mar-rata tat-tagħbija mingħajr effett osservabbli għat-tossiċità akkwatika kronika, jista' jintuża direttament fil-kriterji tal-klassifikazzjoni. Il-preparazzjoni ta' Frazzjoni Akkomodata mill-Ilma għandha timxi mar-rakkomandazzjonijiet stabbiliti f'xi waħda mil-linji gwida li ġejjin: L-Appendiċi C tar-Rapport Tekniku Nru 26 tal-ECETOC (1996), id-Dokument Gwida tal-2002 tal-OECD dwar l-Ittestjar tat-Tossiċità Akkwatika ta' Sustanzi u Taħlitiet Diffiċli (is-Sensiela tal-OECD dwar l-Ittestjar u l-Evalwazzjoni, Nru 23), ISO 5667-16, Il-kwalità tal-ilma – Teħid ta' kampjuni – il-Parti 16 (Gwida dwar it-testijiet bijoloġiċi tal-kampjuni), ASTM D6081-98 (Prattika Standard għall-Ittestjar tat-Tossiċità Akkwatika għal-Lubrikanti: Preparazzjoni tal-Kampjun u Interpretazzjoni tar-Riżultati) jew metodi ekwivalenti. Barra minn hekk, demostrazzjoni tan-nuqqas ta' tossiċità għal sustanza fil-limiti tagħha ta' solubbiltà fl-ilma għandha titqies li tissodisfa r-rekwiżiti ta' dan il-kriterju.

Is-sustanzi li ġejjin huma eżentati mir-rekwiżiti 2.1 u 2.2:

—	kwalunkwe sustanza li aktarx ma taqsamx il-membrani bijoliġiċi MM > 800 g/mol u b'dijametru molekulari > 1,5 nm (> 15 Å), jew

—	kwalunkwe sustanza li hi polimeru u li l-frazzjoni tal-piż molekulari tagħha anqas minn 1 000 g/mol tkun anqas minn 1 %, jew

—	kwalunkwe sustanza li ftit li xejn tinħall fl-ilma (solubbiltà fl-ilma < 10 μg/l)

Is-solubbiltà tas-sustanzi fl-ilma għandha tiġi determinata, meta xieraq, skont il-Linja Gwida 105 tal-OECD għat-Testijiet jew il-Parti A.6 tal-Anness tar-Regolament (KE) Nru 440/2008 jew b'metodi tal-ittestjar ekwivalenti.

Il-frazzjoni tal-piż molekulari anqas minn 1 000 g/mol għandha tiġi determinata skont il-Parti A.19 tal-Anness tar-Regolament (KE) Nru 440/2008 jew skont il-Linja Gwida 119 tal-OECD għat-Testijiet jew b'metodi tal-ittestjar ekwivalenti.

KRITERJU 3 – IL-BIJODEGRADIBBILTÀ U L-POTENZJAL TA' BIJOAKKUMULAZZJONI

Ir-rekwiżiti għall-bijodegradibbiltà tal-komposti organiċi u l-potenzjal ta' bijoakkumulazzjoni għandhom jiġu ssodisfati minn kull sustanza miżjuda intenzjonalment jew iffurmata intenzjonalment f'konċentrazzjoni ta' 0,10 % jew aktar, ta' piż skont il-piż fil-prodott finali.

Il-lubrikant ma għandux ikun fih sustanzi li huma kemm mhux bijodegradabbli u (potenzjalment) bijoakkumulattivi. Madankollu, il-lubrikant jista' jkun fih sustanza waħda jew aktar b'ċertu grad ta' degradibbiltà jew potenzjal ta' bijoakkumulazzjoni jew b'bijoakkumulazzjoni attwali sa konċentrazzjoni kumulattiva tal-massa kif indikat fit-Tabella 4.

Tabella 4

Limiti perċentwali kumulattivi tal-massa (% w/w) għas-sustanzi preżenti fil-prodott b'rabta mal-bijodegradabbiltà tagħhom u l-potenzjal ta' bijoakkumulazzjoni

	ALL	PLL	TLL	Griżijiet (ALL,PLL,TLL)
Bijodegradibbli aerobikament faċilment	> 90	> 75	> 95	> 80
Bijodegradibbli aerobikament b'mod inerenti	≤ 10	≤ 25	≤ 5	≤ 20
Mhux bijodegradabbli u mhux bijoakkumulattiv	≤ 5	≤ 20	≤ 5	≤ 15
Mhux bijodegradabbli u bijoakkumulattiv	≤ 0,1	≤ 0,1	≤ 0,1	≤ 0,1

Valutazzjoni u verifika

Għal kull sustanza, meta l-valutazzjoni ssir mill-applikant, għandhom jingħataw ir-rapporti tat-testijiet jew id-data mil-letteratura, inkluż ir-referenzi dwar il-bijodegradabbiltà u meta meħtieġ dwar il-(potenzjal ta') bijoakkumulazzjoni.

Għal kull sustanza, meta l-valutazzjoni tkun ibbażata fuq ittra ta' konformita (LoC) valida, għandha tingħata biss kopja tal-ittra.

Għal kull sustanza magħżula mil-lista tal-Klassifikazzjoni tas-Sustanzi tal-Lubrikanti (il-lista LuSC), il-valutazzjoni tista' tkun ibbażata fuq l-informazzjoni rrapportata f'din il-lista u ma hemm bżonn jitressaq l-ebda dokument.

Bijodegradazzjoni

“ Bijodegradabbli b'mod inerenti ” tfisser sustanza li tikseb dan il-livell ta' degradazzjoni li ġej:   > 70 % wara 28 jum għat-test tad-degradazzjoni inerenti, jew   > 20 % iżda < 60 % wara 28 jum fit-testijiet ibbażati fuq tnaqqis tal-ossiġenu jew ġenerazzjoni tad-diossidu tal-karbonju. Il-bijodegradabbiltà inerenti għandha titkejjel skont it-testijiet li ġejjin: — Ir-Regolament (KE) Nru 440/2008 (il-Parti C.9 tal-Anness), 302 tal-OECD, jew metodi ekwivalenti. — testijiet ibbażati fuq it-tnaqqis tal-ossiġenu jew il-ġenerazzjoni tad-dijossidu tal-karbonju: Ir-Regolament (KE) Nru 440/2008 (il-Parti C.4 tal-Anness), 306 tal-OECD, 310 tal-OECD, jew metodi ekwivalenti.

“ Bijodegradabbli b'mod faċli ” tfisser klassifikazzjoni arbitrarja tal-kimiki li għaddew minn ċerti testijiet ta' skrinjar speċifikati għal bijodegradabbiltà finali; dawn it-testijiet huma tant stretti li hu preżunt li dawn il-komposti se jiġu bijodegradati malajr u għalkollox fl-ambjenti akkwatiċi f'kundizzjonijiet aerobiċi. Is-sustanzi huma meqjusa li se jiġu degradati malajr fl-ambjent jekk xi wieħed minn dawn il-kriterji jiġi ssodisfat: 1. jekk, fi studji tal-bijodegradazzjoni faċli fi 28 jum, jinkisbu mill-anqas dawn il-livelli ta' degradazzjoni li ġejjin: — testijiet ibbażati fuq karbonju organiku maħlul: 70 %; — testijiet ibbażati fuq it-tnaqqis tal-ossiġenu jew il-ġenerazzjoni tad-dijossidu tal-karbonju: 60 % tal-massimu teoretiku. Dawn il-livelli ta' bijodegradazzjoni jridu jinkisbu fi żmien għaxart (10) ijiem mill-bidu tad-degradazzjoni liema punt jittieħed bħala l-waqt meta jkunu ġew degradati 10 % tas-sustanza, diment li s-sustanza tiġi identifikata bħala UVCB jew bħala sustanza multikostitwenti kumplessa b'komponenti strutturalment simili. F'dan il-każ, u meta jkun hemm ġustifikazzjoni biżżejjed, il-kundizzjoni tal-perjodu ta' 10 ijiem tista' tiġi rinunzjata u l-livell rikjest jiġi applikat wara 28 jum; jew 2. jekk, f'dawk il-każijiet, meta tkun disponibbli biss data BOD u COD, meta l-proporzjon ta' BOD5/COD ikun ≥ 0,5; jew 3. jekk ikun hemm evidenza xjentifika konvinċenti oħra disponibbli li turi li s-sustanza tista' tiġi degradata (b'mod bijotiku u/jew abijotiku) fl-ambjent akkwatiku sa livell > 70 % fi żmien 28 jum. Il-bijodegradabbiltà faċli għandha titkejjel skont it-testijiet li ġejjin: — Ir-Regolament (KE) Nru 440/2008 (il-Partijiet C.4, C.5 flimkien ma' C.6 u C.42 tal-Anness), 301 tal-OECD, 306 tal-OECD, 310 tal-OECD, jew metodi ekwivalenti. Nota: Fil-qafas ta' dan il-kriterju, il-prinċipju tal-perjodu ta' 10 ijiem mhux bilfors ikun japplika. Jekk is-sustanza tilħaq il-livell rikjest ta' bijodegradazzjoni fi żmien 28 jum iżda mhux fil-perjodu ta' 10 ijiem, tiġi preżunta rata ta' degradazzjoni aktar bil-mod.

“ Mhux bijodegradabbli ” tfisser sustanza li ma tissodisfax il-kriterji għal bijodegradabbiltà finali u inerenti. L-applikant jista' juża wkoll data read-across biex jistima l-bijodegradabbiltà ta' sustanza. “Read-across” għall-valutazzjoni tal-bijodegradabbiltà ta' sustanza għandha tkun aċċettabbli jekk is-sustanza ta' referenza tkun differenti bi grupp funzjonali wieħed biss jew bi framment wieħed mis-sustanza applikata fil-prodott. Jekk is-sustanza ta' referenza tkun bijodegradabbli faċilment jew b'mod inerenti u l-grupp funzjonali jkollu effett pożittiv fuq il-bijodegradabbiltà aerobika, allura s-sustanża applikata tista' titqies ukoll li hi bijodegradabbli faċilment jew b'mod inerenti. Gruppi funzjonali jew frammenti b'effett pożittiv fuq il-bijodegradazzjoni huma: l-alkoħol alifatiku u aromatiku [-OH], l-aċidu alifatiku u aromatiku [-C(= O)-OH], l-aldeid [-CHO], l-ester [-C(= O)-O-C], l-amidu [-C(= O)–N jew -C(= S)–N]. Għandha tingħata dokumentazzjoni xierqa u affidabbli dwar l-istudju fuq is-sustanza ta' referenza. Fil-każ ta' tqabbil ma' framment mhux inkluż hawn fuq, jenħtieġ tingħata dokumentazzjoni xierqa u affidabbli dwar l-istudji fuq l-effetti pożittivi tal-grupp funzjonali fuq il-bijodegradazzjoni ta' sustanzi strutturalment simili.

Il-bijoakkumulazzjoni

Il-(potenzjal ta') bijoakkumulazzjoni ma hemmx għalfejn jiġi stabbilit meta s-sustanza:

—	ikollha MM > 800 g/mol u dijametru molekulari > 1,5 nm (> 15 Å), jew

—	ikollha koeffiċjent tal-parti tal-ottanol-ilma, log Kow, valur < 3 jew > 7, jew

—	ikollha BCF imkejjel ta' ≤ 100 L/kg, jew

—	tkun polimeru u l-frazzjoni tal-piż molekulari tagħha anqas minn 1 000 g/mol tkun inqas minn 1 %.

Il-biċċa l-kbira tas-sustanzi użati fil-lubrikanti huma idrofobiċi ferm u għaldaqstant il-valur tal-fattur tal-bijokonċentrazzjoni (BCF) jenħtieġ ikun ibbażat fuq il-kontenut tal-piż lipidu u għandha tingħata attenzjoni biex ikun żgurat biżżejjed ħin ta' espożizzjoni. Il-fattur tal-bijokonċentrazzjoni (BCF) għandu jiġi vvalutat skont il-Part C.13 tal-Anness tar-Regolament (KE) Nru 440/2008, jew metodi tal-ittestjar ekwivalenti.

Il-koeffiċjenti log tal-parti ottanol/ilma (log Kow) għandu jiġu vvalutat skont il-Parti A.8 tal-Anness tar-Regolament (KE) Nru 440/2008 jew 123 tal-OECD, jew metodi tal-ittestjar ekwivalenti. Fil-każ ta' sustanza organika differenti minn aġent tensjoattiv, meta l-ebda valur esperimentali ma jkun disponibbli, jista' jintuża metodu tal-kalkolu. Huma permessi dawn il-metodi tal-kalkolu li ġejjin: CLOGP, LOGKOW, (KOWWIN) u SPARC. Il-valuri log Kow stmati miksuba b'xi wieħed minn dawn il-metodi tal-kalkolu < 3 jew > 7, jindikaw li s-sustanza mhix mistennija tagħmel bijoakkumulazzjoni.

Il-valuri log Kow huma applikabbli biss għall-kimiċi organiċi. Biex jiġi vvalutat il-potenżjal ta' bijoakkumulazzjoni ta' komposti mhux organiċi, aġenti tensjoattivi u xi komposti organometalliċi, għandu jsir kejl BCF.

KRITERJU 4 – REKWIŻITI TAL-INGREDJENTI RINNOVABBLI

(a)

Fil-każ speċifiku ta' ingredjenti rinnovabbli miż-żejt tal-palm jew miż-żejt tal-qalba tal-palm, jew derivati miż-żejt tal-palm jew miż-żejt tal-qalba tal-palm, 100 % w/w tal-ingredjenti rinnovabbli użati għandhom jissodisfaw ir-rekwiżiti għall-produzzjoni sostenibbli ta' skema taċ-ċertifikazzjoni li hi organizzazzjoni ta' diversi partijiet konċernati bi sħubija wiesgħa, inkluż NGOs, l-industrija u l-gvern u li tindirizza l-impatti ambjentali fuq il-ħamrija, il-bijodiversità, il-ħażniet tal-karbonju organiku u l-konservazzjoni tar-riżorsi naturali.

(b)	Jekk jintuża t-terminu “b'bażi bijoloġika” jew “bijolubrikant”, il-kontenut minimu tal-karbonju b'bażi bijoloġika fil-prodott finali għandu jkun ta' 25 % skont EN 16807.

Valutazzjoni u verifika

Biex tintwera l-konformità mal-kriterji 4(a), għandha tingħata evidenza permezz ta' ċertifikati tal-katina tal-kustodja tal-partijiet terzi li l-materjali użati fil-manifattura joriġinaw minn pjantaġġuni ġestiti b'mod sostenibbli. Għandhom jiġu aċċettati ċ-ċertifikati dwar iż-Żejt tal-Palma Sostenibbli (RSPO) jew iċ-ċertifikati ta' xi skema tal-produzzjoni sostenibbli ekwivalenti jew aktar stretti li juru l-konformità ma' xi wieħed minn dawn il-mudelli li ġejjin: identità ppriżervata, segregata, il-bilanċ tal-massa. Għad-derivati taż-żejt tal-palm u taż-żejt tal-qalba tal-ġewż, għandhom jingħataw l-ammonti ta' krediti mixtrija u dikjarati fil-mudell tas-sistema PalmTrace tal-RSPO waqt l-aktar perjodu ta' negozjar annwali riċenti, ħalli tintwera l-konformità mal-mudell tal-katina tal-provvista Book & Claim.

Biex juri l-konformità mal-kriterji 4(b), l-applikant għandu jehmeż ir-rapport tat-testijiet tal-prodott finali skont EN 16807, ASTM D 6866, DIN CEN/TS 16137 (SPEC 91236), EN 16640 jew EN 16785-1.

KRITERJU 5 – IR-REKWIŻITI TAL-IMBALLAĠĠ/TAL-KONTENITUR

(a)	Il-kontenut riċiklat (applikabbli biss fil-każ ta' lubrikanti mibjugħa f'imballaġġi/kontenituri tal-plastik): l-imballaġġ/kontenitur tal-plastik għandu jkun magħmul minn minimu ta' 25 % ta' plastik diġà użat mill-konsumatur.

(b)	Id-disinn (applikabbli biss fil-każ ta' lubrikanti maħsuba biex jinbiegħu lil konsumaturi finali privati): l-imballaġġ/kontenitur jenħtieġ ikollu sistema xierqa (eż. sistemi ta' estensjoni jew ftuħ dejjaq) ħalli waqt l-użu jkun evitat it-tixrid.

Valutazzjoni u verifika

L-applikant għandu jipprovdi din l-evidenza, kif applikabbli:

Il-kompożizzjoni tal-imballaġġ/kontenitur tal-plastik u l-proporzjonijiet ta' materjal verġni u materjal riċiklat. Jekk ikun meħtieġ, għandha tiġi inkluża dikjarazzjoni ta' konformità mingħand il-fornitur tal-imballaġġ/kontenitur tal-plastik.

Plastik diġà użat mill-konsumatur tfisser il-plastik iġġenerat mill-unitajiet domestiċi jew mill-faċilitajiet kummerċjali, industrijali u istituzzjonali meta jkunu utenti finali tal-prodott li ma jistax jibqa' jintuża iżjed għall-iskop maħsub tiegħu. Dan jinkludi l-plastik irritornat mill-katina tad-distribuzzjoni.

Il-plastik diġà użat mill-konsumatur għandu jiġi kkalkulat kif indikat hawn taħt. Peress li ma hemm l-ebda metodu disponibbli li jkejjel direttament il-kontenut riċiklat fi prodott jew f'imballaġġ, għandha tintuża l-massa ta' plastik miksub mill-proċess tar-riċiklaġġ, wara t-telf u devjazzjonijiet oħra.

X(%) = A/P × 100

Fejn:

X hu l-kontenut riċiklat (diġà użat mill-konsumatur)

A hi l-massa tal-plastik riċiklat (diġà użat mill-konsumatur)

P hi l-massa tal-imballaġġ/kontenitur

Għandha tingħata deskrizzjoni tad-disinn tal-imballaġġ/kontenitur, flimkien ma' ritratti jew disinji tekniċi.

KRITERJU 6 – IL-PRESTAZZJONI TEKNIKA MINIMA

Il-prodott lubrikanti għandu jkun konformi mar-rekwiżiti korrispondenti tal-prestazzjoni teknika minima kif speċifikat fit-Tabella 5.

Tabella 5

Il-prestazzjoni teknika minima għall-prodotti lubrikanti

Kategorija tal-lubrikant	Prestazzjoni teknika minima
Żjut tas-srieraq bil-katina	Test tal-KWF bil-verżjoni tal-2017 jew ekwivalenti
— Lubrikanti tal-ħbula tal-wajer — Aġenti tar-rilaxx tal-konkrit — Lubrikanti oħrajn ta' telf totali — Żjut tat-tubu tal-poppa — Fluwidi tax-xogħol tal-metall	“Xieraq għall-iskop maħsub” murija minn tal-inqas “approvazzjoni tal-klijenti tal-applikant” waħda.
Żejt tal-gerijiet	żjut tal-gerijiet (gerijiet magħluqa): ISO 12925-1 jew DIN 51517 (it-Taqsima I, II jew III) żjut tal-gerijiet (gerijiet miftuħa): “Xieraq għall-iskop maħsub” murija minn tal-inqas “approvazzjoni tal-klijenti tal-applikant” waħda.
Żjut two-stroke	two-stroke fuq il-baħar: NMMA TC-W3 two-stroke fuq l-art: ISO 13738 (EGD)
Sistemi idrawliċi	ISO 15380 (it-Tabelli 2 sa 5) Fluwidi idrawliċi reżistenti għan-nar: ISO 15380 (it-Tabelli 2 sa 5) + ISO 12922 (it-Tabella 1 sa 3) jew Approvazzjoni Reċiproka tal-Fabbrika
Protezzjoni temporanja kontra l-korrużjoni	ISO/TS 12928 jew “Xieraq għall-iskop maħsub” murija minn tal-inqas “approvazzjoni tal-klijenti tal-applikant” waħda.
Griżijiet lubrikanti	Griżijiet għal protezzjoni temporanja kontra l-korrużjoni: ISO/TS 12928 jew “Xieraq għall-iskop maħsub” murija minn tal-inqas “approvazzjoni tal-klijenti tal-applikant” waħda. Griżijiet għal gerijiet magħluqa: DIN 51826 Griżijiet għar-roller bearings, għall-plain berings u għall-uċuħ li jiżżerżqu: DIN 51825 Il-griżijiet l-oħra kollha: ISO 12924 jew “Xieraq għall-iskop maħsub” murija minn tal-inqas “approvazzjoni tal-klijenti tal-applikant” waħda.

Nota: Il-griżijiet ta' diversi skopijiet li jinkludu kwalunkwe waħda mill-applikazzjonijiet speċifikati hawn fost l-użi potenzjali tagħhom għandhom jiġu ttestjati skont it-test korrispondenti speċifiku tal-applikazzjoni speċifikata rilevanti.

Valutazzjoni u verifika

L-applikant għandu jipprovdi dikjarazzjoni ta' konformità ma' dan il-kriterju, sostnuta mir-riżultati tat-testijiet, meta xieraq.

Għas-sistemi idrawliċi, il-folja tal-informazzjoni tal-prodott għandha tindika liema elastomeri ġew ittestjati.

Approvazzjoni tal-klijenti tal-applikant tfisser ittra/dokument/dikjarazzjonijiet maħruġa mill-klijenti għal prodott speċifiku, li jiżguraw li l-prodott jissodisfa l-ispeċifikazzjonijiet tagħhom u jaħdem sew fl-applikazzjoni maħsuba tiegħu.

KRITERJU 7 – INFORMAZZJONI LILL-KONSUMATUR DWAR L-UŻU U R-RIMI

Jekk il-lubrikanti jkunu maħsuba biex jinbiegħu lil konsumaturi finali privati, l-imballaġġ/kontenitur għandu juri din l-informazzjoni li ġejja (f'forma testwali jew pittogrammi) (jistgħu jintużaw formulazzjonijiet ta' test komparabbli):

“Tħallix il-prodott mhux użat jixtered fl-ambjent”,

“Ir-residwi tal-prodott u l-imballaġġ/kontenitur għandhom jintremew f'postijiet tal-ġbir apposta”.

Valutazzjoni u verifika

L-applikant għandu jipprovdi kampjun tal-imballaġġ/kontenitur tal-prodott jew grafika tiegħu fejn tkun qed tidher din l-informazzjoni msemmija hawn fuq.

KRITERJU 8 – L-INFORMAZZJONI LI TIDHER FUQ L-EKOTIKKETTA TAL-UE

It-tikketta fakultattiva b'kaxxa għall-kitba tista' tinkludi dan it-test:

(a)	“Sustanzi inqas perikolużi li jispiċċaw fl-ambjent”,

(b)	“Prestazzjoni verifikata”

(c)	“X% tal-ingredjenti rinnovabbli ċċertifikati użati” (fejn rilevanti) (8),

Il-linji gwida għall-użu tat-tikketta fakultattiva b'kaxxa għall-kitba jinsabu fil-Linji Gwida għall-Użu tal-Logo tal-Ekotikketta tal-UE, fuq is-sit web:

http://ec.europa.eu/environment/ecolabel/documents/logo_guidelines.pdf

Valutazzjoni u verifika

L-applikant għandu jipprovdi kampjun tat-tikketta. Jekk tintuża d-dikjarazzjoni c), l-applikant għandu jipprovdi ċ-ċertifikat(i) rilevanti relatati mal-persentaġġ tal-ingredjent(i) rinnovabbli ċċertifikati użati.

---

(1)  Ir-Regolament (KE) Nru 765/2008 tal-Parlament Ewropew u tal-Kunsill tad-9 ta' Lulju 2008 li jistabbilixxi r-rekwiżiti għall-akkreditament u għas-sorveljanza tas-suq relatati mal-kummerċjalizzazzjoni ta' prodotti, u li jħassar ir-Regolament tal-Kunsill (KEE) Nru 339/93 (ĠU L 218, 13.8.2008, p. 30).

(2)  http://ec.europa.eu/environment/ecolabel/

(3)  Ir-Regolament (KE) Nru 1907/2006 tal-Parlament Ewropew u tal-Kunsill tat-18 ta' Diċembru 2006 dwar ir-reġistrazzjoni, il-valutazzjoni, l-awtorizzazzjoni u r-restrizzjoni ta' sustanzi kimiċi (REACH), li jistabbilixxi Aġenzija Ewropea għas-Sustanzi Kimiċi, li jemenda d-Direttiva 1999/45/KE u li jħassar ir-Regolament (KEE) Nru 793/93 tal-Kunsill u r-Regolament (KE) Nru 1488/94 tal-Kummissjoni kif ukoll id-Direttiva 76/769/KEE tal-Kunsill u d-Direttivi 91/155/KEE, 93/67/KEE, 93/105/KE u 2000/21/KE tal-Kummissjoni (ĠU L 396, 30.12.2006, p. 1).

(4)  Ir-Regolament (KE) Nru 1272/2008 tal-Parlament Ewropew u tal-Kunsill tas-16 ta' Diċembru 2008 dwar il-klassifikazzjoni, it-tikkettar u l-imballaġġ tas-sustanzi u t-taħlitiet, li jemenda u jħassar id-Direttivi 67/548/KEE u 1999/45/KE, u li jemenda r-Regolament (KE) Nru 1907/2006 (ĠU L 353, 31.12.2008, p. 1).

(5)  Id-Direttiva 2000/60/KE tal-Parlament Ewropew u tal-Kunsill tat-23 ta' Ottubru 2000 li tistabbilixxi qafas għal azzjoni Komunitarja fil-qasam tal-politika tal-ilma (ĠU L 327, 22.12.2000, p. 1).

(6)  Id-Deċiżjoni Nru 2455/2001/KE tal-Parlament Ewropew u tal-Kunsill tal-20 ta' Novembru 2001 li tistabbilixxi l-lista ta' sustanzi prijoritarji fil-qasam tal-politika tal-ilma u li temenda d-Direttiva 2000/60/KE (ĠU L 331, 15.12.2001, p. 1).

(*1)  Il-fatturi-M għall-komponenti tossiċi ħafna għandhom jiġu applikati skont l-Artikolu 10 tar-Regolament (KE) Nru 1272/2008 kif deskritt fit-taqsima 4.1.3.5.5.5 tal-Anness I ta' dak ir-Regolament.

(7)  Ir-Regolament tal-Kummissjoni (KE) Nru 440/2008 tat-30 ta' Mejju 2008 li jistabbilixxi metodi ta' ttestjar skont ir-Regolament (KE) Nru 1907/2006 tal-Parlament Ewropew u tal-Kunsill dwar ir-reġistrazzjoni, il-valutazzjoni, l-awtorizzazzjoni u r-restrizzjoni ta' sustanzi kimiċi (REACH) (ĠU L 142, 31.5.2008, p. 1).

(8)  Jekk jintużaw ingredjenti rinnovabbli ċċertifikati, irrispettivament mit-tip ta' bijomassa (eż. kolza, ġirasol, palma, soja, eċċ…), jista' jiġi indikat il-kontenut totali tal-ingredjenti ċċertifikati.