|
15.10.2018 |
MT |
Il-Ġurnal Uffiċjali tal-Unjoni Ewropea |
L 258/3 |
DEĊIŻJONI (UE) 2018/1505 TAL-PARLAMENT EWROPEW U TAL-KUNSILL
tat-12 ta’ Settembru 2018
dwar il-mobilizzazzjoni tal-Fond ta’ Solidarjetà tal-Unjoni Ewropea biex tingħata assistenza lill-Bulgarija, lill-Greċja, lil-Litwanja u lill-Polonja
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea,
Wara li kkunsidraw ir-Regolament tal-Kunsill (KE) Nru 2012/2002 tal-11 ta’ Novembru 2002 li jistabbilixxi l-Fond ta’ Solidarjetà tal-Unjoni Ewropea (1), u b’mod partikolari l-Artikolu 4(3) tiegħu,
Wara li kkunsidraw il-Ftehim Interistituzzjonali tat-2 ta’ Diċembru 2013 bejn il-Parlament Ewropew, il-Kunsill u l-Kummissjoni dwar dixxiplina baġitarja, dwar kooperazzjoni f’materji ta’ baġit u dwar ġestjoni finanzjarja tajba (2), u b’mod partikolari l-punt 11 tiegħu,
Wara li kkunsidraw il-proposta mill-Kummissjoni Ewropea,
Billi:
|
(1) |
Il-Fond ta’ Solidarjetà tal-Unjoni Ewropea ("il-Fond") għandu l-għan li jippermetti lill-Unjoni tirrispondi b’mod rapidu, effiċjenti u flessibbli għal sitwazzjonijiet ta’ emerġenza sabiex tintwera solidarjetà mal-popolazzjonijiet tar-reġjuni milquta minn diżastri naturali. |
|
(2) |
Il-Fond ma jridx jaqbeż l-ammont annwali massimu ta’ EUR 500 000 000 (bil-prezzijiet tal-2011), kif stabbilit fl-Artikolu 10 tar-Regolament tal-Kunsill (UE, Euratom) Nru 1311/2013 (3). |
|
(3) |
Fil-11 ta’ Jannar 2018, il-Bulgarija ppreżentat applikazzjoni għall-mobilizzazzjoni tal-Fond, wara l-għargħar ikkawżat minn xita qawwija u maltempati vjolenti fil-25 u s-26 ta’ Ottubru 2017. |
|
(4) |
Fil-11 ta’ Ottubru 2017, il-Greċja ppreżentat applikazzjoni biex timmobilizza l-Fond, wara terremot li affettwa r-reġjun tal-Eġew tan-Nofsinhar u l-gżira ta’ Kos fl-20 ta’ Lulju 2017. |
|
(5) |
Fit-22 ta’ Diċembru 2017, il-Litwanja ppreżentat applikazzjoni għall-mobilizzazzjoni tal-Fond, wara għargħar ikkawżati minn xita kontinwa matul is-sajf u l-ħarifa tal-2017. |
|
(6) |
Fil-25 ta’ Ottubru 2017, il-Polonja ppreżentat applikazzjoni biex timmobilizza l-Fond, wara maltempati eċċezzjonalment vjolenti u x-xita qawwija li seħħew bejn id-9 u t-12 ta’ Awwissu 2017. |
|
(7) |
L-applikazzjonijiet mill-Bulgarija, mill-Greċja, mil-Litwanja u mill-Polonja jissodisfaw il-kundizzjonijiet sabiex tingħata kontribuzzjoni finanzjarja mill-Fond, kif stabbilit fl-Artikolu 4 tar-Regolament (KE) Nru 2012/2002. |
|
(8) |
Għaldaqstant, jenħtieġ li l-Fond jiġi mobilizzat sabiex jipprovdi kontribuzzjoni finanzjarja lill-Bulgarija, lill-Greċja, lil-Litwanja u lill-Polonja. |
|
(9) |
Sabiex jitnaqqas kemm jista’ jkun il-ħin li jieħu l-Fond biex jiġi mobilizzat, jenħtieġ li din id-Deċiżjoni tiġi tapplika mid-data tal-adozzjoni tagħha, |
ADOTTAW DIN ID-DEĊIŻJONI:
Artikolu 1
Għall-baġit ġenerali tal-Unjoni Ewropea għas-sena finanzjarja 2018, il-Fond ta’ Solidarjetà tal-Unjoni Ewropea għandu jiġi mobilizzat sabiex jipprovdi l-ammont ta’ EUR 2 258 225 lill-Bulgarija, EUR 2 535 796 lill-Greċja, EUR 16 918 941 lil-Litwanja u EUR 12 279 244 lill-Polonja, f’approprjazzjonijiet ta’ impenn u ta’ pagament.
Artikolu 2
Din id-deċiżjoni għandha tidħol fis-seħħ fil-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Hija għandha tapplika mit-12 ta’ Settembru 2018.
Magħmul fi Strasburgu, it-12 ta’ Settembru 2018.
Għall-Parlament Ewropew
Il-President
A. TAJANI
Għall-Kunsill
Il-President
K. EDTSTADLER
(1) ĠU L 311, 14.11.2002, p. 3.
(2) ĠU C 373, 20.12.2013, p. 1.
(3) Ir-Regolament tal-Kunsill (UE, Euratom) Nru 1311/2013 tat-2 ta’ Diċembru 2013 li jistabbilixxi l-qafas finanzjarju pluriennali għas-snin 2014-2020 (ĠU L 347, 20.12.2013, p. 884).