(1)

Taħt id-Deċiżjoni tal-Kunsill 2002/917/KE (1), il-Ftehim dwar it-trasport okkażjonali internazzjonali ta' passiġġieri bil-kowċ u bix-xarabank (Ftehim Interbus) (2) ġie konkluż, f'isem l-Unjoni, fit-3 ta' Ottubru 2002 u daħal fis-seħħ fl-1 ta' Jannar 2003 (3).

(2)

Fil-5 ta' Diċembru 2014, il-Kunsill awtorizza lill-Kummissjoni biex tiftaħ negozjati biex jiġi emendat il-Ftehim Interbus bil-għan li jitkabbar l-ambitu ġeografiku tiegħu, biex jippermetti l-adeżjoni tar-Renju tal-Marokk, li bħalissa mhijiex prevista fih. Il-Kummissjoni nnegozjat, f'isem l-Unjoni, Protokoll li jemenda l-Ftehim Interbus billi tiġi estiża l-possibbiltà ta' adeżjoni għar-Renju tal-Marokk (il-“Protokoll”). In-negozjati ġew konklużi fl-10 ta' Novembru 2017.

(3)

L-adeżjoni possibbli tar-Renju tal-Marokk mal-Ftehim Interbus mistennija tikkontribwixxi għall-iżvilupp ta' relazzjonijiet internazzjonali fir-rigward tat-trasport tal-passiġġieri, tat-turiżmu u tal-iskambju kulturali lil hinn minn dawk il-pajjiżi li bħalissa huma Partijiet għall-Ftehim Interbus. Ir-Renju tal-Marokk, li ma jgawdix sħubija sħiħa fil-Konferenza Ewropea tal-Ministri tat-Trasport iżda għandu biss status ta' osservatur, li mhuwiex biżżejjed għall-adeżjoni mal-Ftehim Interbus, għandu jingħata l-opportunità biex jaċċedi għall-Ftehim.

(4)

Għalhekk, il-Protokoll jeħtieġ li jiġi ffirmat f'isem l-Unjoni, suġġett għall-konklużjoni tiegħu f'data iktar tard.