|
2.7.2018 |
MT |
Il-Ġurnal Uffiċjali tal-Unjoni Ewropea |
LI 165/1 |
DEĊIŻJONI TAL-KUNSILL EWROPEW (UE) 2018/937
tat-28 ta' Ġunju 2018
li tistabbilixxi l-kompożizzjoni tal-Parlament Ewropew
IL-KUNSILL EWROPEW,
Wara li kkunsidra t-Trattat dwar l-Unjoni Ewropea, b'mod partikolari l-Artikolu 14(2) tiegħu,
Wara li kkunsidra l-inizjattiva tal-Parlament Ewropew (1),
Wara li kkunsidra l-approvazzjoni tal-Parlament Ewropew (2),
Billi:
|
(1) |
L-ewwel subparagrafu tal-Artikolu 14(2) tat-Trattat dwar l-Unjoni Ewropea (TUE) jistabbilixxi l-kriterji għall-kompożizzjoni tal-Parlament Ewropew, jiġifieri li n-numru tar-rappreżentanti taċ-ċittadini tal-Unjoni ma jisboqx is-seba' mija u ħamsin, apparti l-President, li r-rappreżentanza għandha tkun proporzjonalment digressiva, b'limitu minimu ta' sitt membri għal kull Stat Membru, u li l-ebda Stat Membru ma għandu jiġi allokat aktar minn sitta u disgħin siġġu. |
|
(2) |
L-Artikolu 10 TUE jipprevedi, inter alia, li l-funzjonament tal-Unjoni għandu jkun ibbażat fuq id-demokrazija rappreżentattiva, fejn iċ-ċittadini jkunu rappreżentati direttament fil-livell tal-Unjoni fil-Parlament Ewropew u l-Istati Membri jkunu rappreżentati mill-gvernijiet tagħhom, li huma stess ikunu demokratikament responsabbli lejn il-Parlamenti nazzjonali jew lejn iċ-ċittadini tagħhom, fil-Kunsill. |
|
(3) |
L-Artikolu 14(2) TUE għalhekk japplika fil-kuntest tal-arranġamenti istituzzjonali usa' stabbiliti fit-Trattati, li jinkludu wkoll id-dispożizzjonijiet dwar teħid ta' deċiżjonijiet fil-Kunsill, |
ADOTTA DIN ID-DEĊIŻJONI:
Artikolu 1
Fl-applikazzjoni tal-Artikolu 14(2) TUE, għandhom jiġu rispettati l-prinċipji li ġejjin:
|
— |
l-allokazzjoni tas-siġġijiet fil-Parlament Ewropew għandha tuża b'mod sħiħ il-limitu minimu u dak massimu għal kull Stat Membru stabbiliti mit-TUE, biex ikun rifless kemm jista' jkun possibbli d-daqs tal-popolazzjonijiet rispettivi tal-Istati Membri; |
|
— |
il-proporzjonalità digressiva għandha tiġi ddefinita kif ġej: il-proporzjon bejn il-popolazzjoni u n-numru ta' siġġijiet ta' kull Stat Membru qabel l-arrotondament għal numri sħaħ għandu jvarja skont il-popolazzjonijiet rispettivi tagħhom b'tali mod li kull Membru tal-Parlament Ewropew minn Stat Membru b'popolazzjoni akbar jirrappreżenta aktar ċittadini minn kull Membru tal-Parlament Ewropew minn Stat Membru b'popolazzjoni iżgħar u, bil-maqlub, li aktar ma tkun kbira l-popolazzjoni ta' Stat Membru, akbar ikun id-dritt tiegħu għal numru kbir ta' siġġijiet fil-Parlament Ewropew, |
|
— |
l-allokazzjoni tas-siġġijiet fil-Parlament Ewropew għandha tirrifletti l-iżviluppi demografiċi fl-Istati Membri. |
Artikolu 2
Il-popolazzjoni totali tal-Istati Membri hija kkalkolata mill-Kummissjoni (Eurostat) abbażi tad-data l-aktar reċenti pprovduta mill-Istati Membri, skont metodu stabbilit permezz tar-Regolament (UE) Nru 1260/2013 tal-Parlament Ewropew u tal-Kunsill (3).
Artikolu 3
1. In-numru ta' rappreżentanti fil-Parlament Ewropew eletti f'kull Stat Membru huwa b'dan stabbilit kif ġej għal-leġislatura 2019-2024:
|
Il-Belġju |
21 |
|
Il-Bulgarija |
17 |
|
Ir-Repubblika Ċeka |
21 |
|
Id-Danimarka |
14 |
|
Il-Ġermanja |
96 |
|
L-Estonja |
7 |
|
L-Irlanda |
13 |
|
Il-Greċja |
21 |
|
Spanja |
59 |
|
Franza |
79 |
|
Il-Kroazja |
12 |
|
L-Italja |
76 |
|
Ċipru |
6 |
|
Il-Latvja |
8 |
|
Il-Litwanja |
11 |
|
Il-Lussemburgu |
6 |
|
L-Ungerija |
21 |
|
Malta |
6 |
|
In-Netherlands |
29 |
|
L-Awstrija |
19 |
|
Il-Polonja |
52 |
|
Il-Portugall |
21 |
|
Ir-Rumanija |
33 |
|
Is-Slovenja |
8 |
|
Is-Slovakkja |
14 |
|
Il-Finlandja |
14 |
|
L-Iżvezja |
21 |
2. Madankollu, fl-eventwalità li r-Renju Unit ikun għadu Stat Membru tal-Unjoni fil-bidu tal-leġislatura tal-2019-2024, in-numru ta' rappreżentanti fil-Parlament Ewropew eletti għal kull Stat Membru li jieħdu l-kariga għandu jkun dak previst fl-Artikolu 3 tad-Deċiżjoni tal-Kunsill Ewropew 2013/312/UE (4) sa meta l-ħruġ tar-Renju Unit mill-Unjoni jsir legalment effettiv.
Ladarba l-ħruġ tar-Renju Unit mill-Unjoni jsir legalment effettiv, in-numru ta' rappreżentanti fil-Parlament Ewropew eletti f'kull Stat Membru għandu jkun dak previst fil-paragrafu 1 ta' dan l-Artikolu.
Ir-rappreżentanti kollha fil-Parlament Ewropew li jimlew is-siġġijiet addizzjonali li jirriżultaw mid-differenza bejn in-numru ta' siġġijiet allokati skont l-ewwel u t-tieni subparagrafi għandhom jokkupaw is-siġġijiet tagħhom fil-Parlament Ewropew fl-istess waqt.
Artikolu 4
Fi żmien suffiċjenti qabel il-bidu tal-leġislatura 2024-2029, il-Parlament Ewropew għandu jressaq quddiem il-Kunsill Ewropew, skont l-Artikolu 14(2) TUE, proposta għal allokazzjoni aġġornata tas-siġġijiet fil-Parlament Ewropew.
Artikolu 5
Din id-Deċiżjoni għandha tidħol fis-seħħ fil-jum wara dak tal-pubblikazzjoni tagħha f'Il-Ġurnal Uffiċjali tal-Unjoni Ewropea.
Magħmul fi Brussell, it-28 ta' Ġunju 2018.
Għall-Kunsill Ewropew
Il-President
D. TUSK
(1) Inizjattiva adottata fis-7 ta' Frar 2018 (għadha ma ġietx ippubblikata fil-Ġurnal Uffiċjali).
(2) Kunsens tat-13 ta' Ġunju 2018 (għadu ma ġiex ippubblikat fil-Ġurnal Uffiċjali).
(3) Ir-Regolament (UE) Nru 1260/2013 tal-Parlament Ewropew u tal-Kunsill tal-20 ta' Novembru 2013 dwar statistika demografika Ewropea (ĠU L 330, 10.12.2013, p. 39).
(4) Id-Deċiżjoni tal-Kunsill Ewropew 2013/312/UE tat-28 ta' Ġunju 2013 li tistabbilixxi l-kompożizzjoni tal-Parlament Ewropew (ĠU L 181, 29.6.2013, p. 57).