(1)

Skont l-ewwel subparagrafu tal-Artikolu 4(2) tal-Att ta' Adeżjoni tar-Repubblika tal-Bulgarija u r-Rumanija (“l-Att ta' Adeżjoni tal-2005”), id-dispożizzjonijiet tal-acquis ta' Schengen minbarra dawk elenkati fl-Anness II għal dak l-Att, li għalihom ir-Repubblika tal-Bulgarija (“il-Bulgarija”) u r-Rumanija jaderixxu fil-mument tal-adeżjoni, iridu japplikaw fil-Bulgarija u r-Rumanija skont deċiżjoni tal-Kunsill għal dak l-effett wara verifika li l-kondizzjonijiet meħtieġa għall-applikazzjoni tal-partijiet kollha tal-acquis ta' Schengen ikunu ġew issodisfati.

(2)

Fid-29 ta' Ġunju 2010, il-Kunsill adotta d-Deċiżjoni 2010/365/UE (2). Wara dik id-Deċiżjoni, id-dispożizzjonijiet tal-acquis ta' Schengen relatati mas-Sistema ta' Informazzjoni ta' Schengen (“SIS”) bdew japplikaw għall-Bulgarija u għar-Rumanija mill-15 ta' Ottubru 2010, bl-eċċezzjoni tal-obbligu li jirrifjutaw id-dħul jew is-soġġorn fit-territorju tagħhom għal ċittadini ta' pajjiżi terzi li fir-rigward tagħhom tkun inħarġet twissija minn Stat Membru ieħor għall-finijiet li jiġu rrifjutati d-dħul jew is-soġġorn skont ir-Regolament (KE) Nru 1987/2006 tal-Parlament Ewropew u tal-Kunsill (3) u mal-obbligu li joqogħdu lura milli joħorġu twissijiet tas-SIS u jdaħħlu informazzjoni addizzjonali kif ukoll milli jiskambjaw informazzjoni supplimentari dwar ċittadini ta' pajjiż terz, għall-finijiet li jiġu rrifjutati d-dħul jew is-soġġorn skont ir-Regolament (KE) Nru 1987/2006 (“ir-restrizzjonijiet li fadal”).

(3)

Fid-9 ta' Ġunju 2011, il-Kunsill ikkonkluda, skont il-proċeduri ta' evalwazzjoni ta' Schengen applikabbli, li l-kondizzjonijiet fl-oqsma kollha tal-acquis ta' Schengen li jirrigwardaw il-fruntieri tal-ajru, il-fruntieri tal-art, il-kooperazzjoni tal-pulizija, il-protezzjoni tad-data, is-SIS, il-fruntieri tal-baħar u l-viżi kienu ġew issodisfati mill-Bulgarija u r-Rumanija.

(4)

Fit-12 ta' Ottubru 2017, il-Kunsill adotta d-Deċiżjoni (UE) 2017/1908 (4) li applikat ċerti dispożizzjonijiet tal-acquis ta' Schengen relatati mas-Sistema ta' Informazzjoni dwar il-Viża (“VIS”) fil-Bulgarija u fir-Rumanija, mingħajr preġudizzju għad-deċiżjoni separata tal-Kunsill li trid tiġi adottata b'unanimità skont l-Artikolu 4(2) tal-Att ta' Adeżjoni tal-2005 fir-rigward tat-tneħħija tal-kontrolli fil-fruntieri interni tal-Istati Membri kkonċernati. L-applikazzjoni ta' dawk id-dispożizzjonijiet li tawtorizza lill-Bulgarija u r-Rumanija biex jaċċessaw id-data tal-VIS għall-finijiet ta' konsultazzjoni u f'konformità mal-proċeduri u l-kondizzjonijiet speċifikati f'dik id-Deċiżjoni għandu l-għan li jiffaċilita l-verifiki mill-Bulgarija u r-Rumanija fil-punti ta' qsim tal-fruntiera fuq il-fruntieri esterni tagħhom, li huma fruntieri esterni ta' Schengen, u fit-territorju tagħhom, biex b'hekk jiżdied il-livell ta' sigurtà fiż-żona Schengen u tiġi ffaċilitata l-ġlieda kontra l-kriminalità serja u t-terroriżmu.

(5)

Sabiex jiżdied il-livell ta' sigurtà fiż-żona Schengen u sabiex il-ġlieda kontra l-kriminalità serja u t-terroriżmu ssir aktar effettiva, il-kontrolli mill-Bulgarija u r-Rumanija fuq il-fruntieri esterni tagħhom u fit-territorju tagħhom jenħtieġ li jsiru aktar effettivi billi jinħarġu twissijiet tas-SIS għall-finijiet taċ-ċaħda ta' dħul jew soġġorn u billi jeżegwixxu twissijiet bħal dawn introdotti minn Stati Membri oħra, b'mod partikolari jekk dawn it-twissijiet ikunu bbażati fuq theddida għall-ordni pubbliku jew għas-sigurtà pubblika jew għas-sigurtà nazzjonali. Sabiex jiġi żgurat li l-Bulgarija u r-Rumanija jkollhom l-obbligu li jirrifjutaw id-dħul jew is-soġġorn fit-territorju rispettiv tagħhom għal ċittadini ta' pajjiżi terzi li għalihom tkun inħarġet projbizzjoni fuq id-dħul minn Stat Membru ieħor, kif ukoll l-obbligu li jinħarġu dawn it-twissijiet tas-SIS, huwa xieraq li jitneħħew ir-restrizzjonijiet li fadal dwar l-użu tas-SIS. It-tneħħija ta' dawn ir-restrizzjonijiet fil-Bulgarija u r-Rumanija ser tikkontribwixxi biex jiżdied il-livell ta' sigurtà fiż-żona Schengen u biex il-ġlieda kontra l-kriminalità serja u t-terroriżmu ssir aktar effettiva.

(6)

Huwa xieraq li tiġi stabbilita d-data minn meta jenħtieġ li jitneħħew ir-restrizzjonijiet imsemmija hawn fuq fir-rigward tal-acquis ta' Schengen relatati mas-SIS. L-Artikolu 25 tal-Konvenzjoni li timplimenta l-Ftehim ta' Schengen tal-14 ta' Ġunju 1985 bejn il-Gvernijiet tal-Istati tal-Unjoni Ekonomika tal-Benelux, ir-Repubblika Federali tal-Ġermanja u r-Repubblika Franċiża dwar it-tneħħija gradwali tal-kontrolli fil-fruntieri komuni tagħhom (5) (“il-Konvenzjoni ta' Schengen”) dwar konsultazzjonijiet għal permessi ta' residenza u twissijiet għall-finijiet taċ-ċaħda tad-dħul jenħtieġ li japplika mill-istess data.

(7)

Din id-Deċiżjoni hija mingħajr preġudizzju għat-tneħħija tal-kontrolli fil-fruntieri interni tal-Istati Membri kkonċernati li jenħtieġ li jkunu soġġetti għal deċiżjoni separata tal-Kunsill li trid tiġi adottata b'unanimità skont l-Artikolu 4(2) tal-Att ta' Adeżjoni tal-2005.

(8)

Peress li l-verifika f'konformità mal-proċeduri applikabbli ta' evalwazzjoni ta' Schengen li jikkonċernaw il-Bulgarija u r-Rumanija diġà tlestiet f'konformità mal-Artikolu 4(2) tal-Att tal-Adeżjoni tal-2005, il-verifika skont il-punt (b) tal-Artikolu 1(1) tar-Regolament tal-Kunsill (UE) Nru 1053/2013 (6) mhux ser issir fir-rigward ta' dawk l-Istati Membri. Madankollu, wara l-adozzjoni ta' din id-Deċiżjoni, it-tneħħija tar-restrizzjonijiet li għad fadal fuq l-użu tas-SIS jenħtieġ li tidħol fis-seħħ fl-1 ta' Awwissu 2018.

(9)

Fir-rigward tal-Iżlanda u n-Norveġja, din id-Deċiżjoni tikkostitwixxi żvilupp tad-dispożizzjonijiet tal-acquis ta' Schengen fis-sens tal-Ftehim konkluż mill-Kunsill tal-Unjoni Ewropea u r-Repubblika tal-Iżlanda u r-Renju tan-Norveġja dwar l-assoċjazzjoni ta' dawn tal-aħħar mal-implimentazzjoni, l-applikazzjoni u l-iżvilupp tal-acquis ta' Schengen (7) li jaqgħu fil-qasam imsemmi fil-punt G tal-Artikolu 1 tad-Deċiżjoni tal-Kunsill 1999/437/KE (8).

(10)

Fir-rigward tal-Iżvizzera, din id-Deċiżjoni tikkostitwixxi żvilupp tad-dispożizzjonijiet tal-acquis ta' Schengen fis-sens tal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta' Schengen (9) li jaqgħu fil-qasam imsemmi fil-punt G tal-Artikolu 1 tad-Deċiżjoni 1999/437/KE flimkien mal-Artikolu 3 tad-Deċiżjoni tal-Kunsill 2008/146/KE (10).

(11)

Fir-rigward tal-Liechtenstein, din id-Deċiżjoni tikkostitwixxi żvilupp tad-dispożizzjonijiet tal-acquis ta' Schengen fis-sens tal-Protokoll bejn l-Unjoni Ewropea, il-Komunità Ewropea, il-Konfederazzjoni Żvizzera u l-Prinċipat ta' Liechtenstein dwar l-adeżjoni tal-Prinċipat ta' Liechtenstein mal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta' Schengen (11) li jaqgħu fil-qasam imsemmi fil-punt G tal-Artikolu 1 tad-Deċiżjoni 1999/437/KE flimkien mal-Artikolu 3 tad-Deċiżjoni tal-Kunsill 2011/350/UE (12),